【龔成問答信箱】（Q21941-21960）

Q21941：

Sir, 話個好消息給你知。我已榮升做老闆啦

下星期完成交吉就可以著手搞開舖（做美容院）, 自己獨自創業。 知道條路一定困難（好多嘢要獨自處理, 唔同以前打工仔心態）

自己剩餘人生時間唔多, 唔突破就會遭困死, 既然喺咁不如玩大佢, 無悔今生～。 3年前追開你fb, 睇你百萬富翁1， 令我反問翻自己興趣喺什麼, 點樣賺多啲錢。

當時公司搬去內地, 感覺好徬徨, 由文職專去做美容真係唔易, 首先要改變心態、思維, 因為是服務行業, 不再是整天坐著辦公室機械色工作。要想辦法怎樣令客人覺得你服務好,

怎樣推銷產品/療程（最重要喺點樣幫助佢地解決美容問題）, 是1種大考驗, 就算現時都係1邊做1邊令自己進步。

上緊你堂， 帶晒你著作, 非常感謝你幫忙簽名。你喺我幸運之神。 真的衷心多謝你

龔成老師︰

先恭喜，成為老闆。同埋都好多謝你一直支持。

因為除左上堂，都要處理好多相關事務，寫書、回答問、準備課程內容等，都真係比較忙。遲D完左進階班，我會好好休息下，多謝關心。

新生意，一切由零開始，好多事都要慢慢摸石過河。你要從日常經驗，慢慢去將盤生意調節，比心機。

記住，你係要諗點幫到客人(為客人創造價值)，生意長線自然就會好。

生意一定有上落，一定有困難，堅持是最重要的，加油！

------------------------------------------------

Q21942：

老師你好，之前上3萬點抵受不了股票的回報。把所有股票賣掉，也停了月供，現在有點後悔了，但財務上，因為疫情，都小了收入了，想問你意見

而家46歲，家庭月入得得3萬，現金得60萬，沒有股票，個人儲蓄保險已供完。層樓仲欠11年，月供12000元，估計開支後。有6千剩低，我現在應該做什麼好呢？

龔成老師：

我地是重要是「財富組合的配置」，不是現金的賺蝕數，持有貶值的現金只會令你財富不斷貶值，你之後要慢慢建立翻一個優質股的組合。

現時你物業，保持供款就得，除非你每月出現支出大過收入，否則，你保持現時的供款情況是最好的，到你57歲供款還清按揭，情況不差。

現時你有$60萬，建議你動用$20萬-$35萬，分注投資平穩增長股，由於不少潛力股都升左，加上你現時46歲，不能太進取，因此，可以集中在平穩增長股。

平穩增長股：考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想潛力提高，就加少少恆生科指ETF（3067）。

現時大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

至於你每月的$6000儲蓄，可以考慮月供$4000，以上優質股都得，如不月供就儲現金先，久不久入貨就得。

------------------------------------------------

Q21943：

龔老師您好，本人今年45歲，早前以BNOVISA去了英國，剛開始學投資。

手上$50萬現金。月入$17000，扣除開支@$14000和剛開始月供2800盈富@$3000。想用3至5年時間增值至150萬，可供女兒在外國讀大學。請老師指點一下，謝謝

龔成老師：

坦白講，要咁短時間達至$150萬，有點進取，除非有很大的機遇，否則未必做到。

以你的年齡及家庭等情況，我唔建議你太過進取，暫時只建議你投資平穩增長股類別：

考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

你可以保持月供。

同時，$50萬可以動用$20萬，投資上述的股，暫下資金，等你更為安頓，以及你有較多投資知識，先開始投資，到時可考慮「平穩增長股」+「潛力股」。

雖然這個計劃，未必能達到你的目標，但我地投資，一定要「先想風險，後想回報」。

所以，你要從增加收入的方向去想。

------------------------------------------------

Q21944：

老師，你點睇未來樓市呀？
同埋你會唔會移民？

龔成老師：

香港樓市，中短期會有少少上落（但不會大跌），長遠會向上。

首先要睇經濟基本面，如果經濟持續地差，失業率上升，樓市終會向下，這會對樓市有中期性的影響，不過，就算跌，都不會大跌，最多只是小跌，如果經濟差的情況不是太大，甚至不跌，這是由於背後的需求大。

在長遠計，我仍相信樓市在長遠計，因供求關係，仍是向上多。因為現時香港買樓的需求仍大，而長期供應不足，加上政府往後施政只會更加困難，好多所謂的大計劃都未必能夠實行，又或最後規模細左。

另一方面，需求大，我見唔少適婚年齡的朋友，都正等機會買樓，但未買樓，這些是「潛在需求」，過往每年不斷累積，只要樓市跌少少，就會有需求走出來，這令樓市不能大跌。

另外，樓市另一作用是「投資」，現時的租金無大跌情況，以投資回報率的角度分析，樓價都不會大跌，因此樓市平穩。

長遠計，租金及樓價會平穩，有少少向上，但不是倍升，不會好似過往般倍升，而是平穩向上。

我相信，我暫時都唔會移民，因為我太喜歡香港，同時不捨得離開。

------------------------------------------------

Q21945：

老師你好，謝謝您無私的付出，免費幫我哋答問題，有幾個問題想請教

1.睇完老師啲書,再上股票班會否容易啲吸收？

2.上初級股票班，應上哪個課程？

3.老師對買美股及債券有什麼看法,值得投資嗎？

龔成老師：

1）【投資倍升股課程】適合初學者的，因為整個課程的設計都是針對初中階投資者的，課堂頭3堂都是初階的內容，只要你課後好好溫習，能跟到之後的內容。

每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資時機、配置、評估平貴，在投資上已掌握了一定的知識。

另外，你上課之前，多睇理財、股票類的書，留意一下財經新聞，到時就較易跟到。

2）之後可以上【進階班】，但你唔需要太心急，一步步打好基礎先，上左上述的基礎班先，同睇書。

3）債券的投資價值一般，除非你好低風險或較年長。至於美股，都有投資價值的，你可以配合港股，同時持有都得，如果預熟識美股，可以投資ETF，如VOO、QQQ就得。

------------------------------------------------

Q21946：

亞sir,06893係咪唔會點升架啦，買左之後係咁跌


龔成老師︰

你唔好用價格走勢，去衡量一隻股票有無投資價值，不要再用這種短炒思維，長遠只會對你不利。

我地持有一隻股票與否，係應該睇佢本身質素、行業前境、財務數據等，去得出結論。

衍生集團(6893)主要從事開發、營銷、銷售及分銷個人護理產品、保健產品及家居產品，以及提供中醫保健及相關服務。

佢規模好細，1年的營業額連HKD2億都無，而且按年下跌中。

近年更出現虧損狀況，暫時睇唔倒佢有投資價值，建議你有反彈，就沽出會比較好。

------------------------------------------------

Q21947：

請問135昆倫能源，老師有咩睇法？

另外2379中天國際是否老千股黎，因為我曾經中過伏

龔成老師︰

昆侖能源（0135）雖然質素都算有，但不是最高質類別，佢對油價較為敏感。佢的產品自主力較弱。

石油是商品，當中沒有差異性，佢地要將石油賣出，只能跟國際油價，這令佢地處於被動狀態。沒有價格自主的能力，這令佢地的獨特性有限。

這類商品企業，都可投資，但就要明白不是最高質的企業。

由於質素中等，唔建議大注投資，但相信油價上翻佢會上升的。同時這股收息不差。

中天國際(2379)主要業務為物業開發、物業租賃及投資，及融資等等。

佢一定係老千股，但此股規模好細，盈利好波動，更多年出現虧損。

而且，核數師有多年要修定報告。這類企業，我都較有保留，不投資會較為穏當。

------------------------------------------------

Q21948：

老師我係你學生，正分析914海螺，預計下年每股盈利HKD$8.23元左右X預計下年5.2 市盈率=HKD$42.7元

914海螺，現價每股盈利HKD$8.06左右X5.3市盈率=HKD$42.7元

老師請問我有冇計錯呢？現價合裡嗎？
sir現價屬於合理區是嗎？

龔成老師︰

其實水泥行業，較受水泥價格和經濟週期所影響，佢近年每股盈利增長係唔錯。但長線能否能持這個水平(特別係大環境明顯轉差時)，是一個問號。

因此，我地係計算每股盈利時，要用較保守方法，用過去7年平均數，大約為HKD4.3。

之後，我地再用過去10年市盈率，中間的4個數字，去作為指標，區間為9-12倍。我地可以得出﹐其合理區大約係$38.7 - 51.6。

當然，這只是其中一個估值的角度，而投資者在進行估值時，會同時用多個估值方法去進行估值，得出更立體的結果。現價算合理區頂，但你預佢股價會較波動。

安徽海螺（0914）有質素，有增長力。

佢主要從事生產和銷售熟料和水泥製品，業務地區包括中國東部、南部、西部、中部及海外。而安徽海螺是水泥行業中，全球最大的單一品牌供應商。

水泥屬於基礎原材料行業，對建築行業有很高的依賴性，同時亦會與經濟增長速度有較高的相關性，特別與固定資產投資相關。即是說，當中國基建及房產市場不景，水泥行業會比一般行業處較大的不利狀態。

另外，水泥企業在生產過程中，燃料成本佔總生產成本中約佔了超過一半。若能源價格出現較大變動，就會對企業成本造成較大影響。因此，當能源價格出現較大上升時，將引致安徽海螺的成本增加，影響其中毛利。

綜合來講，佢擁有相當規模、生產能力，有一定的質素及賺錢能力，而水泥行業長期將因中國城鎮化以及一帶一路的建設，仍然會增長，但不會像過往般快速，而是進入較平穩的時期，在本質上此企業不差。

你要記住，我地係做估值時，唔係所有企業都係用同一個方法。你要因應企業本身特性、質素、發展潛力等，去作出調整，計出來的估值，才會較為貼近現實情況。

------------------------------------------------

Q21949：

你好成哥，我一直都留意左你好耐，亦都keep住有睇你d書。希望將來有時間黎上堂，繼續學習新知識。

知道你有買比亞迪，小米，完美醫療 & 金莎，

1.想問一下小米，完美醫療，金莎什麼價位才是合理價？

2.另外，想預有一部分錢買入收息股，有什麼股票值得推介？

3.之前$240價位不小心買入比亞迪及$293價位買入阿里巴巴，現在應該怎樣部處？

謝謝！

龔成老師︰

1) 小米(1810)和完美醫療(1830)現價偏貴，要回多1,2成才算較合理。而金沙(1928)現價合理，可以分注儲貨。

2) 目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

但你要明白一點，我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係分配投資項目時，會因應番你的人生階段。

如果你年青，可以「平穩增值股」+「潛力股」。中年人士，可以較集中翻係"平穏增長股"。當你已近退休之年，就應集中在「收息股」，去創造平穏現金流。你可以睇翻自已年紀，去作出配置。

小米(1810)和完美醫療(1830)算係潛力型，而金沙(1928)則是平穏增長股。

另外，現時大市只在合理區，資金唔好盡用。最好留有部份，等大跌市出現時，可以用來掃貨。

3) 這2隻係潛力股，都很有質素， 雖然你買入價較貴。但企業長線係會升值，你照持有就可以。

阿里巴巴(9988)現價已算合理區，你可以加1注，之後每回調10-15%才再加。

而比亞迪(1211)依然係貴，再加注要等到$135以下，才好考慮。或小注月供。

------------------------------------------------

Q21950：

你好，我今年23歲，去年畢業出來工作，存款大概20萬上下，3月的時候想過買入美股ETF，但因當時波動較大不敢入場而擱置。

我的目標是建立長期成長投資組合，再以資產追資產，大都打算長期持有。

美股考慮主要購入VOO/QQQ大指數ETF，以及輔以ESG、消費品ETF或內地/亞洲ETF，港股曾研究房地產領展及公用股（感覺較穩定，但見老師曾說增長較慢），

債券就未有研究，只是認購了ibond打算開賣即放。（曾經亦對ARKK心動，但已成過去）不知道我選ETF配置的方向正確嗎？

最近有保險經紀向我推銷月供基金，令我重新思考應以ETF還是基金進行資產投資，因為感覺兩者投資的內容相似，ETF自由度較大，經紀公司收費較高有固定年期，

但亦有一些loyalty bonus。

現時本人月薪只有萬四，扣掉MPF同家用節約洗費後可能得七千，這樣還應該月供ETF/基金嗎？老師會比較推薦美股還是基金呢？有可能兩邊同時進行嗎？

如果自己月供ETF（例如$4000/月），是否也是分注投入不同ETF？而且月供隨時可開始，因平均成本無分高位低位？因擔心每月認購金額太少，手續費都蝕埋。

最後例如美國指數雖有波輻，但長遠看過去一直持續上升，一次性較大手買入會否比用供基金更好？

先謝謝老師花時間閱讀和解惑！

另外工作行業多行合約制，現時合約到22年1月，未來數年又未知會否到外國進修/移民，目前仍是以回報多多益善為上策，但會摻入一些較穩定產品，

不知道老師有沒有推薦?

龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時23歲去計，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

不論ETF、保險基金、股票，其實都有投資價值。但你都要分析佢質素、對該市場認知程度、投資策略、長線增長潛力、費用成本等。去睇翻邊個，最適合你現時年紀和風險承受能力。

至於月供，其實都會因應市場平貴，去調整現金持有比例。但你係初學者，未識定平貴。我建議你理價格水平，一直長線去供。

因為你自行調整，諗住某個時間先供多D，某個時就唔供住，我就唔建議。因為，若調整時機不正確，會大大影響左你平均價格買入的效果，令你得不償失。

以下是一些適合你月供的股票，供你參考。你唔一定要用的建議的，只要你覺得有更合適的投資目標，而你又理解的，都可以用。

現在你每月先用5成儲蓄做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股︰VOO、盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰QQQ、比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）、三星FANG ETF（2814）。

由於你投資知識不高，因此可較集中在平穩增長類股，至於潛力股，只宜小小注(不多於3成)。最好是你先提高投資知識，等到你有一定知識和經驗，才慢慢增加潛力股比例(大約5成)。

現時大市只是合理區，你現有20萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

你現時每月資金不多，可以先集中係1,2個股票，最好係一些較大型市場的ETF，好似盈富(2800)、VOO, QQQ，會較有分散風險效果。

而且供得太散，變相會令每隻股票的月供成本增加，影響長線回報。

另外，若你打算短期移民或到外國進修，而投資係要全數贖回的話，你就要留意。因為投資係一個長線計劃，如果投資年期較短(不足3-5年)。

選股策略上，我地就要作出調整，不可太進取，以免中短期價格波動，影響你回報。

------------------------------------------------

Q21951：

龔成老師，我現時40歲, 有自住樓重欠銀行$300萬，有－個物業收租，租金收入約$14000, 家庭總收入約$13萬，有兩仔女, 幾年後出外讀書，可儲蓄約每月5萬

現有股票909, 1833, 2333, 3888, 9618, 1209, 853 (現價約150萬)，另有現金約150萬當不時之需

1) 請問以上股票可持有嗎？

2) 應否加大投資股票金額？

3) 現時樓價高企, 值得再買樓收租嗎？想快些增長以供仔女留學之用

謝謝

龔成老師︰

1) 上述股票，都係有質素，可長線持有。但當中股票，主要係一些波動性較高的股票。佢地增長潛力大，但風險都同樣高。

特別係明源雲（0909）、金山軟件（3888）、微創醫療（0853）不確定性就更高。

以你40歲年紀，這些潛力股可佔約4-5成，餘下應用以下平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

2) 現時大市只在合理區，現金最好佔組合3-5成，你最多可以動用多1,2成資金，以分注方法，買入上述平穏增長股。

餘下部份，就用來等大跌市機會。

3) 從投資角度，現時租金回報率不高，用優質股做增值，值博率會較高。

另外，我地財富組合除左要有增長力和質素外，平衡性都好重要。你已有2個物業，現時資產明顯係偏重於物業類。長線你應加入一些優質股，以免過於集中個別資產類別，而產生風險。

因此，你新資金建議優先投入股市，去令成個組合更平衡。

最後，投資增值係要時間，如果你子女會在短期就出外升學(不足3年)。該部份資金，投資時就要相對保守，以免價格波動風險，影響他們升學預算。

------------------------------------------------

Q21952：

你好，本人現年25歲，自由工作者，每月收入約3-5萬，但有一筆本連息約50萬的負債，且不能提早還款，月供約1.5萬，

請問我現時理財方針應以儲蓄（保本）還是投資（增加收入）為主？

如建議儲蓄，想請教下你對零存整存嘅睇法

龔成老師︰

正常情況，當你有一筆負債，而佢的息率都不低的話，我會建議先還款，以免拖累長線回報。

但由於你不能提早還款，這部份就不作特別考量。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

這個是根據你年紀，去作出配置。與你有否這筆負債無關，只要你每月扣起相應還款金額，之後再作投資就可以。

以你現時25歲去計，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

策略上，你可以投資「平穏增長股」和「潛力股」。你每月5成儲蓄做月供。其餘先儲起，用一邊月供一邊儲蓄的策略。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

餘下的另一半現金，我地就等機會，當大市出現較大回調，就加大力度掃貨，然後作長線投資。

至於零存整存這類產品，風險無高，但增值能力同樣好弱。對你年紀，我唔建議你用佢，作為財富增值工具。

------------------------------------------------

Q21953：

龔成老師您好，請問如果有五萬人民幣現金在手，應該投資內地股票 / 做定存 / 還是兌港幣投資月供好？

龔成老師︰

從財富增值角度，你應將資金集中係優質資產，好似優質股、物業等，去做財富增值。

定期存款增長力不高，除非你這筆資金短期內要動用，或者你風險承受能力十分弱，否則不應作定存。

至於內地和香港股票，都係可以投資。

若你現時無投資知識和經驗，對企業估值，點去定平貴未必會太了解。建議你先利用月供模式，去做增值，可以減低買貴貨風險，對你而言會較理想。

------------------------------------------------

Q21954：

龔Sir，你好，很羨慕有好多人都可以很早便財務自由，心想如果在我年輕的時候有人告訴我就好了。白手興家，辛勤半生（一陣短命啲可能已經大半生）

但無奈沒有把握時機。可以請你看看我的情況，如何能夠在退休前的日子扳回一城，等佢優之後無憂無慮嗎？

重點分析：

-距離退休還有15年
-家庭收入約$120,000一個月
-每月供樓$30,000，尚餘17年
-要養四大長老及小朋友，開支大
-自己節衣縮食每月可儲約$40,000
-有百萬左右股票（港交所20%，匯豐、中國平安、友邦、工行、港鐵、領展、新鴻基地產、小米、騰訊、阿里巴巴、特步、
金風科技（我覺得呢隻賴嘢）、吉利、雅生活服務等各佔5-8%)
-現金約70萬
-MPF 預計退休時好彩的話有6-7M (市有上落，很難說）

目標：
-退休可負擔每月約$30,000支出，不用靠孩子
-有$2m可支付孩子將來首期

到底每月可以儲嘅錢應該點樣分配好呢？萬分感謝！

龔成老師︰

如果你希望15年後每月有3萬蚊現金流，以股息率6%計，你需要本金600萬。

你現時持有股票，都係有質素。但當中潛力股(1810, 0700, 9988, 0175)，我唔建議再加注。

因為以你的年齡計，其實要開始為退休做準備，財富仍有增長力（但不可以太進取，故潛力股不宜持有太多）。因此，你可以投資「平穩增值股」+「收息股」。

你可以做月供股票，供「平穩增值股」+「收息股」，每月5成儲蓄做月供。其餘先儲起，用一邊月供一邊儲蓄的策略。

但就隨著年齡增加，慢慢增加收息股的比例。到退休時，你收息股比例，應提升至100%。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、平安(2318)。

同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

若你想增長力大D，可以較集中係平穏增長股。

大市現處於合理水平，那70萬資金和每月儲蓄，就等大跌市機會出現，才大力度掃貨，並長線投資。

若你能維持月供$40000 + 現有資產170萬(現金70萬、持股100萬)，我假設投資回報有7-8%（連股息再投資），15年後大約會增值至1500萬，故這樣安排相信很大機會達至你的財務目標。

到你退休前，慢慢將收息股比例，應提升至100%。透過這些收息股，去創造現金流，供你退休生活，咁就可以。

另外，金風科技（2208）主要從事製造並銷售風力發電機組及風電零部件，佢有提供風電相關諮詢，風電場建設、維護服務；建立及經營風力發電場；以及提供污水處理業務及融資租賃服務。

整體算不差，但股價有點波動。睇佢近年股東回報率都有下跌，代表佢賺錢能力弱左。加上此股負債不輕，都係一個風險因素。

此股可投資，但不宜持有太多。若佔你組合不多，持有係可以。

------------------------------------------------

Q21955：

老師，我想請教：投資(月供) Vs 儲錢

成哥你好我睇左你既post 同書都有2年幾。我有D關於儲錢同投資既概念分得唔係好清楚，想請教下你。

我今年30歲，月入22K 一個月可以儲到13K，目標係3-4年內儲夠首期。依家月供緊盈富同中芯各2000蚊。黎緊諗住搵多隻潛力股供。2000蚊。

依照我依家既月供方式去投資，我每個月供6000蚊。淨低既錢就有7000蚊。3年內儲到252,000。但如果我唔月供的話我3年可以儲到468,000。

月供會減慢左我儲首期計劃，咁我點解仲要繼續月供呢?

BTW我報左你股票班，期待見到你真人學多D智識。多謝

龔成老師︰

你有個基本概念錯左，你依然停留係現金模式。

我地進行財富增值，其實就係將一直貶值架"現金"，轉換成"優質資產"的一個過程，佢可以係股票、物業、一盤生意等等。

若果你一直以儲現金，去作為累積財富的方法。你只會見到，自己個購買力越來越弱。相最基本跑嬴通漲，你都做唔到。

相反，你持有一些優質資產，好似優質股、物業，佢地長線跑嬴通漲之餘，都可以令你財富有所升值。

所以，你要改變現時想法，由儲現金變成儲優質資產。

你現時月供計劃係可以，每月餘下$7000就先儲起，等大跌市機會。

新增一隻月供股票，你可以選擇其他優質股。

由於投資係一個長線計劃，你可以等上完堂，有個完整概念再調整，相信會更好。課堂見!（你可以等上完堂先更具體配置）。

------------------------------------------------

Q21956：

您好龔sir, 本人40多歲，為單親媽媽，原本有份穩定職業，平均月入近4萬，可惜近幾年事業出現極大錯敗，失業，近日只能找到一份文職工作，月入萬多。

由於本人一直不敢冒險，即使早年已有在正職下搞生意的想法，可惜網上生意又搞不好，已停頓了，跟本沒有賺過錢。

龔sir你曾經講過要建立被動收入，其一就是在有正職下亦要發展小生意，據我經驗，有正職要分身發展生意似乎有點困難，請問可以指教一下嗎？

另外投資方面，我是新手，有穩建又有點增長的建議嗎？以我這年紀，才開始做小生意不敢承受大風險，還可以嗎？現金30萬，可以如何投資？謝謝指教！

龔成老師︰

當你本身有正職，再同時間去發展一盤生意，會係有些困難。

但由於去創業，本身有一定風險，除非你好有信心，加上本身有一定本錢係手，就算有一段較長時間，收入較少都不成問題。

見你之前網上生意，都不太順利，或許你對這門生意上未能完全掌握。

我建議你先用"正職"+ "兼職小生意"的模式，會係較穏當。到你有一定生意經驗，或者本身個生意開始上軌道，才全力投入，會較好。

至於想創業，其實任何年紀都適合，只要你做好風險控制，就咁可以。

投資方面，以你4X歲，可以選擇一些「平穩增值股」+「潛力股」作投資目標。

由於你投資知識不高，因此可較集中在平穩增長類股，至於潛力股，只宜小小注。此期間，你最好是努力提高投資知識，才慢慢增加翻潛力股比例。

大市現處於合理水平，那30萬資金(扣除你小生意要用的資金)，你可以先用一半，以"分注"形式慢慢入貨。餘下一半就等大跌市機會出現，才大力度掃貨，並長線投資。

------------------------------------------------

Q21957：

龔成老師，想請教一下理財方向，希望日後得賜教回覆

本人39歲月入73k左右 (連bonus 年收入約1.1m左右），早年因理財不善所以未有太多錢儲蓄（現幫家人供樓），只約400k現金，完全沒有買股票經驗（早年因為無錢），

相信保險買了一些年金及投資基金，有賺但回報時間冗長。扣除以上月可儲15-20k左右。

想請教︰

1. 想開始月供股票，因為我無時間day trade，什麼是好選擇？

2. 目標希望可以3-5年有能力買樓，請問是否應採取進取或中低風險增長策略？目標市區兩房，不一定是新樓，因有現樓住，只是長遠退休收租回報之用。

3. 常聽買債的回報高，請問現在是否安全？迷你債券事件會再發生嗎？

希望老師可以在日後專欄回覆，萬分感激

龔成老師︰

首先，你要清晰一些投資概念先。我地投資股票，其實等同投資一間企業。希望透過其自然增長，以達至財富增值的目的。

所以，我地投資一定係長線，而唔係短期炒賣，去賺差價。所以，你唔係唔洗不停睇住個市，因為唔係做DAY TRADE，而係長線持有優質股。

另外，"保險"主要係用來防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

1) 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你39歲，應以增值為主，建議你用「平穏增長股」 + 「潛力股」作組合，去創造一個增值平台。

現在你每月先用5成儲蓄做月供。其餘先儲起，用一邊月供一邊儲蓄的策略。

由於你投資知識不高，因此可較集中在平穩增長類股，至於潛力股，只宜小小注(不多於3成)。最好是你先提高投資知識，等到你有一定知識和經驗，才慢慢增加潛力股比例(大約5成)。

現時大市只是合理區，你現有40萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

2) 用以上月供方法，假設投資回報有10%（連股息再投資），你每月投資$15000 + 40萬現金，5年後大約會增值至160萬，相信對你置業都有一定幫助。

但緊記，我地投資理財，除了講增值，都要顧及組合的平衡性。係你買屋同時，必需留有一定優質股作增值，否則會過份偏重物業類，而造成風險。

3) 從財富增值角度，債券增長力不高。較適合一些退休人士，用作創造現金流。但用來累積財富，就未必咁適合。

債券，這其實只是「產品」，物業、優質股是「資產」，所以從財富本質上，我地應較集中持有「資產」，才對我地最有利(你可以睇睇《財務自由行》一書，我從財富本質上，講述了當中原理)。同時，現時息口低，但未來有機會重回加息週期，債券未必是最好的投資工具。

另外，你會不時聽到一些債券基金，係坊間分好多種，你要小心睇，因為有d風險低，無乜問題，有d則有潛在的風險，絕對不是保本的產品，有機會出現了「賺息蝕價」的情況。

第一，有些債券基金，會投資「高收益債券」，即是「垃圾債券」，你一定要睇睇佢所佔的比率。

第二，債券基金往往不是單純地持有債券，而是可以作買賣，以及利用衍生工具作對沖等策略，即是可能有價格上的波動。

第三，不少銀行都會提供借貸，以槓杆去放大回報，以平息借貸去賺取息差。低息環境時間題不大，但進入加息週期，不止借貸成本增加，同時債券價格往往在加息期下跌，雙從打擊下，投資價值成疑。當然，若然加息步伐不快，息差利潤就可觀。

我不是說債券基金有問題，只是說明當中的風險，因為市面上的基券基金好多，你要仔細分析。

------------------------------------------------

Q21958：

龔sir你好，本人有200萬，有100萬巳買了股票有700 1810 2013 1347全是高位入，現還未能去到買入價 ,做了蟹貨，現在還有100萬現金未買，我應點去買呢，

本人已40歲，沒有返工的，有一個小朋友要供養，我怎樣可以將餘下的100萬變出倍計的收益呢？我不想蝕咗可能是我的最後 100萬，我應怎樣做？

請指教，我想買你嘅書睇，應買邊本呢？

感激你的回覆。

龔成老師︰

若你想持股有倍計收入，簡單來說就係買入一些優質股票，並長線持有，讓其慢慢自然增直，以達至財富倍增的目的。

但這個倍增計劃，係要長線。講緊係以年計，故你唔好預短時間內，對你財務上會有任何幫助。

另外，投資再有質素的增長股，都會有風險，有機會出現虧蝕。若你係無法承受這個風險，你只宜投資一些收息股，甚至只作定期。你要自己從風險與回報中，取個平衡。

雖然你係買左貴貨，但這些股票都有質素，長線都會升值，所以你照持有會係最好。

但較大問題是，你而家組合太偏重左係潛力股(全部都是)，佢地雖然有增長潛力，同時風險都較高，不宜持有過多。

以你40歲年紀，潛力股可佔約4-5成，餘下應用以下平穏增長股。加上你投資經驗較淺，潛力股比重，要再調至2-3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

除了新資金，必需優先投入平穏增長股。你現有持股，都可以考慮沽出部份，同樣換碼至平穏增長股，去平衡風險。

平穏增長股：盈富(2800)、金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建(1038)

由於你現時無工作，同時間要供養一個小朋友，所以你必需為自己預留一筆半年開支，以備不時之需。

若你預期家庭無收入狀況，會維持一個較長時間(例如1-2年以上)。你可以考慮將部份資金，買入一些收息股。佢增長力會較弱，但勝在有穏定現金流，可以支援你生活開支。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)

現時大市只係合理水平，現金佔比重大約3-5成。你可以多用少少資金，分注入貨。餘下資金，就等大跌市出現，才加大力度掃貨。

書本上，你可以先睇我架《80後百萬富翁》、《財務自由行》和《股票勝經》，都適合初學者。

------------------------------------------------

Q21959：

龔成老師你好，有投資問題想向你請教，我今年30歲，希望可以盡快存到首期買樓，月入2萬幾，每月可儲1萬。

2017年開始買股票，一直都贏粒糖 輸間廠。內銀2017年買入，現在價位相差太遠 沒有出售

中行 4.28買入，5000股
工行（買入價位已忘記），1000股
建行 （買入價位已忘記），2000股

一兩年前買入
匯豐56.5買入 (400股）
鐵塔 1.7買入 （6000股）

近期
阿里巴巴 （有溝貨，均價買入267，400股）
京東 （有溝貨，均價買入334，100股）
京東健康 （有溝貨，均價買入146，100股）
小米 33買入 600股

現有流動資金大約20萬，應如何再投資？

龔成老師︰

從質素上，你持股係無問題，都可以長線持有。但從配置角度，問題較多。

首先，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

但要留意，銀行業營運模式較特別，風險會比一般行業為高。必需堅守30%這個準則，如果可控制在20%以內，會更好。

你現時銀行股和阿里巴巴(9988)明顯係超標，但阿里巴巴有質素，你可以照持有，但暫時不要加注。

而銀行股，除了比重過高外，佢地本身只係收息股，增長力不高。用作財富增值，但不適合。建議你沽出部份，換至其他有增長力股票。

另外，我見你大部份股票，都係高位入市。我估你都幾受市場氣氛影響。這個也是你贏粒糖，輸間廠的原因。

記住，當個市場好狂熱，個個爭相去買股票架時候，好多時個價都係被炒起左。就算你買入股票有質素，長線回報都會受影響。

另外，我地繼續持有一隻股票與否，不是建基於賺蝕數，而是企業的質素與長遠發展。

你過往投資成績不佳的原因，就是你建基於「賺蝕」去決定是否持有，同時，當你見到股價下跌，想拉低平均買入價，就會「溝貨」，同樣是集中在「過往買入價」，你應該改變這思維，以「怎樣令財富組合將來有最好的增長」為目標。

未來你再投資，應先集中用月供模式，去平衡買貴貨風險。到有一定經驗，才去一直買貨。

以你30歲，可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

平穏增長股：盈富(2800)、金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建（1038）

潛力股：安碩恒生科技（3067）、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814），但就要明白波動性比上述會高左，同時風險大左，你要自己平衡。

由於你投資知識不高，因此可較集中在平穩增長類股，至於潛力股，只宜小小注。此期間，你最好是努力提高投資知識，才慢慢增加翻潛力股比例。

餘下現金就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q21960：

龔成老師，新股Boss直聘值得入貨嗎？謝謝！

京東物流這隻股會否升值？

龔Sir, 對於京東物流2618是否值得長期持有呢？Thx

龔成老師︰

Kanzhun Ltd ADR (BZ)主要提供線上招聘服務，為求職者和企業提供直接溝通的線上平台。

從業務上睇，佢係有投資價值。但由佢依然係燒銀紙階段，幾時先會有穏定盈利，無人知。

不確定性很高，要做個較穏當的估價，係好困難。只能說現價唔平，而且此股有一定風險，就算投資都只宜小注。

京東物流（2618）都有質素的。

京東物流係中國領先的技術驅動的供應鏈解決方案及物流服務商。通過科技賦能提供全方位的覆蓋各個業務領域的供應鏈解決方案和優質物流服務，從倉儲到配送，從製造端到終端客戶，涵蓋普通和特殊物品。

根據一些調查報告，按總收入計，這企業係中國最大的一體化供應鏈物流服務商。

2018、2019 及 2020 年，京東物流營收分別為人民幣 379 億元、人民幣 498 億元和人民幣 734 億元。

京東物流於 2018、2019 及 2020 年產生的虧損淨額分別為人民幣 28 億元，人民幣 22 億元及人民幣 40 億元，不過，如果扣除一些非現金流的開支，又未算太差。

佢表示，上市集資所得，部分將用於升級和擴展該企業的物流網絡；部分將用於開發與供應鏈解決方案和物流服務相關的先進技術。

企業有優勢的，長遠發展正面，但中短期股價未必有好強的表現，這股都有投資價值，但現階段未必值得大額投資。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q19101-Q19120）

Q19101：

成哥 :我是你的舊生 , 想向老師請教
1475 日清嘗試去計算合理價值 , 但由於上市時間不太長 , 估價有一定難度.
得出以下結果

合理區為 6.5 - 7.8
P.E. 25 – 30 倍

從年報中歸納出以下數點

1. 香港分部業績沒有多大改善 , 甚至乎是倒退 , 但中國分部業績每年有可觀升幅 , 同時也在中國積極建立分部及廠房

2. 在香港本地的即食麵品牌 , 出前一丁 , 公仔麵 , 福字麵及其冰點產品 , 全部也是日清旗下產品 , 品牌已深入民心 , 有知名度 , 亦有不停推出新口味及新產品 ( 最新為水耕沙律菜 , 與日本野菜谷公司合作 , 在香港生產水耕沙律菜 )去吸引顧客 , 以乎想香港作為試點 , 作為進入中國市場作準備

3. R.O.E. 方面與 322 康師傅及 220 統一 , 一併計算過 , 雖然現在營利能力日清不及前2者 , 但從2014年 ROE 3.45 % 增長至 2019年 ROE 6.98 % ,但營利能力增強應該已經是事實.

4. 派息比率方面 , 日清為 50 % 而康師傅及統一則 100 %

想問我的估值是否過高 ?
P.E. 是否合理

龔成老師：

其實分析大致都可以，都講出了這股的重點，以及一些重要的財務數據。當然，正式買入前仍要做更全面的分析。

日清食品（1475）不差的，都算有質素。

佢本身有品牌，加上業務穩定，盈利都不差。但比較大的問題，是增長有，但發展潛力未算好強，但市場已假設佢有高增長，所以在股價上，只視為平穩增值類別。內地市場的確係一個增長動力。

至於估值方面，上市年期短令估值難，這是正常的，如果你面對這類情況，建議你「保守」一點。

你見統一（0220）及康師傅控股（0322）都沒有太高的市盈率，如果你給予一個過高的市盈率，就要有足份的理由，除非這企業在行業裡好突出。

因此，建議你調低翻估值可能10%-15%，會較為合理。

------------------------------------------------

Q19102：

龔老師，我已上完6月份之股票班，獲益良多。我還有8年退休，我目標要8年內要有100萬，現時每月可以儲到1萬元。我現在投資組合如下：

（1）005 匯豐（1手85元）
（2）2628 中國人壽（2手 25元及26元）
（3）2388中國平安（1手 92.5元）
（4）2318中銀香港（1手 39.7元）
上述4隻股都是從前跟電台分析員建議買入，一直沒有賣出，直到現在蝕。
（5）66港鐵（3手 平均價42元）
（6）2800 盈富基金（5手 平均價25元）
（7）823 領展（3手 平均價62元）
（8）1928 金沙（2手 平均價 28元）
（9） 0002 中電（1手 71.9元）

由於上述的股票增長力慢，很難達到自己的目標。

我想買潛力股例如3067（ETF 安碩恒生科技），每月一手手買些儲貨，不知每月應入幾多？又不知現價16.58買入是正確，或合理價買1177 （中生製藥）、1448（福壽園）、1810（小米。希望你給予意見？

我接近退休年齡，想一手手買收息股，現時合理價的收息股，有哪些可以買入？

萬分感激，期待你的回覆！

龔成老師：

要完成目標，只要每月善用$1萬，絕對無問題的。

你的方向，可以投資一半為平穩增長股，一半為收息股，會最適合你的年齡與情況。如果你想進取少少，建議你投資少於2成的資金在潛力股，這樣對你較平衡。

上述的股票，基本上都有質素的，就算部分處虧損狀態，都可以守，只是當時買入價較貴，就算要賣出，都最好等1年後經濟好轉翻，股價上翻D先，不過，可以守。

你可以中生（1177）先小注，跌再分注入。褔壽園（1448）及小米（1810）就等回少少先入。至於安碩恒生科技（3067），則可以月供，只要注碼不太多就得。

你可以每月月$5000去投資股票，餘下$5000留現金到適當時機先入貨。

------------------------------------------------

Q19103：

老師你好，我27歲，女，已婚，未有小朋友，供緊樓，自己月入約5萬，除去必要開支，大概每月可儲3萬

現金約150萬，部份做緊定期，已為退休買了幾份基金，但我的目標是財務自由，投資知識零，現在買了你的書慢慢學緊，請老師賜教

我應該如何配置我的現金，讓我早日達成目標。

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

由於你已有物業，在財富平衡的角度，會建議你之後集中投資股票，長遠建立這方面的財富，當然，同時要留有一定的現金。

你27歲這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。做月供股票，每月$30000。

你可以考慮盈富（2800）$10000。

另外再加幾隻（每隻$5000）：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：安碩恆生科技ETF（3067）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

如果你不懂股，就集中供盈富$30000。

現時大市處合理區，可以一邊投資一邊留現金，而餘下現金$150萬運用，暫時唔建議你動用，你最好增加投資知識，以及有一定的經驗先用。

如果大跌市時，都可出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q19104：

龔sir, 我家人有大約15萬紐元及30萬人民幣現金，做定期息率太低，轉回港幣又蝕匯率，可否請教有何投資能做？

因為之前一直參考股票的投資都是港股用港元投資
我是之前九月股票班的學生。謝謝

龔成老師：

可以留意投資該貨幣的收息產品，可以向銀行問下，不過，這方面我都無研究，所以你投資時，最重要是問清楚「風險」。

如果不認識，就不要投資，暫時就持有這些貨幣先。

其實最好的方法，都是轉港紙投資港股，就算買收息股，回報都不差。

不過，我相信你家人不想蝕匯率，所以暫時只有等下先。

可以等匯價上翻D，賣出部分，餘下再守。

------------------------------------------------

Q19105：

龔Sir,本人已關注你FB一年多，很欣賞你凡事正面既態度，有一事望你賜教。

現時市已好少少，但內心可能會焦急，
我係打算長線投資的，

我地投資如何克服內心既擔憂和恐懼，
堅定內心既信念？感謝

龔成老師：

最重要是分清楚「股價」與「企業價值」，一般人只會集中在股價，股價上上落落，令自己有恐懼，但如果著重企業的長遠價值，情況就會不同，你的分析點，睇到的視點，都會不同。

所以，你要大量分析「企業本質」，自然就不怕大市的波動。

同時，你要訓練自己的心理質素，要平常心面對股價，以一價「獨立第三般」去分析股票，投資，好需要「理性」。

你試下訓練自己唔好睇大市，一星期唔好睇股價。

------------------------------------------------

Q19106：

老師，請教一下幾多%的股息率才為之平的股價? 睇股價平貴需要以邊幾方面為準則? 感謝

龔成老師：

在收息股層面，我地可以用股息率，作為其中一個衡量平貴的指標，以現時的市場情況，你預5%、6%是大致合理的股息率，當然，每個行業與企業都是不同的。

要留意，股息率只是其中一個分析平貴的方法，仲要配合好多其他方法去一同運用。

正式計平貴，其實要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

如果要深入計算，基本上要好仔細的研究企業，要分析好多財務數據用比率，先至有較完整的答案。

------------------------------------------------

Q19107：

老師，我目前持有 1119 2 萬股 4.79
1183 70k 股在 1.72
9988 947 股 在 257

我該怎麼辦？

龔成老師：

首先你要明白一個概念，我地持有一隻股票與否，關鍵位是企業質素、前景，不要被買入價影響。買為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

睇翻上述的股票，不是無質素的，不同太擔心。

創夢天地（1119）質素不差的，但業務較波動，這類股唔建議太大注。

佢主要透過合約安排於中國從事經營手機遊戲平台，種類包括角色扮演類遊戲、消除益智遊戲等。

睇翻佢旗下大部分遊戲均可供免費下載，並透過銷售遊戲虛擬物品而獲得收益，亦會在遊戲及遊戲內用戶社區中投放各類廣告以產生信息服務收益。這是不少行業都用的模式。

佢主要股東騰訊控股（0700）就雲基礎設施、內容購買及開發、數字娛樂及遊戲方面進行合作，這是佢的優勢。

財務數據方面，生意有增長，但盈利較波動，反映業務存有一定的不確定性，因此本身有風險。

澳能建設（1183）以過往的業務來睇，只是中等，業務發展不算強，整體不差但又未算好好。

佢最近宣布，同德國創新科技企業Ｕｂｉｔｒｉｃｉｔｙ達成戰略合作，於大灣區拓展大灣區開發、製造及分銷電動汽車充電業務。

睇翻澳能果邊，主席表示，目標係兩年內在港澳大灣區安裝500至1000個充電裝置。

企業發展力都有，但近期股價其實有點超前反映。這刻投資值博率未算高，你小注持有好了。

阿里（9988）面對內地監管可能收緊，因此風險度增加左，最大的影響在於螞蟻的貸款業務，這亦是中國叫停上市的其中一個原因。

因為這部分是一些網上的小型貸款業務，增長快，但監管並不如銀行般緊，因此，中央會有更多的監管針對這部分，影響了賺錢能力。

整體上，阿里，長遠仍是有發展，賺錢能力雖然有少少減，但長遠會同政府同議一些監管方法，以及找到合理的賺錢模式，你預阿里$250以下是合理區的頂位，這股可長線。不過，中短期會波動。

如果有貨，可持有，但就唔需要太急加注。

------------------------------------------------

Q19108：

老師，我依家都開始研究長線投資
我個人暫時睇好 285 1810 9988 1211 2331

想请教下投資組合應該有幾多個股票？

老師 想問下823 領展依家係合理價嗎？

龔成老師：

上述的5隻股，都是有質素，可以長線持有的，不過，現價都唔平，你如果要入市，最好等回少少，同時要控制好注碼。

其實我地投資，最重要是建立一個長期的財富組合，當中要有質素，要有不同的類別，唔能夠太過集中。

一個成熟的組合，大約有10隻股，每每股佔組最好少過15%。

領展（0823）有質素，現價仍合理，分注投資可以。

------------------------------------------------

Q19109：

龔成老師，我想問一些關於供保險的問題, 如老師有空, 希望得到你的回覆

我28歲, 正在為媽媽供一份危疾, 保額50萬, 月供約2000, 己供5年

但媽年齡58, 沒收入, 其實本不需買,

而我收入42000, 自己亦供左2年一份AIA 多裕智倍保, 月供1500,

但我和媽都未有其他保險, 包括醫療, 所以我認為保險支出比例太多, 想斷供媽媽那一份危疾保險, 甚至想轉自己一份危疾做定期危疾, 把錢用來做投資

但這樣會蝕約15萬

但我又不想把錢放20多年在保險公司
不知老師有沒有意見?

龔成老師：

保險的最大作用，是將「你不想承受的風險」，轉到保險公司。

我地理財，應該攻守兼備，保險是守的部分，不用多，但基本都要，做好守，就要盡力進攻。

有些風險，當發生時，例如危疾，就會對你造成很大的財務影響，如醫療支出，這就值得去買。

你要分析一下，你地有那些風險，覺得發生會好大影響，這部分就買保險，將風險轉比保險公司。至於儲蓄類別的，則作用不大，不如將錢投資更好。

------------------------------------------------

Q19110：

老師，3033 與 3067 的分別是什麼？

龔成老師：

其實都是追蹤相同指數，恆生科技指數，只是唔同基金公司搞。

由於佢地都上市不足一年，分析的數據較少。

3033成交多，價格較近真實價值，如果中短線投資會較適合。

3067則管理費低D，如果長線投資較適合。

------------------------------------------------

Q19111：

龔Sir，多謝你上一次嘅回覆，我想問如果如你所講咁我月供多一隻潛力股，潛力股有無推介？

月供可否調整如下：
盈富$4000
地鐵$1500
領展$1500
港燈$1000
香港電訊$1000
+潛力股$1000

定應該從之前嘅選股中改供一隻潛力股？

謝謝你

龔成老師：

上述所選的股票，都有質素的，可以長期進行。

如果要加一隻，可考慮安碩恒生科技（3067），長期月供。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂，因此，這刻不能大注投資。最好的策略，就是月供，或自行分注小注慢慢收貨，原理如同不斷儲貨，這樣就能平均買入價，減少風險。然後就長線持有。

------------------------------------------------

Q19112：

龔sir, 被你影響，我都想開始月供股票，但有一些疑問，希望你解答，謝謝你：

1. 請問月供股票係咪一定要選有股息的？如果是，係咪最好選高息股？

2. 要唔要選擇幾時開始？因現在好多股票都好高位。

3. 是否每間銀行都要每月收取費用？我睇左幾間都要收。謝謝你

龔成老師：

1）選「優質股」就得。

而優質股都分好類別，你選適合自己就得，例如騰訊（0700）是優質股，領展（0823）都是優質股，但收息差好遠。

2）只要投入金額唔太大，現時都可開始。

3）好多都要，你可問下匯豐、南洋商業銀行，部分證券行都有得供。

------------------------------------------------

Q19113：

你好，我每個月扣除屋租 其他雜費 還剩3000左右 可以怎樣理財嗎？

龔成老師：

都可以，你首先儲一些現金，例如要有基本的備用現金。

當現金足夠後，就可以透過月供股票去累積財富，積少成多。

將每月的部分資金，去做月供股票，供盈富（2800）。月供$2000-$3000，對初階投資者來說，月供股票是一個很好的累積財富方法，因為可避免你一次過在高位買入的風險。

原理如同儲錢，不過就不是儲現金，而是儲股票。計劃要長期進行。

另外，盈富是一個組合，適合絕大部分人投資，風險不高，長期儲貨可助你財富平穩增值，記住要長線持有。

------------------------------------------------

Q19114：

你好龔sir,我有2名小朋友，先生一人工作，平均月儲3-4萬，但年尾一交稅又無了一半

想財務自由準備買樓，低風險地長線投資，有咩可以建議！

龔成老師：

最重要是建立平衡組合，優質股、物業可同時持有。

你可以首先利用股票去為財富增值，到一定數量後，就可以再投資物業。

你可以考慮月供或分注投資：

盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：安碩恆生科技ETF（3067），但就要明白波動性比上述會高左，同時風險大左，你要自己平衡。部分要等回少少先入。這基金唔建議太大注，因為你想「低風險」

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q19115：

本人就是香港某航空公司之員工, 為了保住工作, 被迫簽了不平等新合約. 人工倒退 10 年, 其實对未來是非常擔憂.

龔成老師：

首先，你要留一定的現金，有現金在人可以較安心，投資股票則未必需要好進取。

另外，你都要想想長遠的發展，你可以多角度分析，怎樣可以令自己長遠的收入與事業發展更好，唔好比過往的限制左自己，要多想不同的可能性。

如果有空閒時間，可以做一些小生意，做副業等，長遠唔好太依靠單一打工收入。

------------------------------------------------

Q19116：

Hi 龔成老師, 本人拜讀過閣下幾本著作, 理性是知道不要看短期股價, 亦明白現在(本人和太太也是36歲)應該先增值後現金流.

但是波動的股價還是為我帶來很大的心理壓力, 所以我覺得我自己只合適投資比較穩定的股票.

這樣的話, 我們2人15年內達成財務自由這個目標還有可能嗎? 如果可以, 我應該如何部處呢?

我和太太共有約1.5M 現金, 現價約hkd 120K的收息股, 二人年薪合共約950K 左右 (我們工作都尚算穩定, 但已經到達ceiling了, 再向上的機會不大). 住的樓已經在前兩年已經供完, 而且我們都很自律, 每月定必儲起50%的收入.

身邊有很多朋友已經買了第二層樓, 所以我們近日也去睇樓, agent 計了說我們有能力購入另一層 8M 左右的樓.

但這對我們來說無疑是極大的投資, 雖然有樓收租感覺上好像是有人幫我們供樓一樣, 但還是很多麻煩的事情, 身邊也有朋友遇過惡租客

所以我們也下不了決心應該怎樣投資才好. 我們也看了你的書, 明白一定要投資增值財富, 不然現金只會一直貶值.

我們都有個夢想就是退休後環遊世界(backpacker level), 所以很希望15年後就可以財務自由. 但又不敢輕舉妄動, 很是煩惱. 還望老師指點一下, 謝謝

龔成老師：

你要建立一價適合你，長遠的財富組合，由於你較低風險，你可以集中在優質、平穩增值股。

如果你有睇《財務自由行》都會見到「股樓平衡」是不差的方法，書亦有講述具體的運用。

首先，我會建議你這刻集中投資股票，你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

保持月供或分注投資，但不要將全部現金投資，可以一半持有現金，一半投資股票。

同時，你可以慢慢留意下物業市場，我見你有些擔心，因此，可以等你累積多少少資金先進行這一步，例如在3年內進行這一步，買樓收租。

當你完成買樓收租後，就等租客幫你供樓，你自己的資金，就再集中投資平穩增長股。

我相信你地要15年財務自由，無問題的。

------------------------------------------------

Q19117：

老師，我依家擁有700得1手
1288有2手
6988有1手
823有1手
941有1手

老師應該點分配呢
兌吧就有3手

請問6060呢，我都有1手

老師請問700什麼價位可以買呢
唔該老師

龔成老師：

上述持有的，都是有質素的股票，基本上無也問題，農行（1288）及中移動（0941）增長力就唔強，收息為主。

至於樂享互動（6988）是中國的效果類自媒體營銷服務提供商，利用商業智能技術為行業客戶及自媒體發佈者提供服務。

睇翻近年的財務數據，佢增長力是有的，但上市前的數據參考價值較低。

相信佢長遠，業務都有增長力的，公司話佢自己能盈利高增長，業務始終較波動，因此小注持有好了。

兌吧（1753）不過不失，但增長力暫時唔強，唔建議持有太多。

眾安（6060），業務都有發展力的，但業務仍有不確定性。佢最近開始由虧轉盈，反映之前的投資開始有收成，暫時睇是正面的，但之後的發展仍有未知，這一定會令股價波動。

騰訊（0700）如果跌多10%，會較合理的。

------------------------------------------------

Q19118：

老師，我想問吓如果對股票零認識適合報讀 投資倍升股講座嗎？地點喺灣仔無其他地方？如果有1、2堂上唔到會有補堂嗎？

龔成老師：

股票班（基礎班），即是「投資倍升股課程」，適合初學者的，因為整個課程的設計都是針對初中階投資者的，課堂頭3堂都是初階的內容，只要你課後好好溫習，能跟到之後的內容。

每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資時機、配置、評估平貴，在投資上已掌握了一定的知識。

另外，你上課之前，多睇理財、股票類的書，留意一下財經新聞，到時就較易跟到。

暫時都只得灣仔。

如果當中有1、2堂上唔到，可以有補堂，你在我下次開班上翻該堂就得，我並不多每月都有班，預早同我地講就安排到。

------------------------------------------------

Q19119：

龔成先生你好
我是一個33歲的中年，大學時期至今都不懂投資，而家
手上一堆爛股票
可否給小弟一些意見

積落過十年，爛到唔爛
你睇買入價，就知好多都係09年買落

1205、1088、5、9988、9923、9618

我仲可以點挽救手上呢個portfolio?
而家就係每年keep 住神華，等股息

我好明白阿sir 你的是價值投資，而我係亂咁投機
最新果隻移卡，又係估唔到一入即移返唔到身

龔成老師：

首先你要明白一個概念，我地持有一隻股票與否，關鍵位是企業質素、前景，不要被買入價影響。買為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

另外，當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

所以，你上述的股票，中信資源（1205）無乜質素，宜賣出。

匯豐（0005）中國神華（1088）只是收息股，唔太適合你，你長線最好賣出，起碼都減比例，你可以等1年，經濟好翻D，就可以減部分，將資金轉到其他更適合你的股票仲好。

以你的年齡，應該建立一個潛力股+平穩增長股的組合，見你上述已有幾隻潛力股，因此，你在之後的配置，可以加翻平穩增長股，如盈富（2800）。另外再加：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

在長遠來說，你應該潛力股+平穩增長股都有，潛力股可考慮：安碩恆生科技ETF（3067），但就要明白波動性比上述會高左，同時風險大左，你要自己平衡，買入要分注，唔好太大注，因為現價唔平。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

至於你所講的投機，在中短期，總會有贏有輸的，但在長期，則輸的較多，這是我過往做10年銀行與證券行的見證。

------------------------------------------------

Q19120：

成兄，雖然以往你唔會評論半新股，但近段時間我見到比較多人吸電子煙，6969思摩爾國際，想請教一下，它的合理區間

龔成老師：

思摩爾國際（6969）係霧化科技解決方案提供商，主要經營以下兩項業務。

第一，佢以ＯＤＭ模式為全球煙草公司及獨立電子霧化公司（如日本煙草、英美煙草、Ｒｅｙｎｏｌｄｓ
　　Ａｓｉａ－Ｐａｃｉｆｉｃ、ＲＥＬＸ及ＮＪＯＹ）研究、設計及製造封閉式電子霧化設備及電子霧化組件。

第二，佢做研究、設計、製造及銷售自家品牌（包括「Ｖａｐｏｒｅｓｓｏ」、「Ｒｅｎｏｖａ」及「Ｒｅｖｅｎａｎｔ　Ｖａｐｅ」）開放式電子霧化設備或ＡＰＶ（高級進階私人電子煙設備）。

基本上業務是正面的，有當中的獨特性，以及長遠有增長力。不過，股價升了不少，現價唔算平，如投資真的小注好了，而這股有長線投資價值的。

股價回翻2成會較合理。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。