賴：呢邊好似好耐冇新 post 咁， #看舖 掃一掃塵啦。原文如下，Medium Link: https://link.medium.com/Syasb0h6mY

//

香港金管局 (HKMA) 發出咗八個虛擬銀行 (Virtual Banking，下簡稱 VB) 嘅牌照，預期 2019 年年底或 2020 年年初陸續投入服務。

不過， VB 未開始投入服務，傳統銀行已經率先迎戰。匯豐銀行率先取消多項銀行賬戶最低結餘要求及相應嘅低結存收費。剩返一百萬或以上嘅卓越理財 (Premier) 戶口，先要求大家達到指定 TRB (Total Relationship Balance ，泛指各項存款、投資、保險及借貸，但唔計按揭及信用卡結餘) 。

行內大佬出招，其他行家陸續撤回類似嘅費用同存款金額要求。唔係暫緩啦，今時唔同往日，在商言商，冇得你玩語言偽術嘅。主流嘅中銀、渣打、東亞同恒生都已經先後同匯豐睇齊，要享用有網上銀行、電話銀行、外匯兌換、投資戶口等一站式服務，從此唔使再擺低一萬或五千蚊。

企喺 HKMA 嘅角度， VB 可算係未出發，先興奮。 VB 其中一個好處係令銀行服務普及，減少「因為貧窮而用唔到銀行服務」嘅情況。係有啲左膠嘅，但今時今日間間上市公司都要講社會責任 (social responsibility) ，冇得話賺到盡就將基層市民拒諸門外。

如果話 HKMA 係虛擬銀行新時代之下嘅贏家，咁傳統銀行割捨一部份來自低結餘嘅收入，睇落好似係輸咗咁。但係棄車 (其實係卒仔啫頂多) 保帥，輸少當贏，喺大環境變化之下，傳統有分行嘅銀行首先要避免客戶流失畀 VB 。如今 VB 主要嘅賣點，即係冇低結餘收費同埋冇最低存款要求，已經被中和 (netlutralized) ，VB 帶來嘅威脅。自然由嚴重變成輕微。

咁邊個係連串轉變之下嘅輸家呢？似乎就係一班諗住打入香港銀行市場食大茶飯嘅 VB 喇。原本 VB 嘅賣點已經失去叫座力，嚟緊要搶客搶存款，多少要靠存款息口去競爭，咁又即係打價格戰囉。如果你唔知嘅，典型銀行盈利方程式就係「借貸息率」 – 「存款息率」，再扣減人工租金同燈油火蠟。咁存息要高，利錢自然少咗咯。

何況 VB 要攞牌本來就要擺低一大嚿資金作為股本，以示申請機構有返咁上下家底同財力，唔會郁啲就擠提。資金本身都有成本架嘛大佬，基本要求係三億港紙。如是者，資金成本 (或機會成本) 本身已經係一個要考慮嘅因素。

再講， VB 要喺市場上招兵買馬，成本其實唔低。你諗下，除非本身量緊地，否則好人好姐，做乜要入去 VB 做開荒牛？轉工加薪，收嘅係 Risk Premium ，而 VB 無論係盈利能力同持久力兩者都係問號，好難叫得郁已經上岸或坐穩釣魚船嘅有經驗人士，要冒險外闖嘅，一係本身由同一集團移殖過去 (中銀 / 渣打) ，一係就本身仕途不順、瞓身一博嘅散兵游勇，一係就真係睇錢份上嘅僱傭兵。

由籌組班底、建立基礎 (infrastructure) 同相關政策、工序、衡量市場定位以制訂 marketing strategies ，喺開張大吉嘅半年之前， VB 已經燒咗一大嚿錢。仲未計開檔之後，為咗吸納客戶而付出嘅禮物或回贈，以至為吸納存款而支付嘅高息。如果 VB 背後扒唔返相應咁大啖借貸嘅飯， be it 私人貸款 (aka P-Loan) 或企業信貸 (主要都係中小企或 start-ups 啦，今時今日 KYC 揸得咁緊) ，咁 VB 食乜呢？

英國《金融時報》就做咗一篇幾詳細嘅報道，分析返匯豐本身喺香港市場，不論存貸，都佔咗大約四分一江山，而匯豐喺亞太區，尤其是香港市場，利潤零舍豐厚，即使唔爭逐 VB 牌照，仍然可以保持優勢。

又或者咁諗。八間 VB ，除咗 WeLab 份屬本地初創企業，其餘七間或多或少有中資身影 (騰訊、阿里系嘅螞蟻金服、中國平安、小米、中銀、眾安及同渣打合資嘅 CTrip) 。對於呢啲 VB 嚟講，吸納香港 (及大灣區) 嘅資金，借畀大灣區甚至大陸其他地區嘅公司，喺唔使交分行租金、業務 scalability 較大嘅優勢下，透過大灣區區內融合而「個餅大咗」帶來嘅商機發展，先至係大家嘅如意算盤。

有朋友問置記，入 VB 做好唔好。冇架，張 CV 有 FinTech 成份，肯定豐富又矚目咗。不過投資涉及風險，押注自己嘅仕途喺 VB 呢度，可以玩幾多年？八間 VB ，最終有幾多間順利開檔，又有幾多間兩、三年後仍然健在？投身 VB ，同炒賣股票一樣，最緊要係退潮時唔好畀人發現自己冇褲著。能夠賺到比較高嘅人工，累積到實在嘅經驗，甚至 Title 都靚仔咗，日後去返傳統銀行或其他金融機構，都唔係冇得諗嘅。