【龔成問答信箱】（Q22101-22120）

Q22101：

龔sir 我今日做左進階班功課 有d問題想下，我用左莎莎既年報去計財務比率

1）我計到既ROE 分別係-26.4同-31.1, 但係你比的價值網同bochk 係-23.5 同-24.9，點解會有d分別呢？

2）EBITDA 利潤率 其實我唔係好識搵個EBITDA出黎 自己跟住年報計除息除稅除折舊後 都計唔到價值網 顯示既-3.85同-3.67億(價值網顯示2020年係正數

我諗應該係負數先岩？）個EBITDA利潤率 價值網 係-12.7同6.41，而bochk係 4. 06同5.47, 想請教下可唔可示範一下點計？

3）存貨週轉日數 我計到160，呢個數字同價值網差唔多，但bochk係106, 又係想請教下邊個數字先岩？

4) 關於杜邦分析法

2020年: 1.97 x 1.75 x - 9.02% ＝-31.1
2021年: 1.89 x 1.21 x - 11.5% ＝-26.3

ROE 2年都負數 不過2021負得冇得多 2021年純利率差左 不過財務槓桿 同總資產週轉率個數細左 所以負少左

我就唔係好明 總資產週轉率 應該愈大愈好 但係假設2021年都係1.75 (instead of 1.21) 咁計出黎個ROE負得仲勁 咁咪調返轉應該係愈細會愈好？請指教一下

龔成老師︰

1) 我相信係你和其他網站，係計個"發行股數"和"股東權益"出現分別。

因為每個網站的公式都不同的，就算發行股數都不同，計年頭？年尾？平均？加權平均？通常我睇財經網站，都唔會太著重d細數字，你了解大方向就得，同埋，不同財經網站的數據，一定會有d誤差，正常的。

2) 至於EBITDA利潤率，你可以參考BOC個數字。你可以用佢年報中"經營虧損"，再加翻"按性質分類之開支"中的折舊部份(2021年年報P.177)。但會有少少差別，可能係提取數據或匯價問題，影響不大。

價值網部份，都係用類似計法。但2021年數據，可能系公式不同，其實，一般網站在計算EBITDA時，都計左「使用權資產折舊」，但這並不是真正的折舊，所以數據的參考價值會低左。

其實較精準方法，我建議係用EBIT - 折舊，但這個折舊，應該排除左"使用權資產折舊"的數字，咁會更準確。2020和2021年EBITDA，應該為-7.6%和-10%。

2020年︰(-5.53 + 1.17) / 57.17 = 7.6%
2021年︰(-3.91 + 0.87) / 30.43 = 10%

3) 如果用我教法，拿年初和年末平均數計，答案係160。至於點解BOC會有分別，因為佢係計算存貨時，唔係用年初和年末平均數去計，所以有落差。

你照用160，咁就可以。

4) 你這個杜邦分析計算，係正確。你睇翻個3組數字﹐你會發現中間組數(營業額/總資產)，係變動最大。

你就會發現，企業這2年面對問題，係銷售數字出左最大問題，有明顯轉差情況。

之後，我地再睇翻客觀環境。由於這2年有社運和疫情影響，令到營業額受損，係正常。這些都係中短期因素，因此我地係分析企業質素時，唔洗過度在意。

至於你話總資產週轉率愈大，個ROE就會負得愈多，係正常。因為現時佢生意少左好多，但好多固定成本，好似舖租、人工等，唔係話停就停到。

佢現時基本上，每件貨品都係蝕住做。但當這些不利因素過去，營業額回復正常，有更多銷售單位去攤分這些固定成本時，就會令佢轉虧為盈。

這時候，每賣一件貨都係賺錢，自然會係總資產週轉率愈大愈好。

------------------------------------------------

Q22102：

你好 龔sir本人持倉如下：

778 @$10.3 x 5000
823 @$71 x 1500
941 @$83 x 500
968 @$13 x 8000

1177 @$4.5 x 12000
1928 @$41 x 2400
6823 @$10.5 x 10000

另月供5隻各$1000, 現值16萬多

3,285,823,1177,1299

本人50歲 月入33K 還有十年退休，想法是退休時將所有股票轉成有5厘息以上的收息股 作生活補貼

1) 這個組合有沒有問題？

2) 因為未來還有10年穩定收入 這組合是否過於保守？

謝謝 祝生活安康

龔成老師︰

1) 你持有和月供股票，都係有質素。但由於你50歲，係一個要為退休開始準備的年紀。

因此，你要將組合中的股票，慢慢轉成較保守組合。按年紀增長，慢慢加大收息股比重。目標係10年後退休時，組合100%係收息。

現有持股，暫時可以不用改變。但月供組合中，中生(1177)和比亞迪電子(0285)都係潛力股，風險對你而言，用點高，唔建議用佢地作為月供組合。

你可以將這2隻股票，換成為收息股，會較適合你現時的年齡配置。

收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

還有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

另外，你要留意一下，你組合持股的佔組合比例。個別企業和行業，不要佔組合15%和30%以上，否則會有過度集中性風險。

你現時部份股票，係超過這個標準。但由於都係有質素股票，故不用沽出。用未來新資金，去慢慢拉平衡翻個比例，咁就可以。

現時大市只在合理區，每月月供之餘﹐緊記都要留少少現金，用來等大跌市出現時，可以去掃平貨。

2) 你大致上跟我所講的方法，去進行配置，增長力度就會配合到你年紀所需。

我假設投資回報有10%（連股息再投資），你每月投資$5000 + 55萬持股，10年後大約會增值至250萬。

你再將佢換成6%收息股，大約每月就會有1.25萬的現金流。你可以以此作為參考，調整自己投資計劃。

------------------------------------------------

Q22103：

我正在研究電動車和自動駕駛，有什麼介紹

對這個行業未來的看法

龔成老師︰

電動車方面，我自己一直較看好比亞迪（1211），係佢的電動車。

首先，電動車有環保的概念，這點令政府會加以幫助，而市民亦會支持，但其實，電動車真正的價值並非在環保，而是慳錢，用電比起用油平得多，因此只要各種配套都完善，車主沒有理由不選擇電動車。

只要有金錢利益推動，人們的習慣將輕易改變，在70年代的石油問題，完全改變了美國人使用汽車的習慣，由一向追求大汽車的習慣，轉變到鐘情於小排量慳油的日本車，令日本車大舉入侵市場，當其他車廠發覺時已經太遲，最終成就日本車霸主的地位。

雖然將來的油價難以估計，但到經濟好景，各國都大量用油的情況下，石油需求大增，電動車的優勢亦愈來愈明顯。

另外，比亞迪在中國發展電動車，可說是佔盡地利因素，因發展電動車必需要有完善的配套，政府的支持十分重要，另外，若政府肯帶頭使用對推廣很有幫助，現時比亞迪的電動巴士已經行走在中國多地的公路上，由公共交通開始發展，可見政府對電動車是正面及支持的，然而，中國政府在支持電動車背後亦有個重要因素，就是石油。

中國並非產油大國，未來的石油供應難以滿足中國的汽車需求，而發展電動車就成為辦法，同時中國在西藏擁有不少能生產電池的鋰資源，若能用電動車取代傳統燃油車，中國對石油的依賴可減少，對別國的依賴能減少，從整個國家發展的戰略角度分析，中國發展電動車的誘因並不少。

同時，中國是政府主導的國家，要建立配套及支持業界，比資本主義國家更容易（在西方國家，石油業的既得利益者並不希望見到電動車的出現）。

投資中國的企業有一個要點，就是順從中央的方向，這不是指個別一兩個政策，而是一個大方向，因這會對企業的長遠發展有重大的影響。

比亞迪在新能源汽車方面，經過幾年的發展開始有起色，混能車銷情理想，而電動大巴在政府支持下銷量亦理想，而部分歐洲國家亦開始試行比亞迪的電動大巴（這是有利的指標，因歐洲的標準甚高的），雖然只屬起步，但情況不錯。

現時比亞迪的新能源汽車遍佈全球6大洲、多個國家和地區，其中包括美國、德國、 英國、日本等主流汽車強國市場。

所以，我睇好這企業的電動車，但並不是一兩年就見到收成。

至於自駕技術，見集團都一直有同科技企業合作，相信發展上都係正面。

但這股經常都處略貴水平，大約去翻$135先算合理，如果真的好想買入，現價小注月供好了。始終現價投資風險高，回翻先考慮正式買入。

或者，你可留意下中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

此股現價合理區頂至略貴。無貨可以現時入少少，到有明顯回調才再慢慢加注。

潛力度是有的，但會比較波動，如投資宜慢慢分注，可長線。

------------------------------------------------

Q22104：

老師你好！岩岩開始睇你既書，好似展開左我人生新既一頁，原來一直以來既理財觀念（淨係識得放錢係銀行儲）係好old school同好無效率。依家將你一本本書慢慢睇，希望可以快啲財務自由啦

小妹25歲，月入4萬，家用一萬，用一萬（下個月開始想用少啲儲多啲)，儲兩萬。

黎緊應該會同男友買樓，想買約7-800萬既樓，有首期，希望可以快啲供完，唔想負咁耐債，其實睇完書真係好唔想供樓，覺得要借錢再負咁耐債呢件事好矛盾，更無奈樓價愈黎愈唔合理，但又想有個安樂窩

1。儲蓄約15萬；需要再拎錢出黎投資嗎？

2。美股：少量voo

3。睇完老師你講既野，想試下月供股票
你覺得我每月供
$5000 （2800）平穩增長股
$5000 （3067）潛力股
如何？

4。如果二人都用呢個組合投資，可以加快供完層樓嗎（男友都係月入4萬）
希望你可以比啲意見我，謝謝呀！

龔成老師：

你現時25歲，係累積財富的黃金時期，你要好好把握，盡你一切的力量去儲蓄、投資、學投資知識。

你盡快加儲蓄到每月$2萬，是正確的。

1）你表示「有首期」，是否已另外預左一筆足夠的資金，去準備買樓，我假設你已準備好，餘下的$15萬就可以投資/等投資，不過，我會較建議你等完成買樓過程，先開始投資。

另外，現時低息環境，其實唔需要太急去還錢，你照正常速度去還錢就得，資金可以用作增值。

2）VOO可長線持有。

3）可以，這兩隻都是不差的選擇，但現時好睇你會幾時買樓，而決定投資多少，留現金多少。

4）你概念上不用想著「想盡快供完層樓」，你只要照正常速度去供樓就得。每月保持進行財富增值，照上述月供模式進行，就得。

------------------------------------------------

Q22105：

你好龔成老師, 首先感謝你的無私分享，令我有希望可以有天財務自由。

先跟你分享我的現況

工作方面：我今天25歲，月收入13K，上年原本收入18K，但因為轉行由低做起，希望將來可以收入更穩定，所以即使收入下降仍堅持轉行。

我亦有PT工作，大概月入3K。而今年9月我打算花約80K讀PT PGDE，預計2年後畢業後起薪點可以升至30K。

儲存方面：我答應自己每月要儲14K，預期3年後有500K。

資產方面：我現有資產350K，當中股票佔6成，3成是銀行定期，其餘是流通現金。股票比例:

1) 316, 買入價119, 股數419
2) 823, 買入價62.76, 股數131
3) 1177, 買入價7.73, 股數1414
4) 2388, 買入價24.4, 股數1447
5) 2800, 買入價26.37, 股數2301
6) 3067, 買入價17.6, 股數692
7) 3988, 買入價3.07, 股數3252

目標：我期望3年後可以儲到一百萬，與男朋友夾份置業再結婚。

1) 請問老師認為我的方法適當嗎? 有更快達到目標的方法嗎?

2) 請問老師認為我的股票比例恰當嗎? 有需要更集中投資/賣走哪隻股票嗎? 我暫時只有穩定地月供1177及3067各約$2000。謝謝你

龔成老師：

1）現時的股票與現金比例，適合的，持有的股票都是有質素的股，但你25歲，其實未必適合持有收息股，因此，中行（3988）這類收息股，就未必是最好的選擇。

至於大方向，基本上無問題的，但由於你轉左工，收入減少，你要睇下自己能否做到每月儲$14000的目標，如果可以做到，相信3年資產達至$100萬，可以的。

2）比例基本無問題，由於你3年後要資金，因此不能太過進取，你預潛力股與平穩增長，各佔一半就可以，潛力股不能太多，反而當你買完樓後，資金可以更長線投資，到時可以再增加翻潛力股的比例。

------------------------------------------------

Q22106：

Hi老師，最接近神的男人
因2年前無意中係fb識到你

另外，知道你聽過好多 多謝你的人留言，
我都一樣
我都好想多謝老師！同埋多謝我自己！

我有間居屋 供緊， 在職媽媽
小朋友x2 有一個工人姐姐
以前就算好慳好慳，
都儲得好小錢！

人工唔高 只是普通文職 ，
但我2年內竟然都儲到多達十萬以上！
都係你帶來的正能量影響

除左正職外，亦多層面地搵到額外收入（如投資，網上填問卷，任務/網店/etc....）
真係好多 原來增加收入來源係好重要
，
而我也揾到真正搵錢方法 好開心）
為了令自己收入更大，我偷時間去投資自己身上！去學習不同知識！
賺取更多額外收入！
多謝你無私奉獻

龔成老師：

哈哈，太誇張了，其實我做的事不是好誇張，我原本都是好普通的人，只是我比一般人更加努力，希望你都要明白，好多事情你都能做到的。

見到你有正面的影響就太好了，你最重要是保持進步，無論知識，以及財富。

你現時的方向正確，同時，你應該思考一些長遠增加收入的方法，例如自己在現時職位上的發揮，有無進步的空間，長遠的事業發展怎樣。在自己的能力上，以子職業上，都要從長遠角度出發，加油！

------------------------------------------------

Q22107：

你好，有些投資問題想求你指教

我月入3萬，太太月入7萬，有兩個3歲小朋友。我有層自住樓，貸款金額仲有500萬，每月供$18000左右。因為我人工唔夠借，所以太太是我擔保人。

另外，我太太和她的家人有層已供完聯名物業市值720萬，但她家人住緊。

現在，我哋想喺太太和家人的聯名物業按揭貸款，之後買入的士（的士牌連新車約$550萬）收租作投資，但我們現金儲蓄得50萬其餘就按揭借回來，你認為可行嘛？

以我的背景會唔會好大風險？還是作其他投資好呢？

謝謝你的賜教

龔成老師︰

我相信你年紀都唔係太大，應該係年青至中年人士的階段。

在這個年紀，其實借貸比例高少少，都係可以。你預總負債，最多可以去到總資產7成。從負債風險角度，只要你做到7成以內，風險水平都係可以接受。

所以，你要計一計數，所有負債，比起所有資產的市值計算。如果超過7成，就是開始高風險。

但你要留意，的士牌過往是增值類別，而家已偏向收息類別(增值都仍有，但不算多)。

本質上，的是牌可以不斷有租金收入，而這個租金都會按貨幣系統的向上，而不斷向上的，但行業近年出現了叫車程式等新的競爭模式，對佢點都有影響。

所以，在長遠計，佢的增長能力只是中等，視為收息類的資產會比較好。

以你們年青至中年年紀，我比較建議集中係一些較有增長力資產，例如一些有增長力的優質股。

投資的士牌唔係唔得，但佢增長力唔會好強，財富增值效果，現時未必有優質股咁好。

------------------------------------------------

Q22108：

龔成，你好啊！好緊張，希望你會答我呢個投資初哥問題

我目前有HKD80,000資金專門預留作為投資用途，宜家30歲，希望係2022年2月前投資而賺到HKD160,000;請問有咩嘢建議？

我之前有月供股票買盈富同CLP,都有小量投資美股，只限tesla, ARK及台積電。

Thanks!!!!

龔成老師︰

我地做財富增值，一般希望做到架合理回報，係每年增長10-15%。你現時這個目標(1年升倍)，用股票投資去做，風險會好大，較難達到。

而且，1年係一個好短架時間，就算再優質股票，都要時間升值。1年太短，好易會有股價波動風險，令最終回報不確定性好高。

如果你無其他增值方法，建議你按部就班，透過月供去買入優質股，去為自已資產作增值。

你過往投資股票，都係有質素，用來增值係可以。但以你30歲年紀，應以增值為主。中電(0002)增長力不高，未必太適合你。

建議你用「平穏增長股」 + 「潛力股」作組合，去創造一個增值平台。

現在你每月先用5成儲蓄做月供。其餘先儲起，用一邊月供一邊儲蓄的策略。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

另外，我建議你加強每月儲蓄，這是重要的。

------------------------------------------------

Q22109：

你好呀, 老師, 我今年29, 有以下兩件事情想各你請教:

1. 想與姐姐置業 兩人月入共7萬 流動資金約有100 萬, 本住青衣區, 想買樓齡不超過20 年的, 正考慮藍澄灣, 同埋想問2人自住, 建議入手呎價為多少

（實用面積為500呎會過大負擔嗎？ 想做9成按揭，另想問下老師你覺得此區樓宇有升值潛力嗎？ 由於是第一次置業，想先請教老師有何建議?

2. 另外，因父母抽到居屋，費用為200多萬， 父母正考慮做多少成按揭，如一次過付款，流動資金便所剩無幾，但做按揭又要俾利息，所以想請教老師

建議按幾成才合適呢？

謝謝你的解答!

龔成老師︰

1) 青衣區內大型屋苑唔算好多，成個區潛力度只算中等。但東大嶼計劃落實的話，有機會刺激到這區樓價上升。

藍澄灣質素算中等，佢距離港鐵站較遠，係一個扣分地方，但整體算係可以。

但你這個作為自住樓，我建議較從你自身需要作出發點，去作出考量。你要諗這間屋，係唔係適合你長遠需要，講緊係未來5-20年。

呎吋方面，只要唔好太細(少於300呎)，符合到你生活要求，咁就可以。另外，我地自住樓一定要堅守一個大原則，就係長線要"供得起"。如果可以的話，置業係無問題。

2) 現時貸款息口在低位，無論係你和你父母，我都建議盡量做高成數貸款，去空出更多資金，做財富增值。

如果你父母本身好怕風險，就將按揭成數調低，但其實在財富運用上，高成數會較好的。但要留意，你自己買物業時，高成數按要比按保，你要平衡翻。

雖然高成數按揭表面上，係要比多左利息，但我地要從機會成本做考慮。你利用低息貸款，空出來資金進行投資增值(投資優質股)，去爭取更大回報，相信長線財富增值效果會更理想。

同時，你父母都可以因此留下更多資金，以備不時之需。

------------------------------------------------

Q22110：

Hi 呀Sir你同唔同意1211黎緊要加強品牌宣傳，佢銷量好似唔夠多，我明白佢有技術，但始終作為買家都想要多人識既牌子咁。

比如比亞迪做公交車，人地買左會唔會覺得自己個檔次低左

龔成老師︰

其實比亞迪(1211)品牌，的確有改善空間，特別係在國際市場。

但由於佢有技術，這方面係佢主要勢所在，品牌雖然唔算好強，但無損其投資價值。

而且，集團將來未必只係集中係出售新能車，可以會慢慢加大電池和新能車相關技術銷售。故零售品牌的強弱，未必對佢影響十分大。

其實，比亞迪其中一個往後的發展，就是「賣電池」，即是同不同的車企合作，而這方面的發展，自己的品牌，未必是核心。

------------------------------------------------

Q22111：

龔成老師，你好！距離上次請教問題，原來已經有1年7個月，最估唔到既係呢段時間自己既資產價值升左有65%(105->175)。主要係將過去持有既現金部分轉左去股票+每月部分剩餘資金作月供

所以出現左較大既升值。

一、打算準備置業，而因為我目前有接近6成既資產都係股票，因此若要置業就需要放左一D股票，目前股票（買入價，未扣除過往收息）如下：

完美醫療[email protected]，24000股
騰訊700@408，400股
銀河[email protected]，1000股
盈富基金[email protected]，6910（月供緊10000）
中生製藥[email protected]，10000股
小米[email protected]，3000股
建設銀行[email protected]，10000股
阿里巴巴9988@176，100股
港鐵[email protected]，1449股(月供緊3000）
閱文[email protected]，406股

我有考慮既係因完美醫療同騰訊升幅較大，再接觸到較平宜價較難，所以計劃：

1.先放左升值潛力無咁大：如建設銀行、閱文集團；

2.現時買入價與成本價相距較近：港鐵、阿里巴巴、小米

3.再考慮剩餘（優先考慮銀娛，及部分盈富基金）的股票。

你覺得呢個安排會唔會較好？

二、由2019年11月開始月供到而家，見盈富基金佔現時比例較大，想降到3000/月，因為澳門月供股票成本較貴，50hkd/隻/月，

唔想月供分得太散，想10000就分別5000福壽園，5000港鐵。會唔會都可以？但若果成功置業，到時候可能只月供到3000-5000。

三、最近睇完你本《80後千萬富翁》，好有感觸，特別係我對現時份工完全感受唔到滿足感，甚至厭倦，現時一有時間就會睇報表，樓宇相關資訊，

目標向住有基本財務自由後辭職。感謝你本書再俾我動力去向股票，樓宇，老闆方向發展。

龔成老師︰

一) 你的策略，有部份需要修正。

我地考慮持有邊D股票，要從佢是否適合你、組合平衡性和現價平貴(而唔係睇買入價與成本價的差距)，去作出考量。

你還未到30歲，建行(0939)這類收息股，唔適合你。閱文集團（0772）確定性較高，可以減持少少。

完美醫療(1830)現價偏貴，加上佢佔你組合比重較高，我都建議你沽出部份。

至於餘下股票，持有價值差不多。若你有需要進一步套現，你可以按比例去每隻沽少少。

二) 你這個調整，都可以。暫時你就用你新的調整，去繼續進行月供。到你置業後，才按需要減少月供供款，就可以。

三) 本書能幫到你就好，記住要做好財富增值，唔係短時間可以做到的事。要保持學習、維持現有投資習慣，你自然會一步步走向財務自由。

------------------------------------------------

Q22112：

你好！ 家父將於4年後退休，佢想我幫佢用1百萬做投資，希望長期收息亦可有小許本金增長。

80% 穩定收息
303 vtech 15%
778 置富 15%
1310 香港寬頻 12%
941 中國移動 12%
2638 港燈 15%
2800 盈富 11%

20% 增長股票
1810 小米 7%
981 中芯 3%
823 領展 5%
066 港鐵 5%

請問以上可以嗎？定比例或股票有些轉換會更好？
Thanks！

龔成老師︰

由於你父親，尚有4年就退休，投資上應要較保守。

你現時持股和配置，大致上都可以。但盈富(2800)唔係收息股，佢派息平均只有2-3%，但有穏定增長力，可持有。

另外，中芯(0981)和小米(1810)雖有質素，但波動性較大，不宜持有太多，故不要再加注。

現時大市只在合理區，資金唔好盡用。最好留有部份，一方面，可以等大跌市出現時，用來掃貨。另一方面，你父親都應該留有一定現金，以備不時之需。

------------------------------------------------

Q22113：

龔成老師你好，我想請教下你，我已經賣左我既單位，宜家手頭上現金有130萬，我和先生的入息加埋有6萬，我地想買返樓

但係樓齡新少少已經去到700萬，供唔起，我地打算租住先但係又驚上唔返車，請問我地點做會好d？

龔成老師︰

若現時財政，不足以直接承擔心目中的理想單位，你有2個方法。

你可以先購買一個較細單位，之後放租去「以租養樓」或自住。另一邊，就用優質股繼續增大個資金，之後才用較高成數去買大屋，令自己可以供得起。

這樣做，可以有平倉樓市的效果。你們資產，相對受樓價波動的影響，就會較細。當你地將來再換物業，會較有預算。

另一個方法，就係直接用優質股去增值。現時以租金回報率計，股市值博率會較高，潛在回報都會較大。

但由於佢同樓市，唔係有直接關聯。若長線樓市升幅跑嬴股市，變相反而令你置業成本上升左，得不償失。

你要自己衡量下，邊個方法會較適合你。

------------------------------------------------

Q22114：

本人49歲，丈夫51歲，一子將升中學。夫婦兩月入約15萬。在何文田擁有一物業，以丈夫名下持有，仍欠銀行180萬。

我與丈夫現共有公積金約700萬。現金260萬，定期200萬，基金保險200萬。我自己有9手滙豐股票、1手工商，1手港交所。

丈夫常想多買一層樓，因現單位不夠住，想多買一間三房單位，何文田單位出租。但我想以我們的年紀，再重新供一間樓是儍事嗎？

最近見大埔一大屋苑800呎單位，售950萬，26年樓齡，可考慮嗎？

龔成老師︰

其實，每個人都有自住需要，一個適合家庭長線生活的物業，係需要的。你用現時方法，買入一間3房，再將現有物業放租，係可行。

你現時有一定的現金，只要利用作首期，餘下部分現金，你每月供款，我相信可以應付，但的確，每月支出會增加左，你要計好數。

而你現有物業按揭$180萬，將其放租，我相信每月都有基本的正現金流，可以幫少少你每月供樓部分。

另外，如果日後能善用公積金，無論作為部分還款，又或投資一些能產生現金流的工具，都能有助你供樓的。

但當你再買入一個物業時候，你成個財富組合，就會偏晒係物業類，出現過度集中性風險。故你在買入新物業後，長遠來說，加大翻優質股的投入﹐去令財富組合回復平衡。

另外，你現時持有股票，都係有質素。但你要留意，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

你現時明顯，係偏重左係銀行股，未來要加大其他行業股票佔比，去平衡翻個組合。

以下是一些適合你的股票，現價都在合理區，可分注入貨。

平穏增長股︰金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

現時大市只在合理區，資金唔好盡用。要留有部份，等大跌市出現時，可以用來掃貨。

------------------------------------------------

Q22115：

龔sir，我是你的學生，想就爸媽的情況請問你意見：

爸媽是退休公務員，60歲，有長俸(每人每月約$15,000)。他們持有一個單位，市值約$1,000萬。下年中他們將搬來跟我一起住，請問他們應該：

(1) 將樓放租，租金大概$20,000/月，每月$2,000管理費；或

(2) 將樓放賣，將部份所得資金(大概$700萬)換入保守投資股票組合，希望有4-5%年回報，換取現金流。

請問那個方案較適合他們的情況？如是(2)，請問除了港燈般的公用股，還有那些是最穩健的收息股？因為就算領展置富這些近年都比較波動，謝謝

龔成老師︰

你父母由於會跟你同住，所以無自住樓需要，其實用分法1和2去處理，都係可以。

若你父母透過長俸和租金收入，已經足以應付基本生活支出，我會建議一動不如一靜，用方法1就可以。

相反，若現時長俸金額和他們生活開支，係有一段距離，你就可以考慮用方法2。

另外，你可以考慮將層樓加按，套現部份資金，去買收息股(最好係方法1，不足夠支付生活才用)。

但由於借貸始終有一定風險，唔好按太多，大約2成左右好了。同時你要明白，這樣會令你父母負債增加，風險會增加。

另外，如果你投資的股票不幸股價下跌，你就會出現「賺息蝕價」，對你不利。

同時間，如果日後加息，又或你收息股的派息減少，都會令你得到的息差回報收窄，你的回報會減少。

你要從實際情況和風險中，取一個平衡的方法。

以下是一些有質素的收息股，給你作參考。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)都可以。

如果你能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

領展(0823)都可以考慮，但因為佢都有一定增長力，所以股息率未必太高，你要留意這點。

我較建議方法（1）。

------------------------------------------------

Q22116：

我想請教，以收息股為例

我既3號仔，早前收左利息，我係咪應該將息做investment ，Otherwise 就achieve 唔到個compound effect ?謝謝你

龔成老師︰

其實複息效應，係分2部份。第一部份，係企業賺到錢，攞去再投資在業務上，創造更多盈利。

另一部份，就係你所講的派息。這部份，就要投資者，將這筆資金去再投資，去創造更多財富。

但如果你持有股數不多，收到股息可能較少，不足以買1手股票。你可以將這些股息先儲起，到有一定數量，目標股票價值又合理，就可以出手。

------------------------------------------------

Q22117：

龔成老師: 現時持股組合中，有1928金沙 $33.9買入，但擔憂政治風險影響續牌，以至可能帶來毀滅性打擊，

眼見880 澳博股價下跌不少，值博率上升，請問是否換馬較好?

龔成老師︰

金沙(1928)無論在賺錢能力、規模、物業質素和協同性等等，都係優於澳博(0880)。

現價計，雖然澳博值博率係較高。但長線計，金沙(1928)增長相信會較好，我比較建議用金沙，作為長線投資目標。

至於澳門賭牌問題，我係課堂上，都有課程的同學們分享過。簡單而言，佢成功續牌機會，會係較大。

------------------------------------------------

Q22118：

龔sir, 有事想請教你意見。我將會離職，公積金約有40萬可選擇取回或者繼續存放於景順，目前都係放高風險的100%環球股票基金。

僱主供款30萬幾（我唔洗供），而家收益9萬幾。

請問我應該選擇取回所有現金再作其他投資？（扣取放回MPF的錢之後應該還有28萬左右可以取回）還是應該先繼續放，等個市好啲再取出？（佢五年內再隨時取回）, 先謝

龔成老師︰

首先，你按翻人生財富配置就得，睇翻自己年齡情況，是否適合說基金的風險度。

另外，你可以睇翻隻基金表現和目標，去做決定。

例如投資的資產類別、投資策略、風險程度、市場、費用成本、以及過往的表現。

你可以睇佢過往5-10年，如果回報係比主要投資市場高，有機會值得繼續放在公積金戶口投資。

------------------------------------------------

Q22119：

老師，請問你有沒有覺得最近市況有點過熱，大市市值有點偏高？

我留意到HSI的市值已高達17倍，比以前一般10-12高出不少，另外一流的公司市值升很多不在話下，但連不少質素很好的2線公司都有2-3倍的升幅，

例如中國軟件，中遠海控，這情況令我擔心市場正在開始形成泡沫。

針對這種情況，我繼續保留質素很好的公司，但我應該把手上投資組合中質素一般的股票賣出，換成現金還是換成較好質素的股票比較好？

現在我有1百萬股票，1百萬現金，我希望5年後能夠增值成1千萬，跟隨老師你的步伐，請問我怎樣做才可以達成目標。感謝你的時間和思考，如果上面寫得不夠清楚，請見諒。

另外一提，在我只有十萬時看百萬富豪，給予我希望及目標，最終我得到百萬，果然意念成就事實。

現在，我正在看千萬富豪這本書，給予我新的目標，而且我已經不會再覺得是希望，而是信念，必定能做到的信念。

感謝你，這些都是因為老師影響到我。

我現在是創業，會計師樓老闆之一，算是正在做創富類的工作吧。

我想變得更好。

龔成老師︰

先恭喜你，達成首個理財目標，成為百萬富翁。

由於近期恆指加入不少新成份股，令到PE合理區，都作出相應調整。你預13倍左右，算係合理區底部。

中國軟件國際(0354)和中遠海控（1919）係貴，但整體大市依然算係合理區，暫時唔見有好明顯泡沫。

你持有優質的股票，應長線持有。但較一般的股票，若持有比重較多，可以考慮換碼至其他優質股

其實，我地投資股票，就等同投資一間企業。係要時間，比佢慢慢成長。一般希望做到架合理回報，係每年增長10-15%。

你現時這個目標，用5年將財富由200萬，增值至1000萬，用股票投資去做，風險會好大，較難達到。

其實，正如《80後千萬富翁》書中所講，要致富其實有5條路，投資只係其中之一。

而生意，都係其中一個出路。一盤生意打理得好，回報係可以遠超投資優質股，所以你想達至你的1000萬目標，可以先從自己盤生意著手。

若再用空閒資金，才用來投資優質股和物業，令財富組合更平衡，咁就可以。

如果你這筆100萬資金，係已經諗住預留去投資優質股。你可以先儲起，因為現時大市只在合理區，你可以等有明顯回調時，才用來慢慢分注入貨。

------------------------------------------------

Q22120：

老師，不知不覺就過左2年多没有message你, 其間我有睇你書及留意你facebook

亦成為我這幾年的鼓勵，現在有些問題想請教你意見, 我同男友想在明年初結婚, 我們都打算未來幾年內移民, 我們打算未來1-2年生BB,

我男友想買樓, 他會用大部份積蓄, 但我反而叫他租樓住, 因為咁様，cash flow會較多, 而且怕幾年後樓價會跌, 放樓也不容易, 一買一賣涉及很多費用, 又要用錢装修

我們這個情況, 你會有甚麼建議? 贊成我男友買樓嗎？還是盡量租樓, 留多d cash係手?

因政局常變, 而買樓有3年禁售期, 因為我才建議男友租樓, 但他不喜歡租, 只想買, 你意見如何? 這刻可怎樣為將來同移民打算?

龔成老師︰

過幾年樓市升跌，無人知。從自住角度，若你係有實際生活需要，而有"供得起"，置業都係可以。因為除了優質股，物業都係一種資產，都係可以幫到你累積財富。

較理想的情況，就係在置業同時，可以留有一定優質股係手，保持增值。令成個財富組合，唔會過於遍重物業，因而造成過度集中性風險。

但其實，你距離移民只有幾年時間,如果移民時，你可能不會保留任何香港資產，我就建議你地租屋會較好。

加上一買一賣的成本高，同時無人知樓市到時是高是低。

因為本身樓市有一定波動性，加上装修和買賣成本都高，還有額外印花稅等問題。為幾年生活，而去置業，未必真係值得。

你反而用移民前的幾年時間，將資金投資一些優質股，去幫你移民前做些增值，相信會較好。

而你男友想買樓，我估有機會係從投資角度出發。但其實現時樓市算略貴，整體租金回報率不高。投資值博率計，會係股市會較高。若他真的有從投資角度考慮，你可以提一提他這一點。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21381-Q21400）

Q21381：

龔Sir 你好！ 請問如何計算企業價值呢？

700 騰訊為例，用NAV (778M/9.6bn no. of share)去睇，2020 佢只值八十幾蚊人仔，化返做HKD 都係一百蚊左右。

而家股價$600, 係咪當中包括左好多市場情緒同對未來憧憬既估算？想請教你通常點去量化。 感謝

龔成老師︰

你上述所講的價值，只是企業的「資產價值」，這是衡量企業平貴的其中一個方向，但絕對不是唯一的方向，同時，並不是所有企業都適用的。

在些企業，其資產價值與盈利能力、長遠發展未必有太大的關係，市場會較著重企業的長遠發展力，多於擁有多少資產。

簡單來說，有些資產有一定的市場價值，有些資產無太大的市場價值。有些企業長遠的發展及盈利與資產有一定的相關性，有些企業則無太大相關性，有基本的資產後，長遠的發展較受大環境影響，而不是有多少資產。

騰訊(0700)偏向係潛力股類，市場會著重將來，而不單是過去資產，同時會著重其業務價值。

至於點去計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

------------------------------------------------

Q21382：

老師現年48歲，月入4萬8，想每月投資2萬

有一層做咗400萬按揭嘅樓，已租出，租金可cover 每月銀行還款。

有現金50萬
冇股票（因曾輸過）

有保險基金單50萬
想5年後移民，想喺呢幾年做進取嘅投資！睇咗你嘅資料，但遲遲未決定到點入手！

銀行職只又不時想我買保險產品！
請問有咩建議？

龔成老師︰

我地進行理財，應說建立一個平衡的組合，你現時有物業、保險基金、現金，但就缺少了股票，因此應該增加翻股票。

你過往投資失利，相信是由於未了解股票最基本原理，只要你往後明白，投資股票就是持有優質企業，長線持有等企業成長，就得。同時，要建立平衡組合，不是賺差價。

另外，你話「想5年後移民，想喺呢幾年做進取嘅投資」，要留意，財不入急門，加上5年時間不算長，反而不能過度進取。

以你現時情況，我建議你以「平穏增長股」 去創造一個增值平台，在這5年為你的財富增值。

現在你每月先用5成儲蓄，即$10000做月供。其餘先儲起，用一邊月供一邊儲蓄的策略。

月供方面，你可以選擇投資這些平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

大市現處於合理水平，那50萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

到你將要移民的一年前，再慢慢沽出手上持股套現，就可以。但唔好到要走個一刻才一次過沽貨，咁樣會令股價波動性風險大大提高。

至於"保險"只係理財中防守部份，買足夠保障就可以，增值可以留比優質資產(如優質股、物業等)去做，個效率會較好。

你現時那份保險基金單，可以睇翻基金的投資策略，所投資的資產類別、投資策略、風險程度、市場、以及過往的表現(可以睇佢過往5-10年，只回報係比主要投資市場高，就可以考慮繼續投資)。

------------------------------------------------

Q21383：

Hello 龔sir!我現有大概HKD3百萬現金及數百萬股票。

一個人租樓住（租每月HKD20K），無小朋友，考慮3 年內退休，其實應唔應該再考慮買樓自住（死後層樓冇用）？

如買樓就無晒現金同要賣股票了(50 歲,就退休好難做按揭)，變咗3年後唔夠錢退休。。。

繼續租又好似好唔安穩因為租金會一路升，同業主可能會收樓...矛盾中 (退咗休會想讀吓書，所以都有不少洗費)

龔成老師：

以你的情況，租樓會較好，第一，你現時做按揭未必做到，因此去唔翻現在的生活質素，第二，你無後人，因此投資物業的誘因會減少左。第三，買樓後會用盡資金，反而風險提高左。

租樓雖然較好，但坦白講，每月$2萬的租金，長遠都會對你有一定的生活壓力，所以，可能要轉一些較平租的地方。

如果利用$300萬，投資不同的工具，收息股、低風險基金、年金、債券等，建立一個組合，如果能平均有5%現金流回報，$300萬即是每月收息$12500，都算是可以幫你提高現金流。

當然，你到時可以再利用手頭上的股票，進行配置，調整一下，如果持有一些現金流強的類別，就可以增加你到時的現金流。

你要思考一下長期的收入及支出情況，是否要調整生活質素，又或要日後想方法增加收入，或略為延遲退休。

------------------------------------------------

Q21384：

我大學嗰時讀嘅Investment，好似無乜用。

龔成老師：

大學課程，其實我都有讀過「財務系」，坦白講，學校教的是學術，我會認為有基本作用，但睇巴菲特相關書，以及年報，會有用得多。

------------------------------------------------

Q21385：

我想問阿sir，睇youtube聽講你以前未價值投資法時，試過儲一筆錢又蝕左佢，儲一筆又蝕左。

其實，因為我剛剛炒衍生工具蝕光了投資户口的錢，一陣約見了心理醫生了，想問下你當年總共蝕左幾多錢？

同埋蝕左幾多次，可以分享下你的心路歷程嗎？

我蝕左本金十萬，還有14萬儲起在家人到，以前都試過買牛熊證蝕曬錢，所以無將所有錢拿去投資

因為以前蝕曬錢，所以好幾年吾再投資，今年2月入返市，你都知呢排跌市，一買就蝕，實在無法子，又買返衍生工具，結果賺13萬，但後來又蝕返，想追又一直蝕，最後 total lose

睇醫生是因為炒牛熊證心理承受吾住了，需要求醫，好後悔買返衍生工具，但跌市蝕自己又控制吾住

龔成老師：

我20年前，都是短炒者，投機，玩幾年，輸足幾年，當年未算好有錢，相信蝕$10萬左右（其實唔記得），但當年已是全部身價，應該話輸左幾次身家。

之後我明白，衍生工具原本發行商食水好深，散戶只有做水魚，所以，我決定以為唔玩衍生工具。之後只做優質股，長線投資，就開始不斷賺錢。

我之後做銀行同證券行，見大部分輸錢的客，都是偏向短炒、玩衍生工具的！

當然，你問我有無人贏錢，是有的。但就我觀察，長線投資贏錢的人，比短炒的較多。

你這類人，我在過往做銀行時見唔少，因為玩衍生工具輸身家，所以，點解我現時，不斷強調再強調，不要短炒。要買優質股長線持有！

另外，如果你分析全球真正賺錢的投資者、經金經理，佢地都無人短炒，都是長線投資的，巴菲特都是反對短炒的，佢都唔用技術分析。

因此，我相信長線投資，是真正助我地贏錢的方法。

我建議你倍止所有衍生工具投資，你現時同賭錢無分別！

之後，慢慢儲現金，月供一些穩健的股票，或ETF，例如盈富（2800）、高息基金（3110），我相信是適合你的。

------------------------------------------------

Q21386：

龔成老師你好,多謝您一直鼓勵我地要投資理財,同時經常比正面的信念我地,實在感恩, 自從留意你FACEBOOK後

本人33, 由2019年開始投資,開始時都有小小升調,但最近大部份買入的股票都回落,現時股票價值同入的資金差不多,之前跣時用了大部份資金,現時手持現金好小,

以下是我的股票組合,希望你能給予意見應該如何調配, 感恩

2800 @ 25.82 4000股
3067 @18.52 4700股
1038 @53.72 1600股
0066 @43.95 1706股
1177 @7.21 2800 股

3033 @ 8.005 1600 股
1810 @26.65 400 股
3188 @52.6 200 股
1038/3067 虧得最多,是否需要減持,謝謝

龔成老師：

最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

股票中短期上落好正常的，不用太過理會，睇「企業長期質素」就得。

現時你的組合，都是有質素的，可以持有。但我見比例上，潛力股類別開始有點多，你要注意翻，因為這類股的風險較高，股價上落會較大，因此在比例上不能太過多。

長建（1038）是不錯的企業，有一定規模，資產亦有一定質素，並擁有相當充足的現金，而過往的發展亦很理想，能平穩發展及再投資的回報亦不算差，而開拓新業務亦能平衡當中的風險回報，整體有相當的質素。不過，規模大，國家保護資產，都令這企業增長力有所減弱。

長建有不少歐洲及英國業務，脫歐因素、歐洲經濟較弱難免對其造成影響，反而，脫歐情況明朗化會更有利企業，可說是最壞情況已過，之後將會慢慢向好。

其實長建近年仍不斷進行投資，但由於歐洲業務較弱，令股價並沒有顯現，但只要歐洲情況慢慢好轉，當中的資產價值就會更有效反映。

不過，歐洲的經濟，總不能用「強」去形容，所以長建並不是高增長類，只是最弱時期相信已過，往後會平穩向上。但回勇之路，仍然較長。

另外，由於企業已有一定規模，加上作風穩健，發展的速度不會太快，但平穩增長則無問題，手持的現金相信會逐漸收購其他海外業務。

是收息及平穩增長類，現價是合理的。你持有就得。

至於安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

你一定要睇長線，不要太著重短期股價，同時由於現價仍唔平，所以如想加注，一定要慢慢分注。

最後，如果你現時持有現金比例太多，就不要投資住，儲下現金先。

------------------------------------------------

Q21387：

龔成, 您好! 手上持有渣打2888 兩年 - 500 股 @HK$54唔係好多, 見派息不好, 又沒甚麼特別消息.......是否應該放晒佢呢? 謝謝 (私人回覆OK)

龔成老師：

渣打集團（2888）質素只是一般。

雖然未到劣質，但質素不高，但本地銀行股中，賺錢能力算是較弱。加上銀行業近年的環境不及過往，賺錢能力不及以前咁好，相信佢之後，都只是好基本增長，不要對股價有太多期望。

投資價值只是一般，我會建議考慮其他更有質素的銀行股仲好。

因此，你可以考慮部分或全部，轉其他。

------------------------------------------------

Q21388：

您好！現時手上有800股1928(金沙)於$32時買入，現考慮趁行業復甦前增持。

不過看過它2020年剛出爐的年報，它的年末現金由2019年的24億美金，大跌至8.6億；這個數字比起它的流動負責14.1億還要少。

一直以來您都看好澳門博彩股，但面對現時的情況，自己對它變得有所保留，甚至企業本身「捱唔住」。請問您認為這個想法是否恰當？

龔成老師：

上述的情況，會令風險度略有提高，因此會少少扣分，但未至於對佢有倒閉影響。

第一，佢規模好大，品牌、資產、現金流強，要在市場進行集資，好易。

第二，佢負債比率未算好高，要再問銀行借貸，有好多空間。

第三，佢持有的酒店等資產好有價值，如果真的經營環境差，要賣出套現救企業，絕對可以。

第四，佢本身現金流好強，只要澳門好翻少少，佢都有一定的現金流，不斷有資金翻。因此，唔需要太過擔心。

------------------------------------------------

Q21389：

龔sir你好。Follow左你好耐，亦上過你堂，好遺憾無早啲認識你。

之前有買1211，但因為唔夠耐性錯過左佢爆升時間，之後16左右買吉利升左一倍都無放。

因為唔想再錯過，而家佢跌到得$20左右，請問你覺得吉利前景如何？值得再長揸嗎？謝謝

龔成老師︰

記住，我地投資優質股，一定會係長線。因為賣出股票最大的風險，就是買唔翻。

不少人會以為「若果現在賣出 到時再以低價買入」，中間可以賺到個波幅。

但「到時再以低價買入」？真的一定會預期中發生嗎？？？

就好似我經常說，700多年不斷上升，388升100倍。如果我地升少少就沽貨，而唔係用質素，去決定是否持有，我地就無可能賺到近100倍回報。。

所以，你現時長線持有吉利(0175)係正確。

吉利(0175)本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。

另外，佢早前杭州灣新工廠正式發布純電動新品牌新車「極氪（ＺＥＥＫＲ）００１」，宣布吉利進軍高端電動車。

這些動作不單有利佢有中國發展，同時長遠，可能加快了海外發展速度。因此，這股長遠仍是正面的。

現時價位在合理區頂位，股價波動，現貨可長線。如果現價入貨，小注都得。

------------------------------------------------

Q21390：

老師你好，一直遵從你的指導每月將資金一半用來月供，另一半用來儲現金等大跌時入貨。

由於不知道等到何時大市才大跌，可能一等就半年甚至一年或更長時間，就覺得把這筆現金放在銀行的回報率太低了。

請問老師有沒有推薦的現金替代品，可以令這筆現金可以比放在銀行有更高的回報？謝謝！

龔成老師︰

無錯，我地唔會知道下一個大跌市，係何會出現，可能係1,2年後，但同時間可能就是下一天。

因此，我地最理想係持有現金去等待，因為現金流動性最高。

若你將這筆資金，用來買了其他理財產品，要贖回可能需要些時間，甚至會被收取一定的提早贖回費用。

而用來先買部份較穏定的股票(如收息股)，我都唔建議，因為再穏定的股票都有波動性，到時會跟隨大市下跌，以你可投入資金減少。

所以，我建議你都係持有現金最好，最多可以將部份用作短期定期。我地投資唔好睇太中短期，要用整個組合的長線發展機會，去做考慮，因此用現金等待，會係較理想的做法。

------------------------------------------------

Q21391：

龔Sir您好，我夫妻倆在澳門從事教育工作

對於投資沒有太多觀念之前都是拿錢給長輩在國內買樓買車位。

1. 去年疫情開始後股票大跌後，開始學買股票，我該如何學起？

2. 該從你的哪本書看起？

3. 之前做過一些短炒確實賺到錢，但是現在回頭看若當時沒賣掉那些股票的話現在賺更多，現在決心要開始好好學理財放長線。

我現在這組合可以嗎？會不會太保守還是太高風險？

4. 我該繼續專心供一隻還是先分散幾隻建立好組合後再慢慢提高持有比例？

夫妻倆32歲 未有子女
夫妻倆年收入：約110萬hk

現有流動現金約: 20萬
儲蓄險：40萬
(今年剛繳完2025年後開始拿利息)

國內放租樓盤：廣州2樓、中山1樓、中山3車位
(租金拿來當作給長輩的家用，全部以交清貸款)

固定支出：
在澳租樓(11000HK)
兩人保險每年約:10萬hk
年收入至少15~20%捐給慈善機構
無負債

之前
每月供 5000
00066 港鐵 或 00388 港交所

現在打算每月拿8000出來月供股票

00270粵海 或00066 港鐵 $2000 2選1
00087 太古股份公司Ｂ或 港交所 $3000 2選1
9988 阿里巴巴、 00175 吉利汽車、01211 比亞迪$3000 3選1

現有股票 組合總值約16萬HK。組合總表現： 約+7%
分配如下

00066 港鐵@45.172 18.9%
00388 港交所@406.930 19.4%
00694 北京首都機場@5.240 7.28%
00883 中國海洋石油$7.648 10.02%
01398 工商銀行@5.240 3.32%

02588 中銀航空租賃@60.9 8.67%
02800 盈富@24.2 17.6%
00270粵海投資@12.240 2.4%
01810 小米集團 @28.109 12.33%

龔成老師︰

1) 就初學者而言，你要加強吸收知識，多閱讀理財類別的工具書，以及多接觸財經新聞，而進修相關課程亦是重要的知識來源。

另一問題是價格，初學者未能捕捉股價的高低，所以，策略上宜用分注買入的方法，將一注資金分成多注，然後在不同的價位分別買入，這樣就可避免一次過在高位買入的風險。

2) 你可以先睇我寫架"80後百萬富翁"、"財務自由行"和"股票勝經"，都適合初學者。之後，才看我其餘9本書。

以下是我的12本書：

《80後百萬富翁》（第9版）
《80後2百萬富翁》（第4版）
《80後3百萬富翁》（第2版）
《財務自由行》（第7版）
《大富翁致富藍圖》（第5版）
《50優質潛力股》（第4版）
《50穩健收息股》（第3版）
《50值博倍升股》（第3版）
《股票勝經》（第3版）
《選股勝經》（第2版）
《年報勝經》（第2版）
《5年買樓4部曲》（第2版）

3) 正確，優質股的確係長線持有，才會有最理想的增值效果。

我地做財富增值，除左講增值能力外，也要注重成個組合的平衡性，當中要包含不同的優質資產(如物業、優質股等)。

你現時組合，明顯係偏重左係物業類，未來要增加優質股的投入，去令組合平衡翻。

而"保險"只係理財中防守部份，買足夠保障就可以，增值可以留比優質資產(如優質股、物業等)去做。現時供完的保險可以不變，但未來唔好投放太多資金在儲蓄類保險產品。

我先講你現時持股組合，北京首都機場股份（0694）、中銀航空租賃（2588）和中海油(0883)本身都有質素的，但只屬中等，不宜持有太多，暫時唔好再加注。

另外，我地組合唔好太偏重係個別企業或者行T%，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於3成，而單一企業不要高過15%。

你現時有個別股票，港鐵(0066)和港交所(0388)係超過這個比重，但由於佢地好優質，所以唔需要沽出，只要暫時不要加注，讓新資金慢慢調節就可以。

但盈富(2800)係一個包含55間不同行業的股票組合，故不受15%所限。

新月供組合方面，你可以用粵海(0270)，因港鐵(0066)已有一定貨。再加港交所(0388)，而餘下3隻，阿里巴巴(9988)會係3隻中波動性較低，如果你想進取D，可選另外2隻。

但現時比亞迪(1211)偏貴，不宜做月供。你可以用吉利(0175)或GX中國電車（2845）代替。2845這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

另外，我建議你加入一隻盈富(2800)，用佢做主力，可以令你個組合平衡性高D。

你現時用於月供金額，相對你們收入比例唔算高。以你年紀，應盡力做好財富增值，盡可能將閒錢，都放在投資計劃上會較好。

現時大市只在合理區，每月儲蓄宜先用一半去做月供。餘下一半和20萬就等大跌市機會，才入市。

4) 我地唔好成個組合，只集中係1,2隻股票身上。(當然，盈富除外。)

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

------------------------------------------------

Q21392：

老師，我今年32歲，有兩個小朋友，家庭每月收入30K，持有下列股份。

想問個倉比例合唔合適？有無邊隻唔應該再等？要唔要減持？

如果想睇你啲書，你推薦先睇邊本？
多謝！

9988阿里巴巴248 @300
9618京東集團327 @200
3888金山軟件60 @1000
0285比亞迪電子52.6 @1000
0327百富環球8.2 @4000

0880澳博控股9.8 @5000
3988中國銀行2.9 @120000
0914海螺水泥50 @2000
1530三生制藥7.55 @5000

龔成老師︰

我地係創建一個財富組合時，最重要係有優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

現時你持股中，三生製藥（1530）和百富環球（0327）質素算係中等，不宜持有太多。

安徽海螺（0914）佔組合比例開始多，不宜再加注。

另外，我地個組合唔係可太偏重於個別行業或企業，相同行業不可佔組合多於3成，而單一企業不要高過15%。

你現時中行(3988)明顯係佔比過重，而且此股主要用來收下息，唔會有太高增長力。以你32歲計﹐此股太保守，你應先做好增值部份。

因此，你可以慢慢將此股，換碼至其他較有增長力的優質股。

其餘股票都有質素，長線持有就可以。

以下是我的12本書：

《80後百萬富翁》（第9版）
《80後2百萬富翁》（第4版）
《80後3百萬富翁》（第2版）
《財務自由行》（第7版）
《大富翁致富藍圖》（第5版）
《50優質潛力股》（第4版）
《50穩健收息股》（第3版）
《50值博倍升股》（第3版）
《股票勝經》（第3版）
《選股勝經》（第2版）
《年報勝經》（第2版）
《5年買樓4部曲》（第2版）

你可首先睇：

《80後百萬富翁》
《股票勝經》
《財務自由行》

之後再睇其他。

------------------------------------------------

Q21393：

龔Sir,我啲股票比較高位買入，家陣坐晒艇，想你幫忙睇睇

9988，均價285
1810，均價29.27
1833，均價116.7
1024，1手價291（250入見穿左240即斬，導致均價升到呢個位)

除左快手之前想短炒（但依家都變長揸），其他一直都打算長揸或再加注。

龔成老師︰

現時你全部股票都在虧損狀態，好明顯你投資方法上，出現左核心性的問題。

首先，記住我地投資係長線持有優質股，而唔係做短炒，去賺差價。

見你不少股票都是較高位買入，相信你較易受市場氣氛影響，同時你由於未有企業估值能力，因此在貴的價位買位。

這些股票雖然帳面值係虧損，但有質素，你可以守。但若個別股票，係佔組合比重好多，就要沽出部份去平衡風險。

建議你在再投資前，先學好正確的財富增值理念，和投資相關知識。你可以睇我寫架"80後百萬富翁"、"財務自由行"和"股票勝經"，都適合你這類初學者。

就算學好，在經驗較淺時期，我都建議你先用月供，或分注的投資策略。等你真正有企業估值能力後，先一手手買，會較好。

------------------------------------------------

Q21394：

龔sir 我而家20歲 Year2

兩年前喺Facebook見到你，努力儲咗兩年錢，今年開始Value Investing。

目前持倉
$70.45 一手領展
$44 一手港鐵
$26.5 一手2388中銀
$7.43 一手置富
$5.41 一手工商銀行

1. 想請問可唔可以比少少意見我嘅portfolio

2.同埋港鐵公佈業務去年虧蝕。現價會否太貴？ 我需要換股嗎？

龔成老師︰

1) 你現時持有股票，都係值得長線持有。

但我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

因此，以你現年20歲計，你組合持股有少少保守。置富(0778)和工行(1398)主要係用來收息，增長力麻麻。你現時應先著力增值部份，故這類收息股就唔係咁適合你。現貨可持有，但不要加注了。

將來，你可以加入一些潛力股，去提升組合增長力。例如中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）。

但由於潛力股有一定波動性，你投資經驗較淺，暫時不宜持有太多，大約3成好了。到你累積到較多經驗，才慢慢將比重提升至5成。

同時，現時大市只在合理區，資金唔好盡用。最好留有部份，等大跌市出現時，可以用來掃貨。

2) 我地去分析一間企業時，要用「長線」質素和發展去考量，唔係只係集中係1,2年數字。

上年由於疫情關係，對不少企業都造成嚴重的負面影響，港鐵(0066)也不能幸免。

但上年度佢虧損的主要原因，係因為物業重估數字，這只是一個會計上的數字。如果扣除這個因素，其實佢在營運上，是有錢賺的。

但睇翻佢長線，有質素。佢是全港唯一的鐵路營運商，加上政府會比佢地產方面的優勢。長遠正面。

雖然近年有不利因素，影響了中短期盈利，雖然會扣分，但最核心的本質不變。

睇翻資料，港鐵過往正常年份，一年可以賺$160億，就算扣除物業重估，都有過百億，當中包括了鐵路經營部分，以及物業的發展、物業的租金收入。基本上，每年都過百億的。

物業發展部分，長線正面，收租部分，無問題。

因此，長遠發展仍是正面的，可長線持有。現價大約在合理區中上部，未算貴。但由於你有貨係手，如果想加注，要等佢回多1成以上，才出手會較好。

------------------------------------------------

Q21395：

老師你好， 因為不經意 在facebook 發現你， follow你 一段時間也有購買你的書籍， 對我不善理財的人， 實在獲益不少！

因為最近工作 非常艱苦 應該很快失業， 我先生已經因為身體問題，去年年尾已經失業！

所以希望用手上的現金資本，向你請教適合的投資方向。

以下是我的 財務背景， 請你多多指教!

本人50歲 ，目前仍然有Part-time工作， 但因為全球因疫情影響經濟，公司業績非常差。我應該估計會在兩個月內失業, 基於經濟問題及身體狀況，應該再有工作機會。

丈夫56歲 因為身體健康問題，2020年尾被迫退休

沒有子女

目前有資產如下:

1. 4個物業(1個自住，2個放租私樓及1個工厦放租)
所有物業合共市值 HK$2300萬

4個物業合共尚欠銀行貸款 HK$750萬
租金扣除每個月銀行供款差餉管理費及物業稅 (包括自住物業在內)剩餘HK$3600.00

2. 已經投資基金 (高風險 )$80萬
每月派息HK$3600.00

3.股票
過往20年投資股票,已經很有耐性等待，持有股票回報欠佳,種種原因，輸了很多錢 ！

因為近1年看 你facebook 和你的書本 所以決定賣了已經持有十多年 的股票， 希望重新再計劃好 ，才重新買股票作遠投資 。

目前手上只持有:
2638*5000
1038*1000
2800*1000

4.現金:HK$200萬
因為手上持有四個物業 ，仍然有銀行掛鉤存款，大概1.3%
即每月利息合共有HK$1500元

希望 保留100萬現金作為日常全活備用金

5. 人壽及各項醫療保險(所有共2人):HK$10,000.00

6.月供高風險基金: HK$5000*10年(2020尾開始供)

7.日常家庭支出:HK$20,000.00( 不包括保險和月供股票及基金)

8.投資目標:
希望利用手上200萬現金，投資股票，作為未來十年退休日常生活費。

若是中途此現金投資回報不夠支付10年生活開支， 五年後可以，減持基金換取現金 作生活費 或提取 保單內的 儲蓄 價值 昨日常生活費。

估計10後,我先生可以提取mpf大約有HK$150萬( 因為目前有接近100萬) ,希望盡量減慢賣物業資產的日期， 以作日後長遠生活開支。

9. 由現在至未來十年投資計劃-銀行月供基金:

月供費用HK$20000.00

目標 計劃月供股票分配組合內容:
1.2800盈富*$6000(30%)
2.2638港燈*$4000(20%)
3.1038 長江基建*$4000(20%)或1113長實， 請提供意見 二選一 ，那一隻較可取？
4.3140 領航標普500*$3000(15%)
4.3067 安碩科技*$3000(15%)

計劃年期: 3-5年(最少36月=HK$720,000.00)

拜託你提供意見，直接評價，我們目前的財務組合 是否恰當作為長遠退休計劃安排？

感謝你經常分享你的經驗和意見
期待你的回覆

龔成老師︰

以你和你先生的情況，由於未來就業收入不確定性較高，加上你們都較接近退休之齡，投資策略唔可以太進取。

你現時物業算係有正現金流，可持有。但考慮到若不幸有部份物業不能出租，會出現額外開支。

另外，你在整個財富組合中，太過集中物業類資產，因此在之後的財富配置，不要再增加物業類的比例，而之後亦未必適合投資太多地產相關類的股票。

係你成個財富配置上面，我地會保守少少。你係投資前，先儲下一筆最少等同半年開支的應急錢，會較理想。

而所講的高風險基金，雖然以派息率計，尚算可以。但你要了解這部份回報是否保證，而當中又有什麼風險，背後是投資什麼股票、債券或工具，你要了解清楚。

例如債券，佢是否投資的都是A級債券。唔好投資一些高收益債券，其實這些是一些評級不高的垃圾債券，風險不少。

至於現有持股可以，但佔整個財富組合比重太少。現時太偏重左係物業類，未來你要加大翻股票部份，令成個組合健康。

月供組合方面，盈富(2800)和港燈(2638)係可以，而長建(1038)和長實(1113)，我會建議你用1038，佢主要係投資一些公用事業，相對較穏陣，而且派息都理想。

而領航標普(3140)和安碩科技(3067)就波動性較高，以你現時情況，我唔係太建議你用。同時3140將會退市。

你可以在以下的「平穩增值股」+「收息股」去選擇。「平穩增值股」有平穏增長力，加若干股息。而「收息股」則主要係收息，無乜增長力，但波動性較低，會較穏陣。

但緊記，隨著年齡增加，慢慢要增加收息股的比例，去減少波動性風險。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、平安(2318)。

同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

現時大市只在合理區，資金唔好盡用。最好留有部份，等大跌市出現時，可以用來掃貨。

若然你在月供中途不幸失業，可以先停一停月供都無問題。所有投資的大前題，都係用閒錢。如果資金係用於日常生活或一些短期的必需性開支，就不要動用。要先確保好基本生活，才可以進一步做財富增值。

------------------------------------------------

Q21396：

龔成老師，本人27歲，文職工作，月入約$17000，現在想讀兼讀制大學（外國大學提供的課程，讀商業和英文的範疇，但在香港讀，有資歷架構QFlevel5,今年9月開學，學費共$12萬，讀兩年）

本人現持六萬現金，諗住半工讀。想讀大學的主要原因是增值自己英文的程度，同埋希望有張沙紙多點自信有多點保障。

但又擔心冇咩錢投資，因為要交學費同埋應該會少時間學投資（本人初學，只投資過債券），加上，27歲才開始讀又好似好遲又唔知讀唔讀得黎。

好迷惘，想請教老師意見，會否覺得我應該全副心機集中儲錢同學習財務知識/還是覺得值得一試去讀？先讀一個學期試下？

大學學歷是否很重要？
謝謝！

龔成老師︰

其實學習係無分年紀，但最重要係，這個學習所得到的，是否對你長線發展，係有實際的正面影響。

例如你現時工作的行業，要升職加薪係好需要一紙較高學歷的證書。或者課程當中某些知識，對你將來發展有好大幫助，你都可以考慮進修。

相反，如果你係純粹感覺有張紙會增加安全感，或者你是抱著"人有我有"心態"，我就有保留。你要先認清楚，這個大學課程是實質上，還是心理上幫助你。

另外，如果想增值英文，其實有好多方法，未必一定要上課程。而學習財務知識和報課程係無衝突，你係可以2者並行。

你自已先認清個情況，再決定這些錢，是進修，還是投資。

若然投資，你應該買入一些有質素的優質股，把握在年輕時，累積一筆較理想財富。債券增長力有限，不太建議你用。

------------------------------------------------

Q21397：

你好，我是新讀者，看見板面內容後，真係增長好多股票知識。謝謝你的無施分享。

本人43歲，有2個小朋友，同丈夫供緊層樓。之前貪快，已經係0175，3800，0788虧錢離場。

現手上有貨
2138 ：6000股
2333 ：1000股
0788 ：20000股 （1.27入）
3333 ：2000股 (22.3入）

請問這個股票組合適合嗎？想放棄3333 改入1516，3988適合嗎？

或是直接入你提議嘅3067（安碩恒生科技）好？
感謝你的意見。

龔成老師︰

記住，不要用自己的買入價作為何時沽出的指標。坊間經常用買入價作為何時沽出的標指，這是極度錯誤的。

沽出是基於這股已偏貴，又或沒有前景，質素有問題，而絕非由買入價決定。

因此，若你分析該企業的前景一般，才可沽出。

你已沽出的3隻股票，除了保利協鑫能源(3800)質素一般，其餘吉利(0175)和中國鐵塔（0788）都係有質素，你係應該長線持有。

現有持股方面，香港醫思醫療集團（2138）都有質素的。不過業務中短期會有少少波動，除非你現時現金好充裕，否則我建議你沽出部份，去平衡一下你的風險。

至於，中國恒大（3333）業務本身不算差，但中央有時會出打擊樓市政策，加上佢本身負債極高（這是最大問題，風險太高），相信會對佢有一定的影響。

你預佢中短期都會波動，你現時小注持有，都算勉強可以，但都要明白風險。

融創服務（1516）有質素的，主要在中國提供物業管理服務及增值服務。

財務數據唔差，生意與盈利增長快，現金流強，整體正面，這股有長線投資價值。不過，現價貴，如投資，真的小注好了。

而中行(3988)而價合理，但佢主要係用來收息，唔會有太高增長力。以你年紀，這類股票只宜小注。

安碩恒生科技(3067)都有質素，佢係追蹤包含恆生科技股指數，有投資價值。

但留意你上述股票(除了中行3988)，普遍波動性風險都係較高。我地創造一個財富增值組合時，最重要係平衡性，唔可以偏些係一些波動性高股票。

以你43歲，都可以投資安碩恒生科技(3067)這類潛力股。但若果你投資經驗不多，或者較年長，比例就不宜太多。

同時組合上，應加入一些平穏增長股，並以之作為主力。這類股票波動性無咁高，但有平穏增長能，可以令組合更平衡。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

------------------------------------------------

Q21398：

Hi 老師，你好，想請教你，買咗以下股票，可以比一些意見嗎？

同睇到你post 又想月供，我39歲，月糧$19,000每月可儲$2000,如果月供可揀什麼？謝謝

778
$9.09 @2000
$8.92 @3000

11
$177.9 @400

1928
$44.55 @1200
$42.5 @800

9988
$285 ,$254.4 各1@ 100

1833
$117 @100

6820
$3.78 @8000

2400
$97,$90.4,$67.8 各1手

1918
$35.95 @1000

6088
$3.18 @6000

1024
$306,$283.6 各1手

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你39歲，應先以增值為主。你現時買股票，都質素。

但當中，融創中國（1918）業務不差，有規模、品牌、銷售網絡，但同時有一定風險。

首先，中國樓市如果逆轉會有很大打擊，另外，這股的負債超高，無事就無事，有事大件事。

因此，投資這股不是不可，因為不是完全無質素，但要明白背後的風險，自己要控制好注碼。

IT HON TENG（6088）質素中等，雖然都有投資價值，但企業不是最高質之列，因為企業的賺錢能力始終唔算好強，每件產品賺錢唔多。

同時業績有回落情況，不過，這股始終不是無質素，現貨可持有，但暫時不宜再加注。

我發現你主要問題不在於選股，而是手上不少股票的買入價跟現價都有相當距離。雖然部分可以守，但你要預起碼等一段較長時間。

其實你的情況，都是不少投資新手會犯的錯。第一、買入當炒股；第二、在市況最旺（即是最多人認為市場好景的時候）以最貴的價位買入。

其實這些問題，係可以避免。方法其實好簡單，就是投資較穩健的股票，又或是盈富基金（2800），分注買入，例如透過月供股票方式，每月買些少，會是較好的策略。

所以，你暫時最好先用月供去投資，每月可以用$1500供盈富(2800)，餘下資金就儲起，等大跌市機會。

另外，你組合波動性股票係佔較多(1024, 6820, 9988, 1833, 1918)，故你長遠要加入大盈富(2800)比重或加一些平穏增長股，令組合更平衡。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

此期間，你要努力學習投資知識，要學好如何選擇優質股，點為股票定平貴。這些技巧，對你長線投資增值，係十分有幫助。

------------------------------------------------

Q21399：

你好，請問2352，順豐怎樣看

龔成老師︰

順豐控股 (002352.SZ)為內地快遞物流綜合服務的提供商，主要提供倉儲管理、銷售預測、大數據分析和結算管理等綜合物流服務。

此股有質素，集團在內地有領先規模。在電商近年高速發展下，集團長遠發展正面。

但此股現價不平，過往佢股票波動都比較大。此股有水資價值，但現時值博率唔算高，同時要控制注碼。

------------------------------------------------

Q21400：

龔成老師，請問1088 是穩陣的收息股嗎？見今年派息over 10%, 派息比率是100%

謝謝！

龔成老師︰

中國神華(1088)佢始終有一定規模，但政策不是好支持行業，的確會對佢有影響，但已經在股價反映左。

另外，由於佢地的產品自主力較弱，因此不算好高質。

所賣出的是商品，當中沒有差異性，令佢地處於被動狀態，只能睇市場價，沒有價格自主的能力，這令佢的獨特性有限。

所以整體來講，這股不算差，但又不算非常好，唔好對股價有太大的期望。

如果是收息的，都可以。但留意佢派息會跟隨利潤，而有所變動。因此，就唔建議太大注。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q18781-18800）

Q18781：

龔老師你好，最近我在圖書館借了2本你的著作，正在閱讀其中一本"財務自由行"。

我今年25歲，中學時家人一直指出只有醫學/法學才有前途，讀商科無前途，最後成績不好只能前往內地讀醫。

但當我閱讀你的著作時發現，其實讀醫都不能發展佣金團隊，亦較難建立生意，成為專家則沒有十年八年都難以做到，加上我尚未考取執照。

我現在只是邊讀碩士邊複習，不知幾年內能否考到，如果考到人工當然不低，但如果考不到，我可能只可以做藥廠等，收入就一般。

我十分慨嘆，當時如果讀商科，甚至在中學時建立財富觀念，發展5個途徑，便好了。
不過你本書寫得好好，獲益良多！！！！

我有時好心急想搵錢，我25歲讀碩士，每月有18000獎學金，是我人生第一份糧。我好後悔咁遲先搵錢，起步好遲。我有時好擔心以後不夠錢生兒育女和買樓，好迷惘。。。

因為一讀就可能讀埋博士，畢業就28歲，但呢4年憑獎學十金都係得18000-20000/月，好低人工。。。

龔成老師：

現時你已投資了一定的時間，要翻轉頭較難，所以要盡力在現在的情況下，發展你的事業。

首先，讀好現時的書，我相信你會有一定的專業知識與價值，而這都能幫你創造財富。在《財務自由行》中所講的5條路，其實你仍都可以利用「投資」「專家」「生意」去發展。

當然，你起步的時間可能慢左，但如果可以的話，現時已可做一些小生意，任何都得，這只是一個訓練。無人知你將來的事業發展，但你如果有做生意的經驗，將來的可能性可能更大。

另外，你已投資一定的時間，在長遠，如果你在這範疇成為了專家，將來的收入相信會可觀，你都要研究下這方面。

同時，你只要好好將每月薪金投資，其實都可以累積到一定的財富，好好增加投資知識，到你正式有更大收入時，投資的力量就明顯。

------------------------------------------------

Q18782：

龔成老師謝謝您，您的書籍、分享、課堂改變了我的一生，令我人生有180度大轉變！

自從2016年上你的課堂後，由月光族的我開始慢慢買入累積優質股票，並長線持有，升升跌跌，從來沒有賣出過。

本身我的家裡比較擠迫，沒有自己獨立空間，買樓自住是我的一個夢想。

直至最近比亞迪升$200，我有幸抽中樓花，在此機遇下我人生第一次賣出股票，成功上車，比亞迪自持股以來勁賺超過200%，承擔了我超過6成的首期。當然我亦十分不捨得比亞迪，在它會落後會再入貨。

真的感謝您分享正確投資的態度，令我有今天的成就，我從來沒有想像過可以做到！

龔成老師：

太好了！

18歲時，我自己不斷學理財投資，多年有一點成績，我好明白這些知識的重要，於是不斷分享，見到知識對你有正面影響，實在太好！

你要保持知識與財富的進步，同埋要多同身邊人分享正確的理財知識，加油！

------------------------------------------------

Q18783：

你好龔老師，已經報咗老師課堂了。上課前有沒有什麼可作預備？有沒有書應該上堂前先看？

另外想問問你意見，我和先生打算賣出自住樓。。

原因:
- 有兩個小朋友，地方少少唔夠住
- 想4-6年後移民
- 見樓市好似跌咗少許，驚嚟緊會再跌
- 按現在市況，大約升了35-50% (當然要再看最後成交價)
- 賣出後租樓住，然後將資金分配成三部分
- 50% 响移民的地方買樓，先出租
- 35% 等機會，响香港再買一個細單位，出租
- 15% 買股票

用投資回報角道，你覺得這樣好，還是應該繼續自住先？因為買，賣，租，中間有佣金/費用，而自住供樓都係自己的。。

謝謝，期待股票班見。

龔成老師：

其實自住樓唔太建議賣出，不過，如果你有移民需要，這就可以。

但你的心態，唔好太預期「樓市將會大跌，現時賣出先，之後再買翻」。

我相信「中短期樓價會向下，但不會大跌，而長期會向上」。不過，我始終認為唔好太「預期樓市走勢」，因為難度好高，太主觀的分析未必正確。

香港經濟轉弱，樓市的確會向下，但需求始終好大，因此不會大跌，長遠會向上。

當然，如果你在準備移民角度，有資金需求，同時長遠不用香港樓自住，這不是不可的。你可以賣出，再將資金配置成不同資產，但心態上，你唔好「預期大跌再買翻」，無人知的。

至於股票班，你可以睇《股票勝經》作準備，以及睇多D新聞、財經。上堂留心D就跟到。股票班見！

------------------------------------------------

Q18784：

龔Sir,水桶投資方法不明白。

1) 如何分辦股票是屬於那一個水桶？可以這樣理解嗎？水桶1會升一倍，水桶2會平穩增長，水桶3不會增長？

2) 水桶方法講到是水向下層流動，下層水桶的錢都由上層水桶而來。那麼是否所有新資金一定只能先投資水桶1，等水滿後，才用這些資金投入水桶2，直至達到分配的百份比？新資金不可投資水桶2？

3) 潛力股定義為最小能升一倍，但問題是多長時間才會升一倍呢？十年或二十年？時間太長似乎很難理解為潛力股，是嗎？例如，福壽園１４４８，增長速度較慢，不似其他科技股快，要升一倍似乎要很長遠時間。是否倍升速度較快的股票，潛力會較大呢？

謝謝！

龔成老師：

1）類似。但不完整。

其實最重要是分析「企業」，如果一間公司，長遠業務有潛力，前景好，企業價值增長快，就是水桶1。

如果一間企業業務穩定，無增長力，但現金流穩定，投資者可收到理想股票，就是水桶3。

2）不是。

你應該睇翻你自己的年齡及風險，先設計一個組合，不同水桶的%。過幾年後，如果上層的水較多，就會作出調整。

3）最重要是睇企業本質的業務增長力，當然，我地會同時考慮買入價的平貴，去衡量投資值博率。

------------------------------------------------

Q18785：

你好，龔成老師，我是由朋友介紹認識到你，剛買了你的《80後》，但尚未開始睇，投資股票方面白紙一張，希望你能給我一點方向，感謝你！

我做網上生意，cash 每月需要10萬左右，每月純利2萬至6萬，手上現金有45萬，15萬做儲備，我只可以拎到30萬作投資用途。請問我該如何分配？

你會建議我分散投資在有潛力股/收息股？想賺$55萬，令財富有$100萬。多謝你！

龔成老師：

《80後百萬富翁》適合初階者的，你盡快睇啦。另外，《股票勝經》相信都適合你。

由於你每月都有一定的現金開支，而做生意總有不確定的，我會建議你留多一點現金。

只將部分現金投資好了（當然，具體留幾多，你就要考慮自己的生意特性與情況）。

簡單來說，就是「閒錢」先好投資，同時，最好買一些流動性較強的工具，可以快速變現，例如股票，而潛力股只佔小部分就好了。

財不入急門，合理增值最重要的。要睇多$55萬不是無可能，但好多時不能強求，因為時間短。投資要耐性，配合機遇的。

------------------------------------------------

Q18786：

成功先生，訓唔著咁啱見個frd like 咗閣下facebook。

其實呢2晚訓唔到，我好苦惱，因為我買了西營盤XXX，唔知是福是禍。因為又細又貴。

當初，我打算買新自住下，再租/ 賣，但好多人話港島樓冇潛力升，又話我買納米新盤，貴又on 居，又有另一個agent 仲想勸我撻訂(成5%首期加其他費用) ...

所以我也有幻想撻訂 因為我最怕 每月咁辛苦供，end up 會蝕讓 ~ 你點睇？
希望你俾啲意見我, 唔該哂 。

龔成老師：

港島樓，有價值，因為供應有限，地點永遠無得輸，而西營盤，地段優質，不同擔心。

不過，我一向對新盤、納米樓，都有少少保留。納米樓質素始終較一般，除非個價好吸引，否則，納米樓就唔太建議。

至於新樓，因為一向都會有溢價，因此好易買貴左。

另外，你唔好太著重經紀所講，因為經紀都有佢自己的考慮因素，最重要是你的獨立分析。

你最重是理性分析，你要計翻呎價，比較翻同區較新樓齡的樓，是否不太貴，另外，你可以計算預期的租金回報，比較同區較新樓齡的樓，是否合理。

你唔好將情緒放大，投資要求你理性。「每月咁辛苦供」這應該一早預期到，不應買入後先發現，你想翻最初買入這樓的理由，這動作在你的長期財富配置策略，起了一個怎樣的作用。

------------------------------------------------

Q18787：

你好龔成老師，之前買左你本50優質潛力股，我想問問潛力股同優質倍升股其實投資落邊樣會好啲？呢啲股如放長線是指幾耐？

本人34歲，剛剛生左小朋友，想將資產5年內翻倍留俾小朋友，月入平均約$70000，每月可買股票$1-20000

現有1177, 548, 3690, 9618, 1157, 345 ($35入）, 1951($13入), 2800，本人能接受風險較高，以上股票前景怎樣？

可留或加嗎？蝕緊嗰兩隻要唔要換？我想慢慢儲貨滾大。謝謝你

龔成老師：

一般優質股，與潛力股，就有少少分別。優質股會比較穩健，長線持有股價都能倍升，但時間會較長。

至於潛力股，風險會較高，適合較有實力、能承受風險的投資者，這類股增長力較快，但業務可能有不確定性。

如果是初階投資者，會建議先投資穩健的優質股，遲少少先投資潛力股。又或者潛力股佔比唔好太多。

至於你上述的持股，都可以持有的。決定我地是否賣出一隻股，不是睇賺蝕數，而是睇「企業質素、長遠發展」。

維他奶國際（0345）等回多D先加注，錦欣生殖（1951）就暫時唔好加注。

如果你能承受風險，你可以分注投資潛力股，上述你的持股可考慮，同時亦可考慮：安碩恆生科技ETF（3067）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211），部分要等回少少先入。

------------------------------------------------

Q18788：

龔sir，我最近買左一隻比亞迪和吉利的股票掛勾，好嗎？

龔成老師：

這些股票掛勾工具，其實唔太建議，因為你會進入了「回報有限，風險無限」的模式當中，你自己想想，如果佢質素明顯轉差，股價會大跌，你就會有明顯損失，相反，如果佢業績大好，股價大升，你只會得到有限的回報。

------------------------------------------------

Q18789：

老師，我之前學人買隻安山金控，點睇？

龔成老師：

安山金控（0033），2019年的獨立核數師意見，出現了「不表示意見」，反映佢盤數有D古怪，加上佢每年都出現虧損，這企業投資價值不高。

------------------------------------------------

Q18790：

您好，前幾個月在網上無意中看到老師的FB，看了覺我很實用，很想來信請教您。

我是30歲以上才開始投資，但一直都是跟著別人買，所以，短短幾年存了很多都是蟹貨。而我的收入只得1萬多，扣除開資和家用，每月最多只能儲1千多。

以下是本人現有的股票，想請教老師該如果調整？

0082 第一視頻 (已經忘了買入價錢)
0083 信和置業 (2000股10.5買入)
0102 凱升控股 (4000股9.75買入)
0390 中國中鐵 (1000肢10.94買入)
0555御泰中彩控股(50000股(已經忘了買入價錢)_
0716 勝師貨櫃 (16000股分別是1.45、1.49和1.62買入)

0880澳博控股(1000股16.68買入)
1128永利澳門(400股23.6買入)
1680澳門勵駿(1000股5.52買入)
2888渣打(100股119.)
3988中國銀行(2000股分別是2.7和3.0買入)
9988阿里巴巴(100股 219入252出，259再買入)
1810小米 (600股 18.46買入)

以上大部分都是蟹貨，很多都未到買入時的價位，想問一下該不該在不到價位仍然賣出，然後集中資金再買入一些優質少少的股票？

另外…也想問問…9988的起趺幅度很大，是不是該在高位時賣出，在跌的時候買入，還是該一直持有不賣出？

我該如何調整的的股票分佈？

十分謝謝你！

龔成老師：

首先你要明白一個概念，我地持有一隻股票與否，關鍵位是企業質素、前景，不要被買入價影響。買為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

第一視頻（0082）質素很普通，賣出較好。

凱升控股（0102）無乜質素，賣出較好。

御泰中彩控股（0555）無乜質素，賣出較好。

澳門勵駿（1680）質素很普通，賣出較好。

至於其他，都可以持有，不過部分的質素唔算好高。同時，唔好太集中持有銀行股。

至於阿里（9988），你問「是不是該在高位時賣出，在跌的時候買入」，這是一般散升都會這樣做，但卻是錯的，因為無人能預期高低，賣出後可能買唔翻，佢地以為得，可惜最後唔得。建議你長線。

我建音你之後，努力增加股票知識，你先慢慢儲本金先，唔好心急入市，到有知識在選股有技巧後，才正式入。如果本金唔多，就更加要好好利用。

------------------------------------------------

Q18791：

龔老師，0868在10元左右賣出，最近股價短期又創歷史高位，一路入唔番，你又否研究呢隻？

龔成老師：

信義玻璃（0868）是很好的潛力股，有質素，企業有發展，在我2016年出版的《50優質潛力股》已有推這股，之後每一版都有這股。

這股值得長線的，其實這類股你唔應該賣晒，點都要留部分。

現價已在合理區頂，最好回翻10%先小注。

------------------------------------------------

Q18792：

我今年26，有20萬現金,每月可存1萬

3988@20000x3.54
[email protected]
788@3800 x ~1.63
3993@9000x2.88

我想係3年內可以有100萬做買樓首期

但目前嘅手持服票都蝕到入肉，到底我好唔好放左佢地用黎買潛力股定係溝淡佢地好？ 好迷惘！

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股只能小注。

因此，匯豐（0005）、中行（3988），以你的年齡來說，並不適合。首先，你唔好加，另外，長遠要找機會賣出，轉其他更高增長的。

而洛陽鉬業（3993）質素只是中等，唔值得持有太多，小注就得。

中國鐵塔（0788）有質素，可持有。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

如果你想3年後有$100萬，要大力增加你的投資知識，花更多時間研究股票，同時加大儲蓄投資，先做到。

------------------------------------------------

Q18793：

龔成老師你好,
有一樣野想你幫我解答下

我係股票市場新手, 已經買左老師兩本著作"股票勝經"& "年報勝經"自學中...
我有一位朋友, 應該係股票市場打滾超過1x年 (我不知道他是價值投資者定係短炒人士)

但我當話俾佢聽我學習緊投資時, (學習下睇年報.....)

佢即刻話 : 年報入面果d數字你唔好信呀 (由其是中國市場)....佢話: 入面果d咩資產負債表呀, 財務報表呀, d數字可以係假, 造數架......

咁我地香港有個普遍既概念係 : 中國有好多野未必是真的.....

咁我想問下我朋友講既 "年報果d數字都可以係假架".....究竟應該點去理解呢?

因為一般人真係唔會知盤數係咪"造"出來.....

係咪好似你係書入面講, 如果個獨立核數師係畢馬威會計師行, 就好難做假呢?多謝老師指教

龔成老師

我地買股票，就是買公司，要了解公司，就要睇年報，這是不變的。

問題是，年報的財務數據，的確有真有假，但這不代表我地因此而唔睇年報（因為唔睇年報就去買股票，是極有問題的，因為現時我地要買股票，無可能連基本的財務數據都唔知，就去買）。

的確，有些會計上的原則，可以令數字靚D，因此，我地分析時有幾個要點，第一，睇長期，唔好只睇元1、2年，因為長遠數據較難造。第二，要睇核數師意見，如果核數師意見出現「保留」「不表示意見」等字眼，就要小心。第三，從現金流量表有得睇數據的直實度。

核數師，如果是4大行，就會更有信心，畢馬威是其中一間。

另外，《年報勝經》都有教你一些分析年報的技巧，你可以睇。我地不是無從得知那些數是假的，但這不易學，你多睇年報及細閱《年報勝經》先。

------------------------------------------------

Q18794：

Sir,想請問你 1316 425質素如何?
謝謝

龔成老師：

耐世特（1316）本質中等，近年的業績有點弱，但又唔算好差。我相信佢中短期仍會面對不利的經營環境，見佢生意並無增長，盈利都是。

相信要過一段時間，先會慢慢進入正常少少的時期。這股都算有投資價值，股現價合理，但就未必值得投資太多，因為質素始終不強。

敏實集團（0425）不過不失，佢產品都供應比一d國際著名汽車集團，豐田、福特、通用、戴姆勒等。

佢係中國外部汽車車身零部件供應商，主要從事設計、製造及銷售以下三大類商品車身結構件等。

整體都有發展的，但未去到最高質素的企業類別。這類股，投資不是不可投資，但就唔適合佔組合比例好多，現價合理區中上部，都可長線的。

------------------------------------------------

Q18795：

龔sir 小弟剛剛睇完 " 月供股票投資策略" 後 我有個想法 就是匯豐佢呢家呢個情況係左右做人難 比中美夾擊 。

但呢個不利因素 應該長遠會消失(中美唔會係經濟上永遠敵對) 。另外佢派息 ，我亦覺得佢長遠都會派返息。

綜合以上想法， 雖然佢盈利能力比以前低 但佢都算係一個有實力股 。

咁其實長遠月供佢 應該無問題。 我想問龔sir我呢d想法有無漏洞?還係我太睇得太美好。 請指教 謝謝抽空解答。

龔成老師：

中美雖然唔會永遠敵對，這可以減少匯豐（0005）的不利因素，但不代表佢這樣就優質。

就算中美對立之前，銀行業、佢的賺錢能力，都有下跌情況，所以，就算之前好轉，你都唔能夠對佢好大期望。

質素由過往的高質，變成了中等質素，這是核心，不是指短期。

因此，你月供不是不可，但唔建議你太大注，你預這股長遠是收息，唔好對股價有太大期望。

------------------------------------------------

Q18796：

你好。 成sir 我在朋友的推介看了你一上些對金錢的睇法。

我今年31 月13000 左右 現在現金約4-5 我可而怎樣增加我累似利息既收入

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

第一，你要累積一些現金，作備用。當有一定的現金數，之後就可以增值。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

例如可以做月供股票，每月$3000、$4000。

你可以考慮盈富（2800）$2000。

另外再加1、2隻（每隻$1000）：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：安碩恆生科技ETF（3067）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18797：

Hello龔成老師，因家人承傳的關係，現時本人持有兩層單位物業，一層市值600萬，另一層市值300萬左右。
如果想每月被動收入有30,000港幣，而又能保留物業的話，請問有什麼意見參考，謝謝你

龔成老師：

第一，當然是將物業出租。

第二，如果兩物業現時無按揭，其實可以適度加按。

在我地創造過程中，適當利用借貸，都是可以的，如果你本身無乜投資經驗，就唔建議你加按大多，只將$600萬樓，按$100萬-$200萬。如果你本身風險承受能力低，就唔好按。

按出的資金，可以投資收息股。目的就是以較低風險的方法，去創造息差回報，因為收息股現時大多有6%股息回報，而按息約2%，你就能創造到正現金流。

投資收息股，可以作為財富分配的一部分，但不建議將全部資金都投資，因為一定要留有一定的現金作防守，以備不時之需，以及若大市下跌，可以買平貨之用。

你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

如果你能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

但要留意，現時股價只是合理，未到平宜，因此買入時宜分注，同時不能用盡現金。

當然，你一定要明白，加按原理是借，這一定有風險的，因此都有賺息蝕價的可能，你要明白這點。

------------------------------------------------

Q18798：

龔成老師，本人53歲，剛剛離開職場，最後年薪接近一百萬，現在總資產約3,000,000，分配狀況：

現金：1,500,000
MPF : 800,000
實金 ： 小量
股票 ：買入價約550,000

2638 55,000股
2800 500股
823 300股
700 100股
1772 200股
1373 10,000股

因為現金許可，不做月供，但由今月開始每月入一手2800、一手823、一手1772，每季入一手700或669

如果可以搵到工作，本人5年總資產目標希望可達8,000,000；如果未能搵到工作，5年總資產目標希望可達5,000,000，作為60歲後的後人生財務保障

請問本人
1 總資產目標是否合理
2 股票組合合適否
3 待股市跌市期間，有什麼股票可以大手買入

先感謝指教！

龔成老師：

1）由於你現時的年齡階段，投資方面不宜進取，將會以「平穩增長股」+「收息股」作為組合的方向。

因此，財務目標宜調低翻少少。如果有工作，要視乎你收入及每月可投資金額，$600萬-$800萬合理的。至於如果無工作，如果這段時間消費不算多，則預期$400萬-$500萬。

2）方向可以，但潛力股唔建議太多。當然，如果你之後有工作，而你承受到風險，就可增加潛力股比例。

你可以考慮盈富（2800）、港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

3）銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

當然，如果見到某些優質股大跌，都可考慮。

------------------------------------------------

Q18799：

假設全球金融經濟進一步轉壞（例如因戰亂、新嚴重疫症），請問有什麼地方可以避險？
現金？黃金？還是股票市場、基金債券之類？

龔成老師：

黃金是其中之一。

之後就要睇發生咩事，如戰亂，油價將暴升。

現金就可能一文不值。

如新嚴重疫症，醫療相關企業，將會大升。

其實，如果你投資的是優質資產，例如一間好有優質的股票，其實未必一定有問題（當然，假設只是中短期，如3年內的問題）。

------------------------------------------------

Q18800：

有見你之前po 3032/3033/3067/3088既比較,系咪應該睇管理費同跟蹤偏離度? 我想由3033轉去3088或3067,但交易量需唔需要考慮?

今日9.7入左少少2333,呢個可以長揸?

龔sir,我想問下如果想學睇年報,買你嗰本年報勝經係咪都可以學到基本分析年報既知識? 仲有無什麼書推介?

因為我之前買左本圖表分析,諗住學下但聽到你講話無咩用,唔實際所以想轉學睇年報之類。

如果唔睇圖表咁應該點樣知道嗰個股可以係靚既價位或者合理價位入手?Thank you

龔成老師：

其實幾樣野都要考慮，一般來說，會先考慮管理費同跟蹤偏離度，所以3067應該較好。

不過，成交量其實都是一個因素，因為當成交活躍時，佢的買賣價，會好近當中的真實價值，成交少就有可能買賣差價闊左，因此，成交較多的3033，並不是無價值。

如果是短線投資，3033會較適合，但如果你長線，成交因素影響相對較少，因此3067會較好。

長城汽車（2333）有質素的，可長線持有。

如果你想學睇年報，可以睇《年報勝經》，《股票勝經》都有用的，另外，你可以睇巴菲特相關的書，都有年報相關資料的。

至於睇圖，根本無用，我20年前用左，研究左幾年，發現技術分析原來一開始就錯，同時明白巴菲特都唔用。

至於買賣價位，我地會分析平貴度，記住，唔好因為無方法而強行用一些錯的方法。

計算企業價值是最重要的方法，同時，可以配合大市冷熱度去分析。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。