《十八年後的終極告白》第七集，芳芳妳好戲👏🏻

～ 大台劇縱使劇情熟口熟面，不過，永遠會失驚無神爆個好戲演員出來，救番個劇。好似第七集結尾尹詩沛飾演的Tiger嫂阿娣，夠晒潑婦，一個打四個，阿一都打謝，型到呢！只能講句：「好戲！」繼《金宵大廈》的芳芳後，又一令人留下印象的角色。

～ 無巧不成話，今集莎莎(阮兒)也有出現，做林嘉華舊情人孖生妹妹，而林嘉華見到江欣燕入舖的反應，完全就是被撞破姦情的反應，一絕！

～ 楊卓娜係好喊得，但經常做同類角色，真是會吸引力大減，如果改搵佢做阿娣，相信一樣可以爆！

～ 相比之前的《特技人》，林師傑的戲進步了不少。

～ 這兩集何遠東好搶戲，是幾個人中還算有良心那個。不過呢，成日大街大巷大聲講案情，點會唔穿煲？

～ 有套劇重案組不在九西才是奇怪，新界發現骸骨又關九西事？

～ 去到今集，一個大話掩飾一個大話，情況愈來愈嚴重的效果做得不錯。

～ 俾我估七個人都不是兇手，兇手是第八人，斷估無痛苦可能係阿倩，同七個人和死者有關係，又出個鏡，大家通常又唔會估係佢，撞下唧😜

～ 當《打天下》都係用大台的一個專業／運動去編劇時，《十八年後》反而劇情集中啲，節奏會好啲，只是情感上很多人唔想撐或睇。

#十八年後的終極對白 #譚俊彥 #黃智雯 #陳山聰 #楊秀惠 #林嘉華 #何遠東 #趙希洛 #江欣燕 #楊卓娜 #韓瑪利 #伊詩沛 #阮兒

《十八年後的終極對白》首周，有查案味，不過無乜驚喜。

～ 除了第一集夠緊湊刺激外，之後集數雖然節奏無拖，但劇情和人設實在太多舊橋重用，所以無乜驚喜，而且有些場口還有點兒戲。誰是兇手的懸疑劇情點都有吸引力，但這件案要做足二十集才解謎，所以第一個星期案情還未入肉，甚至殺死鬼仔強的兇手，未必是當年的同學，不過，追查阿一下落，和警察鬥智還算有查案味，林嘉華只是交代了是十八年前死者之父，他的高潮戲還未到，希望後面的查案戲會好睇番。

～ 男演員中還是以陳山聰最搶戲，但他的演出實在熟口熟面，有水準未有突破，還是「阿蕭」令人懷念啲。那些江湖恩怨戲，爭利益兩幫人閙來鬧去，阿公主持公道呢類場口，唔可以話佢難睇，只是睇得多無乜感覺，兩個大佬(阿一同棺材)赤膞對打一幕相對已經算有點新鮮，但還是谷晒在第一集。阿一公開認楊秀惠是女友的橋，又係常見到睇了唔知幾多次。

～ 角色劇本所限，黃智雯的角色只屬正常表現，但還未有場口給她發揮演技。仲未接受到她和江欣燕演母女！

～ 楊秀惠是首周發揮得最好的，因為啞所以要靠表情，她的眼神用得不錯。她和TB Jackie(孟希璘)的戲在上周受到較多報導，間接證明其他戲唔算吸引。

～ 兒戲的劇情之前提過有阿Sam同阿一因綁架事件充滿恩怨，居然為隻VCD咸碟fan番！楊秀惠揸架電單車衝入後巷，相當兒戲地救回阿一。另一更兒戲位是阿Sam在貨倉火場救回Madam，門口明明是火頭，最猛火位置，鎖又大鐵鏈又粗，阿Sam唔單止用枝棍整爛個鎖，仲可以徒手開門救人，仲只是輕微燒傷，⋯兒戲到O晒咀咯！

～ 楊卓娜由出場到之後劇情發展和《跳躍生命線》大同小異，出場死老公，開間小舖維生(餃子店／補衫舖)，李成昌/何遠東照顧佢日久生情，現在只欠惡奶奶未出場，基本上又定型又定橋，楊好戲都減低了吸引力。

～ 劇情開始不斷要整走趙希洛，韓瑪莉好有火，不過見到她咁瘦實在有點擔心，健康要緊。

～ 楊秀惠等阿一拘留出來時，心想唔好又落雨呀，點知個天真係次次都响呢個時間落雨！真係每逢有呢種劇情就落雨！等左咁耐，點去廁所呢？

～ 阿Sam同阿一和好番點解要去打拳嘅？阿Sam覺得怪錯人想贖罪所以被打一身？但阿一綁架毆打他條數點計先？

#十八年後的終極對白 #譚俊彥 #黃智雯 #陳山聰 #楊秀惠 #林嘉華 #何遠東 #趙希洛 #江欣燕 #楊卓娜 #韓瑪利