【龔成問答信箱】（Q21721-Q21740）

Q21721：

龔sir,你好
想請教下如何有效咁儲錢

我人工只有17000
分期還緊卡數，
找完數每個月只剩下3000蚊

每個月都清，儲唔到錢
如何可以處理現況，或增值儲錢方法？

沒有任何投資經驗
謝謝

龔成老師：

第一，你要定目標，如果無目標，就無動力去做。不用太誇張，但就要適合自己，例如一年儲$50000，5年儲$50萬等。

第二，減少用信用卡。

第三，習慣每天記低花了多少錢，不是要求你不花錢，而是要知。

第四，分清想要同需要。

第五，如果你本身自控能力較弱，可參加銀行、保險公司，月供基金、月供儲錢、月供股票等計劃。

就算每月只供$2000，長遠都能累少成多的。

你可以睇我的書《80後百萬富翁》，適合你的。

------------------------------------------------

Q21722：

龔成老師，老公最近係書局睇到你既書，買了回來，覺得好大啓發同鼓勵，謝謝你！

我地剛結婚，而家有地方住，但因長遠想有小朋友所以想地方大啲，諗緊買樓，想請教一下你的意見：

老公同佢屋企大概有350萬首期，我自己就大概有80萬資金，我地一年前開始睇樓，但因為疫情反覆加上老公轉工，一直未决定到點買同買咩，而呢段時間樓巿都升了不少；

老公黎緊7月會返新工，我地呢排都睇緊樓；

你覺得我地應該進取啲買9xx萬既樓，定保守啲老公買7xx萬的，我自己則另外搵細價樓（如500萬下）投資？

另外因為老公7月先返新工，你覺得係咪應等到下半年先買？不過近來樓巿交投暢旺，下半年會否要更貴？

抱歉問了很多問題，謝謝你！

龔成老師︰

由於你地現時有地方住，距離你實際需要目標新屋，其實都有一定時間去準備，所以唔需要急。

目標係"9XX萬的自住物業"，定係"7XX萬的自住物業 + 5XX萬收租樓"，我會偏向前者。

我地做決定時，要考慮成個財富組合的配置，如果你係"自住物業 + 收租樓"，你成個組合會偏左係物業類。

當樓市出大問題時，你成個財富組合，會有嚴重影響。這不是價格，或者配搭上考慮，要係講成個財富組合的平衡性。

因此，你應該係置業之餘，都要同時留有一定股票，進行財富增值，成個財富組合才算健康。

由於有一定時間去準備，你可以先用一半資金，去投資優質股作增值。

你可以投資「平穏增長股」和「潛力股」。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

現時大市只在合理區，你可以先用一半資，分注買入上述股票。餘下一半，我地就等機會，當大市出現較大回調，就加大力度掃貨。

此期間，若你發現合適單位，價格又唔錯，而且你們有信心，長線都係「供得起」，就可以考慮動用這筆資金入市。

------------------------------------------------

Q21723：

龔成老師你好：我就尼26歲，女，月入扣除強積金供款約$40000，每月俾父母家用共$10000

月供$2000儲蓄保險，供左1年，仲要供多4年

月供2份住院保險共$3300，供10-15年後可全數本金取回$515000

銀行存款約港幣$60萬，另有價值共$13萬的外滙

有一份現值$115000的派息基金，每月約派息$670

想投資一個$250萬的為於大角咀的新工廠大廈單位，你認為好不好？只係比較擔心樓價會跌。

如果唔好，你認為投資咩最好？月供股票？

你覺得依家適唔適合買樓？

同埋我已經幫父母買哂醫保，將來即使有健康問題都不太擔心醫療費用，我亦暫時未有結婚念頭。

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你26歲年紀計，你應該先做好增值部份。

"保險"只係理財中防守部份，買足夠保障就可以，增值可以留比優質資產(如優質股、物業等)去做。

現有儲蓄保險，你可以保留，但未來唔建議再投資太多這類儲蓄產品，因為會拖低你財富增長力。

13萬的外滙，你可以睇翻有無實際用途，如果無，你可以換回港幣去投資。

至於基金，暫時派息率都可以。但要了解清楚，這個派息率是否保證。同時，你個基金會唔會出現"賺息蝕價"的情況，才決定是否持有。

其實工廈，近年的回報率不高，投資價值只屬中等。投資與否，你應睇翻佢租金回報率，來作決定。

另外，近期興起的在家工作模式，有機會影響到工廈、寫字樓等的潛在需求。影響有大，係一個未知之數，但會多左一個潛在風險。

現時從投資角度出發，整體上投資股市，相對投資樓市，值博率會係較高。

當然，如果你這個工廈，係肯定租金回報率較高，又有升值潛力，其實都可考慮。

否則，我建議你月供和現有資金，去投資優質股，咁會較好。

策略上，你可以投資「平穏增長股」和「潛力股」。你每月5成儲蓄，其餘先儲起，用一邊月供一邊儲蓄的策略。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

大市現處於合理水平，那60萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

------------------------------------------------

Q21724：

龔sir你好，以前無意中發現你的專頁，就一直keep住follow，最近幾個月將你的所有書都買曬返屋企了，之後要逐本睇曬佢~

因為我對理財投資係完全零認識，所以我亦買曬全套的富爸爸窮爸爸，唸住睇曬先再睇你的書，起碼有d底先，再睇投資類畫會好d。

見到你都會有解答讀者的一些問題，就睇下我會唔會咁好彩，你會見到我message~

本人29歲，以前係做會展, event類工作的，都唔知好彩定唔好彩，2年前轉行做了department admin, 一過試用期就疫症，

眼見好多同行都失業或者停薪留職無工開，我唸我都算好彩。。。但呢個位係死位，無人工加無職升，除非跟大圍每年幾幾％，如果唔係都唔會有調整0

。好多熟d的director 都同我講，有得走就好走，呢個係死位。。 同埋覺得呢份工真係唔適合我，做左2年都係覺得好辛苦，好頹，

甚至1年前因工作而抑鬱而差d自尋短見，d人成日羨慕我份工咁hea唔洗做福利又好，但我真係覺得好辛苦，無成就感，無嘢係我負責的感覺好唔鐘意，

如果我係有家庭或等退休，咁呢份係絕世好工。。。有試過搵工，但依家個market好似無咩地方請人。。 同埋最驚係，再遲d 過慣退休生活，會出唔返去。。

連我男朋友都話我似足佢退休ge阿媽。。因為我日日真係唔洗用腦，唔洗點做嘢，返去坐。。。同埋連自己都覺得，真係蠢左。。。哥下先恐怖。。

以下係本人財務訊息：

資產：
現金：月光族，銀行永遠只keep有3000現金
儲蓄保險 100,000 (一筆過，不用供，現每年收息，約4％)

收入：18k (1k公積金，實可支配現金17k)

支出：
保險：2,000
固定費用：1,000
家用：3,000

儲蓄：
定期: 1200
月供基金 (富蘭克林科技基金): 1200

負債：40,000 (信用卡分期, 每月還3,000)

以前只要儲到錢，就會用黎去旅行去，所以依家基本上都無咩儲到錢，自覺出年已29＋1。。先發現財政狀況實在可怕，但感到唔知點算好。。。。

因為現時財政係負債緊，亦唔敢轉工。。。因為依家有醫療福利，交通津貼，食飯津貼。。 但真係好辛苦，好驚自己會抑鬱落去。。但又唔敢辭職。。

希望參考下龔sir你的意見。謝謝。

龔成老師︰

基本上，我99%留言都會回覆，想盡量珍惜大家互動溝通機會。但由於近排比較多讀者發問，所以最少都要好幾日，先至可以回應到。

睇完你的留意，我覺得你係一個成熟的人，很會為自己長遠作打算。

我相信你對前途，已經係有一個想法。只是礙於現時疫情，再加上現有債務上負擔，令你唔敢去改變現狀。這一點，係完全可以理解。

的確，現時求職市場唔係咁理想，你而一刻去作出改變，風險會唔細。但我地唔係無野可以做，你可以想清楚，自己未來10年、20年的路。

我地唔係要而一刻，立即全面去改變。但我地可以為未來去準備和舖路，等待時機出現，我地就可以更有效率和本錢地，作出行動。

例如，你要學什麼野技能，才可以做到心目中的理想工作。你可以先去讀相關課程，甚至去做這類型工作的兼職、問下這方面有經驗架朋友，去一步步行近自己目標。

記住，我地係要睇長線，只係對長線發展有利，短期可能人工較低架工作機會，我地都應該要考慮。

至於你財富增值方面，你要先處理好信用咭負債部份，因為佢利息好高，會拖垮你投資回報。

同時，你要努力去審視自已開支，睇下有無地方可以節省，盡力每月空出一點資金，去做月供股票，去進行財富增值。

另外，"保險"只係理財中防守部份，買足夠保障就可以，增值可以留比優質資產(如優質股、物業等)去做。

已一筆過交付的儲蓄保，你可以保留。但未來唔好再投放太多資金在儲蓄保險，因為會減弱你財富增值能力。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時29歲去計，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

定期這類定息產品，無乜增長力，唔適合你。

基金你可持有，但必需了解當中持股(最少要了解10大持股)，是否優質和有增長潛力。

投資策略上，你可以在處理好咭數後，投資「平穏增長股」和「潛力股」。你每月5成儲蓄，其餘先儲起，用一邊月供一邊儲蓄的策略。

選股上，你可以投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

餘下的另一半現金，我地就等機會，當大市出現較大回調，就加大力度掃貨，然後作長線投資。

書本上，你可以先睇我寫架"80後百萬富翁"、"財務自由行"和"股票勝經"，會較適合你這類的初學者。

記住，世上沒有問題解決不了，只要你不放棄，總會在不同地方，找到一條適合你自己的出路，加油。

------------------------------------------------

Q21725：

老師你好，近日睇完你新作，同埋睇左好多有關吸引力法則既書。我知道要盡快行動！

我根據自己既專業成立左一個專頁，目的系分享，希望做第一步。唔知老師有冇咩提議呢？

因為專頁會叫你俾錢做宣傳，想問下老師一開始整專頁時有冇咁做呢？

龔成老師︰

其實整專頁，同做生意一樣。

除左你要比人睇到你的專業外，這個專頁對讀者有無創造價值，令讀者可以從中獲益。

另外，你要突出你個專頁獨特之處，跟其他競爭對手，有什麼不同，為什麼要睇你，唔睇其他人。

你從讀者方向去想，怎樣才會造成雙嬴，人流就會自然增多。

我最初無特別比錢做宣傳的，之後就有。

你最初可以透過身邊人去做宣傳，叫佢地幫手，同時初期你可以問翻身邊人意見，睇下點樣先較受歡迎。你要找市場歡迎的，不是自己盲目比資訊出去。

------------------------------------------------

Q21726：

龔sir，一直有留意你嘅文章，有東西想請教。本人37歲，月入10萬左右，扣除各方開支，月儲2萬左右（其中1萬會預留交稅）。現想找方法投資，希望60歲退休每月有3萬蚊息收下。

1. 想過月供股票，但亦有聽過，其實月供股票到最尾係會輸錢/回報十分低。比如說，2015年到2020年，如月2800，其實際回報只低於3％。如果係咁，有乜方法建議呢？

2. 如月供股票可很，想請教有關組合及操作方式。
謝謝

龔成老師：

1）月供股票是一個穩陣的方法，但的確不是最高回報的方法，但我一向會建議初階者先月供，因為初階者根本無法把握買賣時機及企業估值，如果做錯決定，就會有負回報。

因此，我建議你每做月供，每月$1萬，同時學投資知識，到了有一定的投資知識，就不用月供。

至於選股，最初你可以選ETF，如2800、3067，到你有一定的投資知識，就可自行選股。

2）簡單來說，月供股票就是你每月將現金，買入某一隻或多隻股票，慢慢咁樣儲貨。坊間不少銀行都有提供月供股票服務，你先開證券戶口，然後登記做月供股票。

形式就是每月投入相同的金額，買入同一隻或多隻股票，並持續進行。

例如，每月以相同金額$10,000 買入盈富基金（2800），假設第一個月股價為$25，就能買入400股；第二個月升至$35，就能買入286 股；第三個月跌回$30，就能買入333股。

總結這三個月，投入了的資金為$30,000，累積股票為1019股，平均買入價為$29.4。

由於月供股票每月投入的金額相同，因此當股價上升時，買入的股數自然減少，而當股價下跌時，就自然會買入較多股數，如同自行調節一樣。

要注意的是，由於每月持續投入資金，因此一定要選優質股，長線投資，同時要以儲股票的概念進行，最少持續供3 年以上，之後持有5年以上。

月供最重要的一點，是「選股」，如果你無選股能力，就投資ETF，如盈富。

------------------------------------------------

Q21727：

老師你好，首先多謝你，我跟你價值投資法，購入6隻股票，只有一隻9988未賺錢，不過我會strong hold！

今次有幾個問題想問，我覺得電動車係黎緊大趨勢，想問你有無電動車股推介？之前你推介過的2845好似現價略貴？

另外請問吉利汽車現價處於合理區嗎？
謝謝

龔成老師：

現時電動車的佔比仍好少，而這是大方向，因此仍有一定的潛力。

GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

此股現價合理區頂至略貴。無貨可以現時入少少，到有明顯回調才再慢慢加注。

潛力度是有的，但會比較波動，如投資宜慢慢分注，可長線。

吉利(0175)本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。

另外，佢早前杭州灣新工廠正式發布純電動新品牌新車「極氪（ＺＥＥＫＲ）００１」，宣布吉利進軍高端電動車。

這些動作不單有利佢有中國發展，同時長遠，可能加快了海外發展速度。因此，這股長遠仍是正面的。

現時價位在合理區中上部，股價波動，有貨可長線。如果現價入貨，小注都得。

------------------------------------------------

Q21728：

龔成老師，多謝你回覆，我係依幾個月入左少量股票如下:

3067~600股@18.24
1177~4000股@7.905
0066~500股@43.7
0014~1000股@29.2
2800~545股 (月供)
0027~43股 (月供)

現正打算月供3000蚊0027，3000蚊1810，請問會唔會太散亂？

本人年紀30中，另外打算再投資多10萬蚊落股票，請問點樣配置會比較好？謝謝你無私分享

龔成老師：

唔會亂，你上述持有的，都是有質素的股票，同時隻數不過多，你預一般組合，10隻股票都可以的，反而過份集中一隻股，會出現集中風險。

上述都是有質素的股票，可長線持有。

而你的年齡，可投資潛力股+平穩增長股，如果你有實力，潛力股可較多，若實力不足，潛力股不宜過半

你月供的兩隻股，無問題，可以長期進行，當然，如果想組合更加平衡，就加入ETF，如盈富（2800）、恆生科指ETF（3067）。

至於$10萬，你要留有一定的現金，餘下可考慮盈富（2800）、恆生科指ETF（3067）、港鐵（0066）、中國電車基金（2845）。

------------------------------------------------

Q21729：

龔Sir您好：經過了3個多月的新手學習(不斷睇你的FB和讀你的書)，慢慢有了基本的投資概念，現時手頭上有的股票：

銀河 71.35x27股
比亞迪電子 45.1x43股
領展 68.6x100股
比亞迪 208.6x9股

舜宇光學 181.4x10股
盈富 29.4394x163股
GX中國電車 114x50股
安碩 18.8619x2400股

老師，請問安碩會否過於集中，而其他又太零散呢？有什麼建議可以給我嗎？

龔成老師：

你持有的股票，基本上都是有質素的，但就有幾個問題。

第一，部分股價在貴的價位買入，反映你未有企業價值概念，建議你加強這方面的學習，同時，在未掌握前，多用分注、月供等這類方法，將買入價平均，能有效減少你一次過在高位買入的風險。

第二，潛力股都佔了一定比例，潛力股長遠當然對我地財富有較好回報，但同時要求你的投資實力較高，因此，暫時潛力股比例，不宜過多。

第三，你部分有集中行業風險情況，例如電動車及手機相關，佔了一定的比例，你日後要注意翻。

至於你所講的安碩集中情況，問題不大。而整個組合不算散。

你要同時留有現金，唔好太快去一次過買入太多股票，慢慢立一個長遠平衡的組合。

------------------------------------------------

Q21730：

成哥你好，有個有關失業貸款嘅問題想問你，希望可以得到解答

小弟今年廿中，雖然我而家失業但我之前都儲左筆錢可以應付到一段時間嘅生活，最近政府出左個失業貸款年利率1%好似幾吸引咁，可以分6年還錢，如果我申請到失業貸款再將呢筆錢放落股票市場會唔會係一個明智嘅方法？

如果我拎呢筆錢拎黎買美股voo（因為呢筆錢係借所以揀呢個風險最低嘅黎投資），根據數據一年平均都有1x%嘅增長

變左我可以將呢筆錢去增加我嘅現金流/總資產，而且在預定還款期末或之前還清全部貸款和利息後。

龔成老師：

唔建議。

其實你這樣即是借貸投資，雖然利息低，但始終借貸投資都是有風險的，加上你本身無收入，如果投資不幸出現損失，對你的影響會好大。

美股VOO，近年回報的確不差，但你不能以這數據去推算往後都不錯，現時美股唔平，如果出現較大調整，對你不利。

另外，借貸投資只合高階投資者，因此如果實力未到最強，暫時就不要動用。

同時，借貸投資只會在市況好平，及恐慌期才會動用，而這刻，並不算。

------------------------------------------------

Q21731：

龔Sir之前抽中一手百度50股，但一直跌，点算好

仲有阿里巴巴$271買入300股，都係咁跌，点算好

麻煩龔sir有時間回覆，感謝

龔成老師︰

百度(9888)為全球最大的中文搜索引擎，是內地用家搜尋資訊主要對口，2019年百度用户規模突破10億，而百度App日活潑用户2億，信息流位居中國第一。

當你坐擁不少資訊和客戶群，就可以利用佢地去發展很多不同業務。

百度在規模和質素上係有，但你預佢中短期會較波動。現貨若佔組合不多，唔需要太過擔心，一直持有就可以。

阿里巴巴(9988)近期面對內地監管可能收緊，風險度增加左，令佢出現波動。

但內地唔係想佢唔賺錢，只係想規管佢。由於佢本身己建立一個完善的業務，因此本身是無得輸，只是賺多賺少架問題。

此股質素依然存在，但你預佢增在力會弱左。你買入價係略貴，但唔算好多，現貨可長線持有。

------------------------------------------------

Q21732：

阿sir 你好，參考左你之前嘅意見，最近開始左月供股票，加上上緊股票班中，上你堂好開心，學好多野，整理左自己嘅投資組合：

基本資料27歲，月薪$4萬，現時每月儲蓄2萬（因上股票班時你建議最好儲蓄人工嘅一半，就唯有慳啲）現有15萬現金，及10萬股票，希望3年後100萬，目標買樓。

月供股票$8000:
盈富基金：$3000
領展 ：$2000
阿里巴巴：$2000

之前買左：
盈富基金： $ 24.3 ，1500
海吉亞： $65 ,800
東京健康：$157， 300

希望阿sir 可比少少意見，謝謝！

龔成老師：

現時你方向正確，你27歲，是累積財富的黃金期，所以努力儲蓄，把握機會投資增值，絕對有價值的。

我相信你要3年後完成目標，絕對有可能。

但要留意，由於你打算3年買樓，因此投資時間唔算好長，你最好不要100%投資潛力類企業（因為這些公司增長需時）。

另外，到你接近買樓的6-12個月，就要開始賣股票，為資金作出準備，因此，你其實投資的年期唔算長。

現時你持有的，其實都是有質素的股票，海吉亞醫療（6078）以腫瘤科為主的醫療機構，主要在中國經營醫院業務、第三方放療業務和醫院托管業務。

此股上市不久，故很難估值，而且要時間才可以慢慢見倒真章。

2019年盈利約0.4億，但市值去到300億。初步睇佢股價在一個十分高水平，所以風險不少。如果投資，小注好了。

其實現時組合無乜問題，最重要是你之後的配置，要考慮翻我上述所講，因為買樓的因素，而不要太過進取。

------------------------------------------------

Q21733：

您好，本人年41歲，月入25000元 + 兼職 12000元至 13500元 （未扣除MPF）。月供股票：港燈2000元．盈富基金6000元、港鐵2000元及恆基 4000元，由去年12月開始月供，加上其他股票，合共超過170000元。

另外持有現金480000元，每月可儲蓄超過一半。內地有物業，正等待通關後出售後可得到大約100萬港元。

由於本人和丈夫在香港沒有物業，居所是奶奶提供，其實沒有迫切自住需要，究竟我拿著資金，應該置業放租 / 投資？ 還是繼續投資股票 / 收息股票?

丈夫他53歲，也有100多萬現金，他最近改變主意，覺得沒有下一代，買房子日後無人繼承，不如手持現金? 但我又不認同，覺得是投資工具嘛，或是購買車位也可以考慮。

龔成老師：

其實你最重要的，就是財富的配置，物業、股票、銀行產品、現金等，都是配置的其中一部分。

由於你地無自住需要，因此，物業對你地來說，是一個投資工具，雖然可作為財富配置的其中一部分，不過，如果以現時香港樓的投資值博率計，只是一般。

不是無投資價值，但如果從長遠的增長力來說，投資股票會較好。

因此，這刻可以先投資股票，令財富增值，但不代表不能投資物業，若然樓市出現下跌，有一定的投資吸引力，都可以考慮。

另外，我地進行財富配置，—平衡都是一個因素，因此你若果股票比例較多，而你有較多資金想投資物業，這方向其實都可以，但就不一定好急去進行。

------------------------------------------------

Q21734：

你好呀，龔成老師，我想買隻高息股，考慮緊中石化、中海油、農業銀行、中國電力，請問可以比啲意見我邊隻比較前景/增長力，現價入唔入得過？

謝謝

龔成老師：

其實上述的，都是可考慮的收息股，我會建議你建立一個組合，唔好單考慮一隻。

中國電力（2380）、中石化（0386）、農行（1288）都可以的。現價合理的。

另外，你可以可考慮港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

------------------------------------------------

Q21735：

你好,龔成老師
本人今年28歲，上個月剛開始月供股票
$2000 恆基
$2000 盈富
$2000 騰訊

另外，有基金$50000
上年ibond 3手
儲蓄保險供左$100000
住院保供左$100000
儲蓄約有$500000
月入$50000

今個月開始見到股價回落，尤其騰訊，之前見股價跌，我又諗緊入唔入，但我其實本身已經月供緊

我應該加入咩股票月供好，但諗過港燈收息都好
唔該老師

龔成老師：

你現時持有太多防守性工具，以28歲來說，未必好適合。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

在理財上，當然要攻守兼備，但守的部分，其實不用太多，你ibond、現金都太多，而保險如果有需要，則無問題。

騰訊（0700）有質素，有發展力的。佢最有價值的，就是「平台」，這亦是現世代好有發展的資產。

佢業務模式係提供平台，如通訊平台、交易平台、入門網站、遊戲平台等，而收入來源則是其廷伸的服務，如增值服務、網絡廣告、電子商務交易等。

過往的業績十分理想，又身處高增長的行業，加上擁有重要的資產，即龐大的客戶群，將來發展各業務都有相當的優勢，這都是騰訊值錢的地方。

現價合理區頂，小注或月供可以。你唔好買入得太急，保持月供就得，除非有更大回落，先考慮一手手去加注。

至於港燈（2638），並不是對你最理想的投資。

由於你投資知識不算高，建議你加大月供至$20000一個月，但暫時就不用一手手去買入股票。

除了上述原有的股票，可加大金額去供外，你同時可以加入優質的平穩增長股，及潛力股，去長期月供。

------------------------------------------------

Q21736：

老師，我又有野想請教你了
本身12.9 入左一手00270
想問依隻是否適合月供？

我見佢現在價位長期處於11個幾，我地揀月供係咪要揀依d無咁大上大落既股票？

但我有追開你fb ,我諗住月供1211 ，每月2000蚊，但見佢股價又上返150蚊 ，想問而家開唔開始月供好？

我現在32歲，有一個小朋友，穩定工作
以下是我的投資組合

00978 20000股
00005 2400股
00012 3000股
01816 30000股

00548 6000股
01038 1000股
00939 7000股
00435 10000股

00386 10000股
02689 2000股
00006 500股
00270 2000股
00175 1000股
00778 2000股

我想加d潛力股，所以已set好下個月開始月供1211，每月2000蚊，想問埋現在可否月供阿里1000蚊？ 唔該晒老師

龔成老師：

月供股票，最重要是供一些「優質股」，不用刻意供一些無大上大落的，粵海（0270）、比亞迪（1211）你都可以供，至於供那一隻，就要睇翻你自己的風險承受能力，以及投資配置。

記住，月供是長期的，是一個持續儲貨的狀態，因此不用理短期股價。

比亞迪只要你月供金額不過多，都可以供的。至於阿里（9988），都可月供的。

至於你現時持有的股票，大部分都是有質素的，但增長力的確不強。你可以加入一些潛力股，最簡單是分注投資：安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

這基金上落較大，現價大約在合理區頂，因此，這刻不能大注投資。

最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

至於現時持有，增長力較低的股，如一些收息類股，其實可以減部分。

------------------------------------------------

Q21737：

你好龔sir，我同太太現時30歲，共月入$6萬，餘下儲蓄都用作月供股票。已購入一自住物業，按揭還款尚欠$693萬，每月大約還$24500。持有現金$110萬，另持有大約$30萬股票，詳細持貨如下:

心通醫療 2000股x$15.26
金沙中國 800股x$32.8
完美醫療 8000股x$2.86
阿里巴巴100股x$216.8
水發興業能源 6000股x$3.44

萬國數據200股x$81.8
福壽園2000股x$7.43
富力地產1200股x$9.6
同仁堂2000股x$5.46
比亞迪111股x$80
平安好醫生100股x$87.5

另外月供緊以下股票每隻$3000，現時持有:

銀河447股x$60
領展403股x$66.2
中生3347股x$7.38
盈富997股x$27

我有以下問題想請教:

1. 負債比率是否過高？應唔應該加快還款？

2. 下個目標係想買第二個物業收租，但如何係高負債下做到？

3. 股票組合是否太分散？有冇咩要執？

4. 110萬現金現時存放在mortgage link，應如何使用？

5. 如果想10年內財務自由有可能嗎？現時有咩可以做？

唔好意思問題比較多，多謝你耐心解答

龔成老師：

1）要睇你物業價值。

除非你較高位買物業，否則，以你現時的整個財務情況計，應該問題不大，你30歲，可承受風險，同時現時低息環境，你還錢不一定有利。

2）如果太急買第二個物業，就會令你過度集中在物業比例，以及令你負債太高。所以，暫時建議你以股票等資產去累積財富，到你有一定的股票比例，到時再將部分轉去物業，就較平衡。

如果要做高負債，其實唔建議，如果真的要做，就要同另一人名買樓及有足夠的收入做按揭。

3）勉強可以，建議你唔好太心急買一些上市不久的股票，除非有較大的獨特性及優質度。

現時月供的，可保持進行。

4）可以將其中$30萬-$50萬，投資優質股，善用現金，以你的年齡，其實可投資一定的潛力股比例。

5）當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你可以加入一些潛力股：安碩恆生科技ETF（3067）

另外再加：阿里（9988）、騰訊（0700）、港交所（0388）、舜宇光學（2382）、小米（1810）、ＧＸ中國電車基金（2845）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

------------------------------------------------

Q21738：

龔Sir你好，本人38歲，已婚，有兩個小朋友，一個4歲，一個快1歲。 每月家庭收入8萬幾，開支大約4~5萬，現金200萬，定期 50萬，另持有以下股票：

2800 x 2500股 ($25)
1299 x 200股 ($79.5)
2638 x 6000股 ($7.9)
3918 x 4000股 ($8)
3067 x 300股 ($15.92)

近半年睇你facebook 後開始知道投資的重要性，過往都係持有現金/做定期。

希望55歲退休，到時每月能夠有4~5萬生活費。請問以我而家既狀況有機會/ 點先可以達到？係咪需要放多d 資金去投資？如果係，請問咩投資組合適合？

開始明白投資心態的重要性，有基本會計知識，不過投資上就係初哥，請問邊本書適合睇？

而家習慣每日起身睇你專頁，漸漸被您既正能量感染，感謝您！

龔Sir, 另外，仲想幫兩個小朋友做投資，請問係咪應該月供2800?

謝謝您


龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時38歲去計，應先努力做好增值部份。定期這類定息產品，不適合你年紀。

另外，持股中的港燈(2638)是收息股，增長力好弱﹐都不宜持有太多。

未來投資，你可以集中在「平穏增長股」和「潛力股」。你每月5成儲蓄，其餘先儲起，用一邊月供一邊儲蓄的策略。

由於你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。到你有一定投資經驗﹐潛力股比重才慢慢調升至約3-5成。

現時大市只是合理區，你現有250萬資金可以先投入約50-80萬，用"分注"形式，慢慢買貨。餘下資金和每月所儲倒的資金，就等大市出現較大調整，才慢慢大力度掃貨，然後長線投資。

如果你希望55歲退休後，每月有5萬蚊現金流，以股息率6%計，你需要本金1,000萬。

我假設投資回報有10%（連股息再投資），你每月投資$30000 + 250萬本金，14年後大約會增值至1900萬，故相信以上安排，很大機會達至你的財務目標。

書本上，我建議你先我寫架"80後百萬富翁"、"財務自由行"和"股票勝經"，會適合初學者。

而小朋友增值部份，由於佢地還很年幼，可增值時間較長，故計劃上會相對簡單。

你可以幫佢地儲盈富(2800)，佢係包括55間質素不錯上市公司股票的組合，有一定增長力。

若你想增長力較高，可以儲安碩恒生科技(3067)。但此股波動性會較大，要睇翻你自已風險承受能力。

基本上，以你小朋友年紀計，持有以上2隻股票都係可以，但你明白當中風險。

------------------------------------------------

Q21739：

男神，我去咗國外先留意到你既專頁，想報你啲班都無機會住，書又買唔到，而家只可以叫朋友買完寄比我

我想問吓，我有一百萬現金，應該點分配可以做到目標五年翻五倍？

仲有想問吓你對中國鐵塔同埋中國移動有咩睇法？ 好似見你比較少提呢兩隻

我中國鐵塔$2入咗， 去到2.2無放就擺到而家

請指教指教

龔成老師︰

我地做財富增值，一般希望做到架合理回報，係每年增長10-15%。你現時這個目標五年翻五倍，用股票投資去做，風險會好大，較難達到。

如果你無其他增值方法，建議你按部就班，透過月供和買入優質股，去為自已資產作增值。

中國鐵塔（0788）不是無質素的。始終中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入都增長，盈利都保持向上，但增長比之前略減，加上股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。

這股算是合理價。雖然你買入價偏貴，但此股有質素，你可以守。這股長遠仍算有發展力，不過，潛力度比過往略減，要回到你買入價，相信要點耐性。

中移動（0941）都質素的，5G雖然對佢有正面影響，不過，中國政府希望相關費用不會太貴，令資訊流通更好便利，所以，對佢的賺錢能力方面，未必能帶來突破性的增長。

可視佢為收息股，增長力不算強，較適合年長或好守的投資者。這股有長線投資價值﹐現價合理，可以分注。。

------------------------------------------------

Q21740：

你好, 龔 sir, 我係你既學生, 想問下關於睇年報既問題, 岩岩睇2800(盈富基金)既年報, 有小小問題想問:

1. 點樣分析盈富基金? (我見佢唔會有市盈率/ 市賬率呢類資訊)

2. 呢類基金係用咩方式黎做估值

3. 見佢全年係虧損, 咁會唔會影響對佢既估值?

4. 係年報 P.19 (投資淨(虧損)/收益呢部份, (未變現投資收益之變動) - 意思係咪即係手持而未賣出之股票既市價減去購入價之賬面上既利潤?

5. 另外, 龔 sir, 我岩岩嘗試做 303(VTECH) 既分析, 但我搵唔到相關行業既競爭對手做比較, 咁我係咪只可以用返佢過往數據黎做分析?

感激回答!!

龔成老師︰

1) 盈富基金(2800)就係追蹤恆指，所以你用大市水平，去評估佢平貴就可以。

以往市盈率大約10倍開始平，但由於近期成份股加入不少新經濟股，故要上調少少，大約13.5倍開始算平。

2) ETF你可以用返佢追蹤的指數，去參考平貴。好似盈富基金(2800)，你就要睇恆指水平。

當你分析時，你不應集中分析盈富的報表，而是分析恆生指數，了解恆指平貴，又或以盈富頭10大持股，去計算這些企業的估值，從而計算翻恆指平貴（當然，這只是一個參考方法。

3) 佢係一籃子的企業，分析時唔可以好似一般企業咁，睇個損益表。這類ETF，你直接用佢相對指數，去做估值就可以。

盈富報表所顯示的，只是一些會計上報表問題，你不用分析。

4) 你可以簡單理解為，佢組合中持有或已賣出的股票價值變動。但我地分析盈富基金(2800)價值時，這個不是重點。

5) 如果無直接競爭對手，可以作比對。我地就用佢過去數據來分析，但你都要留意，大環境有無改變。如果無大變，過去數據才有參考價值。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21041-Q21060）

Q21041：

老師，比亞迪電子
由幾個月38.8買入到而家冇放到
近期回到接近我買既價
我想知我應吾應該繼續持有

由60見到佢跌到而家
個心好累

係咪我太貪心以為佢會繼續升
定係e個就係價值投資要經歷既過程？

龔成老師：

其實買股票，是好正常的，我隻1211，10年前，都由$10上到$88，跌翻去$12，之後先慢慢上，睇住自己身家幾百萬上落（當時我仍打緊工，$1萬人工）

成功投資者，就要有好強的心理質素！

我是睇「長遠企業價值」，而你就睇「短期股價」，所以你要學懂唔睇短期股價。

285有潛力，你可長線，但如果你心理壓力太大，不如轉其他股價無咁波動的股。你預左買潛力股，一定會這樣的。

------------------------------------------------

Q21042：

龔sir,另外想問下你對2380的睇法，這股票有8厘息，但上年除淨後股價跌到1.4，應該繼續持有收息還是先賺錢呢？

龔成老師︰

中國電力（2380）有質素的，可以長線投資。但要留意，中國的電力市場與香港的不同，香港的，有利潤「保障」協議，助電力公司賺穩定的利潤，但中國的，電力價格由國家主導，電力公司處被動位。

受燃料成本，以及國家主導的因素影響，中國電力過往的收入略有波動，而盈利亦有不穩影響。國家會給電力公司「合理」的利潤，但不會過多。

你用佢收息係可以，但要留意佢股息率雖然高，但都會有一定波動性，故不宜持有過多。

------------------------------------------------

Q21043：

龔sir你好，留意左你專頁一段時間，亦開始讀你的著作，十分同意你的投資理念，作為投資新手唔想行咁多冤枉路，所以果斷報了你堂。

我現在28歲目標係若干年後，靠收息+工作每月有十萬蚊收入，唔知會唔會太大想頭呢？

另外我想請教你點睇用桿槓買REITs呢？我見坊間有導師會教學生襯現在低息環境，借槓桿買REITs買債等相對穩定和低風險的投資產品，回報可達10厘以上，唔知你又點睇呢？

謝謝你的回覆，期待上堂親眼目睹龔sir的廬山真面目

龔成老師︰

借錢槓杆這個方法，賺錢時候你會加倍，但損失架時候同樣會被放大。風險唔細，唔建議你用。

除非出現「明顯的投資機會」，才考慮利用借貸投資，否則，有機會出現賺息蝕價的情況，小心。

我地投資一般期望合理回報係每年10-15%，如果想做到收息+工作收入加起每月有10萬現金流（我先假設你每月收入有5萬來自工作 + 5萬來自股息）。以股息率5%計，你需要本金1200萬。

你可以用上面架計法，大約推算要達至這個目標，所需要架總資金和時間。

上堂見!!!

------------------------------------------------

Q21044：

Hi 龔Sir，有事想請你比意見

現在同另一半租屋12500，住東九龍
男友是公務員，可申請綠表資格
想買返東九龍嘅居屋自住

二人每月收入共$60000
之前有睇過私樓，但因為我從事美容行業，近年疫情影響，銀行對美容行業按揭比較嚴謹，
所以我哋都偏向買二手居屋有政府擔保
近日睇咗鑽石山
以下都系13,14年樓齡，同一條街，
步行3分鐘到，港鐵站需要搭多一程小巴，或步行15分鐘

1，嘉峰臺 私人參建居屋屋苑
422尺實用，兩房 叫538萬
需月供 $23000左右
間隔不能大改動，感覺不太實用

2，瓊軒苑 單幢居屋
398尺實用，一房 叫438萬
間隔實用四正
需月供$18500左右

基本開支每月二人合共$28000
包括保儉，水電煤雜費，卡數，交通，食飯，電話費，寬頻

我地手持大約流動資金有$65萬
股票有$30萬
所以會做95%按揭，25年供款

想睇下老師比d意見
會揀選屋苑定單幢

龔成老師︰

以你地的情況，買居屋的確是較好選擇。

2間物業位置好近，交通、生活配套、地區發展、落成年份、尺寸等條件都好相近。

屋苑的價值，雖然比單幢樓高，但見兩者呎價都有更段差距，因此要思考值唔值得。

嘉峰臺相對貴成100萬，除非有其他原因（例如預將來會有小朋友，要留定多間房），否則應該瓊軒苑較好。

因為大家質素相若，但瓊軒苑可令你節省近100萬，用作投資增值，長線會對你較有利。

------------------------------------------------

Q21045：

你好， 有問題想請教。
有一層自住樓，幾十年前買斷了。
我地一家三口 為照顧老人家搬咗返去同住。
我係一個從來無買過股票的年輕師奶，要照顧自己的小朋友 和照顧自己個妹的小朋友

也辭去護士的工作 做緊全職媽媽。
靠老公一份人工 生活普普通通。

可惜，自住樓日益老化，維修事項漸多，已投放幾十萬裝修，小朋友也漸漸大個，兩房樓也漸漸唔夠住

在這裡認識了你的專頁，想問問：

1. 想賣左層樓套現，利用套現的錢來增值財富。是否太進取？

2. 我為人穩陣，十分不喜歡炒炒賣賣，如何在這範疇中能平平穩穩地賺取回報，讓老人晚年生活得更舒適？

3.我喜歡文字，不怕閱讀大量資料，想認真地認識自己在進行什麼投資，不是人云亦云地買一兩個什麼號碼，有付出才有收穫 嘛！

4. 前路有點模糊， 請指點下。

註： 自住樓大約值 600萬
手拎零股票
有買 金粒的習慣 大約10萬值
買了兩份儲蓄保險單 給女兒 和年老的家父

龔成老師︰

1）唔建議賣樓。自住樓不應賣出。你換樓可以，但賣出自住樓就不建議。

其實，以你現時奬況，但長線計，你都要增值一筆錢，為換樓作準備。你可以用月供優質股，去做增值。

2） 投資股票，其實係希望買入一些優質企業，透過佢自然增長，達至財富增值目的。絕對唔係"短炒"，只你要選對股票，並長線持有，就會有唔錯架財富增值效果。

你要做架事，就係先睇下每個月扣除開支後，有無多餘錢可儲。無就要睇翻有無支出可以删減，重點係每月要空出一筆資金用來增值。

你可以投資"平穏增長股" 和 "潛力股"。你先用每月5成儲蓄做月供，其餘先儲起，用一邊月供一邊儲蓄的策略。

選股上，你可以投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）、領展（0823）。

增長力較強的，可選安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。但佢地波動性和風險會較高，你要自己平衡。

餘下的另一半現金，我地就等機會，當大市出現較大回調，就加大力度掃貨，然後作長線投資。

但由於你家庭靠老公一份收入，開始投資前，必需儲起一半約為半年開支的應急錢，咁會較穏當。

3） 你這想法正確，我地唔好對企業毫無認知之下，做投資決定。你可以先睇我寫架"80後百萬富翁"、"財務自由行"和"股票勝經"，會適合你這類的初學者。

4）你現時每增加知識，並利用股票去進行財富增值，最簡單的方法是月供盈富。另外，如有需要就考慮換樓，但要視乎你地的資金、需要等。

至於金粒，都可以儲。但黃金主要係用來對沖突如其來架風險，所以唔洗多，佔總資產3%左右好了。

而"保險"只係理財中防守部份，只要買足夠保障就可以，增值可以留比優質資產（如優質股、物業等）去做，咁會較有效率。

------------------------------------------------

Q21046：

老師，我看到你的相“你是宇宙最大的奇蹟”
我都有留意 “吸引力”

入左一間公司做半年多， 同team兩個一開始共事既好同事都都走

一個辭職，另一個比人調組（調左一陣都辭職）

之後新來兩個同事 合作得暫時都一般，加野比我做
前日我又沖口而出話自己未必handle到咗多野，跟住佢地對的工作開始質疑，背後對我有微言

係咪我吸引左d負面野比自己
好擔心連份工都無埋
另外，前排可以左投資

買一手藍月亮，一手中國生物製藥

龔成老師：

吸引力法則是一個大方向，而在現實中，有好多變數的。

我地最重要就是自己有正面思維，往往會有好的事情發生，不過，現時仍是有野不是我地控制，你都要明白這點。

由於與你較友好的同事走左，所以你產生左一些負面想法，強加在新同事裡，不如你試下改變對新本同事的睇法，改善大家關係，否則會出現惡性循環。

至於你持有的兩股，有質素的，不用太擔心短期股價波動，持有一手無問題的。

------------------------------------------------

Q21047：

龔sir，你好，我都有啲概念野唔太明，股票係買賣，買/賣要有人接貨先叫成交，照計買賣既金額應該係一樣，咁點解D沽空既金額唔係成交既一半既？

龔成老師：

因為沽空不是正常的「賣出」，是一些無貨的人通過證券行借貨，先賣後買，因此要特別申報的。

------------------------------------------------

Q21048：

老師 我真係好迷茫 唔知應該點行 希望你能夠以過來人身份指點一下我

我27歲 無大學學位 只係普通DSE畢業
依家有份工作 admin 19k 返10:30 放6:30 無晉升機會 但好安穩 基本上都一定唔會踢我走 但19K已經係頂盡唔會再加

最近收到一個HSBC既teller offer , 人工少左, 15-16K左右, 我應唔應該轉去做teller? teller既晉升機會大唔大呢..唔係好清楚佢career path係點

希望你能夠解答一下我既難題

龔成老師：

其實好簡單，你從長遠角度去想就得。

你比較一下，5年後，10年後，這兩份工對你有那些分別。

從長遠角度去想，到時的收入、事業、生活、發展等因素，那個較好，那個較近你的長期目標。

你原有職業，突破唔高，除非你懂得善用餘下時間及利用資金投資有理想回報，否則發展唔高。至於銀行，teller的發展唔算高，不過，算是好過你原有職業，因為有機會再轉其他職位，以及有機會令你將來更有動力轉工，慢慢上。從突破角度，轉工會好少少。

你最重要問翻自己，長遠想點？有這個答案，就知選那份工。

------------------------------------------------

Q21049：

成哥，請問我買1177一手

1）甘我比一手價錢，啲錢係比1177間公司定比左邊個？

2）當我用1000投資，買左這股，升到1300蚊我放左，甘賺果300蚊係1177間公司比我定邊個比我?

我想了解運作，謝謝你

龔成老師：

1）交易所是一個二手市場，你是幫「另一個股東」買的。

你平時見到的股價上落及成交，就是每天不斷在買買賣賣，即是貨由投資者A轉給投資者B，不斷轉來轉去。

2）你可以當現時，你比$1000，在二手市場買了一部手機，然後過了一段時間，以$1300賣這手機賣給了另一位買家。

------------------------------------------------

Q21050：

老師，我知道你不建議借父母錢買樓。
不過我男朋友屋企人預備左1百萬(現時做緊定期)俾佢，係預備俾佢大約3-5年左右買樓付首期。

男朋友既父母話唔係好識投資，所以放左係定期。
雖然我覺得自己唔係太應該俾建議佢父母，但我都想問老師

1. 100萬應該拎出部分作投資嗎？

2. 應該拎多少作投資？

3. 應該投資係咩方面？係應該以佢哋既年齡而投資收息股嗎？謝謝。

龔成老師：

如果這筆錢會在中短期，例如1、2年內買樓，咁就最好持有現金，不要投資，因為投資始終有上落，無人知你買樓時的投資市況，萬一股市下跌，就會到時唔知賣唔賣股票去買樓好。

如果在3年後先買樓，就可以動用這筆資金，最好是投資「收息股」+「平穩增長股」，唔建議面對太多風險，同時，投資金額最好在$20萬-$50萬，不要太多。

------------------------------------------------

Q21051：

Sir，我Q19941見你早前的問答，我好想分享，我前後睇樓差唔多一年了，由6百幾萬睇到7百幾萬，又因為已經橫跨成年，可負擔的樓價已經就快可以去到8百萬

我由尖旺單幢20年左右的舊樓2房，睇到半新樓1房，再睇到黃埔細兩房，再愈睇愈貴睇到黃埔靚景中型兩房，已經去到8百幾萬

如果買去買800萬的樓，我就要用盡晒我啲錢同埋要賣晒啲股票，要賣晒股票，我會好唔捨得

後來我有一日本身已經睇左大半日樓，見仲未算好晏，就walk in去睇一個九龍上車屋苑，佢無我之前睇既樓咁近地鐵，但其實都叫walking distance

搭小巴去亦都好快，平均成交價講緊3百幾呎細兩房係6百尾至7百頭，頓時覺得好平，而且比起我之前睇既黃埔新好多好多

同埋一直以為呢個屋苑唔係咁好，但睇完實物又似乎都係一個唔錯的選擇

所以我會建議Q19941的讀者在考慮800萬dream house時，都去睇下啲細價樓，睇下自己感覺如何

就好似我咁，我睇完呢個上車屋苑後，感覺好ok，樓價低啲，唔需要套現晒我啲股票，供得輕鬆啲，可以繼續月供咁上下的股票，成個資產分配又唔會側重晒在住宅物業上面

最後我都想講下我近月的感受，我發現有啲同樣想買樓的朋友，與一年前的自己好似，就係好中意網上睇樓，而好少落場睇實物

親身睇樓真係好重要，而且唔係要買樓前至去睇，而係日後都會想買樓時，已經要早啲去睇下樓，到真係急住要買樓住時，至可以好快決定到。

龔成老師：

多謝你的意見，我都會同佢講聲。

這是一個好好的分享。

而你所講的「睇實物」，這點好認同，我相信網上只是輔助，並不能變成主力，我地一定要親手睇樓先得。

都恭喜你，你找到了你的目標物業！

------------------------------------------------

Q21052：

sir，1337雷蛇點解你睇好佢潛力？

龔成老師：

雷蛇（1337）有潛力的原因，主要係佢發展緊的業務，都是潛力類，加上見佢財務數據等資料，應該過了最差時機，因此可能有轉機。

當然，佢本質好波動，盈利不足，所有的市值，都只是基於「將來預期」去產生，這個預期可以變得好快，因為大家都只是「估」。

同時，電競行業的真正營運模式，賺錢能力如何，充滿了未知數，一個遊戲可以好受歡迎，亦可以好快無人玩。

另外，佢近年都有發展一些新興業務，潛力度有的，但仍左有不確定性。

因此，這股有前景，但有風險，無人知真正的價值。而佢另一些業務較是較新興，同樣有危有機類，所以，佢有可能有潛力，但風險方面就要注意。

------------------------------------------------

Q21053：

龔sir 你好
本人35歲
現時持有以下股票，請問組合ok 嗎？

0005 - 2手 平均買入價$42
0017 - 1 手 買入價$41
1177 - 2手平均買入價$7.9
0175 - 2手平均買入價$30

0017 買入後一直下跌，但個人認為企業有質素，但增長確實太慢，甚至不停下跌，很有衝動賣出，應如何是好？希望收到你的回覆，謝謝

龔成老師︰

就算再優質企業，中短期股價都會有機會波動。原因不一定是本質出問題，可以係一些與其本質無關的因素。只要長線質素無變，中短期波動我地唔需要理會，長線持有就可以。

中生（1177）和吉利（0175）都係適合你，可持有。

新世界發展（0017）不錯的，本身有一定的規模，業務廣泛，從事物業投資及發展、合約工程、服務提供、經營基建項目、電訊服務、百貨、酒店及餐廳、電訊、媒體、科技等業務。

但這類綜合企業，一般的增長力都不會太強，佢近年的生意亦只是平穩，你可以持有這股，但不要預佢有好大的增長力。因此不建議持有太過多。你暫時可持有，但不要心急加注。

匯控（0005）增長力一般，主要係收息，以你年紀，不宜持有太多。

------------------------------------------------

Q21054：

成sir 1883和3988各有一手，係當年招股時買一直到而家。你見議應該點看待依兩隻股？

可長持嗎還是平手時放左佢好嗎？

龔成老師：

中信國際電訊（1883）業務穩定，整體質素算是不差，過往股價的波動亦不大。佢近年的生意都保持穩定，盈利亦是一樣，相信市場結構令佢處於一個穩定賺錢的狀態，不過，增長力就不強。

盈利就穩定並平穩增長，但始終生意無上升，點都會有扣分的地方。

相信佢能平穩發展，收息可以，但就不要對股價有太大期望。

中行（3988）由於內地經濟無過往年代咁強，股價無過往咁好，由中美貿易戰開始，中國的經濟動力已有所減少，加上最近的疫情，都是影響經濟的因素。不過，初步已好轉，但不是高增長型。

現價合理區中間，這股收息可以，但就唔好對股價有太大期望。

所以，持有與否，要睇你本身投資目標，如果你想收息，就持有。想增值，就賣出。

------------------------------------------------

Q21055：

你好龔sir, 想問下，近期地產/物業企業既物業重估都系向下，是否可以代表香港物業其實系處於跌價方向，但似乎住宅物業冇乜跌價跡象。其實當中有冇關係呢？

龔成老師：

第一，這些物業重估只是一個「估」的數字，更只是一個會計上的因素，對企業無實際現金流的影響。

第二，我地分析時，會著重長期分析，唔需要太理會中短期情況。

所以當我地分析時，重業重估會影響盈利，但只是會計上，因此唔會太過著重的。

而佢地係重估時，不單考慮這刻的住宅樓價，仲要考慮租金，不同類的物業，以及將來發展情況等。

------------------------------------------------

Q21056：

你好老師，我係澳門人，早兩日去珠海金灣睇樓, 嗰度係 珠海新區 發展勢頭好勁但係依家 就係地盤多, 好多嘢都話會起好 將來點點點!

但係 現時比較荒蕪 但係都賣到兩萬五一方 不過有好多大品牌嘅地產商喺度都 喺度開盤 依家 15 16 唔知 買唔買好

因為我覺得個價錢都幾貴, 我覺得佢有啲潛力, 因為見佢之前啲新城區都 搞得幾好!

老師！中鐵建有投資價值嗎？
現價如何

龔成老師：

你最重要睇翻長遠的配置，該地區的交通及價值，以及，本身是否近商業地區。

如果有潛力，就時貴少少都是值得（當然不能過份地貴），建議你進一步分析該區的長遠城市規劃，以及發展等。

中國鐵建（1186）質素算是中等，不算好強，但都不差。

如果有分析佢多年的業績，會見到佢生意其實都幾穩定，但就無增長力，至於股本回報率處合理水平。但這股最大的問題，就是負債太多，雖然佢現金流好穩定，但太多負債始終會扣分。

而這一點，亦令佢企業價值不會太高的原因。而現價處於合理水平，但發展力不算強。

------------------------------------------------

Q21057：

想問下龔Sir對於
686 北京能源國際
668 東銀國際控股
1628 禹洲集團
3883 中國奧園

哩幾間公司嘅潛力，未來趨勢，現時股價值得持有嗎？

留意到近兩月內地房地產成交量急升，80，90後成家置業，可以從呢個方向同埋業績搵現價較平潛力股嗎？

龔成老師：

北京能源國際（0686）風險高。東銀國際控股（0668）賺錢能力唔強。

禹洲集團（1628）主要於中國廈門、上海、福州及合肥從事物業開發、物業投資、物業管理以及酒店業務。

佢係新加坡、香港、上海、合肥、福州、廈門等地均設有分支機搆。

整體質素都有，但未算好強，佢在行業中，未算有好大的規模與優勢，另外，負債較高都對這股造成風險。加上業務有點波動，這股唔建議投資太多。

現價合理，如果控制注碼都可考慮這股，長線投資價值都有，但未去到最高質類別。

中國奧園（3883）主要於中國從事物業發展及物業投資業務，近年增長快速，這是受中國樓市保持向好的情況帶動，加上佢利用大量負債運作，當好景時，佢就會好好賺。

但佢的負債有點多，有危有機，好景時好好賺，但逆景時，就幾大件事。

所以，這類股不是無前景，但風險較高，唔算好建議大注。

至於你從地房地產成交量急升，80，90後成家置業這方向，只能參考下，因為短期成交不一定反映真正的市況情況，而內地往往受政策等因素影響。年輕人成家這是需求，其實一直都有，你要確定是近期短期多左，還是長期核心需求的反映，我暫時未能確定一定是長期需求湧現。

------------------------------------------------

Q21058：

龔老師，我大陸有層樓
值439萬hkd

純粹問下

如果你攞左依439萬hkd
你會做d咩投資
如果做果個投資風險大唔大

龔成老師：

要睇翻你的年齡與風險程度，你可以考慮股票、基金、債券、銀行產品、車位等。

這是一個財富配置的過程，因此無話風險一定大，要視乎你怎樣配置。

就算股票，都有收息股、平穩增長股、潛力股等。

要睇你現時的配置，及將來的配置。

------------------------------------------------

Q21059：

老師，若我希望收息，哪些股票較合適？331豐盛服務可以嗎？659 新創建可以嗎？

龔成老師：

豐盛服務集團（0331）主要係於香港、中國內地及澳門，從事機電工程服務、建築材料買賣、環保產品貿易及提供相關工程諮詢，亦於香港從事清潔及廢物處置管理服務、回收及環保處置服務以及洗衣服務。

過往生意都有穩定的增長，而盈利都是，但企業的規模較細，因此風險較大，同時規模效益不高。但以佢現時的估值計算，價格是在合理區。

你可以投資這股，分注買入就得，長線持有，但就不建議投資得太多，始終這企業有點風險。

新創建集團（0659）都有質素的，佢係是新世界發展（0017）的基建及服務旗艦，業務遍及中國內地、香港、澳門。

新創建係一間綜合企業，可分為7大業務：道路、環境、物流、航空、設施管理、建築及交通、策略性投資。當中可分為兩大類，即是基建及服務

整體的質素，算是不差，但又未到最高級別，業務分散於多個範疇，部分與公共事業有關，過往的生意雖然穩定上升，但盈利卻停滯不前。

企業本身不是沒有優勢，長遠仍有增長能力，但由於賺錢能力略有下降，加上企業本身已很龐大，增長期望不會太多，過往過價大致穩定，投資宜集中在股息多於股價回報。

另外，近期的肺炎對佢有一定的影響，相信中短期仍弱，不過長期來說。仍是有投資價值。

現價合理，分注投資可以，但這股不建議太大注。同時要耐心等好轉，明白佢增長力不強。

------------------------------------------------

Q21060：

龔生你好，本人37歲，月入5萬左右，有一份穩定既收入，同先生財政獨立。現時自住樓先生名下，沒有很大固定開支，現家有大約80萬現金，十萬左右蟹貨股票。

平時無做其他投資，扣除生活開支後，每月大約可以儲2萬蚊。如果想投資，有咩選擇？

另外，如果想買樓投資，應該買咩價位既單位，同埋有無話咩地區比較好。

主要想10年內可以買2層細單位，想留比小朋友
謝謝你給予意見

龔成老師：

我地在財富配置上，最好是建立一個「平衡的組合」，如果太集中買樓，其實會出現集中風險。

當然，你不是不能這樣做，但就明白當中在風險，同時不是最好的配置模式。較好的做法是「股樓平衡」。

你可以先利用現時的$80萬，其中$40萬投資股票，再加上每月用$15000月供或分注買入股票。利用股票去進行財富增值，之後到適當時機先買入（這一步不用急）。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

平穩增長股：潛力股
8：2（如果你投資實力較強，可增加潛力股比例）

平穩增長股：考慮盈富（2800）。

另外再加：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

潛力股：安碩恆生科技ETF（3067）

另外再加：阿里（9988）、騰訊（0700）、港交所（0388）、舜宇光學（2382）、小米（1810）、ＧＸ中國電車基金（2845）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

現時大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q17301-Q17320）

Q17301：

Sir, 我係股票班舊生, 用阿Sir這8堂所教知識去分析了1830/必瘦站（包括跟同行比較～發現必瘦站比2138及1827更有發展及優質, 之後填寫6張企業分析表）覺得此企業屬於優質股。

～分析如下（有時間慢慢睇, 唔使急， 謝謝🙏）

目標客戶以中產以上人士為收入來源（屬中高檔次, 有能力將成本轉嫁給客人）睇過他們過去5年的年報, 發現他們現金流非常強，而財務穩建, 沒有向銀行借貸。

營業額～ 除2017年（-13.89％）2016 2018 2019都有增長， 當然2020年疫情下仍然有4％增長已經算係唔錯。

1）管理層積極進取, 拓展海外發展（包括2020年2月在澳洲開業, 表現理想,

2）還想在今年進攻美國美容市場）。但疫情下可能會較謹慎考慮開店舖問題 （或者趁疫情下以平價的租金買或租舖, 去發展美國美容業務）。

3）另外, 亦看了2019 2020 年報， 他們都積極發展大陸市場（包括大灣區）

但集團仍然以香港為主要發展重心地區。

4）至於男士美容業務（講了2年仍沒開始, 可能待2021年才推出）

5）流動比率～過去5年介乎177％～205％（合格）

6）ROE～5年內有增長， 今年53.04％

7）總負債/股東資金比率～今年91.35％ 算合格嗎？過住4年51％～74％

8）投資活動～ 過去5年都有投資發展企業（例如擴充香港及澳門/中國業務）（租舖/買機器/增加員工人手。。等等）

9）其中評估表內（估值～行業市盈率）

我以2138/香港醫思醫療集團的市盈率（12.43～12.85）及1827/卓珈控股的市盈率（28～30）比較, 好似太高, 所以用回必瘦站市盈率（7～9）

過住市盈率～亦以（7～9）

推算合理市盈率～ 以8～10計算估值, 所以推算約$1.44～2.20（這個股價合理區範圍正確嗎）如有錯請賜教！

必瘦站應該不屬於資產型企業， 所以市盈率及市賬率分析應對其分析平貴指標作用不大, 對嗎？

預估下年派息會減少, 因為疫情可能負增長（中國/澳門及澳洲）,但香港營業額應該不會太過差

最後發覺分析1隻股票, 起碼7至14日時間（包括睇年報, 所以我非常佩服你）。 必瘦站的年報算是簡單, 如果地產/銀行或大型企業, 肯定要1個月時間。

非常感謝你細閱以上分析, 已將8堂所學的僅餘嘅投資分析及知識盡量發揮。

龔成老師：

你的分析不錯，基本上已掌握了課堂所學，並講出了重點。

1）2）3）佢的發展方向，以香港為重心，並同時會發展中國，相信中國是其中一個管理層會重點發展的地方。

但由於管理層由的表態曾經出現反覆（你睇佢多年年報的管理層講話就明），過往一直用高派息政策，反映發展心態唔算強，但都會發展。

到近年，曾經表示想大減派息大力發展中國市場，最後，派息後保持高水平，有時都難以完全掌握管理層的方向。

4）暫時唔好有太大期望。

5）6）7）對，合格。但由於高派息比率，ROE無反映到再投資回報率，因此只反映原有資金回報率。

8）相信佢仍會保持發展。

9）你的方向正確，我會比你估值計算出的高少少，主要因為現金流強，派息高同時仍有增長力。加上佢就算在疫情期間，都無虧損，這點令人有驚喜。

另外，由於之前派左大額股息$0.34，因此我地計算出來的估值後，都要減翻相關數目，以反映企業現金的實際流出。

大約$2.X是合理區，去到$1.7以下是平。

------------------------------------------------

Q17302：

疫情人工黎緊幾個月都要減四分一，開始迫我面對之前一直打算做既網上小店副業同埋真係報左幾個課程增值自己。

同埋我更清晰自己一直只有打工都係死路一條，人要多把刀比自己用。性格問題囉，我最討厭停滯不前既感覺。

但萬事起頭難 ，岩岩起步又要儲stock ，要用啲資金。唉 ，好多不確定令我開始有擔心既感覺。

幸運既係 仲有份工頂住，

前兩年我睇過相，批過命 ，又話我無股票運 又唔好同人夾份做生意，所以呢句野一直有啲影響我...好既係我無再玩短炒。

龔成 我都係80後 你真係好叻又努力。無㗎，我單純想呻下 ，我諗你都睇過秘密呢本書 ，我相信呢種力量。加油！

龔成老師：

加油！我地總會面對困難，而我成日同自己講，困難是我令進步的因素，短期當然會辛苦，但長遠反而更加好。

最重要是保持進步，同時要對自己有信心。

《秘密》這書當然有睇過，我的書都有講吸引力法則，因為這的確對我地有影響。網上小店保持發展啦，好多野要試先有答案。

------------------------------------------------

Q17303：

老師，因隻932而差點永不超生既我。因為最近既疫情問題反而令我增加了收入，現在手上既流動現金差不多有十多萬，想捉緊今次機會突破返，將失去既時間同金錢追返晒。

但因為國安法，而中美又會產生太多不明朗因素恐怕引發蝴蝶效應，所以近期前我都未會採取買入資產既行動

想請問老師意思，呢段時間除左留有現金外仲應該要點準備機會來臨？

龔成老師：

順騰國際控股（0932）生意無增長，年年虧損，加上2019年的核數師意見有少少問題，這都反映企業本身的投資價值唔高。你要多從企業的角度去分析。

你唔好太著重中短期分析，唔好太著重事件的分析，要著重翻企業的價值，以及財富組合的配置。同時要長線投資。

現時的大市，你唔好100%現金，雖然有些版塊熱炒，但同時有些版塊較合理，只要你以分注投資進行，仍是可以的。如果你擔心，就唔好入太多貨，但唔能夠無貨。

------------------------------------------------

Q17304：

老師你好，恕我冒昧想問一下關於我的狀況如何投資。

我4X歲，月入$35,000，剛離婚要自己搬出來，暫時租住朋友一間的房屋月租$15000，每月可儲蓄大概$7000

打算短期內購買一間500多萬的房屋，手上流動資金大概10萬元，請問我應該如何部署往後的資金？

龔成老師：

如果你想買一層$500萬樓，就算9成按，都要有一定的金額，你要盡力加大儲蓄，希望每月可以儲到$1萬以上。

你要計算計自己打算幾時買，如果中短期，就未必適合將資金投資，如果是中長期，資金就可以適度投資，但都要投資較穩健的股，平穩增長型，如盈富（2800）、銀娛（0027）、恆基（0012）、中銀（2388）、港鐵（0066）、平安（2318）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

------------------------------------------------

Q17305：

你好呀，我一路以來都追開你嘅書 係你嘅fans 呢一兩年都有參考著你嘅書投資 首先想講返聲多謝 因為睇完你嘅建議再去睇年報 最尾成功係比較平嘅位買入恆基兆業

呢排自己睇到金沙中國價錢都嘅吸引 市盈率係15-16咁又見金沙城洒店改建嘅倫敦人就開幕 覺得有潛力 想慢慢分注買入 想問下你嘅意見！唔該曬

龔成老師：

恆基（0012）有質素的，不過增長力比過往減左少少，但長遠仍有投資價值。

至於金沙（1928），現價合理，中短期這股會較弱，始終疫情令佢生意影響，但我地投資股票一定是睇長遠的，因此這股可以長線投資。現價有投資值博率，全注已可以。

但都要同時留有現金，唔好心急用盡資金。

------------------------------------------------

Q17306：

龔老師你好，本人47歲，從事電梯維修判頭，太太家庭主婦，有2幼稚園小孩。本人因上年中風、所以現時身體影響工作。不能夠長時間開工。本月收入不太穩定。

現租住近女兒學校荃灣市區3房單位，租金$18000。早幾年放售物業約5百萬現金。暫未有上車。

現手持5百萬現金，應該買入那些收息股可用來幫補家庭開支及租金？ 謝謝你

龔成老師：

由於你收入唔穩定，加上有一定的家庭負債，投資唔建議進取。持有的$500萬要小心運用。

你最好以「低風險，穩陣，現金流」為資金配置的主軸。你可以將這$500萬，分成5部分。

第一部分投資收息股，你可以建立一個收息股組合，你可考慮港燈（2638）、香港電訊（6823）、匯豐（0005）、工行（1398）、置富（0778）、陽光（0435）、深高速（0548）等，大多有5%股息

你平衡的投資這些股，除了可以得到穩健的收息收，同時可有效的分散風險。

另外，小部分投資盈富（2800）都可以，而收息的ETF，如ＧＸ恒生高股息率基金（3110）都可考慮。

第二，投資債券，你可以選擇A評級的債券，年期較長都可以，但利息卻不高。你可以到銀行問問。

第三，投資年金，你可以睇睇，這是適合你們的產品，零風險，可以有穩定回報。

第四，你亦可投資銀行低風險類的產品，你可自行到銀行了解下，總之是「低風險，持續現金流」的。

第五，持有現金，除了可做定期外，現金亦可以為你的後盾，以備不時之選。同時，若投資市場大跌，你可以在這時買到更多的收息股，股息率會進一步上升。

你可以將$500萬資金，平衡地分配在上述的項目上，對你來說是最好平衡風險，同時有穩定的現金流。

如果你能承受到小小風險，就可投資較多平穩增長股，即是銀娛（0027）、恆基（0012）、中銀（2388）、港鐵（0066）、平安（2318）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。這部分要睇你的家庭情況，以及風險承受能力決定。

------------------------------------------------

Q17307：

老師你好！我準備24歲，月入$25000，手持現金33萬（先前用來作定期存款）。而今年開始每月月供匯豐股，每月$10000，已供半年，最近亦開始接觸股票。

而我看到老師在fb都建議月供盈富，我是否應改變現時月供匯豐？

另外，現時想開始學習買股票，應如何入手？以及現時有什麼有質素的股推介？謝謝你！

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股只能小注。

因此，匯豐（0005）以你的年齡來說，並不適合。你應該先投資盈富（2800），月供可以。如果有能力，就加少少其他股，甚至潛力股，但如果選股能力不強，就暫時供盈富先。

另外，以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。你可以睇《股票勝經》或上堂都得。

------------------------------------------------

Q17308：

你好，本人29歲，有穩定職業，月薪約四萬，扣除開支後大約可月儲二萬八千，現時大約有儲蓄八十多萬。

請問如想盡早開始投資股票的話，應該選擇那些股票呢？

本人屬於低風險和保守的性格，每月投資股票應佔每月可儲收入多少成呢？謝謝。

龔成老師：

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，加上你是較低風險，因此這刻不用急著投資潛力股。你可以集中在平穩增值股先。

你可以自行分注或月供，每月預算大約投資$15000。

你可以考慮盈富（2800）$8000。

另外再加幾隻（每隻$3000）：銀娛（0027）、恆基（0012）、中銀（2388）、港鐵（0066）、平安（2318）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

至於現時的$80萬，暫時只能動用$20萬，分注投資上述的股都得。

------------------------------------------------

Q17309：

龔老師,我係投資新手 想打算用15萬去投資收息股 想買中銀香港,長和,中國神華,中移動呢4個 分散投資好定係買晒其中一個好呢?

龔成老師：

分散是較好的，因為你並不是「賭」某一股的表現，而是要建立一個組合，要做好「配置」。

你可以投資中銀香港（2388）、長和（0001）、中移動（0941），都是可投資收息的股。神華（1088）業務有潛在波動，以長遠收息的角度，未必是最適合。

另外，你可以同時考慮香港電訊（6823）、置富（0778），都是不差的收息股。

------------------------------------------------

Q17310：

想問如何計算便宜的價格去買股票？

龔成老師：

要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

如果要深入計算，基本上要好仔細的研究企業，要分析好多財務數據用比率，先至有較完整的答案。

------------------------------------------------

Q17311：

老師你好，想請問如果我想月收股息15000

我以家30歲每月只可用2000黎供股我又咩都唔識咁我供哂盈富基金先同埋想學投資又冇時間想堂咁淨係靠睇書得嗎老師有咩書可推介比新手睇?

因為我住離島以家有個女又好困身以家暫時都係買電子書睇咩都做唔到。請老師指點迷津

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

所以，你這刻應著重「增值」。

其實你這個年齡，仍是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。

你可以先增加知識，可以不斷睇書，《股票勝經》是很好的入門書，你睇完這本再睇其他。

------------------------------------------------

Q17312：

龔成老師，你好 我係你以前股票班的學生，我睇左你本新書《5年買樓4部曲》，覺得老師你分析得好詳細，好活學活用。

我同我女朋友拍拖6年, 打算兩年內有結婚買樓, 我地兩個加埋月入HKD65k, 暫時有HKD1.7m liquidity cash，用作首期及裝修費。

我地亦問左銀行做初步審批按揭，可以做到9成按揭同買700萬左右的樓。因為我地係初階投資者，prefer 大型屋苑/ 藍籌屋苑，有升值潛力，實用面積大概300-400呎，比較鐘意海景。

由今年4月份開始睇樓, 包括大型藍籌屋苑 e.g. 黃埔花園, 將軍澳新都城, 南豐新村, 德福花園, 淘大花園等等。

睇過咁多屋苑, 我地prefer大角咀港灣豪庭, 港島南區置富花園同將軍澳中心. 三區都算近返工地點(中環/ 鰂魚涌), 同返娘家(西環)都比較分便. 想問龔成老師會點選擇?

以下係本人少少分析, 請老師作出指點:-
大角咀港灣豪庭優點:-

- 樓齡17年, 唔算舊
- 位於大角咀, 鄰近栢景灣, 維港灣, 帝柏海灣等豪宅
- 屋苑樓下有個小型商場
- 部份單位有海景
- 鄰近返工and 娘家 (20-40 分鐘車程)

大角咀港灣豪庭缺點:-
- 位於港鐵奧運站同南昌站中間, 交通不算太方便, 由港鐵站往返港灣豪庭需時行10-15分鐘, 中途全程露天步行
- 鄰近九龍殯儀館
- 要買生活必需品要過旺角/ 奧運
置富花園優點:-
- 景觀開揚，部分會有海景
- 比起市區呎價平
- 未來會受惠於南港島線北段(華富站)
- 鄰近返工and 娘家 (30-45 分鐘車程)
- 校網唔錯

置富花園缺點:-
- 大廈外牆正進行維修, 要額外分期灘還到2022年第一季，入住初期要忍受環境差
- 樓齡41年
- 交通往返其他地區遠, 冇會所
- 華富邨將會重建，會影響將來的海景同重建時會影響將來的居住環境

將軍澳中心優點:-
-樓齡較新 (17年樓齡)
-有會所
-交通方便, 鄰近將軍澳站
-鄰近大型商埸 (i.e. PopCorn), 容易買生活用品

將軍澳中心缺點:-
-人口稠密度高
-返工放工等繁忙時間港鐵超多人
-如果港鐵有任何事故, 出市區比較困難
- 離娘家(西環) 比較遠 (45-60分鐘車程)
- 校網一般
仲有兩條問題想請教老師

Q1: 我地prefer買有升值潛力, 會考慮受惠於南港島綫（西段）的樓盤, 知道老師推介田灣, 但係該區單幢樓比較多同樓齡比較舊, 請問老師有冇推介既樓盤? 如果冇, 置富花園會唔會都係一個唔錯的選擇?

Q2: 根據我地現時睇樓既經驗, 比較好的樓盤通常一個月內賣出, 所以議價空間比較少,賣出價一般都比銀行估價高少少。我地應該等市況靜D再壓價, 但係又擔心等等下樓價又升, 定係貼近銀行估價都可以買樓?

龔成老師：

1）就上述的3個屋苑，置富花園及港灣豪庭較好，始終對你的方便程度較高。

兩者中，港灣豪庭的升值潛力會高D，至於置富花園，由於就算將來起南港島線西段，相信都唔會經過置富，只會行下面的華富。

但如果只考慮方便你自己的程度，可能置富又會好少少。

中短期維係問題唔好太在意，最重要是睇長期。

另外，你可以睇下黃竹坑的金寶花園，雖然不是大型屋苑，但近黃竹坑地鐵站，加上將來隔離會有商場，生活配套會慢慢齊。不過呎價都唔算平，但你可以睇睇。

2）如果你可以等得，最好是耐心少少，但你要睇多D盤，要有心理準備有D盤會無左，但有耐性是較易買到好野的。

但現時樓市唔跌，的確較難買到平野，所以只要你認為合理價，有得平少少，都可以考慮。

------------------------------------------------

Q17313：

老師你好，本人買股票已有十多年，不過都係蝕嘅多。
目前的組合也不樂觀，所以想請教你怎樣處理現時的股票。

年初時好不容易才等到2899紫金礦業返到家鄉，放出後以83蚊買入1000股823領展，目前仍持有中，該長線持有嗎？

另外還有以下股票：

9988阿里巴巴 100股，買入價176
3323中國建材 10000股，買入價12.7
1618中國中治 10000股，買入價4.97
1333中國忠旺 25200股，買入價5.85

想問下以上除9988外、其他點處理好、該止蝕轉換成其他股票嗎？謝謝！

龔成老師：

阿里（9988）可以長線。至於領展（0823），有質素的，可以守。

至於另外的3隻，質素與增長力都不算好高，雖然不是劣質，但持有的價值不是好高類別。

中國建材（3323）如貨不多，可守，但預佢增長力唔強。中國中冶（1618）長遠應該賣出。中國忠旺（1333）長遠都應該賣出，但由於不是零質素，因此唔一定要立刻賣，可以等上翻D先。

長遠來說，你應該轉換成更優質、更高增長力的組合。

你有三大問題。第一，選股能力不強，你要考慮企業在行業裡的優勢，以及長遠行業的發展力，唔好只著重當刻的情況。

第二，太過著重買入價，其實你應該著重資產質素，要建立平衡與優質的組合。

第三，無用平均的買入方法，除非你掌握到企業估值，否則，以平均入市的模式進行，這樣能有效減少買入價的風險。

------------------------------------------------

Q17314：

老師，我從上年八月開始買入領展的月供股票，現在佢既市盈率係負數，咁我應唔應該繼續供落去呢？謝謝老師

龔成老師：

我地投資股票，就是買入企業，唔好太著重中短期因素，要睇長遠的企業質素與發展。

領展（0823）有質素的，中短期香港地產市道當然較一般，但長遠仍是正面，增長力或者不及過往年代，但要平穩增長及收息是無問題。

佢市盈率出現負數只是因為物業重估因素，這只是一些會計上的數字，對業務無影響的。

另外，月供股票一定要長線進行，唔好中間轉來轉去。

------------------------------------------------

Q17315：

老師，本人47歲、3年前買咗樓平租比自己人、租同供等同！

我買咗收息股3、6、405、435、778、1038、2388、6823、大約共160萬、現金淨40萬！

月可儲$10000
請問老師覺得我仲有咩安排會比較好呢！
謝謝老師提點

龔成老師：

你持有的，都是有質素的股票，雖然增長力不算強，但以你的年齡情況，其實無問題，配置基本適合。

你現時有物業，同時股票都佔財富一部分，基本上能做到股樓平衡，配置不差。

現金$40萬，以現時的大市平貴情況，都算可以，但暫時唔好再動用這$40萬，除非出現大型跌市，否則作備用及等機會之用。

至於月供可儲$1萬，你可以投資平穩增長股，分注或月供都得，例如盈富（2800），如果你可以承受到風險，就可以將其中$3000供一些潛力股，因為你的組合現時並無潛力股。

------------------------------------------------

Q17316：

成老師！1876 怎樣看 ?

龔成老師：

百威亞太（1876）以質素來說，的確不差，佢係百威亞太控股為AB InBev Group的一部分，係亞太地區最大的啤酒公司。

佢從事生產、進口、推廣、經銷及出售超過50個自家擁有或獲許可使用的啤酒品牌組合，包括百威、時代及科羅娜，以及旗下多國品牌和當地品牌，如福佳、凱獅及哈爾濱。

佢係多個國家都有相當的市佔率，同時增長力強，就近年的數據睇，盈利每年都有雙位數增長，業務、品牌、質素絕對有。

過往股往少少貴，現時合理翻D，你預現時是合理區中上部，分注投資，長線持有都可以。

------------------------------------------------

Q17317：

龔成老師你好，我一直有留意龔成信箱，希望可以為自己制訂一套良好的投資組合，包括美股、港股、RIET、債券等，但過去5年覺得投資上走彎路，錯誤的港股投資及炒股導致數十萬損失。

因此在此希望請教一下龔成老師，以制訂一個健康的投資組合並盡快達到財務自由。以下為本人的基本資料：

今年29歲，從事穩定行業，月入約5萬，每月可儲2-3萬。另每年公司Bonus約20萬。主要資產如下:

1. 一香港物業出租，價格1000萬，做400萬按揭，每月供款約15000，租金收入24200,將來用作自住用途:

2. 香港股票50萬:包括中國石油化工股份(13%)、中國鐵塔(5%)、建設銀行(37%)、石四藥集團(8%)、藥明生物(15%)、長實集團(9%)、中銀香港(10%)、京東集團(2%)

*本人認為太集中在金融股、想調整組合加大中國鐵塔投資組合份額降低平均成本(原買入價2.13)及另外再買入吉利等增長股;

3. 美股約HKD15萬: 包括Beyond Meat、Zoom、波音等;

4. MPF17萬，另外每月額外自願供款1000

5. 現金約30萬

目標希望在40歲前每月產生4萬元現金流，現在正考慮在投資組合中加入星加坡及日本RIET，以及未來到英國置業、請問可以做到嗎?

龔成老師：

首先，你有「建立財富組合，做好配置」這是正確方向，持有優質資產長線是大前題。

不過，你這年齡，可以進取翻少少。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你應該在40歲前，著重增值，到40歲，轉為現金流類別。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股只能小注。

因此，建行（0939）、中石化（0386），以你的年齡來說，並不適合。

你可以加大少少吉利（0175）及中國鐵塔（0778），長線持有。

至於外國的房託，只要有質素的都可考慮，但要留意不少房託都以收息為主，增長力不強，而你這刻應加強增長力。

------------------------------------------------

Q17318：

老師你好，我同先生每個月可以儲10000，有樓，年紀32歲，流動資金50000，請教我地怎樣投資可以做到財務自由

龔成老師：

你地的現金唔算多，建議$5萬唔好動用，除非大市有大型下跌。

至於你每月$1萬，暫時可以將一半投資，你可以月供股票或自行分注投資。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。做月供股票，每月$5000
。

你可以考慮盈富（2800）$2000。

另外再加1、2隻（每隻$1500）：銀娛（0027）、恆基（0012）、中銀（2388）、港鐵（0066）、平安（2318）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

如果你不懂股，就集中供盈富$5000。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q17319：

龔sir,感謝你。
又一年過去，眨下眼我26歲了。我已完成了第一個一百萬。

感激遇到你令我對財務策劃上有更多既認識令我對自己有要求有目標，雖然還未稱得上熟悉股票市場，但我仍然會保持學習的心 堅持每月供股為我的未來努力。

下年目標希望能購入一層800萬以下的自住單位。
希望我會成功

龔成老師：

加油！你已行在正確的路。

理財是長期戰，你要保持進行，方向已正確，保持努力就得。提高自己的投資知識，以及不斷儲錢。希望你能成功置業。

由於你打算在1年裡買樓，因此宜持有較多現金。

------------------------------------------------

Q17320：

老師，目前我23歲
月供2800中。

想問月供美股可考慮嗎？
有邊隻可以選擇？

我上網留意 美股可一股買賣 只需幾百元，對嗎？

龔成老師：

唔好因為入場費低而強行投資某一股。

最重要是這股有質素及長遠發展正面。

美股你可投資，只要當中是優質股，以及你熟識就得，你這年齡，可以投資增長力較高的股票，盈富（2800）可保持月供，至於美股，你可留意一下科技類的，例如GOOGLE等。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。