【龔成問答信箱】（Q21201-Q21220）

Q21201：

你好龔Sir , 上完你堂就計一計吉利(175)既估值，麻煩睇下我做成點呀

因汽車界近來有著革命性的改變, 所以只用近5年的數據
主要競爭公司 2016-2020年PE raio

(因比亞迪完全是一間電動車公司而且市盈率太極端所以不用來比較)

以下數據按大小排

吉利(175)8.551 12.58 13.87 14.41 26.97
長城(2333)6.676 7.178 8.777 8.812 11.11
廣汽(2238) 4.22 6.802 8.584 9.454 10.19
北京汽車(1958) 6.236 7.766 8.495 9.402 12.14
(因2018年一次性PE大升,其後回復正常, 所以不用2018年改用2015年)

用你課堂教的調整，再綜合分析，推算行業平均市盈率 : 8.5815 - 10.5195

吉利(175)市值大, 業務規模比其他同業大, 值得調整，大約調整50%。經調整後吉利合理市盈率 : 12.87 - 15.78

吉利5年平均每股盈利 : (0.64 + 1.4 + 1.58 + 1 + 0.61)/5 = 1.046

大行預期2021年每股盈利為 : 0.94

因吉利積極發展電動車品牌及推出新車, 但同樣銷量亦受疫情及芯片短缺帶來一點拖累

所以先假設每股代表盈利是5年的平均數1.046
所以吉利的合理估值為 : 13.46 - 16.51

請問咁計同你計出黎既差得遠嗎? 你計出黎又係幾多呢? 謝謝

龔成老師︰

首先，北京汽車(1958)2018年市盈率大升，並唔係一些會計因素，純粹係當年不少汽車股被炒起。

因為價格大升，所以市盈率就被大幅抽高。將來都有機會出現這種情況，故你都應把這年，計算在內。

吉利(0175)本身的質素不差，擁有一定的銷售網絡及品牌，不錯的市場策略及定位。

佢早前杭州灣新工廠正式發布純電動新品牌新車「極氪（ＺＥＥＫＲ）００１」，宣布吉利進軍高端電動車。

這些因素，都值得給予吉利較高評價。加上佢近年加大新能車部份發展，預期會令增長力增加，故市盈率可以比以往，再調升少少，大約17-22倍。

合理估計，你可再上調多D，會較為合理。

其實，你已掌握了估值的方向，你最重要在計算後，明白這計算背後的基礎，當中是考慮了那些環境情況。

有時我在估值時，會同時計幾個情境，例如好景時的EPS會怎樣，如果差的情況估值又會怎樣，去得到更立體的答案。

另外，你要多做練習，為不同企業進行估值，這樣才會更掌握當中的技巧。

------------------------------------------------

Q21202：

龔老師您好，想問下中國鐵建，長遠和短期投資可以嗎，現時pe2-3，點解佢賺到錢，又有股息，但係格價咁低？

龔成老師：

中國鐵建（1186）業務以鐵路及交通相關工程為主，包括高原鐵路、高速鐵路、高速公路、橋樑、隧道和城市軌道交通工程設計及建設。

業務地區包括中國，以及中國以外地區，工程承包業務是這企業的核心業務，例如基礎設施建設，鐵路、公路等。

這企業的發展不過不失，但增長力及賺錢能力都比過往有所減少，從一些財務數據，例如資產回報率、股本回報率、EBITDA利潤率等，都見到這企業的長期財務數據有轉弱情況，反映企業現時每個項目的賺錢能力，不及過往年代，企業質素因而下跌，而市場估值都會因此而減少。

這股的整體質素算是中等，發展力比過往有所減弱，這類股不是不可投資，但就不值得投資太多資金。

至於市盈率較低，並不一定代表吸引的。

第一，每一間企業，每一個行業，都會有其合理的市盈率，雖然數字愈低一般代表愈便宜，但在實質操作時，先要了解每個行業及企業自身的情況。

第二，當一個行業、一間企業的發展前景不及過往年代，賺錢能力減弱，市場就有可能將其合理市盈率的估值調低，投資者要小心解讀數字背後的意思。

第三，近年一帶一路的發展力，並不及之前所預期，部分國家的工程都減少了，這企業的長遠生意都會因此受影響，同時每項工程的賺錢能力都有可能因此而受壓。

第四，當投資者分析企業時，要了解生意的持續性，例如一些從事零售行業、飲食行業，只要大環境無太大變化，生意往往會持續。但若然企業從事工程，投資者就要了解生意持續性的因素，若果一個國家該類建議最大規模發展的時期已過，企業生意可持續發展能力就會轉弱。

在中國鐵路最大規模建設時期已過，以及一帶一路國家對中國興建鐵路的需求，未必及預期的情況下，這企業自然受影響。

若投資者見到這企業長期的市盈率，經常都處於很低的水平，反映市場認為這企業面對上述因素，只是值這個市盈率，因此，並不代表特別便宜（情況與內銀股一樣，長期低市盈率背後是有原因的）。

------------------------------------------------

Q21203：

你好，想問下你有冇長線投資邊隻美股或者ETF？知道你長線投資1211，覺得你好有毅力，

想問下如果我長線投資arkk / arkf好吾好呢？另外你還睇好邊隻港股可以長期持有呢？thanks

龔成老師︰

其實你只要明白，真正最好架財富增值方法，就係長線持有優質股這個道理，你都可以做得到。

美股和ETF，我自已無投資，我都係自行選股，好似比亞迪(1211)、小米(1810)等。

美股我自已無特別研究，所以這些股票比唔倒太多具體建議比你。

但初步睇佢地都有質素和潛力，但你預佢地波動性會較大，緊記投資持要控制注碼。

而港股方面，都有不少優質股，值得長線持有。若你係年青至中年人士，以下股票都適合。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、領展(0823)

潛力股︰安碩恒生科技(3067)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）。

但你要留意翻，部份潛力股已有輕微過熱情況。只有安碩恒生科技(3067)、ＧＸ中國電車基金（2845）、 阿里（9988）、中生製藥（1177）、福壽園(1448)勉強算在合理區頂部，可分注入貨，其餘要等等。

------------------------------------------------

Q21204：

龔sir，你好👋🏻本人30歲，是全職媽咪，現持有以下組合嘅股票：

1. 01093石藥 （平均價$9.56）持有12800股

2. 2342京信通信 （平均價$2.612），持有16000股，現價跌到兩蚊，請問應唔應該再購入？

3. 941中移動（平均價:44.85 ） ，持有1500股

4. 939建行（平均價$6.41 ）持有4253股

請問這些股票是否都是有質素？除了建行外，其他另外三隻都打算長渣，是
否可行？謝謝你抽空解答

龔成老師︰

你以上持股，都係有質素，全部都係可以長線持有。

但選股組合上，京信通信(2342)質素未算好高，唔建議再加注。

現時你除左石藥(1093)外，其餘幾隻增長力都唔高。若果你個人投資取態係較保守，咁都可以。否則，你就你加入多少少有增長力股票，去提升財富增長速度。

另外，有一個較大問題，係你好偏重左係石藥(1093)身上，佔組合比重很高。任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於3成，而單一企業不要高過15%。

長期你需要建立一個更平衡架組合，唔好太集中係幾隻股票。

------------------------------------------------

Q21205：

你好，龔sir 小妹今年28歲，月儲一萬左右，想係30歲前有100-130萬，有可能嗎？現時持股如下
(坐艇中）！！！

匯豐2000股@70元
騰訊100股@662元
美團300股@330元

小米400股@32.7元
安碩恒生科技600股@20.58元
21世紀教育33000股@1.38元
易鑫集團500股(新股上市抽中的）

另外有大約價值6萬港幣的美股(哈，終於系正數😅唔洗負數負到懷疑人生）和30萬左右現金！

龔sir,請問有機會達成目標嗎？有無邊d股票應增加或減持？希望你比小小意見我，多謝解答。

btw報左你股票班，因為你太神秘關係，好想揭開你的面紗！

龔成老師︰

其實你唔好太著重係股價上，帳面賺定蝕，從來都不是持有一隻股票與否的因素。

關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

假設回報10%計(連股息再投資)，你每月投資$10000 + 現有資產約值65萬，2年內增值至100萬，計算上係可以。

但由於2年唔係一個長的時間，就算優質股也有機會出現波動，影響到你最終回報，你要明白有這個風險。

先講你現有持股，都有質素。

但匯控(0005)只係收息股，唔會有太高增長力，唔適合你。

易鑫集團（2858）、21世紀教育(1598)質素中等，而美團(3690)有質素，但不確定性較高，都不宜持有太多。

你現時28歲，較適合用"平穏增長股" + "潛力股"的組合。每月用5成儲蓄，去做月供，其餘先儲起，用一邊月供一邊儲蓄的策略。

現時大市只係合理水平，現金和股票最好各佔一半。餘下30萬和每月儲蓄，就等大跌市出現，才加大力度掃貨。

股票班見!

------------------------------------------------

Q21206：

Hello!請問龔sir你覺得比亞迪電子285 現價可以入嗎？其實我都有啲睇好佢，但知道佢，依家呢個價唔平，要落返去20-30蚊都幾難下！謝謝

同埋阿sir 我想問你依家手上有咩股票同平均咩價位入？

龔成老師︰

比亞迪電子（0285）質素不差的，有潛力。睇佢過往發展都正面，有技術，而前景都唔錯。

考慮到近期的增長，$40左右算係佢合理區頂部，現價略貴。要等回翻才好分注，或者可用月供去儲貨。

至於我的持貨，講其中幾隻啦，比亞迪（1211）、小米（1810）、中生（1177）。

現時比亞迪較貴，唔好考慮住，而小米同中生，算是合理區頂至略貴。相信這3隻股，都會好長線持有。

------------------------------------------------

Q21207：

龔sir,你好！本人45歲，已婚有2個子女讀中學，夫妻有穩定工作及收入共6萬元。

我上年12月在FB follow 你，除了睇完百萬富翁系列書籍，也買齊你的聖經及50系列的書，
真是獲益良多。

今年1月開始月供1萬股票，包括2800＄3000, 1810＄1500, 9988＄1500, 66＄1500, 823＄1500
及1928＄1000。

現手持有股票：
1手2382＄175入, 1手9988＄222入, 6手3067＄17.15入, 1手981＄24.5入, 1手2018＄43入

1）有10萬資金想在跌市時再買入上述持有的股票，還是買入月供的股票，哪個會比較好？

2）以上股票分布會否太散太多？有否集中某類型？

3）2018及981仍可持有，還是賣出轉換1928或其他會比較好？

懇請龔sir指教分析，謝謝。

龔成老師︰

先多謝你支持，你可以先睇"80後百萬富翁"、"財務自由行"和"股票勝經"，由淺入深，咁會較好。

1) 其實2者都可以，除了中芯(0981)較一般，唔建議加注之外。

同時間，你入市架時候，唔好太偏重新經濟股，都要加入部份舊經濟股，令組合更平衡。

2) 不算太散，但有少少偏重天係新經濟類別，會令組合波動性偏高。

3) 瑞聲科技（2018）不差的，本身有一定的規模與技術，長遠發展正面，不過，佢增長力不是好強，只能視為平穩增長類別，你可以長線持有。

中芯國際（0981）業務有增長力，但未必能稱為好優質的股。

睇翻佢過往的業務情況，雖然仍每年的生意都有增長，但盈利就有波動，反映雖然大環境的市場在增長中，但佢的成本與售價，就未必在佢掌握的範圍，最後造成盈利波動的結果。

雖然這股都有前景，但以佢面對的情況，但好難將佢定義為最優質的股票。加上之前熱炒過，股價大上大落，投資要注意風險。現貨1手可持有，但唔建議你再加注了。

------------------------------------------------

Q21208：

龔成老師你好，我今年32歲，其實我已經接觸股票超過十年，在最近開始留意你的fb才發現原來我一直都買錯哂/亂咁買，有一種一言驚醒夢中人的感覺

我已經買了股票勝經，希望重新開始真正學習如何買股票，非常感謝你無私的分享

我現時持有以下股票：

267 - 1000股 @15.48
388 - 100股 @297
745 - 12500股 @2
1733 - 60000股 @0.5

1776 - 1000股 @24.65
1816 - 5000股 @3.71
2382 - 100股 @176
6886 - 200股 @24.8

我知道大部分蟹貨應該賣出，其實我深知積存蟹貨的原因是我買股票後就好少留意股價，到想起來時先發現原來跌咗好多

加上我不知道應該幾時賣出才好，感覺過去十年的時間及金錢都浪費了。

看了老師你的分享後，我才知道月供股票，覺得頗適合我這種很少留意股價，但又想獲得合理投資回報的人，希望老師有時間的話可以對我的投資組合給予寶貴意見。

萬分感激龔成老師，謝謝!

龔成老師︰

你想先更正你一個投資想法，蟹貨與否，唔係一個重點。我地投資最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，賺緊定蝕緊，都要賣。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你今年32歲，建議你先集中做好增值部份。現有持股中，舜宇光學(2382)和港交所(0388)係合適的。

中國國家文化產業(0745)見佢過往有20合一，而且多年出現虧損，好大機會係財技股，建議你盡快沽出。

易大宗(1733)，如果有睇佢的企業年報，就會見到核數師，多年來都有「保留意見」或「不表示意見」，這已經賬目「有古怪」。這類股基本上無投資價值，賣出較好。

中信股份（0267）、廣發証券（1776）、中廣核電力(1816)、ＨＴＳＣ華泰證券（6886）質素一般，唔建議你持有太多。

至於月供適合較初學者原因，唔係因為唔洗成日睇住個價。而係佢可以透過拉平均左個買入成本，令你減少買貴貨架風險，從而長線得到較佳回報。

月供策略上，現在你每月用5成儲蓄，去做月供，其餘先儲起，用一邊月供一邊儲蓄的策略。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

而何時賣出，基本上企業質素一直無變差，你係唔洗賣。除非個市去到好狂熱，如果你現階段無信心判斷大市平貴，你可以用"升一倍、沽一半"架策略。

先收回成本，餘下一半讓佢自行慢慢增值，咁就可以。

書本上，我建議你先睇埋我寫架"80後百萬富翁"、"財務自由行"，咁會較理想。

------------------------------------------------

Q21209：

我爸爸岩岩過身
原本供緊層樓諗住比佢養老
我租左新樓 $12500
但依家舊樓就空左市值300萬左右
我諗緊賣唔賣好
層樓倍升左幾倍
岩岩我公司燉我冬菇
減左20%人工

股票我仲有
比亞迪
盈富
領展
小米
3033
全部小量
想睇下你會點睇

龔成老師︰

每個人都有自住需要，除非間屋已經明顯無乜增值潛力，咁你才考慮沽出。

否則，你可以考慮自已住，可利節省新樓租金，用來投資增值。又或者，放租比人，自己另租地方。大前題係，如果物業依然係有質素，就應留住這個物業。

你現時持有的股票，都係有增長力和質素，適合年青至中年人士。這些股票，你長線持有就可以。

若你將來會再投資恆生科技股ETF，建議你用安碩恒生科技(3067)。

相對南方恒生科技(3033)，佢每年收費和追蹤誤差都較低。但由於幾隻恒生科技ETF都係初上市，追蹤誤差只能作參考。實際誤差未必一樣，你要知道這個風險。

------------------------------------------------

Q21210：

龔sir,你好，又要你幫手解答問題了，想問萬國數據值得持有嗎？我知道都有新意網，2隻長遠黎講邊個好？

新意網又持續上升，萬國數據就蝕錢，但又因為覺得中國發展潛力大

另外亦知道美股亦有呢隻股，那麼大家有什麼分別?見佢低過招股價 想入手，那麼我買美股定港股?唔清楚呢d範疇，謝謝。

龔成老師︰

我地持有邊一隻，唔好太著眼係中短期股價走勢，要用翻佢長線質素去做考量。

新意網集團（1686）主要提供數據中心、設施管理、網上應用及增值服務，系統之安裝及保養服務。

行業長遠發展正面，佢已經做到全港最大，加上行業的需求不斷增長，對佢長遠都有正面影響。佢過往生意與盈利保持增長，財務數據正面。

這股有投資價值，不過現價就唔算平，大約在合理區頂。如投資，小注分注都可。

萬國數據（9698）有質素的。

佢的業務為開發及營運數據中心，根據佢公司提供的資料，佢係全中國最大的運營商網絡中立數據中心服務提供商，市場份額約2成。

現時主要通過GDS上海、GDS北京及其子公司進行該等業務。GDS北京及GDS上海各自持有經營業務所需的互聯網 數據中心牌照。

佢提供託管和管理服務，包括創新和獨特的託管雲價值主張，機房面積為266,260平方米，有一定的規模。

見佢生意有一定的增長，行業前景正面，只是現價唔算平，投資價值都有，但就唔建議太大注。跌翻10%較合理。

2者都有長線投資價值，規模上，萬國數據（9698)會佔優。但此刻值博率，會係新意網集團（1686）較高。

至於，買港股定美股，其實分別唔大。

------------------------------------------------

Q21211：

龔SIR，我想講你知，我上過你股票班，跟咗你兩年之後，認同你套方法係得！

我今年28歲，成功說服家人賣了住了20年的兩房自住物業，目的一部分資金幫老人家做收息作生活費，還了另一物業的樓貸(因自住物業作抵押)

剩下部分讓我倆兄弟(弟弟22歲)投資增長股，目標是5~10年再運用借貸買兩個物業，一個值300多萬的細價樓，一個過千萬的三房物業。

目標投入潛力股的資金約340萬港元，目標組合:舊經濟股1177, 3319, 1830, 新經濟股 2382, 0636, 2845, 9988

340萬本金的組合，若選擇投資以上的股票，應選幾多隻好呢?建議比例如何?我會留意股價睇值博率

龔成老師︰

你所講的組合，都適合用來做財富增值。

但這個組合中有主要係潛力股，佢地雖然有增長潛力，但同時波動風險都唔細，唔建議全部資金盡用在這些股票身上。

我建議你加入一些平穏增長股，同你上述架潛力股，比例上各佔一半，咁會令到個組合更平衡。

大市現處於合理水平，那340萬資金，你可以先用一半，以"分注"形式慢慢入貨。餘下一半就等大跌市機會出現，才大力度掃貨。

由於你現處於"沽空樓市"狀態，股票增長和樓市增幅未必同步。所以，假若股票升幅跑輸樓市，反而會令你日後買樓成本上升。

你可以在投資組合中，加入多少少房產類股票，去盡量平衡翻這個風險。

至於老人家收息部份，就唔好用以上股票，應以一些優質收息股為主。策略上，都係先用一半資金，分注入市，餘下就等機會。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)都可以。

如果你能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

(你可睇下我本《50穩健收息股》當中仲有好多)

------------------------------------------------

Q21212：

老師我想請教，其實我等緊2020居屋結果，搞珠號碼好後，本身以為冇機，但又收到信補料，之後仲收到二次急件要我補料，好似比咗個希望我。

現在有現金100 万，覺得而家係買樓時機，唔買冇機會，目標500万樓下，做9 成，其實冇咩實力。

聽講居屋5、6 月𢵧樓，如果到嗰時先知自己原來冇机先再睇返私樓巿場，會唔會太遲，我已經41，買舊樓驚做唔到長年期，500 樓下變得冇乜選擇，好心急，求意見

龔成老師：

你可以等埋居屋果邊先，我相信私樓未必會一下子上得太快，估計1年內上落都唔會太過多。

如果居屋果邊唔成功，到時就睇私樓（當然，現時你久不久睇下私樓先，都無壞的）。

要留意，你的「供款能力」是最重要的考慮因素，唔好太過勉強，如果這方面不足，就寧願調低目標樓價金額。

------------------------------------------------

Q21213：

你好龔老師 關於上次你既解答 我風險過高，除左買3067，如何可以提升組合平衡性？ 現持有小米及雅迪，但不是月供

小米有1800股，雅迪4000股； 是否建議買短期股？想每個月都增加$4000以上收入，有可能嗎？

龔成老師：

恆生科指（3067）是一個組合，會比單一股票的風險度較低，當然，由於佢持股都是潛力類股票，因此本身都有一定的波動性，你要留意。

小米（1810）絕對有質素，可長線。

至於雅迪控股（1585），都有潛力，不過要留意股價升左好多。

佢主要係中國以「雅迪」品牌從事電動兩輪車（包括電動踏板車及電動自行車）的開發及銷售，亦銷售電動兩輪車用的電池、充電器及其他零部件（包括電機、車架等）。

睇翻過往財務數據，唔差的，生意的確有增長力，潛力度有。不過現價唔算平，因此唔建議持有太多。

另外，不建議你短炒，全部都要長線投資，不要著重每月賺多少，要睇長線。

------------------------------------------------

Q21214：

龔成老師本人30中，有一自住物業育有一子，供樓等家庭開支全一力負擔，每月可尚餘2-3千元。。。

而儲蓄則由老婆負責，現有100手a50，2手電能，2手中國建築，3-4萬現金。應該如何重新分配令財富有長遠的增長保障退休後的生活？

而5-6年後除去支出本人每月可有8-10k的餘額，50％作月供股票50％用作儲蓄流動資金合適嗎？而40歲才由零開始理財會否太遲？

本人明白財富增值非一朝一夕的事，但人總有貪婪的一面，會引發一些錯誤的想法，所以唔知醜咁希望龔成老師指教一下以滅絕那錯誤的想法！

另外想問問老師的投資初階班學費是多少

龔成老師，我媽媽遲下會退休，強積金大約有50萬左右，我應該以咩比例分配係收息股同平穩增長股，而到左退休年齡可以投資少少係潛力股嗎？

龔成老師：

你現時現金其實不足，以一個家庭來說，加上要供樓，如果只有$4萬現金並不足夠，最好去到$7萬-$10萬作備用現金，餘下的才投資，這會較好。

另外，A50中國可長線的，但要留意，雖然這是組合，但都不能過度集中，宜同時投資其他股，如果不懂選股，就考慮其他ETF。至於電能（0006）及中國建築（3311），質素是有的，但增長力不強，收息為主，以3X歲來說，算是較保守，因此，日後可增持一些有基本增長力的股票。

至於你自己要5-6年後除去支出本人每月可有8-10k的餘額，50％作月供股票50％用作儲蓄，最好當然盡快啟動這計劃，但如果無計，就等5年後啟動，40歲，有心都唔怕遲。

現時你每月可儲$2-3000，都可以盡力投資，月供股票都得。

當然，希望你在收入上更進一步，想想長遠增加收入方法，對你會更有用。

至於你媽，潛力股就唔太建議，如果佢真的好想，就1、2成好了。

佢你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

股票班共8堂，暫時優惠價：$8800。

------------------------------------------------

Q21215：

龔成老師你好，我40歲，睇左你FB 一段時間，另外都購買左你先前的網上課程，有得益。希望你能指導下。麻煩曬，長文

因為以前父母系股票輸左好多錢，多年前讀 U 就開始兼職賺錢供父母層樓，也一直都抗拒進入股票投資。
但幾年前開始有剩餘錢就學人抽下新股或短炒賺餐晏仔。

現時還繼續持有幾個蝕本股
3883，1916, 8511, 8313, 6886, 1932, 1227(呢個是父親的)

想問下應該蝕住放甘點？

另外上月開始月供3067, 暫時每月7000
還有1833, 6060, 386, 1786, 1299(都是2至3手)

成40歲最近我被裁，有筆20萬長期服務金。請問應該投資股票定放系供樓的高息戶口等跌市？

我同先生目前有2層樓，一層租萬5(月供5千到2016完), 一層自住(月供2萬8). 另外有150萬現金，股票40萬。我同先生月入8萬(我被裁前人工4萬), 但要供養4大長老同個女，經常性使費都大。

龔成老師：

首先你要明白一個概念，我地持有一隻股票與否，關鍵位是企業質素、前景，不要被買入價影響。買為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

中國奧園（3883）有質素可持有。
江西銀行（1916）質素一般，增長力不強，宜減持。
ZC TECH GP（8511）無乜質素，賣出較好。
杰地集團（8313）無乜質素，賣出較好。
ＨＴＳＣ（質素中等），可守住先，但增長力不強。
中漆集團（1932）質素一般，增長力不強，宜減持。
國盛投資（1227）無乜質素，賣出較好。

至於你「上月開始月供3067, 暫時每月7000
還有1833, 6060, 386, 1786, 1299」

基本上無問題，只是鐵建裝備（1786）質素不太好，宜賣出。

由於你現時有一定的物業資產，反而股票部分很少，因此應增加股票比例。

你$20萬應投資股市，但你投資知識與經驗不多，暫時只建議你月供股票，以及投資平穩增長股。盈富（2800）、港鐵（0066）、領展（0823）都可以。

你可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q21216：

龔sir，有啲野想請教下你
月供基金,我應該要留意啲咩

龔成老師：

首先，要睇翻該基金的投資範疇，投資策略，因為基金有好多種的，你要了解該基金投資的資產類別，是否你睇好的，長遠向好的。

另外，過往回報是否理想，比起大市時否較好或較差。

當確認有質素後，就可以投資，月供是一個方法。如果該基金不是在交易所上市，你就要睇翻有那些條款，會否要求你最少持有幾多年。

------------------------------------------------

Q21217：

老師好！本人50歲持有股票。

公用股：0003 6823 6.51%
REITS：0823 10.96%
醫藥：1177 4.23%
潛力金融：0388 15.54%
石油：0386 1.24%
家電：6690 2%

保險：2318 7.13%
電動車：0175 1211 21.38%
內銀：0939 1398 3988 21.38%
新資訊科技：9888 1.98%

另外以下基金：已供占10.81%
2800 月供$6000
3188 月供$4000

計劃每月買一手3033
已買了一手2845

1. 以上組合是否太亂？有什麼需要加減？
2. 想每月買入一手3069 3109？有咩意見？
3. 手上還有60萬現金，等機會？
多謝

龔成老師︰

1） 都有少少，最好組合數量維持係8-10隻，咁會較理想。

持股方面，都有質素，可長線持有。但你比重上，太偏係潛力股類（1177, 0388, 0175, 1211, 9888）。

佢地雖然有增長潛力，同時風險都較高，不宜持有過多。以你50歲計，潛力股佔組合20%左右好了。

現貨可持有，但未來時間，你要加大翻平穏增長股部份，慢慢令個組合平衡翻。

平穏增長股：金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建（1038）

月供方面，同樣要作出調節。而你想投資恆生科技股ETF，我建議用安碩恒生科技（3067），佢費用成本會較低。

2） 華夏恒生生科（3069）主要係追蹤恒生香港上市生物科技指數之表現。

指數包含51隻成份股，當中有「藥品」、「⽣物技術」等公司。較為人熟識的，有藥明生物（2269）、京東健康（6618）、中生（1177）等等。

隨著人口老化和人均收入增加，對優質醫藥的需求只會有增無減。此股都有質素，可作長線投資。但你預佢會較波動，最好用月供模式儲貨，並長線持有會較好。

南方科創板５０（3109）都有投資價值，但成交比較少，會有機會買賣差價偏高。

但你要留意，這2隻都算係潛力型股票，以你年紀，不宜持有太多。

3） 現時大市只係合理水平，現金和股票最好各佔一半。若你持股總值已超過60萬，有手現金就最好等大跌市出現，才加大力度掃貨。

------------------------------------------------

Q21218：

你好，老師
35歲，家庭月入約6萬
每月儲到2萬
2小朋友讀緊幼稚園

持有以下，希望可以盡快儲到200萬作首期，買多層樓收租。不過，我都唔係好清楚當有200萬時，應該購樓收租，還是繼續投資股票？

農行：10萬股$3.38
建行：17000股$6.58
交行：10000股$4.9

9988 阿里：300股$463
快手：200股$402
中移動：1000股$53.8

總成本：70萬

另外可動用多50萬投資股票，請問投資方案應該係點？謝謝你

龔成老師︰

我地做財富增值，係要建立一個有不同優質資產的組合，除了股票，物業都係其中之一。

以你現時情況，由於現時資金較少，應先利用優質股去增值一筆財富，再買入物業。但同時間，必需留有一定數量的股票，作增值之用。

而這物業可以放租，用「以租養樓」架模式去運作。較詳細方法，你可以睇我本<5年買樓4步曲>。

你現時持股，主要有2大問題。首先，農行（1288）、建行（0939）、交行（3288）和中移動（0941）只係收息股，增長力好一般，不宜用來增值之用。

另外，你組合好集中係銀行股。記住，個別行業唔好佔組合3成以上，否則會有過度集中風險。

我建議你用「平穏增長股」 + 「潛力股」作組合，你可以慢慢將部份收息股，換至以下股票。

現在你每月5成儲蓄，去做月供，其餘先儲起，用一邊月供一邊儲蓄的策略。

大市現處於合理水平，那50萬資金和每月儲蓄，就等大跌市機會出現，才大力度掃貨，並長線投資。

------------------------------------------------

Q21219：

Hi 龔sir你好
我今年35歲 穩定職業
想每月供$5000落金沙、阿里、小米或比亞迪
是但兩隻可以嗎？
邊隻會前景好d?

龔成老師︰

4隻股票都係有質素，但我地做配置時候，都要考慮平貴、年紀等因素，去決定成個組合。

以你35歲計，建議你用「平穏增長股」 + 「潛力股」的組合，比例大約各一半。

現時比亞迪（1211）略貴，回到$120才可以月供。

金沙（1928）係「平穏增長股」，而另外阿里（9988）和小米（1810）係「潛力股」，你可以在當中2選1，去創建你月供組合。

現時大市只在合理區，每月儲蓄不要盡用。你要留有部份，等大跌市機會出現時，用來掃貨。

------------------------------------------------

Q21220：

龔sir,你好，我今年大約35歲，現有股票如下：

788@6000股 買入$1.16
1810@1400股 買入$24.59
1922@8000股 買入$5.1

2031@2000股 買入$16.63
3067@400股 買入$17.11
3718@12000股 買入$1.28

1）想問現有股票會唔會太多？同埋有無長遠投資價值？
2）1922，2031，3718可以長遠持有嗎？
3）想問下京東健康，阿里健康同平安好醫生嘅分別？邊個比較有投資價值？同埋長遠發展
邊個比較理想？有月供價值嗎？
謝謝

龔成老師︰

1） + 2） 數量上，唔算太多，長線維持8-10隻就可以。

持股方面，銀城生活服務（1922）上市時間唔算長，不確定性較大。而澳至尊（2031）質素只係好一般，2隻都不宜持有太多。

其餘都有質素，可長線持有。

3） 京東健康（6618）、平安好醫生（1833）和阿里健康（0241）都係有質素和潛力，業務上都非常相近。

但問題係佢地是有危有機的類別，雖然業務增長好快，但這刻仍處於燒銀紙的狀態中。估值上好困難，因為無實質的盈利數據作為基礎，市場只是估估下。

質素和值博率計，平安好醫生（1833）會較為佔優。但始終有一定不確定性，因此，低風險者未必適合投資，若投資者考慮這股，亦不能大注投資，買入後就耐心長線持有，等待這企業改變整個行業的情況。

現價算合理區頂，但好波動。你可以用月供儲貨，如直接買入，就只能小注。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q20421-Q20440）

Q20421：

老師，我想請教下，一間冇盈利既公司，例如（1833）佢點解可以令到股價高上，而投資者又願意買呢隻股票？

龔成老師：

因為市場集中在佢將來的價值。

在企業估值的方法，不少都會考慮到將來的情況，例如現金流折現法，就是計算將來現金流，變成現在價值的總加。

這並不是考慮最近1年，而是1年、2年、3年，一直考慮。

就算企業這刻的現金流較少，只要將來的現金流較強，都會有一定的價值。

當然，愈是將來的現金流，不確定性愈高，就會令股價波動愈大。

------------------------------------------------

Q20422：

老師，自從睇左你嘅書（但未睇哂），我開始每月儲錢，而家28歲，月入20k，每月儲到8,000-10,000，而家儲左50k. 我有以下2個大方向想請教：

1. Hkd 5, 000供股＋買增值股，暫時打算hkd 2,500係盈富(2800)，hkd 2,500係比亞迪（1211），再每月買1手etf(3067)

2. 月供4000落儲蓄保險，（之後第2年開始年年派20,000），每月買1手3067，之後佢每年派息先再買股票。

真係多謝老師，如果唔係你嘅書，我好肯定我唔會每個月儲到8000-10000

龔成老師：

太好了！你已經踏上了正確的理財之路，保持知識與財富增長！

28歲，如果你可承受風險，可選（1），而（2）會較保守的（當然，如果你本身好怕風險，就（2））。

不過（1）的方案，現時比亞迪（1211）貴，建議你供其他，盈富（2800）+2845+3067都得，這個組合會較穩健。

GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），中國因為能源問題，長遠一定要發展電動車，這是大方向，故此股有一定投資價值。

由於近期不少車股被炒起，此股現價略貴。無貨可以現時入少少，到有明顯回調才再慢慢加注。

潛力度是有的，但會比較波動，如投資宜慢慢分注，可長線。

------------------------------------------------

Q20423：

老師，弱弱一問我用富途牛牛投資如果想買收息股佢會點派息？

同埋3738（阜博集團）值得投資有潛質嗎？
thanks

龔成老師：

當你買入某股後，就要睇翻該股有無息派，以及除淨日幾時，這是一個介定有無息收的日子，如果這日或之後先買，就無法收該次的股息。

如果確定你有息後，就會在派息日派息，一般都是現金的，會直入你戶口，除非佢有「以股代息」，你就有權同佢講要股（但可能要你主動提出）。

阜博集團（3738）是較高風險類。

業務是線上視頻內容保護服務供應商，客戶包括七大全球電影公司、電視網絡公司及其他內容擁有者。

過往一直虧損，近年開始有錢賺，業務增長加快，不過，本身的獨特性不是好強，規模未算好大，因此，未見佢有好確定的優勢。

潛力度有的，不過就存有較有不確定性，這類股只適合小注投資。

------------------------------------------------

Q20424：

請教下：
27.4入左1818
7.7入左1448
長線投資，可以？

龔成老師：

招金礦業（1818）不過不失，佢主要從事勘探、開採及銷售黃金。

本身的資源有一定的價值，但盈利始終受國際黃金價格影響，因此本質上會較為被動，無乜價格自主能力，同時產品無差異性，是典型的商品企業。這類企業都有一定的投資價值，但就不會太高。

股價很大程度與黃金掛勾，由於人類對資源的渴求在長期不會停止，而資源是有限的，所以，長遠都會有上升的潛力，但中短期就會波動。

近期受惠於金價上升，此股升了不少，市盈率去較高水平，唔平。

此股唔係無質素，但只屬中等，不建議持有太多。

福壽園（1448）有質素有發展力。你可長線。

佢係中國最大的殯儀企業，有一定的規模，而針對的是高端市場，服務有一定的質素，擁品牌及知名度，有相當的賺錢能力，財務穩健負債少，因此企業本質不錯。
由於行業處增長的市場，而新競爭者要入行不易，因此對原有企業有利，故福壽園是優質的企業。

佢憑著本身的優勢，能取得比同業更好的回報，而福壽園管理層表明會持續擴展，策略上會透過併購同業及買墓園去擴充。

由於福壽園的模式成功，因此只要投入資金去發展，複製過往的成功，已經能取得理想的再投資回報率，長期來說此股有一定的增長潛力。

不過，由於此股業務好獨特，因此業務情況在年報上或資料上，未必能完全反映，雖然數據及資料上都顯示此股有質素，但往往要時間證實。

至於企當估值方面，市場對此股的評價亦不低，企業經常處略貴水平，$7是合理區頂，不能太過進取，以分注小注投資是一個策略。

管理層的野心很大，投資後不要升少少就快，要耐心持有，等長期更大的收成。

你有貨可持有，無問題，但就不要太急去加注。

------------------------------------------------

Q20425：

老師你好，我今年42歲，現時財政狀況如下：
本人及先生月入：$60000
年尾花紅：$10-12萬
樓按揭：餘12萬（快供完）
現金：45萬

MPF: 70萬，高風險為主
儲蓄保險：8年前實供9萬，現值12萬，擺多10年會收番20萬（唔知應否提早取出？）

自己人壽儲蓄：$6萬/年，尚要比多2年
自己危疾儲蓄：$1萬/年，比多10年
先生人壽儲蓄：$3萬/年，比多5年
股票：只有1000股匯豐，平均約58入，每月月供股票$4000

本人想財富增值，日後早少少退休，想請問：

1. 月供股價應否轉為2800？
2. 儲蓄保險應否提早取出？今年11月可取回12萬
2. 應該如何投資，可令財富穩定增值？

謝謝你的回覆

龔成老師︰

1） 匯控（0005）主要用來收息，增長能力好一般。建議你轉做盈富（2800），增值能力會較好。至於現有持股，由於唔算多，持有住都可以。

2） 其實"保險"只係理財中防守部份，買足夠保障就可以，增值應留比優質資產（如優質股、物業等）去做。但由於你們保單都就供完，甚至已供完，故唔建議去做變動。

3） 現時你成個資產組合中，股票比例明顯太少。建議你用"平穏增長股" + "潛力股"作組合，去創造一個增值平台。分配上，應用"平穏增長股"作為主力，再加一些"潛力股"。

現在你每月5成儲蓄，去做月供，其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、希慎（0014）、太古地產（1972）或潛力股︰中生（1177）、福壽園（1448）、安碩恒生科技（3067）、港交所（0388）、阿里（9988）、騰訊（0700）。

現時大市只是合理區，你現有45萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

------------------------------------------------

Q20426：

龔sir，你係成功過程中
點樣調整到蝕左錢個心態

有時蝕左錢就好想即刻追返
心急就亂，亂就好易出事

龔成老師：

我持有比亞迪（1211）12年，多年前由十幾二十蚊，見佢上到$88，其後見佢有$88跌近9成，去翻$12！

比亞迪當時已是我最大持股，由賺變蝕！

我的財富當然大幅貶值，我同自己講，過往的無辦法，最重要是將來，理性分析現時應該持有/加注/賣出，在投資世界，理性是最重要。

我上了一課，經歷財富的大起大跌，心理質素大幅提高。

記住，最重要不是睇「賺蝕」，不是睇「買入價」，而是睇質素。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

------------------------------------------------

Q20427：

男神，我同你報喜
我由2019年12月識你之後
就開始進行月供股票
到目前為止

盈富增值＋16.22%
港鐵增值＋12.18%
中銀增值＋3.47%
金沙增值＋55.16%一手手買
中間有小小炒賣
必瘦站增值＋104.41%
不過中生制藥就－14.85%
都係多謝你先 之前我只會將錢儲定期 一年有1-2萬蚊已經十分開心

而家唔止增值1-2萬蚊
真係好開心

您真係致富明燈
任勞任怨帶領大家財富自由 你真係超級無敵靚仔兼大善人
真心多謝你 ！

龔成老師︰

能夠幫到你，咁就好！

緊記月供係一個長線計劃，月供最少維持3年，並持有這些股票5年以上，才會有較理想效果。

當中會有升有跌，但係正常的。只要持股係有質素，中間股價波動係唔洗理，長線持有就得。

另外，唔好短炒，可能一次半次有賺到錢。但我之前做銀行、證券行咁多年，見證大量客短炒全部最終都係蝕錢，只有長線才能有錢賺。

長遠來說，我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

------------------------------------------------

Q20428：

老師，有個情況想問你意見：

當年我媽退休時（我還未接觸股票），被他人說服用退休金買2628，仲要以高位（大約@33）買入共46手。買入後大跌，她也沒有止蝕（因她也不太懂股票）keep住到而家。

想問一下如何處理？（想幫佢好好咁manage一下佢既退休金）

現在賣出轉其他收息股？等回到某一水平才賣？還是keep住唔賣，就咁收息？謝謝

龔成老師︰

其實已退休人士，應集中係"收息股"身上。用佢產出架穏定現金流（即係股息），去支援退休生活開銷。

中國人壽（2628）近年賺錢能力弱左，質素只算中等（不是無質素）。但佢唔係收息股，唔適合你母親，就算持貨都不應太多。

你可以慢慢沽出（唔係一次過，要分段做），再建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）都可以。

如果你能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

現時股價只是合理，未到平宜，因此換碼時宜分注。同時，可保留一部份作現金，等大跌市才動用。

最後，你要留意係創建這個收息組合時，唔好太集中係單一股票上。相同行業不可佔組合多於3成，而單一企業不要高過15%，否則會有過度集中風險。

------------------------------------------------

Q20429：

龔sir，想問平有教我們供股票既意思是否定期一手一手禁買入跟晤同既股價追上?

因為我之前入咗隻莎莎國際1.2 入的～ 這股都用供股形式去分段投資合理價嗎？

因為我之前以為供股個意思係張啲股票同一口價落三成本金跟住借七成 畀你股24個月禁供

這樣是否誤會咗你嘅意思

龔成老師：

我所講的是「月供股票」，要先同銀行登記，簡單來說，就是你每月將現金，買入某一隻或多隻股票，慢慢咁樣儲貨。坊間不少銀行都有提供月供股票服務，你先開證券戶口，然後登記做月供股票。

形式就是每月投入相同的金額，買入同一隻或多隻股票，並持續進行。

例如，每月以相同金額$10,000 買入盈富基金（2800），假設第一個月股價為$25，就能買入400股；第二個月升至$35，就能買入286 股；第三個月跌回$30，就能買入333股。

總結這三個月，投入了的資金為$30,000，累積股票為1019股，平均買入價為$29.4。

由於月供股票每月投入的金額相同，因此當股價上升時，買入的股數自然減少，而當股價下跌時，就自然會買入較多股數，如同自行調節一樣。

如果你不想用上述月供，用「自行分注」都得，例如每1、2個月買入一手。

莎莎（0178）都有質素的，相信最差時期已過，你都可以久唔久入一注，但最近升左上去，又唔值得買入得太密，同時未必值得持有得太過多。你原有貨不持有，但就加注未必要加得太急。

------------------------------------------------

Q20430：

請問6837可以入貨嗎？之前d潛力股都未返到買入價。謝謝你

龔成老師：

海通證券（6837）業務有：證券及期貨經紀、資產管理、自營交易、投資銀行、直接投資、管理本部及其他分部、融資租賃、海外經營分部。

業務主要地是中國，近年的生意不算差，但增長力唔算強，同時盈利略有波動，始終行業都會受投資市場上落因素影響。

現價合理，但你預佢都會有波動風險，長線投資價值都有但不是高增長類。

------------------------------------------------

Q20431：

Hello,想問0175 同3993 前景如何

龔成老師︰

吉利（0175）本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。這不單有利佢有中國發展，同時長遠，可能加快了海外發展速度。

現時價位在合理區頂，甚至有少少貴，股價波動，有貨可長線。最好回少少，或這刻小注等跌再加。

洛陽鉬業（3993）並不是完無質素，但不能說是穩健，佢的營業額同盈利都十分波動，這點令分析佢較困難。因為好難確定到往後經營環境對佢的影響，同埋，佢亦因成本令佢盈利較波動，這同樣是較難預測的。

我地好需要，用過往的數據去分析，同時判斷往後的經營環境，如果過往數據變化太大，會較較分析。

另外，這股的股價較為波動，這股不是不能投資，但不建議大注。

------------------------------------------------

Q20432：

龔成老師你好！ 睇你專頁都有一段長時間，晌上年開始我入市以下股票：

0003-2100股 平均價$13.14
388-8股 平均價$382.65 （之前月供，上到$500後停供）
823-631股 平均價$65.94
1177-3000股 平均價 $9.4
2628-2000股 平均價 $16.42
3328-5000股 平均價 $4.75
8328-4000股 平均價$5.22

每月我大概可儲$14000，當中有$7000月供領展。
2628同3328 ，我打算升番d就平手或賺少少離場。 到時大概有5萬，再加我手上餘錢，合共8萬左右。

我有諗過以下想法，想問下老師的意見？

1/ 8328最近升左好多，請問值得高追1-2手嗎？
2/我睇中1789及3718，請問老師對此兩隻股票意見？
3/ 0003 現價好平，值得現在加注嗎？

謝謝老師

龔成老師︰

1） 信義儲電（8328）都有質素，但盈利上好波動，不宜持有太多，唔建議加注。

2） 愛康醫療（1789），以長遠業務分析，正面的。佢以「愛康」品牌從事設計、開發、生產及銷售骨科植入物，並專注於髖關節及膝關節置換植入物。

睇翻佢的資料，佢的產品包括用於初次手術的骨關節植入物，以及為置換、修復或升級前次手術的植入物或部件的翻修手術而專門設計的骨關節植入物。都是有前景的業務。

這股業務不差，有增長潛力，盈利增長，這反映企業有實際的價值提升。不過，這股經常處於少少貴的水平。現時市盈率達40倍以上，投資時要考慮價格風險。

北控城市資源（3718）有質素的。佢主要在中國從事環境衛生服務；危險廢物處理業務；以及廢棄電器及電子產品處理業務。

環境衛生服務方面，佢的服務涵蓋綜合道路清潔、垃圾分類、垃圾收運、垃圾轉運站管理、公廁管理、糞便收運、綠道養護、河道保潔服務。

同時自2019年起開始，佢有係北京的若干商住區域提供物業管理服務。

過往財務數據不差，有一定的增長力，有長線投資價值。現價大約合理區頂位，不建議這刻太大注。

3） 煤氣（0003）現價係合理區中間，加小注可以。但緊記，個別企業唔好佔組合15%以上，否則會有過度集中風險。

另外，投資記住係用長線持有模式，讓優質股自然咁增值，而唔係做短炒。

現有持股中，中國人壽（2628）質素較中等，不宜持有太多。你可以將部份換至其他優質股，咁會較好。

而交行（3328）主要係收息，若你係年青至中年，由於佢無乜增長力，都唔適合你。

------------------------------------------------

Q20433：

龔成老師您好，本人是來自澳門的一位80後的家庭主婦。最近開始閱讀你的作品，希望從中可以學習到投資的知識，期望你不久的將來可以過來澳門開班。

目前有小小問題想請教一下你，本人大約在6年前自以爲懂投資的情況下，購買了以下股票，購買了之後就一直跌到現在

本人想放售然後入小米，但還是想聽聽龔成老師意見，應該繼續持有，還是怎樣，感謝你的解答

751--10,000股 （成本價$6.6）

1060--60,000股（成本價 $2.78）

1816--20,000股（成本價 $4.5）

龔成老師︰

創維集團（0751）從事電機、智能系統技術業務、智能電器業務等，中國及海外都有市場。

近年增長力唔算強，生意未見有擴展力，盈利有點波動，整體的品牌價值及銷售網絡，未算好強。長遠發展力只是一般。你預佢增長力唔算強，長遠算是不過不失。

如果佢只係佔你組合小部份，持有都可以。

阿里影業（1060），炒作較多，風險高。這企業到現時仍未有盈利，市場只憑佢前景去評估，其實這會有相當的風險，這類股最多只能小注。

中廣核電力（1816）主要從事發電及電力銷售，以及核電項目及非核清潔能源項目的建設、運營及管理。

佢主要於中國從事核能發電業務，包括運營及管理核電站、銷售電力、管理及監督核電站的工程建設，以及向工程公司提供相關技術及維修服務。

這企業發展平穩，但增長力不強，收息可以，但就唔好對股價有太大期望。

現時小米（1810）都有點貴，想換碼入貨，等佢回1成先會較好。

其實我之前都有開過澳門班的，不過現時疫情，所以暫時停左，之後會再開翻的。

你或者可以預早留位，只要whatsapp 852-55457212我同事講，打「留位澳門班」就得。我地有具體資料就會 whatsapp你。

因為現時已有好多澳門人留左位。

------------------------------------------------

Q20434：

希望龔sir可以審視一下我既理財妝況

背景： 26歲，未計雙糧花紅月入20k ，月儲12k,其中7k月供股票，現金儲4-5k

現時現金大約11萬，投資組合現值約32萬

現時月供 2800 - $2000
066. - $2000
788. - $1500
1177. -$1500
手持股票：
2800。2400@$27.3
066。 1100 @$44.2
788. 9750 @ $1.35
1177. 408 @ $7.3
178. 6000@ $2.21
1211. 204 @. $44
1212. 3000@ $8.24
1257. 3000@ $3.45
1928. 800@ $27.83
1972. 1200@ $21
2388. 1020@ $28.2

（1）. 股票組合係咪偏向平穩而唔夠進取？

（2）增持1212會唔會好過增持178？

（3）長遠來說，放走178/2388而換其他增長力較高既股票，得益會唔會更大？

（4）如果公司私有化，對股票持有人會有損失？

（5）. 新經濟股佔比係咪太少？現價太貴而不敢入市

（6） 我將家用交俾家母時，原來她一直都會將一少部分儲起，再若干年後（大約15-20年）送贈給我，
但問題係現金已經不斷貶值，如果我說服家母儲起既現金慢慢入手黃金會唔會更加好？

再次祝福龔sir工作順利！！

龔成老師︰

1） 以你年紀，平穏增長股和潛力股比例，大約各佔一半。所以，你月供配置，係可以。但持股比例，就偏保守。

2） 利福國際（1212）和莎莎（0178）其實都差唔多，大家都受經濟週期和疫情影響。但利福國際（1212）負債較多，風險高少少。

3） 莎莎（0178）都有質素，但近年係弱左，不過不是無質素，只要不過多貨就得。而中銀香港（2388）係有質素，可長線持有。

4） 要睇翻佢私有化個收購價，如果比你買入價低，會有財務上損失。同時，由於你不在持股，你將失去佢升值的得益。

5） 以你年紀計，係偏少，潛力股和平穏增長股各佔一半左右，會較理想。

現時部份新經濟股，有輕微過熱架情況。要若直接入，最好等回翻先好入市，或者用月供去儲貨都可以。

6） 黃金是貴金屬，有「終極貨幣」之稱，是人類自古以來的貨幣，因此，有持有價值，而現時我地的現金，一定長期貶值，所以黃金長期會向上。

不過，黃金沒有現金流，持有無法創造出經濟價值，其主要作用是對沖黑天鵝事件。

所以，你可以投資黃金，但不用佔財富比例太多（<3%），而且持有的應該為實金。其餘最好投放在優質股，增值效果會較理想。

------------------------------------------------

Q20435：

龔sir～ 我係一個大學生最近先開始玩股票～ 依家手持01810 06993 03800

暫時感覺都唔錯 都問下有機會突破嗎？ 同埋都買左 01076 00438 想問下呢兩隻股既睇法～

因為都偏冷門小小，麻煩你

龔成老師︰

我唔知佢中短期會唔會有突破，但只要股票係優質，長線持有佢就會自然增長。

小米（1810）係優質潛力股，可長線持有。

藍月亮（6993）有質素，畢竟係新股，有一定不確定性，唔好持有太多。

保利協鑫能源（3800）質素只是一般。佢主要為光伏行業製造多晶硅及硅片；銷售電力；開發、投資、管理及營運光伏項目。

市場炒緊佢前景，但當中存有不確定性，股價大上大落，佢的確可能會大升，但同樣可以大跌，無得估，這炒作不少，現時值博率不算高，小小注好了。

博華太平洋（1076）主要從事博彩及度假村業務，包括發展北馬里亞納群島聯邦塞班島綜合度假村。

集團生意一直下跌，連年持續虧損。而且，2018和19年核數師意見出現有小問題。

整體而言，此股無投資價值，賣出較好。

彩虹新能源（0438）主要從事太陽能光伏產業業務；生產和銷售發光材料和鋰電池正極材料；太陽能電池元件及其他配件交易。

此股盈利波動，賺錢能力唔高。加上佢負債係一個唔理想架水平，長線我建議你換碼至其他優質股較好。

你在選股能力和經驗上，都未算太理想。我建議你先學好選股和定平貴知識，再慢慢去投資。就算想現在投資，也先集中係一些大路股票，會較穏陣。

你可以睇我寫架"80後百萬富翁"、"財務自由行"和"股票勝經"，會幫助到你。

------------------------------------------------

Q20436：

啊Sir想請問一下我今年37歲。以下組合可以如何優化？太多銀行股同時蝕緊錢。
應止蝕轉其他潛力股嗎？

1. 煤氣x1,000@$16.94
2. 匯豐x400@$76.05
3. 港交所x200@$279.4
4. 騰訊x200@$463.4
5. 領置x200@$59.5
6. 中生製藥x4,000@$8.58
7. 比亞迪x500@$69.8
8. 小米x800@$25.3
9, 舜宇x200@$126.1
10. 中銀香港x500@$26.55
11. 雅生活x250@$37.5
12. 中國銀行x10,000@$4.72
13. 阿里巴巴x100@$176

龔成老師︰

你上述持有的，基本上都是有質素的，問題不算大。而你37歲，可以在當中作一些調整。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

你現時的年齡，應以增值為主。匯豐（0005）、中行（3988）只係收息，無乜增長力，唔適合持有太多。

其餘股票都適合，但你潛力股佔比重佔好高。佢地有增長潛力，但同時波動性都好高，所以最多只可以佔你組合4成左右。未來新資金，可以優先投資平穏增長股，令組合更平衡。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）、領展（0823）。

另外，潛力股可考慮安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

------------------------------------------------

Q20437：

老師，我媽取25萬給我幫佢投資，我既諗法係用最低成本幫佢買入高息股以賺取股息，我睇了以下兩隻：

00808（50手）及03988 （50手），你覺得可以嗎？
謝謝

龔成老師：

上述兩隻都是有質素的股票，收息無問題，現價合理，可投資。

其實，持有2股有少少集中，你可以建立一個收息股的組合，目標是5%、6%的股息率的收息股，可以考慮加入以下股票（在當中選股）：

例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

------------------------------------------------

Q20438：

老師，想問下你意見，（大概18歲時曾經問過風水師，佢話美容行業唔岩我）

賭場我已經做左十幾年，一直無起色，職場上明爭暗鬥令我很累，加上自身性格問題，做得唔開心就轉工

但以家開始年紀大，唔想捱夜，如果35歲先試學做美容，咩都從新頭開始，係咪太遲。

加上美容店都請勞工（有經驗），而我就無經驗，條路好似好難行。

龔成老師：

我從來不信命運，我只會信我自己。

如果你真心想試，就大膽去做，你這年齡仍是可改變的時期，你試完，如果唔得，都可以轉去賭場。

好多野我都唔試，永遠唔知結果的！

你美容從頭開始雖然有點遲，但如果方向正確，過5年後、10年後，仍可以有一翻作為，加油！

------------------------------------------------

Q20439：

老師，當我見我個倉每日跌2%，個心又不安了，究竟要點樣先可以培養到好嘅心態？

龔成老師：

我持有隻比亞迪（1211）已經有12年，試過由$88跌到$12，跌左9成！之後先慢慢上翻。

你要集中分析「企業長遠的價值」，唔好太理會中短期股價，同時，唔好集中一隻股，要建立「組合」。

記住，「企業」是重點，短期股價不是，要平常心，同埋唔短期股價波動，最好練唔好日日睇股價。

------------------------------------------------

Q20440：

老師，我想問中國生物製藥現價算合理嗎？

另外，騰訊的主要收入來自網絡遊戲，風險會否因此比阿里巴巴高？騰訊現時價格是否太高？

希望㰍sir能抽空解答。謝謝！

龔成老師：

中生製藥（1177）是潛力股，人口老化令佢長遠有唔錯的增長，無論是政府投入的行業資源，又或是人民生活質素令可控制資金上升，都令人們更在醫療方面投入更多。

佢已建立一套完整的商業系統，有多個已賺錢的藥品類別，同時毛利高，可以不斷將錢投資在新藥裡，這模式運作很好。

但這類藥物企業，難免有一點風險，因此要久不久檢視，中短問題不用理會，但如果有一些核心性的問題，就要再全面分析。

就這刻來說，這股可以一直持有，因為商業模式理想，高回報，不斷再投資令股東利益快速增長。加上睇翻佢的業績，保持增長，這令企業價值有實際的上升，令股價得以支持。

現價合理區中上部，有貨可持有，分注或月供可以，這股可以長線持有的。

騰訊（0700）與阿里（9988）都有質素的，都可以長線投資，月供適合。騰訊雖然網絡遊戲佔了一定的比重收入，但佢最有價值的，就是「平台」，這亦是現世代好有發展的資產。

我地分析企業時，要思考那些是核心的企業價值。

佢業務模式係提供平台，如通訊平台、交易平台、入門網站、遊戲平台等，而收入來源則是其廷伸的服務，如增值服務、網絡廣告、電子商務交易等。

過往的業績十分理想，又身處高增長的行業，加上擁有重要的資產，即龐大的客戶群，將來發展各業務都有相當的優勢，這都是騰訊值錢的地方。

現價略貴，如投資要明白當中的風險，這刻在注碼上不過份大注，就可以投資這股。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q19741-Q19760）

Q19741：

hello老師你好，想請教你小小問題，關於我同我屋企人既投資組合既。

問題1.最近我同同事有一D爭執，遇到一班刁民同暴徒爭D想出手打架，因為我係咁叫佢地清倉而家好高位，佢地唔肯聽仲不斷短炒，日玩港股夜晚美股。

佢地而家好睇唔起我，而且覺得玩幾個月就草到首期，自己投資仲勁過巴菲特(回報率，話巴菲特都係21%)，佢地話一星期50%係合格，一睇就知班人太年輕。

所以我知道係時候要清小小貨同埋準備定D現金。不過遇到小小問題

投資組合如下

1810小米@12蚊買入2000股，於25蚊放左1000股手上仲有1000股

6160百濟神州@ 152.5買入200股，月頭買左未放，打算持有3~5年直至佢地王牌藥PD-1係全國/全球都廣泛應用

9988阿里@ 282係10月尾螞蟻唔成功上市時買左一手，而家240~250左右。

問題就黎啦~我手上而家貨值around 8.8萬~9.6萬，但係現金係有小小爆，我用耀才比媽展買大左DD，所以手上冇cash

一直好想清左隻9988佢，留番小米同百濟神州，其他keep cash可以係大跌時有錢入市，你意下如何?阿里巴巴係搵一日升市時沽左佢可以嗎?

另外屋企人比左20萬我投資(仲有10萬備用現金)，我之前落堂都有問過你你話唔建議冇貨，上完堂後幫屋企人建左小小倉
如下

1. 1038長江基建@40.35買入-1000股=40350 (而家42-44左右)

2. 6060眾安在線@35.5買入-800股=28000左右 (而家47-50蚊左右)
Total 7萬以內，而家有13萬cash係手準備大跌入市

買1038因為極度穩健，堅持派息同埋管理層反而趁疫情期間，好積極收購世界各地既公司，既可以去拓展業務/享有成本優勢，而且而家買入價好平。

買6060因為今年你見ZA bank係香港地鐵都有好多廣告搞虛擬銀行，保費收入都有按年上升，而且有國家支持係大陸開始有數位化人民幣既保險服務，仲拓展健康生態圈想學阿里健康/平安好醫生咁樣做線上應趁，醫完病就sell保險。

想問而家組合OK?

問題二: 想問下股災黎到既話，應該係買入新既股票，定係加注係現時手上既股票好?因為我真係R爆頭如果真係有大跌既機會，真係唔知買邊一隻會比較有利?

老師介唔介意講下記得你話舊年3月你係唔同價位買小米，平均成本拉到12蚊之外，仲有冇對手上既股票加注? 你會建議加注手上既貨定係買入新股比較好?

問題三: 今年都因為環球印錢多，都係低息環境，有冇話咩行業會比較有利?同埋係咪會有更多潛力股會受惠?

龔成老師：

1）你唔好同人爭論，第一，根本無意思，第二，幫唔到佢地，佢地有佢地的想法，第三，你會被佢地影響情緒，投資好需要「理性」的，第四，唔好估頂，唔好叫人賣晒D股票，無人知個市幾時跌。

你唔需要理會別人，我地只要做好自己就得，這事情多遇過無數次，不用理會，不要浪費自己時間。

我唔建議你減晒所有貨，點都要有基本的貨，無人知股市是否會回落，無人知。最重要是「平衡配置」。

至於你持有的3隻股，都有質素，其實都可以長線。如果可以當然全部持有，但如果一定要賣，其實都難選，你賣阿里（9988）都可以的。

至於你家人，長建（1038）無問題，但眾安（6060）唔建議持有太多，始終資金是你家人，承受風險能力會較低，而這股風險會高少少。小注可以。

2）當股災時，最重要是建立組合，以及買入較有投資值博率的股票。例如某類股跌得最多，值博率最高，而長遠潛在回報最高。

上年疫情初期，當時股市出現恐慌，我主力入3隻，比亞迪（1211）大約$40增持（這股一直都是我最大持股，大部分貨只入不出）。小米（1810），平均價$12。必瘦站（1830），當時應該$2，因為認為佢因疫情打擊，股價跌，較平，但長遠無事。

3）其實最重是分析業務發展，低息可能對有些行業利好，例如地產，但如果本質增長唔強，都唔能夠叫最有利。

------------------------------------------------

Q19742：

龔sir, 請問如何分析一隻股票， 要睇d邊幾方面？ 謝謝

龔成老師：

可以十分多，因為買入股票，原理就是買入一盤生意，一間企業。

要分析企業的業務、生意、盈利、現金流、產品、管理層負債、前景、行業等。同時要進行企業估值、年報分析、財務比率分析。

------------------------------------------------

Q19743：

我齊了龔老師12本書的，已看了50潛力、財務自由行，80後百萬富翁和股票勝經，請問餘下的閱讀次序是建議哪幾本？

以下還未看的：
80後2百萬富翁
80後3百萬富翁
大富翁致富藍圖
50穩健收息
50值博倍升
選股勝經
年報勝經
5年買樓4部曲

期待你4月份出的新書，務必第一時間購買！

龔成老師：

可以，其實最初你睇《80後百萬富翁》、《股票勝經》
《財務自由行》，之後再睇其他就得。

而《年報勝經》則較深，可排最後。《5年買樓4部曲》，則前後次序無所謂。

好！多謝支持！保持進步！

------------------------------------------------

Q19744：

你好
請問1919/3188點睇？

龔成老師：

中遠海控（1919）主要從事提供集裝箱航運、集裝箱碼頭管理與經營服務。

整體的質素算是不過不失，雖然在行業有一定的規模與優勢，但行業整體的賺錢能力無過往咁強。

經濟好轉會對佢有利，因為始終是對經濟較敏感的行業，現時的股價已反映相關利好因素。預佢之後只能平穩增長，未必是高增長類，現價合理。

華夏滬深三百（3188）投資目標為追蹤滬深300指數的表現。

中國企業長遠有增長力，這基金都有投資價值，不過內地股市的特點就是波動性較大，價格上落會較大，因此，建議以慢慢分注或月供的模式投資，買入價長線持有，相信是不差的策略。

------------------------------------------------

Q19745：

龔sir,自從9月上堂後，自己對投資股票嘅信心大左，最近三個月我花左好多時間去研究唔同板塊嘅大約10-15隻股票

但帳面值只係跑贏恆指1-2%，計埋收息仲會跑輸盈富基金，所以我想轉變策略，希望老師幫忙評價一下：

我打算將現時近半資金轉到盈富基金，餘下資金則專注4-5隻潛力股，咁一來收息及增長有基本保障，二來又可以更專注研究個別潛力股

避免因要分散投資而買入不夠熟悉既股票，請問咁做可行嗎？謝謝老師

龔成老師：

第一，學投資是一個好大的課題，你仍要不斷睇年報、用評估表、不斷研究分析企業，先可以有較明顯的回報。

第二，不要用短期的回報，去衡量投資的好與壞，我投資比亞迪（1211）12年，過往回報一直不太高，是近年才變成10倍回報。

你可以將部分資金轉到盈富（2800），餘下部分投資潛力股，可以的。你要慢慢了解自己的實力，之後可以再作出調整。

------------------------------------------------

Q19746：

老師，我剛升職加人工想重新整理下月供組合 由現時月供
2000盈富
2000小米

改成
3000盈富
2000港燈
2000恒生

目標希望有增值及收息平衡發展
定還是應該分3500 盈富 3500恒生？
只供2隻比較好？

龔成老師：

上述都是有質素的股票，都可月供，轉唔轉，好睇你的投資目標，原來的組合會較有增長力。將小米（1810）轉成新組合，就會比較保守，因為新加的兩股都是收息股，增長力有限。

當然，投資收息股無問題的，最重要是「適合」與否，如果你想減少風險，的確可以轉成盈富（2800）$3000、恆生（0011）$2000、港燈（2628）$2000。

------------------------------------------------

Q19747：

龔sir 其實你會建議以股待息還是直接要現金息呢？

龔成老師：

以股代息就是你收息時，唔要現金，要股票。

首先，你一定要長線投資的，因為佢會派碎股比你，所以你最好以不斷儲股，每次都收息的模式進行。如果你不怕有碎股，基本上可以進行的。

第二，只有優質股才可進行。

第三，換股價是否合理，若果現價合理，可以進行。

------------------------------------------------

Q19748：

龔sir，我手上大約有10萬現金可投資中長線股票，不想月供股，請問應該如何選股及分配？

想重新整理好投資計劃，我想在兩年內增值至100萬有機會嗎？謝謝龔sir！

龔成老師：

要兩年將$10萬增值至$100萬，十分難，除非你面對過高的風險去追高回報就有機，但不建議。如果要完成目標，反而建議你在這2年，同時加大儲蓄去投入資金投資。

你可以投資「平穩增值股」+「潛力股」，不過，由於潛力股要求你有一定的投資知識，加上現價唔平，因此這刻不用急著投資，你可以集中在平穩增值股先，潛力股小注好了。

你可以自行分注去入貨，暫時可以將$5萬入後，餘下$5萬留現金。

你可以考慮盈富（2800）。

另外再加1、2隻：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

潛力股可考慮：安碩恒生科技（3067）。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂，因此，這刻不能大注投資。最好的策略，就是月供，或自行分注小注慢慢收貨，原理如同不斷儲貨，這樣就能平均買入價，減少風險。然後就長線持有。

------------------------------------------------

Q19749：

你好老師，請問對吉利汽車有什麼看法？佢最近上得好快，有冇潛力好似比亚迪咁爆上？現價會否太貴？

龔成老師︰

吉利（0175）本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。這不單有利佢有中國發展，同時長遠，可能加快了海外發展速度。

未來電動車將為汽車業帶來很大發展空間，吉利在電動車方面技術都有，但唔算好高，但最近有合作發展，因此長遠正面。但相比比亞迪（1211），這方面優勢未及，故對這部份唔好有過高期望。

現時價位在合理區頂，甚至有少少貴，股價波動，有貨可長線。

------------------------------------------------

Q19750：

龔成老師，我想問下 手持

3399 $4.96 1000
148 $26.4 2500
005 $44 400
1038 $46 500
700 $565 100
1475 $7.4 5000
1810 $24.2 1000
3690 $255 100
9988 $279.4 100

現考慮1475，148 是否換馬
700 ，1810 是否加購
有推薦股票 或 建議

想於年中到年底 吐現入市500 萬左右樓 上車 手持70 萬現金 。月入35000
謝謝

龔成老師︰

你持有股票，大致都有質素。但由於你年中要套現置業，時間唔長。

策略上，應開始慢慢分段沽出持股，去拉平衡個賣出價，去減少個價格波動，影響你回報。

至於新和現有資金，也最多只可做定期，以免因股市波動影響你置業計劃。

你可以留部分較優質的，例如美團（3690）、騰訊（0700）、小米（1810）等，而建滔集團（0148）可考慮賣出（不過這股並非無質素，只是考慮你想買樓，其實要開始套現）。

------------------------------------------------

Q19751：

老師你好，好後悔而家先向你學習財務自由既概念，已經遲左好多，希望追得上

我今年40歲，月入四萬，流動資金十萬之下，但係我有個約值六十萬既車位。

近期考慮緊係咪應該放左個車位，改上車買私人樓（四百萬左右，按九成），老師你覺得我應該上車，定係用六十萬係股票市場作長線投資，倍大個資本先呢？謝謝

龔成老師︰

這個好睇你有無即時實際需要，如果無，你可以用股票都去增值一下先。到樓市有較明顯回調，或者找到荀盤才出手。

現在你用每月5成儲蓄，去做月供，其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、希慎（0014）、太古地產（1972）。小注加上恆指科指ETF（3067）都得。

現時大市只是合理區，你現有10萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

至於車位，你可以用租金回報率去睇下佢值唔值得持有。現時一般車位都好低，你可以考慮將佢沽出換至其他優質資產上去做增值。

------------------------------------------------

Q19752：

龔成老師你好，我今年很開心，投到白居二， 並計劃在2021 年6 月-12 月買入約500 萬的物業

現在有流動資金40 萬

但由於不肯定半年後的樓市是怎樣，所以想請教有沒有方法令40 萬穩賺/ 有無一些方法令這筆資金增值，
因為我不想這筆資金在銀行做定存

龔成老師︰

由於你計劃在半年至1年內買樓，筆資金有明確目標，投資要好保守。

如果只有半年，我建議你最多做定期。如果有一年以上，你可將小部份放在收息股去收下息，但比重唔可以多，因為股票始終都有波動性風險。

記住，你這筆資金重點係保本，而唔係增值。

收息股︰港燈（2638）、香港電訊（6823）、工行（1398）、恆生（0011）、置富（0778）、陽光（0435）、深高速（0548）。收息基金（3110）都得。

------------------------------------------------

Q19753：

龔sir，小弟好耐之前係4.13買入中集安瑞科（3899.hk），睇中佢主營業務市佔大，有護城河

近期升咗唔少，想知點樣可以判斷離場價位

龔成老師︰

中集安瑞科（3899）主要從事廣泛用於能源、化工及液態食品行業的各式各樣運輸、儲存及加工裝備的設計、開發、製造、工程及銷售，並提供有關技術保養服務。

睇翻過往的業務情況，大致穩定，但有時會出現了一些盈利的波動。質素算是中等，規模不大，略有風險。

投資值博率只是一般，但不是零質素，這類股，只宜小注。

如果佢佔你組合比重較高，你可以現價賣出部份。又或未來就以"升一倍、沽一半"架策略，都可以。

------------------------------------------------

Q19754：

halo 龔成老師, 我係一個fresh grad, 手頭有兩三萬流動資金, 依家想幫自己制定一份投資計劃,

但係又唔知應該從何入手. Follow咗老師你嘅FB兩三年, 知道你一直鼓勵要做投資, 無論資金多或少, 所以想請教老師, 我應該如何入手?

龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

你現時的年齡，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

策略上，你可以投資"平穏增長股" 和 "潛力股"。建議你找到工作後，將每月5成儲蓄做月供，其餘先儲起，用一邊月供一邊儲蓄的策略。

選股上，你可以投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）、領展（0823）。

增長力較強的，可選安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177）、福壽園（1448）。但佢地波動性和風險會較高，你要自己平衡。

若你不懂選股，可以先用盈富（2800）做目標。到有能力時，才選我介紹的股票。

現時大市算是合理水平，你可以現價先入一手盈富。餘下資金和每月5成儲蓄，我地就等機會，當大市出現較大回調，就加大力度掃貨，然後作長線投資。

------------------------------------------------

Q19755：

龔sir，想請問港㡠現價$7.7及香港電話訊$ 9.98是否平價可以大手買又嗎？

龔成老師︰

港燈（2638）和香港電訊（6823）都是收息股，增長力唔大。

若你目標係每月有平穏現金流，這2隻股票都合適。

現時香港電訊股息率有7%，才分注入貨。而港燈只有逾4%，只小注好了。

------------------------------------------------

Q19756：

老師，我有幾個問題

1）本人持有小米1810股票
$24買入

本身目標想$40放，係唔係再等下，因為又想唔放，當草錢3年後換樓

3年後小米會唔會股價都會過$100，驚放左買唔番之前買入既價

2）如果月供股票比小朋友等將來可以讀書用，每月$5000會唔會太多，定將錢作其他用途投資好？

3）現在買股票投資，應該買那隻較好？
謝謝

龔成老師︰

1） 小米（1810）有質素，但中短期會到那個價位，或者幾時會到$100，無人會知。但長線計，佢架質素一定會反映係股價上，所以建議你長線持有。或者你用「升一倍，賣一半」的方法都可以。

2） 這個視乎翻你自己經濟能力，和將來你小朋友讀書開支要多少。

（假設你可儲5年以上） 你每月有$5000可以投入，你可以一半供盈富（2800）。餘下一半，等大跌市才掃貨。

3） 投資選項會睇翻你人階段，相信你係年青至中年之間的人士，以下股票適都適合你。若你偏年青，潛力股可多一點（大約4成內）。相反，你較近中年，潛力股就唔可以咁多。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、希慎（0014）、太古地產（1972）或

潛力股︰中生（1177）、福壽園（1448）、安碩恒生科技（3067）、港交所（0388）、阿里（9988）、騰訊（0700）。

部份潛力股現價偏貴，現在只有中生、阿里、安碩恒生科技算在合理區頂，可小注。

現時大市只在合理區，資金唔好咁快用晒。要留有一部份，等大跌市出現時，才用來掃貨。

------------------------------------------------

Q19757：

呀sir，請問下你覺得3319同6989邊個潛力度高d？thanks！

龔成老師︰

雅生活服務（3319）不錯的，佢無論在業務本質、規模、品牌、財務數據、前景，都是理想的，反映這企業有一定的質素。

加上這企業的背景因素，以及行業的發展，相信這企業的前景不差，有長線投資的價值。

卓越商企服務（6989）主要於中國提供物業管理服務及增值服務，亦提供金融服務、公寓租賃服務以及軟件開發及技術維護服務。

暫時睇佢都有投資價值，但此股上市不久，無乜數據可以參考。所以，估值上較困難，現時不宜太大注。

整體質素，雅生活服務（3319）會較好。現價在合理區頂部，入貨要慢慢分注。

------------------------------------------------

Q19758：

老師，其實我今年19歲，想買啲增長率，潛力比較高既股票，有無一啲股票既優質，同時現價 比較合理?
大約$50000左右作為投資資金

順便想問一問埋呢，隻2186 我見其實都係有潛力，點解 會跌穿4.0咁多。有無話有啲咩因素導致佢呢個結果?

龔成老師︰

你現時的年齡，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

策略上，你可以投資"平穏增長股" 和 "潛力股"，以下都是一些適合你的股票，你可以參考下。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）、領展（0823）。

潛力股︰安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。但佢地波動性和風險會較高，你要自己平衡。

雖然你年紀可承受較高風險，但我地選股除了有增長力外，整個組合平衡性，都係好重要。我建議你"平穏增長股"和"潛力股"比重各佔一半，咁會較理想。

現時大市只是合理區，你現有5萬資金可以先投入一半，用"分注"形式，慢慢買貨。餘下一半就等大市出現一定程度的下跌，才大力度掃貨，然後長線投資。

同時留意，潛力股中部份價格已偏高，現時只有中生、阿里、安碩恒生科技算在合理區頂部，可分注入少少。

綠葉製藥（2186）正面的，佢主要銷售腫瘤科、心血管系統以及消化與代謝三個領域的新藥品，基本上都係有市場的，加上佢過往的生意增長唔錯，市場仍發展中，所以長遠不差。

但近年佢質素的確有少少轉弱，但不是全無質素，不過，這股本身的風險較高，唔建議投資得太多。現價只是合理區位置，小注投資係可以。

------------------------------------------------

Q19759：

龔成sir ~~自從follow 你之後已經開始月供股票，
不過早幾年誤信朋友比d number 有幾隻都蝕左好多，想問吓你意見應該斬纜定等下先？

931: 20000股 $1.7
1195: 16000股$0.63
6869: 1000股 $34.4
582: 2400股 $9.85

現時大約有40萬股票，現金流冇問題，想問吓你覺得呢啲股票有冇機會升返少少？

有啲真係輸咗9成，好辛苦先儲到幾十萬輸晒喺呢啲number 到真係好傷心！

我而家唔會再信呢啲消息，已經跟住你本書買啲股票收息，希望有日可以歸本。

龔成老師︰

我地買入一隻股票，一定要知道佢質素、行業前景、財務狀況等，才去投資。如果連間公司點賺錢、於行內有乜優勢、點解未來有發展和增長潛力，都答唔倒自已，咁就要停一停，唔好投資住。

中國天然氣（0931）、京維集團（1195）、藍鼎國際（0582）年年虧損，唔見有投資價值，建議沽出。

長飛光纖光纜（6869）有算質素的，但有轉弱的情況，但未算壞。

佢長遠的增長力仍在，因為全球光纖光纜市場，仍會保持向上，智能手機、互聯網、大數據等科技，成為了行業的推動力。

長飛光纖之前受惠三家國有電訊營運商發展網絡基礎，所以生意算是不差，但這亦令這公司出現風險。之前中移動的中標結果，佢排名唔算前，這反映市場競爭有所加劇，佢的賺錢能力有可能略有減弱。

整體上，質素仍在，但增長與賺錢能力就有就減弱，投資價值仍在，現貨可以守住先，唔好加注。

這些贖回來的資金，等你先增值投資知識，才再入市會較穏當。你可以睇我寫架"80後百萬富翁"、"財務自由行"和"股票勝經"，會幫到你。

月供方面，你可以睇翻自已年紀，去做配置。年輕時，可以用"平穏增長股" + "潛力股"，到中年"潛力股"比重要減少，到近退休應集中在"收息股"上。

平穏增值股︰盈富（2800）、港鐵（0066）、金沙（1928）、煤氣（0003）、恆基（0012）、中銀香港（2388）、長建（1038）、粵海（0270）、領展（0823）、希慎（0014）、太古地產（1972）

潛力股︰中生（1177）、福壽園（1448）、安碩恒生科技（3067）、港交所（0388）、阿里（9988）、騰訊（0700）、舜宇光學（2382）、小米（1810）

收息股︰港燈（2638）、香港電訊（6823）、工行（1398）、恆生（0011）、置富（0778）、陽光（0435）、深高速（0548）。

------------------------------------------------

Q19760：

老師你好，我岩岩出黎做野冇耐 岩岩入股票市場
最近聽你介紹 01686 都有去睇番佢啲資料

係7.2 果陣 買左1000股 試吓入場

黎緊 想睇下 買比亞迪 或者 小米 或者 匯豐
想問下你 意見 大概咩價錢係合理價位 謝謝你

龔成老師︰

新意網（1686）有一定的質素，穩定的租金收入，強勁的現金流，加上行業的增長潛力，都令這股有投資的價值。

近年由於高速發展，令負債增多了不少，是一個風險。整體而言，值得長線持有。

而你很年輕，投資時應以增值為主。匯控（0005）只係收息股，增長力麻麻，唔適合你。

比亞迪（1211）和小米（1810）都適合你，但現價偏貴。前者要回到$120才算合理，而小米最少都要回多3,4成，才可以開始慢慢分入貨。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。