【龔成問答信箱】（Q21941-21960）

Q21941：

Sir, 話個好消息給你知。我已榮升做老闆啦

下星期完成交吉就可以著手搞開舖（做美容院）, 自己獨自創業。 知道條路一定困難（好多嘢要獨自處理, 唔同以前打工仔心態）

自己剩餘人生時間唔多, 唔突破就會遭困死, 既然喺咁不如玩大佢, 無悔今生～。 3年前追開你fb, 睇你百萬富翁1， 令我反問翻自己興趣喺什麼, 點樣賺多啲錢。

當時公司搬去內地, 感覺好徬徨, 由文職專去做美容真係唔易, 首先要改變心態、思維, 因為是服務行業, 不再是整天坐著辦公室機械色工作。要想辦法怎樣令客人覺得你服務好,

怎樣推銷產品/療程（最重要喺點樣幫助佢地解決美容問題）, 是1種大考驗, 就算現時都係1邊做1邊令自己進步。

上緊你堂， 帶晒你著作, 非常感謝你幫忙簽名。你喺我幸運之神。 真的衷心多謝你

龔成老師︰

先恭喜，成為老闆。同埋都好多謝你一直支持。

因為除左上堂，都要處理好多相關事務，寫書、回答問、準備課程內容等，都真係比較忙。遲D完左進階班，我會好好休息下，多謝關心。

新生意，一切由零開始，好多事都要慢慢摸石過河。你要從日常經驗，慢慢去將盤生意調節，比心機。

記住，你係要諗點幫到客人(為客人創造價值)，生意長線自然就會好。

生意一定有上落，一定有困難，堅持是最重要的，加油！

------------------------------------------------

Q21942：

老師你好，之前上3萬點抵受不了股票的回報。把所有股票賣掉，也停了月供，現在有點後悔了，但財務上，因為疫情，都小了收入了，想問你意見

而家46歲，家庭月入得得3萬，現金得60萬，沒有股票，個人儲蓄保險已供完。層樓仲欠11年，月供12000元，估計開支後。有6千剩低，我現在應該做什麼好呢？

龔成老師：

我地是重要是「財富組合的配置」，不是現金的賺蝕數，持有貶值的現金只會令你財富不斷貶值，你之後要慢慢建立翻一個優質股的組合。

現時你物業，保持供款就得，除非你每月出現支出大過收入，否則，你保持現時的供款情況是最好的，到你57歲供款還清按揭，情況不差。

現時你有$60萬，建議你動用$20萬-$35萬，分注投資平穩增長股，由於不少潛力股都升左，加上你現時46歲，不能太進取，因此，可以集中在平穩增長股。

平穩增長股：考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想潛力提高，就加少少恆生科指ETF（3067）。

現時大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

至於你每月的$6000儲蓄，可以考慮月供$4000，以上優質股都得，如不月供就儲現金先，久不久入貨就得。

------------------------------------------------

Q21943：

龔老師您好，本人今年45歲，早前以BNOVISA去了英國，剛開始學投資。

手上$50萬現金。月入$17000，扣除開支@$14000和剛開始月供2800盈富@$3000。想用3至5年時間增值至150萬，可供女兒在外國讀大學。請老師指點一下，謝謝

龔成老師：

坦白講，要咁短時間達至$150萬，有點進取，除非有很大的機遇，否則未必做到。

以你的年齡及家庭等情況，我唔建議你太過進取，暫時只建議你投資平穩增長股類別：

考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

你可以保持月供。

同時，$50萬可以動用$20萬，投資上述的股，暫下資金，等你更為安頓，以及你有較多投資知識，先開始投資，到時可考慮「平穩增長股」+「潛力股」。

雖然這個計劃，未必能達到你的目標，但我地投資，一定要「先想風險，後想回報」。

所以，你要從增加收入的方向去想。

------------------------------------------------

Q21944：

老師，你點睇未來樓市呀？
同埋你會唔會移民？

龔成老師：

香港樓市，中短期會有少少上落（但不會大跌），長遠會向上。

首先要睇經濟基本面，如果經濟持續地差，失業率上升，樓市終會向下，這會對樓市有中期性的影響，不過，就算跌，都不會大跌，最多只是小跌，如果經濟差的情況不是太大，甚至不跌，這是由於背後的需求大。

在長遠計，我仍相信樓市在長遠計，因供求關係，仍是向上多。因為現時香港買樓的需求仍大，而長期供應不足，加上政府往後施政只會更加困難，好多所謂的大計劃都未必能夠實行，又或最後規模細左。

另一方面，需求大，我見唔少適婚年齡的朋友，都正等機會買樓，但未買樓，這些是「潛在需求」，過往每年不斷累積，只要樓市跌少少，就會有需求走出來，這令樓市不能大跌。

另外，樓市另一作用是「投資」，現時的租金無大跌情況，以投資回報率的角度分析，樓價都不會大跌，因此樓市平穩。

長遠計，租金及樓價會平穩，有少少向上，但不是倍升，不會好似過往般倍升，而是平穩向上。

我相信，我暫時都唔會移民，因為我太喜歡香港，同時不捨得離開。

------------------------------------------------

Q21945：

老師你好，謝謝您無私的付出，免費幫我哋答問題，有幾個問題想請教

1.睇完老師啲書,再上股票班會否容易啲吸收？

2.上初級股票班，應上哪個課程？

3.老師對買美股及債券有什麼看法,值得投資嗎？

龔成老師：

1）【投資倍升股課程】適合初學者的，因為整個課程的設計都是針對初中階投資者的，課堂頭3堂都是初階的內容，只要你課後好好溫習，能跟到之後的內容。

每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資時機、配置、評估平貴，在投資上已掌握了一定的知識。

另外，你上課之前，多睇理財、股票類的書，留意一下財經新聞，到時就較易跟到。

2）之後可以上【進階班】，但你唔需要太心急，一步步打好基礎先，上左上述的基礎班先，同睇書。

3）債券的投資價值一般，除非你好低風險或較年長。至於美股，都有投資價值的，你可以配合港股，同時持有都得，如果預熟識美股，可以投資ETF，如VOO、QQQ就得。

------------------------------------------------

Q21946：

亞sir,06893係咪唔會點升架啦，買左之後係咁跌


龔成老師︰

你唔好用價格走勢，去衡量一隻股票有無投資價值，不要再用這種短炒思維，長遠只會對你不利。

我地持有一隻股票與否，係應該睇佢本身質素、行業前境、財務數據等，去得出結論。

衍生集團(6893)主要從事開發、營銷、銷售及分銷個人護理產品、保健產品及家居產品，以及提供中醫保健及相關服務。

佢規模好細，1年的營業額連HKD2億都無，而且按年下跌中。

近年更出現虧損狀況，暫時睇唔倒佢有投資價值，建議你有反彈，就沽出會比較好。

------------------------------------------------

Q21947：

請問135昆倫能源，老師有咩睇法？

另外2379中天國際是否老千股黎，因為我曾經中過伏

龔成老師︰

昆侖能源（0135）雖然質素都算有，但不是最高質類別，佢對油價較為敏感。佢的產品自主力較弱。

石油是商品，當中沒有差異性，佢地要將石油賣出，只能跟國際油價，這令佢地處於被動狀態。沒有價格自主的能力，這令佢地的獨特性有限。

這類商品企業，都可投資，但就要明白不是最高質的企業。

由於質素中等，唔建議大注投資，但相信油價上翻佢會上升的。同時這股收息不差。

中天國際(2379)主要業務為物業開發、物業租賃及投資，及融資等等。

佢一定係老千股，但此股規模好細，盈利好波動，更多年出現虧損。

而且，核數師有多年要修定報告。這類企業，我都較有保留，不投資會較為穏當。

------------------------------------------------

Q21948：

老師我係你學生，正分析914海螺，預計下年每股盈利HKD$8.23元左右X預計下年5.2 市盈率=HKD$42.7元

914海螺，現價每股盈利HKD$8.06左右X5.3市盈率=HKD$42.7元

老師請問我有冇計錯呢？現價合裡嗎？
sir現價屬於合理區是嗎？

龔成老師︰

其實水泥行業，較受水泥價格和經濟週期所影響，佢近年每股盈利增長係唔錯。但長線能否能持這個水平(特別係大環境明顯轉差時)，是一個問號。

因此，我地係計算每股盈利時，要用較保守方法，用過去7年平均數，大約為HKD4.3。

之後，我地再用過去10年市盈率，中間的4個數字，去作為指標，區間為9-12倍。我地可以得出﹐其合理區大約係$38.7 - 51.6。

當然，這只是其中一個估值的角度，而投資者在進行估值時，會同時用多個估值方法去進行估值，得出更立體的結果。現價算合理區頂，但你預佢股價會較波動。

安徽海螺（0914）有質素，有增長力。

佢主要從事生產和銷售熟料和水泥製品，業務地區包括中國東部、南部、西部、中部及海外。而安徽海螺是水泥行業中，全球最大的單一品牌供應商。

水泥屬於基礎原材料行業，對建築行業有很高的依賴性，同時亦會與經濟增長速度有較高的相關性，特別與固定資產投資相關。即是說，當中國基建及房產市場不景，水泥行業會比一般行業處較大的不利狀態。

另外，水泥企業在生產過程中，燃料成本佔總生產成本中約佔了超過一半。若能源價格出現較大變動，就會對企業成本造成較大影響。因此，當能源價格出現較大上升時，將引致安徽海螺的成本增加，影響其中毛利。

綜合來講，佢擁有相當規模、生產能力，有一定的質素及賺錢能力，而水泥行業長期將因中國城鎮化以及一帶一路的建設，仍然會增長，但不會像過往般快速，而是進入較平穩的時期，在本質上此企業不差。

你要記住，我地係做估值時，唔係所有企業都係用同一個方法。你要因應企業本身特性、質素、發展潛力等，去作出調整，計出來的估值，才會較為貼近現實情況。

------------------------------------------------

Q21949：

你好成哥，我一直都留意左你好耐，亦都keep住有睇你d書。希望將來有時間黎上堂，繼續學習新知識。

知道你有買比亞迪，小米，完美醫療 & 金莎，

1.想問一下小米，完美醫療，金莎什麼價位才是合理價？

2.另外，想預有一部分錢買入收息股，有什麼股票值得推介？

3.之前$240價位不小心買入比亞迪及$293價位買入阿里巴巴，現在應該怎樣部處？

謝謝！

龔成老師︰

1) 小米(1810)和完美醫療(1830)現價偏貴，要回多1,2成才算較合理。而金沙(1928)現價合理，可以分注儲貨。

2) 目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

但你要明白一點，我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係分配投資項目時，會因應番你的人生階段。

如果你年青，可以「平穩增值股」+「潛力股」。中年人士，可以較集中翻係"平穏增長股"。當你已近退休之年，就應集中在「收息股」，去創造平穏現金流。你可以睇翻自已年紀，去作出配置。

小米(1810)和完美醫療(1830)算係潛力型，而金沙(1928)則是平穏增長股。

另外，現時大市只在合理區，資金唔好盡用。最好留有部份，等大跌市出現時，可以用來掃貨。

3) 這2隻係潛力股，都很有質素， 雖然你買入價較貴。但企業長線係會升值，你照持有就可以。

阿里巴巴(9988)現價已算合理區，你可以加1注，之後每回調10-15%才再加。

而比亞迪(1211)依然係貴，再加注要等到$135以下，才好考慮。或小注月供。

------------------------------------------------

Q21950：

你好，我今年23歲，去年畢業出來工作，存款大概20萬上下，3月的時候想過買入美股ETF，但因當時波動較大不敢入場而擱置。

我的目標是建立長期成長投資組合，再以資產追資產，大都打算長期持有。

美股考慮主要購入VOO/QQQ大指數ETF，以及輔以ESG、消費品ETF或內地/亞洲ETF，港股曾研究房地產領展及公用股（感覺較穩定，但見老師曾說增長較慢），

債券就未有研究，只是認購了ibond打算開賣即放。（曾經亦對ARKK心動，但已成過去）不知道我選ETF配置的方向正確嗎？

最近有保險經紀向我推銷月供基金，令我重新思考應以ETF還是基金進行資產投資，因為感覺兩者投資的內容相似，ETF自由度較大，經紀公司收費較高有固定年期，

但亦有一些loyalty bonus。

現時本人月薪只有萬四，扣掉MPF同家用節約洗費後可能得七千，這樣還應該月供ETF/基金嗎？老師會比較推薦美股還是基金呢？有可能兩邊同時進行嗎？

如果自己月供ETF（例如$4000/月），是否也是分注投入不同ETF？而且月供隨時可開始，因平均成本無分高位低位？因擔心每月認購金額太少，手續費都蝕埋。

最後例如美國指數雖有波輻，但長遠看過去一直持續上升，一次性較大手買入會否比用供基金更好？

先謝謝老師花時間閱讀和解惑！

另外工作行業多行合約制，現時合約到22年1月，未來數年又未知會否到外國進修/移民，目前仍是以回報多多益善為上策，但會摻入一些較穩定產品，

不知道老師有沒有推薦?

龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時23歲去計，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

不論ETF、保險基金、股票，其實都有投資價值。但你都要分析佢質素、對該市場認知程度、投資策略、長線增長潛力、費用成本等。去睇翻邊個，最適合你現時年紀和風險承受能力。

至於月供，其實都會因應市場平貴，去調整現金持有比例。但你係初學者，未識定平貴。我建議你理價格水平，一直長線去供。

因為你自行調整，諗住某個時間先供多D，某個時就唔供住，我就唔建議。因為，若調整時機不正確，會大大影響左你平均價格買入的效果，令你得不償失。

以下是一些適合你月供的股票，供你參考。你唔一定要用的建議的，只要你覺得有更合適的投資目標，而你又理解的，都可以用。

現在你每月先用5成儲蓄做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股︰VOO、盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰QQQ、比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）、三星FANG ETF（2814）。

由於你投資知識不高，因此可較集中在平穩增長類股，至於潛力股，只宜小小注(不多於3成)。最好是你先提高投資知識，等到你有一定知識和經驗，才慢慢增加潛力股比例(大約5成)。

現時大市只是合理區，你現有20萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

你現時每月資金不多，可以先集中係1,2個股票，最好係一些較大型市場的ETF，好似盈富(2800)、VOO, QQQ，會較有分散風險效果。

而且供得太散，變相會令每隻股票的月供成本增加，影響長線回報。

另外，若你打算短期移民或到外國進修，而投資係要全數贖回的話，你就要留意。因為投資係一個長線計劃，如果投資年期較短(不足3-5年)。

選股策略上，我地就要作出調整，不可太進取，以免中短期價格波動，影響你回報。

------------------------------------------------

Q21951：

龔成老師，我現時40歲, 有自住樓重欠銀行$300萬，有－個物業收租，租金收入約$14000, 家庭總收入約$13萬，有兩仔女, 幾年後出外讀書，可儲蓄約每月5萬

現有股票909, 1833, 2333, 3888, 9618, 1209, 853 (現價約150萬)，另有現金約150萬當不時之需

1) 請問以上股票可持有嗎？

2) 應否加大投資股票金額？

3) 現時樓價高企, 值得再買樓收租嗎？想快些增長以供仔女留學之用

謝謝

龔成老師︰

1) 上述股票，都係有質素，可長線持有。但當中股票，主要係一些波動性較高的股票。佢地增長潛力大，但風險都同樣高。

特別係明源雲（0909）、金山軟件（3888）、微創醫療（0853）不確定性就更高。

以你40歲年紀，這些潛力股可佔約4-5成，餘下應用以下平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

2) 現時大市只在合理區，現金最好佔組合3-5成，你最多可以動用多1,2成資金，以分注方法，買入上述平穏增長股。

餘下部份，就用來等大跌市機會。

3) 從投資角度，現時租金回報率不高，用優質股做增值，值博率會較高。

另外，我地財富組合除左要有增長力和質素外，平衡性都好重要。你已有2個物業，現時資產明顯係偏重於物業類。長線你應加入一些優質股，以免過於集中個別資產類別，而產生風險。

因此，你新資金建議優先投入股市，去令成個組合更平衡。

最後，投資增值係要時間，如果你子女會在短期就出外升學(不足3年)。該部份資金，投資時就要相對保守，以免價格波動風險，影響他們升學預算。

------------------------------------------------

Q21952：

你好，本人現年25歲，自由工作者，每月收入約3-5萬，但有一筆本連息約50萬的負債，且不能提早還款，月供約1.5萬，

請問我現時理財方針應以儲蓄（保本）還是投資（增加收入）為主？

如建議儲蓄，想請教下你對零存整存嘅睇法

龔成老師︰

正常情況，當你有一筆負債，而佢的息率都不低的話，我會建議先還款，以免拖累長線回報。

但由於你不能提早還款，這部份就不作特別考量。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

這個是根據你年紀，去作出配置。與你有否這筆負債無關，只要你每月扣起相應還款金額，之後再作投資就可以。

以你現時25歲去計，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

策略上，你可以投資「平穏增長股」和「潛力股」。你每月5成儲蓄做月供。其餘先儲起，用一邊月供一邊儲蓄的策略。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

餘下的另一半現金，我地就等機會，當大市出現較大回調，就加大力度掃貨，然後作長線投資。

至於零存整存這類產品，風險無高，但增值能力同樣好弱。對你年紀，我唔建議你用佢，作為財富增值工具。

------------------------------------------------

Q21953：

龔成老師您好，請問如果有五萬人民幣現金在手，應該投資內地股票 / 做定存 / 還是兌港幣投資月供好？

龔成老師︰

從財富增值角度，你應將資金集中係優質資產，好似優質股、物業等，去做財富增值。

定期存款增長力不高，除非你這筆資金短期內要動用，或者你風險承受能力十分弱，否則不應作定存。

至於內地和香港股票，都係可以投資。

若你現時無投資知識和經驗，對企業估值，點去定平貴未必會太了解。建議你先利用月供模式，去做增值，可以減低買貴貨風險，對你而言會較理想。

------------------------------------------------

Q21954：

龔Sir，你好，很羨慕有好多人都可以很早便財務自由，心想如果在我年輕的時候有人告訴我就好了。白手興家，辛勤半生（一陣短命啲可能已經大半生）

但無奈沒有把握時機。可以請你看看我的情況，如何能夠在退休前的日子扳回一城，等佢優之後無憂無慮嗎？

重點分析：

-距離退休還有15年
-家庭收入約$120,000一個月
-每月供樓$30,000，尚餘17年
-要養四大長老及小朋友，開支大
-自己節衣縮食每月可儲約$40,000
-有百萬左右股票（港交所20%，匯豐、中國平安、友邦、工行、港鐵、領展、新鴻基地產、小米、騰訊、阿里巴巴、特步、
金風科技（我覺得呢隻賴嘢）、吉利、雅生活服務等各佔5-8%)
-現金約70萬
-MPF 預計退休時好彩的話有6-7M (市有上落，很難說）

目標：
-退休可負擔每月約$30,000支出，不用靠孩子
-有$2m可支付孩子將來首期

到底每月可以儲嘅錢應該點樣分配好呢？萬分感謝！

龔成老師︰

如果你希望15年後每月有3萬蚊現金流，以股息率6%計，你需要本金600萬。

你現時持有股票，都係有質素。但當中潛力股(1810, 0700, 9988, 0175)，我唔建議再加注。

因為以你的年齡計，其實要開始為退休做準備，財富仍有增長力（但不可以太進取，故潛力股不宜持有太多）。因此，你可以投資「平穩增值股」+「收息股」。

你可以做月供股票，供「平穩增值股」+「收息股」，每月5成儲蓄做月供。其餘先儲起，用一邊月供一邊儲蓄的策略。

但就隨著年齡增加，慢慢增加收息股的比例。到退休時，你收息股比例，應提升至100%。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、平安(2318)。

同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

若你想增長力大D，可以較集中係平穏增長股。

大市現處於合理水平，那70萬資金和每月儲蓄，就等大跌市機會出現，才大力度掃貨，並長線投資。

若你能維持月供$40000 + 現有資產170萬(現金70萬、持股100萬)，我假設投資回報有7-8%（連股息再投資），15年後大約會增值至1500萬，故這樣安排相信很大機會達至你的財務目標。

到你退休前，慢慢將收息股比例，應提升至100%。透過這些收息股，去創造現金流，供你退休生活，咁就可以。

另外，金風科技（2208）主要從事製造並銷售風力發電機組及風電零部件，佢有提供風電相關諮詢，風電場建設、維護服務；建立及經營風力發電場；以及提供污水處理業務及融資租賃服務。

整體算不差，但股價有點波動。睇佢近年股東回報率都有下跌，代表佢賺錢能力弱左。加上此股負債不輕，都係一個風險因素。

此股可投資，但不宜持有太多。若佔你組合不多，持有係可以。

------------------------------------------------

Q21955：

老師，我想請教：投資(月供) Vs 儲錢

成哥你好我睇左你既post 同書都有2年幾。我有D關於儲錢同投資既概念分得唔係好清楚，想請教下你。

我今年30歲，月入22K 一個月可以儲到13K，目標係3-4年內儲夠首期。依家月供緊盈富同中芯各2000蚊。黎緊諗住搵多隻潛力股供。2000蚊。

依照我依家既月供方式去投資，我每個月供6000蚊。淨低既錢就有7000蚊。3年內儲到252,000。但如果我唔月供的話我3年可以儲到468,000。

月供會減慢左我儲首期計劃，咁我點解仲要繼續月供呢?

BTW我報左你股票班，期待見到你真人學多D智識。多謝

龔成老師︰

你有個基本概念錯左，你依然停留係現金模式。

我地進行財富增值，其實就係將一直貶值架"現金"，轉換成"優質資產"的一個過程，佢可以係股票、物業、一盤生意等等。

若果你一直以儲現金，去作為累積財富的方法。你只會見到，自己個購買力越來越弱。相最基本跑嬴通漲，你都做唔到。

相反，你持有一些優質資產，好似優質股、物業，佢地長線跑嬴通漲之餘，都可以令你財富有所升值。

所以，你要改變現時想法，由儲現金變成儲優質資產。

你現時月供計劃係可以，每月餘下$7000就先儲起，等大跌市機會。

新增一隻月供股票，你可以選擇其他優質股。

由於投資係一個長線計劃，你可以等上完堂，有個完整概念再調整，相信會更好。課堂見!（你可以等上完堂先更具體配置）。

------------------------------------------------

Q21956：

您好龔sir, 本人40多歲，為單親媽媽，原本有份穩定職業，平均月入近4萬，可惜近幾年事業出現極大錯敗，失業，近日只能找到一份文職工作，月入萬多。

由於本人一直不敢冒險，即使早年已有在正職下搞生意的想法，可惜網上生意又搞不好，已停頓了，跟本沒有賺過錢。

龔sir你曾經講過要建立被動收入，其一就是在有正職下亦要發展小生意，據我經驗，有正職要分身發展生意似乎有點困難，請問可以指教一下嗎？

另外投資方面，我是新手，有穩建又有點增長的建議嗎？以我這年紀，才開始做小生意不敢承受大風險，還可以嗎？現金30萬，可以如何投資？謝謝指教！

龔成老師︰

當你本身有正職，再同時間去發展一盤生意，會係有些困難。

但由於去創業，本身有一定風險，除非你好有信心，加上本身有一定本錢係手，就算有一段較長時間，收入較少都不成問題。

見你之前網上生意，都不太順利，或許你對這門生意上未能完全掌握。

我建議你先用"正職"+ "兼職小生意"的模式，會係較穏當。到你有一定生意經驗，或者本身個生意開始上軌道，才全力投入，會較好。

至於想創業，其實任何年紀都適合，只要你做好風險控制，就咁可以。

投資方面，以你4X歲，可以選擇一些「平穩增值股」+「潛力股」作投資目標。

由於你投資知識不高，因此可較集中在平穩增長類股，至於潛力股，只宜小小注。此期間，你最好是努力提高投資知識，才慢慢增加翻潛力股比例。

大市現處於合理水平，那30萬資金(扣除你小生意要用的資金)，你可以先用一半，以"分注"形式慢慢入貨。餘下一半就等大跌市機會出現，才大力度掃貨，並長線投資。

------------------------------------------------

Q21957：

龔成老師，想請教一下理財方向，希望日後得賜教回覆

本人39歲月入73k左右 (連bonus 年收入約1.1m左右），早年因理財不善所以未有太多錢儲蓄（現幫家人供樓），只約400k現金，完全沒有買股票經驗（早年因為無錢），

相信保險買了一些年金及投資基金，有賺但回報時間冗長。扣除以上月可儲15-20k左右。

想請教︰

1. 想開始月供股票，因為我無時間day trade，什麼是好選擇？

2. 目標希望可以3-5年有能力買樓，請問是否應採取進取或中低風險增長策略？目標市區兩房，不一定是新樓，因有現樓住，只是長遠退休收租回報之用。

3. 常聽買債的回報高，請問現在是否安全？迷你債券事件會再發生嗎？

希望老師可以在日後專欄回覆，萬分感激

龔成老師︰

首先，你要清晰一些投資概念先。我地投資股票，其實等同投資一間企業。希望透過其自然增長，以達至財富增值的目的。

所以，我地投資一定係長線，而唔係短期炒賣，去賺差價。所以，你唔係唔洗不停睇住個市，因為唔係做DAY TRADE，而係長線持有優質股。

另外，"保險"主要係用來防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

1) 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你39歲，應以增值為主，建議你用「平穏增長股」 + 「潛力股」作組合，去創造一個增值平台。

現在你每月先用5成儲蓄做月供。其餘先儲起，用一邊月供一邊儲蓄的策略。

由於你投資知識不高，因此可較集中在平穩增長類股，至於潛力股，只宜小小注(不多於3成)。最好是你先提高投資知識，等到你有一定知識和經驗，才慢慢增加潛力股比例(大約5成)。

現時大市只是合理區，你現有40萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

2) 用以上月供方法，假設投資回報有10%（連股息再投資），你每月投資$15000 + 40萬現金，5年後大約會增值至160萬，相信對你置業都有一定幫助。

但緊記，我地投資理財，除了講增值，都要顧及組合的平衡性。係你買屋同時，必需留有一定優質股作增值，否則會過份偏重物業類，而造成風險。

3) 從財富增值角度，債券增長力不高。較適合一些退休人士，用作創造現金流。但用來累積財富，就未必咁適合。

債券，這其實只是「產品」，物業、優質股是「資產」，所以從財富本質上，我地應較集中持有「資產」，才對我地最有利(你可以睇睇《財務自由行》一書，我從財富本質上，講述了當中原理)。同時，現時息口低，但未來有機會重回加息週期，債券未必是最好的投資工具。

另外，你會不時聽到一些債券基金，係坊間分好多種，你要小心睇，因為有d風險低，無乜問題，有d則有潛在的風險，絕對不是保本的產品，有機會出現了「賺息蝕價」的情況。

第一，有些債券基金，會投資「高收益債券」，即是「垃圾債券」，你一定要睇睇佢所佔的比率。

第二，債券基金往往不是單純地持有債券，而是可以作買賣，以及利用衍生工具作對沖等策略，即是可能有價格上的波動。

第三，不少銀行都會提供借貸，以槓杆去放大回報，以平息借貸去賺取息差。低息環境時間題不大，但進入加息週期，不止借貸成本增加，同時債券價格往往在加息期下跌，雙從打擊下，投資價值成疑。當然，若然加息步伐不快，息差利潤就可觀。

我不是說債券基金有問題，只是說明當中的風險，因為市面上的基券基金好多，你要仔細分析。

------------------------------------------------

Q21958：

龔sir你好，本人有200萬，有100萬巳買了股票有700 1810 2013 1347全是高位入，現還未能去到買入價 ,做了蟹貨，現在還有100萬現金未買，我應點去買呢，

本人已40歲，沒有返工的，有一個小朋友要供養，我怎樣可以將餘下的100萬變出倍計的收益呢？我不想蝕咗可能是我的最後 100萬，我應怎樣做？

請指教，我想買你嘅書睇，應買邊本呢？

感激你的回覆。

龔成老師︰

若你想持股有倍計收入，簡單來說就係買入一些優質股票，並長線持有，讓其慢慢自然增直，以達至財富倍增的目的。

但這個倍增計劃，係要長線。講緊係以年計，故你唔好預短時間內，對你財務上會有任何幫助。

另外，投資再有質素的增長股，都會有風險，有機會出現虧蝕。若你係無法承受這個風險，你只宜投資一些收息股，甚至只作定期。你要自己從風險與回報中，取個平衡。

雖然你係買左貴貨，但這些股票都有質素，長線都會升值，所以你照持有會係最好。

但較大問題是，你而家組合太偏重左係潛力股(全部都是)，佢地雖然有增長潛力，同時風險都較高，不宜持有過多。

以你40歲年紀，潛力股可佔約4-5成，餘下應用以下平穏增長股。加上你投資經驗較淺，潛力股比重，要再調至2-3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

除了新資金，必需優先投入平穏增長股。你現有持股，都可以考慮沽出部份，同樣換碼至平穏增長股，去平衡風險。

平穏增長股：盈富(2800)、金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建(1038)

由於你現時無工作，同時間要供養一個小朋友，所以你必需為自己預留一筆半年開支，以備不時之需。

若你預期家庭無收入狀況，會維持一個較長時間(例如1-2年以上)。你可以考慮將部份資金，買入一些收息股。佢增長力會較弱，但勝在有穏定現金流，可以支援你生活開支。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)

現時大市只係合理水平，現金佔比重大約3-5成。你可以多用少少資金，分注入貨。餘下資金，就等大跌市出現，才加大力度掃貨。

書本上，你可以先睇我架《80後百萬富翁》、《財務自由行》和《股票勝經》，都適合初學者。

------------------------------------------------

Q21959：

龔成老師你好，有投資問題想向你請教，我今年30歲，希望可以盡快存到首期買樓，月入2萬幾，每月可儲1萬。

2017年開始買股票，一直都贏粒糖 輸間廠。內銀2017年買入，現在價位相差太遠 沒有出售

中行 4.28買入，5000股
工行（買入價位已忘記），1000股
建行 （買入價位已忘記），2000股

一兩年前買入
匯豐56.5買入 (400股）
鐵塔 1.7買入 （6000股）

近期
阿里巴巴 （有溝貨，均價買入267，400股）
京東 （有溝貨，均價買入334，100股）
京東健康 （有溝貨，均價買入146，100股）
小米 33買入 600股

現有流動資金大約20萬，應如何再投資？

龔成老師︰

從質素上，你持股係無問題，都可以長線持有。但從配置角度，問題較多。

首先，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

但要留意，銀行業營運模式較特別，風險會比一般行業為高。必需堅守30%這個準則，如果可控制在20%以內，會更好。

你現時銀行股和阿里巴巴(9988)明顯係超標，但阿里巴巴有質素，你可以照持有，但暫時不要加注。

而銀行股，除了比重過高外，佢地本身只係收息股，增長力不高。用作財富增值，但不適合。建議你沽出部份，換至其他有增長力股票。

另外，我見你大部份股票，都係高位入市。我估你都幾受市場氣氛影響。這個也是你贏粒糖，輸間廠的原因。

記住，當個市場好狂熱，個個爭相去買股票架時候，好多時個價都係被炒起左。就算你買入股票有質素，長線回報都會受影響。

另外，我地繼續持有一隻股票與否，不是建基於賺蝕數，而是企業的質素與長遠發展。

你過往投資成績不佳的原因，就是你建基於「賺蝕」去決定是否持有，同時，當你見到股價下跌，想拉低平均買入價，就會「溝貨」，同樣是集中在「過往買入價」，你應該改變這思維，以「怎樣令財富組合將來有最好的增長」為目標。

未來你再投資，應先集中用月供模式，去平衡買貴貨風險。到有一定經驗，才去一直買貨。

以你30歲，可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

平穏增長股：盈富(2800)、金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建（1038）

潛力股：安碩恒生科技（3067）、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814），但就要明白波動性比上述會高左，同時風險大左，你要自己平衡。

由於你投資知識不高，因此可較集中在平穩增長類股，至於潛力股，只宜小小注。此期間，你最好是努力提高投資知識，才慢慢增加翻潛力股比例。

餘下現金就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q21960：

龔成老師，新股Boss直聘值得入貨嗎？謝謝！

京東物流這隻股會否升值？

龔Sir, 對於京東物流2618是否值得長期持有呢？Thx

龔成老師︰

Kanzhun Ltd ADR (BZ)主要提供線上招聘服務，為求職者和企業提供直接溝通的線上平台。

從業務上睇，佢係有投資價值。但由佢依然係燒銀紙階段，幾時先會有穏定盈利，無人知。

不確定性很高，要做個較穏當的估價，係好困難。只能說現價唔平，而且此股有一定風險，就算投資都只宜小注。

京東物流（2618）都有質素的。

京東物流係中國領先的技術驅動的供應鏈解決方案及物流服務商。通過科技賦能提供全方位的覆蓋各個業務領域的供應鏈解決方案和優質物流服務，從倉儲到配送，從製造端到終端客戶，涵蓋普通和特殊物品。

根據一些調查報告，按總收入計，這企業係中國最大的一體化供應鏈物流服務商。

2018、2019 及 2020 年，京東物流營收分別為人民幣 379 億元、人民幣 498 億元和人民幣 734 億元。

京東物流於 2018、2019 及 2020 年產生的虧損淨額分別為人民幣 28 億元，人民幣 22 億元及人民幣 40 億元，不過，如果扣除一些非現金流的開支，又未算太差。

佢表示，上市集資所得，部分將用於升級和擴展該企業的物流網絡；部分將用於開發與供應鏈解決方案和物流服務相關的先進技術。

企業有優勢的，長遠發展正面，但中短期股價未必有好強的表現，這股都有投資價值，但現階段未必值得大額投資。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21781-Q21800）

Q21781：

龔sir, 我係你舊生，有關於現金流嘅問題想請教，我偶爾聽到你評論一些公司現金流強，請問現金流強、普通、弱有什麼指標?謝謝你百忙抽空回答

龔成老師：

投資者會分析企業的現金流量表，在年報可以找到的，當中會分為「經營活動」、「投資活動」、「融資活動」3部分，而我地會集中分析經營活動部分。

如果企業的經營活動現金流保持強勁，反映企業憑做生意，持續保到理想現金流，除了反映業務不差外，企業得到大量現金，無論發展，又或派息，都是有利因素。

你預保持年年正數，就是現金流強或普通，而當中的數字大，就是強勁。當然，我地仍有好多因素分析，例如現金流量表的各項目，盈利的情況等。

------------------------------------------------

Q21782：

龔老師你好丫，我係你嘅忠粉，我有問題想請教你的‍

我現時28歲，剛上車一年，地點係粉嶺聯和墟帝庭軒，買入價係550萬。

想問下黎緊幾年個區樓價升幅大唔大？因為我見附近又有新盤開賣。

我想過幾年轉返出沙田或荃灣的地方住。所以先上車再換樓，咁樣做岩唔岩丫

龔成老師：

坦白講，粉嶺聯和墟始終離市區有距離，就算去翻地鐵粉嶺站，都要坐小巴或行一段時間，長遠的升值潛力不算大。

當然，聯和墟有點似一個小鎮，如果工作地點不是市區，從本身的生活配套上，其實不算差，因此不是劣質。

你擁有一個物業，都算是處於「物業追物業」的狀態，不過選擇物業就不是最好類別，但都不是差。現時你物業，可持有的，到你日後，可轉翻出去沙田或荃灣，無論自住定長遠升值能力都會較好。

------------------------------------------------

Q21783：

龔老師你好。我今年已32歲，一直都沒有理財概念，只係被動地儲錢（即係用剩先儲，但我唔買名牌嘅）。

上年好不幸地被裁員，剛剛搵到工，但人工只剛剛夠食住行+俾屋企人藥錢（年頭驗到有事），差唔多無剩。而我亦只是個文員仔，唔望會加人工，就算搵新工都唔會加到好多。

我嘅人生好似入左個死胡同咁，晚晚臨瞓時都眼濕濕，唔知未來點算。

目前儲蓄只有20萬，深明擺係銀行只有慢慢眨值，想請問有什麼資產增值的方法？

龔成老師︰

現時大環境唔係咁理想，就業市場，以至人工收入受到影響，係正常，唔好諗得太負面。大環境我地係改變唔到，但個人心態係可以改變。

你先要了解自己未來工作發展目標，講緊係長線，10年以上。

再睇翻，現時工作，可唔可以幫你達成目標。如果唔得，那這份工作，純粹只過渡性。你就要工作之餘，努力為你目標工作做準備。

學習相門知識、上相關課程、或者做有關兼職。目標係當市道轉好時，這些經驗可以增加你成功就職理想工作的勝算。

至於財富增值方面，你要一改以往金錢觀念。想做到理想財富增值效果，每月我地係先要儲起一筆錢投資，到真係有錢剩，才作休閒消費，概念是跟你以往係倒轉。

我建議你有時間的話，可以找些增加收入方法，例如兼職、網上小生意等，目的係每月可以開始空出一定資金，作投資增值。

以你32歲，可以選擇一些「平穩增值股」+「潛力股」作投資目標。

到你每月可儲到錢時，你可以每月先用一半儲蓄做月供股票，另一半就先儲起架策略。

由於你投資知識不高，因此可較集中在平穩增長類股，至於潛力股，只宜小小注。此期間，你最好是努力提高投資知識，才慢慢增加翻潛力股比例。

餘下現金就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

至於20萬，我建議你扣起半年開支和屋企人藥錢。有剩的一半，你可以分注買入上述股票，餘下同樣等大跌市機會。

------------------------------------------------

Q21784：

龔sir你好，我今年年初開始接觸到你呢個Facebook page，好有啟發，慢慢開始改正我投資觀念，仲一次過買左你幾本書希望增加投資知識。

有兩個問題想請教你：

1）未認識你呢個網之前只係靠屋企人一d介紹買入一d股票，所以唔識睇“平貴”同優質程度去揀同買，宜家手上股票組合需要慢慢調整，

其中手上持有696呢隻股票，而且係組合入面都佔左幾多（大概20萬入面嘅5萬）。我睇過你嘅書知道呢隻股票有佢嘅獨特性，但我當時2-3年前嘅平均買入為$21-22，

宜家佢股價一路都上唔返去。我因為某d原因暫時唔可以再投入額外新資金去買股票，可以動用黎買嘅現金只有萬五左右。如果我得戶口入面個二十萬黎增值財富，

咁我應該繼續放係度繼續等待定先賣出部份黎增加現金同買其他股票增值？

2）另外，你係書度提過可以留意係生活之中自己喜歡嘅野同埋身邊嘅潮流黎發掘潛力/優質股。最近香港人都係度談論Viutv/mirror/error，

我都係一份子。請問龔sir點睇電盈前景？我睇過佢地係電視業務之前都仲蝕錢，但已經慢慢開始有改善，如果佢地咁嘅走勢，

會唔會有潛力突破到一直以來嘅“穩定”？
先謝謝你！

龔成老師︰

1) 中國民航信息網絡（0696）係資訊服務及網絡管理解決方案商，目標市場為中國航空客運及旅遊行業。

例如電子旅遊分銷系統、機場旅客處理系統等，過往業務穩定，有長線投資價值，不過不是高增長類。

你買入價有少少貴，但又唔係好貴，可以守。若你係年青至中年人士，這股適合，照持有就可以。但由於佢佔你組合較重比例(個股應維持少於組合15%)，我建議你都部份，換至其他優質股，咁會較好。

記住，我地投資股票，就等同你投資緊一間企業，一盤生意。你必需了解佢業務、賺錢能力、行業發展、財務狀況等，才去做決定。

如果你而一刻投資經驗較淺，不懂定平貴。你可以用分注或者月供模式去儲貨，去平衡買貴貨架風險。

現時大市只在合理區，你餘下5萬蚊就先儲起，等大跌市才出手。

2) 生活選股法，係其中一個選股模式。因為這些企業和你生活息息相關，所以你較易了解佢當中營運模式和優勢。

但這只是初級，之後我地就要進一步審視佢本質、行業未來發展、財務狀況等等，才可以決定，是否一間值得投資的企業。

電盈（0008）雖然業務算穩定，但由於負債較多，都有一定風險。

VIU TV最近的確發展不錯，但當你再仔細分析佢年報。你會發現媒體部份，其實佔佢收入比重不高。

因此，就算佢有較理想發展，當整個集團盈利幫助，唔會好大。

這股作為收息股，可以，但增長力不強，若你較年輕，就不宜持有太多。同時負債多有風險，不建議大手投資。現價合理的。

雖然這隻算不上係優質股，但你這個思考模式係正確。只要你再努力學習更具體的投資知識，和累積經驗，相信你長線會有唔錯成績。

------------------------------------------------

Q21785：

龔成老師你好，一家準備移民到英國生活，賣出香港物業後可預計套現800萬。

準備到當地買一層$200~300樓自住，其餘想投資賺取生活費，因為未必會在當地工作，所以需要現金流。

請問：用50%~70%資金買英國樓收租，其餘買收息股好唔好？

如果買收息股，應該係買英國股？還是買港股比較好？

因為對英國股票唔熟悉，只有留意港股，阿sir有無英國收息股推薦？

我見阿sir話個組合要平衡，同一股不能太多，咁一般收息組合應該買幾多隻股票？

(好難搵到太多唔同行業又有6%以上既收息股）例如3988 1398 939 都係銀行業

多謝阿sir解答

龔成老師︰

買入自住物業後，用50%~70%資金買英國樓收租，其餘買收息股架策略，係可以。

但你投資英國樓時，緊記只可以投資一些真正了解的項目，堅守「不認識就不投資」的原則。

確保自已真的已了解當地的物業市場、租務市場、法例、經濟發展。而物業有潛力，租金回報率又理想，咁就可以。

另外，唔好用晒全數資金去投資，要保留一部份現金在手，大約半年開支左右(你可自己按情況調整)，以備不時之需。

至於收息股，其實你買美股、英股、港股都係無問題。你只要睇翻你自己的認識程度、交易成本、稅務成本等，去做決定就可以。

我自己主力研究港股，所以比你建議，都會集中係港股。由於現市大市只係合理區，有不少優質收息股，都無6%咁高。

但我地唔會知，未段一段時間，佢地會唔會回到6%以上。所以，我地只可以策略性地，因應平貴，係現階段先入小注入貨。每有回調，再慢慢加注。

但正如你所講，係配置股票組合時，唔好太集中某行業，以免出現過度集中性風險。相同行業不可佔組合多於30%，而單一企業不要高過15%。

特別要留意係銀行業，佢營運模式較特別，風險會比一般行業為高。必需堅守30%這個準則，如果可控制在20%以內，會更好。

收息股︰港燈（2638）、香港電訊（6823）、恆生（0011）、工行（1398）、置富（0778）、陽光（0435）、深高速（0548）等，大多有5%股息

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

（你可睇下《50穩健收息股》當中仲有好多）。

最後，你要留意英國係收取股息時，係會抽稅。係計算你實際現金流時，你注意這點，以免高估左實際股息回報。詳細計算方法，建議你上官方網頁，或者向當地稅務顧問查詢。

------------------------------------------------

Q21786：

你好，龔成老師，我今年34歲，獨女，屋企供滿左層居屋市值大概480萬，月入4萬，之前因為種種原因幾乎沒有儲蓄。現時有5萬現金，MPF 30萬，

黎緊每月可以儲1.5萬

1. 希望可以55歲退休，想之後每月有最少2萬現金流，請問我應該可以點步署？

2. 屋企人曾經提出以現有單位再買私樓，但居屋原來不能再按，所以唯一方法就係賣出現有單位再另外買私樓，請問長遠計係咪私樓會保值啲？

老師有冇建議我可以點做？點樣安排會好啲？
多謝龔成老師

龔成老師︰

1) 如果你希望55歲退休時，每月有2萬蚊現金流，以股息率6%計，你需要本金400萬。

你可以用「平穏增長股」 + 「潛力股」的組合，去累積這筆資金。現在你每月先用5成儲蓄，即$7500做月供。其餘先儲起，用一邊月供一邊儲蓄的策略。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

2) 居屋雖然投資價值，一般都遜於私樓，但好處係投入資金較少。可以用空出資金，作其他投資之用。

由於你這間是自住屋，是否配合你長線生活需要，會比佢保值能力更重要。除非你現時自住樓，真係好唔理想，配合唔倒你長線生活要求。否則，我唔建議你沽出。

若你想投資物業，你可以先用優質股增值，到一定金額才買物業投資。

------------------------------------------------

Q21787：

早晨龔sir,我除左月供apple外，頌可以月供咩股票可以做到五年連本賺200萬，月供資金有1萬蚊其實有無咁既機會？

現持有9988兩手、823四手、6618兩手、966三手、BIDU 8手，Apple 26股、JD京東20股,Qcom 21股 美股都係依兩星期內先入手

現持有股票還可行？

龔成老師：

你月供apple，可以，佢有質素，無論持術、發展、品牌、銷售網絡都十分強，是可以長線持有的股票。

佢設計了各種各樣的消費電子設備，如智能手機（iPhone）、（iPad）、智慧手錶等。

而iPhone占蘋果總收入的大部分。另外，蘋果亦為客戶提供各種服務，亦是一些延伸的賺錢模式，如蘋果音樂、iCloud、蘋果電視、蘋果支付等。

由於已經發展得好大，因此，最高速增長期已過，之後會進入穩定的增長期。長遠的投資價值仍在，但要留意股價。近年大部分時間在合理區中上部至略貴的水平，如投資要分注，長線。

至於其他股，都可以持有，基本上都是有質素的。

不過，你較多比例集中在科網類別，這會出現集中風險，你要注意翻。

要5年$200萬，$10000月供，仍未足夠的，你要提高金額同時供其他股。另外，每月仍要儲到基本現金，等機會。

選股無問題，但最好平衡翻個組合。同時，在買入時，要慢慢分注，不要一次過買入太過。要同時留現金。

------------------------------------------------

Q21788：

Sir,其實到水桶3楷段買收息股，基本上長期收息，不會常常買出買入，應該選優質的企業的股息越高越好，你常推介的置富和陽光分別5.7%、6.1%

我見3988中國銀行有7.1%更多，反而很少推介是否有問題呢？

龔成老師：

其實最好是建立一個「收息股組合」，因此，幾隻都得，可同時持有。

但我地在分析收息股時，要同時考慮佢業務，因為業務將會影響佢的股價及股息變動，金融業的不確定性以及內銀的風險，比本地的收租企業，前者風險較高。

------------------------------------------------

Q21789：

龔sir。本人48歲，因健康問題已退休，正準備移民往台灣！有幸在半年前朋友介紹而認識你！

購入你的作品，有股票勝經、年報勝經、50穩健收息股、財務自由行及80後百萬富翁！

想請教，我現持有以下股票：

66 有728股 （在IPO時購入一手，持有多年有碎股！）
178 有6000股 （平均價$1.927）
270 有6000股 （平均價$13.773）
435 有1000股 （平均價$3.48）
778 有2000股 （平均價$6.98）

823 有100股 （購入價$69.9）
1398 有1000股 （購入價：$4.94）
1810 有400股 （平均價：$23.35）
2638 有1000股 （平均價：$7.77）
2800 有500股 （購入價$26.62）另開始月供，每月投入$4000

另有3067 有500股（平均價$17.66

我會繼續購入，還有50萬資金！

1.請問龔sir 我是否買得太多問種類股票？

2.需要整合一下嗎？可以如何優化？

3.另我還想購入9988及0285作長線投資！

麻煩你

龔成老師︰

1) 你現時持有種類和數量，算可以。長線計，組合維持10隻左右，會較理想。

2) 從質素上而言，你持股係無問題，可持有。但由於你係退休人士，投資選項時，我地要保守少少。

你應該較集中係「收息股」類別，因為你退休之後係無收入，需要透過「收息股」的現金流，去支援你的生活開支。

因此，你應以「現金流是否充足」作大前題，去考慮你個財富配置。現時你收息股只有陽光(0435)、置富(0778)、工行(1398)和港燈(2638)，唔算太多。

長線計，唔好太集中係幾隻身上，應建立一個平衡的收息組合，包括不同企業和行業，唔好太集中係個別股票。相同行業不可佔組合多於3成，而單一企業不要高過15%。

以下係一些優質收息股，你可以參考下。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

當然，你都可以參考我<50穩健收息股>書中資料。

如果你現有收息股，產出現金流已經係足夠應付你基本生活。你才考慮增持一些「平穏增長股」來增值，好似盈富(2800)、港鐵(0066)、粵海(0270)、領展(0823)、莎莎(0178)等。

否則，「平穏增長股」類持有現貨好了，唔好再加注。

而小米(1810)、安碩恒生科技(3067)這類「潛力股」雖有增長潛力，但波動性太高，唔適合你。現貨可持有，但唔好加注了。

現時大市只在合理區，你可以用多15-20萬，以分注形式入市。餘下的就等大跌市，才用來入貨。

但由於你將會移民台灣，加上你本身身體都有些問題。建議你先預留相關的潛在支出，才開始投資計劃，這樣安排會較為穏當。

3) 阿里(9988)和比亞迪電子(0285)同屬「潛力股」類別，波動性太高，唔建議你投資。

------------------------------------------------

Q21790：

龔成老師你好！本人想請教你有關投資方案 , 本人50歲 , 因市況不景氣, 剛被公司辭退, 待業中 , 家中有兩老需照顧及供養。

本人住公屋, 有積蓄大約25-30萬, 希望老師可以指導如何投資增值, 以維持家庭基本生活.

感激萬分 !! 謝謝 !
本人為基層人士

龔成老師︰

我地做財富增值，係需要因應人生階段、投資經驗、客觀環境等因素，去作出一個配置。

由於你暫時無收入，加上有雙親需要照顧，中短期現金的需求不少。所以我地投資前，先要保障好你生活上無問題，做好防守部份，才考慮進攻。

以你現時情況，我建議你先儲起半年基本開支(包括照顧雙親部份)的應急錢，計好數，真的「閒錢」才開始投資計劃。

你可以用「收息股」作投資目標，雖然佢增長力唔高。但派發的股息，可以為你提供穏定現金流，去減輕生活支出的壓力。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)都可以。

如果你能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

但要留意，現時股價只是合理，未到平宜。因始資金不要用盡，大約先用一半，以分注形式慢慢入貨，餘下等大跌市才動用。

到你將來工作變得穏定，有更多空閒資金可作投資。你就可以加入一些較有增長力的「平穏增長股」，去提升翻個增長力。

但現階段，你應以維持家庭基本生活為主要目標。故先集中係能提供現金流的「收息股」身上，「平穏增長股」就暫時不要考慮。

平穏增長股：金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建（1038）

------------------------------------------------

Q21791：

龔Sir，最近我媽媽退休，有一筆$28萬退休金，現想幫她作投資，想請教一下阿Sir

Plan A
$20萬 股票收息股投資
$5萬 作定期或買Ibond
$3萬作後備資金

收息組合
6823 (15%)
1883 (15%)
778 (15%)
6 (15%)
435 (15%)
1038 (10%)
939 (5%)
1373 (5%)
1398 (5%)

Plan B
$25萬，特選客戶優惠
放5年，每年回$6萬，5年後總共得到$30萬
途中如需提出餘下金錢，則不可再累積任何利息，並需收取3%手續費

龔Sir 對兩個計劃有什麼意見？那個較好？

龔成老師︰

整體而言，PLAN A會係較好。

如果想組合更加平衡，可以加入ＧＸ恒生高股息率ETF（3110），同時減少你部分15%幾隻股的比例，去到10%，會較好。

因為你不少選股，都有相同類別的情況，例如相同是電訊，相同是房託，長建（1038）與電能（0006）關連性都高。

PLAN A以收息股作為主力，再加入風險較低的Ibond作平衡。而且，整體回報都明顯較PLAN B為高。

當然，PLAN B都有佢好處，就係回報係更有保證。因為始終收息股都係股票，會有一定不確定存在。

你可以在風險承受能力和回報之間，取個平衡，去決定用邊個計劃。

------------------------------------------------

Q21792：

成哥，我今年一月碩士畢業，過多幾個月就黎25，一d工作經驗都無。因為讀書讀得太多，現在覺得早我兩年出黎做嘢d人好似都好好。

我自己見mt第二輪failed左， 覺得好失敗25歲已經輸俾人地同年齡好多。雖然上左你股票班投資有斬獲，但事業上確是0。

突然覺得自己全部都係0，係社會廢物。好想消失係呢個地球。我應該點算。

龔成老師︰

你現在才事業剛起步，一切由零開始，是正常的。

加上現時市道較差，未必可以短間內找到心儀的工作，但唔好咁快放棄。

同時間，如果未能找到合適工作，都唔代表無野做。你可以做些兼職，有收入之餘，可以獲得工作經驗，如果同你本科有關，咁就更好。

另外，你可以有時間，去借書返來進修其他知識。把握現在空閒，去上些有用課程。

保持個人積極態度，無論對你本身或者見工，都百利而無一害。

另外，我建議你加強一些讀書以外的技巧，例如溝通、領導、處事等。記住，無人生來就是廢物，只是你未找到自己的真正價值而已，加油！

------------------------------------------------

Q21793：

龔sir你好，我睇左你本5年買樓4部曲，想請教你

我27歲，老公30歲。2人月入大約$43000。已問銀行話我同老公收入及職業可買530萬樓下的樓按9成都冇問題。

我同老公睇緊灣仔區樓，我地睇左十幾間樓，有間心水單棟樓，賣445萬，中銀估價430萬，匯豐估400萬。開放式實用207尺，間屋四正，但42年樓。打算用首置按9成收租

樓的詳細：

好處：
間格實用四方，多窗
高層（非頂層）向東，景觀開揚有山有公園望，光猛
落樓30秒即到地鐵站（囍匯旁近合和中心)
旺中帶靜，樓下條街唔嘈（唔係對正大馬路及叮叮路）
裝修企理四正，再油油就ok
冇任何滲水情況
廁所乾濕分隔整齊
平路入大廈唔洗行樓梯級
管理費唔貴，平其他單橦樓$400-$500
外牆及大堂已大維修，來緊換升降機都唔洗業主比錢，大廈有盈餘200萬及政府津貼50萬

唯一唔好處：
42年樓齡，現在可按30年，但將來放好難放。

主要想買樓收租，現在租金下降，但都位置方便都應該放到$11000-12000。感覺間樓幾好，就算老左冇地方住係到住都唔差。

我們目標係400萬/under 400成交，都係我地budget內。灣仔20-40年樓齡較貴，而且有啲太近街市。所以比較心宜這物業，只是擔心樓齡老，但灣仔區的樓都係比較老，我需要擔心之後難放售嗎？

我們仲要睇其他樓，希望發現荀盤。感謝sir解答，謝謝！

現在我們同朋友一齊夾租新界私樓3房單位，兩人租樓支出共6300。如冇意外未來5年都會同朋友一齊住慳錢。

另外因為我未來大約5年後可能會quit現在full time社工的工作，想自己做塔羅諮詢師+part time 社工，所以襯現在工作穩定，想先上車然後遲啲放心追夢。

兩個都第一次買樓，希望將來可換大屋/再買多層。這個上車盤可取嗎？

龔成老師︰

若能做到你預期租金回報$11000-12000，租金回報率，勉強算係可以。

雖然位置係唔錯，但始終係偏舊，相再轉手較難。而且維護成本，可能都唔少。再加上，實用面積太細，連一個基本家庭生活的尺寸(約300尺)，都未到，都係扣分位。

我明白你策略係先細屋，後大屋。但要這策略成功，其中一個重點位，就係個細屋必需有一定增值能力，至少同大市同步。

你現時灣仔這個納米尺寸的單位，能否做到，我較有保留。

如果你未找到合適單位，其實你都可以用優質股，去先做住增值。加上你未來5年住屋問題，都算解決左。

除非你真係找到租金回報率理想、單位又有質素、價格都可以，才出手置業。否則，你唔需要急於一時。

------------------------------------------------

Q21794：

Sir 早晨，我上佐3堂睇埋80後的百萬富翁，開始有d投資既概念，想幫我媽媽買入水桶3既股票，發現佢原來係好多年前開佐個股票戶口，

當中有1102環能國際同埋1150米蘭站，但一直無理到d股票，雖然佢好彩當時都有買到d水桶3既股票，但原來而家呢2隻股票已經供過好次股或者係合股，

佢手上既貨變哂碎股，量唔多既，分別係500股同2000股，但而家賣又賣唔出，可以點做？

同埋我都想問個問題，劣質股係唔係可以跌破0股價或者負數？如果會，甘會點架？股東會唔會被逼補倉架？麻煩哂你

龔成老師︰

首先，持股數量多與少，係唔係碎股唔重要。我地是否持有一隻股票，最重要係睇質素。

環能國際(1102)年年虧損，無投資價值。

加上核數師意見，每年都是「保留意見」，代表盤數有機會有問題，建議盡快沽出。

米蘭站（1150）質素不太好。

佢每年的生意持續下跌，加上年年虧損，投資價值不高，建議沽出。

劣質股係可以跌到個價好細，但唔會跌破$0或者負數，所以唔會有補倉情況。

你所講的補倉，多數是一些槓桿性投資(例如︰用孖展買賣)，才會出現。一般去買正股，係唔會出現咁架情況。

------------------------------------------------

Q21795：

請問9888百度2021Q1業績公佈後最新PE9和預期PE4是怎樣理解？

有時見到靜態市盈率及TTM，又是怎樣。

龔成老師︰

我地一般會成日講的市盈率PE，就係「靜態市盈率」。
[計算︰現時市值，除去最近一年的總純利]

而「市盈率TTM」，係表達現時總市值，相對過去4個季度的純利。[計算︰現時市值，除去最近4個季度總純利]

由於年度數據，只會一年更新一次。故用季度作比對，數據會相對較新，會比較貼近現況。

若「市盈率TTM」比「靜態市盈率」細，你可以理解為，佢近季度盈利能力係有上升。但緊記，我地投資要分析長線和整體，唔好單用這個數字，就下結論。

至於「動態市盈率」，主要係預估本年全年純利。
[計算︰現時市值，除去預測本年度全年總純利。]

由於只係一個預測數字，只宜作參考。

------------------------------------------------

Q21796：

龔老師，你好。本人31歲，月入1萬5。月光族。手上無存款，年供2萬儲蓄，月供1100人壽醫療。卡數負2萬。

無家庭負擔，每月俾3000家用。自己搬出來跟男友同住5年，算普通生活不用負擔。

本身十分在意外表，定期會做facial, 已經維持13年。戶口一有錢就會一筆過買treatment ＆美容針。每月平均有2000在護膚品。

近期開始留意老師專頁，覺得自己真係井地蛙，原來大家都可以咁有錢。希望以後可以開始投資，但無方向，唔知老師有無好介紹。

雖然有睇到有相似個案分享，但大家都有積蓄... 我一無所有，所以好迷茫。原本有2萬5工作，因為疫情辭退之後，只能搵返1萬5，之前試過有輕生想法，覺得自己30歲人好失敗。

想問下開股票戶口？我應該開邊間？本身自己只有匯豐出糧戶口，但朋友分享話citi bank股票戶口比較好？

龔成老師︰

現時礙於大環境欠佳，其實好多事情都未必可以控制得到。但相信長線，疫情會過去，生活與工作都會慢慢重回正軌。現時艱苦，只係一時，唔好氣餒。

而且，有時這些不利的環境，反而可以激發我地的潛能，造就你的成功。

其實，要做財富增值，唔一定係本身好高人工，或者已有一大筆資金，才可以做到好效果。其實只要你每月有一筆閒錢，可以定期做投資增值，已經係可以。

因為你尚算年青，能進行資產增值時間較長，複息效果會較佳。只要你好好把握時間，努力學習正確投資方法，和每月努力儲錢，相信都可以做到不錯效果。

只要你這刻努力，做好理財，定目標，好肯定你過5年後，會比過半同齡人的財富更加多！

投資戶口，你可以係銀行或證券行開都得，只要佢費用合理，又方便你自己，咁就可以。

你現時還很年輕，儲蓄保險這類產品，不建議持有太多。雖然風險較細，但增長力不高，會拖慢你財富增值步伐，你要自己平衡下。

另外，你要想方法，令自己每月能空出一筆資金，作投資增值之用。

你可以考慮做兼職、做網上小生意，去增加收入。同時間，要睇翻日常生活，有無乜野不必要開支，係可以減少。

到你每月都可以空出一筆資金，就可以進行月供股票，去為自己財富增值。

你31歲，建議你用「平穏增長股」 + 「潛力股」的組合。現在你每月先用5成儲蓄做月供。其餘先儲起，用一邊月供一邊儲蓄的策略。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q21797：

啊sir ，我是你的忠實讀者。我希望40歲可以做到有被動收入，不至於退休但可以財富增值。

我初學買股票，而因為老師的書。暫時都有小小的回報，大感謝！

但因為手頭上的股票感覺上太多，之前覺得樣樣都會升，就愈買愈多，有d賺有d蝕。

最近想重整一下，希望可以老師指點指點

手頭上月供︰
2800,2823,788

其他嘅就係︰
1997 ($28蚊入)
1928 ($27蚊入)
2845 (平均 $135入)
286 ($41.8入)
522 ($100入)
2388 ($22.5入)
293 (疫情時膽粗粗6.15入)

以上有好大部分都係因為老師嘅分享而有小賺，感謝

另外有一部分就蝕︰
1810 (平均28.5)
0606 (平均 64)

仲有一堆美股︰
APPL, TSLA, NNDM, ARKK, ARKF
美股收息指數
VYM, SPLG

我知道老師集中講港股，可否指點一下迷津，如何重整一下。

感謝

龔成老師︰

你現時股票數量有點多，而且都偏雜亂。長線最好集中翻10隻左右，會較容易管理。

另外，你要明白一個概念，我地持有一隻股票與否，關鍵位是企業質素、前景，不要被買入價影響。因為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心，照持有就可以。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

而且，唔好見個市越升，就越買，咁係好危險。因為市況狂熱時，不少股票個價，都會被炒高，你好易會買貴貨。

如果你對點定平貴，唔係太有信心，未來投資可以集中用月供方法，去減少這方面的風險。

港股中，你持股大部份都有質素，可長線持有。

但愛帝宮(0286)質素較一般，長線換至其他優質，相信會較好。

國泰（0293）同樣質素只是一般。其中一個風險，是油價，睇翻佢過往多年，油價對佢成本影響好大，令佢盈利十分波動，就算佢利用對沖，都唔係好成功，反而試過因對沖而蝕大錢。

另外，航空業對經濟週期較敏感，收入不穩，同時唔算係一個好賺錢的行業，因此這股的質素只是一般。

就算佢重組，得到新資金，只是比佢「捱過這一關」，並不是賺錢能力方面有改善。你想持有都得，但不宜太多。

至於0606，我估你係打錯股票編號，應該是想說眾安（6060）。佢業務都有發展力的，但業務仍有不確定性。

初步睇，企業有發展力的，不過風險同時存在，因此唔建議太大注投資，這股都可長線持有的。

至於美股，同樣大致上都係有質素。但留意Nano Dimension Ltd (NNDM)，初步睇佢業務都有吸引力，但暫時未做到收支平衡，風險會較高。投資與否，要自己衡量。

而月供方面，你現時組合已經可以。安碩Ａ５０（2823）和盈富(2800)係一籃子優質企業，較有風險分散能力，分配上，用這2隻做重心會較好。

現時大市只在合理區，每月資金唔好盡用。最好留有部份，等大跌市出現時，可以用來掃貨。

------------------------------------------------

Q21798：

你好,本人今年40歲, 1家4口, 家庭收入$50,000, 有3層物業 (合共約$2300萬, 己不用供款), 但由於都係細單位, 所以另外租住一間大物業, 暫時收租夠交租同埋夠交小朋友學費。

本人考慮8-10年退休, 想問應如何打算。本人有100萬亞洲債券基金,有約4厘, 另月供約$2萬股票(包括2800, 823, 9988, 388, 2, 1299)

謝謝解答!

龔成老師︰

你現時應透過累積優質資產，去幫自已財富增值。到你退休時，再轉換成收息資產，去創造穏定的現金流，以支援自己的退休生活。

物業都係其中一種優質資產類，除左有升值潛力外，都能提供穏定現金(租金)，所以係合適的。

但我地財富組合除左要有增長力和質素外，平衡性都好重要。你現時資產明顯係偏重於物業類，長線你應加入一些優質股，以免過於集中個別資產類別，而產生風險。

因此，你新資金建議優先投入股市，去令成個組合更平衡。

現時你月供組合的股票，都係有質素和適合你。當中阿里巴巴(9988)和港交所(0388)係潛力股，以你年紀，大約佔組合4成好了，否則風險性會過高。

若你投資經驗較一般，或者承受風險能力較弱，再要將比重下調多少少。

現時大市只在合理區，每月資金唔好盡用。最好留有部份，等大跌市出現時，可以用來掃貨。

至於債券基金，坊間分好多種，你要小心睇，因為有d風險低，無乜問題，有d則有潛在的風險，絕對不是保本的產品，有機會出現了「賺息蝕價」的情況。

第一，有些債券基金，會投資「高收益債券」，即是「垃圾債券」，你一定要睇睇佢所佔的比率。

第二，債券基金往往不是單純地持有債券，而是可以作買賣，以及利用衍生工具作對沖等策略，即是可能有價格上的波動。

第三，不少銀行都會提供借貸，以槓杆去放大回報，以平息借貸去賺取息差。低息環境時間題不大，但進入加息週期，不止借貸成本增加，同時債券價格往往在加息期下跌，雙從打擊下，投資價值成疑。當然，若然加息步伐不快，息差利潤就可觀。

我不是說債券基金有問題，只是說明當中的風險，因為市面上的基券基金好多，你要仔細分析。

------------------------------------------------

Q21799：

老師，你覺得綠置居買唔買得過呀？近排鑽石山綠置居有點兒想抽。但投資價值是否比不上居屋？

而且你本書話黃大仙區投資價值不太高

龔成老師︰

綠置居投資價值會稍遜於居屋，但由於佢定價會比居屋低，故都有投資價值。

今次鑽石山綠置居，位置在鑽石山港鐵站附近，交通十分便利，故有一定吸引力。

雖然黃大仙區，本身人口老化，區內人均收入低，較難撐起樓價，故投資價值不高。但若作為自住樓，都有一定價值。因為佢定價較居屋低，能節省一筆資金，可以用作其他投資之用。

因此，只要佢適合你生活需要，而且有供得起，其實買都係可以。

------------------------------------------------

Q21800：

龔sir,我有些關於前途的問題想問，我現年33歲，現職學校合約文員，月薪萬幾，每次續約會多幾百元的升幅，這份工的優點是返工地點近屋企，

而且放工時間準時和放得早，但近日經過思考後我的目標是將來想財務自由，有自住樓，成為全職投資者，那麼我是否應為了得到穩定收入而投考政府文職公務員，

如果想成為全職投資者條路應怎樣走，謝謝老師答覆

龔成老師︰

我地可以透過投資和累積優質資產，去達至財富自由目標。

但大前題係你要有資金，最少每個月都可以有一筆閒錢，可以用作投資增值。

若你已經有個明確目標，係想做到財務自由，而現有工作收入又較難做到，你就時候作出改變，努力去提升自己收入，為財富增值創造基本條件。

到你每月有一定閒錢，就可以開月供優質股，去累積財富。之後，到有一定資金，就可以加入物業類。當資金累積到足夠數量，你就可以換成收息資產，去創造現金流，支援財務自由生活。

而要做到全職投資者，投資對你而言，不單要係興趣，而且更要成為你強項。若你現時對投資無乜了解，你就要先由一個「基本知識投資者」，慢慢開始提升自己。

你要花大量時間，努力去看相關書籍、睇年報聞、睇新、、上課程，去學習如何分析一隻股票。

到你累積到分析50間企業和長期實戰經驗，你就可以變成一個「有實力的投資者」，以算有做全職投資者的基本條件。

但要突破至最高層次的「真正專業投資者」，已經不單是投資知識的問題，因為要突破，就要擁有很強的分析力、很強的眼光、很強的心理質素。這些要更長時去磨鍊，才會做到。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q20741-Q20760）

Q20741：

老師，看了270粵海投資最新的年度業績報告，佢除稅前溢利對比上年係有增長的。

但與此同時，非控股權益大增超過8成，而稅項則增加接近4成，係扣除非控股權益同稅項之後，股東應佔溢利就跌左1成，當中係咪反映左一些負面因素呢？

會唔會對企業價值有影響？

本身賺錢多左，毛利亦提高左，但扣減稅項同非控股權益之後就出現盈利倒退，呢一點有些疑惑，所以想問問老師你有咩看法。謝謝。

龔成老師︰

稅務開支大增，主要係由於收入大增及某些盈利增長所致，當然中間亦有一些會計及稅務因素。但唔會因為稅務增加而認為佢質素差左。

而非控股權益，你見到數字大增了很多，由$6億增加到$11億，但這其實不是「支出」，而是一個會計上的調整數。

主要係反映集團的非全資附屬公司，當中不屬於粵海(0270)的盈利部份。

因粵海非100%持有這些公司，故盈利會透過這個項目，去按比例調減。因此，這不是一個負面的因素，只是權益裡盈利分配問題，又或只是一些會計上「計多左」的數而要扣走比非全資附屬公司的數。

因此，你所講的兩個因素，並不是影響佢質素的核心因素。

而佢在收入和毛利都有增長的同時，純利郤出現倒退。相信是當中部份成本，在此期間有較大上升。但由於未有年報，好難明確知道當中原因。

所以，我地暫時都唔可以咁快認定有長線影響，但都會扣少少分。到我地等到有詳細資料，才可以知道實際情況，才可以作出最終結論。

------------------------------------------------

Q20742：

龔sir, 你點睇隻7552,現畤可作為平風險嗎？

龔成老師：

ＸＩ二南方恒科（7552）之投資目標為追踪恒生科技指數每日兩倍反向表現（－２ｘ）的投資業績。

表面上可以對沖大市下跌，平衡風險，但實際操作好難，佢有槓杆，其實你好難控制得好。你幾時買？幾時賣先最好？根本好難。

國泰（0293）自己都有做油價對沖，最後輸左過百億。有好多野，睇就易，做就難。

------------------------------------------------

Q20743：

龔成老師，最近常常睇你的專頁常常幫人解答疑難，而我岩岩學投資，初初接觸股票，但我而家好迷惘。本人而家27歲，手上本來有現金流13萬，月入1萬5。

因為吾識，於是買下買下，慢慢地放左12萬係股票到。而最近蝕左3萬多。

我不知可以點算，我覺得自己好似吾適合投資，好多都係買入即跌，都係高價位入。

但好多股票買左放係到，股價仲係虧損嘅狀態，所以我諗緊應該要放定繼續長放，龔成老師，可以比少少意見我嗎？

1205 0.468入
3800 3.59入
9911 6.12入
1830 5.56入
1208 6.04入

我因為好多都係高位，我想放左佢地轉換買穩定既股票或套現。

你認為我應該要繼續等定放哂佢地套番現先...

龔成老師︰

你要明白一個概念，我地持有一隻股票與否，關鍵位是企業質素、前景，不要被買入價影響。

買入價只是一個心理因素，如果企業本身係有質素，而核心因素又無變。中短期股價波動，我地係唔需要理會。

中信資源(1205)業務的賺錢能力唔算好強，因此投資價值一般。

保利協鑫能源（3800）質素只是一般。佢主要為光伏行業製造多晶硅及硅片；銷售電力；開發、投資、管理及營運光伏項目。

市場炒緊佢前景，但當中存有不確定性，股價大上大落，佢的確可能會大升，但同樣可以大跌，無得估。此股都可以投資，但只宜小注。

赤子城科技(9911)主要從事開發一系列移動應用程式、健身應用程式、遊戲應用程式等。業務上，係有吸引力的，不過，我一向都新股半新股都無興趣，因為真實面要慢慢先見到。

由於上市時間唔長，故較難準確估值，只建議小注，同時你要明白當中的風險。

必瘦站(1830)買入價係貴，但此股有質素，可長線持有。

五礦資源（1208）質素都只是一般般，長遠要找機會賣出。

其實你唔係唔適合投資，只係定平貴和選擇優質股能力都不足。建議再投資前，你要去多讀投資相關書本、年報，新聞和課程。你可以睇我寫架"80後百萬富翁"、"財務自由行"和"股票勝經"，都適合初學者。

另外，你都建議你考慮本人的【投資倍升股課程】適合初學者的，每一課後都會有指引比你，要你在一星期內找那些資料，溫那些內容，只要你跟著去完成。到你讀完整個課程後，你已能自己選股、投資、評估平貴，相信會直接幫助到你。

課程時間，你可以留意我FB。

------------------------------------------------

Q20744：

龔sir,請問1918點睇？如想買入，什麼價較為合適

龔成老師︰

融創中國（1918）此股有一定風險。首先，中國樓市如果逆轉會有很大打擊，另外，這股的負債超高，無事就無事，有事大件事。

因此，投資這股不是不可，因為不是完全無質素，但你要明白背後的風險，

現價算係合理水平，但你要明白此股股價較波動，自己最好控制注碼。

------------------------------------------------

Q20745：

成哥，早晨！自從中了老千股後聽你話開始研究及學習.購入了您的年報、股票聖經和80後百萬富翁；
還想加入金沙及福壽園（請問甚麼價位才為合理或便宜區？）

現持有以下股票：
匯豐：53*800
領展：69.3*200
中國生物製藥：8.46*2000
小米：17.14*600
必瘦站：4.58*4000
長城汽車：26.8*1000
舜宇：215.4*100
安碩恆生科技：19.85*100
智中：1.57*48000（老千股）
阿里：224.45*400
（想整理一下及騰出資金待合理時機購入金沙及福壽園）求指導🙏謝謝

老師，如賣出長城汽車、舜宇和智中國際（老千股）、再購入金沙.好嗎？

龔成老師︰

智中國際（6063）唔可以話一定係老千股，佢主要在香港作為分包商提供外牆工程及建築金屬飾面工程項目設計、供應及安裝服務。

此股剛上市不久，無論規模、盈利等都好細。業務上，吸引力只算一般，此股不宜持有太多。小心。

長城汽車（2333）有質素的，業務都不差，不過，過往的增長力不算好強，長遠業務發展雖然正面，但未必是潛力型。這股都有長線投資價值。

睇翻你成個組合，持股都有質素，但係好集中係"潛力股"。佢地雖然有增長潛力，但同時波動風險都唔細，故不宜持有太多。

未來，你可以集中翻D係平穏增長股，令組合更平衡。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、領展(0823)、希慎(0014)、太古地產(1972)

金沙（1928）和福壽園(1448)現價合理，可分注入貨。要平宜的話，要等佢地回多2-3成。

------------------------------------------------

Q20746：

龔成老師你好！一直有留意你的FB Page，早幾天買了你的「財務自由行」

打算開始從知識增長自己的腦袋。想請教下你我持有的股票組合。

我現時30歲，月入約30K，工作穩定，我現時持手股票總值約200K：

1. 2015年$5.3購入綠色力量環保10000股(1330), 現虧19,300

2. 2021年1月 $9.9 購入香港電訊5000股(6823), 現盈5,400

3. 2021年1月 $40 購入長實集團1000股 (1113), 現盈6,150

4. 2021年3月 $70 購入領展1000股(0823), 現盈550

因為股票1購入後並持有多年仍未上返買入價，打算用2-4的股票Cover 股票1的損失

所以我計好價就放2-4的股票嗎? 老師有沒有建議以上持有股票幾多放好？

有什麼策略我可以參考?

股票2公布了5月派息，我好不好等到派息才放？

我可以預100K-200K可作投資用，除了以上股票組合，老師有沒有其他策略可以教下我?多謝老師！

龔成老師︰

你有一點好錯，用賺錢架股票，去填補虧損股票架損失，咁係無意義。你咁好大機會會令手上好架股票，越來越少。我地應睇佢本身質素，來決定是否持有。

綠色力量環保(1330)都算有質素，但負債偏高會係扣分架地方。此股可持有，但不宜佔咁高比例，建議沽出部份。

而其餘3隻都係有質素，但香港電訊(6823)增長力唔高，唔適合你年紀。另外，個別行業唔好佔組合3成以上，否則會有過度集中架問題。

因此，你要調整地產類股票比例，去令組合更平衡。

至於收息前後沽貨，其實係無分別。

將來時間，你可以用"平穏增長股" 和 "潛力股"作投資目標。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股︰安碩恒生科技(3067)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)。但佢地波動性和風險會較高，你要自己平衡。

現時大市只在合理區，現金和股票最好各一半。因此，餘下100K-200K資金，我地就等大跌市，才出手掃貨。

------------------------------------------------

Q20747：

龔sir，我想請教下
我現揸

2800 500股25買
2382 100股214買
1772 200股112買
6618 300股153買

我手頭上有6萬既流動資金，我想問我現時組合，可唔可以長擺下

龔成老師︰

現時持股都有質素和增長力，若你係年青至中年人士，係可以。

但留意你現時除了盈富(2800)，都係一些波動性較高架股票，佢地增長力高，但風險同樣高。

特別係京東健康(6618)，這類股票不宜大注。未來再加注，可以優先放在一些平穏增長股，例如金沙（1928）、恆基（0012）、平安(2318)、中銀（2388）、港鐵（0066），令組合更平衡。1772小注好了。

現時大市只在合理區，6萬現金先儲起，到有較大回調才出手。

------------------------------------------------

Q20748：

老師，6969思摩爾國際+3993 洛陽鉬業 +6049 保利物業 。想長期持有，請問適唔適合？謝謝

6969 $75.9入了2000股
6049$58 入了2000股
3993$6.8入了12000股

聽朋友話貪心，買多左貨，最近不停跌，好驚。我應該點算好？謝謝你，老師

龔成老師︰

我地分析是否持有一隻股票時，唔好睇咁短線，要從長遠角度和質素去考慮。

思摩爾國際（6969）係霧化科技解決方案提供商，基本上業務是正面的，有當中的獨特性，以及長遠有增長力，這股有長線投資價值的。

洛陽鉬業（3993）質素中等，但不能說是穩健，佢的營業額同盈利都十分波動，這點令分析佢較困難。因為好難確定到往後經營環境對佢的影響，同埋，佢亦因成本令佢盈利較波動，這同樣是較難預測的。

此股的股價較為波動，若佔你組合比重不多，可以守。

保利物業（6049）都有質素的。佢係中國的物業管理服務綜合商，主要提供以下三項服務：（1）物業管理服務（2）社區增值服務（3）非業主增值服務：主要向物業開發商提供案場協助服務。

生意與盈利都有理想增長，現金流不差，本身有質素。但市場有時對這類股有少少熱，令股價較波動，加上規模不算好大，因此都有風險。

優質度有的，故現貨可長線持有，但不宜太大注。

------------------------------------------------

Q20749：

你好，首先想多謝你教曉我正確的投資方法，我在慢慢閱讀老師的書，剛完成50優質潛力股，正在讀選股勝經。有幾個問題想請教下

我今年28歲，月入3萬，已於2017年購入自住新界樓一層，供樓後儲蓄大概每月8000。希望5年可累積200萬現金。暫時現金流有40萬左右，現時並持有以下股票

[email protected]
[email protected]
00914-500@48
[email protected]
09988-100@281
[email protected]/21.5

請問老師以上組合平衡嗎？風險及潛力可以嗎？如想再購入其他股票，什麼合適？

另外，在啟德發展區附近擁有33年樓齡工廈單位一個，已供斷，暫時估價260萬。由於一半屬於家人，一直空置沒有租出。

考慮到工廈按揭限制多，樓齡太舊，有可能要繳付一筆大廈維修費，我考慮將單位出售，再作投資。老師認為可行嗎？還是繼續持有？

謝謝！希望得到老師寶貴的意見！

龔成老師：

上述都是有質素的股票，你可以持有，長線投資。但如果想組合更加平衡，建議你加入ETF，例如盈富（2800），如可以承受風險就3067。

以你年齡，部分加入，安碩恒生科技（3067），可以的。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買可次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

如果該工廈價值不高，出租方面不強，就可以考慮轉其他資產，你分析時，最重要睇翻長遠的投資價值，發展程度，你要分析維修後價值與租金能否提高，去分析是否有持有價值。

------------------------------------------------

Q20750：

龔sir，你好 一直有睇開你post
好多謝你好用心分亨你既經驗同智識。
以下有問題想你給些意見 ：

本人 3x, 收入約$30k /月
先生 3x, 收入約$20k /月
已有一個小朋友 ，另將有一個黎緊出世 ，本人有一自住物業 ，月供計埋雜費約 $15k/月 （一房單位 新樓），現時有3個方案：

由於將有多個BB：想增加居住空間 ：

1. 賣出現有物業，套現買間三房

2. 將現有租出 ，然後買間兩房，但儲蓄只夠買間較細及舊2房，（如簡選此方法 ，手上會無曬儲蓄 ）

3. 把現時物業出租 ，
再租間2房
請你給些意見 ，謝謝!

龔成老師：

從財富增長的角度，（2）是較好，因為可以在長遠，擁有最多的資產。當然，都要睇翻你地是否承擔得到，如果太過勉強，就等過幾年，你地有更多資金先進行。

如果你地好急，一定要搬，就睇下這方法在供樓方面是否供得起，如果勉強得，都可以考慮，但就要明白風險，如果唔得，就考慮（1）。

------------------------------------------------

Q20751：

你好，龔成老師！我很認同你的理財理念，我希望對自己的財務重新審視。

我想詢問如果300萬儲蓄現時未首置，我應該如何配置我的理財組合？置業上是否以20 年樓齡內及租金大於供款為主要入手考慮？

我應該現時購入物業還是先行投資優質公司股票以增長資產？

增長股與收息股的比例現時應該如何劃分比例？ETF 應該一同加入考慮嗎？以上一系列的問題有點長，謝謝你的意見！

龔成老師：

如果你本有物業，而持有一定的現金，其實已經可以留意物業市場，最好是買入10-25年的物業，用大約$150萬作首期。

最好是將現金，轉為股票+物業，長期持有，建立一個平衡，財富增長的組合。

如果你決定投資物業，就唔好太急買股票，除非見到大跌市就入少少。否則，應該等你完成置業後，之後仍有一定的現金剩，到時就開始增加股票。

至於增長股與收息股的比例，好睇你的年齡與風險承受程度。如果年輕，就可投資平穩增長股+潛力股，年長，可較多收息股。

建議你睇《財務自由行》《大富翁致富藍圖》，適合你的。

------------------------------------------------

Q20752：

老師你好，我一直有追你既post，好認同你既投資理念，亦眼見你路途上幫助左好多人，希望將來可以有機會上你既堂！

有關本人投資方面，真係超級bb班，有一個困擾，希望老師幫忙解答！我係$9既時候入左3320，一直等到依家。見老師過往只有極少數評論呢一隻估

只係提過話佢有質素，但就未見詳細分析，希望老師可以幫忙詳述一下，同埋會唔會有機會上返$9呢？十分感謝！

龔成老師：

華潤醫藥（3320）都有質素的，但不是最高質之列。

佢主要於中國以「三九」（又稱「９９９」）、「雙鶴」、「賽科」、「紫竹」、「東阿阿膠」及「天和」等商標從事研發、製造、分銷及零售醫藥與其他營養保健品。

產品組例有化學藥品，例如包括慢性病（如心腦血管疾病及糖尿病）藥品的研發及產銷、輸液治療（主要是大劑量靜脈注射液）、兒科、腎科與生殖健康的治療領域、抗感染與皮膚病用藥，亦製造及銷售少量原料藥。
　　　　
另外，亦有中藥、生物製劑、營養保健品。

其實業務仍發展中，不過賺錢能力就唔算好強。這股都有長線持有的價值。

有貨你可以持有，但要上翻$9，相信要多少少時間，耐心。

------------------------------------------------

Q20753：

老師，以往我從無投資過。喺大約两個月前開始買股票，曾買0136 亦賺左小小到後來高位入左，點知跌到剩下1半，但都係小注。

而另外31蚊入了1810請問應否繼續持有

我喺1個月前開始留意你Facebook 專頁。發現你既投資方法好有道理，你講到不用理公司股價，只需研究該公司價值及應長線望遠，不應貪圖短暫獲利。

想請問你有那1本你寫既書會教看公司估值及從公司年報可看出是否值得投資的呢？

知道老師你會很忙，但都希望能指導1下

龔成老師：

選股是重要的技巧，如果未能掌握，可以投資盈富（2800）作組合的核心。

恒騰網絡（0136）有危有機類。

現時企業盈利不多，但市值極高，市場對「前景」有無限幻想，有時炒作會升好多，但跌都可以好勁。

如果長遠業務成功，會爆得好勁，但失敗，會跌得好勁。因此，長線投資不是不可，但只能小小注。如果持貨較多，宜減。

至於小米（1810），你持有就得，但你買入價貴，之後要慢慢學習企業估值。

你可以睇《股票勝經》《年報勝經》。

------------------------------------------------

Q20754：

龔成老師你好呀！我想增加自己嘅收入，本身自己有份做文員的職業，但每月收入唔高，微薄的收入無辦法為買樓做好準備

雖然我自己都有買到股票，但始終投資股票難免會有損失，當中都損失左唔少錢，想問下有無方法可以指導下。謝謝！

龔成老師：

第一，增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。《股票勝經》適合初階者的。

第二，將每月的部分資金，去做月供股票，供盈富（2800）。對初階投資者來說，月供股票是一個很好的累積財富方法，因為可避免你一次過在高位買入的風險。

原理如同儲錢，不過就不是儲現金，而是儲股票。計劃要長期進行。

另外，盈富是一個組合，適合絕大部分人投資，風險不高，長期儲貨可助你財富平穩增值，記住要長線持有。

當然，你可以自行分注買入，但要你有知識，懂得分平貴先得。有知識財富就增長較快。當然你要努力儲本金。

------------------------------------------------

Q20755：

老師，點解你唔高位賣1211？

龔成老師：

我一直都持有1211，已12年，平均價$20，之後上到$88，跌翻去$12，當時個個都問我點解唔$88放。

其實，無人能捉到最高位，我地只有持有優質企業令財富有最大增長，如果成日都以捉高位概念進行，反而會升少少賣左。我地投資要理性，不要認為自己能做到不能做到的事。

我只知道，長期佢會慢慢上升至$100以上，但好多野無得估的。

------------------------------------------------

Q20756：

龔sir 想請教你 我31，岩岩學識玩股票 買左3800 3067 可以提供一下意見嗎？

我追緊你YouTube 爬反文 因為我想35歲擁50萬 但好似好遙遠 因為只有4年時間...

而我收入大概16k 暫時未有咩負擔 但個個月卡數都過萬

我準備實行你教既方法 吾碌卡 全現金同埋買豬仔錢罌 希望龔sir可以比到意見

龔成老師：

安碩恒生科技（3067），有長線投資價值。適合你年齡。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

保利協鑫能源（3800）業務不穩，質素中等。

佢主要為光伏行業製造多晶硅及硅片；銷售電力；開發、投資、管理及營運光伏項目。

市場炒緊佢前景，但當中存有不確定性，股價大上大落，佢的確可能會大升，但同樣可以大跌，無得估，這炒作不少，現時值博率未算好高。

如果真的想投資，小小注好了。

你如果想完成$50萬目標，第一，唔用信用卡，同時要減少支出，你要盡快累積基本的本金先，否則根本唔會有錢去滾大財富。

第二，要想方法開發收入，你現時31歲，其實事業有發展，要想想長遠提高收入，發展你事業的方法！

第三，要開始投資，你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

------------------------------------------------

Q20757：

龔sir你好，最近開始想學習下投資
我宜家27歲，做左都7年野
宜家月入3萬，有30萬現金

想問下如果要睇書應該睇邊啲，唔知道應該點樣開始，又唔知買嘅話啲資金應該點分配，身邊嘅朋友都係短炒嘅多，冇乜投資經驗問唔到佢哋意見

另外上堂學嘅野同你啲書嘅內容一唔一樣？

龔成老師：

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

如果你不懂選股，就投資ETF，如盈富（2800）、恆生科指ETF（3067）。

不過最初唔好用太多現金。

有9成散戶都是短炒的，所以你朋友短炒是正確。不過，全球日賺錢的投資者巴菲特，佢是反對短炒，並用70年去證明長線最賺錢。你可以想想，應該跟那一個。

課堂大部分內容，都是無在書講過的，而一些實戰，更具體的投資技巧，都只會有課堂講述。

例如企業估值技巧、5種選股模式、選股程式的具體應用、年報分析的實戰技巧，同時會派一份6頁紙的「企業評估表」給學員，令你可以自行為企業進行有系統的質素評分。

你可以當書只是頭1、2堂的入門部分。

------------------------------------------------

Q20758：

你好龔成老師，經朋友介紹開始留意你既Facebook專頁，有追番之前你寫既post同讀者問答信箱，好欣賞你既才華，發現你寫既書同比讀者既建議真係好貼地！

以下有小小問題想請教老師，我今年29歲，年半前開始學買股票，盲中中就買左d銀行股，諗住有息收又不會有太大風險

但發現呢類銀行股買左一段時間都無咩起息。希望老師幫我分析一下現有組合，應該繼續持有還是要沽出？

或可以推介一下有邊類型股票適合我重新配置我的股票組合（月入2萬，月儲蓄8千，無供緊樓，現階段有5萬流動現金可作其他投資）

現股票組合如下：
005*800 @50.7
1288*10000 @3.48
3988*15000 @3.6
1810*1000 @29.45
7500*3000 @5.815

龔成老師：

你現時持有3隻銀行股，這幾隻不是無質素，但未必適合你。

以中行（3988）來說，由於內地經濟無過往年代咁強，股價無過往咁好，由中美貿易戰開始，中國的經濟動力已有所減少，加上最近的疫情，都是影響經濟的因素。不過，初步已好轉，但不是高增長型。

現價合理區中間，這股收息可以，但就唔好對股價有太大期望。

幾隻銀行股都有類似情況，以收息為主，增長力不強，但不是無質素。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

所以你這年齡，未必適合。

另外，你同時持有3隻，這會出現行業集中風險，你要注意翻。

ＦＩ二南方恒指（7500）產品之投資目標為追踪恒生指數每日兩倍反向表現（－２ｘ）的投資業績。好難玩，唔建議你投資。

小米（1810）你可長線，但預佢短期股價會好波動。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

$30萬，暫時可動用$10萬-$15萬。

平穩增長股：潛力股
7：3
（如果你投資實力較強，可增加潛力股比例）

平穩增長股：考慮盈富（2800）。

另外再加1、2隻（每隻$1500）：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

潛力股：安碩恆生科技ETF（3067）

另外再加：阿里（9988）、騰訊（0700）、港交所（0388）、舜宇光學（2382）、小米（1810）、ＧＸ中國電車基金（2845）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

現時大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q20759：

龔成sir，我父母有廿萬現金存款，但都沒有工作，我每月家用俾佢哋有$13000，佢哋只會存現金，沒有投資概念。

我最近計劃每月用$4000供股，為佢哋未來打算
$2000 領展
$2000 盈富

是否一個理想組合而又較為平穩？
想聽聽你意見
多謝

龔成老師：

$2000 領展
$2000 盈富

可以，你可以長期進行，都是適合的投資。

至於$20萬，其實可以動用部分去投資收息股。

你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

這些都是股價上落唔算大，有穩定派息的股票。

------------------------------------------------

Q20760：

你好呀龔sir
呢排心情有d亂

現持有
9618 @50 356入
1398 @2000 5.1入
1024 @100 392.2入
3690 @100 410.6入
1833 @100 122入
1810 @400 27.95入
1 @500 52.9入

應否止蝕放1024和3690？
溝貨的話又沒有那麼多可動資金

龔成老師：

上述持有的，基本上都是有質素的，但新經濟股你的買入價都貴，建議你日後用分注或月供模式去投資。同時，你組合的比例較多在新經濟類股，風險平衡度不足。

1、1398無問題。

9618、1810，業務穩健，只是買入價少少貴，平常心睇股價就得。你預佢中短期股價都會波動。

1024、3690、1833，有潛力的，但之前都處明顯貴的水平，就算近期回落都略貴，不過，業務有增長力，只是估值的問題。如果你持有過量，可能要減少少，但如果不多，就守住先，不過要有心理準備股價好波動。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。