【龔成問答信箱】（Q22201-22220）

Q22201：

老師求救！

$270入左3690
$545入左700
$270入左9988
$29入左1810
$16.5入左2013
$4入左8083
點算好？

龔成老師：

你選股較集中在新經濟股類別，這是你的核心投資問題，你要注意翻。另外，不少貨都在貴的價格購買，你日後要加強翻企業估值及投資時機能力，或善用分注、月供等投資策略。

騰訊（0700）、阿里（9988）、小米（1810），無問題，就算騰訊回了不少，都有得守。

騰訊（0700）受政策因素影響，中短期弱，企業的賺錢能力會略減，以及企業估值都會略減，不過，政策影響未到核心性，無令到企業無法賺錢，只是賺錢減少。

這企業長遠仍有質素，有發展力的。佢最有價值的，就是「平台」，這亦是現世代好有發展的資產。

佢業務模式係提供平台，如通訊平台、交易平台、入門網站、遊戲平台等，而收入來源則是其廷伸的服務，如增值服務、網絡廣告、電子商務交易等。

過往的業績理想，又身處長遠有增長的行業，加上擁有重要的資產，即龐大的客戶群，將來發展各業務都有相當的優勢，這都是騰訊值錢的地方。不過，政策會令其賺錢能力減，不過，長遠騰訊仍找到賺錢方法，簡單來說，就是現時定了新的遊戲規則，而企業要時間去適應，中短期賺錢能力減，但長遠會慢慢好轉。

現價合理區中間，分注或月供可以。

美團（3690），不建議太大注，微盟（2013）都不建議過多。

中國有贊（8083）較大問題。

佢主要於中國從事經營電商業務及支付服務業務，業務分類如下：

（１）電子商貿：透過電商品牌「有贊」提供各種有關虛擬批發及零售之線上及線下解決方案及服務，如「有
贊微商城」

以有「有贊零售」等ＳａａＳ軟體產品及人才服務、面向開發者的「有贊雲」ＰａａＳ雲服務、面向品牌商的「有贊推廣」與「有贊分銷」、以及面向消費者的「有贊精選」與「有贊微小店」。

（２）第三方支付服務。

（３）一鳴神州：提供第三方支付系統解決方案及銷售綜合智能銷售點裝置。

（４）一般貿易。

近年業務發展快速，生意增長力，不過，現時估值高，業務變化較，整體有好大的不確定性。加上佢過往在核數師報告出現過「保留意見」，盤數可能有古怪，雖然已是數年前的事，但都會扣分。

佢不是無潛力，但風險較高，這投資值博率不高，宜減持。

------------------------------------------------

Q22202：

老師，請問你試過蝕到本錢嗎？我現在蝕了1成多了，心情開始影響生活了，如果完全放低唔睇一段時間（2、3個月），是否好危險？

龔成老師：

比亞迪（1211），股價試過由$88跌落$12

當時我打銀行工，月入萬零蚊。由賺幾百萬（賬面）上，去到蝕錢（賬面）。

我並無影響生活，因為我集中分析企業，而不是股價，如果你無法平常心對股價，就只會同一般散戶，永遠同一層次。

你有些概念錯左，我地不是不理股票，我地是不理短期股價，但會關心「企業」。

建議你花時間睇年報，減少時間睇股價。

------------------------------------------------

Q22203：

Sir, 文長，希望你可以比啲意見我

Sir,我係你38班學生, 由半年前向你請教, 跟住好認真咁上你八堂課, 功課做啱晒都好開都好有滿足感, ….. 又就好似你上堂提過一樣, 已經當大家好似朋友咁.

再次多謝你每次好肉緊咁教導我們正確理財知識, 連BREAK都唔休息咁解答學生疑難 (有時都擔心你操勞過度)

我年紀唔細 (50), 老公已經退休, 以下係我二人家庭狀況

現有資產:
現金 約有$0.8M
股票* 約有$0.75M
基金 約有$0.65M (虧蝕中, 打算明年年中免罰息後, 全數取回再作投資)
保險儲蓄+年金+MPF (預計10-15年後, 2人共約有$3M可以購買政府年金, 希望為將來基本支出補底)
已供滿自住物業 (兩房, 樓齡20, 地鐡沿線步行10, 估計現值$8M)

每月淨收入: $40,000 / month
本人希望3年後退休, 之後用兩年時間(i.e. 第4-5年, 慢慢轉晒去水桶3作長線收息. *股票profolio 草擬如下

中長線計劃:
A)預算3年(最長不多於5年)提早退休, 移居馬來西亞 (預算2人日後生活醫療保險等開支約$18,000-$20,000 / month)，

B) 希望從現有資產, 及每月收入 , 投資滾存, 達致以下兩個目的:

i)預留3年後退休時, 動用當$1.2M在當地買一間住宅, 退休用
ii) 其餘每月有被動收入最少有$18,000/month 作為二人生活開支

C) 想盡量10年內唔賣樓, 原因是暫時保留自住物業給家人使用, 或如租出, 大部份租金作為父母養老用.

我知道太遲計劃，所以好希望老師可以幫忙, 抽時間給予意見及指導：

I. 如何運用現有流動資產#1/2/3及現時每月$30,000收入, 在退休前約仍有3年時間, 應如何步署以至有效達至計劃A+B i&ii? 實際上是否可行？

II. 上面草擬嘅stock portfolio , 股票及比例要改進嗎? 15隻會唔會太多? 應如何改善 或 應該部份剔除 (現在15隻都有貨)?

III. 由於距離我退休前仍有3年，如利用自住物業做按揭借出 eg. $2M投資收息股，3年內加大現有資產，又是否可行加快達成目標？你認為這個想法如何？風險會很大嗎?

IV. 其實亦有想過趁現在樓價高，將單位先出售吐現$7-8M（反正已經住咗22年，物業亦升值咗$5M)，改為租住地方等。不過，我又擔心持太多股票會造其他成風險. 你意見如何?

V. 保留物業將來可做逆按揭, 以每月收到款項作為夫婦二人年老時,應付大部份日常開支, 你認為做逆按揭可取嗎?

重覆中長缐計劃，啲points 清楚啲

龔成老師︰

I) 你現時計劃操作模式，大致都可以。但金額上未必足夠，有些地方要再調整一下。

如果你希望3年後每月有1.8萬蚊現金流，以股息率6%計，你需要本金360萬。再加上你置業，和一些置業上雜費，相信最少要500萬才足夠。

以你現時資產2.2M(現金, 持股, 基金)，再每月月供$20000，3年後估計都只會增值至350萬左右，故實行上有點困難。

我可以考慮，現有資產和月供，就主力去累積這個360萬，以換取每月$18000現金流。

而你移居後的新物業資金，就透過賣出現有香港物業去獲得。由於你和你先生已移居，你家人可以搬去較細單位，從而空出這120萬，作你們新居住地置業之用。

II) 以你組合金額計，15隻都勉強可以。現持股都係有質素，但緊記由於你將近退休，你要將水桶1和2慢慢轉去水桶3﹐去為自己創造現金流。

III) 透過借貸投資，從中賺取息差，是可以。

但你要留意，現時按息不高，這策略是可行的。但當未來按息口上升，令息差收窄，就會影響到你回報。

另外，就是虧損的可能，股價是會升跌的，若然買入後股價下跌，你就會出現「賺息蝕價」的情況，那你的計劃就會得不償失。

但現時大市只在合理區，大致收息股在「不處於平宜區」的價位，較難確保不會「賺息蝕價」。

而且，這樣做都會增加你負債水平，而造成風險，你要自己從風險與回報中，作出一個平衡。以你年紀，總負債不要高於總資產50%，會係較安全。

IV) 這個都可以，但我在答案I)的建議，相信會較為穏當。因為畢竟3年唔係一個長時間，再優質股票都會有機會波動，令回報不確定性增加。

而且你咁做，這3年所有資產都會偏晒係股票類。若股市出問題，你成盤計劃就會大受影響。故建議原有物業，暫時不動，令組合較平衡會比較好。

V) 逆按揭都係一個可取方法，只要你物業在你家人居住後，再沒有傳傳承需要，逆按揭都係一個提取穏定現金流的好方法。

------------------------------------------------

Q22204：

龔sir，你好，一直有追隨你的專頁。想你就住我嘅財務狀況和目標比d意見。

現時我和太太35歲，財務狀況：
儲蓄：130萬
股票：40萬 （20萬hsbc, 15萬巴巴，5萬莎莎）
外幣：30萬 （澳元，兩年前兌換率5.8買，無升跌，但有約年息率5％）
自住樓：現值700萬，仍欠320萬貸款
未來儲蓄：預計月儲3萬

我倆目標五年後40歲，打算賣埋樓有其他人生計劃，希望可總共有1200萬資產 （打算賣埋樓）

我有以下計劃，想龔sir比點意見

1. 股票會長放，直至目標：莎莎$4, 匯豐$80, 巴巴$350）,到時40萬股票--＞75萬

2. 樓保守假設樓價不變，仍值700萬（到時欠270萬貸款）,賣左即是有430萬

3. 外幣30萬澳元keep，目標兌換上$7.5，有38萬

4. 130萬，分30萬流動現金（唔會郁），100萬分3注，買入基金 （初步計劃投資中國股票基金及新興市場基金，希望可追落後，感覺現在美國市場太高追，風險大），

目標100萬可增值至200萬

5. 每月儲蓄$30000，會全部月供香港科技指數etf，因睇好未來新經濟產業成長以平均成本法買入（嘗試找在每月相對低點買入），

令原本三年儲蓄180萬儲蓄，目標可增值至250萬

上面計落都只做到75＋430＋38＋230＋250，都係只做到約1000萬目標。

想龔sir比下意見，自問沒有選股票眼光，和太太都傾向保守穩陣，所以才打算以基金及月供方式去增值資產，

我想龔sir特別在第四第五點比下意見，能否有更好增值方法，讓我們達到1200萬目標。以我們投資保守取向，1200萬目標是否不實際？

龔成老師︰

要做到你1200萬目標，又唔可以話完全不可能。但你要從目標與風險中，取個平衡。

1) 其實我地買股票，就係買企業，只要佢質素不變，我地係應該一直持有，讓其為你財富增值，才是正確做法。

因此，我從來都唔會定目標價。只會係佢質素出問題，或者大市好狂熱，股價異常地高，才會減持。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你35歲，應以增值為主。匯控(0005)只係收息股，不宜持有太多。建議減持部份，換至其他較有增長力股票。其餘2隻，都可以長線持有。

另外，我地唔好成個組合，只集中係2,3隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能高於組合30%，同一股不能高於組合15%。要平衡，建立後長期持有，不是買賣賺差價，而是成為你財富組合一部分。

你可以投資平穩增長股+潛力股，以你年紀，比重可以去到各一半，但潛力股風險較高，若你投資經驗較淺，或者不想承受太高風險，就要調低少少個比重。

2) 其實每個人都有自住需要，無自住樓就會承受租金波動風險，你要自己衡量。

3) 在投資的角度，外匯不是最好的投資項目，因為說到尾，這些都只是一些貨幣，即是「政府借據」，貨幣中期會以週期的模式運作，但長期來說，都是貶值收場，因為貨幣只有「交易價值」，並無真正的財富價值。

而我地進行財富增值時，應該集中將資金投放在真正的資產，如物業、車位、優質股等。

4) 可以，但大前題你要對相關市場，有基本認識。同時間，如果你唔識定平貴，就要分注去入市。

你可以衡量基金的投資策略，所投資的資產類別、投資策略、風險程度、市場、費用成本、以及過往的表現(可以睇佢過往5-10年，如果回報係比主要投資市場高，有機會值得繼續投資)。

5) 安碩恒生科技(3067)這類ETF係可以，但唔建議全數投資落去。因為組合除了有增長力外，平衡性都好重要。

因為而一刻你見佢行業係好有潛力，但你唔能夠肯定，會唔會突然出現一些負面因素，影響成個行業發展。因此，我地要分散投資，個別行業唔好佔組合3成以上。

現時大市只在合理區，資金不宜盡用。你每月儲蓄，可以先用一半去月供上述的股票。餘下一半，就等大跌市才出手。

但唔建議你找每月低點，因為係好難，好易出錯。你好簡單咁，每月用同一日入貨(不用理當天價格)，其實已經做到平衡價格波動性風險的效果。

我假設投資回報有10%（連股息再投資），你每月投資$30000 + 現有資產200萬(現金、外幣、股票)，5年後大約會增值至540萬。

再加上你現有物業，相信你增值至1200萬，係可行的。但重點係你要配置好一個適合和平衡的股票/基金組合，才會有機會做到上述預期回報。

------------------------------------------------

Q22205：

Hello, sir!我follow左你專頁好一段時間，我本身一直都缺乏投資概念，唔懂得投資只係儲錢擺響銀行，最近開始定下一啲目標希望增值同滾存財富。

我現時月入約40k，扣除支出家用我保守計可以每月儲到 約25k，儲蓄有現金50萬，另外近期入手左3隻港股。

1830 2手@ 8.5
2196 2手@54.6
9988 2手@206

我想提升自己理財知識，逐步提升持股對現金嘅比例，希望2年內資產值滾存到2百萬，想將來有資本去搞一啲小生意。

1. 想問我組合嘅股票策略可以有哪些地方改進？

2. 因為我有買左幾年儲蓄保險，但我現時想進取一點同彈性大啲，我嘅經紀向我建議買一啲每月派息嘅美國指數基金，強調本金基本上係冇增值但賺息，呢類產品適合我嗎？

我應該有咩地方要留意？

響投資方面真係新手，好多嘢需要學習，謝謝龔成老師，我有買你本書睇，好認同你對財富管理嘅態度，希望學到更多

龔成老師︰

1) 我假設投資回報有10%（連股息再投資），你每月投資$25000 + 50萬儲蓄和持股，2年後大約會增值至140萬。

但2年只係一個好短時間，就算再有質素的股票，都有機會出現波動，影響你回報，你要明白這個風險。。

你現時持有股票，都係有質素和增長力，但佢地都係潛力股，雖然較有增長潛力，同時風險都較高，不宜持有過多。

組合上，可以用平穏增長股和潛力股作配合，各佔5成左右。若你投資經驗較淺，潛力股比重，要再調至3成以下。到你學到一定投資知識，才慢慢調高。

現在你每月先用5成儲蓄，即$12500做月供。其餘先儲起，用一邊月供一邊儲蓄的策略。

現時大市只是合理區，你現有50萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

若你要達至200萬目標，你月供就要加大至$50000，或者將投資年期加長至3-4年，才可以做到。我比較建議加長年期，因為時間較長，最終回報不確定性會較低，成事機會會較大。

2) 其實"保險"主要係用來防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

而且，你這份基金係以收息為主，我相信唔會有太大增長力。用來做財富增值，就未必適合。

------------------------------------------------

Q22206：

龔成老師，你好。我係初哥，之前考慮左一段時間，用左少少買入一手深圳高速（$7.7買入），但係佢最近都跌，我有嘗試去了解跌既原因。

但係都搵唔到，我應該點樣去搵資料，了解一隻股票既外圍因素

龔成老師︰

就算再優質企業，中短期股價都會有機會波動。原因不一定是本質出問題，可以係一些與其本質無關的因素。

只要長線質素無變，中短期波動我地唔需要理會，長線持有就可以。

深圳高速公路股份（0548）有質素的，這股持有不少有質素的資產，現金流穩定，不過增長力不強。

這股有長線投資價值，收息可以。中短期價格波動，係正常事，唔見佢質素有明顯變差，可持有。但就不要對股價有太大期望。現價合理。

其實你要了解一隻股票，先要了解佢業務係點樣賺錢，這些要睇年報、公司網站等資料。這些資料，在港交所、公司網站、一些財經網，都可以找到。

之後，你要定期留意公司和行業相關新聞，去睇下有無一些事件，對佢"長線"賺錢能力，造成影響。

我地去分析，應該主要集中在企業和行業本身。外圍宏觀經濟因素，不應佔太高比重。

------------------------------------------------

Q22207：

龔成老師，想請教你以下問題。

1. 留意你提到，預計現時為牛市二期。想知下一浪是否必定為牛市三期嗎？還是有機會受各因素影響突然變為熊市？我不太了解牛熊市是否一定順序而行？

2. 坊間預期通脹快來臨而持續多年。想知哪些股票會受惠？哪些類型股票會下跌而不宜沾手？

3. 樓市方面，通脹理應帶動所有民生用品及物價上升、及樓價也因而上升嗎？

龔成老師：

1）現時牛熊分析，已經比過往年代，作用大減。

理論上，會去牛三，但現時我已好少這樣推論，現世代變數多左好多。

在過往年代，一般是順序的，因為會依經濟週期運作，但現世代有好多情況都不是。

你應該集中分析「長遠企業價值」，而不是推算「市況」。

2）如果企業加價能力較弱，本身產品自主能力較弱的，就有可能受影響。不過，我地的分析重點，始終是長遠的企業價值，前景等的因素。

3）理論上係。

當通賬出現，物業這類資產項，價格都會向上，但中短期仍會受經濟、供求、租金回報率等因素影響。

------------------------------------------------

Q22208：

龔成老師你好
電動汽車股具增值潛力

想問一下
點解你會揀買入比亞迪而不是Tesla既？

龔成老師：

比亞迪（1211）與Tesla（TSLA）都是有質素，有潛力的企業，由於同處電動車行業，而這行業的前景均正面，因此，兩隻都有長線投資價值。比亞迪在中國電動車市場、公共交通工具、電池技術方面較強，而Tesla則在外國的電動車市場較強，因此各有優勢。

比亞迪我投資了超過10年，選這股而不選Tesla，是由於過往比亞迪的財務數據較Tesla理想，比亞迪在過往多年，一直都有手機電池、傳統車等業務，為這企業帶來持續的正現金流。相反，Tesla在過往處負現金流狀態，要不斷靠市場集資進行研發，到近年才有正現金流。

投資者選股，選現時已有賺錢業務，有正現金流的企業，會比較穩健，風險度較低。

相反，Tesla過往未有正現金流，風險度會較高，但這類企業，若果能夠由負現金流轉為正現金流，股價的上升幅度可以十分驚人，因此，投資者選那一隻，其中一個因素就是本身的風險承受能力。

------------------------------------------------

Q22209：

老師你好, 好想請教你一個心理嘅問題, 最近我見啲科網股跌得好犀利, 譬如阿里巴巴我留意住佢, 人嘅心理就係咁

當然佢一路下跌嘅時候就會等一等,好似每日都跌啲每日都跌啲,咁唔會下定決心買,但係今朝早我見佢好似有啲止跌回升嘅感覺,跌咗落去又升返琴日嘅價位

咁我就買咗一手好想請教老師其實呢種心態係唔係唔係咁理想?

究竟我哋應該係下跌一路下跌當中捕捉一個價位就買?定抑話要等佢U turn升返少少先至買?

龔成老師：

你現時停留在一般散戶的思維，你唔好理短期股價，你要學憑投資真正賺大錢的人的方法，例如巴菲特的方法。

第一，著重企業價值

第二，不預測短期股價走勢

第三，不要情緒化投資

第四，要以平貴度去進行投資

第五，買入前定好投資策略，不要到時變來變去

------------------------------------------------

Q22210：

Hello. 龔成。想請教一下、如果香港政局不穏或我自覺身處地方政局不穩。現在所持有的股票應該先估出還是繼續看企業現在的質素？

因為萬一有咩事或香港經濟不太自由，無辦法估計所持有的還可否有價值

我現時月供五隻股票每隻1k.
1, 823, 3,66,2800

謝謝你的時間和建議！

龔成老師︰

若你相關資產，係會依然保留在你所講的地方投資，就應該睇企業質素。除非佢政局問題，同時影響到企業本質，否則政局問題應不作考量。

因為股價長遠都係反映企業質素，中國會係未來10年其中一個增長理想經濟體，香港股市中有不少有質素的內地企業，長遠都會受惠。

而且，內地企業需要一個面向世界的集資平台，相信香港唔會去到好極端。

你現時月供股票，係適合你。如果你想增長力再大少少，可以加入少量潛力股，但佢地風險會較高，你要自己衡量。

現時大市只在合理水平，每月資金唔好盡用，要留有部份，等大跌市機會。

潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。

------------------------------------------------

Q22211：

龔sir, 早晨！想向你請教一些有關香港樓的問題。

1）我見現在內地有房住不炒政策，加上Facebook google 等有機會撤港，請問分別對香港樓巿有影響嗎？因為擔心這兩個都會令香港樓巿下跌。。

2）我最近想投資買樓收租，雖然見租金回報率不算太高，但仍希望能賺於升值。可是，另一邊又擔心以上的情況會令樓價跌，最後得不償失。。

3）由於預算（約550-650萬）有限，我正考慮沙田第一城，淘大花園，北角/銅鑼灣/灣仔，請問哪個選擇會比較值博？

4）（1）提到的問題對本地地產股會有影響嗎？

問題比較多，謝謝和期待你的回覆

補充一點，我擔心房住不炒的影響是因為有見香港政府與中央的關係越來越密切，政策上有不少都跟中央。。所以擔心香港之後也會推類似。。

龔成老師︰

1) 內地由於部份地區，房價炒至不合理水平，故中央政府才出手干預。好似最近一房多校政策，都係為內地不合理的樓價，去進一步降溫。

但香港房屋政策，未必一定完全跟足內地，因為大家背景和地區條件都不同，好難話完全一樣。但類似調控，係有機會。

而Facebook google 會否撤港，暫時都係未知之數。但有大型企業離開，對香港經濟係不利，樓間會出現影響係唔奇。但長線香港房屋供應失衡，相信出現較大回調，機會較微。

2) 長線樓市係升架機會較大，但你現時資金不多，加上投資樓市值博率不及股市高，故你先投資優質股，會係較好。

3) 地區上，沙田第一城和淘大花園都係較有值博率。但你都要睇翻物業本身質素，價格去作最終衡量。

4) 會，因為佢地除了住宅物業，還有工商用物業。若大型企業離開香港，佢地都會受影響。

------------------------------------------------

Q22212：

老師你好，我現時31歲，月入大概4萬，扣除所有開支每月大概可儲1萬。以下是我現時的資產分佈，想問問你的意見：

- 銀行現金約25萬

- 阿里（9988）100股（買入價 $250）
- 中生（1177）2000股（買入價 $7.5）
- 安碩恆生科技（3067）1000股（買入價 $20）
- 信義光能（968）2000股（買入價 $12.7）
- 舜宇光學科技（2382）100股（買入價 $175）
- 華潤水泥控股（1313）2000股（買入價 $9.19）
- 金沙（1928）800股（買入價 $35）

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你31歲，應以增值為主，建議你用「平穏增長股」 + 「潛力股」作組合，去創造一個增值平台。

你現時持股，係有質素和適合你。但就過份偏重於潛力股(9988, 1177, 3067, 0968, 2382)﹐令風險偏高。

以你年紀，潛力股佔5成好了。若你投資經驗較淺，要再調低少少。

但由於你持股都有質素，你唔需要去沽出。用新資金去慢慢調整翻個比例，咁就可以。

現在你每月先用5成儲蓄，即$5000做月供。其餘先儲起，用一邊月供一邊儲蓄的策略。

大市現處於合理水平，那25萬資金，你可以多用5-10萬，以"分注"形式慢慢入貨。餘下資金和每月儲蓄，就等大跌市機會出現，才大力度掃貨，並長線投資。

------------------------------------------------

Q22213：

謝謝成哥，708 恆大 & 1357 美圖，兩隻股我蝕左投資本金嘅六成，剩返三成（總共得返3萬蚊）

其實真係好少，我睇過兩隻股三個月前都係好爆升，但係而家又跌返差唔多去到一年前嘅低位，我究竟好唔好等呢？

其實而家得返三萬蚊我諗緊不如等半年睇吓佢地變成點？我傻嗎？

好彩我投資左10萬蚊1211 比亞迪，我諗住當長線投資，當時180入，我第日等到過咗250先再放平衡返心態

龔成老師︰

其實唔係所有股票"等"，就代表佢一定會有機會重回買入價。因為無質素的股票，只會越跌越深。

所以，我地係決定是否守的時候，重點一定要睇隻股票有無質素。有的話，守係可以。若果係無，你只會浪費時間成本。你應盡早沽貨，投入其他優質股會較好。

恒大汽車（0708）雖然可能有潛力，但風險高，佢資金投入的確強，大力發展新能源車，但這些仍未有賣產品真正的實力，長遠能帶動多少收入，未知。

由於仍有好多未知數，而股價已經大升左好多（比半年前），因此，這刻要自己衡量風險。

可能佢真的有潛力，但連基本的銷售銷售都未有，我地作為投資者，就好難分析，只可以話佢股價會大上大落。

我唔係話佢無投資價值，只係不確定性較高。

美圖公司（1357）正面，佢過左最差時期，現時正向好。佢主要從事提供在線廣告及其他互聯網增值服務；以及開發、製造及銷售智能硬件產品。

見佢財務數據改善，這企業仍有發展力，有長線投資價值。不過業務變化始終大，不建議大注投資。

這2隻股股票，若你持貨不多，可以守住先，再觀察。相反係持貨比較多，就要沽出部份，去平衡風險。

另外，你唔好停留一般散戶個種"賺差價"想法，諗住升就沽，賺個現金差額回來。

我地真正財富增值，係將只會貶值現金，換成會資產的一個過程。只要資產係有質素，佢就會一直為你增值，你係唔應該賣出。

比亞迪(1211)係有質素的潛力股，係一個唔錯的資產。而且佢現時才在發展階段，未到真正全盛時期，價值未得到完釋放。。建議你一直持有，會對你較有利。

------------------------------------------------

Q22214：

老師你好！想代朋友問問他有40萬，想買些穩定的股票。短時間，大概持3至6個月到，他想知道有何選擇呢？謝謝你

龔成老師︰

其實就算最穏定和優質股票，中短期都一定有波動。

3至6個月係一個好短架時間，我一般建議投資者，持有股票最少3-5年，才可以較有效去平衡價格波動上的風險。

因此，如果只係3至6個月時間，我建議你朋友最多只可做定期存款，唔好以股票作為目標，去做增值。

------------------------------------------------

Q22215：

非常感謝龔成老師的回覆，您給予的投資建議，我會認真考慮。在我以後的投資生崖中，我會更著眼於企業本身的價值之上。

我近日先至在不同的社交媒體上認識到龔成老師您，您在眾多文章中提及過小米跌到24蚊，就可以開始分注吸納、福壽園，跌到7蚊就可以開始分注吸納。

小米、福壽園，最近我都打量著。而阿里，目前200蚊防守性極強。但現在，我會更傾向於觀望或審慎小注分注並長線持有的策略。

我現在先對龔成老師的著作《80後百萬富翁》一書感到興趣，請問有何購買渠道?

可能較為不幸，我在看到襲成老師的回覆前不久，已再度入市，不過是打算小注分注入，並打算長期持有:

-天能動力(819)，14.26買入1手2000股。您之前在2021年4月28日的文章上有提及過天能是有質素的，業務向好方面發展。

我自己亦對天能進行了一些資料搜集。目前是超低市盈率，僅5.38倍，就算相對同業，都是一個極低市盈率水平。

股價現處於52周較低水平，盈利及其増長速度亦相當亮麗。行業前景方面，未來電動車是大勢所趨，動力電池企業的前景更是無可限量。

不過，近日我看過一篇文章，指天能動力在較早之前進行分拆。天能動力將接近貢獻九成利潤的電池研發、製造以及銷售的核心業務分拆予天能股份。

那請問天能動力 (819)，在進行分拆之後，在企業質素以及投資價值上，有否改變過，我是否已跌入低市盈率陷阱?

-深圳國際(152)，10.86買入了兩手1000股。您在較早前有專欄提及過深圳國際，評穩定、高息、有少少增長力。深圳國際一股，我跟長輩研究過之後，是看好的

不過一定要長期持有，到通關之後，好可能會急速增長。

我自己亦對深圳國際做過一些資料搜集，深圳國際，由深圳市政府透過投資公司間接持有，企業本身持有深高速一半股權

經營收路費、港口、物流園業務。另外，我經披露易發現到深圳國際的亮點，發現兩摩、花旗等大行的持有已發行股權的占比好多，約接近六成之多

相對其他內銀股/收息股/公用股，大行持貨一般只有大約十幾％左右，深圳國際在這方面給我安心的感覺。不過，發現2020年的盈利為4007百萬，盈利增長率為負20.19%

請問這只是疫情所造成的現象，對企業質素以及投資價值上，亦沒有影響?

再次感謝龔成老師的回覆~~~

龔成老師︰

你係分析上，依然係未放開過往短炒的模式。雖然我明白唔係一時三刻可以改變，但你必需要努力去調整。

52周較低水平，係一些技術分析，主要係短炒用。過去股價，跟今天企業質素，未必有好大關聯性。如果你用佢做投資決定，好易會出問題。

天能動力（0819）分拆電池業務上市，對佢價值唔會有影響，佢會係新上市公司的大股東，相關盈利依然會係佢會計帳目當中。

至於佢一直低市盈率，很大程度係因為市場對佢長線賺錢能力有保留。只能說，此股風險本身較大，投資係可以，但緊記不能大注。

深圳國際（0152）有質素，是不差的收息股。

佢主要從事收費公路的開發、營運及管理；物流中心及綜合物流港的建設、營運及管理；提供第三方物流服務、物流資訊及金融服務、港口及相關服務、物流園轉型升級服務。

但留意，集團主要股東係深圳市投資控股有限公司，而非兩摩、花旗。其實一般股東比重，對企業分析上，重要性唔算好大﹐最多只會作為輔助性參考。

由於疫情關係，令到國內不少經濟活動，出現停頓。因此，收入難免受到影響，但這都是中短期因素，長線投資價值依然存在。

集團過往業務穩定，生意與盈利都不差，不過就不是高增長類。這股都有長線投資的價值。

現價合理，投資收息可以。但以你25歲年紀，這類收息股，就不太適合。你應先集中係有增長力股票，去累積一筆財富，到退休時，才換成這類收息股，去創造現金流，而非現在。

------------------------------------------------

Q22216：

唔好意思龔成老師
我有一樣急需請問你的意見

因為我在年初恆騰網絡136炒起時分階段入左好多，平均價係10.81，我最高峰時可以賺$300k但無走，就是因為貪心

現在我手持48000股136，賺面蝕300k左右，眼見他一直跌好像永不翻身咁，恆大又好像沒有起色，真的很擔心

我投資的一百萬股票，有一半就是買了136

請問龔成老師
我現在應該止蝕離場嗎？

龔成老師：

第一，我地應該建立平衡組合，同一行業要少過3成，同一隻股票要少過15%，你出現了集中風險。

第二，恒騰網絡（0136）有危有機類。這些股我地投資的金額，要更少。

佢現時企業盈利不多，但市值極高，市場對「前景」有無限幻想，有時炒作會升好多，但跌都可以好勁。

如果長遠業務成功，可以升得勁，但失敗，會跌得好勁。因此，長線投資不是不可，但只能小注。

現時你最大的問題是集中，因此，要在反彈時減持，餘下先守。

------------------------------------------------

Q22217：

龔sir你好，一直有留意你同睇開你岀既書，本本都令我獲益不少，希望你唔好停下來，繼續讓大家一起進步

有少少問題想請教一下，本人三十四歲，分別係唔同時期投資以下股票：

0005 1200股 均價$59
1038 1125股 均價$49
0066 500股 均價$43.8
9988 300股均價$ 227

Q1:請問呢個組合可以嗎？ 會否太過保守？

Q2:如果賣左0005 轉換其他更優質資產會不會更好，比如Reits 或 地產股 因為香港始終地小人多租金不斷向上，回報會唔會好啲

銀行股賺錢能力如你所講不及以往

我會耐心等候回覆 謝謝

龔成老師︰

多謝你的支持，我有時間，一定會繼續出書，同大家分享更多有關投資的知識。

1) 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你這個組合，以於有不少比重在匯控(0005)，所以係有點保守。

2) 以你34歲計，應以增值為主。匯控(0005)只係收息股，增長力好一般，唔建議你持有咁多。地產股，係可以考慮。

但房地產信託基金（REIT），就未必太合適。佢原理如同買樓收租，基本上是穩健的。而房託規定要將可分派的90%收入作派息，故利息有一定保證。

而租金長遠一定會上升，故長期持有不錯。但好多房托，其實都無增長力，係純收息，除了領展(0823)適合你外，其餘REITS，在你這年紀暫時不要考慮。

以下是一些有增長力的優質股，你可以將部份匯控(0005)換碼至優質，平穩增長股，及潛力股票，未來新資金，也可以用佢地作為投資目標。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

另外，我想提多你一個要點。

任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

特別係銀行業，佢營運模式較特別，風險會比一般行業為高。必需堅守30%這個準則，如果可控制在20%以內，會更好。

另外，指數基金係不受此限。你現時組合總金額不多，有出現過份集中問題，都係正常。但當你組合金額有一定數量，你就要留意，唔好比個別行業/企業，佔太高比重，以免造成不必要的風險。

------------------------------------------------

Q22218：

龔成 你好，一直打算分注VOO同QQQ 定期各買一股 但他們價位一直升

如果現在入市 會是貴價位入嗎？

還是應待他們跌至什麼程度才買入較理想？

龔成老師︰

Vanguard標普500指數ETF〈VOO〉，是追蹤標普500指數的ETF。而Invesco QQQ Trust(QQQ) 是追蹤納斯達克100指數。

2隻都係有質素的ETF，後者增長潛力和風險會較高。但現價都處於合理區頂，至略貴水平。

但由於你係用近似月供的模式去入貨，本身會有平衡價值波動效果，因此你現時已可以開始買入。

除非你本身有一定投資經驗和技巧，否則我唔建議你用平貴去做策略，用你本身計劃定期各買一股，會較好。

但緊記，你這個定期入貨計劃，一定要長期進行，才會有理想效果。最少維持3年，並持有這些股票5年以上。

當然，可以的話，最好一直持有。因為，優質股持有時間越長，財富增值效果就會越理想。

------------------------------------------------

Q22219：

龔成老師，你好！本人今年3x歲，丈夫4x歲，丈夫是西醫，沒有子女。

1. 擁有一個已完成供款，現值$800萬的物業
2. 持有一個寫字樓舖，現值大概$450萬
3. 兩年前，購入一層價值$1,200萬物業，康城樓花，今年年尾收樓，正在供款中。
4. 持有大概40萬匯豐股票，購入價$48元
5. 有400多萬現金

兩三年後，有計劃搬到港島區居住，不知道應該如何處理，現在手頭住宅物業？

這些年，我們忙於工作沒有學習投資知識，對投資一曉不通！我們第一步應該如何投資呢？

謝謝你！

龔成老師︰

我地投資除左講求增值，組合平衡性都好重要。現時你有2個住宅物業，加1個商用單位，其實成個組合嚴重偏向左係物業類。

我比較建議，你用手頭上其中一個物業，去轉換成港島區物業。至於沽出那一個，你可以從佢長線潛力和租金回報率去衡量。

其餘資金，你就用來投資優質股，這樣安排會較理想。

另一個方法，你唔洗沽出現有物業，將佢地放租，以租養樓，從而節省買賣物業之成本。之後，港島區自住房則另外購買。

但這樣做，風險就會較高。因為當你買入新港島區物業後，資產會極之偏重物業類。當物業市場有問題，你成個財富組合，會有嚴重影響，你要自己衡量。

不論你用那一個方法，你都應將每月閒錢和置業後餘下資金，盡力投入優質股，去提高優質股係你財富中的比例，去盡力提高平衡性。

策略上，你可以投資「平穏增長股」和「潛力股」。你每月5成儲蓄做月供。其餘先儲起，用一邊月供一邊儲蓄的策略。

你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

到你有一定投資經驗﹐潛力股比重可以相應調高，佔組合約3-5成，視乎你當時投資經驗多寡和了解這些股票程度而定。

現時大市只是合理區，你現有資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

現有匯控(0005)都可以持有，但佢係收息股，就要係收下息，唔好預佢有太大增長力。而且，佢已有一定數量。所以，你暫時唔好增持佢或銀行業股票。

個別企業和行業，不要佔組合15%和30%以上，銀行業更加不要高於組合20%，否則會有過度集中性風險。

------------------------------------------------

Q22220：

龔sir, 你好，求教呀！我同老公因為住屋問題，攪到非常煩惱，想聽聽你的意見。我哋十年前買落2房戶，住到現在，但仔女已步入青春期，

需要各自有自己房間，但3年前我哋將宜家2房戶加按，再加上當時儲蓄，買多咗個1房單位收租，所以宜家煩惱緊應該賣出自住單位，樓換樓呀，

還是自住物業放租，然後再租一個3房單位住呢？

如果樓換樓的話，我哋計過財政上會有壓力，但仔仔已是中三生，有必要同妹妹分開房間。龔sir，請你教教我哋該如何做？

我哋宜家現金只有700k左右，股票只有2800（但冇諗過賣），如果真的要樓換樓的話，計過同區屋苑，最平都要補2百萬現金，仍未計stamp duty, commission payment 等雜費。

龔成老師︰

你有2個方法，第一個方法就係你所講，將現有自住單位放租，之後再另租一個3房單位。好處係你可以保留原有物業，同時也減少了買賣物業的成本。

另一個方法，就係盡沽2個現有單位，去買入一個3房單位自住。這樣做以2間細屋，換一間大屋，相信可以減少你財政上壓力。但中間買賣物業的成本，就會相對較大。

而且，你會失去左一間單位租金的現金流。

至於用邊個方法，你可以睇翻整體財政狀況，邊個方法會較穏當。另外，你都要考量埋現有物業質素。若佢地長線係有增長潛力，你用以租養樓去保留佢地，會比較好。

若投資價值一般，你可以沽出套現，直接買一間大屋，就可以了。

但緊記，你要有信心長線供得起，才好置業，否則用方法1會較好。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21501-Q21520）

Q21501：

阿sir ，我每個月供～$25000 股票，3成收息股，3成穩健增長股，4成新經濟股，供了4個月都只係賺得5%，冇20%，距離我目標仍好遠，會唔會出了什麼配置問題？

龔成老師：

第一，你要睇長期，不是短期。

第二，股神巴菲特一年的平均回報是20%，要思考目標的可行性。

第三，月供股票的回報不及自行投資，但好處是風險低，你要睇翻自己的風險承受能力，以及投資實力，決定每月月供的比例，留現金等投資機會的比例。

我地投資，一定要「先想風險，後想回報」。

------------------------------------------------

Q21502：

老師，我正溫緊書，想請教房託類市帳率為何過住10 年數據都咁穩定？

自己係第4 堂note p.92寫左上高句野，想知多少少

龔成老師︰

首先，你要回憶翻何謂市帳率。就係"市價" / "帳面值"

房托主要係透過旗下物業放租，租金就係佢地收入主要來源。房托企業很少作額外發展，故帳面帳變化較細。

而且租金收入，一般都穏定，市場預其佢收入唔會有太大增長，因此市價都唔會太波動。

所以，整體你會見房託類的市帳率，波動好細。

------------------------------------------------

Q21503：

龔sir, 你好，睇完你本書《50股》，真係明白好多，又容易理解

但我都想請教，由於資金有限，只可以從書中3選1
@0916 （依家就似你書中所講過熱投資）
@0868 （價格冇點變動，但利好）
@0968（現價格好似適中，但利淡）

另外仲有：
@1250
@3818 係睇其他報導
謝謝！

龔成老師：

北控清潔能源集團（1250）、中國動向（3818）質素唔算高，你選翻上述的3股，長線投資的價值會更高。

上述3股，你都可以考慮，信義玻璃（0868）最穩健。

這股有質素，仍有增長力。

當然，近年股價上升了不少，股價是唯一的風險，業務則仍是長期睇好，市場長遠發展正面。

現價大約在合理區頂，如投資，這刻唔建議大注。

另外，龍源電力（0916）都可考慮，有質素，這股有長線投資的價值。

佢係中國發展風力發電業務，收入大部分來自銷售風電場及火電廠所發的電力，而有關電力銷售主要倚賴淨售電量及上網電價。

旗下客戶為風電場及火電廠連網的各地方電網公司。

過往業務發展不差，生意與盈利保持增長，不過股價就有少少波動，現價合理區頂，但就要留意股價上落風險。這股可長線。

信義光能（0968）潛力度高，但風險都較高。

------------------------------------------------

Q21504：

老師你好，小弟開始計劃加入新經濟股，希望能解答疑難

（1）9618同9888長遠有增長力嗎？

（2）如果同時持有上邊2隻股得唔得？

（3）舊經濟股現時仲可以加注嗎？

（4）若持倉較少新經濟股，咁係咪應該加入新經濟股先？

（5）小弟睇好9618，9888，若加注3067，9618，9888作長期持有可以嗎？

龔成老師：

1）+2），有，兩隻都有投資價值，如果同時投資，可以。但由於類別有少少近，因此合共佔的比例不宜太多。

京東（9618）會較百度（9888）穩定，而百度的潛力度會較高。

京東業務有質素，發展仍是正面，不過現價就唔算平。

佢係一間電子商業銷售平台，佢定位為「以供應鏈為基礎的技術與服務企業」，現時是中國第二大電商，有一定的品牌。同時，根據《財富》按收入統計的全球500強排行榜，集團是中國最大的零售集團。

佢目前業務已涉及零售、數位科技、物流、技術服務、健康、保險、物流地產、雲計算、AI和海外等領域，其中核心業務為：零售、數位科技、物流、技術服務四大板塊。

京東已建立自己營運覆蓋全中國的物流基礎設施，以支持電商業務，打造了線上購物體驗，係2017年、2018年、2019年，活躍用戶數達到了2.9億、3.0億、3.6億。可見已建立了一個巨大的網絡。

佢經營線上零售，以及電商平台業務，線上零售業務方面，從供應商購買產品，然後直接銷售給客戶，並從24,000多家供應商採購商品。

佢的物流基礎設施佈局覆蓋了中國幾乎所有的區縣，包括遍佈89個城市、累計總建築面積約1,690萬平方米的700多個倉庫，包括京東物流技術開放平台所管理的倉庫面積。

從質素上，這股不差的，現價算是合理區中上部至頂，如果買，都可以，但要控制注碼。這股可以長線投資的。

3）可以，大部分相關股，現時在合理區內。

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

4）要睇你的年齡、風險程度，去設計長期的配置，去設計長期的配置比例。再根這個比例，去衡量現時加入那類股。

5）可以，但合共的比例，不能過多。

------------------------------------------------

Q21505：

老師你好~我今年年頭開左個網店 ,來緊下月會租格仔舖試下開舖既反應

其實我而家手頭上無太多現金流 , 主要都放哂係股票 , 有10萬左右 , 其實我想入多D貨 , 想問你意見 , 放左部分手頭上股票 ? ( 0388 , 01810 , 02800 )

還是以低息借貸去入貨做生意呢? 因為長遠會想租一間舖頭去做生意的, 我預10萬起步基金

另外，我有諗過借貸買股票 ( 一定唔係短炒 , 係長期 ) 等唔等於買樓做按揭 ?
感謝老師

龔成老師：

網店你要找到一個獨特的市場，做生意不要與其他人硬碰，要有自己的獨特性，你往往要不斷試先能找到市場的爆發點在那裡。你唔好太急去做太大生意，除非你確定市場正爆發中。

至於你現時的持貨，基本上無問題的，可長線。但留意，你要留翻多少少現金在手，不要零現金，否則當大跌市出現時你就無錢把握到機會。

借貸長線投資，等同於預支資金去買股，由於物業與股票的性質不同，因此股票會較物業一般風險較高，因為物業有穩定現金流，同時可抵押性一般較高，而股價上落的風險一般較大。

因此，這貸買股，風險會比物業高，除非大跌市令股價好平，好有值博率，否則，未必太建議。

------------------------------------------------

Q21506：

老師，我之前聽你建議我宜家每月都月供港鐵、領展、3067，亦都記得你話未來香港樓市升幅不會像前十年升得咁勁，所以諗住轉買車位投資。

我年尾會搬康城，請問你對康城車位有咩睇法？有投資價值嗎？大約要200萬每個車位。或者香港有冇其他地區嘅車位值得投資？ 多謝老師你嘅意見同時間先！

龔成老師：

先以住的角度分析，康城比之前好左，因為交通、配套開始足，加上九龍東的發展不斷，都利好了康城區。

而車位都會因為上述因素而加分，不過，潛力度始終不算好高，投資價值中等。

你要考慮當區及屋苑裡，住宅與車位的比例，以及租金回報率資料，先有具體的投資價值。

至於車位投資，其實現時的吸引力整體算是中等，不過已比之前好，之前車位貴，現時已由高位回落了兩成，投資價值好翻D。你可以留意一下大型，中產地區的屋苑車位。

------------------------------------------------

Q21507：

你好龔老師，最近我買左你嘅股票勝經呀，概念上慢慢改變緊嘅，希望一路吸收知識，好好理財。

另外我手頭有400股772，平均價係70.35，係咪應該要放左佢入其他更好嘅股票？

同埋我最近留意緊3067同2382，現價合理可分小注買入嗎？

龔成老師︰

閱文集團（0772）這類股，並不易分析的，因為佢的生意模式未完全穩定，可說是有危有機，這一定令業務的不確定性較大，同時市場對佢的估值變化亦較高。

集團從騰訊控股（0700）分拆上市，在中國運營網絡文學平台。業務包括在線閱讀、版權運營及紙質圖書業務。

業務發展是有的，但盈利變化大，未能好確實分析到這經營模式的賺錢能力。同時估值難分析，唔能夠確定這刻平貴，只可以話唔算特別平。

這股長遠應該都有發展力，但這刻就唔建太過大注。

如果這400股只係佔你組合不多，可以持有。但若佔較多，建議先沽出200股，去平衡翻個風險。

至於舜宇光學科技（2382）現價略貴，回1成左右才入，值博率會較高。

而安碩恒生科技（3067）算係合理區頂至略貴，你無貨，可以先階下先小注。到有較大回調，才正式入貨。

但留意你以上所講的，都是一些較有潛力股票。如果你本身投資經驗不多，投資取態較保守，或者你係偏向年長，我都唔好持有太多這類股票。

因為潛力股都有一定波動性，風險會係較高。

------------------------------------------------

Q21508：

老師 你好 我媽媽留左50萬俾我 我要保本，買定期 但利息小得厲害

我想分別買3-5隻收息股2 /133 /941 /1398 /2638/1373/3187/

你可以俾啲意見我嘛 你可以揀幾隻 俾我參考下嘛。

龔成老師︰

若你這筆資金，係以保本為主。定期利息雖少，但其實係一個適合選擇。

因為就算收息股波動性再低，畢竟佢係股票，股價波動係在所難免。

買不買收息股，要乎你媽媽承受風險能力。或者可建立一個組合，部分定期，有部分就收息股。

你上述收息股，都係有質素，除了招商局中國基金(0133) 多年出現虧損，不建議投資外。

你可以考慮用香港電訊（6823）、恆生（0011）、置富（0778）、陽光（0435）、深高速（0548)等去取締。

但留意3187, 0778, 0435同是地產類股票，同一行業不要大於組合30%，否則會出現過度集中風險。

現時大市只在合理區，你可以先用一半，分注入貨。餘下一半，就等大跌市才出手，咁會較好。

------------------------------------------------

Q21509：

長汽2333 如何呢？

吉利好還是長汽好？

長汽業績唔差，但又跌成咁，感謝龔sir。

龔成老師︰

長城汽車（2333）有質素的，業務都不差，不過，過往的增長力不算好強，長遠業務發展雖然正面，但未必是潛力型。這股都有長線投資價值。

過往佢股價偏貴，現在下跌只係將股價，回到一個較合理水平。質素上，唔見有明顯轉壞的情況。

現價算係合理區頂，可小注。

而吉利(0175)同樣質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。

另外，佢早前杭州灣新工廠正式發布純電動新品牌新車「極氪（ＺＥＥＫＲ）００１」，宣布吉利進軍高端電動車。

這些動作不單有利佢有中國發展，同時長遠，可能加快了海外發展速度。因此，這股長遠仍是正面的。

未來電動和智能車，將會係行業發展的大方向。這方面，吉利的質素會較長汽好，長線計，投資吉利會較有利。

吉利(0175)現時價位在合理區頂位，股價波動，暫時只宜小注都得。到有較大回調，才正式入貨，或現價月供都可以。

------------------------------------------------

Q21510：

3918
1909
3319
我對以上股票有興趣，應該挑選那一隻比較好？

龔成老師︰

金界控股（3918）有質素的，但始終新興市場，因此點都有風險。佢會因全球的疫情，而影響左生意，但這只是中短期。

長遠計，佢仍然正面，佢之前有項目獲當地政府批准發展5幢建築面積共逾580萬平方呎的物業，包括提供共4700個房間的酒店群、娛樂場所及公寓等。我相信長遠對佢仍正面。

這股股價較為波動，不過都有長線投資的價值，分注投資可以。另外由於市場新興，在注碼上不能投資得過多。

火岩控股（1909）有質素的。佢主要從事開發網頁遊戲及移動設備遊戲（包括遊戲設計、編程及圖像製作）以及授權全球各地的營運商營運集團自主開發的遊戲。

遊戲已在北美、日本、歐洲及中國營運。集團收入主要來自授權費及出售遊戲幣。

業務發展理想，生意與盈利都有理想的上升，賺錢能力強，基本上有投資價值，暫時睇，前景仍是正面的。

不過要留意兩大風險，第一，佢行業是一些變化較大的類別，無人知當中的優勢能持續多久，始終市場變化可以較大。

第二，股價上落大，現價合理區上部，投資值博率都有，但未算高。因此，如果要投資，就要控制注碼。

雅生活服務（3319）不錯的，佢無論在業務本質、規模、品牌、財務數據、前景，都是理想的，反映這企業有一定的質素。

加上這企業的背景因素，以及行業的發展，相信這企業的前景不差，有長線投資的價值。

整體是有長線投資價值的。現價合理，不過股價都會有時出現波動，投資宜分注進行。

以這刻值博率計，金界控股（3918）和雅生活服務（3319）會係相對較高。

但留意，以上3隻都係波動性較高股票，不宜佔組合過高比重。如果你投資經驗不足、年紀較年長、或者本身投資取態較保守，只宜好小注。

------------------------------------------------

Q21511：

老師 我呢排睇好多同比特幣有關聯既股份。雖然本人對比特幣信心唔係去到好大，但我覺得區塊鏈技術係未來好大機會普及。

你覺得1263，1611，0863，1499，1647 邊隻最有潛力，同埋現時可大注嗎?

另外想問你點睇美股隻SOS同CAN

龔成老師︰

無錯，區塊鏈技術係將來，預期會日漸普及。而比特幣，是利用區塊鏈的其中一項產物。

至於比特幣相關股份，如果你要投資，建議你要認研究企業細節和質素。唔好因為好比特幣，或者見比特幣走勢好，就去入貨。

栢能集團（1263），火幣科技（1611）、BC 科技（0863）都係有風險，有回報的類別。投資這類股係可以，但估值唔易，只能說，投資時一定要控制好注碼。

歐科雲鏈（1499）無特別研究，佢屬較高風險類，要睇下你博唔博。過往持續虧損，見佢股價上落好大。只可以話，唔建議大注，自己衡量風險。

雄岸科技（1647）主要於新加坡從事提供綜合樓宇服務，當中專注於維修及安裝機電系統，以及提供建築及建造工程服務。

此股規模細，賺錢能力唔算好強。在2020/03年度，核數師意見係"無保留意見（修定報告）"。雖然唔代表盤數一定有問題，但我自己保守D，會對佢有所保留。

Sos Ltd（SOS）主要業務是提供消費信貸業務，和緊急救援服務業務的控股公司。

初步睇，佢企業規模唔算好大，生意額都唔算十分高。加上業務性質，會令佢收入較波動。過去幾年，一直都在虧損狀態。

暫時所見，投資價值一般。如果你有研究，覺得佢有潛力，可投資。但只宜小注，以控制風險。

Canaan Inc(CAN)通過專有的高性能計算專用集成電路提供超級計算解決方案。

公司為客戶提供整體人工智能解決方案，包括人工智能芯片、算法開發和優化、硬件模塊、最終產品和軟件服務。

我未研究此股，粗略睇此股市值不高，近年生意有下滑情況，近年更轉盈為虧。這是短期問題，還是集團技術已經追不上大環境，要再觀察。

暫時不建議投資，最好再觀察一下發展，才作決定會較安全。

------------------------------------------------

Q21512：

老師，我睇緊你本財務自由行有野唔係好明

因為樓價上升既速度快，而家租金回報率唔再有5%！如果得4%既回報率，凈息差只有1.5%咁係咪表示而家買樓只係「平倉樓市」，只係賺樓市既升幅？因為租金都唔係好夠比每月既銀行供款！

龔成老師：

現時的租金回報率，大約為3%，而按息大約為2%，淨息差約1%，可以視為投資物業得到的淨回報並不高，因此，作為投資者，利用借貸買樓，吸引力只是一般。

你可以理解，投資物業只能賺升幅，租金回報部分無乜得賺。

而「租金都唔係好夠比每月既銀行供款」，其實供款包左：還錢、還息，如果每月收到的租，基本能還到息，即最每月正在「償還本金」，對投資者其實是一個財富累積的動作。

另外「平倉樓市」的意思，是指個人持有物業狀態，不要亂左，你可以再睇翻《財務自由行》內容。

------------------------------------------------

Q21513：

龔Sir，
請問你354(中軟),659(新創健)如做月供边隻好D。

晤該阿Sir幫我揀。

龔成老師：

中國軟件國際（0354）企業本質不差，但行業有少少波動，略有風險，但前景正面。現時大約在合理區頂位。

因為佢太多收入來自華為，這是核心風險，因為這是客戶集中的問題。華為久不久因中美因素，從而影響到這股，大部分都是中短期，當然有一些會發展至長期性。

長遠仍算正面，但無可避免存有風險，你如投資，就要分注，控制注碼，同時明白這股股價較為波動，前景可以的。

新創建集團（0659）都有質素的，佢係是新世界發展（0017）的基建及服務旗艦，業務遍及中國內地、香港、澳門。

新創建係一間綜合企業，可分為7大業務：道路、環境、物流、航空、設施管理、建築及交通、策略性投資。當中可分為兩大類，即是基建及服務

整體的質素，算是不差，但又未到最高級別，業務分散於多個範疇，部分與公共事業有關，過往的生意雖然穩定上升，但盈利卻停滯不前。

企業本身不是沒有優勢，長遠仍有增長能力，但由於賺錢能力略有下降，加上企業本身已很龐大，增長期望不會太多，過往過價大致穩定，投資宜集中在股息多於股價回報。

另外，近期的肺炎對佢有一定的影響，相信中短期仍弱，不過長期來說。仍是有投資價值。

現價合理，分注投資可以，但這股不建議太大注。同時要耐心等好轉，明白佢增長力不強。

兩隻都有質素的，如果要2選1，好簡單，睇翻你本身的風險承受能力、投資目標。

如果你想增長高D，就中國軟件國際（當然風險會高D），收息及基本增長，就新創建。

------------------------------------------------

Q21514：

龔先生，你好！最近開始睇你80後百萬富翁的書，開始設定自己的目標和理財計劃。

我本身都有放錢係股票市場，但投資概念都同一般散戶一樣，見低就買，賺少少就放。

最近睇你本書之後，略略對自己持有的股票分析下，發覺好多都落係新經濟股，所以風險較高。

我持有388，1398，3988，3690，1810，9988，6618，6060，6690&3993，大概總供有25萬左右。我覺得自己要再重整一下投資的策略。

想分散吓風險。係咪應該將6060，6690，6618呢幾隻賣咗佢。我想入1919，佢質素好嗎？另外都想每月供股，應該供邊隻好？

我係澳門人，我見你有開班，你會唔會考慮用zoom做線上教課呀？

龔成老師︰

記住，我地投資係長線，特別是優質股，因為賣出股票最大的風險，就是買唔翻。

好多散戶會覺得「若果現在賣出 到時再以低價買入」。「到時再以低價買入」？真的發生嗎？？？

你試想想，如果用你賺少少就沽的策略，在過往，港交所（0388）、騰訊（0700）在這麼多年，股價上升100倍時，你的方法能賺到多少？

可能連一倍都賺唔到。你怎樣能賺到100倍，就是「唔好賣」。

你現時持有的都是優質股，可長線。但正如你所講，太過偏重係新經濟類這種潛力股。

若果你係年青人，風險承受能力較高，潛力股佔5成都可以(但經驗較淺，要下調至3成)。但若你係中年人，最多佔3成好了。

你可以睇翻潛力股佔組合比重，如果太高，你係可以沽部份，好似眾安在綫(6060)、京東健康(6618)、美團(3690)這類風險較高的潛力股，去平衡風險。

如果只係高左少少，你可以不用沽貨。利用新資金買一些平穏增長股，去將個比重慢慢拉平衡即可。

海爾智家(6690)業務不差，而且相對平穏，你持有就可以。

中遠海控（1919）主要從事提供集裝箱航運、集裝箱碼頭管理與經營服務。

整體的質素算是不過不失，雖然在行業有一定的規模與優勢，但行業整體的賺錢能力無過往咁強。

經濟好轉會對佢有利，因為始終是對經濟較敏感的行業，現時的股價已反映相關利好因素。股價大升後，其後之後較難有高增長，因為已反映了利好因素，反而預佢之後轉為平穩增長。

現價略貴，回1、2成才入貨，會較好。

而網上課程，因為擔心有被人偷拍風險，故暫時不會安排，還望見諒。

------------------------------------------------

Q21515：

你好，想問你對777和914前景如何？謝謝

龔成老師︰

網龍（0777）主要從事網絡遊戲開發（包括遊戲設計、編程及繪圖）及網絡遊戲營運；教育業務；移動解決方案及移動營銷業務。

另外，佢近年有發展教育業務，相信長遠都有前景的，但業務始終有不確定性，市場具體情況仍有未知數，所以，投資價值是有。若想投資﹐唔建議太大注。

安徽海螺（0914）有質素，有增長力。

佢主要從事生產和銷售熟料和水泥製品，業務地區包括中國東部、南部、西部、中部及海外。而安徽海螺是水泥行業中，全球最大的單一品牌供應商。

水泥屬於基礎原材料行業，對建築行業有很高的依賴性，同時亦會與經濟增長速度有較高的相關性，特別與固定資產投資相關。即是說，當中國基建及房產市場不景，水泥行業會比一般行業處較大的不利狀態。

另外，水泥企業在生產過程中，燃料成本佔總生產成本中約佔了超過一半。若能源價格出現較大變動，就會對企業成本造成較大影響。因此，當能源價格出現較大上升時，將引致安徽海螺的成本增加，影響其中毛利。

綜合來講，佢擁有相當規模、生產能力，有一定的質素及賺錢能力，而水泥行業長期將因中國城鎮化以及一帶一路的建設，仍然會增長，但不會像過往般快速，而是進入較平穩的時期，在本質上此企業不差。

現價勉強合理的，無貨的話，你可以小注，但要留意盈利有潛在波動。

------------------------------------------------

Q21516：

龔成老師您好，請問9911，6666，2327，883呢幾隻係咪潛力股？依家都蝕緊5-20%，是否應該止蝕？

另外有一直購入3067，暫時蝕緊，不過唔擔心，但請問咩價會比較適合入？

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。因為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

赤子城科技（9911）算是潛力股類，佢主要從事開發一系列移動應用程式、健身應用程式、遊戲應用程式等。佢長遠有發展的。

業務上，係有吸引力的，但就仍未算好穩定，盈利上落較大，但長遠增長力是有的，加上業務規模細，發展力強，不過風險都會有。

這股質素中等，不宜持有太多。若持股不多，可以守。若太多，就要沽少少去平衡風險。

恒大物業(6666)算係平穏增長至潛力股之間。此股同樣可持有，但只宜小注。

美瑞健康國際（2327）主要從事抗衰老健康管理服務及銷售藥物；房地產代理及建築材料貿易服務；買賣健康醫療產品及建築材料。

生意雖然有增長，但業務有點波動，企業規模細，獨特性不強，投資價值只是一般般，不過初步睇，不是劣質類。

長線計，慢慢換碼至其他優質股較佳。

中國海洋石油（0883）不自潛力股，只是一般商品類股票。

石油是商品，當中沒有差異性，這令佢地的獨特性有限。這類商品企業，都可投資，但就要明白不是最高質的企業，只宜小注。

安碩恒生科技（3067），有長線投資價值，現貨可持有。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴。你有貨就不用急，等佢每月10%左右回調，才再加注，並長線持有。

------------------------------------------------

Q21517：

老師，請問1810 在30蚊揸重貨，6865在33蚊揸重貨。。6618有150蚊揸重貨？請問要走貨嗎？

請賜覆

龔成老師：

你如果持貨不過多，持有就得，你要問翻，佢有那些業務明顯轉壞，要令你賣出這隻優質股？

業務發展一直良好，只是股價之前貴，現時回翻，根本業務完全無變，優質度無變。

唔好太著重短期股價，睇「企業業務」「長遠發展」。試下唔好睇股價，了解翻佢業務，如果你想賣出，要找出佢「業務轉差」的理由！

小米（1810）可長線，但如果你佔組合%太多，可能要上翻D減持。

福萊特玻璃（6865）其實都有質素，但都幾波動，唔建議太過大注。這股可長線。

京東健康（6618）都有類似情況，可守。只要不是貨多就得，但你預佢上翻去需時。

你有幾個問題。

第一，只投資熱炒類或市場焦點股。

第二，一次過在高位買入，而不用月供或分注投資。

第三，無建立一個平衡的組合。

第四，無計過企業價值，全部都在貴的時候買。

最後，建議你大幅提高你的投資知識。

------------------------------------------------

Q21518：

老師，我忽然有一個想法，希望老師可以指點一下。

既然中電和港鐵都是平穩增長股，是否應該先月供其中一隻，將$2000集中投資一隻谷大股數？

到將來有能力每月撥多啲錢才投資其他股票？港鐵和中電之中選一隻是否港鐵比較有潛力？謝謝老師

龔成老師：

你要留意平衡。

當你太集中去供一隻的時間，組合就會出現中短期失衡，相反，如果同時供兩隻，雖然要較長時間先可以同時有一定的數目，不過組合能一直保持較為平衡的狀態，這是對投資者重要的。

其實，如果資金可以的話，應該整個財富組合都有這模式，當然，實際操作上有點難，因此盡力平衡就得，同時，我地都會考慮每隻股票這刻的平貴度，去決定入貨的力度。

------------------------------------------------

Q21519：

龔老師，我想問︰

1. 751 創維 $2.88 入了 放了一年、 應該止蝕嗎？ 很多好消息 為何還不升？

2. 另6030 值得多買嗎？ 經常很大上大跌 但我個人覺行戈好好炒 ... 經常朝早買 下午放 day trade 一流 ...

3. 另1375 應止蝕嗎？ 2.88 買 、 放了2 年了 🥲蝕好多 ...

4. 另買之前 sir 認為買前功課應做咩？ 是否看左周年報表先？ 或先看多小才經新聞先？

thz

龔成老師︰

1) 你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

中短期價格，與企業本質唔一定有直接關係，就算有好消息，唔代表一定會升。我地分析一隻股票價值，應該用長線去分析。

創維集團（0751）從事電機、智能系統技術業務、智能電器業務等，中國及海外都有市場。

近年增長力唔算強，生意未見有擴展力，盈利有點波動，整體的品牌價值及銷售網絡，未算好強。長遠發展力只是一般。

現價合理，但你預佢增長力唔算強，長遠算是不過不失。若你持貨較多，可考慮沽少少，去減低風險。如果持貨不多﹐可以守住先。

2) 短炒我見好多人都係蝕錢收場，股價中短期一定會有波動，唔好用種估走勢，賺差價模式去投資。優質股一定要長線持有，才會最有利。

中信証券（6030）質素算是中等，增長力不強。

其實佢不是無生意，盈利都有，但增長力就是無乜動力，發展力亦不強，現價合理，但這股又唔值得佔組合比例太多。

3) 中州證券（1375）從事投資管理、投資建設項目所需工業原材料及機械設備，原材料銷售及房屋租賃。

佢以中原証劵股份有限公司的名義於中國經營業務，另以「中州證券」名義於香港開展業務。集團之主要業務包括：

（１）經紀：代客戶進行股票、基金和債券交易，並提供融資融券服務及執行商品期貨及金融期貨交易。

（２）投資銀行：向機構客戶提供投資銀行服務，包括股權融資、債權融資和財務諮詢。

（３）投資管理：包括資產管理、直接投資和基金管理。

（４）自營交易：通過自有帳戶從事股票、債券和基金以及衍生工具等交易。

（５）其他創新業務：用自有或籌集的資金從事其他資本中介業務，如股票質押式回購交易及約定購回式證券交易等。

睇翻過往的財務數據，只是一般，生意無特別增長力，盈利波動，未見好賺，而企業獨特性不強，規模不大，投資價值不算高。

若你持貨較多，建議在反彈時沽出部份，餘下小注可以守。

4) 看年報、財經新聞、公司網站，睇相關書本和上課程。

我建議你先學好正確投資理財概念，才慢慢學分析和投資股票，會較理想。

你可以睇我寫架"80後百萬富翁"、"財務自由行"和"股票勝經"，會對你有幫助。

------------------------------------------------

Q21520：

龔成老師我想問,我現時34歲,最終目標想達到財務自由,現時目標先要增值資金,收入中等4萬左右,有一萬要比父母,同伴侶租屋(租金一萬)

每月儲到1萬5左右, 現時現金有120萬左右,之前有係4X位入過1211 3手,但後期疫情伴侶叫我沽左佢(賺dd),我又真係好聽話沽左,後悔左超級耐down左一段時間

之後開始去圖書館借你頭幾本書,又慢慢再買你d書, 經過閱讀你d書沈澱左後,最近再出發,現時手頭上股票有:
005(2800股, 買入53)005係疫情前買；270 (6000股, 買入12.25); 823 (600股, 買入62.3); 1810 (600股,買入22.75); 1830 (12000股,買入4.55); 3067 (200股, 買入16.8 ）

由於最近先再出發,價位已經唔平, 想問老師黎緊我應該點做較好?

股票會唔會買得太散?邊方面的股票可以增加返多d?005我諗到返差唔多位置就沽左佢, 轉換其他

同埋我而家唔會同伴侶講有咩股票,發覺我手上股票一跌佢就好緊張叫我沽. 謝謝老師, 希望好快可以係澳門見到你(已留名上堂)

龔成老師：

比亞迪（1211）事件過去就由佢過去，但佢比到你一個很好的經驗，就是明白優質股長線投資的道理，只要你做好這點。之後行翻正確的方向，你睇到的一定更加多！

現時你的持股，其本上都是有質素的，無太大問題，由於你34歲，財富仍有增長，因此收息股如匯豐（0005）就未必是最好的選擇，你可以等之後上翻，賣部分或全部，轉其他。資金可加入3067及港鐵（0066）、銀如（0027）這些股。

你現時的現金比例較多，要好好運用，暫時先慢慢加入平穩增長股+潛力股先。

你34歲，潛力股及平穩增長股，可以「5：5」，但如果你投資實力不足，就「3：7」，我會建議你這刻，唔好有太大變動，從比例上，潛力股類別已差不多，反而可等你上完堂，學好知識後，先正式進行配置。除非大市大跌，否則。這刻不用做任何野，投資是長期戰的。

只外，你現時不與伴侶講有咩股票，是正確的，因為一般人對股價上落的心態都不正確，所以不講好過講。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q19061-Q19080）

Q19061：

老師：見你FB 有此說法「98%的散戶想法，會停留在「賺現金差價」，但你要明白現時的貨幣系統，現金已不是錢，資產才是，不斷追隨現金無法賺到大錢。你要跳過98%散戶的想法，了解有錢人怎樣賺錢」

那麼，Cash is King 是錯的嗎？

長期持有優質股票，只買不賣，是為了賺取股息？這豈非要持有大量優質股票才有大額股息？

我是否想錯了？謝謝老師

龔成老師：

「Cash is King」是錯誤觀念。

你睇翻全球的有錢人，他們是怎樣賺錢。

我20年前開始睇致富類書，就是見到所有有錢人，都不會有「Cash is King」概念，他們明白，現金不是「真正財富」，現金只會貶值，最重要是持有資產。

李嘉誠利用地產致富，巴菲特利用長線持有優質股致富。

他們大部分資產都是一些「會增長的類別」，長期持有。

而佢地都會持有現金，不過，佢地明白現金的作用只是「等投資機會」。

現金正在無限發行，永遠貶值，持有現金只會成為輸家。

你唔好停在「要賣出股票」的概念，要有「真正財富的概念」，建議你多睇書，《股票勝經》《財務自由行》對你好有用。

------------------------------------------------

Q19062：

龔老師，你好，我近排先追隨你，我啱啱供咗盈富5000，小米1810供1000，1177供1000，比亞迪1211供2000

比亞迪呢個月先開始供，87蚊供咗23股，宜家咁高，我停?還是繼續供落去呢?
請你指教，謝謝。

龔成老師：

現時的確有點兩難，因為潛力股的股價上左唔少。你可以停一停比亞迪（1211），其他就保持月供，長線進行。

始終比亞迪$100以上都貴，你等佢落翻先考慮，又或者供另一隻。

------------------------------------------------

Q19063：

龔成老師你好，因為我唔肯定現時採用嘅儲蓄planning 好唔好，所以想問你意見

背景： 2019大學畢業生，已穩定工作一年幾個月，月入平均17k, 因為讀書嘅時候感受到貧窮嘅無力感，所以一開始做嘢就好急草錢，有持有公用股for 長線投資，自從幾個月前睇到你嘅書同fb嘅Q&A，都有每個月用$6000月供幾隻股票，當中盈富佔$3000:

長線持有中 (未有增/減持想法）:
1. 0003 (10500@$11.52)
2. 02638 (4000@$7.81)

月供中:
1. 00823 (62@$62.01)
2. 00066 (150@$39.38)
3. 02800 ([email protected])
4. 00669 ([email protected])

一共大約16萬股票，如果唔計mpf，大約有5萬蚊嘅現金儲蓄，不過因為遲啲要做手術，可能得返2萬左右。

因為轉咗工，下個月我嘅薪金會上調至19k，2年後可能會同朋友夾份搬出住，變相每個月支出更多。

有計過條數，我其實係需要更多現金儲備，但係我又想係未搬去，趁未有另一筆開支前，可以增值我嘅資產，入手更多優質股。所以有幾個問題想問：

1. 因為薪金上調，我應該點去分配？定還是我要降低月供嘅金額，放更多落現金儲蓄？

2. 宜家月供緊，感覺上係有排都未供完，我想知幾多手先叫足夠？

3. 因為我所選擇嘅股票都係長線投資，增長都慢，假如真係有需要拎一筆錢出嚟，我係咪要放咗股票？定係我要接觸下短線投資？

另外特別想多謝你之前分享月供股票呢個概念，可幸嘅係 我可以趕係中低位嘅時候開始月供，所以均價都唔高，多謝！

龔成老師：

1）當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

我見你現時持有的，部分只是收息股，如煤氣（0003）、港燈（2638），這些股雖然有質素，但就未必好適合你年齡，所以，你可持有，但唔好加注。在之後的財富配置，要提高翻增長力。

你可考慮月供盈富（2800）+安碩恒生科技（3067）。

2）你可以保持月供的，這是一個財富配置的計劃，不一定要有「完」的概念，是將你財富有效配置的模式。

你要思考，怎樣對你財富最平衡，現金與股票，各類股票等。同一股票太多就會有集中風險。

3）唔好短炒。

你先要儲一些現金，如果有需要用現金，就先動用這筆先。之後先考慮賣股票。

------------------------------------------------

Q19064：

成哥 有置業既問題想請教你

我同女朋友準備3年後買樓結婚
而家我收入27000 佢32000

佢係政府工會跳point
我係持牌測量師 跳糟後30000以上

3年後大家約定儲到80萬作首期同雜費

資產方面

1. 自住公屋 綠表市值220萬左右 但未供完 欠36萬
2. 港股+美股 共20港幣
3. 珠海公寓 約值100萬港幣 簽左10年租約 10年回報約25萬港幣

欠債
1.信用卡欠款約27萬 投資用 每月供6400 3年半後供完
2. 政府學費 13萬 8年後供完

手上仲有2年半後家人既綠表資格

所以我打算3年後用綠表抽新屋

因為都比較難抽中
如果抽唔中

買私樓好 定居屋二手市場好？
另外買幾大先易轉手？
如果買左上述既物業 同時又抽中左綠表市場既新居屋 點樣配置好？

麻煩哂成哥

龔成老師：

無論你之後的置業情況如果，都建議你這幾年，集中在股票方面的投資，利用股票去進行財富增值，至於買甚麼樓，慢慢決定都得。

當然，你唔能夠全部持有股票，一定要部分留現金。

你可以以平穩增長股為主，分注投資優質股就得。

置業方面。從自住角度，政府樓是較著數的，因為你每月的現金流支出較少，這就可以令你有更多資金投資，原理就是自住政府樓與住私樓，在相同自住概念情況下，政府樓的每月支出一定較少。

不過，在投資角度，私樓長遠的租金收入，以及升值能力，一般都會比政府樓較好。

你可以這刻先買二手居屋，同時之後不斷財富累積，之後先再私樓。

------------------------------------------------

Q19065：

你好呀龔先生 我有好大既家庭負擔 又唔識投資買股票 又想增加資產 銀行有70萬 成日想買保險儲蓄 由得佢擺 幾十年後比小朋友 唔知咁樣做岩唔岩

定係可以有其他方法快啲增加 請問可以比少少意見我嗎？

龔成老師：

如果你有家庭負擔，在財富配置上會偏向穩陣。

不過，全部持有現金都不是方法，你可以留$35萬現金，餘下$35萬就投資股票，部分平穩增長股，部分收息股。

平穩增長類你可以考慮盈富（2800）。

另外再加：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

收息股可考慮：5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）都可以。

你唔好一次過入這些股，要分注，要慢慢進行，部分資金要等跌市才動用。

------------------------------------------------

Q19066：

老師，我剛退休，收到一筆約七百萬現金，我好迷惘，想請你指點一下如何配置。

龔成老師：

你可以將這$700萬，分成5部分。

第一部分投資收息股，你可以建立一個收息股組合，你可考慮港燈（2638）、香港電訊（6823）、恆生（0011）、工行（1398）、置富（0778）、陽光（0435）、深高速（0548）等，大多有5%股息

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

（你可睇下《50穩健收息股》當中仲有好多）。

你平衡的投資這些股，除了可以得到穩健的收息收，同時可有效的分散風險。

第二，投資債券，你可以選擇A評級的債券，年期較長都可以，但利息卻不高。你可以到銀行問問。

第三，投資年金，你可以睇睇，這是適合你們的產品，零風險，可以有穩定回報。

第四，你亦可投資銀行低風險類的產品，你可自行到銀行了解下，總之是「低風險，持續現金流」的。

第五，持有現金，除了可做定期外，現金亦可以為你的後盾，以備不時之選。同時，若投資市場大跌，你可以在這時買到更多的收息股，股息率會進一步上升。

你可以將$700萬資金，平衡地分配在上述的項目上，對你來說是最好平衡風險，同時有穩定的現金流。

------------------------------------------------

Q19067：

Hello 龔成老師, 大家都是80後, 我仲有兩個月就40, 希望10年後財務自由, (最好係5年, 因為工作隨時可以無左). 我月入5.5萬. 約儲3萬. 現金約HK$500K, 外幣約HK$150K, 美股約HK$200K.

至於港股:
公司 號碼 股數 平均價
匯豐控股有限公司 5 1,200 $ 77.00

吉利汽車控股有限公司 175 4,000 $ 22.00

中國教育集團控股有限公司 839 2,000 $ 15.20

安徽海螺水泥股份有限公司-Ｈ股 914 4,000 $ 54.50

中國建設銀行股份有限公司—Ｈ股 939 142 around $5

工商銀行—Ｈ股 1398 2,093 around $4

太古地產有限公司 1972 800 $26

冠君產業信託 2778 3,000 around $5.5

盈富基金 2800 1,000 around $27

交通銀行股份有限公司—Ｈ股 3328 1,265 around $4

ＦＩ二南方恒指 7500 9,000 $7

京東集團－ＳＷ 9618 100 $ 226.00

網易－Ｓ 9999 100 $ 126.00

想請問老師應該步處如何? 從而5-10年後可財務自由.

龔成老師：

首先你要明白，我地繼續持有一隻股票與否，與你的買入價無關，因為這只是一個心理因素，最重要是企業的質素、前景。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你現時的年齡，可投資平穩增長股為核心。

有部分股，如匯豐（0005）、工行（1398）、建行（0939）、交行（3328）就不用持有太多。因為增長力不強，只是收息股。

另外，7500這類反向衍生工具，無必要持有。

至於其他股，無問題。之後的方向，以平穩增長股為核心，再加小部分潛力股，保持進行，已經是適合你的大方向。

------------------------------------------------

Q19068：

龔sir, 今次係第一次與你洽談，我現在61歲仲有幾年就退休啦（65歲)，現在仲跑緊數，睇到你好多寶貴意見，希望65歲做到財務自遊啦

我既目標在最後5年再儲蓄多3百萬（每月4萬月供股票，28OO，66，1398，3988)

住屋已供月，退休後用來收息，以上4隻股票OK要？
住屋已供完

龔成老師：

以你的年齡，現時可以投資平穩增長股+收息股，你上述投資，方向都是這類。

上述4隻都是有質素的，可以供，不過，有些少問題。

第一，你如果$300萬集中4隻股，會有集中風險，建議分散少少。

第二，當中有2隻是銀行股，同時較集中。

平穩增值股，可再加入，例如盈富（2800）、長建（1038）、恆基（0012）、粵海（0270）。

同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、置富（0778）、陽光（0435）都可以。

你可以選擇部分，去進行月供，到65歲就長期收息。

當然，你都要有部分現金在手，唔好100%股票。

------------------------------------------------

Q19069：

龔sir，唔好意思，想問一問阿sir你點睇賽晶科技（00580），因為見到公司研發IGBT 芯片，想知道佢有冇潛力

龔成老師：

我無研究賽晶科技（0580），見佢的業務都穩定的，同時有一定的盈利，財務數據算不差。

不過，見佢規模不算大，你要確定佢在全球，真的擁有相關技術，現時的研究情況如何。

我從過往的財務數據睇，見佢業務不差，財務數據不差，但就未知潛力度，建議你睇佢的年報進一步分析。

------------------------------------------------

Q19070：

龔成老師你好
本人26歲，月入$14000

現在放緊無薪假，月入大約$12000
想30歲前搵到人生第一個$100萬
現金大約$18萬
另外手持

2手滙豐（59.9入）1手生物制藥（8.9入）
2手大快活 （25.15入）1手港鐵（38.5入）
同家人夾錢買咗間屋（夾咗$30萬首期）

間屋租咗出去等人供緊
有打算賣出樓宇
可以拎返共$45萬

股票依加都係蝕緊錢，請問我應該放左佢地嗎？同埋我資金咁少，應該如何部署投資呢？謝謝你！

疫情下每月存款$3000-4000
正常情況下每月存款$5000-6000

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你這年齡，匯豐（0005）這類收息股，未必適合你，你應該投資較有增長力的股。你等佢上翻多D就轉其他。

至於另外3股，都有質素的，可持有，但都不是高增長類。

如果你想30歲完成目標，要盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。月供股票都可，最重要是你仍有現金在手，唔好用盡。

你可以考慮盈富（2800）$2000。

另外再加1、2隻（每隻$1500）：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：安碩恆生科技ETF（3067）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

我希望你這段時間提高財務知識，到你取到$45萬後，可以更有效運用。

------------------------------------------------

Q19071：

Sir,想問你個問題，已經買左7萬股煤氣，1萬股金莎，5000股盈富，現金約30萬左右，目前睇好博彩同消費行業，想買入銀河同高鑫

但想知道應該怎樣運用資金會比較好，本人30，每月可儲3萬

龔成老師

這些都是有質素的股票，你可以長線。其實最重要是「配置」，建立一個長遠平衡的組合。

銀娛（0027）有質素，你可分注投資，但同一行業比例唔好過多。

高鑫零售（6808）於內地經營大賣場業務，以提供各種零售商品包括紡織品、電子產品、日用百貨、大眾消費品及生鮮產品。集團除對外採購品牌產品，亦自有品牌商品。

近期被阿里收購，股價上左，這刻的投資值博率，算是中等。

睇翻佢基本面，雖然業務穩定，但睇翻佢過往的財務數據，就發現佢生意增長力不算強，盈利增長力都不強，相信佢都會因中國的經濟週期受影響，同時，網購的發展對佢都有一定程度的影響。

不過阿里收購，會利好長遠發展，這股都有前景的，但不能只睇好的一面，而以佢現時的估值計算，這刻的投資值博率只屬中等，未到吸引的人平。如投資只能小注先。

$30萬中，你可以動用$10萬，餘下就留現金。你可以分注投資股票。建議你同時加入其他股，唔好只集中幾隻股。

至於每月$3萬，可以部分月供，盈富（2800）、安碩恒生科技（3067）（小注）都可以長期月供。

------------------------------------------------

Q19072：

老師，我啲股票蝕緊，好似有排都唔上返嚟，我應該點好呀？

12,66,405,5,3,2388,823,700

12,66,405,5,3,2388,823帳面都蝕緊10幾萬，係咪經濟好啲就會上返嚟？

我知道股票係一種投資 只要有耐性，但係依家好似蝕錢多啲，應該點做呀？

龔成老師：

有兩點你要注意翻，第一，我地繼續持有一隻股票與否，與你的買入價無關，因為這只是一個心理因素，最重要是企業的質素、前景。

最重要不是賺蝕數，而是「配置」。

第二，如果大部分股你都蝕錢，而我睇翻上述股票其實有質素，相信你有買入方面未能掌握，建議你日後同月供策略，將買入價平均，對你有利。

上述股，你可以守，只要經濟好轉，過1年後，大部分都會上翻唔少。

另外，你要將「賺蝕」概念減少，要有「配置」，長期持有的概念。

------------------------------------------------

Q19073：

龔成老師。我與先生（32/30歲）有一個小朋友。現有2個物業，一個貸款270萬，一個貸款450.感覺現在的資產較偏重在物業，現時現金流只要約10萬

是否建議分批沽岀正榮服務，換碼至你fb提及的盈富，金沙，舜宇等股票會較好？還是待有較多現金流，再作佈署？

另外想問問你幾時會黎澳門開班？

龔成老師：

如果你股票持有比例唔多，建議你之後加強這方面，令你的組合唔好太多物業類。

正榮服務（6958）主要在中國從事提供物業管理服務及提供增值服務。

佢的物業管理服務，包括住宅及非住宅物業的清潔服務、安全秩序服務、園藝服務及工程維修服務。集團會委聘外包商提供若干物業管理服務等。

生意與盈利理想，現金流理想，因此整體是不差的。

不過股價就有少少波動，有時行業有炒作，股價上落較大，要注意風險。加上佢規模較細，不似同行有些較大型及有背景支持的有優勢，這會扣左d分。

整體都可以的，但未到最高質之列。這股你持有都得，但如果這股只是你唯一一隻股，就要調整。

你可以建立一個平衡的財富組合，盈富（2800）等等，「平衡」是重要的，你要從長期角度作配置。當然，留部分現金都重要的，所以，現金有$10萬是基礎。要利用「餘下現金作配置」。

其實我之前都有開過澳門班的，不過現時疫情，所以暫時停左，之後會再開翻的。

你或者可以預早留位，只要whatsapp 852-55457212我同事講，打「留位澳門班班」就得。我地有具體資料就會 whatsapp你。

因為現時已有好多澳門人留左位。

------------------------------------------------

Q19074：

Hello 老師，不知您記不記得我呢？
經過數年努力後，我在早前終於買了樓，我買了啟德（近$800萬樓價）樓花。

現想請教您，我該兩成首期上會、還是四成首期上會好？

我還在跟家人同住，想在3-4年後用綠表抽新居屋，故啟德會放租出去。謝謝您的意見。

龔成老師：

恭喜你！
這是你努力的成果！

啟德這區不差的，長遠正面。

你可以比較少首期，只要你可承受風險，同時你要有現金剩就得。

至於日後再買樓，可以，現時做好這一步先，順利做按揭，同時買樓後由於有負債，點都要預留現金。

之後就努力儲蓄投資，日後可以考慮再買樓。你方向無問題。

------------------------------------------------

Q19075：

想多問一下 2年後我會有2筆儲蓄保已回本+有少量的息
約20萬左右

想知道到時候應該拿出來投資 還是繼續滾息？

龔成老師：

如果你的投資知識好低，同時你好怕風險，就留在原有的儲蓄保。

在我地的理財配置中，儲蓄保都有佢的角色，是防守部分。不過，進攻度不足。

如果你有少少投資知識，想回報可少少，就應該將資金，轉投資其他項目，最簡單如盈富（2800），回報會較高。

------------------------------------------------

Q19076：

老師請快幫忙1789買了1萬股
点解市升佢連跌幾日？

龔成老師：

愛康醫療（1789）本身正面，不過，貴。

佢以「愛康」品牌從事設計、開發、生產及銷售骨科植入物，並專注於髖關節及膝關節置換植入物。

睇翻佢的資料，佢的產品包括用於初次手術的骨關節植入物，以及為置換、修復或升級前次手術的植入物或部件的翻修手術而專門設計的骨關節植入物。都是有前景的業務。

這股業務不差，有增長潛力，盈利增長，這反映企業有實際的價值提升。

不過，這股經常處於少少貴的水平，股價一定會較為波動。如果你持貨不多，就不用理中短期股價，如果太多，就應該減持。

------------------------------------------------

Q19077：

有時見到d潛力股票
少少上
大大回
搞到好驚
但學你話齋
而家燒銀紙階段
所以就算產品賣得比同期高增長率好似都係無太大嘅增長

另外我仲想問
我之前買左紫金（2899）
係6蚊左右就已經放左
呢排見佢都升得好快
想問下
如果我中長線嘅話
可否值得再入？
幾錢度為合理？

另外我手上有小米
華潤水泥
同周黑鴨
是否都值得做中長線？
小米而家已經試緊破頂（爭扎緊是否應該要出）

留意左你fb一段時間
想入你建議嘅粵海同維達
合理價是多少可入？
問題比較多
好多謝你嘅耐心解答

龔成老師：

你唔好太著重「股價」，最重要睇企業價值。這類公司，要睇下你博唔博，長遠的情況如何，唔好太理短期股價。

紫金礦業（2899）佢主要從事黃金及其他礦產資源的勘探、採礦、生產、冶煉及銷售。

但你要留意番，雖然這類資源股雖有投資價值，但只算中等。

原因是這樣，資源本身有一定的價值，但盈利始終受國際黃金價格影響，本質上會較為被動，無乜價格自主能力，同時產品無差異性，是典型的商品企業。這類企業都有一定的投資價值，但就不會太高。現價合理區頂。

至於你持有的股，都是有質素的，可長線。

粵海（0270）現價合理，分注投資可以。

維達（3331）合理，是平穩增長型，現價分注投資都得。

------------------------------------------------

Q19078：

龔成老師，先多謝你，我看了你的的書：80後一百萬富翁，80後二百萬富翁，選股勝經，年報勝經，我看完，我的財富與金錢都有明顯的提升，多謝你。

我現在自己下載年報，根據你書中的內容一步一步分析。

以下是我現時的財政情況，希望可以得到你的指點：

月薪 17000， 2019年畢業 現25歲 單身女 每月大概可以儲蓄10000

現持有股票分配如下
386-中國石油化 8000股 買入價 3.98 （前幾日 我3.1 賣出4000股）
1448-福壽園 4000股 買入價 7.5475
1810-小米 1200股 買入價 13.56
1830-必瘦站 4000股 買入價2.87
1928-金沙中國 400股 買入價 29.5
2382-舜宇光學 100股 買入價 123.9

股票市值大概 12萬
現在持有現金 大概6萬

問題1:
我現在的全職工作時間為一個星期6日，我呢幾日係度留意兼職情況，我前幾日見到一個時薪120的補習，一星期2日，一日2小時，請問你認為我是否去做兼職還是利用時間，增加知識。

問題2:
我目標是2021年9月是儲蓄40萬，我覺得如果按現時情況黎睇，好似無咩希望咁，請問你有什麼建議？

問題3:
請問對於我現時的財政情況有什麼好的建議？

問題4:
如果要自由，書建議要從商，但我從來無關於做生意的唸法，我的專業是關於金融的範疇，我唔知做咩生意好，我知道你都是金融出身，你可以分享下你之前做生意的經歷？如果要做生意，你有什麼建議給我？補充：我租屋住

我會耐心等待你的回覆，十分多謝你可以閱讀到此！

龔成老師：

1）我初踏出社會工作時，由於本金不足，要盡快有本金進行投資，等我可以財富滾大財富，所以，頭1、2年我不斷做兼職。

但之後，我就開始減兼職，因為我放更多時間在「研究股票」，令我可以將資金滾大。

所以，你要睇翻你自己現時的本金，去到基本狀態未。你要平衡「得到本金」與「增加投資實力」這兩方面。

2）比起2021年目標，我反而建議你定一些長少少的目標，如2025年、2030年。其實原理如同種樹，唔好太心急，反而目標長遠建立大樹。

3）分配都不差，但現金唔算多，同時之後可以加入盈富（2800），以平衡組合。

4）如果你本身有金融知識，可以集中發展「投資」，投資股票的回報可以好大，但你要專業，我一星期用6小時分析一間公司，一年50間，但一年只買1、2隻股票。

其實你投資可以發展好大，同時要放好多時間。

當然，你可以試下做小生意。我乜都做，小販、網站等等。

------------------------------------------------

Q19079：

龔sir 其實系咪唔算優質既股票大跌，你都唔會考慮，寧願買合理價既優質股？

例如005，144，659 等 都大跌
唔系無質素又唔系優質股

龔成老師：

我地最重要睇企業質素、前景，如果優質度無變，當然不用理，但如果優質度變左，就另一件事。

以銀行業來講，賺錢能力的確有所減弱，優質度減，投資價值地減，值得佔我地組合比例都會減。

至於招商局港口（0144），貿易因素同樣令佢賺錢能力與增長力減弱，雖然不是無質素，但有所減弱。

至於新創建集團（0659），這股本質就無明顯減弱，不過增長力減，以及面對中短期不利情況。

我選股，會以較高優質度及增長力行先。

------------------------------------------------

Q19080：

老師，我可以問你，你係成功之前，我記得你講過你都經歷過一d fatal mistake，但係你係點樣捱過黎，最後建立出而家自己既資產出黎？

龔成老師：

投資方面，十幾年前試過幾次近輸身家的經驗，每次都好痛，但每次我都比一個限期自己唔開心，之後就一定要重新振作。

當時輸左幾次勁之後，好決心要學好投資，同時要自己之後的投資，每一次都好小心，要逼自己好仔細研究之後，先會出手。

就算我面對唔同人生低谷，我都好快企翻起身，我會逼自己做運動，同埋要自己睇成功類書。同時要同自己講，最重要是之後的大目標，這刻只是小挫敗，是學習，之後會更強。通常就好快起翻身。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。