【龔成問答信箱】（Q22401-Q22420）

Q22401：

Hello 依家溫緊進階班第5堂 notes 你話如果附屬公司多而且比較接近50％ or 小數股東股益較大 個純利率會扭曲左

想問下幾多間附屬公司先為之多。同樣 小數股東股益點樣先為之大 例如佔左總盈利既某個%就叫大？

龔成老師︰

我地要估這個調整，主要係因為當集團對附屬公司持股，較接近50%時，即附屬公司盈利中，有不少比重非有集團所有，令計算出來的純利率出現偏差。

所以，我地有時係會唔扣"非控股權益"，直接用盈利(而非股東應佔溢利)去除營業額，去計算純利率。

但我地唔需要一見到"非控股權益"有數字，就去做這個調整。因為有時個數字好細，當你調整後，發現純利率其實無明顯變化。

所以，你預"非控股權益"大於"盈利"10%，我地才會對純利率進行調整，令佢數字更能反映真實情況。

------------------------------------------------

Q22402：

你好請教1928，見佢近期弱左，如靠債去還債，賺到的利潤都會被利息蠶食。

派一次中期息都要10億美元，好難想像何時內可以做到。

還未計續牌等政治風險，以你的專業分析點解可以對此企業有咁堅定信心？


龔成老何：

金沙（1928）風險度的確增加左，但投資者分析時，不要將中短期因素太過放大，其實只要澳門疫情穩定翻少少，其實就無事。

睇翻上半年，金沙中期經調整物業EBITDA 2.34億美元，銀娛都是EBITDA有正數的，反映如果唔計會計因素，佢是有錢賺的，除非疫情惡化，否則，佢無問題，而我地從投資，是投資企業的長期，不用將當刻的短期因素太過放大，同時佢持有的資產好有價值，要融資都十分容易。

至於政治因素，的確有少少，但如果從「澳門政府想那些博企續牌的角度」，就是金沙、銀娛，這是從就業、澳門發展等的角度去分析。

------------------------------------------------

Q22403：

你好。想問9926同2878點睇，9926跟人買跌左十元。點算，唉。守唔守好

龔成老師：

康方生物（9926）你預佢上落會較大，不宜持有太多。

主要從事生物製藥業務，專注於腫瘤學及免疫學治療領域。

佢候選藥物例如有ＡＫ１０４：適應症包括子宮頸癌、肝細胞癌、食管鱗狀細胞瘤、胃癌、非小細胞肺癌、黑色素瘤、晚期實體瘤、外周Ｔ細胞淋巴瘤；預計於２０２１年下半年在中國提交治療子宮頸癌的首次ＮＤＡ（新藥申請／生物製品許可申請），及開始在美國進行治療晚期或轉移性實體瘤的Ｉｂ／ＩＩ期臨床試驗，以
及聯合治療實體瘤的試驗。

這企業現時是投資期，回報要慢慢先見到，不過，這股估值十分難。因為無實在的收入與盈利進行計算。

只可以話，風險較高，是有危有機的類別。投資注碼一定不能大。

如果持貨，小注，長線，不是不可。投資得就一定長線，等佢長期回報。

如黑持貨多，宜減。

晶門半導體（2878）都算有長線投資價值，佢係一間無晶圓廠半導體公司，主要從事設計、開發及銷售專有集成電路晶片產品及系統解決方案業務。

佢的產品及方案可供應用於智能手機、平板電腦、電視╱顯示器、筆記本電腦以及其他智能產品。

雖然都有一定的生意，但多年來都出現虧損，到近年才算好轉。行業需求對佢是利好的。

這企業質素未算好高，因為技術未算好強，這股如果持貨不過多，都可守住先。

------------------------------------------------

Q22404：

我想請教你
2869在11元買入
1313 在 9.9買入需止蝕嗎？

我知3319/1313是優質股可以守，2869是優質股嗎？
多謝阿sir解告令我心態有改變

龔成老師：

綠城服務（2869）仍算有質素的。佢為中國高端住宅物業服務供應商，提供以下三類服務：

（１）物業管理服務：包括保安服務、保潔及園藝服務，以及物業維修及保養服務。

（２）顧問諮詢服務：包括在建物業服務（示範單位管理服務及建築工地保安服務）及管理諮詢服務（於項目設計及開發階段提供物業開發諮詢服務，以及於物業交付後提供各種物業管理諮詢服務）。

（３）園區增值服務：包括園區產品及服務（購物協助、拎包入住服務、交通服務、文化教育服務、房屋返租與置換服務及二手房交易的經紀服務）、家居生活服務（物業維修及保養、家政服務、保健及娛樂），以及園區空間服務（出租廣告空間，並提供廣告設計、製作及出版服務）。

過往發展不差，業務有增長，現價合理區中上部。

這股都可以守，但你預佢中短期會有少少波動。

至於另外兩股，都可持有。但你較集中在內地地產相關行業，小心行業集中風險。

------------------------------------------------

Q22405：

如果我40歲，加按d錢出嚟投資會唔會有風險？謝謝你的意見

龔成老師︰

以你年齡可承受的風險程度(以你年紀，建議總負債，最多只可以佔總資產6成)，加上現時仍處低息期，加按是沒有問題的。

關鍵是加按後，將資金買入其他資產，創造更高的回報，由於加按是要支付利息的，所以新資產產生的利息回報一定要比加按的利率高，這樣才值得做。

最好有比較明顯的息差回報，這樣才能抵銷加按後，加大負債為你所帶來的風險。因此，你加按前，最好先計劃如何分配新資金，如何平衡風險，怎樣說服自己獲得理想的回報，即是有充分的理由，而非為加按而按。

若是投資於股市，相信中低風險會較合適，公用股、內銀股、收息股、房託等，都可考慮，策略為長期的增值及收息，期望股息回報大於加按利息，這樣就值得做。但絕不建議炒賣等方式投入股市。

------------------------------------------------

Q22406：

到目前為止，我們現住的村屋政府還沒有任何收地計劃。估計還可以起碼多住十年八載。我想得到一些資料關於鄰近地區政府收地價、土地私人買賣價錢等資料，

從而比較一下地主開出的價錢是否合理。請問以上資料可以從哪裏得知呢？謝謝你的幫忙！祝生活愉快！

除了以上住屋問題之外，從二月至今，已分段買入以下股票合共約200,000。(之前打算用1,000,000投資，其中500,000分注入市及月供股票；

其餘500,000手持現金等大跌市才大力度掃貨)，請問暫時這個股票組合是否合適我？分注買入速度又是否過急呢？

66 - 43.50 （12.3%）
1658 - 5.70 （9.6%）
1928 - 29.20 （13.2%）
1972 - 22.90 （12.9%）

2800 - 27.80 （7.8%)
3067 - 17.60 （19.9%)
9633 - 56.80 (12.8%)
9988 - 198 (11.2%)

另外，月供股票方面也開始了兩個月。分別月供以下股票。月供股票因為剛開始，未有計算在以上。

2800 - $3000
27 - $2000
66 - $1000

請問以上我的股票組合是否潛力股方面佔約40%太多呢？之後再分注買入的資金，我會偏向平穩增長股及收息股。請問龔sir有什麼股票建議加入我的組合呢？

以上問題太多，不好意思。希望得到你的抽空回覆。祝身體健康，生活愉快！

龔成老師︰

你可以去田土廳和地政總署，可以睇到交易金額和一些補償計算資料，你可以用來參考。

你現時持股和月供計劃，大致上係可以。但安碩恒生科技(3067)和阿里巴巴(9988)係潛力股，這類股票以你48歲，最多佔2成左右好了。

未來時間，就正如你所講，要偏向平穩增長股及收息股，去慢慢拉低翻潛力股比例，以免風險過高。以下都是一些合適選擇，現價都合理，你可以參考下。

但緊記唔好偏重個別企/行業，個別企業和行業，不要佔組合15%和30%以上，銀行業更加不要高於組合20%，否則會有過度集中性風險。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）、富豪產業（1881）等（記住，股價略波動，不能太過大注）。

現時你投入了1/5資金，這個比例係可以。當再出現多10-15%左右回調，就可以再加下一注。而另外50萬，但等大跌市出現，才分注入貨。

------------------------------------------------

Q22407：

1) 龔sir , 想問一問關於美股TLRY , 持有半年虧損接近40% , 應繼續持有還是止損，能幫手分析一下嗎

2) 龔sir, 6993 係米仲可以持有 ,仲可以守

龔成老師︰

1) Tilray Inc (TLRY)從事是一家從事製藥業務的公司。該公司是一家向藥品分銷商供應大麻產品的供應商。

大麻股過往曾是熱炒對象，過去一年波幅好大，由$5至到$67。上市後，更曾經升至$300，可見這隻股票，有一定投機味道。

我自己無仔細研究過大麻行業和相關股份，但從佢財務數據睇，上市後收入係有明顯上升，但依然未能達至收支平衡。

因此，此股現價不少部份，係來自投資者對"將來"的睇去。只要未來前景稍有偏離，你預佢會有較大幅調整。

此股唔係話無投資價值，但確定性較高，只宜小小注。

2) 藍月亮（6993）不是劣質，但最新業績令人失望，由於上市前的數據幾靚，因此，有可能佢上市前執靚盤數，這亦是我對新股/半新股有保留的原因。

佢最新的中期虧損約$4400萬元，去年同期純利約$3億元。虧損主因是市場上，其他平台出現過剩的較低價產品，導致佢定價策略及產品在市場上的價格體系受到干擾。

為統一產品在市場上的定價，佢向其客戶提供若干折扣以穩定產品的市場價格，此類折扣對其於上半年的毛利率產生約9%的負面影響。

相信中短期未必強，但長遠，其實又不算好差，佢成立於1992年，擁有衣物清潔護理、個人清潔護理和家居清潔護理三大系列共73個品種的產品。

佢係中國洗衣液有龍頭地位，加上毛利率高，賺錢能力強。睇翻佢之前的資料，以零售額計算，藍月亮在洗衣液市場、濃縮洗衣液市場及洗手液市場的市佔率均為第一。

整體有質素，不過之前貴，現價算是合理區中上部，如果你小注持有都可以。

------------------------------------------------

Q22408：

龔老師你好，我想聽一下老師的意見.本人可承受高風險。

1. 持有1257，20,000股平均價3.4。現價掉到2.77左右，應否繼續持有或減持?

2. 持有1448，6,000股平均價7.02。現價7.42應否增持?

還是增加其它平衡增長股?

龔成老師︰

1) 中國光大綠色環保（1257）其實本質不差。

睇翻佢的業務情況，長遠發展其實是一個大方向，但佢近年負債有所上升，加上市場擔心佢之後的增長力有所減慢，因此對這股的評價減少左。的確，負債與發展持續性，是這股的風險因素。

長遠來說，這股仍是有投資價值。但不建議太過大注，始終都有風險，同時可能仍會弱一段時期。你明白這些風險，你照長線持有係可以。

當然，若你持股佔組合較多的話，我比較建議你沽出少少，去平衡翻個風險，咁會較好。

2) 福壽園(1448)有質素，現價算合理區頂，如果你現貨佔組合比重不多，或者資金較充裕，現價可以再加小小注。

否則，你等佢回多10%左右，才再加注會較好。

以下增長股，都適合你30歲年紀，你可以參考下。

平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、粵海(0270)

潛力股︰安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。

平穏增長股，現處於合理水平，可分注入市。但潛力股，部份係略貴。

現時只有安碩恒生科技(3067)、ＧＸ中國電車基金（2845）、騰訊（0700）、阿里（9988）、中生製藥（1177）、福壽園(1448)勉強算在合理區中上至頂部，可分注入貨，其餘都略貴，想買就要等一等。

------------------------------------------------

Q22409：

真的衷心感謝，讓我瞓吾著幾日不斷思考過去錯在哪！同時，我並非抗拒買股票，亦十分認同你價值投資的方法。

我從不同category 選了一些之前心儀的和你推薦的選一至两隻，想把台灣現金調回來建立一個組合，比D意見？

銀行-滙豐/恆生/中銀3988（但PE 4倍不到，好似鬼鬼哋）/citibank
地產 - 恒基/新世界/置富
科網-阿里/騰訊/MSFT
手機-小米/舜宇/瑞聲
網絡-電盈/香港電訊/移動

電車-比亞迪/中國電車/雅廸
公共-地鐵
醫療-和黃醫藥/平安好醫生
零售-佐丹奴/六福/周大福
休閒-金沙/銀河
指數或基金-2800或3086華夏納指

建倉用80至100萬，留150萬現金等。

有點長，抱歉！

老實講，我清楚年齡影響可承擔的投資風險，只是希望在還有生產力（10-12年）間，除完成兩個小朋友在外地讀完書和以後照顧到自己已滿足了！

龔成老師︰

以你48歲年紀，我唔建議太進取。你可以用恒基(0012)、地鐵(0066)、金沙(1928)/銀娛(0027)、六福(0590)/周大福(1929)、指數基金作為核心，為組合提供平穏增值能力。

之後，再配以一些收息股，好似滙豐/恆生/中銀3988、置富(0778)、佐丹奴(0709)。

中行(3988)和一些內銀股，你會發現地市盈率都係好低。因為市場覺得佢地壞帳潛在風險大，所以市場唔會比佢地個市盈率太高。

最後，若果你想個增長力強少少，可以加入一些潛力股，例如阿里(9988)、騰訊(0700)、比亞迪(1211 - 但現價偏貴，可先用2845代替)。但由於潛力股風險較高，總額不要高於組合2成。

現時大市只在合理水平，先用80至100萬建倉，再另留150萬現金等大跌市機會，係可以。

若你想加快增值速度(但會承受較高風險)，你可以調高少少潛力股和平穏增長股比重。

否則，你這個年紀，我建議按潛力股/平穏增長股/收息股(20/40/40)的比例，會較穏當。

------------------------------------------------

Q22410：

龔成老師, 你好~ 本人35歲, 月入2萬幾, 60萬左右, 買了以下股票~ 月儲萬五至2萬左右~

買了以下股票, 但一直持續跌勢, 雖然以下股票都是有質素的, 但.. 某些股票仍需要賣出先止蝕嗎? 謝謝!

另外, 怎樣可以增加財富呢.. 因有可能10年後便跟小朋友去外國讀書, 相信在外國對於我來說, 不易搵工作… 買那些股票是比較隱陣呢, 謝謝!

700 騰訊 買入: $616 x 400 (現價約: $537)
1211 比亞迪 買入 $157 x 500 (現價約: $218.
388 港交所 買入: $437.5 x 200 (現價約: $531.5)
2800 盈富 買入: $28.43 x 3000 (現價約: $27.72)
3690 美團 買入: $290.30 X 200 (現價約: $268.80)

9988 阿里巴巴 買入: $223.8 X 100 (現價約: $202.60)
1398 工商銀行 買入: $5.33 X 3000 (現價約: $4.39)
1810 小米集團 買入: $24.75 X 400 (現價約: $26.
1972 太古地產 買入 $23.10 X 400 (現價約: $22.95)

1177 中國生物製藥 買入 $7.44 X 1000 (現價約: $6.99)
3067 安碩 買入: $17.12 X 300 (現價約: $15.28)
2638 港燈 SS 買入: $7.61 X 500 (現價約: $7.80)
3088 華夏恆生 買入: $10.34 X 200 (現價約: $9.22)

龔成老師︰

你現時持股都係有質素，你唔好太比個買入價或者大市氣氛影響，令你做出錯誤決定。緊記只要係有質素，長線投資價無轉壞，就算股價下跌，我地都應該照持有。

由於你尚有10年時間，用以上股票去增值，都係可以。

但有個較大問題，你而家太偏重左係潛力股(0700, 1211, 0388, 3690, 9988, 1810, 1177, 3067, 3088)，佢地雖然有增長潛力，同時風險都較高，不宜持有過多。

你算年青，潛力股可佔約5成，餘下應用以下平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

但你唔需要減持任何股票，只要未來時間，加大翻平穏增長股部份，令組合慢慢回復平衡，咁就可以。

平穏增長股：指數基金、金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建(1038)

但到10年後，你要移居外國，你可能會需要穏定現金流，去支援生活，多於財富增值。

那時候，你可以將部份股票，慢慢換成收息股，用股息收入，去減輕你生活負擔。至於比重多少，你就按自己實際情況而定。

------------------------------------------------

Q22411：

龔 sir 您好！又要打擾您！有關一些資產問題希望您可提供一些意見。

本人有一層剛供完的樓，由於預計子女在未來五至八年後會移居外國 （他們已有當地護照），所以我希望在當地置業。但由於疫情關係，

暫時不能往來外地親自考察當地不同區域的環境，而我又不想只靠海外agent 隔山買牛，所以暫時對於將要付出的金額只有很初步的概念。

現在問題是，我應否在此期間先翻按現在的居所，先keep 錢向手，再等時機去用這筆錢於海外買樓（根據疫情，有機會我要兩年左右才真正落實買到，

甚或如果到時樓價因大量移民而飛升, 海外置業計劃亦可能泡湯）

另一考慮是，我自己工作的房屋津貼將會屆滿，人工也已經到了max, 所以翻按的還款能力會降低，我應否take risk 仍然去翻按 （因市場常有消息指高息時代很快重臨）

不好意思，可能說得有些亂。盼龔sir 比D意見

龔成老師︰

你2個問題，都係建基於一些假設性結果(外地樓價大升/環球息口大升)，但這些結果，到底會否成真，幾時會成真，無人會知。

我地係投資時，係唔應該用"估"去做策略。我地係因應現時情況，平衡各方利弊，去找出一個較可行方向。

由於你子女尚有5-8年才會移民當地，有一定時間。你而一刻其實唔需要急住買當地物，除非你好有信心，長線當地升幅，一定會跑嬴香港樓，咁就另作別論。

至於翻按，你就要一直支付利息開支成本。但你又未知幾時先買外國樓。如果到時外國樓升幅不多，可能這筆錢跟本用不上，你就白比利息。

我建議你先計劃清楚，如果你擔心到時賣左香港樓，都唔足夠你買外國樓。你可以把握這5-8年，用優質股去增值財富，令自己有更多資金可以動用，減少到時的不確定性。

------------------------------------------------

Q22412：

老師，我上了堂， 計算了00698 通達之估價為

市盈率9-12
保守盈利預測0.05
市值股價約$0.45-0.6

不知道為什麼，00698的估價跌了很多，我之前已經減持了很多，上堂後覺得此公司不優質，但還有少量貨，不知道如何處理剩下少量貨，約40000 股，請老師指導

龔成老師︰

佢過往市盈率大約係9-10.5倍，但由於佢質素唔係咁高，我會再打折扣，下調至6-8倍左右。

而每股盈利，可以用佢過去10年平均，大約HKD0.09。

合理價︰HKD0.54 - 0.72。

但要留意，通達集團（0698），只是不過不失。

佢主要從事電器產品（包括手機、手提電腦及其他電器產品）零部件生產；為電子產品及電器提供金屬外殼及其他五金部件；及提供塑膠機頂盒及生產體育產品。

現價計係偏平，但由於質素只係一般，唔值得持有太多，勉強可長線。若40000股只係佔你成個組合，一個好低的比重，你照持有係可以。否則，當有反彈，就要再沽多少少。

------------------------------------------------

Q22413：

老師,其實etf回報係唔係理應回報多過投資個股? 我見差唔多全部etf股價都係步步向上,好似無邊d係大起大落 或者 長線向下? 想問下呢個係ETF特性?

問題二. 想請問下一我地係咪應該買ETF好過買個股? 一般人理應唔會下下買中倍升股,但係etf就基本上股價係一直向上? 長線好小跌?

謝謝你的寶貴意見

龔成老師︰

1) 唔一定，因為ETF係一籃子優質企業，可以係追蹤一個股票市場、一個行業、或者特定產品(如黃金)。

以盈富(2800)這隻較為人所熟識的ETF為例，佢係追蹤恆生指數，等同買入58間優質企業。

但當中有潛力股，有平穏增長股，也收息股。若你用當中的比亞迪(1211)為例，佢近2年一定係跑嬴盈富(2800)。

但如果你用中國人壽(2628)做比較，佢就明顯係跑輸恆指。所以，ETF唔一定係跑嬴個股。只係佢較有風險分散能力，令個整體回報相對穏定。

2) 如果你係初階投資者，不懂選股，但又睇好個別市場，ETF就會係一個唔錯選擇。

因為佢係一籃子股票，就算當中有些股票，表現未如理想，但只要大市或者相關行業係正面發展，你都會享受到成果。這就是分散風險，有利之處。

當然，如果你係買中一隻較具潛力的企業，升幅係有權優於ETF。但若投資個股時，你選擇錯誤，係可以大市/行業升，但你個隻跌。

------------------------------------------------

Q22414：

龔成 我係你fans 有買你啲書 亦曾經係你股票班學生 不過喺度好想同你講聲對唔住 我覺得自己好似辜負咗你咁 因為你當初教嗰套信念我無好好記住

搞到依家由賺錢變倒輸 初初我齋買港股都好哋哋 後尾學人買美股 賺咗少少之後就開始心雄 再玩埋沽空 結果依家輸到損手爛腳 我好嬲我自己

當初嫌你嗰套賺錢慢 於是就不知不覺好似走咗入賭場咁 仲要唔識走 越賭越大 到依家諗返轉頭 原來你一路教嗰套先係最穩陣 雖然唔會一夜致富

但最終一定有收成 依家我down得好緊要

近排工作 前途 甚至依家股市 無一樣嘢順利 好似時不與我咁 唔知點樣走出呢個困局…

龔成老師︰

其實，有唔少人都會因為短炒成功幾次，就會心雄，只後走上短炒之路。這就是點解我成日Q&A度提讀者，以前做證券行個陣，見短炒個班，可能會短期賺，但長遠都係輸晒架原因。

我地投資要成功，除了要學好一套投資方法外，經驗、自律性和心理素質，都係同樣重要。

有些人，本身心理素質好穏定，可以好好地操作個長線投資計劃。有些人，要好像你有一樣，要有所經歷才會明白。但重點係，這2種人最終都會走到財務自由之路。原因是，他們都"學懂"了。

你現時才34歲，依然很年青，只要你現時開始用正確方法，去創造你財富增值組合，係一D都唔遲。

而且，你比其他人經歷更多，對未來操作"真正"大升大跌市時，你心理上優勢，係會更加明顯，這都對你長線投資有利。

所以，你現時要做，就係收拾心情，做你應該做的事，一切自然慢慢會好。加油!!!

------------------------------------------------

Q22415：

老師，我手持幾隻蟹貨，可唔可以strong hold 牙？

3692 $33.1 2000 shares
2160 $16.7 5000 shares
1913 $55.5 500 shares
873 $24.7 3000 shares

謝謝

龔成老師︰

持有與否，你要睇翻企業本身有無質素。如果無，就算唔係蟹貨，係賺緊錢，都要減持，甚至係沽出。

微創心通醫療科技（2160）和翰森製藥（3692）不確定性較高，近期中央相關政策，令佢地風險高左，故暫時不要再加注。

普拉達（1913）有質素的。

佢係全球時裝及奢侈品集團之一，透過Ｐｒａｄａ、Ｍｉｕ　Ｍｉｕ、Ｃｈｕｒｃｈ’ｓ　及Ｃａｒ　Ｓｈｏｅ品牌，從事設計、生產、推廣及銷售高級皮具用品、成衣及鞋履，以及透過特許協議提供眼鏡及香水。

有一定的品牌價值，但都較受經濟週期情況，你預佢中短期都會較波動，這股有長線投資的價值。

世茂服務（0873）由世茂集團（0813）分拆上市，業務有（１）物業管理服務（２）社區增值服務（３）非業主增值服務。

睇翻佢過往的財務數據，基本上都正面，業務不差同時有增長力，不過上市年期不算耐，因此參考價值會減。

股價上落較大，要注意風險。這股都有質素，有長線投資價值。

------------------------------------------------

Q22416：

龔sir, 睇而家個勢6088同788前景如何。6088坐緊3.48，788坐緊1.44

1858之前40入跌到20放埋一邊冇理到 點知前排彈咗一彈上30 好後悔冇溝 係咪繼續坐吓等

龔成老師︰

唔好用買入價，去決定是否持有一隻股票。我地要睇的是企業質素，只要佢有長線投資價值，中短期帳面虧損，唔係咁重要。

IT HON TENG（6088）質素中等，雖然都有投資價值，但企業不是最高質之列，因為企業的賺錢能力始終唔算好強，每件產品賺錢唔多。

同時業績有回落情況，不過，這股始終不是無質素，但預期長遠的增長力只是中等。若你持貨不多，可以守。

中國鐵塔（0788）質素無大變，但你預佢增長潛力同幾年前相比，會係弱左。整體而言，都有長線投資價值。

春立醫療（1858）長遠有發展的，但本身佢股價和盈利，都係較大上大落。你現貨照持有，只要唔係佔組合太重比例，咁就可以。

------------------------------------------------

Q22417：

老師點睇1024快手？佢差唔多每曰都跌，有投資價值嗎？現價$142是否仲係貴既水平？

問題2，另外今個月開始每月會買1手你書中介紹的潛力股1833（平安好醫生），用老師上堂教的估值計是合理價，現價吸引，會持續1年至2年買入，佢升到咩價位應該停買？

想問請如何操作？老師又覺得e家1833是處於咩水平？

龔成老師︰

1) 快手(1024)之前貴，現價開始合理，大致在合理區中上至頂。近期受大市和中央政策風險所影響，有較大回調，但本質上無太大轉變，有貨可照持有。

2) 平安好醫生（1833）長遠有發展力。

佢係中國領先的一站式醫療健康系統平台，透過「移動醫療+AI」，為每個家庭提供一位家庭醫生，為每個人提供一份電子健康檔案、一個健康管理計畫。

平安好醫生係中國互聯網醫療健康市場的先行者，以平均月活躍客戶，以及在線諮詢量計，是中國最大規模的互聯網醫療健康平台。

企業的業務有潛力，本身有優勢，大環境的配合，都成了這企業的機遇，前景正面，不過財務數據未算好理想。

雖然長遠的企業價值向上，但股價在中短期，可以十分波動，因為市場以「前景」作估值，故此變化必然很大。好難得出平貴的準確數，只能估估下，作參考。

因此，低風險者未必適合投資，若投資者考慮這股，亦不能大注投資，買入後就耐心長線持有，等待這企業改變整個行業的情況，現價算合理區中間位。

但好波動，你每月買1手，去平均個價格，係可以。但此股始終不確定性較高，不宜佔組合太多。

如果一個月買一手，會令佢佔你組合比例過重。你可以更改為月供，或者隔開多少少，例如每2,3個月才買一手，去平衡。

------------------------------------------------

Q22418：

龔sir，我有個理財問題想請教你，我手上有兩個物業出租，一個已經供完每月收租金$11500.00，

另一個仲有20幾年要供，每月租金收入$12500.00，租金可以cover供款和物業管理費等支出。

我的問題係我自己住的單位是租的，每月扣除租金收入後還需要付$20500.00。

我上完你初階股票班後一直思考，我係咪應該把手頭上兩個出租物業賣出，先幫自己買入一個自住用的物業來減底支出呢？

謝謝！

龔成老師︰

其實都唔一定，因為香港買賣樓宇成本唔細，你這個變動，可能要用你唔少錢。你可以主要考慮翻，邊個方法可以令你有更在資金空出，作投資增值之用。

如果你現時置業，反而令你每月投資優質股資金少左，其實係成個配置角度，就未必值得咁做。

當然，長線計你照好都持有一個適合自己長線生活需要的物業，但唔需要過急去進行。

你現時持有2個物業，若都有一定質素，你可以照持有，用佢地來資產追資產，平衡樓市波動的影響。

另一邊，你繼續用優質股去增值，到你可以做到買自住樓之餘，又可以保留一定優質股(最好可保留一間收租物業)，才去出手買自住樓都未遲。

------------------------------------------------

Q22419：

1) 也想請問你1093, 《50值博倍升股》中亦提及此股能穩中求勝，請問此股的便宜區是多少？

2) 1297的便宜區是多少？

3) 你的著作《50值博倍升股》中提及1181是穩中求勝之選，請問此股的便宜區是多少？

4) 《50值博倍升股》中提及1458成功打開了一片藍海，請問此股的便宜區在哪？

5) 《50值博倍升股》中提及1373是穩中求勝之選，請問此股的便宜區是多少？

6)《50值博倍升股》中提及868是穩中求勝之選，請問此股的便宜區是多少？

7) 讀完仍的《50值博倍升股了》，但發現很多股票已升了很多，如果現時從書本中選一隻，你會選哪一隻？

8) 想問根據過往數據，本港樓市平均每年會上升多少？（樓價、租金分別上升多少？）我已在書中找到了。

9) 想問現有哪隻優質潛力股已跌至便宜區？

龔成老師︰

1) 石藥集團(1093)現價算合理區上部，要平宜區，要有好大幅回調，接近回一半才到。

2) 中國擎天軟件（1297）規模較細，以及行業存有風險。此股較難做個穏當估值，如你想投資，現價都有投資價值﹐但要控制注碼。

3) 唐宮中國(1181)現價計，你預回多3,4成，會開始到初步平宜區。

4) 周黑鴨(1458)雖然近期回落唔少，但都仲係偏貴，你預佢真係有好大跌幅，去有機會進入平宜區。

同埋，其股都有一定風險，不宜大注。

5) 國際家居零售（1373）你預跌在多2,3成，才算係初步平宜區。

6) 信義玻璃（0868）過往一段時間，累積了不少升幅，就算合理區，都要有一個明顯大回調才會到。所以，暫時唔好入市住。如果真係想入，最好用月供去儲貨。

7) 我會選中生(1177)和信義光能(0968)，2隻雖然只在合理區上部，但本身質素較高。故在當中，值博率會係較好的2隻。

但由於現價唔平，只宜小注，等有明顯回調，才正式入市。

8) 過往數據，你可以作為一個參考。但更重要，你應著眼面前轉變、房屋政策、樓市供求問題。未來預期，香港中短期房屋都係維持供不應求。

再加上，近年多國政府都用量化寬鬆政策去救市，令市場資金大量增加。所以，可預見的將來，樓價都會維持上升。

9) 沒有，其實高質素的潛力股，極少跌到平宜區。所以你唔好諗住平宜區先入，要係合理區就開始分注，如果唔係，好機會錯失入市機會。

------------------------------------------------

Q22420：

老師，我睇返中國銀行和中銀香港每年既股息增長率，中國銀行既股息增長比較快，而家中國銀行呢個價位股息有8厘，如果股息再增長股價必定有影響，那投資中國比行不是比中銀香港好嗎？

同埋我想問如果我想查返中銀香港10年前既股價可以係邊到查詢？

同我想問通漲對阿里巴巴，騰訊，香港中華煤氣，同中銀香港會唔會有影響，我照你推介已買入呢四隻股票，之後仲想入d香港電訊同置富

龔成老師︰

我地唔可以單憑派息增長力，就去判斷一個企業情況。無錯，當中行(3988)股息再上調，有機會令股價再上。但

但始終中行(3988)本身已經好大間，加上佢業務上發展比中銀香港(2388)細，故增長力預期會較弱。

以你3X歲年紀，應該集中係財富增長上，故中銀香港(2388)會較為適合。

至於你想睇10年前股價，你可以去YAHOO財經，或者睇各個財經網的圖表，都會有。

阿里巴巴(9988)，騰訊(0700)，香港中華煤氣(0003)，同中銀香港(2388)都係有質素的企業，長線都會跑嬴通漲，你長線持有就可以。

至於指數基金都係適合你，但香港電訊(6823)只係收息股，增長力不高，不太適合你這個年紀。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q18681-Q18700）

Q18681：

老師，請問如何評估股價嘅合理位？就算睇市盈率又點知佢算高定低？

仲有如何估算一企業嘅市值合唔合理？

龔成老師：

要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

如果要深入計算，基本上要好仔細的研究企業，要分析好多財務數據用比率，先至有較完整的答案。

------------------------------------------------

Q18682：

龔Sir,我個仔現在讀大四，想佢返工後開始月供股票，請問長期供2800得唔得（希望佢一直供到退休，可以自製一份长糧）

我同佢爸爸準備近期幫佢買第一注，以後月供就靠佢自己，2800要幾錢入算係合理區，幾錢算係便宜區?

家長呢種做法可唔可取?
麻煩晒，多謝!

龔成老師：

我覺得這是一個不錯的方法，你地先啟動第一注，其實現價合理，可以進行。你預去到$23以下開始平。

之後就等佢自己長期月供盈富（2800），我相信是一個好的策略。

最好當然佢自己自動自覺去供，但如果佢本身無人意識，你啟動第一注可以的。總之，你要比佢知「最後都是要靠自己」。

------------------------------------------------

Q18683：

你好，我想講去年終於已經轉左工，但都只得1萬元月薪。。。咁我仲可以點?

我想搵兼職

但發現呢份工佔我好多時間

星期一至星期五夜晚去7點幾。。。星期六又去到4點
好難搵兼職

龔成老師：

在中短期，你可以利用高時薪兼職，去提高收入，例如私人補習等。

但長遠，你就要提高自己的價值，這點好重要，你要令自己「值錢」，你提高你的能力，之後可以再轉工，但要在正職上，慢慢走向上，這才是長期的解決方法。

如果現時的工，上流的可能性低，而人工又不算高，加上用了你好多時間，你長遠就要轉工。

------------------------------------------------

Q18684：

老師請問可以教下我如果想一年收兩萬股息可以點部處嗎？

老師如果如果我唔供但每兩個月買一手盈富基金想問要長期持有姐係持幾耐。同埋我都有買埋陽光房產黎收息

但我唔明白點賺錢

老師想問匯控同恆生分別係邊同埋如果想買恒生作長期投資可以嗎？

龔成老師：

如果想一年收$2萬息，如果投資6%收息股，你就要有本金$33萬，你唔好只集中一隻，而是要建立「收息股組合」，同時持有多隻收息股。

如果你每月買一手盈富（2800），現時大約是$12000本金，你就要買28個月，就大約累積到$33萬等值股票，到時可轉到收息股。或者再供長少少時間去累積盈富收息，（因為盈富股息率無6%咁高）。

你要記住，我地不是「賺差價」，而是財富的「配置」，令財富有「增值」及得到「現金流」。

至於隻間銀行，恆生（0011）會較穩健，你可投資作收息。

------------------------------------------------

Q18685：

龔 Sir你好，我之前買咗2202，而家見到恆大嘅財務近期有問題，再看2202的中期財務報告，佢持有資金達到1942億，高過佢一年內要還嘅負債968億，我想再係佢21至$22在加注買入，想請教你覺得如何呢？

之前你同我講要着佢嘅負債，咁呢隻股票係咪唔屬於優質股長期持有呢？ 請你多多指教祝你身體健康。

見到你的書響奧運站新開嘅誠品繼續佔頭10位，真是戥你高興。之前睇完你本80後百萬富翁，我再買咗本《股票勝經》睇緊！

龔成老師：

萬科企業（2202）又是另一間極高負債的企業，內房好中意有個玩法，就是高槓杆，這當然有危有機，只要市道順利，這樣可以放大回報，但同樣會放大風險。

只要能順利賣樓套現，佢就有足夠的資金去還錢，如果賣樓唔成功，就會出現流動性問題。

因為樓點都有價值，所以佢地好有信心，但風險，就是好多時大家都分析唔到的野，我始終覺得佢地太進取。

你小注持有可以，只要控制注碼，長線都得，但就唔建議你加注。

多謝支持！要保持閱讀及增加知識！

------------------------------------------------

Q18686：

老師，想問6049已由高位回左40％左右，其實到合理區未，你覺得呢隻股票前景如何，如果以物管股黎講，頭3名最好有冇佢份？

老師，想問你會唔會有即時串流報價既網站？

龔成老師：

保利物業（6049）都有質素的。

佢係中國的物業管理服務綜合商，主要提供以下三項服務：（1）物業管理服務（2）社區增值服務（3）非業主增值服務：主要向物業開發商提供案場協助服務。

生意與盈利都有理想增長，現金流不差，本身有質素。但市場之前對這類股有少少熱，股價較波動，加上規模不算好大，因此都有風險。

優質度有的，如本身有貨可持有，但如想入就最好小注

我唔用「即時串流報價」，因為我唔著重短期股價，我只睇企業，如果價值適合，$100同$101都差不多。

------------------------------------------------

Q18687：

龔sir 你好
我想問下1038 點解幾個月前會暴跌？
現在價位合理嗎？

長揸有無問題
謝謝

龔成老師：

長建（1038）較多資產在歐洲，當地本身經濟差，鴐上近期疫情持續，對佢有不利，相信中短期仍會較弱，但長遠仍是有投資價值。

其實長和系都有類似情況（你見李嘉誠都有增持），中短期弱，長遠無問題，不過，就不是高增長類股。是收息及平穩增長型。

長建現價合理，可分注投資，長線持有。

------------------------------------------------

Q18688：

老師請問你有無研究投資越南既野？ 點睇2804 和 3087？ 因為好多新聞都話越南會成為下一個世界工廠。
謝謝你，我都好想聽下你意見

龔成老師：

越南的確有一定的增長潛力，之前中美貿戰，已有唔少廠搬左去越南，相信唔少廠都會想方法分散風險而去果度，當地都有投資價值的。

不過，我無特別研究相關的基金，睇翻過往價格就有少少波動。

越南始終是新興市場，有危有機，你投資可以，但就唔建議你太大注。

------------------------------------------------

Q18689：

公司回購股份是好事嗎?
對股價有什麼影響?

龔成老師：

一般來說，都是利好因素。第一，反映公司認為現時股價唔貴，第二，這動作能夠令中短期股價向上，第三，回購進行註銷，總股數減少，每一股的價值得以提高。

因此，這是另一種回饋股東的行動。

不過，我地最重要是分析企業的業務本質，這才是核心，回購因素只是一些加分住。

------------------------------------------------

Q18690：

老師，好久沒找你談話，最近一直被價值投資和投機強勢股兩者所產生矛盾而煩惱。

等待價值股跌落便宜合理價真的很困難，而且當股價跌落某些重要止蝕位時，公司又本質沒變。

但相反投機強勢股再在下方定止蝕，強者恆強的優勢更明顯，老師除了基本面，還會看資金面，技術面嗎

龔成老師：

我20年前，都是短炒者，技術分析者，用左幾年，輸足幾年，之後長線投資，就開始不斷賺錢。

我好後悔當時浪費左幾年去學這些分析技術，我當時不斷睇書、上堂學短炒，但最後都是輸，好後悔，只怪我當時無知。

之後做銀行同證券行，見大部分輸錢的客，就是短炒的一群！這是我10年見到的情況，這是行內的秘密，根本大家都知短炒者一定輸，但業界一定唔會講！

另外，如果你分析全球真正賺錢的投資者、經金經理，佢地都無人短炒，都是長線投資的，巴菲特更講明反對短炒，反對技術分析。

只要我地細心少少去想，都會明短短炒根本賺唔到錢。長線先至係王道。

------------------------------------------------

Q18691：

老師，我想請問一下 00883 03988 00880 01972 02007 01448.

這些股票是我現在持有的

但都比買入價下跌了，老師認為可以繼續持有？

我明白要看企業的長遠發展，但每天看見不斷下跌，就好不安。

麻煩老師比d意見

龔成老師：

我地最重要是睇企業質素，不是股價，不要太在意中短期股價。

太古地產（1972）、澳博（0880）、福壽園（1448）質素較好，而另外3隻質素都有，但未到好強之列，你要睇下自己持貨是否過多。

我地持股，質素較好的可以佔比較多，質素一般的佔比會較少。

你要著重睇企業的長遠發展，而不是當刻的股價。

------------------------------------------------

Q18692：

老師我的個案如下:最近 揸咗十年嘅樓 成功賣出, 當日205萬買入而家 590萬 賣出， 扣除各項我有四百五十萬現金喺手， 我會用 一半 出一部市區的士， 餘下現金 應該如何分配？

我自己本身月入 四萬五， 老公 月入大概 三萬多， 手頭上 有 一開三車位自用

另外手上有三個車位出租， 現擁有四個市區的士牌， 但全部都係供緊， 老公仲有 一間 公司 物業， 一樣係供緊

除咗 賣樓得嚟嘅現金 想 徵詢老師意見如何 投資之外
第二樣就係我希望提早退休， 我現在已經四十七歲 如何用以上擁有嘅資產現金 可以 53歲前 就能夠退休呢？

另外 去年 開始供緊 月供股票， 包括領展， 盈富， 港燈， 最近加咗隻 阿里巴巴， 手頭有少量股票都係你曾經提過嘅優質股， 當然會長揸喇

龔成老師：

其實你太集中在車位與的士牌，在財富配置上，這樣會出現集中風險，你要注意翻，因為我地建立一個「平衡的財富組合」都是好重要的。

你可以保持上述的月供，但到退休時，就應該轉為較收息類的股票。

你可以將有上現金，分成5部分。

第一部分投資收息股，你可以建立一個收息股組合，你可考慮港燈（2638）、香港電訊（6823）、恆生（0011）、工行（1398）、置富（0778）、陽光（0435）、深高速（0548）等，大多有5%股息

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

（你可睇下《50穩健收息股》當中仲有好多）。

你平衡的投資這些股，除了可以得到穩健的收息收，同時可有效的分散風險。

第二，投資債券，你可以選擇A評級的債券，年期較長都可以，但利息卻不高。你可以到銀行問問。

第三，投資年金，你可以睇睇，這是適合你們的產品，零風險，可以有穩定回報。

第四，你亦可投資銀行低風險類的產品，你可自行到銀行了解下，總之是「低風險，持續現金流」的。

第五，持有現金，除了可做定期外，現金亦可以為你的後盾，以備不時之選。同時，若投資市場大跌，你可以在這時買到更多的收息股，股息率會進一步上升。

你可以手上資金，平衡地分配在上述的項目上，對你來說是最好平衡風險，同時有穩定的現金流。

------------------------------------------------

Q18693：

老師，我已經在進行閱讀 八十後百萬富翁
已完成一半
之前都有略讀過股票勝經
打算睇完八十後就再睇一次
股票班都好想上

但因為要輪班 同埋從來都無咩恆心（從來都無成功睇完一本書）
所以想先專心睇左你既書 更有決心再報班

現時和先生月供$13000股票 由今年3月開始（有些是3月時小注買入）另外每月約有$6000儲現金，請問需要調整嗎？現金約有16萬備用

$4000 2800 盈富 24.41 1,444股
$3000 2388 中銀香港 22.31 1,767股
$2000 1211 比亞迪 42.36 793股
下月打算暫時停供 改為供 2382 舜宇光學
$2000 1177 中生 7.89 2,187股
$2000 0823 領展 68.39 635股
$1000 0012 恆基 32.2 1,366股

好想學老師早日財務自由
暫時無咩目標 想有樓住囉
打算呢筆錢 最少3-5年或以上
而且最少啲錢可以自己每個月generate到一筆錢供股票先考慮會用 老師教想用錢最好可以用本錢賺到下一個double先動用呢筆錢

我有努力學習同實踐架
希望可以早日脫離做金錢既奴隸

呀仲有
雖然認識老師你時間較短
但好開心我都見證到第一隻倍升股比亞迪
口水有啲多但好多謝龔成老師

龔成老師：

好呀，你這刻先保持閱讀，之後再報股票班。總之保持進步就得。

月供的都是有質素的股票，方向正確，你照你計劃進行就得，比亞迪（1211）轉其他，可以的。另外，你可以考慮減少中銀香港（2388）的金額，加少少去恆基（0012）。

現金$16萬就持有，等機會。你現時的方向無問題，保持進行就得。

你努力，一定可以財務自由的！

我都用左好多年努力去進行，正如比亞迪（1211），我由2008年開始儲貨，大部分只入不出，都是多年努力的成果！

------------------------------------------------

Q18694：

老師你好 本人25歲 未買過股票 睇你好多時都推薦新手買2800

我睇返2800由07年開始到依家升幅唔係特別高 月供真的可以穩定賺錢嗎 希望老師有機會可以黎澳門開班

龔成老師：

月供的作用，在於「長期儲資產」，原理就是儲錢，但不是儲現金，而是儲資產。

如果你有選股的能力，十幾年前開始，每月月供騰訊（0700）、港交所（0388），我相信你現時身家過千萬。

不過，並不是每個人都有選股能力，因此，對大部分散戶來說，盈富（2800）就是較好的選擇，因為這是一個「組合」，不是最高回報，但卻是較平衡風險。

因此，我會建議你月供盈富，再加上自己選一些股，長期進行。

疫情過後，我會過來澳門的！

------------------------------------------------

Q18695：

老師，舊經濟股冇得賺了
比人帶入股票谷,賺少少
之後比人騙入買了妖股蝕左$10萬

所以要重新學習買股票
但係最近入咗3680美團$260，$255
高位入市😔😫⋯⋯繼續持有

3680後市會掂？
今期$230-250橫行
近期$230-250橫行

只想快啲賺番那$10萬

龔成老師：

你有幾個問題。

第一，唔好太著重這刻的情況，舊經濟由於受疫情影響，雖然增長力弱左，但不代表無質素，你唔好只著重表面因素去分析。

第二，群組及坊間所講的野，所用的方法，不要再信，你要學，就跟全球最賺錢投資者的方法，即是巴菲特的方法。

同時立刻刪去所謂的財經群組。

你有多少知識，同你長遠財富，一定成正比。

第三，你唔好只著重短期股價走勢，這方法好錯。

第四，財不入急門，投資好需要你的理性。

你要明白，我地投資，是建立一個長期的財富組合，買入後長線，著重分配，新舊經濟股都要有。長線持有。

------------------------------------------------

Q18696：

龔SIR,我在早前疫情開始時買了金沙, 雖然在股票班中你從澳門發展前景, 金沙的市佔率表達左你對金沙的信心

我初時都認為是中短期問題...但是我有些擔心, 疫情始終不知道幾時會完...而金沙的現金,面對虧損大約只可捱到2年左右...疫情一唔走..就完全不能營運...財政是不是有機會有重大問題??

龔成老師：

疫情始終只是中短期，你唔好因為「中短期」而影響了企業的核心分析，這會變成坊間的短視分析一樣。

至於現金，佢仍有好大的發債能力，雖然燒銀紙會對企業價值扣分，但就未去到核心性的不利影響。

------------------------------------------------

Q18697：

龔老師你好， 本人投資經驗為零，從事醫護，33歲。丈夫為公務員 31歲，每月收入約10萬。可每年跳point。

育有一兒 約兩歲 之後打算入讀國際學校 每月學費 (暫只計算小學) 約一萬至萬五。

現每月家庭支出為四萬 每月儲蓄5至6萬 沒任何股票 大部份存款放銀行定期 利息少得可憐

現手上存款已儲有7個月家庭儲備金及現金70萬。

全家人已購買醫療及人壽保險

現屋住在政府宿舍 可選擇年半或三年半後遷出 遷出宿舍後可以領取租金津貼 約每月萬八 津貼十年。

問題一 住屋問題

投資經驗為零 丈夫可選擇於年半或三年半後遷出宿舍 視乎升不升級 不升級可住3年半

想問應否早遷出宿舍 自己置業？ 還是住到三年半後？讓這幾年盡量儲蓄更多錢？ 之前大部份儲蓄都打算作首期 不敢拿來投資， 因怕失利之後沒有地方住。看不清樓市走向 不知道租樓還是買房子哪一樣比較好 ？ 因為完全不懂投資亦不敢投資

這個情況 應該有甚麼投資方向 可以保本為上？可以詳細些指點 投資策略嗎?月供股票可行嗎？ 資產分配可以怎樣？

問題二

請問要設定兩人之退休金額應是多少？再加上子女之教育費用 應該如何才能達到財務自由？投資目標回酬應設在多少%才算合理？

龔成老師：

1）以你地現時的現金及居住情況，可以在2、3年後置業，你可以以這個為初步目標，唔需要太心急置業，因為你地這刻資金唔需好多，不過就有儲蓄能力，儲2、3年錢相信會更穩健。

你可以在這段時間，大部分儲現金，小部分就投資股票，如果你無投資經驗，最簡單就是月供盈富（2800），每月$10000。

同時，當你見到股市明顯下跌時，都可以以一手手模式去投資。

另外就是香港樓市，我相信樓市中短期會跌，始終香港經濟轉弱，但這只是中短期，這將會在2年內出現，但跌多少，無人知，不過唔會太多。長期來說，香港樓市仍是向上的，因為香港樓的長期供應仍是不足。

因此，你這刻保持儲蓄投資，如果你見到香港樓市有大少少的回落，就可以提早把握機會入市。

2）當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你可以預算下，自己退休每月于要花多少錢，然後計出一年花的數目，如果到時收資金投資收息類資產，假設有6%回報，就可以計出到時所需的財富金額。

------------------------------------------------

Q18698：

龔成老師，你好！最近開始睇你fb後，才留意股市。本人打算月供追蹤恒生科技指數嘅ETF，希望老師能俾啲意見。

請問你認為市場上各類型嘅恒生科技指數ETF 嘅前景如何？在挑選供哪一隻恒生科技指數ETF 時，有冇什麼條件以及要注意嘅地方？

另外，想問下點睇小米前景？
謝謝

龔成老師：

我會建議你建立一個平衡的組合，恒生科技指數嘅ETF，當然有投資價值，但如果你組合只有這ETF，你就會太集中在潛力類別，這會有風險的。

因此，我會建議你月供盈富（2800），同時月供恒生科技指數嘅ETF，這樣會較為平衡，你可以考慮安碩恒生科技（3067）。

至於小米（1810），$18以下較合理，這股都有長線投資價值的。

------------------------------------------------

Q18699：

老師，請問2168佳兆業美好質素優質嗎？現價 (pe 30倍)，相比其他物管股為低，我估算為合理區中上部，請問正確嗎？ 想小注買入中長線持有。謝謝老師

龔成老師：

佳兆業美好（2168）有質素的，過往的增長力不差，有長線投資價值。每隻物管股都有不同的質素、背景、規模、增長力，因此比較時要明白這點。

整體來說，現價合理，大約中上部至合理區頂，分注投資都可以，但要留意規模唔算好大，所以要留意注碼。

------------------------------------------------

Q18700：

老師，我29歲，每月扣除支出只可儲到$16,000，月供$8,000，包括$5000 2800（盈富基金），$2000（港鐵公司） 66， $2000 823（領展房產基金），繼續進行中，現時持股如下：

00066 港鐵公司 98
00388 香港交易所 112
00823 領展房產基金 122
01211 比亞迪股份 23
02800 盈富基金 1,042

1. 呢個組合OK嗎？

2. 而家用緊中銀月供，會唔會用證券行手續費會平D？有無推介？

3. 現時有約20萬現金，應唔應該一手買入定月供？

4. 388同1211現價都較貴，應該停月供定可以繼續？

5. 想月供或買入9988， 700. 1810，1177，3690，邊隻值博率較高？

感謝！

龔成老師：

1）可以，這都是有質素的股票，值得長期持有，可以長期月供。

2）有可能，但我具體唔清楚。

3）如果你投實力不算高，月供一定是最穩健的。另外，如果你見到有較大的跌市，就可以以一手手模式買平貨。

4）現時有點兩難，因為你股數太少，股價上少少貴，應該停一停，但如果你見佢落翻少少，都可以開始翻。

5）騰訊（0700）就較穩健。另外，小米（1810）、中生（1177）都可考慮。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q15381-Q15400）

Q15381：

龔成 阿sir, 我媽之前聽人講就去買股票。請問以下是否應該賣出，留資金買優質股

515 遠進東方照明
569 中國自動化
653 卓悅
672 眾安房產
858 精優藥業
1898 中煤能源
3889 大成糖業
6161 泰加保險

龔成老師：

我地繼續持有一隻股票與否，關鍵位是企業質素、前景，買入價只是心理因素。

達進東方照明（0515）是財技股，散戶好難玩，賣出較好。

中國自動化（0569）年年虧損，無也投資價值。

卓悅控股（0653）雖然都有品牌，但過往5年有3年都虧損，賣出部分或全部較好。

眾安房產（0672）質素一般，勉強可以持有，但長遠來說，換其他優質股更好。

精優藥業（0858）的核數師意見，全部都是有問題的，反映核數師認為佢盤數「有古怪」，這類股不宜持有，賣出較好。

中煤能源（1898）都算有投資價值，但企業質素未到好高質，勉強持有都可以。

大成糖業（3889）年年虧損，加上核數師意見有問題，賣出較好。

泰加保險（6161）多年來業務無乜增長，加上5年有2年虧損，持有價值一般，長遠都是賣出較好。

坦白講，上述股票如果在投資前，睇下睇公司的業務增長情況，業績，核數師意見，大部分都無可能會買的。

------------------------------------------------

Q15382：

龔成老師，有幾個問題。

1. 早前伊朗同美國局勢不穩，雖然升級機會好似不大，但我都想買下黃金 SPDR金ETF (02840)，你覺得合唔合理

2. 想知道點解維他奶 (345) PE同PB都仲係咁高，佢已經跌咗$10有多，點解市場仲比溢價佢，如果佢不跌反升，個PE只有不斷地大落佢? 點先低得返，係唔係關每股盈利事?

謝謝老師!!

龔成老師：

1）不用。

我地唔好預期事件的發生，不要「估有戰爭風險而去增加黃金」，這模式不是真正的投資，我地唔好估事件。

而我地應該進行「財富的配置」，即是我地不預期事件，而是建立一個組合，做好分配，當中會有金銀這類貴金屬，但這不是為個別事件而買，而是在組合配置中，持有小量貴金屬，是一個正常平衡風險的做法。

2）維他奶（0345）有質素的，不過，這股在近一年都處貴水平，就算股價回落了不少，都仍有少少貴。

第一，這股有質素，第二，佢中國業務發展得唔錯，而市場預期佢中國業務增長理想，因此比佢一個較高的估值，當每股盈利有好增長，市盈率自然會回落。

但我認為，市場對佢增長估得過高，故現價仍不平。

------------------------------------------------

Q15383：

龔sir你好，之前留意到你的專頁，因此想開始學習投資。

我今年20歲，現在分別月供煤氣、領展以及盈富基金。請問這樣的組合適合我嗎？

另外我媽媽亦想學習投資，她今年50歲，尚在工作，請問什麼股票比較適合她呢？感謝你的解答！

龔成老師：

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。做月供股票。

你上述所選的，都可以月供，都可以進行，適合你。盈富（2800）佔比可以較多。

至於你媽，其實會開始為退休做準備，但同時，財富仍有增長力（但不是進取），因此，佢可以投資「平穩增值股」+「收息股」。

可投資「平穩增值股」+「收息股」，但就隨著年齡增加，慢慢增加收息股的比例。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、港交所（0388）。

同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435）都可以。

------------------------------------------------

Q15384：

Hello，我買了762 中國聯通
9.93 買了一手
8.2 買了兩手
平均價是 8.87

但現時聯通價是6.64 很低，如果吾想再溝貨，以月供方式來拉低價位可以嗎，每月供3000-5000 左右

龔成老師：

買入價只是心理因素，唔好比這個因素，影響了你的投資策略。

中國聯通（0762）本質不差的，但賺錢能力比過往有減弱情況，增長力都是，佢是平穩增長類別。

你要睇翻這股佔你組合比例多少，唔好以「拉低平均價」去決定加注。

最重要是睇翻企業質素覺前景，以及你的比例。以這股的質素，不差的，但增長力有減慢是扣分的地方。如果你現時持股佔股票組合比例少，你可以現價加注。但就唔好月供。

如果你持貨現多，就唔好再加注。

------------------------------------------------

Q15385：

成哥...幾個月前先開始供港鐵...五十幾蚊供到依家四十幾..而且恆生每個月手續費都150...令到我疑惑好唔好繼續供..唔夠一手又走唔到...

龔成老師：

月供是長期進行的模式，一般都要供5年先有效果，而在月供的過程，我地會期望股價向下！令我地可以投資到更多的貨，只要企業長期向上就得。

你一定要以長期作為投資目標，唔好因為中短期股價而影響策略！

------------------------------------------------

Q15386：

你好，首先先多謝你一直在 FB 及各大平台的分享。我見你一直都介紹不同的投資心得

我家兩老都有大約三百萬資金係手暫時只做緊唔同的定期，我想幫佢地改變一下，等佢地生活再好d, 有無咩建議呢？

兩老己經退休，生活無懮的

龔成老師：

你可以將這$300萬，分成5部分。

第一部分投資收息股，你可以建立一個收息股組合，你可考慮港燈（2638）、香港電訊（6823）、匯豐（0005）、工行（1398）、置富（0778）、陽光（0435）、深高速（0548）等，大多有6%股息

（你可睇下《50穩健收息股》當中仲有好多）。

你平衡的投資這些股，除了可以得到穩健的收息收，同時可有效的分散風險。

第二，投資債券，你可以選擇A評級的債券，年期較長都可以，但利息卻不高。你可以到銀行問問。

第三，投資年金，你可以睇睇，這是適合你們的產品，零風險，可以有穩定回報。

第四，你亦可投資銀行低風險類的產品，你可自行到銀行了解下，總之是「低風險，持續現金流」的。

第五，持有現金，除了可做定期外，現金亦可以為你的後盾，以備不時之選。同時，若投資市場大跌，你可以在這時買到更多的收息股，股息率會進一步上升。

你可以將$300萬資金，平衡地分配在上述的項目上，對你來說是最好平衡風險，同時有穩定的現金流。

------------------------------------------------

Q15387：

老師，823質素轉差嗎？

龔成老師：

領展（0823）中短期當然會較弱，但如果以長線角度分析，質素仍在，無變。

由大半年開始，佢股價不斷向下，這是受中短期香港不利情況影響，預期這情況仍會持續，但不會永遠，而投資者就是耐心等好轉。

我睇翻，近半年大股東正不斷增持。

------------------------------------------------

Q15388：

老師你好,本人28歲，月入$30k，儲$10k，因喜歡旅行另儲$4k備作短期旅行用，月儲共$14k。

最近打算在30歲前儲去旅行一年並儲$150k但同時亦想儲一筆錢以備不時之需，所以月儲的$10k，一半是用來去旅行，另一半是儲的。有幾個問題想請教老師:

1. 這個儲蓄比例健康嗎？

2. 現只有2年時間儲錢去一年旅行($5k*24=$120k), 與目標$150k還有一段距離，因見到你說過月供股適合長線投資，這情況下如何投資才達到目標呢？

3. 月儲的另外$5k是以備不時之需，用這筆錢買港燈收5%股息可以嗎？因考慮到兩年後會有最少一年時間沒有收入所以暫時不考慮月供股正確嗎？

4. 另外之前在高位$4買入了3988用作收息，如果賣出再買入2800可以嗎？可以的話會建議收埋今年股息先賣出？還是繼續keep?

投資新手，問題比較多，感謝老師抽空指導！

龔成老師：

1）每個人不同，但都可以接受。

但如果可以的話，你年輕，應該再加大「儲蓄作永久財富」的部分，以先投資後享受的模式進行。

2）因為你這部分的目標，是2年內會使用，而這是一個中期時期，不算好長，所以利用股票作增值的效果不明顯，所以，這部分資金會建議儲現金，最多只能少部分投資盈富（2800），令財富有基本增長，月供少少是可以的。

3）你留現金更好，始終你這年齡，可以進取少少。當你留有一定的備用現金後，餘下的就要盡力進攻，而這些備用現金，最好持有「現金」。

4）收息前後賣都是一樣的，因為佢除淨後股價會自然地調整。以你的情況，應該增長多過收息，所以，你已經可以賣出，轉到盈富（2800）。

------------------------------------------------

Q15389：

龔老師，想請教一下宜家我既狀況應該點做先好？

我宜家33歲，得$10000積蓄
每月薪金15500，另外老公每月比家用$8000
家庭+個人必須開支每月大約$13000

有一份供左半年既儲蓄保險，每月供$3300，要供5年，最初供既時候係打算10年後攞出黎裝修屋企

問題：

1. 份儲蓄保險應該10年後攞出黎裝修好定係我用其他方法儲錢裝修，儲蓄保險就留返退休用？

2. 如果我另外想儲錢，應該點投資好？應該月供基金好定股票好？

3. 應唔應該2638（港燈ss)每月入一手當儲錢收息？另外再月供股票/基金？

4. 如果我想8年儲40萬，應該點投資好？

感謝賜教

龔成老師：

1）如果從財富角度，當然是留返退休用，不過，你都要在現實情況中取平衡，10年後的確好多變數，你唔需要這刻決定，暫時只要保持進行，到時可能小部分用作裝修屋企，餘下再滾存作日後退休。

2）以你的情況，建議你月供股票，你可以投資「平穩增值股」做月供股票，每月$5000。

你可以考慮盈富（2800）$2000。

另外再加2隻（每隻$1500）：銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

3）以你的年齡，未必是最好的選擇，你投資盈富更好。

4）你照我上述的月供模式進行，你8年後預期滾存到$65萬以上。

------------------------------------------------

Q15390：

老師你好
本人37歲 無物業 月入34000 每月可儲14000
希望可以60歲退休後有700萬現金(未計通賬)
因退休後會去泰國生活

現持有股票如下：
1211@2500
1810@2600
386@20000
1928@800

股票現價大約280000
每月儲蓄將10000儲起等機會入市 其餘4000備用
我都會因應市況將以上股票以分注型式買入
MPF 390000

年金月供1500 每年有3.5%利息(現價56000)
人壽保險儲蓄 月供760每年3%利息(現金價值160000)
持有現金10萬

請問老師 如到60歲要有700萬應如何分配投資？

1. 想問386平均買入價5.8現階段是否不作投入只收息就好？

2. 1211平均買入價48會繼續持有同時待股價再跌
繼續分注買入什麼價格再投入比較好？

3. 1928什麼價格可再分注入？
麻煩老師有空可會覆本人問題 謝謝
希望老師身體健康

龔成老師：

1）中石化（0386）只算是收息股，對你來說不應投資太多，因為你應該以增長為主，不建議加注，原有貨持有則無問題。

2）這是潛力股，最好用分注模式投資，但不能佔組合比例過多。你可以等佢到$44以下再加注，再類似每跌10%模式再加注的方法進行。

3）現價已經可以，只要同時留有一定的現金就可以了。

如果你每月可以將$10000投資，假設回報率為10%，到60歲，就可以滾存到$950萬，所以，你這刻要做的，就是每月投資$10000（可以即是投入，又或部分儲現金等機會入市），同時，要以10%（增長連股息）的股票為投資目標。就可以完成你的目標。

------------------------------------------------

Q15391：

成哥，請教一下只338入得過嗎？想長楂收利息。期待成哥指教一下，多謝

龔成老師：

上海石油化工股份（0338）這刻的股息率的確好高，但這只是利用上年度的股息，除以現時股價計。問題是，佢之前的業績開始轉弱，股息都有機會受影響。

作企業質素上，算是中等，而近年業務有轉弱情況，現時的估值唔貴，投資都可以。

但你要明白，佢股息有可能出現不穩的情況。同時不建議太大注投資這股。

------------------------------------------------

Q15392：

我是你的粉絲 一直以來我都有睇你教既投資方向, 睇左幾年,你出既書我都買齊, 我好想你教我 我既投資方向有冇問題, 同埋可以點改善, 我今年28 月入25000 有300000現金 ：

823 領展
66 地鐵
6823
1211
778

依家恒指 已去到一定程度, 我個倉偏多係收息股, 我係咪應該買返D潛力股, 如果係 依家還有什麼值得買入？

另外我個人保守 如果我買收息股 諗住一直儲住 以買不賣, 有錢就再買, 例如 6823,778,5等等分散買收息股
希望達成現金流目標 不再為金錢而工作

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，加上如果你本身怕風險，這刻不用急著投資，你可以集中在平穩增值股先。

因此，你原有的收息股，可持有，但之後的資金，應該集中投資平穩增長股。甚至投資小小潛力股都得，你要「先增值」。

------------------------------------------------

Q15393：

阿Sir 請問00086新鴻基公司買得過嗎？我見利息幾好，唔該

龔成老師：

新鴻基公司（0086）係金融服務機構，分行及辦事處遍布香港、中國內地、澳門及新加坡等地，主要業務有：財富管理及經紀業務、企業融資、資產管理、私人財務等。

雖然係香港好多年，同埋發展唔算差，但近年的增長都不強，生意只是平穩，發展潛力唔算大。至於盈利，就比較波動，這亦是這類股的特性，盈利好受金融市場波動的影響，不過，睇翻佢的數據，就算金融環境較弱的年份，都有一定的盈利，因此本質唔算。

整體來講，企業質素不差，但發展潛力不算強，收息都可以，但由於業務本質有不確定性，因此，唔建議太大注。

------------------------------------------------

Q15394：

老師，上堂你解釋完1211 比亞迪潛力在粒電既技術，然後近期因為呢個原因令佢重新發光。如果仲好似以前咁聽d短炒財演講就會錯失左之前平宜區入貨機會或升個少少就忍唔到放左。

雖然因為要分注入平均風險未趕得切入夠貨，不過已經好開心，覺得係學習”真正”投資既一個好開始。心理質素都慢慢改緊無以前咁老散心態一跌市就騰晒雞。多謝

另外搵左你同事幫手已報名進階班，而家溫習緊之前d notes，上堂見！

龔成老師：

對，我地是進行長線投資，這亦是全球最賺錢投資者巴菲特用的方法，證實是最賺錢的方法！

比亞迪（1211）長遠仍有潛力，要耐心等收成。

有時分注買入會令我地買入價高左，或貨少貨，不過，這是有效減低風險的做法，因此是最好的。

遲D見！

------------------------------------------------

Q15395：

成哥你好，今年29歲，請問下

1. 如有10萬閒錢，現在股市下分多注入2800可以？想長期收息

2. 股市回左，有咩股可趁底吸納？
感謝大師開示

龔成老師：

1）你可以將其中的一半，分3次投資，盈富（2800）可以，餘下的一半資金，就等大市再進一步下跌時入貨。

2）你可以考慮一些較受近期情況影響較大，而本質又不差的股票，例如希慎（0014）、太古地產（1972）等，現價合理，已經可以開始投資。

------------------------------------------------

Q15396：

老師，前兩日我已經去買左80後百萬富翁、股票勝經翻屋企睇。

睇完之後，目前有初步的打算，會開始月供盈富，睇過你對1211 ge分析之後，自己都有留意，都想入1211，但澳門月供股票唔抵，我係咪應該先買一手1211，然後慢慢分注投資？

龔成老師：

澳門月供的確有點煩，你應該集中一隻去做月供，只月供盈富（2800）。

至於其他股票，就以一手手模式買入，由於一手手模式，買入價風險比月供模式為高，因此，你唔好心急入，要跌多1成先考慮，同時，要計算這股佔你財富的比例，不能太多。

------------------------------------------------

Q15397：

老師, 隻5仔匯豐依家係咁跌, 無咩前景咁, 我應唔應該放左佢? 我$69買....

龔成老師：

匯豐（0005）不是全無質素，但增長力的確弱。

你可以預佢只是一隻收息股，唔好對股價有特別期望，如果在這個前題下，你睇下這股是否適合自己，又或應該佔組合多少%。從而決定去留。

如果你想組合增長力多D，就可以考慮轉其他。

------------------------------------------------

Q15398：

龔sir
想請教下你點睇吉利汽車?

佢哋個品牌效應唔錯不過 你點睇佢哋喺未來新能源汽車呢一個區域方面 發展?
$15月供可以？

龔成老師：

吉利（0175），本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。前景正面。

但中國車市放緩、外來競爭、行業競爭加劇，都成為不利的因素，相信中短期仍會對佢不利。

股價由高位回落不少，除了反映過往處貴水平，現在回落至合理水平，同時反映市場預期中國車市的不利情況。長遠前景仍在的。

現時價位在合理區，但股價波動，你現時月供可以。新能源汽車都正面的。

------------------------------------------------

Q15399：

老師,在大概年半前開始接觸老師嘅page同書,然後嚐試實行,的確好有用,所以想先感謝你.

回正題,有啲問題想問下老師：

1）0522(asm)
係好早大概以$82入左貨,想問一下如果在大概$95左近入多dd可以嘛？因為佢自早前升過百以黎好似難以回落到我買入嘅價位,但其業務能力好似都仲未到黃金時期應仲有發揮空間,所以趁現價回落入貨追加值得嘛？

2）1137（hktv)
雖然hktv有一定潛力,而且有增長,但其作債務一值都較多,好似每次有成績時就債務同樣增加,明白係發展用,但有過度發展嘛？同時,係疫情下嘅得益雖然短期,但亦係成功吸引followers 嘅方法,長遠好似都有利發展,對嘛？
呢個情況,其值博率大嘛？

thx thx

龔成老師：

1）ASM PACIFIC（0522）本身有質素，但我地好難作出短期的股價走勢預測，因此，你最好就是長線投資，按佢的平貴度，決定入貨力度，咁就得。如果$95，是合理價，分注投資可以。

2）香港電視（1137）的網購業務，經過了多年燒銀紙後，開始進入了初步有現金流的階段，相信往後會正面。

這股仍然有潛力，不過股價都升了唔少，你要平衡投資值博率，以這刻的股價來說，小注好了，但就值得長線投資。

------------------------------------------------

Q15400：

Hi，本人月入40000，儲蓄有25萬
另有40万可在3年後使用

現年39
扣減保費和日常生活，每月可儲2萬元

我還是租客，想買樓，但20年前為家人做了擔保，不可借銀行。想請教一下

龔成老師：

如果你家人的物業，已還款到一定的水平，你可以到銀行，取消你的擔保人身份，你可以去銀行問問。

至於你的現金，暫時留作現金，不要動用，留作買樓資金，而每月儲蓄$2萬，是否投資，就要睇你打算幾時買樓。

如果置業時機是2年內，就盡量儲現金，唔好作投資。

如果打算3年後才買樓，就可適當運用資金，投資一些平穩增長股是可以的。

----------------------------------------------

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。