【龔成問答信箱】（Q22401-Q22420）

Q22401：

Hello 依家溫緊進階班第5堂 notes 你話如果附屬公司多而且比較接近50％ or 小數股東股益較大 個純利率會扭曲左

想問下幾多間附屬公司先為之多。同樣 小數股東股益點樣先為之大 例如佔左總盈利既某個%就叫大？

龔成老師︰

我地要估這個調整，主要係因為當集團對附屬公司持股，較接近50%時，即附屬公司盈利中，有不少比重非有集團所有，令計算出來的純利率出現偏差。

所以，我地有時係會唔扣"非控股權益"，直接用盈利(而非股東應佔溢利)去除營業額，去計算純利率。

但我地唔需要一見到"非控股權益"有數字，就去做這個調整。因為有時個數字好細，當你調整後，發現純利率其實無明顯變化。

所以，你預"非控股權益"大於"盈利"10%，我地才會對純利率進行調整，令佢數字更能反映真實情況。

------------------------------------------------

Q22402：

你好請教1928，見佢近期弱左，如靠債去還債，賺到的利潤都會被利息蠶食。

派一次中期息都要10億美元，好難想像何時內可以做到。

還未計續牌等政治風險，以你的專業分析點解可以對此企業有咁堅定信心？


龔成老何：

金沙（1928）風險度的確增加左，但投資者分析時，不要將中短期因素太過放大，其實只要澳門疫情穩定翻少少，其實就無事。

睇翻上半年，金沙中期經調整物業EBITDA 2.34億美元，銀娛都是EBITDA有正數的，反映如果唔計會計因素，佢是有錢賺的，除非疫情惡化，否則，佢無問題，而我地從投資，是投資企業的長期，不用將當刻的短期因素太過放大，同時佢持有的資產好有價值，要融資都十分容易。

至於政治因素，的確有少少，但如果從「澳門政府想那些博企續牌的角度」，就是金沙、銀娛，這是從就業、澳門發展等的角度去分析。

------------------------------------------------

Q22403：

你好。想問9926同2878點睇，9926跟人買跌左十元。點算，唉。守唔守好

龔成老師：

康方生物（9926）你預佢上落會較大，不宜持有太多。

主要從事生物製藥業務，專注於腫瘤學及免疫學治療領域。

佢候選藥物例如有ＡＫ１０４：適應症包括子宮頸癌、肝細胞癌、食管鱗狀細胞瘤、胃癌、非小細胞肺癌、黑色素瘤、晚期實體瘤、外周Ｔ細胞淋巴瘤；預計於２０２１年下半年在中國提交治療子宮頸癌的首次ＮＤＡ（新藥申請／生物製品許可申請），及開始在美國進行治療晚期或轉移性實體瘤的Ｉｂ／ＩＩ期臨床試驗，以
及聯合治療實體瘤的試驗。

這企業現時是投資期，回報要慢慢先見到，不過，這股估值十分難。因為無實在的收入與盈利進行計算。

只可以話，風險較高，是有危有機的類別。投資注碼一定不能大。

如果持貨，小注，長線，不是不可。投資得就一定長線，等佢長期回報。

如黑持貨多，宜減。

晶門半導體（2878）都算有長線投資價值，佢係一間無晶圓廠半導體公司，主要從事設計、開發及銷售專有集成電路晶片產品及系統解決方案業務。

佢的產品及方案可供應用於智能手機、平板電腦、電視╱顯示器、筆記本電腦以及其他智能產品。

雖然都有一定的生意，但多年來都出現虧損，到近年才算好轉。行業需求對佢是利好的。

這企業質素未算好高，因為技術未算好強，這股如果持貨不過多，都可守住先。

------------------------------------------------

Q22404：

我想請教你
2869在11元買入
1313 在 9.9買入需止蝕嗎？

我知3319/1313是優質股可以守，2869是優質股嗎？
多謝阿sir解告令我心態有改變

龔成老師：

綠城服務（2869）仍算有質素的。佢為中國高端住宅物業服務供應商，提供以下三類服務：

（１）物業管理服務：包括保安服務、保潔及園藝服務，以及物業維修及保養服務。

（２）顧問諮詢服務：包括在建物業服務（示範單位管理服務及建築工地保安服務）及管理諮詢服務（於項目設計及開發階段提供物業開發諮詢服務，以及於物業交付後提供各種物業管理諮詢服務）。

（３）園區增值服務：包括園區產品及服務（購物協助、拎包入住服務、交通服務、文化教育服務、房屋返租與置換服務及二手房交易的經紀服務）、家居生活服務（物業維修及保養、家政服務、保健及娛樂），以及園區空間服務（出租廣告空間，並提供廣告設計、製作及出版服務）。

過往發展不差，業務有增長，現價合理區中上部。

這股都可以守，但你預佢中短期會有少少波動。

至於另外兩股，都可持有。但你較集中在內地地產相關行業，小心行業集中風險。

------------------------------------------------

Q22405：

如果我40歲，加按d錢出嚟投資會唔會有風險？謝謝你的意見

龔成老師︰

以你年齡可承受的風險程度(以你年紀，建議總負債，最多只可以佔總資產6成)，加上現時仍處低息期，加按是沒有問題的。

關鍵是加按後，將資金買入其他資產，創造更高的回報，由於加按是要支付利息的，所以新資產產生的利息回報一定要比加按的利率高，這樣才值得做。

最好有比較明顯的息差回報，這樣才能抵銷加按後，加大負債為你所帶來的風險。因此，你加按前，最好先計劃如何分配新資金，如何平衡風險，怎樣說服自己獲得理想的回報，即是有充分的理由，而非為加按而按。

若是投資於股市，相信中低風險會較合適，公用股、內銀股、收息股、房託等，都可考慮，策略為長期的增值及收息，期望股息回報大於加按利息，這樣就值得做。但絕不建議炒賣等方式投入股市。

------------------------------------------------

Q22406：

到目前為止，我們現住的村屋政府還沒有任何收地計劃。估計還可以起碼多住十年八載。我想得到一些資料關於鄰近地區政府收地價、土地私人買賣價錢等資料，

從而比較一下地主開出的價錢是否合理。請問以上資料可以從哪裏得知呢？謝謝你的幫忙！祝生活愉快！

除了以上住屋問題之外，從二月至今，已分段買入以下股票合共約200,000。(之前打算用1,000,000投資，其中500,000分注入市及月供股票；

其餘500,000手持現金等大跌市才大力度掃貨)，請問暫時這個股票組合是否合適我？分注買入速度又是否過急呢？

66 - 43.50 （12.3%）
1658 - 5.70 （9.6%）
1928 - 29.20 （13.2%）
1972 - 22.90 （12.9%）

2800 - 27.80 （7.8%)
3067 - 17.60 （19.9%)
9633 - 56.80 (12.8%)
9988 - 198 (11.2%)

另外，月供股票方面也開始了兩個月。分別月供以下股票。月供股票因為剛開始，未有計算在以上。

2800 - $3000
27 - $2000
66 - $1000

請問以上我的股票組合是否潛力股方面佔約40%太多呢？之後再分注買入的資金，我會偏向平穩增長股及收息股。請問龔sir有什麼股票建議加入我的組合呢？

以上問題太多，不好意思。希望得到你的抽空回覆。祝身體健康，生活愉快！

龔成老師︰

你可以去田土廳和地政總署，可以睇到交易金額和一些補償計算資料，你可以用來參考。

你現時持股和月供計劃，大致上係可以。但安碩恒生科技(3067)和阿里巴巴(9988)係潛力股，這類股票以你48歲，最多佔2成左右好了。

未來時間，就正如你所講，要偏向平穩增長股及收息股，去慢慢拉低翻潛力股比例，以免風險過高。以下都是一些合適選擇，現價都合理，你可以參考下。

但緊記唔好偏重個別企/行業，個別企業和行業，不要佔組合15%和30%以上，銀行業更加不要高於組合20%，否則會有過度集中性風險。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）、富豪產業（1881）等（記住，股價略波動，不能太過大注）。

現時你投入了1/5資金，這個比例係可以。當再出現多10-15%左右回調，就可以再加下一注。而另外50萬，但等大跌市出現，才分注入貨。

------------------------------------------------

Q22407：

1) 龔sir , 想問一問關於美股TLRY , 持有半年虧損接近40% , 應繼續持有還是止損，能幫手分析一下嗎

2) 龔sir, 6993 係米仲可以持有 ,仲可以守

龔成老師︰

1) Tilray Inc (TLRY)從事是一家從事製藥業務的公司。該公司是一家向藥品分銷商供應大麻產品的供應商。

大麻股過往曾是熱炒對象，過去一年波幅好大，由$5至到$67。上市後，更曾經升至$300，可見這隻股票，有一定投機味道。

我自己無仔細研究過大麻行業和相關股份，但從佢財務數據睇，上市後收入係有明顯上升，但依然未能達至收支平衡。

因此，此股現價不少部份，係來自投資者對"將來"的睇去。只要未來前景稍有偏離，你預佢會有較大幅調整。

此股唔係話無投資價值，但確定性較高，只宜小小注。

2) 藍月亮（6993）不是劣質，但最新業績令人失望，由於上市前的數據幾靚，因此，有可能佢上市前執靚盤數，這亦是我對新股/半新股有保留的原因。

佢最新的中期虧損約$4400萬元，去年同期純利約$3億元。虧損主因是市場上，其他平台出現過剩的較低價產品，導致佢定價策略及產品在市場上的價格體系受到干擾。

為統一產品在市場上的定價，佢向其客戶提供若干折扣以穩定產品的市場價格，此類折扣對其於上半年的毛利率產生約9%的負面影響。

相信中短期未必強，但長遠，其實又不算好差，佢成立於1992年，擁有衣物清潔護理、個人清潔護理和家居清潔護理三大系列共73個品種的產品。

佢係中國洗衣液有龍頭地位，加上毛利率高，賺錢能力強。睇翻佢之前的資料，以零售額計算，藍月亮在洗衣液市場、濃縮洗衣液市場及洗手液市場的市佔率均為第一。

整體有質素，不過之前貴，現價算是合理區中上部，如果你小注持有都可以。

------------------------------------------------

Q22408：

龔老師你好，我想聽一下老師的意見.本人可承受高風險。

1. 持有1257，20,000股平均價3.4。現價掉到2.77左右，應否繼續持有或減持?

2. 持有1448，6,000股平均價7.02。現價7.42應否增持?

還是增加其它平衡增長股?

龔成老師︰

1) 中國光大綠色環保（1257）其實本質不差。

睇翻佢的業務情況，長遠發展其實是一個大方向，但佢近年負債有所上升，加上市場擔心佢之後的增長力有所減慢，因此對這股的評價減少左。的確，負債與發展持續性，是這股的風險因素。

長遠來說，這股仍是有投資價值。但不建議太過大注，始終都有風險，同時可能仍會弱一段時期。你明白這些風險，你照長線持有係可以。

當然，若你持股佔組合較多的話，我比較建議你沽出少少，去平衡翻個風險，咁會較好。

2) 福壽園(1448)有質素，現價算合理區頂，如果你現貨佔組合比重不多，或者資金較充裕，現價可以再加小小注。

否則，你等佢回多10%左右，才再加注會較好。

以下增長股，都適合你30歲年紀，你可以參考下。

平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、粵海(0270)

潛力股︰安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。

平穏增長股，現處於合理水平，可分注入市。但潛力股，部份係略貴。

現時只有安碩恒生科技(3067)、ＧＸ中國電車基金（2845）、騰訊（0700）、阿里（9988）、中生製藥（1177）、福壽園(1448)勉強算在合理區中上至頂部，可分注入貨，其餘都略貴，想買就要等一等。

------------------------------------------------

Q22409：

真的衷心感謝，讓我瞓吾著幾日不斷思考過去錯在哪！同時，我並非抗拒買股票，亦十分認同你價值投資的方法。

我從不同category 選了一些之前心儀的和你推薦的選一至两隻，想把台灣現金調回來建立一個組合，比D意見？

銀行-滙豐/恆生/中銀3988（但PE 4倍不到，好似鬼鬼哋）/citibank
地產 - 恒基/新世界/置富
科網-阿里/騰訊/MSFT
手機-小米/舜宇/瑞聲
網絡-電盈/香港電訊/移動

電車-比亞迪/中國電車/雅廸
公共-地鐵
醫療-和黃醫藥/平安好醫生
零售-佐丹奴/六福/周大福
休閒-金沙/銀河
指數或基金-2800或3086華夏納指

建倉用80至100萬，留150萬現金等。

有點長，抱歉！

老實講，我清楚年齡影響可承擔的投資風險，只是希望在還有生產力（10-12年）間，除完成兩個小朋友在外地讀完書和以後照顧到自己已滿足了！

龔成老師︰

以你48歲年紀，我唔建議太進取。你可以用恒基(0012)、地鐵(0066)、金沙(1928)/銀娛(0027)、六福(0590)/周大福(1929)、指數基金作為核心，為組合提供平穏增值能力。

之後，再配以一些收息股，好似滙豐/恆生/中銀3988、置富(0778)、佐丹奴(0709)。

中行(3988)和一些內銀股，你會發現地市盈率都係好低。因為市場覺得佢地壞帳潛在風險大，所以市場唔會比佢地個市盈率太高。

最後，若果你想個增長力強少少，可以加入一些潛力股，例如阿里(9988)、騰訊(0700)、比亞迪(1211 - 但現價偏貴，可先用2845代替)。但由於潛力股風險較高，總額不要高於組合2成。

現時大市只在合理水平，先用80至100萬建倉，再另留150萬現金等大跌市機會，係可以。

若你想加快增值速度(但會承受較高風險)，你可以調高少少潛力股和平穏增長股比重。

否則，你這個年紀，我建議按潛力股/平穏增長股/收息股(20/40/40)的比例，會較穏當。

------------------------------------------------

Q22410：

龔成老師, 你好~ 本人35歲, 月入2萬幾, 60萬左右, 買了以下股票~ 月儲萬五至2萬左右~

買了以下股票, 但一直持續跌勢, 雖然以下股票都是有質素的, 但.. 某些股票仍需要賣出先止蝕嗎? 謝謝!

另外, 怎樣可以增加財富呢.. 因有可能10年後便跟小朋友去外國讀書, 相信在外國對於我來說, 不易搵工作… 買那些股票是比較隱陣呢, 謝謝!

700 騰訊 買入: $616 x 400 (現價約: $537)
1211 比亞迪 買入 $157 x 500 (現價約: $218.
388 港交所 買入: $437.5 x 200 (現價約: $531.5)
2800 盈富 買入: $28.43 x 3000 (現價約: $27.72)
3690 美團 買入: $290.30 X 200 (現價約: $268.80)

9988 阿里巴巴 買入: $223.8 X 100 (現價約: $202.60)
1398 工商銀行 買入: $5.33 X 3000 (現價約: $4.39)
1810 小米集團 買入: $24.75 X 400 (現價約: $26.
1972 太古地產 買入 $23.10 X 400 (現價約: $22.95)

1177 中國生物製藥 買入 $7.44 X 1000 (現價約: $6.99)
3067 安碩 買入: $17.12 X 300 (現價約: $15.28)
2638 港燈 SS 買入: $7.61 X 500 (現價約: $7.80)
3088 華夏恆生 買入: $10.34 X 200 (現價約: $9.22)

龔成老師︰

你現時持股都係有質素，你唔好太比個買入價或者大市氣氛影響，令你做出錯誤決定。緊記只要係有質素，長線投資價無轉壞，就算股價下跌，我地都應該照持有。

由於你尚有10年時間，用以上股票去增值，都係可以。

但有個較大問題，你而家太偏重左係潛力股(0700, 1211, 0388, 3690, 9988, 1810, 1177, 3067, 3088)，佢地雖然有增長潛力，同時風險都較高，不宜持有過多。

你算年青，潛力股可佔約5成，餘下應用以下平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

但你唔需要減持任何股票，只要未來時間，加大翻平穏增長股部份，令組合慢慢回復平衡，咁就可以。

平穏增長股：指數基金、金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建(1038)

但到10年後，你要移居外國，你可能會需要穏定現金流，去支援生活，多於財富增值。

那時候，你可以將部份股票，慢慢換成收息股，用股息收入，去減輕你生活負擔。至於比重多少，你就按自己實際情況而定。

------------------------------------------------

Q22411：

龔 sir 您好！又要打擾您！有關一些資產問題希望您可提供一些意見。

本人有一層剛供完的樓，由於預計子女在未來五至八年後會移居外國 （他們已有當地護照），所以我希望在當地置業。但由於疫情關係，

暫時不能往來外地親自考察當地不同區域的環境，而我又不想只靠海外agent 隔山買牛，所以暫時對於將要付出的金額只有很初步的概念。

現在問題是，我應否在此期間先翻按現在的居所，先keep 錢向手，再等時機去用這筆錢於海外買樓（根據疫情，有機會我要兩年左右才真正落實買到，

甚或如果到時樓價因大量移民而飛升, 海外置業計劃亦可能泡湯）

另一考慮是，我自己工作的房屋津貼將會屆滿，人工也已經到了max, 所以翻按的還款能力會降低，我應否take risk 仍然去翻按 （因市場常有消息指高息時代很快重臨）

不好意思，可能說得有些亂。盼龔sir 比D意見

龔成老師︰

你2個問題，都係建基於一些假設性結果(外地樓價大升/環球息口大升)，但這些結果，到底會否成真，幾時會成真，無人會知。

我地係投資時，係唔應該用"估"去做策略。我地係因應現時情況，平衡各方利弊，去找出一個較可行方向。

由於你子女尚有5-8年才會移民當地，有一定時間。你而一刻其實唔需要急住買當地物，除非你好有信心，長線當地升幅，一定會跑嬴香港樓，咁就另作別論。

至於翻按，你就要一直支付利息開支成本。但你又未知幾時先買外國樓。如果到時外國樓升幅不多，可能這筆錢跟本用不上，你就白比利息。

我建議你先計劃清楚，如果你擔心到時賣左香港樓，都唔足夠你買外國樓。你可以把握這5-8年，用優質股去增值財富，令自己有更多資金可以動用，減少到時的不確定性。

------------------------------------------------

Q22412：

老師，我上了堂， 計算了00698 通達之估價為

市盈率9-12
保守盈利預測0.05
市值股價約$0.45-0.6

不知道為什麼，00698的估價跌了很多，我之前已經減持了很多，上堂後覺得此公司不優質，但還有少量貨，不知道如何處理剩下少量貨，約40000 股，請老師指導

龔成老師︰

佢過往市盈率大約係9-10.5倍，但由於佢質素唔係咁高，我會再打折扣，下調至6-8倍左右。

而每股盈利，可以用佢過去10年平均，大約HKD0.09。

合理價︰HKD0.54 - 0.72。

但要留意，通達集團（0698），只是不過不失。

佢主要從事電器產品（包括手機、手提電腦及其他電器產品）零部件生產；為電子產品及電器提供金屬外殼及其他五金部件；及提供塑膠機頂盒及生產體育產品。

現價計係偏平，但由於質素只係一般，唔值得持有太多，勉強可長線。若40000股只係佔你成個組合，一個好低的比重，你照持有係可以。否則，當有反彈，就要再沽多少少。

------------------------------------------------

Q22413：

老師,其實etf回報係唔係理應回報多過投資個股? 我見差唔多全部etf股價都係步步向上,好似無邊d係大起大落 或者 長線向下? 想問下呢個係ETF特性?

問題二. 想請問下一我地係咪應該買ETF好過買個股? 一般人理應唔會下下買中倍升股,但係etf就基本上股價係一直向上? 長線好小跌?

謝謝你的寶貴意見

龔成老師︰

1) 唔一定，因為ETF係一籃子優質企業，可以係追蹤一個股票市場、一個行業、或者特定產品(如黃金)。

以盈富(2800)這隻較為人所熟識的ETF為例，佢係追蹤恆生指數，等同買入58間優質企業。

但當中有潛力股，有平穏增長股，也收息股。若你用當中的比亞迪(1211)為例，佢近2年一定係跑嬴盈富(2800)。

但如果你用中國人壽(2628)做比較，佢就明顯係跑輸恆指。所以，ETF唔一定係跑嬴個股。只係佢較有風險分散能力，令個整體回報相對穏定。

2) 如果你係初階投資者，不懂選股，但又睇好個別市場，ETF就會係一個唔錯選擇。

因為佢係一籃子股票，就算當中有些股票，表現未如理想，但只要大市或者相關行業係正面發展，你都會享受到成果。這就是分散風險，有利之處。

當然，如果你係買中一隻較具潛力的企業，升幅係有權優於ETF。但若投資個股時，你選擇錯誤，係可以大市/行業升，但你個隻跌。

------------------------------------------------

Q22414：

龔成 我係你fans 有買你啲書 亦曾經係你股票班學生 不過喺度好想同你講聲對唔住 我覺得自己好似辜負咗你咁 因為你當初教嗰套信念我無好好記住

搞到依家由賺錢變倒輸 初初我齋買港股都好哋哋 後尾學人買美股 賺咗少少之後就開始心雄 再玩埋沽空 結果依家輸到損手爛腳 我好嬲我自己

當初嫌你嗰套賺錢慢 於是就不知不覺好似走咗入賭場咁 仲要唔識走 越賭越大 到依家諗返轉頭 原來你一路教嗰套先係最穩陣 雖然唔會一夜致富

但最終一定有收成 依家我down得好緊要

近排工作 前途 甚至依家股市 無一樣嘢順利 好似時不與我咁 唔知點樣走出呢個困局…

龔成老師︰

其實，有唔少人都會因為短炒成功幾次，就會心雄，只後走上短炒之路。這就是點解我成日Q&A度提讀者，以前做證券行個陣，見短炒個班，可能會短期賺，但長遠都係輸晒架原因。

我地投資要成功，除了要學好一套投資方法外，經驗、自律性和心理素質，都係同樣重要。

有些人，本身心理素質好穏定，可以好好地操作個長線投資計劃。有些人，要好像你有一樣，要有所經歷才會明白。但重點係，這2種人最終都會走到財務自由之路。原因是，他們都"學懂"了。

你現時才34歲，依然很年青，只要你現時開始用正確方法，去創造你財富增值組合，係一D都唔遲。

而且，你比其他人經歷更多，對未來操作"真正"大升大跌市時，你心理上優勢，係會更加明顯，這都對你長線投資有利。

所以，你現時要做，就係收拾心情，做你應該做的事，一切自然慢慢會好。加油!!!

------------------------------------------------

Q22415：

老師，我手持幾隻蟹貨，可唔可以strong hold 牙？

3692 $33.1 2000 shares
2160 $16.7 5000 shares
1913 $55.5 500 shares
873 $24.7 3000 shares

謝謝

龔成老師︰

持有與否，你要睇翻企業本身有無質素。如果無，就算唔係蟹貨，係賺緊錢，都要減持，甚至係沽出。

微創心通醫療科技（2160）和翰森製藥（3692）不確定性較高，近期中央相關政策，令佢地風險高左，故暫時不要再加注。

普拉達（1913）有質素的。

佢係全球時裝及奢侈品集團之一，透過Ｐｒａｄａ、Ｍｉｕ　Ｍｉｕ、Ｃｈｕｒｃｈ’ｓ　及Ｃａｒ　Ｓｈｏｅ品牌，從事設計、生產、推廣及銷售高級皮具用品、成衣及鞋履，以及透過特許協議提供眼鏡及香水。

有一定的品牌價值，但都較受經濟週期情況，你預佢中短期都會較波動，這股有長線投資的價值。

世茂服務（0873）由世茂集團（0813）分拆上市，業務有（１）物業管理服務（２）社區增值服務（３）非業主增值服務。

睇翻佢過往的財務數據，基本上都正面，業務不差同時有增長力，不過上市年期不算耐，因此參考價值會減。

股價上落較大，要注意風險。這股都有質素，有長線投資價值。

------------------------------------------------

Q22416：

龔sir, 睇而家個勢6088同788前景如何。6088坐緊3.48，788坐緊1.44

1858之前40入跌到20放埋一邊冇理到 點知前排彈咗一彈上30 好後悔冇溝 係咪繼續坐吓等

龔成老師︰

唔好用買入價，去決定是否持有一隻股票。我地要睇的是企業質素，只要佢有長線投資價值，中短期帳面虧損，唔係咁重要。

IT HON TENG（6088）質素中等，雖然都有投資價值，但企業不是最高質之列，因為企業的賺錢能力始終唔算好強，每件產品賺錢唔多。

同時業績有回落情況，不過，這股始終不是無質素，但預期長遠的增長力只是中等。若你持貨不多，可以守。

中國鐵塔（0788）質素無大變，但你預佢增長潛力同幾年前相比，會係弱左。整體而言，都有長線投資價值。

春立醫療（1858）長遠有發展的，但本身佢股價和盈利，都係較大上大落。你現貨照持有，只要唔係佔組合太重比例，咁就可以。

------------------------------------------------

Q22417：

老師點睇1024快手？佢差唔多每曰都跌，有投資價值嗎？現價$142是否仲係貴既水平？

問題2，另外今個月開始每月會買1手你書中介紹的潛力股1833（平安好醫生），用老師上堂教的估值計是合理價，現價吸引，會持續1年至2年買入，佢升到咩價位應該停買？

想問請如何操作？老師又覺得e家1833是處於咩水平？

龔成老師︰

1) 快手(1024)之前貴，現價開始合理，大致在合理區中上至頂。近期受大市和中央政策風險所影響，有較大回調，但本質上無太大轉變，有貨可照持有。

2) 平安好醫生（1833）長遠有發展力。

佢係中國領先的一站式醫療健康系統平台，透過「移動醫療+AI」，為每個家庭提供一位家庭醫生，為每個人提供一份電子健康檔案、一個健康管理計畫。

平安好醫生係中國互聯網醫療健康市場的先行者，以平均月活躍客戶，以及在線諮詢量計，是中國最大規模的互聯網醫療健康平台。

企業的業務有潛力，本身有優勢，大環境的配合，都成了這企業的機遇，前景正面，不過財務數據未算好理想。

雖然長遠的企業價值向上，但股價在中短期，可以十分波動，因為市場以「前景」作估值，故此變化必然很大。好難得出平貴的準確數，只能估估下，作參考。

因此，低風險者未必適合投資，若投資者考慮這股，亦不能大注投資，買入後就耐心長線持有，等待這企業改變整個行業的情況，現價算合理區中間位。

但好波動，你每月買1手，去平均個價格，係可以。但此股始終不確定性較高，不宜佔組合太多。

如果一個月買一手，會令佢佔你組合比例過重。你可以更改為月供，或者隔開多少少，例如每2,3個月才買一手，去平衡。

------------------------------------------------

Q22418：

龔sir，我有個理財問題想請教你，我手上有兩個物業出租，一個已經供完每月收租金$11500.00，

另一個仲有20幾年要供，每月租金收入$12500.00，租金可以cover供款和物業管理費等支出。

我的問題係我自己住的單位是租的，每月扣除租金收入後還需要付$20500.00。

我上完你初階股票班後一直思考，我係咪應該把手頭上兩個出租物業賣出，先幫自己買入一個自住用的物業來減底支出呢？

謝謝！

龔成老師︰

其實都唔一定，因為香港買賣樓宇成本唔細，你這個變動，可能要用你唔少錢。你可以主要考慮翻，邊個方法可以令你有更在資金空出，作投資增值之用。

如果你現時置業，反而令你每月投資優質股資金少左，其實係成個配置角度，就未必值得咁做。

當然，長線計你照好都持有一個適合自己長線生活需要的物業，但唔需要過急去進行。

你現時持有2個物業，若都有一定質素，你可以照持有，用佢地來資產追資產，平衡樓市波動的影響。

另一邊，你繼續用優質股去增值，到你可以做到買自住樓之餘，又可以保留一定優質股(最好可保留一間收租物業)，才去出手買自住樓都未遲。

------------------------------------------------

Q22419：

1) 也想請問你1093, 《50值博倍升股》中亦提及此股能穩中求勝，請問此股的便宜區是多少？

2) 1297的便宜區是多少？

3) 你的著作《50值博倍升股》中提及1181是穩中求勝之選，請問此股的便宜區是多少？

4) 《50值博倍升股》中提及1458成功打開了一片藍海，請問此股的便宜區在哪？

5) 《50值博倍升股》中提及1373是穩中求勝之選，請問此股的便宜區是多少？

6)《50值博倍升股》中提及868是穩中求勝之選，請問此股的便宜區是多少？

7) 讀完仍的《50值博倍升股了》，但發現很多股票已升了很多，如果現時從書本中選一隻，你會選哪一隻？

8) 想問根據過往數據，本港樓市平均每年會上升多少？（樓價、租金分別上升多少？）我已在書中找到了。

9) 想問現有哪隻優質潛力股已跌至便宜區？

龔成老師︰

1) 石藥集團(1093)現價算合理區上部，要平宜區，要有好大幅回調，接近回一半才到。

2) 中國擎天軟件（1297）規模較細，以及行業存有風險。此股較難做個穏當估值，如你想投資，現價都有投資價值﹐但要控制注碼。

3) 唐宮中國(1181)現價計，你預回多3,4成，會開始到初步平宜區。

4) 周黑鴨(1458)雖然近期回落唔少，但都仲係偏貴，你預佢真係有好大跌幅，去有機會進入平宜區。

同埋，其股都有一定風險，不宜大注。

5) 國際家居零售（1373）你預跌在多2,3成，才算係初步平宜區。

6) 信義玻璃（0868）過往一段時間，累積了不少升幅，就算合理區，都要有一個明顯大回調才會到。所以，暫時唔好入市住。如果真係想入，最好用月供去儲貨。

7) 我會選中生(1177)和信義光能(0968)，2隻雖然只在合理區上部，但本身質素較高。故在當中，值博率會係較好的2隻。

但由於現價唔平，只宜小注，等有明顯回調，才正式入市。

8) 過往數據，你可以作為一個參考。但更重要，你應著眼面前轉變、房屋政策、樓市供求問題。未來預期，香港中短期房屋都係維持供不應求。

再加上，近年多國政府都用量化寬鬆政策去救市，令市場資金大量增加。所以，可預見的將來，樓價都會維持上升。

9) 沒有，其實高質素的潛力股，極少跌到平宜區。所以你唔好諗住平宜區先入，要係合理區就開始分注，如果唔係，好機會錯失入市機會。

------------------------------------------------

Q22420：

老師，我睇返中國銀行和中銀香港每年既股息增長率，中國銀行既股息增長比較快，而家中國銀行呢個價位股息有8厘，如果股息再增長股價必定有影響，那投資中國比行不是比中銀香港好嗎？

同埋我想問如果我想查返中銀香港10年前既股價可以係邊到查詢？

同我想問通漲對阿里巴巴，騰訊，香港中華煤氣，同中銀香港會唔會有影響，我照你推介已買入呢四隻股票，之後仲想入d香港電訊同置富

龔成老師︰

我地唔可以單憑派息增長力，就去判斷一個企業情況。無錯，當中行(3988)股息再上調，有機會令股價再上。但

但始終中行(3988)本身已經好大間，加上佢業務上發展比中銀香港(2388)細，故增長力預期會較弱。

以你3X歲年紀，應該集中係財富增長上，故中銀香港(2388)會較為適合。

至於你想睇10年前股價，你可以去YAHOO財經，或者睇各個財經網的圖表，都會有。

阿里巴巴(9988)，騰訊(0700)，香港中華煤氣(0003)，同中銀香港(2388)都係有質素的企業，長線都會跑嬴通漲，你長線持有就可以。

至於指數基金都係適合你，但香港電訊(6823)只係收息股，增長力不高，不太適合你這個年紀。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q18841-Q18860）

Q18841：

你好，唔明你點解成日叫人供盈富，回報應該唔高？

龔成老師：

其實盈富基金的作用，是「平衡組合」，我見你好執著盈富回報率，但盈富原理就是持有50隻股，目的就是分散風險，好多時只要求基本的回報就得，你唔好太執著這些野。

我過往做了10年銀行及證券行，見好多散戶自行選股，都是輸多贏少，反而長期月供盈富的一群，是有錢賺的，並不是太錢，但比起大部分虧損的散戶，這算是不差的成績。我地投資，「適合」自己都好重要。

好果你想有較高增長，可考慮月供安碩恒生科技（3067），當然3067的風險比2800大。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂，因此，這刻不能大注投資。最好的策略，就是月供，或自行分注小注慢慢收貨，原理如同不斷儲貨，這樣就能平均買入價，減少風險。然後就長線持有。

------------------------------------------------

Q18842：

老師:你好, 最新才於網上認識看你的資訊, 買了本80後.. 不過不太識選股, 炒來炒去都左手交右手咁, 想學習你長線投資增加收入

以50萬部署較進取的股票組合 ,可否建議現時可選擇哪些股份投資. 謝謝

龔成老師：

短炒唔會賺錢的，你之後調整翻，集中翻長線投資就得。我地投資的原理，就是將現金轉換成優質股，建立一個長線的財富組合，這是一個配置的過程。

有質素及有增長力的股票，可考慮：安碩恆生科技ETF（3067）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比較高左，有風險，你要自己平衡。

不少都要等回少少先入，因為部分仍貴。

上述可以是方向，但就唔好心急一次過入，要慢慢分注，或等。

另外唔建議組合全部集中在這類高增長，建議加入一些較平穩的類別，例如盈富（2800）。可以平衡你整個財富組合。

------------------------------------------------

Q18843：

謝謝老師，但想追問下銀河娛樂00027同金沙中國1928這2隻，為什麼老師您選的是金沙中國？

還有一隻2883中海油田服務想老師分析下俾啲建議，我6.3入左5手

老師我看完您的年報勝經了，好深奧，我現在還沒看致富藍圖和股票勝經，準備看過再回來再看一次

龔成老師：

銀娛（0027）金沙（1928）兩隻都是優質股，你投資任何一隻都可以，可長線。銀娛增長力較高，金沙較穩健及派息高，由於我想在組合中，增加一些較平穩的股票作配置，因此最後選了金沙。

中海油田服務（2883）質素中等，未算強。

佢係中國近海市場最具規模的綜合型油田服務供應商。
佢的服務貫穿海上石油及天然氣勘探，開發及生產的各個階段。業務分為物探勘察服務、鑽井服務、油田技術服務及船舶服務。

雖然佢都有一定的規模，但卻不是最高質素的企業，這是由於佢的產品自主力較弱。

石油是商品，當中沒有差異性，佢地要將石油賣出，只能跟國際油價，這令佢地處於被動狀態。沒有價格自主的能力，這令佢地的獨特性有限。這類商品企業，都可投資，但就要明白不是最高質的企業。

由於質素中等，唔建議大注投資，但相信油價上翻佢會上升的。

《年報勝經》是較深的，建議你先睇《股票勝經》，打好基礎先。

------------------------------------------------

Q18844：

成哥 你好，請問移卡作為長線你默睇

同埋1317楓葉教育

龔成老師：

移卡（9923）是有風險，有潛力的類別。

首先，佢的業務為一站式支付服務，包括基於應用程序的支付服務及傳統支付服務，並支持逾500款發卡機構的移動應用程序，以支付為基礎的科技平台。

其中包括微信支付、支付寶或雲閃付，涵蓋了中國大多數的電子錢包。

另外，佢業務亦有科技賦能商業服務，即是提供商戶ＳａａＳ產品（包括實時庫存管理、消費者關係管理、智能訂單管理及全方位僱員管理）、營銷服務（包括量身定製的精準營銷及客戶忠誠度計劃電子工具），以及金融科技服務（包括助貸服務、委託貸款及保險轉介服務）等增值服務。

睇翻佢的財務數據，增長快速，但業務變數大，行業有不確定性，估值上比較難，這一定會令股價上落大，這刻仍唔平，投資值博率只是一般。

你預佢有潛力，同時有風險，如果控制注碼，都可以小注投資。

至於楓葉教育（1317）本質不錯的，但增長力在近年的國策下，的確弱左，長遠仍是正面的。教育股之前熱炒，然後就因政策等風險而冷卻，慢慢由高位回到正常水平。

由於市場擔心企業之後的增長力，令這股的股價較弱。因為佢過往增長快，但在政策風險下，最影響的不是現時的業績，而是之後的發展，令增長力減慢。

以一間平穩增長的企業來計，現價已是合理價，現時可以理解為合理區中下部，但就唔建議投資太多。

------------------------------------------------

Q18845：

請問老師課程是實體上課嗎？有沒有機會可以同時有視像上課呢？因為我在新界工作，要七點去到灣仔有點難度呀！

又請問老師對我來說值唔值得買柏傲莊的細單位來投資呢？

龔成老師：

我有可能在下年，開一個有關於資產配置的網上課程。

至於股票班，由於內容太重要，暫時唔會。

因為之前實體股票班試過比人偷拍，之後放左上網賣，最後要搞到報海關先處理到，好煩。所以，網上類的教學，都好擔心有偷拍問題，風險太高，因為好多課堂內容，都唔想太公開，只想自己學生知，所以暫時都唔會搞。

柏傲莊，地點有質素，我在《5年買樓4部曲》都有講述香港其中我幾個睇好的地區，大圍是其中一個。

可以投資的，當然要睇呎價。

------------------------------------------------

Q18846：

老師我想請教你一個問題

我而家有屋住、唔使供、有一個女（已長大）咁我自己2016年買咗間細屋平租比自己人、仲要供的、而家自己人準備唔租

你覺得我應該繼續放租定賣咗去、攞D錢放入收息股、錢滾錢好呢，請老師解答

龔成老師：

從方向上，賣出物業再將資金投資收息股，是可以的，因為這會增加你的現金流，始終現時收息股回報率，高過收租回報，因此投資收息股，在配置上是較好的。

不過，由於香港買樓物業的成本高，你賣出後，未必買得翻，因此你決定是否行這一步，要從長遠的財富配置角度分析，唔好只是睇這刻的情況。

你要從長遠角度分析，自己是否不需要這物業。

------------------------------------------------

Q18847：

老師，之前你講過我既投資太過單一,著重左物管同內房,所以單一風險過高。但如果我現在加入一d未有投資過同之前未有留意既股又是否有點兒兒戲?

我聽到投資自己較為熟悉的板塊是比較好。你會唔會有咩板塊會推介初學者入手?

龔成老師：

你投資前，一定要完全了解，要熟識的項目，同時要有質素，不能為投資而投資，在你了解、優質的前題下，就可以進行財富配置，令你的財富組合更平衡。

如果你未能認識，最簡單就是投資ETF，盈富（2800）、安碩恆生科技ETF（3067），已經能助你風險分散，而你買入時，要慢慢分注，或月供。

------------------------------------------------

Q18848：

老師你好 我今日先第一日第一次買股票⋯ 我買左隻6860 其實我都唔識睇都唔明點解會咁多資金流入 啲人話會反彈 是嗎？

我本小所以想買下仙股試下⋯呢隻ok？

龔成老師：

指尖悅動（6860）係中國一家手機遊戲發行商，主要向遊戲開發商提供一站式解決方案，包括遊戲的營銷等，睇翻佢亦通過第三方授權及委託第三方開發之方式從事遊戲開發業務。

業務有波動的風險，這是行業的特性，會令股價較波動，對類股對投資新手並不適合。而佢整體的質素亦只是一般般。

另外，你買股票是買入一間企業，資金流只是影響中短期股價的因素，根本無分析價值，你行錯晒方向。

------------------------------------------------

Q18849：

龔成老師你好，我今年36歲，對股票不熟悉，用了多年的積蓄買了自己2199，可惜蝕了

請問老師我應該怎樣做？
應該捨棄，還是繼續等待？

龔成老師：

相信你現時過度集中在這股，這是投資的大忌，因為我地投資，並不是「博」，而是建立一個平衡的組合，在可承受風險程度下，去盡力爭取回報。

因此，單一行業只能佔股票組合的30%，單一企業只能佔15%。

維珍妮（2199），其業服務主要為研發；設計與製造貼身內衣和功能性運動類產品。

過往業務大致平穏增長，整體賺錢能力唔算好強，算係不過不失。負債過高，會係一個扣分位。

整體而言，質素算係中等，有投資價值，但不宜佔比重太高。

你絕對唔好再加注，之後就算等佢業務環境好轉，希望過1、2年後，經濟好轉D，佢業務好翻D，到時你就減持部分，平衡風險，餘下的就再到時睇情況去守。

------------------------------------------------

Q18850：

龔SIR你好! 最近才認識和留意你的文章,希望你可花一點時間看看或給一些小小意見就好了.

我今年已經34歲,早在十多歲的時候因經濟問題無法繼續升學, 以往對金錢概念沒太多,一直就是先解決現在的狀況.

所以,至今我沒累積很多財富,現金只有40萬左右. 其實一直我也有個留學夢,不過計算過一年可花費HKD20萬就卻步了.

因要在這個疫情放棄一份收入不錯的工作, 年紀也不小了. 當我想到這裡就會想: 可以早點明白金錢的重要就好了. 現在我都是一點點學理財. 由於對數字不敏感,往往我都是"婆仔"式投資.

做些保險儲蓄, 買了1手0005而已. 雖然如此,但我對留學這件事還未想放棄,利用疫情這段GAP的時間,希望善用多1年時間累積多點資金再看看這個夢是否想繼續.

希望你可以給我一點意見去怎樣處理財富較為有效, 至少留學回港後還可支撐一點時間來找工作. 謝謝你的時間! 祝安康!

龔成老師：

你要做兩樣野，第一，增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。《股票勝經》適合初階者的。

同時，我建議你大量增加理財知識，這對你長遠好有用。

投資，是一個配置的過程，你要建立一個平衡的組合，投資優質股，長期持有，當中要「平衡」，不能只集中個別股。

第二，將每月的部分資金，去做月供股票，供盈富（2800）。對初階投資者來說，月供股票是一個很好的累積財富方法，因為可避免你一次過在高位買入的風險。

原理如同儲錢，不過就不是儲現金，而是儲股票。計劃要長期進行。

另外，盈富是一個組合，適合絕大部分人投資，風險不高，長期儲貨可助你財富平穩增值，記住要長線持有。

其實，你34歲，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

你有基本知識後，可以再考慮以下股票：

銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：安碩恆生科技ETF（3067）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18851：

你好 有關1044 報表想請教

係morningstar 睇到 1044由2010年到2020年 revenue, operating income, net income, EPS 都穩定上升, ROE更是年年20%,
為何股價10年間都係橫行？

謝謝！

龔成老師：

恆安國際（1044）不差的，佢主要業務為在中國生產，分銷及銷售個人衛生用品，零食產品及護膚產品。

你見佢股價增長不強，主要是過往市場對佢有太大期望，因此一早已反映左佢的價值。到近5年，你見佢的生意與盈利，雖然都有增長，但力度不算強，因此市場對佢的估值都有所調整。

------------------------------------------------

Q18852：

我想問龔sir，點樣由短炒變成長線當中嘅重要秘訣係咩？

因為我都明白，但尼方我點樣轉變自己嘅心態?

另外想問龔sir長期持有嘅意思係最少持有五年，咁如果本身資金唔多，好難達成財務自由？

因為5年時間要好有耐性，如果係持有2年以上算係長遠投資？

同埋會唔會目標價？

龔成老師：

我1999年開始投資，頭幾年短炒同用技術分析，輸得多，開始問自己，其實呢種方法得唔得？雖然人人用，但未必真係得。

之後，我再睇更多成功投資者、基金經理的書，發現佢地都唔會用短炒！

我之後就開始用長線投資，最初都有少少忍唔到，但當我不斷睇成功投資者的書時，就愈提自己要堅持。之後開始訓練自己唔好睇股價，例如一個月唔睇股價，學心理因素的訓練。

最重要是大市上落，股價上落，你要好平常心，唔好比佢影響，呢一點好難，但你訓練1、2年都可做到，香港散戶基本上做唔到呢點，所以佢地輸多贏少。

最好當然持有5年，但你都可以試下訓練2年先。

你有一些核心概念錯左，就是認為要賣出先可以做到財務自由，你仍停在現金概念，同一般散戶一樣，建議你睇《財務自由行》《股票勝經》，清楚翻現世代的財富系統先。

------------------------------------------------

Q18853：

我想問盈富其實買月供股定買一手好？
定因為係當長期用 買月股係再長線啲？ 定其實都係一樣

咁嘅話我先買一手會唔會回報一咁多

另外潛力股嘅意思係睇一啲新加入嘅股票睇有無得升?
定宜家現有嘅當例如騰訊再睇佢係咪有得升？ 咁係買一手定月供比較適合。謝謝

龔成老師：

月供會比較好。

月供股票就是你每月將現金，買入某一隻或多隻股票，慢慢咁樣儲貨。坊間不少銀行都有提供月供股票服務，你先開證券戶口，然後登記做月供股票。

形式就是每月投入相同的金額，買入同一隻或多隻股票，並持續進行。

例如，每月以相同金額$10,000 買入盈富基金（2800），假設第一個月股價為$25，就能買入400股；第二個月升至$35，就能買入286 股；第三個月跌回$30，就能買入333股。

總結這三個月，投入了的資金為$30,000，累積股票為1019股，平均買入價為$29.4。

由於月供股票每月投入的金額相同，因此當股價上升時，買入的股數自然減少，而當股價下跌時，就自然會買入較多股數，如同自行調節一樣。

要注意的是，由於每月持續投入資金，因此一定要選優質股，長線投資，同時要以儲股票的概念進行，最少持續供3 年以上，之後持有5年以上。

潛力股，即是有較高增長的企業，佢地的業務處較高增長階段，股價會有理想增長，不過，由於市場變化一般較大，所以股價的波動都會較大。

------------------------------------------------

Q18854：

我睇完龔sir 既股票勝經，黎緊會睇你介紹既窮爸爸富爸爸，再睇你既選股勝經同年報勝經，我經常睇你facebook,覺得你講得好岩，我都想學到你咁叻，一向都唔睇書，宜家開始裝備自己

我成本書，現金流折現法呢part唔明，見到你講已經簡化左，我都理解唔到

龔成老師：

加油！其實我18歲時，都是零理財投資知識，都是當時狂睇書，知識不斷累積翻來，無人一開始就識，我只是過往多年努力的成果。

現金流折現法，其實好深的，你唔明都正常。

所有資產，都有當中的價值，我地都可以計出來，不過計算過程較複雜，同埋沒有絕對的計法，而現金流折現法就是其中一種，你可以理解，就是將這資產，往後產生的現金流相加，但由於錢是會貶值的，因此，就要將將來的錢，變成今天價值去計。

就算在我的股票班，都要花一定的時間去講，同學先明，你有概念就得。

------------------------------------------------

Q18855：

想問成哥，我成日見到你話留有現金等大市跌入貨，但我想問如果大市一路上升，咁我儲既現金又可以點做，係拎去投資定係應該繼續放喺度等，定係有其他方法？

另外通常我買一隻潛力股或平穩增長股應該係投資幾耐先睇到比較明顯既成果而去決定放唔放？你講既長線通常係幾耐？

雖然我都想上你既堂，不過而家要返學就吾到時間，我有買你既書睇，股票勝經、80後百萬富翁、財務自由行 呢3本，呢3本睇既次序應該點排？

龔成老師：

我地唔能夠100%現金的，我地會分析大市的平貴度，決定現金的比例。例如現時的大市，大約處於合理區，你要有一定的持貨，同時有一定現金。

當你每月有收入，就要部分入貨，部分留有現金。

至於留低的現金，就是等大跌市先會入。

因此，如果你這刻太多現金，其實都要適度買入優質股。

長線投資，一般指5年，最少3年。

你可以順次序睇：《80後百萬富翁》《股票勝經》《財務自由行》。

------------------------------------------------

Q18856：

我呢家27歲月入大概68k，手頭上資金因為以前亂洗同投機失利得200k到，計哂以下供保險，一個月儲到大概25-30k

其他資產：

保險既基金ard85k（月供2500有環球、美股、債券等等，算係進取既增值組合）

十年期儲保300k（供佐兩年，年供150k，因為之前某d原因買唔到有保險成分既product，預一舊錢將來做medical reserve）

十年期人壽80k（供佐4年，年供20k）

想係3年內儲夠1-1.5m買樓結婚，想問下點plan投資好？

龔成老師：

我地理財，最重要是攻守兼備，你現時已有適當的防守部分，餘下的就是進攻。

不過，由於你3年內希望用資金，因此又唔能夠太過進取，建議你集中投資平穩增長股，小注潛力股，相信這是較平衡及適合你的組合。

你可以做月供股票，每月$15000，又或自行分注投資。

你可以考慮盈富（2800）$6000。

另外再加2隻（每隻$3000）：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可加1隻（$3000），考慮：阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

我相信你要完成目標是可以的。

------------------------------------------------

Q18857：

龔成老師你好！我是一個70後，剛看完你的《80後百萬富翁》，明白了創富的重要性，雖然遲咗少少，但希望可以追得返，最後能達到財務自由。

我一直都有儲蓄，但可惜沒有創富，大部份儲蓄都只是放在定期，現在存款有數百萬。明白到分注投資可以減低風險，但以我現在的情況，怎樣分注才合適呢？

每月用固定儲蓄存款定時購入一些平穩增長股？謝謝老師指教！

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你是70後，財富仍然有增長力，但就不能太進取，應該要以「平穩增長」作為核心。

你可以考慮盈富（2800）。

另外再加：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

上述股，你可以分注去入，慢慢將資金，轉為優質股的組合，例如每個月入一次，分注去人，將買入價平均。盈富可較多。

你可以將$100萬，分開1、2年去入。餘下資金，就等機會先入。

------------------------------------------------

Q18858：

龔sir你好，我想問一下富途證券行內的基金好唔好買得過？

我係90後 如果買基金 現在開始買A股基金 港股基金 美股基金 還是債券基金 還是混合型基金比較好？？

龔成老師：

基金有好多好多，你最重要了解佢的投資策略，持有的資產是否有質素，過往的表現時否能跑贏大市。

你可以投資一些ETF，管理費最少，同時只要有股票戶口就可以買賣，盈富（2800）、安碩恒生科技（3067）、南方Ａ５０（2822）、VOO、QQQ，都是可取之選，你可以分注投資或月供。

------------------------------------------------

Q18859：

老師，我最近重新檢視過我的財務狀況，發現我的保險保障並不足夠，聯絡了我的保險經紀

他建議我買一些定期的醫療和人壽保險以及終身的危疾保險，終身的危疾保有多次性的賠償（復發條款），似乎保障較足，但費用比定期的貴很多（所有的保費加起來會佔現在的人工（稅後）大約8.5%）

我上網看了很多資料，說保費佔收入的10-15%算是合理，但對於危疾險，有些人建議買定期的，有些則建議買終身的，兩者似乎都有道理

所以反而不懂選擇，想請問老師這方面會否有一些建議呢？先謝謝你了

想報你股票班，但出年的roster 還未出，想請問如果到時有些堂不能上的話，能否安排補課呢？

龔成老師：

保險，最重要是你的「需要」，因此每個人都不同，保險的原理，就是將的不想面對的風險，轉嫁比保險公司。

在理財上，我地應該買保險的，因為有防守作用，不過，足夠就得，不用太多。

至於危疾，如果你本身都認為自己想長期將這個風險轉移，就買終生。

股票班，我有補堂機制的，你某一堂上唔到，下次開班時，就可以補翻比你。我差不多每個月都會開一班，總之你預早通知我地同事就得。

------------------------------------------------

Q18860：

你好，龔成。我有以下股票。是否可繼續持有？及可否每隻評論一下買入之價值，是否合理、便宜、或較高？

1） 9988 $172.50
2） 27 $45
3） 1928 $ 28.20
4） 939 $5.49
5） 700 $352
6) 2628 $13
7) 1299 $48
8) 2018 $40
9) 2382 $80

因為本人主力都是買返藍籌股，大部份都是跌市時才買。謝謝回覆

龔成老師：

現時持有的，都是有質素的股票。

阿里（9988）、騰訊（0700）有增長力，可長線持有，現價唔算平。

瑞聲（2018）、舜宇光學（2382）有質素，但中短期較波動，長遠正面，現價合理區中上部。

友邦（1299）、中國人壽（2628）不差的，但增長力中等。建行（0939）只是收息股，無乜增長力。3隻大致都合理。金融類股唔好持有過多。

銀娛（0027）、金沙（1928），有質素，現價合理，可長線。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q15141-Q15160）

Q15141：

老師你好，我今年22歲，剛畢業，收入14000，每月大概儲到6000。

也是剛學習投資，老師會建議每月全數供盈富嗎？

現時儲蓄大概85000，最近也有留意比亞迪和福壽園，不過我考慮到因為太少本金，老師是否都不太建議購入？應該儲更大本金，才購入其他股票？

龔成老師：

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股最多只能小注。

你可以做月供股票，每月$5000。

你可以考慮盈富（2800）$2000。

另外再加1、2隻（每隻$1500）：銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）等，你可以了解下這些股票，然後從中選股。

如果你不懂股，就集中供盈富$5000。

現時大市處合理區，可以一邊投資一邊留現金，你現金$85000，可以動用$35000，分注投資一些優質股，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q15142：

成哥你好！本人同是80後年青人，都是希望透過努力奮鬥，創一番事業！ 雖然你並不認識我，但因為投資理財理念相同，慢慢你已經成為我嘅知己！

本人十三年前曾經透過中國人壽($5入$50出)大賺百萬離場！ 過去12年間透過這第一桶金成功創業，現在略有收成！

在過去12年中由於全神貫注自己經營的生意，所以並沒有接觸過股票！ 只係一賺到錢就買樓， 出租 ， 翻按再買樓！回望過去雖然在股票市場有錯失機會，但並沒有後悔！

現在本人資產如下
六個住宅物業 市值六千萬左右( 仲欠銀行千五萬)， 除兩層自住，其他全部出租， 市值租金夠比供款！

在半年之前，在樓價高位時向銀行返按套現，而家手頭上現金約一千萬左右！ 手上並沒有任何股票！

由於過去在地產市場大有斬獲， 個人感情都偏向購入房地產收租！ 請問最近823,778,435,41,2778 都出現懸崖式下跌， 在別人恐懼時我貪婪的驅使下，心癢癢手痕痕想大大棍全數出擊！

在負面因素上社會事件，疫情， 我相信總有一日會過去！個人覺得在QE的大環境下應該有利！ 請問以上幾隻收租股前景如何請指教?

龔成老師：

你過往的資產配置做得很好，並無錯過機會，只是在之後的長遠上，你應該建立更平衡的組合，除了前向衝，都要開始「守住財富」。

我會建議你平衡財富：物業、生意、優質股，建立永久性財富組合。

你現時持有的物業，我建議你永遠持有，作為永久性資產，加上政府的措施，賣出後買翻就要收重稅，所以不建議賣出。

疫情當然總會有一天過去，加上新的QE，將令現金進一步不值錢，你只要持有資產項就得，物業、優質股將會在長遠價值大升，這是唯一的出路。

收租股近期的確有值博率，可投資，不過，我不建議你太過著重地產類比重，始終平衡配置都是重要的。

所以，分注投資收租股，上述都是有質素的地產相關股，小注可以，餘下資金應投資其他長期優質股。你要從長遠的財富分配方面設計組合。

------------------------------------------------

Q15143：

你好老師。睇哂你書，改變我投資觀念，有幾隻研究睇下可唔可以成為倍升股之一，來你俾少少意見！

6049，1691，9928

龔成老師：

保利物業（6049）係中國的物業管理服務綜合商，主要提供以下三項服務：（1）物業管理服務（2）社區增值服務（3）非業主增值服務：主要向物業開發商提供案場協助服務。

這企業的業務增長理想，現金流強，但上市時期短，規模細，都是不利的因素。投資價值都算有，倍升潛力都有機會的，算是中等。

ＪＳ環球生活（1691）主要從事設計、生產、營銷、進出口及分銷清潔電器（吸塵器、掃地機器人等）、食物料理電器等。

這企業最大的問題是貴，現價值博率不算高。

時代鄰里（9928）由時代中國控股（1233）分拆上市，主要在中國從事提供物業管理服務及相關服務。

但佢新上市，現價唔平，都是風險所在，倍升的可能性算是少過一半。

提翻你，你太集找睇一些新股半新股，而這類企業的真實一面，往往要上年後的2年才能「見真章」，要注意。

------------------------------------------------

Q15144：

老師您好，我今年32歲，月入$44000，每月儲$35000，現在有儲蓄$130萬，應該置業還是投資股票更好？

現有股票3888，$31時買入（10000股）最近升至$29，應該估出或可以中長期持有？

700（$470買入800股）有機會到價嗎？

我想賣出3888買入阿里爸爸，請問值得買入嗎？
謝謝你

龔成老師：

如果你本身未有物業，而你長遠又有置業需要，應該留資金買物業。香港經濟會轉弱，中短期樓市好有機會向下，這是一個時機，但由於長期供應仍不足，因此，唔好預佢跌得多，長遠會上翻去的。

金山軟件（3888）與阿里（9988）都是潛力股，長遠都是有發展。以現時的平貴及發展價值分析，金山算是比阿里略貴，因此，你轉阿里是可以的，或轉一半都得。

至於騰訊（0700），雖然仍是有質素的股，但增長力比過往弱左，要上翻$470要長少少時間，可守住先。

------------------------------------------------

Q15145：

你好,我六年開始月供港鐵.
一,兩年前開始月供AIA

現在想供多一隻,請問有什麼推介？
多謝

龔成老師：

上述的兩股，都值得長期月供，可繼續。

如果想加多一隻，最簡單是加入盈富（2800），可以有效平衡你組合的風險。另外，你可以考慮：盈富（2800）、金沙（1928）、長建（1038）、中銀（2388）、港鐵（0066）、恆基（0012）、港交所（0388）。

------------------------------------------------

Q15146：

以下是小弟45歲既背景

1）三人家庭月入35000，小兒中一
2）有層自住樓，市值5M,月供緊12000，欠12年供款
3）而家月供緊4000元2800
4）積蓄有45萬

5）手上有800股5仔（80元買），3xxx股2800，無其他股票
6）MPF有60萬，50%高風險，50%低風險
7）以前唔識為退休做準備，現在開始怕退休後唔夠用
8）有一入50萬人壽保險（無儲蓄成份）

有什麼投資建議呢？

龔成老師：

你的財富組合，大致平衡。我地理財，最緊要攻守兼備，同時平衡分配。因此，整體上都算可以。

不過，你45歲，財富仍可以平穩增值（但不是進取），而你增值類的資產，並不多，要加強這方面。

現時的$45萬，可以動用$20萬去投資，以分注模式進行，你可以考慮：銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）等，你可以了解下這些股票，然後從中選股。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q15147：

請問9988 值得持有嗎?

會像騰訊一樣?

龔成老師：

阿里（9988）有質素，有前景，是一隻很強的股票，有長線投資價值。不過，股價略略貴，如果本身有貨，可持有，如無貨想入，就只能這刻小注。

至於如騰訊（0700）是甚麼意思？

現時阿里的市值已經超過了騰訊。

------------------------------------------------

Q15148：

老師，我現時30歲, 每月穩定月入20,000, 加埋freelance大概搵24,000左右, 之前因為去外地讀書使左一大筆, 所以現時想專心儲錢結婚

現時大儲蓄有現金20萬, 儲蓄保險9萬左右. 之後希望以月供股票儲錢, 每月用12,000投資月供股票, 其中7000放落盈富基金 (2800), 3000 放落港交所 (388), 2000放落恒安國際 (1044)

希望4-5年可儲到100萬, 呢個投資組合會唔會太保守? 請問你有咩建議?謝謝老師

龔成老師：

你的方向正確，策略可以進行。

你的年齡，仍是財富增長的時期，你投資平穩增值股是適合的，4、5年都是一個不錯的時期，你可以好好利用這段時間增值，而投資優質，平穩增值股，正確。

上述所選，無問題，都值得長期月供，保持進行就得，唔算保守。

但我相信你每月，未必儲到太多現金，因此，手上資金$20萬，就盡量不要動用，除非見到好大的跌市，去翻平宜區，先會考慮。

你保持上述策略進行，我相信你在5年內有$100萬無問題的！

------------------------------------------------

Q15149：

你好，想問下你點睇期指期權呢？值得學嗎？ 坊間有人教炒股炒市，期指呢啲你點睇呢？ 幾時再有堂可上？謝謝！

龔成老師：

唔值得學，因為輸的人多，贏的人好少。

我過往做過10年銀行及證券行，玩這類衍生工具的散戶，大部分都是輸錢收場，在這個戰場，散戶根本無得同大戶打。

反而，我見有部分散戶，簡單買入優質股，長線持有，佢地係最賺錢的一群。

同埋，全球投資最賺錢的人，巴菲特，都強烈反對炒股炒衍生工具，佢會建議人「簡單投資優質股長線持有」。

5月會有股票班。

------------------------------------------------

Q15150：

老師，你好。我是投資新手，最近有興趣想買月供股票，每月有$8000，想買盈富基金，不知老師有甚麼建議/意見？謝謝！

龔成老師：

對於投資初階者來說，月供股票是好適合的方法，因為你這刻未懂得買入時機，未懂分析企業平貴，以月O供去平均買入價，是最能減少風險的投資方法。

另外，盈富（2800）是一個組合，對於未懂得選股的投資者來說，是最好的。

現時大市處於合理區，建議你一邊月供，一邊留部分現金。你可以月供盈富，至於供多少，要視乎你本身有無資金、每月有無現金剩。

開始月供後，唔好理中短期股價，保持長期進行就得。

------------------------------------------------

Q15151：

老師，我係你舊生，有野想問
1:筆記作行業估值既比較個意思有小小唔明，即係同行分析嗎?

2:吉利同比亞迪，石藥同中生既比較問題，想問我係唔係應該如果渣住2隻汽車股既話，將錢集中番係同1隻入面比較好，長遠都係比亞迪有優勢，咁我不如盡早換隻更加好既，加上我潛力股比例不足?

龔成老師：

1）這是進行行業的分析及比較，例如你想分析某一隻股，你就要找出這企業的競爭對手，大家都是類似大小的行家，分析他們的優劣，以及行業特點，同時，為同行企業進行估值。以更立體推算出目標企業的價值。

2）首先，在你的組合內，每個行業都要有一個上限，不能太多，至於這個行業的比例中，你可以持有多少股，則不建議過多，因為想你懂得選較優質的。但都不一定要集中在一隻，就時同時投資2、3隻都可以，只要你分析過，都是有質素、前景正面，就得。

------------------------------------------------

Q15152：

龔成老師：你好，本人係朋友口中認識老師你，想請你指點迷津

因為早年唔識投資，亂聽人講，買股票損手離場，只敢死儲錢...但人到中年，見朋友好多都已經成功置業，知道佢地都係股票投資獲利，深感落後於人，希望可以追返上黎

本人有綠表，仍心大心細買唔買好...因為由屋企要過海返工先想買樓，其實無急切住屋需要

本人35 歲，月入平均約港幣$35,000; 月儲約港幣$13,000

手持約25 萬港幣
約70 萬人民幣 (剛於內地進行了90 天，短期定期存款，年利率約5%)
一兩金粒（多年前於金價～$16,000 買入）
兩條100 oz 加拿大銀條，於$15,408 購入

股票：
騰訊（700)300@$398
港燈-SS(2638) 1500@$5.580 (抽返黎）
吉利（175)3000@$14.26
中國電力（2380)13,000@$2.99
仲有四隻廢股，因為當年聽人講而買，蝕左六位數字，每隻得返一千幾百

想請問老師，我應唔應該將啲人民幣轉返做港幣，喺香港做投資？因為人民幣匯率低左，換返港幣都好肉赤

其實筆錢儲黎做買樓首期，但我本金亦唔算多，知道自己要買樓仲有啲距離...

我立即睇返老師之前解答大家問題嘅post, video, 都知老師好支持大家供股供盈富基金，請問有冇邊間銀行/ 證劵行推介？

我入儲$13,000, 冇乜投資知識（之後會睇返老師啲書，同報班），暫時月供$9,000 集中落盈富好，定揀多隻股好呢？

另外，我手持嘅現金約25 萬港幣，應該加大供股金額，定分注落返投資市場好？

請問我手持嘅貴金屬，應該繼續持有，定都係蝕少少套現進行投資好呢？

最後，請問老師咁多書，淺入深，我應該由邊本睇起

唔好意思，比較長左少少
祝老師身體健康

龔成老師：

你要好好學理財，因為你本身的牌面不算差，但未能有效運用資金。其實我地理財，就是進行一個財富的配置，在可承受的風險情況下，為自己爭取最大的回報。

記住，投資不是炒賣，是買入企業長線持有。

首先你要明白，我地繼續持有一隻股票與否，與你的買入價無關，因為這只是一個心理因素，最重要是企業的質素、前景。

你上述持有的4隻股票，都是有質素的，你可以持有，長線就得，就算部分股價落左，都有得守，但就唔好加注。

至於你另外所講的幾隻癈股，你最重要睇翻企業的質素，因為買股票就是買企業，如果企業無質素，就要賣出，唔好比賺蝕數影響。

另外，你要好好運用手上的資金，如果你投資經驗不多，最初可以用「月供股票」的模式進行，同時你要在這段時間，好好學投資，到半年後，先開始以一手手的模式進行，這是最好的策略。

除了盈富（2800）外，你可以加大月供金額，同時供其他股票如：金沙（1928）、長建（1038）、中銀（2388）、港鐵（0066）、恆基（0012）、港交所（0388）。

另外，以你的情況，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q15153：

你好，我現在有少量現金
我想問下港鐵38入係咪最好呢

龔成老師：

港鐵（0066）是有質素的股，有獨特性，有前景，但不是高增長型，只是平穩增長。

如果去到$38，是一個不錯的買入時機，當然可以入，長線投資。

------------------------------------------------

Q15154：

老師之前你提到會回落24,000，其實我覺得依幾日市場好怪留意左好幾日，病情根本冇好轉，但市場不斷追捧好多中國股，例如建設銀行突然升左好高

呢個係咪一個其實幻象只係國家救市我係咪應該要等返去落去先入貨。

謝謝老師。我而家對股票好有興趣好想等病情好咗參加你的股票班

龔成老師：

早前，當中國的初期肺炎爆得勁時，市場處於「略恐慌」狀態，這就有可能出現下跌的程度，比經濟轉弱情況為多的情況。

當市場開始消化這事情，就會去到理性面，只要情況無太大的惡化，市場都有機會視為好消息。

不過，要解釋股市是困難的，因此，我經常說不要「預測股市」，不要著重中短期市況，因為股市往往無得估的。你只要著重企業的基本面，長線投資就得。

好，遲少少股票班見！

------------------------------------------------

Q15155：

老師你好，我有一位43歲朋友，無住居問題，每月收入44000，我叫他多看你文章，上年開始月供股票：
8000元2800，2000元1177
，每月儲3500-4000現金

今年他想
7000元2800, 3000元1177, 2500元1211
,每月儲3500-4000現金

他目標供到65歲和每年加人工，他會把月供金額上升

他想請問這可行嗎？和現在才供1211會否太遲。
他目標是有800萬至1000千留給女兒

龔成老師：

43歲，仍是財富可以增長的年齡，但就不是進取的時期。佢投資「平穩增長股」+「潛力股」是可以的。

不過，在比例上，我會建議月供盈富（2800）$8000、中生製（1177）$2000、比亞迪（1211）$2000會較好，餘下就儲現金。

現金的作用除了可作備用外，另一目的是等機會投資。

現時大市處合理區，可以一邊投資一邊留現金，而餘下現金的運用，就是等大跌市時出手。

現時才開始供比亞迪，未遲，但佢唔能夠過份進取，所有野都要考慮風險與回報，建立一個平衡的組合。

反而，如果佢目標去打上$1000萬，除左月供外，要好好運用儲蓄到的現金，在這段時間，好好學投資，掌握選股、投資時機、企業平貴等概念，對長遠財富增長好有用。

------------------------------------------------

Q15156：

Hi 龔成老師你好， 我時常 睇老師喺網上解答大家的問題，覺得老師的意見好中肯，尤其是月供股票嘅問題，令我獲益良多， 多謝老師的講解。

現有有關月供股票問題想請教：

我想月供股票， 每月$4000 供四隻股票 每隻1000蚊， 我今年48歲65歲退休仲有17年供款時間

之前你答過我相關問題，話我可以頭十年時間供啲 平穩 增值 嘅股票， 例如騰訊(0700)， 港鐵(0066) ，盈富(2800)， 之後時間再慢慢轉為供啲收息股

我原本又想供 領展(823)及中銀香港(2388)，但係上年2019因為社會問題， 零售 同埋地產，港鐵都好大影響 ，所以我覺得領展，中銀香港，港鐵業績都會有好大影響

所以最後我決定改為供兩隻中煤(0003)同埋盈富基金(2800)， 希望龔成老師可以畀啲意見我

以我現在嘅年紀48歲同埋17年供款期，供中煤同埋盈富基金 這兩隻好嗎 ？謝謝老師解答。

另外我有1.6萬美元，20萬港元流動資金，請問 可以怎樣部署 ？ 我想用少量美元學習買美股， 希望老師可以俾啲意見，謝謝。

其實我嘅投資目標係希望月供股票，如果可以有收息又有增長，目標係可以做到退休前財務自由或者有被動收入

龔成老師：

其實，你唔需要比中短期的因素，影響左你的投資策略。

月供股票是長期性的，每間企業都會有中短期問題，只要長期的質素無變，就得。例如你可以自行分析，該企業3年後的業務情況如何？如果推斷到無大問題，就不同擔心中短期不利。

你可以供：盈富（2800）$2000、煤氣（0003）$1000，另外，可以考慮加多一隻，港鐵（0066）長遠發展力仍強，你可以供$1000。

在這段時間，股價會有上落，但基本上你唔需要理會，保持長期進行月供就得。

至於現金方面，美股你可以投資一些美國的指數基金，這是最平衡及適合你的。

至於港幣現金，你這刻可以大部分持有，等機會，部分分注投資優質股，是可以的。

------------------------------------------------

Q15157：

龔sir2800 012 2388 0066這些股息可以去到6%嗎？

龔成老師

以現時的股息率計，未有。

因為當企業有基本的增長力時，股息率就未必去到好高，如果要去到6%的高息股，企業增長力就會較一般。

不過上述股，雖然這刻的股息率未到，但往後的股息會慢慢向上，長遠會有的。

------------------------------------------------

Q15158：

Hi 龔成。本人24歲 月入2萬
對投資理財方面零知識
已現試下月供匯豐股票當儲下錢 ( 每月供$3000)

但本人另有分期付款供緊 (之前簽落太多美容plan 加埋大概每月還緊$8500) 仲有大概一年多先清得哂

想問下如果咁既情況 我謹有剩下既錢可以做咩投資?股票?

我只求一個月有多賺幾千或者有十萬(有就最好啦)入袋,當幫補下再儲埋咁 我就心滿意足了

麻煩請賜教
Thanks a lot!

龔成老師：

相信你是中低風險的投資者，匯豐（0005）都算適合你的，但你始終24歲，好年輕，是財富增長的黃金時期，因此，建議同時投資其他較有增長力的股票。

匯豐這股有質素，但賺錢能力已比過往年代弱左，增長力不強。因此，你只能視這股為收息股，唔好對股價有太大期望。你每月供$3000投資，視為長期收息，可以的。

你之前的分期付款，希望你過左今年的費用後，唔好再有這類。因為會影響你每月的現金流，而你這年齡是財富增值的黃金期。

一年後，建議你加入盈富（2800）去做月供，每月$4000，同時，要儲下現金，這樣，你的財富會有更快的累積。

------------------------------------------------

Q15159：

Hello龔sir,多年前亂咁聽人講買左1029鐵貨，2314理文造紙，2689玖龍紙業，然後坐艇至今，帳面冇左一半，請問點睇呢3隻股，謝謝

龔成老師：

我地繼續持有一隻股票與否，是基於這企業的質素、前景，買入價只是一個心理因素，絕對不要被這因素影響。

鐵貨（1029）業務波動，經常出現虧損，企業的投資價值不高，你最好找機會賣出。

至於理文造紙（2314）本質不算差，但業務有下跌情況，如果持貨不過多，都可以守住先，不過中短期會較弱。

玖龍紙業（2689）業務都不差的，但增長力同樣減慢左，你只能預佢平穩增長，要大升並不易，這股可以守，但要有耐心。

------------------------------------------------

Q15160：

龔成老師，想問下每月打算月供3萬蚊，有6隻心水股票，經銀行買佣金每隻最低$50，應該每月供哂6隻

定係每月只供兩隻，下個月又供另外果兩隻，再下個月期其餘兩隻，每三個月一個循環，以減低佣金開支？

龔成老師︰

如果手續費去到本金的1%，就會開始高，對你長遠的回報有一定的影響。

所以，只要每隻股票的月供成本控制在1%內就可以，以你月供3萬（平均每隻$5000計），$50成本只佔1%。

這成本程度可以接受，所以你直接每月供6隻就可以。

----------------------------------------------

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

#新人王 #康健人壽 #這群人
不可能還不開市吧!
難道是嗯嗯不夠多?

學會「被拒絕的勇氣」，讓你戰鬥指數破表。
從秒被掛電話，到一通通得心應手的對話。
康健人壽電銷團隊齊心協力實境訓練、前輩們傳授秘訣。
讓你快速開市成交，下一個新人王就是你！

【康健電銷X這群人 邀你一起即刻加入】
檢測你的新人王潛力➡️ https://reurl.cc/0OAxj9
#康健人壽 #電銷招募 #電銷新人王

支持群人 訂閱訂起來➔ https://tgop.pros.si/KWJH4
A Day To Remember 播放清單 經典語錄系列➔ https://tgop.pse.is/M3HAM
來看這群人更多日常生活 ➔ https://tgop.pse.is/KZPB2
群人製作的都在這➔ https://tgop.pse.is/KB5Z4

這是我們的私生活頻道，會不定期的出現各種我們私底下的小影片喔！

演出：網路搞笑團體「這群人」This Group Of People a.k.a. TGOP。
註：戲劇效果、激動演出。

請調整為1080pHD觀看品質較高。

Facebook
這群人：https://tgop.pse.is/K7SE2
展榮展瑞：https://tgop.pse.is/MGXKV
茵聲：https://tgop.pse.is/LEVZ5
董仔：https://tgop.pse.is/MDX52
石頭：https://tgop.pse.is/LZS6Y
尼克：https://tgop.pse.is/HJB2Z
木星：https://tgop.pse.is/MC3JL

Instagram
這群人：https://tgop.pse.is/KE6S9
展榮：https://tgop.pse.is/MJER2
展瑞：https://tgop.pse.is/MEVXJ
茵聲：https://tgop.pse.is/KFWEX
尼克：https://tgop.pse.is/M4GAE
董仔：https://tgop.pse.is/MNY8W
木星：https://tgop.pse.is/KMBXE
石頭：https://tgop.pse.is/MSNET

這群人bilibili： https://tgop.pse.is/M79UP
這群人微博： https://tgop.pse.is/MLT7Q

【兩班半攝影棚開幕啦】
https://www.17hrs.com.tw/
【三花自創品牌3．one x iRoo開賣啦！】
https://3one.iroo.com/
【工作邀約請洽詢】
聯絡信箱 ：thisgroupofpeople@gmail.com