【 #奇食新加坡 中秋節前後最火紅的核桃月酥！】

在新加坡歡度中秋，除了吃月餅，還可嘗到一種叫做核桃月酥的應節食品，它似乎很流行，大小餅家以至酒店食肆都有供應。

如果閣下年紀有番咁上下，或會依稀記得許多年前舊式酒樓的點心車，包括蛋撻、蛋散、布甸、啫喱糖、核桃酥等手工糕點，它們都是大閒角，為填補主流點心（蝦餃、燒賣、腸粉等）市場空隙而存在，氹氹細路過，逗逗小女生，僅此而已，非常之「花瓶」的定位，令人沒法想像它能獨當一面成為有粉絲的實力派。

核桃酥能在新加坡抬起頭來擔正主角，據說始於廿多年前，由來自香港的姚卓然師傅發展出來，他有感於當時的月餅尺碼太大又味道太甜，便自行一款體積細小、糖分較低兼加入核桃的「新類型月餅」，他說：「當時人人都唔睇好，仲話：『嘥氣啦，冇人會食啲咁嘅嘢。』」時間卻證明，核桃月酥推出以後，愈來愈變得滾動，時至今日，市場上出現大批仿傚者，有些水準OK，有些好鬼難食，難食到一個點，我只能慘笑出來。

最好的，還是姚師傅。

姚卓然師傅現時在卡爾登酒店的華樂酒家擔任點心廚師，這店出品的核桃月酥也是最出眾，皮薄餡香又少油，放入焗爐稍烘，外皮即變得十分香脆。除了有白蓮蓉蛋黃版本，還有低糖版，以麥芽醇（Maltitol）替代白糖。

當全世界的月餅在中秋過後要劈價賤賣，這款核桃月酥仍可恃著「物以罕為貴」和「下年請早啦」，而企硬價錢繼續大賣，甚至加價10%也趕不走捧場客，可見大眾有多愛它。

簡短版刊登於：https://www.am730.com.hk/column/旅遊.飲食/新加坡核桃月酥-98359

#陳俊偉Food #陳俊偉Travel #陳俊偉Singapore #PassionMadePossible #陳俊偉又交功課