【龔成問答信箱】（Q22361-Q22380）

Q22361：

龔sir你好呀呢排上緊你進階班，有幾條問題想問

1. 記得你講過話如果非控股權益條數太大，就直接用盈利條數去計純利率，咁大概幾多為之大呀? 如果非控股權益佔盈利10%算唔算大?

2. 如果一間公司旗下淨係有聯營或者合營公司，冇任何附屬公司，咁係咪盈利=股東應佔溢利? 冇非控股權益呢條數?

3. 假設旗下有聯營公司，如果用盈利-聯營公司應佔溢利去計純利率，理論上純利率數字係咪會更加準確?

4. 最近試下分析2138，近年逐漸以醫療業務為核心，係全港最大非醫院醫療機構，亦都不斷有收購動作，以擴展專科範疇。本身醫療行業係有前景嘅，

市民消費力越黎越大，營業額有平穩上升，本質應該唔差嘅。但睇佢財務數據唔算太理想，近年純利率有下跌趨勢，我留意到註冊醫生同僱員開支比例不斷上升，佔成本好重。

但係轉個角度睇，近年香港環境係幾差，目前企業仍然以香港業務為核心，始終會影響業績。而管理層對前景有信心，就算面對大環境影響仍保持擴展動作，醫生團隊不斷擴大，

所以拉低左純利率。長遠將營運模式複製到內地，大環境利好情況下，都有唔錯增長力

我分析成點呀，有冇其他我未睇到嘅因素? 呢度都幾大段野非常感激

龔成老師︰

1) 我地要估這個調整，主要係因為當集團對附屬公司持股，較接近50%時，即附屬公司盈利中，有不少比重非有集團所有，令計算出來的純利率出現偏差。

所以，我地有時係會唔扣"非控股權益"，直接用盈利(而非股東應佔溢利)去除營業額，去計算純利率。

但我地唔需要一見到"非控股權益"有數字，就去做這個調整。因為有時個數字好細，當你調整後，發現純利率其實無明顯變化。

所以，你預"非控股權益"大於"盈利"10%，我地才會對純利率進行調整，令佢數字更能反映真實情況。

2) 係，因為聯/營公司只會將所佔利潤入帳，而非好似附屬公司咁，就算持股<100%，都會100%先入帳。

因此，若企業只係有聯/營公司，非控股權益係會零。

3) 係，因為你"營業額"中並無計入這些聯營公司收入數字，若不扣除的話，純利率會被高估。

4) 香港醫思醫療集團（2138）主要以ＤＲ　ＲＥＢＯＲＮ品牌提供醫學美容服務。企業都有質素的。

（１）醫療服務：包括整形外科手術、微整形療程及由集團醫生操作的能量儀器療程及一般診症服務，以及牙科（ＯＮＥ　ＤＥＮＴＡＬ及ＯＮＥ　ＤＥＮＴＡＬ　ＰＬＵＳ品牌）、中醫及眼科服務。

（２）準醫療服務：包括由已接受培訓的治療師操作的能量儀器療程，該等治療師已完成集團醫生主導的內部
強制性培訓。

（３）傳統美容服務：包括面部護理、按摩以及其他無創療程。

（４）護膚及美容產品：主要為集團的自家品牌寶特曼娜及瑞研雅。

你分析中都說到一些重點，佢員工成本係有上漲，而該部份佔成本比重都唔細。由於集團近年加快內地發展，係員工和醫生方面開支增加，都係正常。

但係數據中，你會睇到佢賺錢能力，因成本增加而出現倒退。但由於集團加大發展，成本增加係正常。

重點係這些成本，長線能否轉化成更高收益效率，就要再觀察。暫時睇佢業務發展不差，長遠有增長力，不過業務中短期會有少少波動。

現價算略貴，由於都有不確定性，故投資時要控制注碼。

------------------------------------------------

Q22362：

龔成 你好。我30歲嫁啦。但都係儲得10萬。點先可以令到啲錢滾大啲。但我完全無投資經驗。我連MPF都係揀最保守嗰啲

可以幫幫我嘛，thanks

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你30歲，應以增值為主，建議你用「平穏增長股」 + 「潛力股」作組合，去創造一個增值平台。

你現時無投資知識和經驗，對企業估值，點去定平貴未必會太了解。所以，我建議你先利用月供模式，去做增值，可以減低買貴貨風險，對你而言會較理想。

現在你每月先用5成儲蓄做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股。

或潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。

現時大市只是合理區，你現有10萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

至於MPF，配置其實唔複雜，你只要按你的年齡階段，去進行分配就得，年輕時較進取，中年平穩，退休前就保守。基本上你按年齡，慢慢跟這樣比調整就得。

強積金是一個超長線投資，中短期當然會有上落，但就唔需要轉來轉去。

只要按你的年齡，長線配置就得。我自踏入社會工作後，一直都是100%恆指，無變過，根本唔需要理會。

------------------------------------------------

Q22363：

你好呀 請問可以指點一下嗎?
1919 平均價$17.9 入咗
1022 平均價$0.91 入咗
833 $10 入咗
請問未來應該點部署??
麻煩晒 感激不盡

龔成老師：

飛魚科技（1022）較弱，華訊（0833）就一般，中遠海控（1919）算是有質素。

中遠海控（1919）主要從事提供集裝箱航運、集裝箱碼頭管理與經營服務。

整體的質素算是不過不失，雖然在行業有一定的規模與優勢，但行業整體的賺錢能力無過往咁強。

經濟好轉會對佢有利，因為始終是對經濟較敏感的行業，現時的股價已反映相關利好因素。股價大升後，其後之後較難有高增長，因為已反映了利好因素，反而預佢之後轉為平穩增長。

現價略貴，回1、2成會合理翻d。

飛魚科技（1022）質素不太好。業務不穩，持續虧損，投資價值不高。

之前得到騰訊（0700）入股，往後會提高企業價值，潛力度高左，但由於仍有未知數，業務不能推算一定成功。

華訊（0833）主要從事生產及銷售電子產品、塑料模具、塑料及其他電子產品元件、買賣生物柴油產品及提供煤氣爐頭、以及提供節能業務解決方案。

業務不過不先，生意都有增長，但盈利有點波動，之前有虧損。整體的企業質素算是中等。

現時股價合理，但由於規模細，加上企業優質並不是很強，投資價值唔算高。如投資，小注好了。

------------------------------------------------

Q22364：

我有睇呀老師
但我手上的股票都從高位下跌了不少，不知應該怎做

270、364、388、700、823、1316、1833、2013、2800、3690、9988

龔成老師：

最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

區塊鏈集團（0364）停牌，暫時只有等，但睇翻佢過往財務數據，年年虧損，不宜投資。

微盟集團（2013）風險會高少少，不能持有太多

而美團（3690）則較波動，要注意風險。

至於其他，問題不大，但就較集中在科網類股，成為你最大核心風險。

------------------------------------------------

Q22365：

龔Sir你好！多謝你的意見！最近我終於入了維他奶($25.1)和騰訊($534)，重基礎分析我覺得這兩間是有質素的公司，我認為襲警事件和監管事件長遠都不會影響 企業的核心賺錢能力，所以決定入貨！

學你話齋長揸有質素的企業享受長時間覆式成長的威力！ 另外想請教你石藥集團(1093) 和福壽園(1448)是否石藥集團較優質一點？

龔成老師：

對，騰訊（0700）、維他奶（0345）都可長線的，最重要是睇翻企業長遠的發展。

石藥（1093）有質素的股票，佢係國內主要醫藥製造商之一。成藥產主要在中國出售，包括抗生素、心腦血管用藥、糠尿病用藥、精神病用藥、抗腫瘤用藥及中醫用藥。

原料藥包括粉狀抗生素、維生素Ｃ及咖啡因，大部分於海外市場銷售。

佢的財務數據不差，有增長力，不過，行業本質有風險，加上近年的政策風險，都令佢股價甚為波動。

這股可投資，長線持有，現價合理區中上位，唔好太心急去一次過投資，宜慢慢投資，長線持有。

福壽園（1448）有質素有發展力。

佢係中國最大的殯儀企業，有一定的規模，而針對的是高端市場，服務有一定的質素，擁品牌及知名度，有相當的賺錢能力，財務穩健負債少，因此企業本質不錯。
由於行業處增長的市場，而新競爭者要入行不易，因此對原有企業有利，故福壽園是優質的企業。

佢憑著本身的優勢，能取得比同業更好的回報，而福壽園管理層表明會持續擴展，策略上會透過併購同業及買墓園去擴充。

由於福壽園的模式成功，因此只要投入資金去發展，複製過往的成功，已經能取得理想的再投資回報率，長期來說此股有一定的增長潛力。

不過，由於此股業務好獨特，因此業務情況在年報上或資料上，未必能完全反映，雖然數據及資料上都顯示此股有質素，但往往要時間證實。

至於企當估值方面，太約$7.5是合理區頂的水平。但不能太一次過投資太多太進取，以分注小注投資是一個策略。

管理層的野心大，投資後不要升少少就賣，要耐心持有，等長期更大的收成。

其實兩隻都有質素，可能福壽園略好。

------------------------------------------------

Q22366：

阿sir，我預計下月會再跌市，請問想撈貨，應幾時入市？

龔成老師：

無得預計的，巴菲特等投資大市都不會預期股市走勢，不要認為自己勁過佢地。我地只知股市會波動，因此當有些股在合理區，已經可以分注買入，當然同時要留現金。

------------------------------------------------

Q22367：

你好老師，老師 想請教下

有關3067 17.231入跌左19％應該點處理呢？
有關6862 34.6入跌左30％應該點處理呢？

龔成老師：

安碩恒生科技（3067），有長線投資價值，你耐心持有就得，你買入價在合理區頂至略貴。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

這基金上落較大，現價大約在合理區中上部，你可持有，如果佔組合比例少，可慢慢分注投資。

至於海底撈（6862），這股就要小心股價上落大，如果持貨多可能減。

從業務長遠本質分析，佢又是不差的，長遠仍會正面，不過中短期會弱。

第一，管理層有講過，之前市場對佢地公司過度樂觀，估值偏高。第二，管理層話公司面對中國的市道，其實業務不是一直都好的。

加上這股之前貴，相信中短期股價仍一般。

不過以長遠來說，這股仍有質素的，佢以「海底撈」品牌經營火鍋店及外賣業務，火鍋菜單由鍋底、醬汁蘸料以及在鍋底烹飪的食材三個主要部分組成，可點單鍋、鴛鴦或四宮格鍋底組合，餐廳提供多種調料及食材，以及供應小吃、酒和飲品。

在中國有好多分店，以及外國都有。

有規模，有品牌，整體正面。相信長遠仍有發展的。

不過，這股市場之前比佢好高估值，就算近期回落，最多只能稱為合理區頂，一定未平。如果有貨可長線，但太多貨要減，股價始終波動。

------------------------------------------------

Q22368：

老師你好 我睇左你個page好耐下 想請教你買股票嘅問題 28歲 我係2019年開始買股票嘅 係隨便買 一出糧錢就好似shopping咁買股票

感受平平地就買 我覺得我好似有啲問題同好危險 因為我唔知幾錢叫平 總之平過我上次買我就覺得平 買股票又無plan 你可唔可以幫我睇下我啲組合有無問題，我蝕緊錢：

700 2手 $629
9988 4手 $232
175 3手 $22
1810 4手 $26
7226 6手 $6
66 1手 $37
17 0.5手 $34

我無儲開錢 啲錢係曬股票度算唔算儲錢？

龔成老師︰

我地做財富增值，其實就係將只會貶值現金，換成長線有增長力的優質資產的一個動作。優質資產可以係物業，可以係優質股、生意等。所以，你買的股票只要有質素，就等同儲緊錢。

但我地唔係完全唔留現金，因為我地要進行日常交易、同時要留有部份，以備不時之需，和當有大跌市時去入貨。

而我地去決定是否投資一隻股票時，你要知道佢到底係做乜、點賺錢、有無質素、行業發展前景係點、財務有無問題等等，才決定值不值得投資。

之後，我地再去用上述資訊，去估算出佢平貴程度，才去制定入市策略。

今天買入價，比上次買入為低，唔一定係"平"，可以係2次都係買貴左。而且佢股價下跌，你一定了解翻，會唔會係一些長線因素影響，令佢投資價值有變。

以你28歲年紀，應以增值為主。你現時持有股票，都有質素，可持有。而且都好好彩，大體上買入價都合理。

但有一隻要留意，ＸＬ二南方恒科（7226）產品之投資目標為追踪恒生科技指數每日表現兩倍（２ｘ）的投資業績。

雖然我長遠認為，恆生科技指數正面，但中短期可以較波動，由於這基金有槓杆，就會令價格更加波動，其實有風險。

我會較建議投資無槓杆的恆生科指ETF（3067），始終較好。

以你現時狀況，你投資經驗唔算多，你可以每月用一半儲蓄去做月供，另一半儲起等大跌市這個模式，去慢慢儲貨，相信會較穏當。

由於你投資知識不高，因此可較集中在平穩增長類股，至於潛力股，只宜小小注(不多於3成)。最好是你先提高投資知識，等到你有一定知識和經驗，才慢慢增加潛力股比例(大約5成)。

------------------------------------------------

Q22369：

你好，有啲問題想請教你下的。我有50萬儲蓄 想問有咩比較 穩陣嘅投資？

定係買啲派息基金 個個月收3千幾蚊息 用簡單啲呢？thanks

龔成老師︰

以你每月派$3000計，派息基金的派息率(7.2%)都算吸引，但你要確認到底派息金額是否保證，而且產品本身，有無"賺息蝕價"的可能性。

如果你想投資一些較穏陣股票，可以用以下優質股。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

因此，如果你係較年青，我會建議用平穏增長股，去做增值。若你較退休之年，穏定現金流對你相對重要，你資金就應集中在收息股類。

你可以因應自己人生階段，去進行選擇。

平穩增值股，例如指數基金、金沙（1928）、長建（1038）、中銀（2388）、港鐵（0066）、恆基（0012）、平安(2318)、粵海(0270)、領展(0823)。

同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）、富豪產業（1881）等（記住，股價略波動，不能太過大注）。

現時大市只係合理水平，入市要分注，同時要留有3-5成現金，去等大跌市出現，才用來加大力度掃貨。

------------------------------------------------

Q22370：

龔成老師，你好。認識了你一個月，第一次發問。本人32歲，已婚有兩名子女。沒有股票投資知識。

有一層已供完的自住樓，另有一層放租，租金12k，貸款400萬，供30年。現金200萬，沒有持有股票。

本身有個目標就係希望50歲退休，到時每個月可有50K被動收入。可能受屋企人熏陶，一直諗住用買樓收租方式去實現目標。即系退休時要擁有4個已經供完，月租12k-13k的單位就可以了。

但睇咗老師嘅專頁後，發覺有啲師兄都係訂咗呢個被動收入50K為財務自由目標。而老師分析只要有1000萬流動資金，做到每年6%回報，其實已經可以做到我個目標。

對比之下好似簡單過買多3層樓收租，所以如果好似我咁樣嘅個案，應該點樣部署投資組合。

P.S題外話，長遠來講自己覺得退休有四層樓收租另一個好處，係當中兩層更可以等子女成家立室時送贈。

謝謝解答

龔成老師︰

若你希望50歲退休時，每月有5萬蚊現金流，以股息率6%計，的確係需要1000萬本金。但只係一個參考數值，總點唔係放係1000萬，而係如何創造出每月5萬現金流。

其實我地退休後，獲得現金流係有好多方法，物業(收租)、收息股、優質債券、年金，定息產品等等。(除了物業，其他都係退休後，唔係而家就買)

無話邊一種係特別好，因為我地重點係要創造一個平衡組合，希望萬一個別投資項目出問題，都唔會嚴重影響到我地全個退休計劃，所以資金會平衡分配係這些項目上。

所以，收租物業都應該成為你財富組合，其中的一員。只要唔係全個組合，大部份比例都被物業佔據，咁就可以。

你現時已持有2間物業，餘下資金和每月儲蓄，應先投資在有增長力優質股，去累積退休所需資金。

你32歲，應以增值為主，建議你用「平穏增長股」 + 「潛力股」作組合，去創造一個增值平台。

現在你每月先用5成儲蓄做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。

但由於潛力股有一定風險，你可以先集中投資平穏增長股，到你有一定投資經驗，才慢慢加入潛力股類。

現時大市只是合理區，你現有200萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

我假設投資回報有10%（連股息再投資），你現投資$200萬，18年後大約會增值至1100萬，再加上你本身收租物業現金流，相信這樣安排，很大機會達至你的財務目標。

------------------------------------------------

Q22371：

龔成老師你好。本人34歲，穩定收入，月入4萬7千。有100萬現金，每月可蓄1萬多。請問如買邊隻股票較合適？偏向想長線高回報個種。

謝謝老師。

龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時34歲去計，可以投資「平穏增長股」和「潛力股」。你每月5成儲蓄，即是用$5000做月供。其餘先儲起，用一邊月供一邊儲蓄的策略。

潛力股係增長力上，會相對較大，但風險同樣地，都係會較高。如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成。你可以視乎你投資經驗多寡、了解這些股票程度和風險取態去決定。

大市現處於合理水平，那100萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

------------------------------------------------

Q22372：

你好丫龔成，我睇左你個page一年，想問問你，本人28歲，儲蓄300萬現金，50萬股票，但股票全部都蝕錢，因早期聽人講買落走唔到，

現有額外流動300萬現金，共600萬，想同時買2個單位，你覺得可以嗎？有咩地區可買？月收入十萬，現租11000單位

龔成老師︰

我先講物業部份，如果係自住樓，地區主要係適合你長線生活需要，咁就可以。

如果係投資樓，除左鄰近商區地段，好似中環、東九、北大嶼(或有變數)外。你都可以留意一些潛力較高地區，好似堅尼地城、大圍、黃竹坑等。

現時整體樓市唔算平，租金回報率唔算太高，用物業做投資增值，值博率不及股市。

但從平衡配置角度，你現時買1個單位投資，我覺得都可以。但2個的話，就會太偏重係物業類，唔係咁理想。

而股票方面，我地投資股票，其實就即係投資一間企業。你一定要知道佢業務、質素、行業發展、財務狀況等，唔好只係聽日講，就走去買。

你要睇翻這些股票有無長線投資價值，如果有，中短期波動唔洗太在意，照持有係無問題。但若無質素，就算現時是賺是蝕，都應該要減持，甚至完全沽出。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你28歲，應以增值為主，建議你用「平穏增長股」 + 「潛力股」作組合，去創造一個增值平台。

除了現有資金，你可以用每月5成儲蓄做月供。其餘先儲起，用一邊月供一邊儲蓄的策略。

由於你投資知識不高，因此可較集中在平穩增長類股，至於潛力股，只宜小小注(不多於3成)。最好是你先提高投資知識，等到你有一定知識和經驗，才慢慢增加潛力股比例(大約5成)。

現時大市只是合理區，你現有300萬資金可投入多50-100萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

------------------------------------------------

Q22373：

本人34歲。供強積金後，月入$27000。每月儲$16000。預計出年儲蓄有100萬。想問獲100萬後投資溫哥華大概港元300萬樓宇好嗎？

另外，現在持有20萬投資建行，港交所，龍源電力，匯豐股票組合。另外想加30萬儲蓄投資股票，以藥明生物，招商銀行，騰訊股票組合， 好嗎？

龔成老師︰

我對溫哥華物業市場，無特別研究。你可以睇翻佢租金回報率，同物業本身升值潛力作決定。

大前題，你必需係認識這項目，「不認識就不投資」。如果你真的已了解當地的物業市場、租務市場、法例、經濟發展，就可以考慮。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你34歲年紀，應先做好增值部份。建行(0939)和匯控(0005)只係收息股，增長力好弱，不宜持有太多。

而且，個別企業和行業，不要佔組合15%和30%以上，銀行業更加不要高於組合20%，否則會有過度集中性風險。你現時組合有3隻銀行股，好大機會會超標，要注意。

其餘股票，都係適合你。但藥明生物(2269)不確定性較大，投資時要控制注碼。

我見你不少股票，都係潛力股類，佢地增長潛力大，但風險都唔細。建議你未來投資時，加入以下平穏增長股，去令成個股票組合更平衡。

另外，除了用現有資金投資外，你可以用每月一半儲蓄，去進行月供股票，去提升組合增長力。餘下一半儲蓄就留起，去等大跌市機會。

平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)。

------------------------------------------------

Q22374：

可唔可以分析下美股 Faraday Future

龔成老師︰

Faraday Future Intelligent Electric Inc. (FFIE)是一間智能電動汽車發展的美國初創科技公司。

我自已無研究過此股，見集團剛與特殊目的收購公司(SPAC) Property Solutions Acquisition Corp.合併。

市場預期會獲得一筆資金，用於未來發展，都算係一個正面訊號。而且集團聲稱2022年第一季，就可以交付首款電動車。比起還只在研發階段的企業，會好少少。

但始終佢業務都算係好初期階段，不確定性會好高，就算你投資， 也不建議太大注。

------------------------------------------------

Q22375：

我高位，$3.32入左1769

星期五出左政策，我现在，应该点做。。。。谢谢你

龔成老師︰

思考樂教育（1769）面對政策風險，賺錢能力減，你宜減持。

本質上，不是劣質，佢主要透過結構性合約於中國提供課後教育服務，包括以「升學」品牌提供學業備考課程，及以「樂學」品牌提供初階小學素質教育課程。

學業備考課程主要針對提高學生的學業表現，以及備考初中入學考試、中考和高考，面向一年級至十二年級的學生。

學業備考課程囊括小學、初中和高中的多門學科，並以小班制形式開展，每班通常不超過２０名學生，一般每周開課一次或兩次，每節課時長介乎１﹒５小時至３小時。每節課由檢查作業、講課時間、課堂考核、練習及小測討論組成。

過往業務有增長，長遠仍有發展力，不過由於規模不大，獨特性未算好強，因此未算好高質。

近期中央政策出台，主要係針對性禁止一些課後教育。集團正正就是從是這類企業，故影響較大。由於成個行業不確定性大，故不建議持有太多。

如果你現時持貨，只係佔你組合一個好細比重，你可以守住先，再觀察。但佔較多重，必需要沽出部份，去平衡風險。

------------------------------------------------

Q22376：

成哥，最近覺得副業生意難做，正職又就嚟完約會失業，股票又輸錢，覺得好難受，點算好

龔成老師：

你要從長遠角度去想，如果你本身有儲蓄，無太大生活壓力，可試下加大力度投入副業，當然這是有危有機。

如果你生活壓力大，就盡快找翻正職先，最好是長工，等你安心翻，至於副業的生意，你其實預左做生意是不易的，最後成功者，是一些有強大心理質素的人。

至於股票，集中睇長遠企業價值，不要睇短期股價，成功投資者心理質素都好強的。

------------------------------------------------

Q22377：

老師你好！我想問。我有216萬股票、21萬基金、53萬現金、83萬mpf

41歲想買樓，但新工只係做左3個月，計埋bonus 3萬/月

我可以點做會較好？自己一個供 用幾多錢做首期較好？係咪要選樓齡少過20年較好 但好多我可負擔的樓齡都過30年？是否等做夠1年先買？

以我可負擔價錢，那一區較適合我？
謝謝

龔成老師︰

你有半年的穩定入息證明，已經可以去做按揭，如果你擔心工作有不確定，就做夠一年先去買樓。其實你現時有一定的流動資產，首期方面應該處理到，最緊要你計好供款佔入息比率，來推算能買多少金額樓價的樓。建議你睇睇《5年買樓4部曲》。

我地投資物業，最重要都是睇翻該物業的質素，呎價，預期租金回報率，特別是利用「呎價，預期租金回報率」去比較同區同類單位，以確定該物業的平貴水平。

你要再要審視其升值潛力，未來地區上、交通上、生活等等的配套發展，才去下一個結論，咁會較好。

其實樓齡，都係其中一個要考慮的因素。樓齡當然越少越好，但唔代表30年以上的樓，就全無價值。由其一些藍籌屋苑，30年都仲好值錢。

但你要留意，30年以上樓宇有機會被要求做樓宇大維修，這是一個唔細的潛在成本，你買物業時，都要加入這個考慮因素。

由於這間係你自住樓，除了以上因素外，更重要係佢能否配合你長線生活所需，講緊係4,5年，係未來10-20年。如果可以，而你又有信心長線"供得起"，就可以考慮入市。

現時借貸息口低，我建議你盡量提高按揭成數，令自己有較多資金可以空出來，作投資之用。

當然，如果你做高按揭成數，會令你月供太吃力，你比多少少首期，都係可以，你要自己去做個平衡。

------------------------------------------------

Q22378：

龔sir,希望長編不騷擾你。我老公已搵到補習工作，現做緊剛開的暑期班，只1～3人一班，一星期有三/四堂。希望九月有新的中四以上的數學班，

佢會容易點，因為一直教中四至六班，現教低年級現多點預備及了解課程。

佢自己已向保險公司借了16.5萬，一年要$12000利息，問他的嫂借了5萬，我在股票攞出5萬，剛好還晒咭數。但現屋企已經無流動錢，要放緊點股票來給他5萬及屋企什使用錢。

股票與利息總共只有約90萬，但是包括我爸放在的幾萬。總90萬減去還錢的5萬，三個月供樓錢，爸放下錢及屋企使用錢。我想就放了1211(現只有一手)及小量其他細股好嗎？

如全部平均放怕剩下是太散、細的股票，這想法好嗎？

現股票有，有提議我先放那種類？

27 1000/入價43.5
66 558 公司送
388 300/入245
700 300/入333
1177 2000/入6.9

1211 500/入183.25
1810 1400/入14.82
2382 300/入140.6
2800 2000/入27.2

2845 50/入121.8
3088 2800/入11.6
3690 300/入110.6
9988 500/入195.6

現在他part-time可能對屋企洗用有幫助，我仍找緊part-time，希望我也有工作會好點。我想申請工時 “不” 提曾做腦腫瘤手術，找工作機會會好點。

希望sir 比點提示。

龔成老師︰

這些股票都有長線投資價值，如果你放，我會優先選擇一些比重較多的股票，建議你盡可能每隻都留有最少1手。

另外，就是一些潛力股，因為佢地雖然增長潛力高，但同時間波動性都較大。以你年紀，不宜持有太多。

所以，我會建議優先沽出"部份"港交所(0388)、舜宇光學（2382）、阿里（9988）、騰訊（0700）、小米(1810)、美團(3690)會較好。

至於你向保險公司借貸(相信你是指，借取儲蓄保單內價值)，這部份息率都算高，其實對你都係不利。你可以睇下銀行，有無其他貸款方法，個息率會少D，咁會較好。

雖然你從儲蓄保單借取現金價值，就算還唔到，最多只會係斷單。但從資產運用角度，這些都是利息支出，都是在蠶食緊你財富。所以長線計，都係找較低利息率的貸款會較好。

至於工作，其實以我所知，很多工作都唔會特別問你這些問題，故相信對你找工作，影響唔算話好大。

但你都要因應自己身體狀況，找工作時不要勉強，任何情況都好，都以自身健康行先。

------------------------------------------------

Q22379：

龔老師，早安！本人持有以下股票一段頗長日子，但股價一直積弱：

511 電視廣播 7000 @$8.60
3918 金界 8000 @$9.50
270 粵海 8000 @ $14.00

應否止損？還請抽空賜教！

特別是金界，是否企業質素轉壞？感謝老師抽空指導

龔成老師︰

電視廣播(0511)已經過了全盛時期，投資價值好一般，長線換至其他優質股較好。

粵海(0270)有投資價值，中短期波動唔洗太在意，暫時睇唔倒佢企業質素，有明顯較壞，你照持有就可以了。

金界控股（3918）都有質素的，但始終新興市場，因此點都有風險。

佢會因全球的疫情，而影響左生意，但這只是中短期。

長遠計，佢仍然正面，佢之前有項目獲當地政府批准發展5幢建築面積共逾580萬平方呎的物業，包括提供共4700個房間的酒店群、娛樂場所及公寓等。我相信長遠對佢仍正面。

此股長線本質，無變差，依然有長線投資價值。但由於佢身處市場新興，股價會較為波動，而你又係退休人士，這類潛力股，其實都唔係太適合你，因為風險太高。

你可以當佢有明顯反彈，就換碼至一些收息股，去為自己創造現金流，支援退休生活開支，這樣會較適合。

------------------------------------------------

Q22380：

本想將一百萬股票值如何滾訣，可惜事與願違

今日再看到恆大被凍結資產這些負面消息，忍痛放曬136，三十萬埋單，第一次蝕六位數字股票，真是一個好好的教訓，不應該重注和要止蝕！

再次感謝龔成老師一直以來的回覆

龔成老師︰

恒騰網絡（0136）始終係有危有機類別，很多價值建構在"未來"2個字。當大環境變差，大市波動，或者係好似現時咁母企出問題。

好容易就會出現較大回調，因此這類企業，投資係可以，但緊記要控制好注碼，來平衡這些風險。

其實你本身係好集中恒騰網絡（0136），現時沽出，再將資金平衡分配一些合適的優質股，反而長線係好事，係百利而無一害。

雖然短期你會見到虧損，但只要你認真去配置這筆資金，長線一定可以賺回來。

若你係年青至中年人士，以下優質股都適合你，你可以參考下。緊記做好組合平衡性，同一行業不能高於組合30%，同一股不能高於組合15%。

平穏增長股，現處於合理水平，可分注入市。但潛力股，部份係略貴。

現時只有安碩恒生科技(3067)、ＧＸ中國電車基金（2845）、騰訊（0700）、阿里（9988）、中生製藥（1177）、福壽園(1448)勉強算在合理區中上至頂部，可分注入貨，其餘都略貴，想買就要等一等。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q20501-20520）

Q20501：

龔Sir,你好，本人今年28歲,月入2萬8千蚊; 我係你進階股票班學生, 我記得你係當時係堂上介紹過 舜宇 (2382)

我亦係當時太約135蚊入左兩手, 我見而家舜宇從高位都跌左唔少, 你覺得而家係咪一個合適既時機再入貨呢?

我而家亦做左少少估值既計算, 想請你幫忙睇下我咁既估算合唔合適?

有代表性既市盈率: 25-35;
預測盈利: $4.08 X 30%增長 = $5.304
(30% 增長從大行報告找出)
預計合理區為: $132.6 - 185.64

龔成老師：

舜宇光學科技（2382）我都幾睇好，本身有質素有技術，加上長遠鏡頭應用都對佢有利。

在長遠，無論是手機鏡頭，又或是各種鏡頭方面的應用，只會愈來愈廣泛，前景正面。

你的買入價不差，原有貨可長線，至於估值方面，基本上正確，你可以用這個估值作分析，我的估值與你接近，比你略略低。你預$170$180左右是合理區的頂位，你在大約這位都可考慮。

------------------------------------------------

Q20502：

龔sir可以教下點樣儲錢方法？

龔成老師：

不如我分享翻我一篇文章：

【只會在非常時期，才會動用的「地獄式慳錢法」】

坦白講，我自己都很久沒有用「地獄式慳錢法」，對上一次用的時候，應該是2008年金融海嘯時期。

當時股市大跌，人心惶惶，但我當時慳錢的原因並非因我身家縮水或擔心將來，而是股市大跌在不斷掃平貨。我記得當時曾有一個月，我的消費是$700（不計家用），當然我每天仍是要返工、食飯、生活的。

--平日的方法--

首先我簡介一下我平日的消費習慣（即無論地獄式與否都會做的）：

->不用信用卡消費
->每天記低消費數目
->儲蓄消費而非負債消費
->分清「想要」與「需要」，凡屬「想要」類的都不會立刻購買

其實以上消費模式並不困難，只要習慣了就會十分輕鬆。

--進擊的方法--

而在某些情況（其實不多，真的很有需要才用），我便會加大力度，使用「地獄式慳錢法」：

首先講食飯，在這段日子我必然是帶飯返工，朋友間的食飯次數亦會減少，盡可能將這方面的消費減至零。（其實帶飯返工很健康，不應用「地獄」來形容，嘿）

交通，當然是選擇最平的交通工具，若果行路返家的時間少於半小時，其實行路是既健康又慳錢的方法。不過我由公司步行返家是必須行山的，但我都做了一次實驗，行一次去計時，結果由公司行山返家用了1.5小時。後來我又計時，試試由公司跑返屋企要多少時間，結果都要45分鐘（其實閒時我都有跑步的習慣），不過相比起幾蚊的車資，的確不化算，所以我亦只做了一次。

至於買衫及日用品方面，在這段時間基本上都絕無僅有，之前提及過要分清「想要」與「需要」。在這段時期，所有「想要」類的消費都減至近乎零。

另外是娛樂方面，並非沒有娛樂的，只是選擇低消費或零消費的娛樂，例如做運動、傾計等。所以這段時期我經常同朋友去行山、跑步，全是零消費的娛樂。

以上種種方法都是針對自己的，但往往最大的困難是身邊人，如家人、朋友、男/女朋友。因為別人不明白你的計劃與情況，所以往往無法配合你的模式，令你的計劃失敗。因此，你要做的是將你的慳錢計劃、目的、情況等同他們講，讓他們明白，最好是給予一個好像好有必要的理由（若你跟人說慳錢的目的是買玩具，這是沒有人會支持你的）。

--落實執行--

最後，如何有效地執行「地獄式慳錢法」呢？

首先是定立慳錢目標，配合每天記帳來跟進。另外是不帶信用卡、不帶提款卡，帶八達通（但不要太多餘額），以及帶很少的現金出街。

「地獄式慳錢法」最困難的是開頭，當習慣之後就會順利。可能你會覺得慳錢令你失去生活及快樂，但在最後我只想說，低消費其實絕不等於低快樂的。

------------------------------------------------

Q20503：

老師，外幣有投資價值嗎？

龔成老師：

外幣始終是「貨幣」，長遠的購買力，始終會下跌，因此不宜投資太多，長遠應持有一些真資產，令財富有真正增值。

------------------------------------------------

Q20504：

龔Sir你好，我今年32歲，想請教一下：

1）對股票沒有太大認識，不過手上有一些持了好多年的股票，跌了很多，請問應該買多手
中和 買入價 ，還是及早止蝕？還是應該再等下？

6886 HTSC 400股 買入價 $25.85
1766 中國中車 1000股 買入價 $15
1776 廣發 600股 買入價 $23
1929 周大福 1000股 買入價 $10

2）之前聽你建議在上年開始月供$5000 入2800 盈富基金，目前大概有3手 帳目賺約5000左右，
由於目前價位已經很高（$30-31/手）

請問我應該調低月供金額嗎？如果要調低 應該為每月供多少？還是停供？待回落再供？
繼續月供一般需要維持多久？

3）我還想長遠增值，月薪約18000，每月有5000-8000 可以投資，請問有哪些有質素股票
建議月供嗎？每月應該月供多少比較好？

多謝你既耐心解答！

龔成老師︰

1） HTSC華泰證券（6886）和廣發証券（1776）質素算是中等，業務有點波動，發展力中等。這類股唔會持有得太多。

中國中車（1766）有質素，但你預佢增長力唔會強，只宜小注。

周大福（1929）有質素，但近期升左唔少，已經合理區頂至係略貴。小注好了。

2） 現時大市在合理水平，不建議改變供款。

如果你本身對點定平貴，唔係太有認識，建議你一直長線咁用同一金額月供。因為盲目去調整，反而有機會唔小心，破壞左月供個平衡價格效果。

3）策略上，你可以投資"平穏增長股" 和 "潛力股"。你先用每月5成儲蓄做月供，其餘先儲起，用一邊月供一邊儲蓄的策略。

選股上，你可以投資在平穏增長股︰盈富（2800）、銀娛（0027）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）、領展（0823）。

增長力較強的，可選安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。但佢地波動性和風險會較高，你要自己平衡。

餘下的另一半現金，我地就等機會，當大市出現較大回調，就加大力度掃貨，然後作長線投資。

------------------------------------------------

Q20505：

龔sir,您好，我follow左你facebook一年，對投資股票學到好多，我以前都係短炒多，但真損手爛腳收場，
打個和已叫好彩，現跟您套方法，讓我資產能得到理想的回報，多謝您無私的分享及心得

電動車係將來取代汔油車，但好多做電動汔車的股票都升左好多，有些根本冇資金買一手，我有睇您的書當中的

（2845 ）GX中國電車及電動車電池股（819）天能動力現在是否值博潛力股嗎？

請賜教，謝謝


龔成老師︰

GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），中國因為能源問題，長遠一定要發展電動車，這是大方向，故此股有一定投資價值。

由於近期不少車股被炒起，此股現價略貴。無貨可以現時入少少，要回多1, 2成才算合理區，才可再慢慢加注。

此股潛力度是有的，但會比較波動，如投資宜慢慢分注，並長線持有。

天能動力（0819）有質素的，同時業務仍在增長中，不過，增長力由過往的高增長，轉為平穩增長。

佢主要係中國從事研發、生產和銷售新能源鋰動力電池、特殊用途鉛動力電池、電動自行車鉛動力電池；廢舊電池回收處理；以及智慧能源解決方案業務。

佢業務都正面的，但盈利就比較波動，因為幾年前曾出現過虧損，這是扣分的地方。近幾年已無這問題，見佢生意同盈利都有理想增長。

不過，這股業務始終有潛在波動，股價上落大，現價合理區頂。投資都可以，但不能大注。

------------------------------------------------

Q20506：

你好，我是一個剛剛進大學的大學生
現在有點興趣投資股票

我現在每月大約可投資$4000-5000
亦希望能夠透過投資
賺點利潤

但不知如何入手
你可以分享你的經驗給我嗎

龔成老師︰

當然可以！首先，最重是長線投資，我20年前，都試過短炒幾年，都是輸多，最後長線，先開始賺錢，所以，最重要是建立一個長期的財富組合，要適合你、要平衡。

其實，係我地進行人生財富累積架時候，會利用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

你現時的年齡，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

策略上，你可以投資"平穏增長股" 和 "潛力股"。你先用每月5成儲蓄做月供，其餘先儲起，用一邊月供一邊儲蓄的策略。

選股上，你可以投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）、領展（0823）。

增長力較強的，可選安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。但佢地波動性和風險會較高，你要自己平衡。

由於你現時無乜選股經驗，你可以先用盈富基金（2800）作為你投資目標，佢係包括52間質素不錯上市公司股票的組合，有助你平衡組合中的風險。到你有一定能力，才買其他我建議的股票。

餘下的另一半現金，我地就等機會，當大市出現較大回調，就加大力度掃貨，然後作長線投資。

------------------------------------------------

Q20507：

龔成老師， gx中國潔能2809 同1183 ，前景好嗎？

龔成老師︰

GX中國潔能（2809），其目標為追蹤SOLACTIVE中國清潔能源指數NTR之表現。

當中佔最多為"半導體產品與設備"股份，約組合4成，其次是逾2成的"獨立電力及可再生電力"。

此股平貴不易分析，而且頭10大股份中，除了信義光能（0968）外，其餘都在內地上市。

潛力度是有的，但會比較波動，如投資宜慢慢分注，可長線。

澳能建設（1183）以過往的業務來睇，只是中等，業務發展不算強，整體不差但又未算好好。

佢最近宣布，同德國創新科技企業Ｕｂｉｔｒｉｃｉｔｙ達成戰略合作，於大灣區拓展大灣區開發、製造及分銷電動汽車充電業務。

睇翻澳能果邊，主席表示，目標係兩年內在港澳大灣區安裝500至1000個充電裝置。

企業發展力都有，但近期股價其實有點超前反映。這刻投資值博率未算高，如睇好，小注好了。

------------------------------------------------

Q20508：

老師，我有20萬資金，能全放太古股票嗎？長缐投資，是多少年為目標？

和國美493能買入嗎

龔成老師︰

長線投資，講緊係最少5年，甚至更長。

太古地產（1972）有相當的質素，有一定的增長力，係唔錯架平穏增長股。

但任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於3成，而單一企業不要高過15%。

國美零售（0493）只是一般般。

企業連續出現虧損，品牌價值遠不及從前，優勢不強，雖然正加強網上網售網絡，以及可能有人事變數，但仍有未知數，整體的投資價值唔算高。當然未來可能有變，但這刻仍有未知數。

------------------------------------------------

Q20509：

老師想問下9988 爸爸1810 小米1928 金沙 1211 比亞迪 呢4隻既買入合理區價錢

係幾多，邊隻現階段值得分注入貨？
因為我26歲剛結婚 有一位小朋友

現時擁有6618 12手 $184 買入
股票+現金+金器 大約有$50萬左右，想儲錢買樓 5xx-600m左右，應該點部署

龔成老師︰

任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於3成，而單一企業不要高過15%。

由京東（9618）分折出來京東健康（6618）其業務主要提供線上線下的醫藥出售和健康管理服務，業務布局包括醫藥電商、互聯網醫療、智慧醫療解決方案、健康服務等4個大板塊。

京東健康旗下京東大藥房，更是內地線上線下收入規模最大的零售藥房。其互聯網醫院，日接診量超過10萬次。

質素上，京東健康是有的。但由於估值難，不確定性大，不宜持有咁多。

至於你所講4隻個股票，金沙（1928）合理區中上部，阿里（9988）算在合理區頂部，至於小米（1810）要回1、2成才算合理。而比亞迪（1211）現價係貴，要回到$120才算較合理，起碼都$150。

你可以利用股票，在這幾年去增值財富，投資平穩增長股+潛力股，同時努力儲蓄。你可以動用$20萬-$30萬去投資股票，但都要有一定的現金。

具體可以睇《5年買樓4部曲》，適合你的情況。

------------------------------------------------

Q20510：

龔sir ，黎緊香港都大力推電動車
我都有持有比亞迪 但想投資有關充動椿公司 但好似無發現。請問sir有無推介

龔成老師：

如果相關的有澳能建設（1183），佢最近宣布，同德國創新科技企業Ｕｂｉｔｒｉｃｉｔｙ達成戰略合作，於大灣區拓展大灣區開發、製造及分銷電動汽車充電業務。

睇翻澳能果邊，主席表示，目標係兩年內在港澳大灣區安裝500至1000個充電裝置。

企業發展力都有，但近期股價其實有點超前反映。這刻投資值博率未算高。

反而我建議另一隻：

GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

由於近期不少車股被炒起，此股現價略貴。無貨可以現時入少少，到有明顯回調才再慢慢加注。

潛力度是有的，但會比較波動，如投資宜慢慢分注，可長線。

------------------------------------------------

Q20511：

老師，你好。現想清去一啲重疊行業既股票，請問保險股既945同2601應留哪一隻？

另如繼將來發展，是否物管較內房好？如將884換了1516作長線，可以嗎？

老師，上堂後，現開始做練習，剛分析一隻股，請龔sir 指教，見佢3年內有多次配股，但用於投資及行使認股權

如果呢個情況，長遠來講，可唔可以話呢啲配股可接受？抑或都不考慮？

龔成老師：

宏利金融（0945）的穩健度較高，可留低，長線。

物管與內房，都有各自的獨特性，由於物管的現金流較強，負債較少，因此會好少少。

你轉融創服務（1516），可以，佢有質素的。

佢由融創中國（1918）分拆上市，主要在中國提供物業管理服務及增值服務。而融創中國本身係中國好有規模的地產發展商，有這個背景優勢，佢長遠發展唔差。

睇翻佢資料，佢客戶主要包括融創中國及其合營企業與聯營公司，以及其他房地產開發商、業主、住戶及其他客戶（如社區增值服務相關的廣告公司）。

財務數據唔差，生意與盈利增長快，現金流強，整體正面，這股有長線投資價值。不過，現價貴，如投資，真的小注好了。

問題不算大，配股是上市公司常見的動作，因此不用太擔心。

------------------------------------------------

Q20512：

老師你好，我今年28歲，目標兩年儲到100萬，唔知可唔可行？

現在資產約320K，股票約200K。月入48K，每月估定支出23K，另外洗費約7000，現月供股票8500。

月供組合：
0823: $1500; 2638: $1500; 2800: $4000; 6823: $1500

之前買落手持股票組合：

0003: 376@$14.44 ; 0005: 508@$60.15 ;
0006: 230@$53.24 ; 0823: 179@$67.74 ;
2638: 3522@$7.8 ; 2800: 2363@$27.68 ;
6823: 2712@$11.51 ; 0011: 100@$158.92

想問下，月供組合需要轉嗎？手持股票好多都蝕緊，需要止蝕換其他股票組合嗎？有甚麼方法達成目標？

謝謝！

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

你年輕，加上想以$100萬為目標，其實財富應投資在較有增長力的增長，而你現時持有的，雖然有質素，但全部都是收息股類別，增長力不強，與你目標不一致。

至於月供，港燈（2638）、香港電訊（6823）都不適合你的目標。

你先改變月供先，轉到較有增長力的項目。

至於原有貨，可以慢慢調整，可以先調整持貨較多而增長力不強的。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，潛力股可考慮：安碩恆生科技ETF（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q20513：

老師，你好，我係新手。雖然工作好忙，但堅持不時都追下你嘅post，想有啲股會間唔時派息嘅，又想有啲長遠係增長嘅：（唔知咁諗啱唔啱）

想問幾隻股，值唔值得供：
3067
2833
1810
0388
2800
1972
1929
先謝謝老師嘅時間
靜候佳音

龔成老師：

上述股票或基金，都是有質素的，你都可以選擇作為月供。

但怎樣配置得較好，就要睇翻你自己的情況。

我地進行人生財富累積，會運用「先增值，後現金流」，年輕時進取，年長就得守。

上述的選擇及比例，就算睇翻你自己的年齡、風險承受程度、投資目標。例如盈富（2800）就是平穩增長型，3067就是潛力型。

------------------------------------------------

Q20514：

我係澳門人，好想上阿sir的堂
我2845有2手，139買入

我又覺得呢隻可以長持，但基於我係新手，可以買賣本金不多，加上無咩經驗，所以諗返覺得入太小手，想加持，但仲觀察緊價位回落去更低，想問下我甘樣想法正確嗎?

龔成老師：

首先，我地要選優質股長線，你方向正確，另外，要睇平貴決定買入方法，這基金現價略貴，因此，要分注投資。

我地無人能準確準測股價的走勢，因此，不要太過「估」股價之後的走勢，我地只能夠定出一些平貴的策略。

你可以每隔一段時間入小小，又或見佢跌得多少少，如每次跌10%，就加注。總之，以分注模式投資，要慢慢買入，同時，要留有一定的現金。同時要長線投資。

其實我之前都有開過澳門班的，不過現時疫情，所以暫時停左，之後會再開翻的。

你或者可以預早留位，只要whatsapp 852-55457212我同事講，打「留位澳門班」就得。我地有具體資料就會 whatsapp你。

因為現時已有好多澳門人留左位。

------------------------------------------------

Q20515：

龔成老師，請問港交所值得月供嗎？定係選擇騰訊或者阿里巴巴較好？而騰訊同阿里巴巴邊一隻更有潛力或值得月供呢？謝謝你！

龔成老師：

上述3隻，都值得月供，至於供那一隻，就要睇你的投資目標。

港交所（0388）會較穩健，而騰訊（0700）與阿里（9988）潛力度會高少少。你可以同時供港交所+阿里，這樣會較為平衡（其實加騰訊亦可，睇你自己想供那一隻）。

記住，月供股票要長線進行先得。

------------------------------------------------

Q20516：

呀Sir 你好，之前工作忙沒時間研究股票，錯失了入股票的時機，中生製藥、阿里、小米、舜宇光學等等您之前介紹的股票現在好像也偏貴，想請問最近有那些潛力股票介紹？

中國鐵塔 (0788)、中國光大綠色環保(01257) 值得買入嗎？ 大概什麼價位可以開始小注呢？

現在月供盈富（$3000）、港鐵（$2000）、領展（$1000）中，盈富最近升很多請問需要先停止月供嗎？

另外，最近開始看您的作品80後2百萬富翁，請問之後應該看那些系列？ 謝謝！

龔成老師：

中國鐵塔（0788）、中國光大綠色環保（1257）不是無質素，但增長力比過往略減。

反而你月供安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

至於你現時月供的，可保持，盈富（2800）都可繼續。

當然，你要留有一定的現金，等機會。

你可首先睇：

《80後百萬富翁》
《股票勝經》
《財務自由行》

之後再睇其他。

------------------------------------------------

Q20517：

想問下460、362、2328 情況

龔成老師：

四環醫藥（0460）好翻D，相信無之前咁差。

不過這股，2015年、2016年，曾經出現了核數師有「保留意見」的情況，反映盤數有問題，小心這股。

我對投資這股有保留。

信陽毛尖（0362）質素不太好。

佢主要從事製造及銷售醋酸乙烯、聚氯乙烯、葡萄糖及澱粉，以及生產及供應電力及蒸氣。例如製造及銷售聚氯乙烯、製造及銷售醋酸乙烯。

生意不穩，加上盈利波動，經常出現虧損，相信成本等因素影響佢好大，缺乏產品價格自主的能力。

投資價值低。

中國財險（2328）主要於國內為各界客戶提供多種財險產品，包括機動車輛保險、企業財產保險和家庭財產保險。

過往的生意與盈利都不差，不過就無乜增長動力，質素算是中等。這股都可長線，不過就重收息，唔好對股價有太大期望。

------------------------------------------------

Q20518：

老師你好~我係核數師 有睇開老師著作如<股票勝經>/<50穩健收息股>

想請問:-
持有136這股多年 買入40,000股 @$0.44. 想問現價升左咁多，可全放嗎? 還是可繼續持有? 謝謝 期待你回覆~

龔成老師：

恒騰網絡（0136）有危有機類。

現時企業盈利不多，但市值極高，市場對「前景」有無限幻想，有時炒作會升好多，但跌都可以好勁。

如果長遠業務成功，會爆得好勁，但失敗，會跌得好勁。

我建議你點都賣一半或以上，餘下留多少，就睇你有幾睇好這股。

------------------------------------------------

Q20519：

HI 老師你好，見到你FB PAGE經常會解答股票疑難 我而家手持一D股票

但由於某D原因需要套現大部份資金 幾個月後先再睇時機入反市 請問應該留反邊2隻股票好D??謝謝你

688 中海外 $17.88 1500股
1810 小米 $28.35 1500股
2318 中國平安 $90 500股
981 中芯 $29.5 1000股
9988 阿里 $282 500股

龔成老師：

我地最重要是睇「配置」睇「企業質素」，不星睇表要賺蝕。

上述的股，都有質素的，但如果要賣，可考賣中芯（0981）、中海外（0688）。如果要賣多一隻，就平安（2318）。

------------------------------------------------

Q20520：

龔成老師你好，本人今年34歲，做工程相關行業，但對此行業生厭，想轉行，但又怕以現在的年紀，加上經濟環境差，轉行會無人請，但又唔想係呢行做死一世，所以好猶豫。

另外本人的儲蓄都比較少，只有十萬多少少，感覺很無希望，都想效法龔成老師可以每月儲蓄1萬元，儲5年就可以有60萬，只是怕到時年紀已接近40歲，就算再投資也未能好好發揮複利息的作用賺到多少錢

唯一的「優勢」可能是我暫時未有家庭負擔，和女朋友亦剛剛分手，所以想係呢個時間好好建立自己的資產，重新開始自己的事業。

希望龔成老師可以對我的人生提出一些意見。

龔成老師：

有心唔怕遲，第一，每月開始儲$1萬，無論是否轉工，都要逼自己做到這一點，將來的你一定會多謝34歲的自己開始了這計劃。

第二，投資，你可以自行分注，或月供股票，月供盈富（2800）、3067及其他優質股都得。總之，要開始投資，記住，這不是炒賣，是「累積優質股」。

第三，如果你有心目中一些行業想轉，我建議你試一試，反正這刻未有家庭，是你人生最後博一次的機會。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q17521-Q17540）

Q17521：

Hello 成哥你好呀！我係上過你股票班的舊生，上埋進階班的，最近在研究二三線企業，我先從不同經濟版塊入手，見大家熱炒緊生物科技同科網，我就試下搵「環保」呢個版塊

發現左一隻「海螺創業」（0586），我用左個word做，希望你唔介意睇睇，我做得比較簡短，唔好意思我知未算太足夠的數據，但做落去都真係幾累，做到懷疑人生。

咁我做完主要有幾個發現同問題。

1. 海螺創業近年的ROE、毛利同純利都增加，理應係賺錢企業，不過我係年報中發現原來最影響利益的係「應佔聯營公司利潤」

因為海螺創業佔左49%海螺水泥利潤，所以令到其毛利、純利都提高。睇返佢賺錢係有增加＾但唔係最大影響，雖然係有支持，不過都反映佢而家生意唔係最賺到錢，可唔可以咁理解？

2. 海螺創業係「現金流量表」中，投資同融資現金流每年表現不一，有上升/下跌，但睇返佢近一兩年的發展，始乎花好多錢係廠房到

而且配合其「5年發展」方針，睇黎想大興土木，呢個投資同融資上升的趨勢，有D似上進階班教的「潛力股」現金流象限。

3. 海螺創業本身有優勢，不論係成本控制、垃圾發電技術、背後財力（海螺水泥）的幫助、政府的支持，對佢黎講都有機會構成護城河，你認為呢？

4. 我將佢同其他環保企業比較，例如龍源電力、天倫燃氣，覺得佢係呢一年業績都算唔錯。而且睇大行報告（超過十頁果隻）都形容對呢隻都感到很正面 真係將來有機會跑出成為倍升，唔肯定咁講岩唔岩

唔好意思，一大咋問題，麻煩你呀成哥，因為我都好受你影響，去裝備自己，為將來財務自由而努力！謝謝你！

龔成老師：

海螺創業（0586）正面，企業有質素，有增長力，這股的確值得深入研究的。我初步睇左你的報告，整個都分析得不差，講出了重點，最後風險部分，你可以再講多少少，因為這是你要較關注的。

1）你大概可以這樣理解。

進階班都有解釋過這部分，當佢有較大的初營公司收入，就會令財務數據出現變化，如果要仔細分析，你要調整翻先得。

由於佢聯營公司貢獻條數都幾大，因此在分析時，最好作調整。

2）對，可以這樣分析。但我地分析現金流量表時，唔好只睇1、2年，要睇整體情況。見這企業仍處一個發展階段，同時派息比率不高，都反映這點。你可以仔細睇年報，尋找管理層分析的部分，睇下佢地有無講發展的具體情況，另外可以尋找有關「資本開支」部分，都有用的。

3）整體是不差，相信前景仍是正面，但政策是一個風險，我地投資者好難預計得到。

4）初步分析，企業是正面的，加上現價未算貴，不過政策及產品價格能否自主，這成為最大的風險。另外，業務能否有持續的發展，我地未能得更絕對正面的結論，雖然過往增長不差，但將來仍會有未知數，這不單由大環境影響，同時會考慮發展風險。

整體都是正面的，但就不是無風險。

------------------------------------------------

Q17522：

老師，我今年55歲，人生經歷了不少，10年前面對困難，我克服左，到近期，疫情令我無收入，我又要面對困難，但我已經55歲，已唔想奮鬥。

我自問之前收入唔少，但最近，唔知點解我無信心，可以點？

龔成老師：

我相信你面對困難的能力，是你最有價值的地方，你現時的確面對困難，但我相信你10年前的困難可能更加大，現時的困難只是因為你上得快，一下子跌落去，你覺得好傷。

加上你的能力比過往進步，經歷比過往多，其實你是比之前更強，只是你認為自己「已55歲」，設定了自己不及從前，其實，每個困難都是突破機會（我自己都好明這點，我生意正常時，生意好穩定，但有困難，就會想方法突破，當環境好轉，生意往往會變得好好）。

其實你都明白，疫情只是中短期問題，你一定會好轉，肯德基創辦人，都是60歲先創立肯德基。

我真的好深信（每次我面對困難都會這樣想，而的確這樣），上天比一個困難我，是要我成長，要我突破，要我明白「不能只是如此已滿足」，加油！

------------------------------------------------

Q17523：

你好 龔sir，想問你點睇6160&1801呢兩隻股，算唔算潛力股？

同時想問兩隻股嘅平宜區係幾多?
感謝你回覆

龔成老師：

百濟神州（6160）透過多份獨家許可協議，向許可方（包括新基（Ｃｅｌｇｅｎｅ））取得於大中華區開發、製造及商業化多種產品及在研藥物的權利。

這股業務有增長力，不過現時仍不斷燒銀紙，估值十分難，只可以話現價唔算平，要有較明顯的回落，先有機會平。潛力度都有，但這刻股價的投資值博率就唔算高。

信達生物（1801）係一家中國生物製藥公司，開發了集研究、發現、開發、製造及商業化於一體的生物醫藥平台，並在腫瘤、眼科、自身免疫和代謝疾病領域建立了一個包括單克隆抗體和其他生物藥物的產品管線。

潛力度是有的，但現價同樣都貴，如投資的話，小注好了。

------------------------------------------------

Q17524：

龔成老師，你好，疫情期間開始看你文章，我今年36歲，月入60000. 擁有一物業，345購入，市值450.還有280貸款。沒有家人需要供養，每月可用現金3萬8.
擁有股票 2186 (8*90000), 保險基金(月供1200)

因居住環境較小，猶疑應否售出換新樓，如御海灣/大圍上蓋，作投資及自住用途。長遠用升幅換更大單位。還是應該運用資源投資股票，讓時間替我財富增值，始終買樓要付息及是一項債務。

股票若進取的話，應該分配如何及有那幾隻可以考慮？
謝謝指教。

龔成老師：

要睇你長遠有無實質需要，如果有實質需要，其實長遠都要換，只是時間的問題。這樣其實都可以進行。

香港樓市，長遠仍會因供求問題而向上，因此你持有較有價值的單位，對你財富都是有利的。

香港經濟中短期有不確定性，可能令樓市下跌（不過不會大跌），因此，你都可以留意機會。

至於股票方面，如想要進取，可考慮：阿里（9988）、騰訊（0700）、港交所（0388）、舜宇光學（2382），但就要明白波動性比上述會高少少。

------------------------------------------------

Q17525：

龔成老師，你好！想請教一下，本人29歲，由2017年開始月供股票，月供開頭由$8k 開始，都是藍籌收息股為主，前年轉工收入增加至25k

慢慢加到月供17k，工作穩定，無家庭負擔，不過依家市道唔好，想儲返現金流。

6月開始供以下：2（$2000）3（$3000），6（$3000），939（$2000）
其餘7k 儲現金

現在120k現金，另股票倉持有：
1211 ：218股
11 ：381股
3 ：7882股
12 ：598股
2 ：371股

823 ：675股
66 ：240股
2388 ：563股
6 ：647股
939 ：6170股
778 ：1000股
2800 ：1096股

6月因一時心急，1211 放了一手。因為依家全部股票也低過我供的平均價，大概蝕緊10萬左右，你認為有需要上蝕嗎？或那一隻你認為可以加持？謝謝

龔成老師：

你有兩個問題。

第一個是一般的散戶都會犯的錯，就是「升的股票就賣，跌的永遠唔賣」，這就會造成「贏粒糖，輸間廠」的結果。

你要以企業的質素行先，有質素的持有，無質素的賣出，質素較一般的，持有的比例都不會太多。

你要好好分析每一隻的質素與增長力，以這個方向去調整持股比例。

第二，你2X歲，應該選較有增長力的股，上述股票大多是平穩型、收息型，這在配置上未必最適合。你現時月供的，雖然有質素，但增長力都不強，未必最適合你。

上述的股票不是無質素，只是在策略與配置上出了問題。

最簡單是增加盈富（2800），以及加翻少少有增長力的股，減少收息股，平衡組合。

------------------------------------------------

Q17526：

你好龔成老師，現持有領展（500股$88.6, 200股$72.5, 300 股$65,應否繼續溝貨？

因為500股購入價太高了。

龔成老師：

這股雖然有質素，可以守，但同一隻股票持有過多，都會出現集中風險。

你最重要是計算翻，這股佔你股票組合的比例，如果已去到15%，就唔好再加，如果少過，就可以加一注。

另外，你要睇翻你現時的現金情況，如果現金數目唔多，就要留現金。

------------------------------------------------

Q17527：

龔老師你好，本人月入4萬，而家28歲，手頭有現金45萬，目標希望5年內買到樓，每月儲蓄大約1.5-2萬左右，屬投資初哥

可否賜教有冇咩方法令我的資產增值。

上年尾開始月供股票 煤氣 工商 招商 香港電訊 0008，但賬面現虧損$3000幾， 投資如何好？謝謝你

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股只能小注。

因此，你上述月供的股票，以你的年齡來說，並不適合。

你可以考慮盈富（2800）、銀娛（0027）、恆基（0012）、中銀（2388）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：阿里（9988）、騰訊（0700）、港交所（0388）、舜宇光學（2382），但就要明白波動性比上述會高少少。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q17528：

hello 你好，想請教一下：
幫小朋友儲錢暫時有大約6萬蚊，部分做咗定期，剛學股票

第一次買咗8000股3988，等收息。如果想幫小朋友儲錢，買邊幾隻長楂收息最好？

龔成老師：

如果幫小朋友儲蓄，你可以建立一個「收息股」+「平穩增長股」的組合，各佔一半，中行（3988）是收息股，可持有。

你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、置富（0778）、陽光（0435）都可以。

至於平穩增長股，最簡單就是投資盈富（2800），這股佔組合一定比例都無問題。

------------------------------------------------

Q17529：

龔成老師好，我每月月供股票，總額是5000元。其中一隻月供股票是恒生。

另外當價錢回落或手上有現金時，我亦會一手一手去買恒生。現在恒生價錢回落了很多，而我平均買入價很高，17x，我應該繼續月供恒生嗎？

龔成老師：

恆生（0011）是收息股，你可持有長線收息，但就唔好對股價有太大期望，相信短期較難上翻去。

繼續月供與否，要睇你的投資目標與組合比例。

第一，這是收息股，你要分析，不斷將新資金投入收息股，是否合你的投資目標。

第二，組合的比例，如果現時已持有一定的數量，就未必值得不斷加。

第三，你現金情況。這刻大市處合理區，同時留有一定的現金是重要的。

------------------------------------------------

Q17530：

老師你好，小弟今年32, 月入$35k 左右，follow 你嘅page 幾個月，開始睇你嘅作品<<80後百萬富翁>>同video, 明白增加投資智識嘅重要性。感激你嘅無私教導

想請教下，接觸你嘅作品之前無投資概念，所以支出大無咩儲蓄，幾年前有買落d 儲蓄保，唔知應唔應該繼續供
1)saving insurance value $65k (@3.5%) 供完
2)saving plan policy value 現有$100k @3.75% 月供$1950
3)saving plan基金 policy value$ 70k 月供$2400

有2手293@$13.7 唔知應唔應該長揸住先，因為宜家航空業冰河時期
開始學月供股

四月開始0005 $1000
六月會開始2800 $3000

0027 $1000
本應想供0270自己幾鍾意依隻，但係HSBC無得月供，所以有機會儲夠錢先入貨

扣除基本開支應該有$5k 剩低儲起佢
如果宜家有依個組合，3-5年唔知去唔去到一百萬呢？

同埋如果睇完<<80後百萬富翁>>系列之後應該睇邊本先好呢？多謝老師指教

龔成老師：

我地進行理財，要做到攻守兼備，你上述持有的儲蓄產品，不是無價值的，但增長力就不強，是「防守」類別，你只能視為財富分配的其中一部分，如不多，無問題。

但之後就唔好增加太多，應該將資金分配到「進攻」的部分。

國泰（0293）質素一般，你可以等佢上翻D後，賣出這股

至於匯豐（0005）只是收息股，增長力不強，對你這年齡未必是最好的投資。

盈富（2800）、銀娛（0027）可保持月供。粵海（0270）有質素的。

另外，以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊月供，一邊留現金每月$5000，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

你可以睇《股票勝經》。

------------------------------------------------

Q17531：

非常謝謝老師百忙中免費為我解答，我還以為我41歲這年齡財富已沒增長力，原來還可以繼續增長

我已馬上加了你推介的（9988）阿里，（1177）中生製藥，各月供每月每隻$500，再加之前2800 （盈富）
00006 （電能實業）
1810（小米集團），
1398 （工商銀行），
1928 （金沙中國）。

每月共$3500月供，金額會否太少？

而你說工行和電能只是收息股，那我應怎樣處理這兩隻股票為佳？我也想報讀你的股票初班，但時間暫時不合適，只要我工作時間合適我會馬上報讀，太感謝你老師

龔成老師：

4X是中年，雖然不是進取投資，但平穩增長，加少少潛力是可以的，我課堂會更具體講述當中的配置方法。

由於你月供，因此買入價得以平均，就算不少潛力股現價唔平，但只要長期供，以及控制注碼，其實都可以進行，當然，最重要是同時留現金。

$3500可以的，反而這刻唔建議太大金額，如果股價回落先加大注碼，這會更好。

至於收息股，你都可以持有，你這年齡都可以有收息股的，但並不是財富核心，你唔加就得，原有貨持有無問題。

------------------------------------------------

Q17532：

老師，我有5手匯豐，平均價係60蚊買入，e+應該放轉買其他股嗎？

還有就是想月供2800和0027，比例1:1好嗎？

龔成老師：

匯豐（0005）只是收息股，增長力有限，唔好對股價有太大期望，你是否持有，要取決你的投資目標。如果你本身想長遠收息，可守住先，但如果想組合有增長力，就應該轉其他。

你唔好比過往的買入價限制，要睇長遠的組合配置與增長。

至於盈富（2800）、銀娛（0027），兩隻都可長線，比例最好是3：1。

------------------------------------------------

Q17533：

老師我借了110萬在炒股，每月還5000元利息，我入左3萬股003煤氣，11.933，想升0.5就放，想套現，不想欠那麼多，你怎麼看呢？

941入左4000股，56.45入的
0005入左2400股，50.7入
00548入左3萬股，7.803入
00670入左4000股，2.88入
01398入左5萬股，4.934入
01829入左5萬股，4.934入
00762入左36000股，4.296入
09983入左21000股，8.64入
謝謝老師

龔成老師：

借錢投資股票是危險的求事，我唔建議。

另外，唔好太集中在單一股票，就算這股有質素，也不能持有過多。

至於你持有的股，都是著重收息的，如果你投資目標以收息為主，問題不大，不過借貸投資，始終要好小心，你要自己衡量風險。

現時持股，中國東方航空股份（0670）有少少風險、中國機械工程（1829）質素不太好，建業新生活（9983）唔建議持有太多。至於其他，就無乜問題。

------------------------------------------------

Q17534：

老師，我8349入左9萬股，1.1入

03175入左2萬5千股，2.07入
00709入左4萬股，4.165入
老師麻煩你給些意見，謝謝，現在越買越多，不想負債太多

龔成老師：

美固科技控股（8349）無乜投資價值。

Ｆ三星原油期（3175）小注好了。唔好持貨太多。

佐丹奴國際（0709）中短期有風險，不過長期不是零質素，但要耐心持有，這類股小注好了。

------------------------------------------------

Q17535：

老師您好，我工作2年 儲蓄40萬
考慮置業 樓價約630萬 借9成，家人可幫補首期
2人 入息80000

想問 儲蓄不多 家人借部分首期 置業會否太急進？
謝謝

龔成老師：

少少急進，但如果你能承受風險，這動作不是不可。

但最重要，就是睇你的「供款能力」，比起樓價上落，你能夠供得起，如果經濟影響了你的工作，是否有足夠的資金供得起，收入影響的可能性不大。

只要你有信心「供得起」，這動作都可以進行。

------------------------------------------------

Q17536：

老師，叧外想問下2號中電，我剛在 $73.05 入過一手（500股)！

我預備入多2注，作長缐投資用！

但我留意了它一段時間，股價波動不算大，如要入第2及第3注，是否也是等跌10% 才入？或5％已可？

龔成都師：

中電（0002）是有質素股，你可以長線。這是收息股，但就唔好對股價有太大期望。

由於這股波幅較少，因此的確可以調整買入的隔距，你可以跌5%買入第二注，至於第三注，就要再注10%，因為最後一注資金要較小心。

------------------------------------------------

Q17537：

龔sir，我持有兩手0014希慎近5個月，個價一直冇升，我應該繼續守還是離場？因疫情影響，係咪中短期都難啲上返30蚊？謝謝！

龔成老師：

投資股票，唔能夠以中短期股價去衡量長期的價值，買股票就是買企業，你要睇「企業」，而不是短期股價。

希慎（0014）有質素，香港情況當然會對佢中短期有影響，但在2、3年後，香港又會回到正常，這股又會上升，因此無野要擔心，因你就要耐心持有。

------------------------------------------------

Q17538：

龔成，有事請教：

中芯國際(0981) 見佢A股上市當天，我仲睇好會繼續上升，但A股就升2倍幾，港股依到就一日跌30%，我諗唔明呀～

係咪因為散戶在港股賺完錢，然後賣完再去A股買，最後見跌3成又返黎港股買先支撐住唔跌破27？

我有個感受：龔成教的係可以令人跌市時蝕得唔多，又可以平穩上升

多謝老師！

龔成老師：

這在過往唔少股票都有發生過，因為中國的投資市場相對封閉，股價往往不受企業價值影響，只受買賣供求影響，而香港是一個開放市場，股價會較為接近價值。

你好難預計資金點樣走，股民點樣炒法，只可以話，香港的市場會較接近企業價值，之前中芯國際（0981），未在香港上市，香港就有大量投資價值，而當這股在大陸上左市，而大陸市場一向較投資的，因此投機類的資金唔再留在香港炒這股，而上翻大陸炒，香港的中芯就回歸合理價（不過仍是唔合理）。

我地最重要是分析企業，同時建立一個平衡組合。

------------------------------------------------

Q17539：

Hello 成哥354中國軟件國際 777網龍呢兩隻值得長線持有嗎 邊一隻會較好？

因為我見網龍好努力喺網上教育上面發展好似前景幾好

龔成老師：

兩隻都不差的，中國軟件國際（0354）穩定性會比網龍（0777）高D。

如果你想要潛力高D，同時能承受風險，就可以考慮網龍，佢本身行業變化較大，新業務會有潛力，但同時為企業帶來較大的不確定性，如果能控制注碼，這股都可考慮。

------------------------------------------------

Q17540：

你好，龔老師。我是一名剛畢業的大學生，月薪大約21000-22000左右。家用方面，每月大約3000-4000左右。
和父母商量後，他們打算讓我月供股票而不直接給現金。
父母年約40中和50中左右，我明白他們在這年紀並不適合太高風險投資，所以打算替他們月供一些平穩增值股作退休之用。

我打算替他們月供0066港鐵和0270粵海投資，請問這適合他們嗎？還是2800 盈富基金比較好一些？

另一方面， 近來都不斷有消息和新聞說那些同股不同權和第二上市的公司會納入恆生指數

這是否會為現時著重金融業的恆生指數帶來一點衝擊或刺激？有機會長遠會令恆生指數有所突破嗎？

此外，恆生科技創新指數，這會否對恆生指數的地位產生一定程度的影響？謝謝.

龔成老師：

以你家人的年齡，最好是平穩增長，以及少少收息股。

你可以以盈富（2800）作為核心，如果有資金就加上其他股如港鐵（0066）。如果資金不多，就集中供盈富。

至於加入不同的股票，這會對恆指長遠的增長力有提升，但同時會增加了恆指的波動性，如果你長期月供，影響唔大，不用擔心。

至於新的恆生科技創新指數，對恆指有少少影響，不過唔算好大，恆指始終有佢的價值。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。