［八年回望］原來剛剛好八年，咁順手講下。

1. 本身一早識我嘅當然知亦都見過。但就是咁的，八年前今日，我就在烏克蘭。其實係出完差去倫敦再去烏克蘭。當時未結婚但都有循例同囡囡講下，咁反正都有共識唔生仔（＊）

2. 呢個，就係登登登登，大名鼎鼎，惡名昭彰嘅，烏克蘭切爾諾貝爾核電廠，四號反應堆。只此一家。

3. 當年已經有得跟local tour，而家更加係阿豬阿狗都識去。當年都要千幾蚊港紙，正宗貼錢買難受，搵命搏，吸收輻射為禍下一代。

4. 出發前送輻射錶一個，仲要簽生死狀（！），講明各安天命，唔保證你，同埋你電子器材嘅安全。果然去完我部相機就死咗，個變焦真係蕉咗，而SD卡都死埋。不過後來修復返部份，所以你先有呢張相睇！

5. 講返四號反應堆，最近只可以去到呢度。唔好諗住癲到入去影石棺。有冇人會試走入去？總有的，但有軍人隨團（＊＊），應該會射低你。你下次可以試下。亦都有閉路電視，唔好諗住整古做怪。

6. 呢張影冇，但都話隨行有個輻射錶，去到呢度就真係你外圍（三十公里禁區）嘅幾十倍了。外圍係12，嚟到呢度係400以上，係咁跳。但唔好驚，咁先正常。如果唔跳幾十倍就證明個錶壞。呢度只能停留幾分鐘。專家話停留一陣對健康冇影響嘅。咁梗係啦，又唔係專家去。

7. 又同意，其實去到四號反應堆前面，個錶都未係最勁。你如果放落地下啲泥土先最勁，所以千叮萬囑叫你唔好掂啲泥更加唔好拎返去玩。我返酒店都即時洗咗對鞋，返到香港好似掉咗。

8. 可惜當年只有Facebook，但流動上網好似未係好盛行，我都係返酒店先整相，所以冇得直播。果然係富貴不還鄉如錦衣夜行，冇Facebook Instagram微信邊有咁多人跑馬拉松上珠峰？

9. 呀仲有，臨走呢，仲有部機畀你玩。就係度下你輻射有冇超標，都有啲緊張架。江湖傳聞話咁多年得一條友爆標（即係，部嘢流的？），即時就送去醫院。有冇出返嚟就唔知了。定佢係超人個friend核能人（又，超人大戰核能人，套戲真係爛到九彩）

10. 不過，當年我作為去切爾諾貝爾嘅少數香港人（Netflix 當年寄緊DVD咋親），都引起咗啲鬨動，有報紙嚟訪問我添。但我後來發現係綠色和平嘅，咁就No thanks啦。擺明配合佢地講「核電好危險」嘅主旗律。咁又唔係有錢收，睬你有味啦，我好得閒咩。

11. 打後幾年，直到而家，都仲有啲輻射後遺症。主要係成日發火啦，朝早唔多想起身啦，日頭冇乜精神啦，鍾意食煎炸嘢食甜嘢啦，夜晚唔願訓啦，成日都好累啦咁。不過多數星期六日症狀就冇咁明顯。

12. 又，我前後去咗三次烏克蘭。可談之處甚多。但真的，啲女真係好靚。

13. 所以啦喎，我係一個財演，但我係一個去過切爾諾貝爾嘅財演，仲係一個去過瓦努阿圖嘅財演。人都係一根蘆葦啫

（＊）我好奇怪啲人可以結咗婚先話「一個想一個唔想」。唔係溝通好晒先結婚？結婚前唔講呢啲，唔通討論西多士落奶定落糖漿？不過又，好多嘢有人會反口，況且講真人會變，never say never，反正又唔係「合約精神」

（＊＊）其實入去禁區一定要軍方批文，所以我懷疑啲團根本都係軍方啲友搞的。你去之嘛，又唔係佢去。況且人地條命邊有你咁值錢。又，有午餐添喎，都OK好食（天寒地凍乜都好食啦），保證食材嚟自區外—佢話。唔鍾意嘅拎個康師傅去都得嘅，我估—但咪又係輻射水。咁真係你唔食嘢都得嘅，但我冇見有人咁老土，反正成團都係鬼，得我一個亞洲人

（＊＊＊）無法唔講，其實最震憾係，有架私家車，將我地由基輔市中心車去切爾諾貝爾（你以為係幾十人嘅團？）。最正係個司機用啲極重口音嘅英文問我地，Video？English？但其實根本冇人答佢都照播，就係播　切爾諾貝爾事故嘅紀錄片！包你未出發先興奮。而家我估係播Netflix了，你去過可以話我知。不過而家你應該可以自己望電話睇TVB，當年我地就真係睇記錄片的（你鍾恴訓覺都得嘅）。可能係為咗嚇走你，最好未去到目的地全部落晒車走人，咁就提早收工。

［是日科幻］人類先係地球最大病毒

1. 埃汾去九龍城食糖水（真係食糖水，係九龍城唔係九龍塘），打卡嘅名句：「癌細胞嗜甜，我就係呢個城市嘅癌細胞」。100%原創，有啲深度，朋友好鍾意。有朋友（政見不同的，好難得）理解話因為我返工用腦多所以要糖份，但你見其實好多人返工唔撚用腦都係咁食甜嘢（其實我都係）。

2. 咁正題，有啲人係城市嘅癌細胞，而遊客（包括我）先係意大利嘅病毒。

3. 再推遠啲，雖然我唔係「人類萬惡死不足惜」嘅Thanos 或 《幽遊白書》仙水忍（黑之章錄影帶，我估新一代唔明咩係錄影帶），但都係要講

4. 廣義嚟講，就真係人類先係地球嘅病毒。

5. 所以大陸段子有講：點解科幻片外星人襲地球，一定要剿滅人類？其實好合理，即係佢地嚟救地球，咪消滅對地球禍害最大嘅嘢咯，本質上同疫苗抗生素差不多，入到人體咪消滅啲病毒。企高一格，全新體法（！），換個角度思考就唔同。正所謂明月裝飾了你的窗子，你裝飾了別人的夢。下聯係莫道你在屌柒人，人亦能屌柒你。你身體入面有病毒，你自己亦係地球嘅病毒。劉伶（正係酒仙）話齋，屋係我條褲，天地先係我間屋。

6. 地球其他生物可能好歡喜，你唔係條魚點知佢唔係咁諗？可能成個過程在真—銀河衞視轉播，宇宙啲高智慧生物睇住外星人代表點殺人類，本質上亦係同直播手術過程，或者播打獵差不多。

7. 類似嘅講法，細細個睇衞斯理都有講，好早期嘅「紅月亮」都講差不多嘅嘢。如果地球係個宿體，咁人類就真係似病毒（甚至唔係寄生蟲），搞爆晒玩爛晒，咪移民去火星再玩過。

8. 講返近啲，雖然我係個樂觀嘅人，但我對climate change係相當悲觀嘅，照計個地球都係冚球鏟嘅機會比較大。但冇所謂，in the long run we are all dead，我死後話你知洪水滔天。照計我冇命見到呢日了。

9. 之前寫文都講過，唔生仔就最環保（http://bit.ly/3dek4cE）。絶對係科學的，有嚴謹計算。你咩食齋burger呀開電動車呀去少幾次日本呀之類，全部做晒，做十世，都未夠生少件咁環保（指碳排放）。因為現代人類文明生活就注定係咁。固然有人講（都係真），咁你自殺仲環保添。係，但唔生都生咗出嚟，況且自殺痛苦，唔係咁易。但唔生仔，相對係容易的。當然生仔應該好過癮（我指個結果，過程就唔使講啦），否則唔會咁多人生。

10. 但又講下，所謂咩「環保」，其實都係人類角度。我避免太過環保膠動物膠，咁so far啲狗呀花花草草呀墨魚滑呀響鈴呀未出嚟一齊反抗（＊），我當佢地同意啦下。

11. 所以呢，其實應該更正，地球唔會玩完的，最多人類玩完之嘛。

12. 又真係，去過切爾諾貝爾嘅埃汾（你估好似你咁睇完Netflix先Google咩，先知就係早你少少），都知道，當地其實啲生態就最好，大把嘢睇。唔係啲畸型輻射三頭馬，而係真係生物多樣性—原因？因為咁多年冇人去搞咯，直到有啲唔撚識死嘅遊客（well）走去睇

13. 咩啫，學者科學家都話安全架，梗係，你去之嘛，又唔係學者科學家去。我只記得係要簽生死狀（！）。仲有，當年去完，我部相機都打埋柴！好驚。唔知點解。啲相都死咗唔少，當年仲係用SD卡。打後幾年我都有啲輻射後遺症，主要係成日發火啦，日頭冇乜精神啦，鍾意食炸嘢啦，夜晚唔願訓啦，成日都好累啦咁。不過多數星期六日就好返。

14. 無論如何，我去威尼斯（意大利嗰個，唔係澳門）嗰時，當然已經係人山人海好多人，時為2012年（正係我去完切爾諾貝爾之後）。當其時坐Gondola，好似八舊水兩條友，但還好，雖然人山人海，意大利佬又好忙，但都做戲做全套，會唱下歌咁。但同你想像中嘅「鷹粟粉確係好，煎炸係唔同播！」就真係唔多同咁咯（＊＊）。

14.5 反而再早年，我同條女（呼，人地條女添）去康橋（唔係護老院），就真係可以「撐一支長篙，向青草更青處漫溯」（＊＊＊＊）。咁梗係人地撐啦，唔通我撐。但威尼斯船同康河係唔同玩法的。

15. 正如我去嵐山（梗係京都啦）睇櫻花，簡直係一生人最錯嘅決定，亦都令我力排眾議，相當唔鍾意京都，仆你個街，去到電話上網都收唔撚到，你想像有幾多人？而冇網上我會發癲的。「冇人叫你旺季去」「京都都有淡季？」「有，而家咯，不過去唔到」。呢啲，一樣係全球化嘅禍。而再政治不正確啲，其實我接受到港女，或者大陸妹著和服浴衣扮可愛影相，韓妹更好，「但我真係好難接受黑妹著和服」。不過唔緊要，黑人都覺得你亞洲人整黑人頭係文化剝削，咪大家互相鬧。

16. 再講開少少，疫情之前已經係全球化退潮，有埋肺炎更加會多人講。但我就冇咁悲觀。其實啲友反全球化，唔係想人唔好嚟，係「冇錢就唔好嚟」，高質遊客，即係有錢嘅，依然人人歡迎。又或者，人地就破壞環境異化當地人，但本人例外。講真的，你睇反全球化啲友，自己一撚樣一年去幾次日本，一撚樣去睇英超西甲炒貴人啲飛玩到足球仕紳化。你有得睇波有得一年去幾次韓國有得食靜岡蜜瓜，全部多得全球化。否則你就去裕華國貨打康樂棋啦（都幾過癮的）

（＊）建議你去睇《群》呢本小說（http://bit.ly/2Uc6EVS），好厚。講「當海洋有了意識，第一個念頭居然是殺人」，真係啲扇貝呀脆肉鯇呀打打下邊爐上嚟搵滾水潑你的，好撚痴線。有一期成日有啲扶手梯意外，我都懷疑係啲扶手梯有意識，開始攻擊人類

（＊＊）應該好多人都知，真係意撚歌，Santa Lucia。亦都真係船歌，意文歌詞有講。不過係拿坡里／拿不勒斯，唔係威尼斯。而其實大利同越南一樣，雖然一國，但向來都有南北之別，越南好啲，北越打贏，河內首都，但最大城市依然係南邊胡志明（西貢），意撚啦喎，向來北方人都覺得啲南方人係生番窮撚黑手黨冇文化，唔信你可以問下。梗係問北方人啦。意甲球會亦一路係北邊為大，「意甲七雄」（＊＊＊）亦全數係北部。拿坡里？馬勒當拿年代後就收咗皮，近幾年先再冒起的。去過拿坡里，馬勒當拿真係神，唔係講笑，啲餐廳將佢張相放在聖母側邊，因為佢難得地幫南部出頭。

（＊＊＊）其實唔鍾意附注再附注，但，意甲七雄呢啲真係出賣年紀，祖雲達斯米蘭雙雄羅馬拉素柏爾馬費倫天拿。

（＊＊＊＊）有人話呢句嘢其實係暗示，你懂的。

【《潘朵拉》（Pandora）：高官搞嘅屎，百姓一齊食】

#晞Netflix記事

除咗《戰疫》，呢套都係南韓災難當前人性同政府眾生相嘅戲，一直都諗住睇，但成日都放埋咗一邊，近期突然醒起呢套嘢，睇返都一樣會覺得適合時局。

故事講一次地震搞到核電廠爆炸，政府為面唔肯疏散、唔肯公佈消息，令一班附近嘅村民陷於險境。男主角身為核電廠職員，就同班同事奮力解救危機，不過高層就心痛核電廠多過心痛人命，遲遲唔肯做實事，終於令災難一發不可收拾。

有少少似《切爾諾貝爾：傷心的兒童》，呢套都唔可以當災難片－－災難場面加埋唔多，但就營造到末日嘅場面，前半段鋪排一場白色恐怖，後半段講災民逃難、男主角點樣阻止核洩漏，冇乜大場面都好緊張，絕對唔係《切爾諾貝爾》咁睇到遊魂。

南韓片一向好夠膽影射政府、踩政府，呢套講到成班政府高層自私自利，總統只不過係隻無用嘅棋子；拎班百姓條命去賭，都唔肯去認低威，心痛死物多過心痛人命，最後呢班人搞出嚟嘅屎，就要百姓承擔。有班人搵命搏、解決你搞出嚟蘇州屎，你就隔住個mon指指點點，連人哋個名係乜都唔知，放諸今時今日局面，點都會有少少代入感，都一如南韓最拿手營造嘅劇力，睇到你把幾火。

美中不足嘅係，又要整場典型嘅韓式感傷，最後喺生死一線間危機，仲要講一大輪煽情催淚對白，破壞曬前大半段嘅緊湊，心諗一句：喂講得嚟爆架喇！

2016年南韓片實在太勁，又《屍殺列車》又《下女誘罪》又《活埋35夜》又《哭聲》，呢套竟然香港冇上畫。個人覺得，雖然唔係想像中官能刺激果種災難片，但上畫應該都有唔錯成績。

‼最後機會‼小弟執筆之原創小說已賣剩最後一批，售完即止，請即訂購：http://bit.ly/2PKXYFA

【IG請follow】www.instagram.com/travelerwithmovie