琴晚為姨丈送上遲咗一日嘅生日驚喜。 話說姨丈係呢個世界上，其中一個我覺得最温柔最温暖嘅人。我成日都同我啲朋友講：「我姨丈好似李東海！」我啲朋友睇完相會話「邊度似」，睇多幾眼會話「對眼有啲似嘅」，但對我來講，佢對眼似李東海，個笑容似李東海 ，內心更加似李東海！ 喺我兩三歲嗰陣，姨丈仲未係我姨丈，但佢已經參與喺我嘅人生。嗰時佢同緊我姨姨拍拖，拍咗七年結婚，2010年再生咗我表弟。細細個我已經好鍾意姨丈，到宜家都仲記得讀幼稚園嗰陣佢來接我放學嘅情景。由細到大我成日都嗌佢「XXX哥哥」，所以佢同我姨姨結婚之後嗰一年，我成日都唔記得要改口稱呼佢做我姨丈～ 姨丈嘅温柔真係好勁，喺我人生有意識嘅二十多年裡面，我真係好似冇見過佢發脾氣，甚至連惡少少咁講野都冇見過。明明我阿姨成日都好惡，就好似姨丈食飯可能只係細細聲講咗句「啲肉餅好似鹹咗少少」，我阿姨就會連珠炮發地講：「煮俾你食仲咁多野講，唔好味就唔好食，成日都嫌呢樣嫌嗰樣！」又或者有時阿姨叫姨丈估下某樣野幾錢，姨丈因為唔係師奶，冇咩對日用品價錢嘅觸覺，就成日都估得好平，阿姨又會窒佢：「你真係天真，以為啲野咁平，食嘅用嘅着嘅全部都係錢來架，blahblahblah（無限伸延⋯）」總之，姨丈成日無啦啦就會俾我阿姨狙擊，但佢從來都唔會反駁，只會笑笑下地繼續默默食飯。當面對我表弟嘅頑皮性格，我姨丈都好有耐性，就好似琴晚我地四個一齊玩overcooked，表弟成日都玩野推人落街，或者特登㩒掣夾死人，搞到我真心躁底；但我姨丈對住玩野玩得好開心搞到贏唔到嘅表弟，竟然係笑住咁話「咁都好玩嘅，傻豬」。 雖然我唔係成日見到我姨丈，但每次我去到佢地屋企食飯或者過埋夜，姨丈都會問候我嘅近況。佢會好認真關心你，聽你講野，會將你講野擺喺心。就好似好耐之前我去杜以辰fans meet，我輕輕問咗句「呢度去上環係咪地鐵最方便」，姨丈答完「應該係」，就問我去嗰度做咩，我答完佢佢仲好有興趣聽我講點解我會鍾意杜以辰🤣但我最impressed嘅位係到咗第二日（出發去fans meet之前），我同姨丈兩個人落街食lunch，佢一坐低就㩒手機。我嗰陣仲覺得佢掛住用電話唔同我傾計，點知佢下一秒竟然係問我：「你一陣去嗰度地址係上環邊度？等我上網睇下有冇車去。」其實上網查我自己都識，但嗰下好滾動嘅位係姨丈竟然將我前一日問佢點搭車去呢個問題放喺心，過咗一日我明明冇特別提起，但佢自己都記得，仲好努力想解答我嘅煩惱。 啊！！！我姨丈真係好好，好到我成日都同阿姨講：「點解妳咁惡死，都有咁好嘅姨丈鍾意妳🤣🤣🤣」但阿姨就係曬命地表示：「我都唔知點解，但妳姨丈份人真係算係好好，一齊咁耐都冇發過我脾氣，都係對我好好。」就好似今日姨姨收到乳健中心嘅電話，話佢上次去做乳房造影出來嘅結果照到有粒野，想約佢再上去中心做多啲檢查睇清楚。姨姨打俾姨丈講佢好擔心，聽日要再去做檢查，姨丈第一句係話：「聽日駛唔駛我陪你去？」嗰下我聽到又即刻融咗。 其實我識咗姨丈起碼二十年，都冇幾何寫生日卡俾佢（好似寫過兩次咁大把），更加唔好講買蛋糕同佢慶祝生日。但今年我覺得我大個女要出來做野，姨丈錫咗我咁多年，睇住我成長，俾咗好多愛同鼓勵我，我今年一定要做返啲野！於是琴晚就殺咗上佢屋企，佢開門嗰陣，見到我攞住點着蠟燭嘅蛋糕同生日卡，佢個樣好驚喜。入到屋，姨丈仲好可愛咁話：「可唔可以等我影張相先🤣」 多謝理想型姨丈喺我人生裡面成為我嘅姨丈，但人無完人，理想型姨丈唯一令我冇咁鍾意嘅位就係佢食煙同成日飲酒/_\仲要佢前排做完身體檢查，結果話佢膽固醇偏高，所以我真係好想佢可以戒咗呢啲損害健康嘅習慣。今日臨走前畫咗本書仔，叫咗阿姨幫我逼佢今晚放工返來要睇咗佢，哼。書仔內容係參考衛生防護中心嘅小冊子同肝病防治學術基金會嘅資訊，因為空間有限所以盡咗力將啲資料簡化同濃縮/_\ 重點：大家都要注重健康呀！男同女都要注意飲食，最好唔好去到膽固醇高先來改善生活習慣啦🥺🥺如果係女性，三十五歲開始應該每一至兩年去做下乳房超聲波等嘅檢查，而因為四十歲以上嘅女性乳癌發病率係比年輕女性高，四十歲開始真係要定期（專家就話每兩年）接受乳房X光造影！有咩問題及早發現，就可以及早治療。當然，我希望阿姨聽日再做檢查會係冇事啦/_\

今次唔係分享病房經歷，而係上門探訪嘅經歷。#staycutewardsharing 話說最後呢兩個禮拜係出社康護理部（CNS），主要係有啲病人出院之後可能有啲問題需要繼續跟進，但佢地又可能唔方便出門/行動不便，就會refer CNS護士上門跟進呢啲case，例如係上門做傷口護理呀，睇下病人嘅糖尿病控制成點呀，幫啲病人分藥⋯到病人慢慢處理到啲問題，或者解決咗個問題（例如洗到個傷口好返喇），就會close file。出CNS好輕鬆，唔駛返shift唔駛喺病房，而係每日返八點放五點，上晝去啲病人屋企，下晝就喺centre做paperwork。返咗短短三日（琴日interview放假），我真心好鍾意呢個實習，唔單止睇咗好多野，仲比病房嘅感受深刻。 話說我實習嗰區主要係去啲舊式屋邨，當中好多都係好似幻愛嗰種「井型公屋」。平時間唔中都會去呢區，每次經過見到呢種屋邨，都覺得由下面望上去，由個「口」字望天空好靚，好有舊式香港嘅味道。望住一道道鐵閘、一個個單位，都會想像隔住木門裡面嘅空間住咗點樣嘅人呢？佢地過住點樣嘅生活呢？（sor，我成日都好想知其他人嘅生活係點🤣）短短呢三日，踏入一個又一個單位，同唔同嘅人共處一個狹小嘅空間，發現原來呢個城市裡面住咗各種各樣嘅人，每個故事都有好多辛酸，又有好多複雜嘅情感。 就好似我畫嘅呢幅畫入面嘅婆婆，佢嘅左邊面有個fungating wound（蕈狀併潰爛嘅癌症傷口，簡單啲咁講就係想像一個cancer腫瘤爆咗出皮膚生咗一大舊爛肉腫瘤，有少少似異型穿破人類身體出來嗰啲樣）。好似講到好恐怖，但你可以去google下，睇完啲相你就會發現事實上啲傷口真係咁恐怖。聽個姑娘講，半年前都只係一粒花生嘅size，半年後已經係我個拳頭咁大，仲要喺塊面度，真係難以想像婆婆嘅痛苦。所以佢都冇出過屋企門口，每日只係喺床上面用住尿片大小便，乖乖地等姑娘每日上來幫佢洗個傷口。洗呢啲傷口要好小心，因為佢成舊瘤都係爛肉，所以唔可以好似平時洗傷口咁用紗布抹/捽。姑娘會痴個膠袋喺下巴，再用針筒沖啲生理鹽水落個傷口咁樣洗，之後仲要好輕力咁印乾，因為如果一個唔小心大力少少，個傷口就好易會瘋狂流血。 望住呢個婆婆日復日地等姑娘拆開紗布，沖洗個大傷口，再蓋返紗布，再重複⋯⋯一個星期都難頂，仲要成半年都每日如是，就咁想像都痛苦。呢個婆婆大概已經冇咗生活，每日只係帶住個軀殼生存緊，加埋佢同個同住嘅阿仔關係好惡劣，有時佢會好激動用我聽唔明嘅鄉下話鬧佢個仔，鬧到好大聲個人都震晒咁⋯⋯ 我喺度諗，婆婆每日咁樣生存究竟有咩感覺呢？ 其實上門洗呢啲cancer傷口真係好普遍，有另一個婆婆係乳癌，但年紀太大所以都唔揀做手術，個腫瘤自然不停生呀生，左邊嘅乳房爆咗一大舊cancer組織出來，仲大舊過上面講嗰個婆婆塊面嗰舊，仲要再惡劣啲，散發住一種好強烈嘅異味。姑娘都話呢啲case都只係一直洗到個病人過身，因為已經冇野可以做，洗傷口只係希望令個傷口唔好發炎，但個腫瘤只會繼續爆出來，唔會因為洗傷口而好返。 木門嘅另一邊除咗住咗好多呢啲帶住極痛苦嘅傷口生存嘅病人，仲有雙目失明嘅獨居伯伯，每次上佢屋企移動過嘅枱枱凳凳凳都要搬返好，因為少少改動都會為伯伯帶來危險；有三十幾歲嘅夫婦同一個婆婆（個丈夫嘅媽媽）逼喺一個冇間房嘅單位裡面，呢對夫婦婚姻生活連一個房間、一啲私人空間都冇，仲要背負照顧記性好差好差嘅媽媽嘅重擔⋯⋯ 當然，都有一啲令我冇咁心酸嘅情景。 好深刻第一日上到一對老夫老妻屋企，主要係睇個婆婆糖尿病嘅情況，睇下佢飲食有冇節制，食藥有冇跟足。一路問婆婆有冇偷偷地食野，個婆婆都話冇，直到姑娘發現枱底地下有幾個大支裝葡萄適嘅吉樽，再追問之下，伯伯先至篤爆婆婆，話婆婆會半夜起身偷飲葡萄適。婆婆細細聲咁拍伯伯，話：「邊有日日飲！」伯伯又繼續爆：「佢呀日日都會去食西多士，食埋咁多糖精，又會食馬仔呀，每日都食架，話佢都唔聽，成日偷偷地食。我就來用籐條打佢pat pat架喇！」婆婆不停叫伯伯唔好再講，伯伯就愈篤愈興起。望住佢地咁樣，我反而覺得好甜蜜。相處咗咁多年，雖然婆婆唔聽人勸咁唔節制，但伯伯一開始都冇爆婆婆啲衰野，直至姑娘自己發現先篤爆佢；篤爆佢嗰陣都唔係鬧婆婆，而係好似湊細路咁樣話要打婆婆patpat。好感受到佢地對話裡面散發出來嘅默契同愛意，都感受到伯伯對婆婆嘅寵愛。 仲有另一對公公婆婆，個伯伯啱啱裝咗心臟起搏器，所以姑娘上門跟進下佢心臟有冇咩唔舒服，同埋教佢初期要注意咩，飲食又要點樣調整。個婆婆坐喺隔離好少出聲，但佢會主動幫伯伯披件外套；姑娘教伯伯飲食習慣要點樣調整，婆婆都特別專注，又會問下問題。之後姑娘叫伯伯出走廊行俾佢睇，行完之後姑娘叫伯伯要行慢啲，伯伯講起佢每日都會同婆婆去散步：「我成日同佢散步，我都行喺前面，佢就mememormor，有時真係等到好忟！」但佢話就話忟，卻係帶住笑意。雖然一個行得好快，一個就鍾意慢慢行，但重要嘅係佢地願意遷就對方，唔會扔低對方。伯伯就算會忟，都會等婆婆；婆婆就算跟唔上伯伯，都會喺後面繼續追住伯伯。我諗喺好多令人心酸嘅人同事裡面，呢啲充滿愛嘅畫面都為我帶來好多温暖。 好啦，純粹想分享我呢幾日睇到嘅故事。希望大家都照顧好自己，重視自己嘅健康，唔好趁年輕就太任性🥺🥺雖然病痛呢啲野唔係我地控制，但做到就做啦！❤️

🎉Youtube 新片上映🎉 乳癌5種飲食預防法 這些人要特別注意｜營養師這樣說 乳癌是台灣女性死亡率第四的癌症 除了定期檢查之外 飲食方面該如何預防呢？ 尤其是以下三種人需要特別注意 屬於乳癌好發族群 1.高年齡層50歲以上的婦女 2.家中有乳癌病史 3.飲食偏向高脂肪的肥胖患者 影片中說明了五種在飲食方面的預防方式 快看影片留言告訴我 你學到了什麼唷～ 【高畫質完整版影片】 請上YouTube搜尋🔍營養師Ricky's Time #乳癌 #營養師rickystime #健康 #營養師這樣說