【龔成問答信箱】（Q22721-Q22740）

Q22721：

老師，上完你的堂，現在看報表，有些問題想請教

1）1310香港寛頻為什麼沒有銷售成本？

2）派息比率由141%至1054%，是否不太正常？有什麼implication on their business direction?

謝謝你

3) 另外偉易達303，初步指標同5年財務數據也好合格，現價是否合理價呢？謝謝你

龔成老師︰

1) 唔係每一間企業年報，都會列出銷售成本。因為有些企業係提供非實體產品，或者以服務為主，其實佢地好難去準備計算一個銷貨成本，所以在年報會見唔到這個項目。

其實除左香港寛頻(1310)，福壽園(1448)由於佢賣地以外收入日漸增，佢係近幾年都開始唔出銷貨成本，都是這個原因。

2) 你要記翻到底派息比率係點計，佢係由"派出股息" / "純利"。而"純利"當中，係會扣除一些非實質支出，好以"拆舊和攤銷"就係其中一種。

以佢2020年純利9700萬計，但"拆舊和攤銷"就足足有成15億，如果加回這部份，你就會發現，其實佢只係派緊本身架純利，無任何不正常狀況。

出現大於100%派息比率，另一個可能性，就係佢用以往賺架錢，拿出來派。

當然，唔係每隻股票派息比率高於100%，都一定係這2個原因。你要每隻去深入分析，才好下結論。

3) 偉易達（0303）佢財務數據係合格，此股可以作為收息及平穩增長股，雖增長力就不算強，但適合你年紀。

本質正面，長遠投資價值有的。

以佢過往正常的經營環境來講，佢派息比率高達9成，成立於70年代，業務是電子產品，這麼高的派息，反映管理層明白這公司已過了最高增長的年代，之後只會是平穩增長。

公司已不需要每年投資發展，反而管理層、大股東，偏向想收息，因此這是重派息多過重發展的公司。

雖然佢係某些業務做得不錯，但發展心不強，同時大環境並不是高速增長，故相信佢之後都會平穩。近年這公司的生意，都是平穩增長，如果比較幾年前的盈利，都是差不多。

此股係收息，再加些平穏增長力。現價合理，可投資，但不能太過大注。

------------------------------------------------

Q22722：

老師你好

一萬股941
一萬股66
一萬股17
二十萬股 3988

10萬股 386
1000股 1113
500股 9988

現在總金額負50萬。不知道應該繼續收息抑或再轉組合?

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

你現時持有股票，全部都係有質素，長線持有係無問題。

有無需要轉換組合，就要因應你年紀和投資經驗，再作出調整。

我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係分配投資項目時，會因應番你的人生階段。

如果你年青，可以「平穩增值股」(0066, 0017, 1113)+「潛力股」(9988)。中年人士，可以較集中翻係「平穏增長股」。當你已近退休之年，就應集中在「收息股」(0941, 3988, 386)，去創造平穏現金流。你可以睇翻自已年紀，去作出配置。

另外，你唔好太集中係幾隻股票身上，你要配置一個平衡性高組合。當中包含不同行業，同時個別企業和行業，不要佔組合15%和30%以上。

以下係一些優質股票，你可以參考下，將適合你的股票，加入組合當中。

潛力股︰安碩恒生科技(3067)、比亞迪(1211)、中生(1177)、福壽園(1448)、港交所(0388)、阿里（9988）、騰訊（0700）、舜宇光學（2382）、小米（1810）、ＧＸ中國電車基金（2845）、三星FANG ETF（2814）。如果有投資美股，可投資QQQ。

平穏增值股︰指數基金、港鐵（0066）、煤氣(0003)、恆基（0012）、中銀香港（2388）、長建（1038）、粵海(0270)、領展(0823)、希慎(0014)、太古地產(1972)。如果有投資美股，可投資VOO。

收息股︰港燈（2638）、香港電訊（6823）、工行（1398）、恆生（0011）、置富（0778）、陽光（0435）、深高速（0548)。收息基金(3110)，都可以。

但你要留意翻，平穏增長股和收息股，現價都合理。但部份潛力股已有輕微過熱情況。只有安碩恒生科技(3067)、ＧＸ中國電車基金（2845）、 騰訊（0700）、阿里（9988）、中生製藥（1177）、福壽園(1448)、QQQ勉強算在合理區頂部，可分注入貨，其餘要等等。

你咁大負數，相信係你買入價過高所致。如果你對估值定平貴，唔係太了解。我建議你先用月供去儲股票，以減低買貴貨風險，相信對你會較有利。

------------------------------------------------

Q22723：

龔成老師你好！本人27歲月入3萬政府工，儲蓄大約有70萬，之前都有月供開1211同823，

想問依家想轉981或1347其中一樣。同1928加405。

可以比些少意見點睇981同1347嗎

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你27歲，應以增值為主，建議你用「平穏增長股」 + 「潛力股」作組合，去創造一個增值平台。

先前月供的比亞迪(1211)和領展(0823)，都是合適的。但由於比亞迪(1211)現價偏貴，暫時不宜月供，就回到$180才好再考慮。

越秀房產信託基金（0405）只係收息股，增長力唔高，唔係太適合你。

中芯國際（0981）業務有增長力，質素係有，但未到最高質素。

睇翻佢過往的業務情況，雖然仍每年的生意都有增長，但盈利就有波動，反映雖然大環境的市場在增長中，但佢的成本與售價，就未必在佢掌握的範圍，最後造成盈利波動的結果。

雖然這股都有前景，但以佢面對的情況，但好難將佢定義為最優質的股票。

加上此股近年升了不少，就算有所回落都唔算平，加上之前熱炒過，股價大上大落，投資要注意風險。這股唔建議大注，回翻D較合理。

月供都可以，但不宜太多，小注好了。

華虹半導體（1347）有質素，發展不差。

佢主要從事半導體產品的生產及貿易，開發及提供晶圓工藝技術組合，包括嵌入式非易失性存儲器及功率器件，以及ＲＦＣＭＯＳ（射頻互補式金屬氧化物半導體）、模擬及混合訊號、ＣＭＯＳ圖像傳感器、電源管理及ＭＥＭＳ（微機電系統）等多種其他技術。

佢客戶主要為集成器件製造商與系統及無廠半導體公司。中國因為想發展這方面的技術，政策在長遠會對這公司有利，增長正面。

這股長線持有無問題，但現時估值有少少貴，而且都比較波動。做月供的話，小注好了。

我地唔好成個組合，只集中係3,4隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能高於組合30%，同一股不能高於組合15%。要平衡，建立後長期持有，不是買賣賺差價，而是成為你財富組合一部分。

------------------------------------------------

Q22724：

你好,我32歲，現時持有股票

3690 200股 406.6平均價
0003 3150股 16.82平均價
3319 1250股 37.6平均價
9618 100股 392平均價

想問下應該如何調整投資策略

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你32歲年紀計，應先以增值為主。你現時持有股票，都係質素和適合你。但美團(3690)不確定性會較高，長線不宜持有過多。

但我發現你手上不少股票的買入價，跟現價都有相當距離，雖然可以守，但你要預起碼等一段較長時間。

其實你的情況，都是不少投資新手會犯的錯。其實很多人都是這樣，亦是投資新手必然經過的階段。

投資新手通常都有兩個主要錯誤，第一、買入當炒股；第二、在市況最旺（即是最多人認為市場好景的時候）以最貴的價位買入。

其實這些問題，係可以避免。方法其實好簡單，就是投資較穩健的股票，又或是盈富基金（2800），分注買入，例如透過月供股票方式，每月買些少，會是較好的策略。

未來時間，你唔好只集中係上述3,4隻股票，要加入更多不同行業，令組合更多元化和平衡。

由於你過往經常買貴貨，我建議你先集中利用月供模式，去建立一個股票組合，以減低買貴貨風險。

策略上，你可以投資「平穏增長股」和「潛力股」。你每月5成儲蓄做月供。其餘先儲起，用一邊月供一邊儲蓄的策略。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

餘下的另一半現金，我地就等機會，當大市出現較大回調，就加大力度掃貨，然後作長線投資。

------------------------------------------------

Q22725：

龔Sir你好，近期留意你嘅資訊買咗你本「大富翁」未開始睇，反而傾向聽你講多啲。

幾年前買入︰

電能（6）2000股平均價$56.25
匯豐800股平均價$66.89
瑞聲（2018）500股平均價$121.44

全部都好似2018年買入就係你講中晒嘅聽人講無分析胡亂唔睇價。以上股票值得長線持有嗎？

至於配置方面，買咗一筆過投資債券派息基金。

本人52歲，希望幫自己儲錢退休，想請問月供股票/基金分別？邊個相對穩陣？

樓按仲有$280萬左右，每月前夫會俾生活費連供樓$53000都用盡。09年後已經無工作照顧家人，而家仔女大晒結埋婚畢埋業有工作，現時負擔係雙親同自己。

可唔可以俾啲方向，人生交叉點。我已有醫保、儲蓄人壽（1份供完，1份舊式供到死不過固定保費$320）$50萬危疾$200萬定額壽險就係死雙親都要錢。

但人要正面睇如果仲係到生活都要錢靠MPF一定唔夠，醫療又年年加，感謝。

龔成老師︰

書本你都要睇，特別係初學者，最好睇左《80後百萬富翁》、《財務自由行》和《股票勝經》先。雖然平時睇我Q&A都可以，但書本上概念較完整，對你分析和解讀我Q&A或者POST架內容，係有幫助。

你以上股票，都係有質素和適合你，可長線持有。但問題係，你買入價有點貴，才會出現帳面虧損。

月供股票/基金，其實你現睇翻佢投資項目，才知有無投資價值。但我一般會較建議買優質股，因為基金都會有一定費用，長線係蠶食緊你回報。

你現時保險都係保障型多，這些可保留。而儲蓄保險，其實增值能力唔算高，現在一份可以保留，但唔建議加大投入。

以你52歲年齡，其實要開始為退休做準備，但同時，財富仍有增長力（但不是進取）。若單靠MPF，其實真的很難足夠應付退休生活，所以你要累積優質股，去加大退休生活支援。

選股上，你可以投資「平穩增值股」+「收息股」，作為增值目標。

由於你過往都成日買貴貨，相信你對企業估值，點去定平貴未必會太了解。所以你先利用月供模式，去做增值，可以減低買貴貨風險，對你而言會較理想。

策略上，你每月5成儲蓄做月供。其餘先儲起，用一邊月供一邊儲蓄的策略。

若你想進取些，可集中「平穩增值股」，相反你想保守少少，可以集中在「收息股」上。但比重要隨著年齡增加調整，慢慢增加收息股的比例。到退休時，你收息股比例，應提升至100%。

同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）、富豪產業（1881）等（記住，股價略波動，不能太過大注）。

------------------------------------------------

Q22726：

龔sir 您好，我係澳門既Fans~因為疫情的關係您應該需要一段長時間才能夠在澳門辦課程，但因為我和其他幾位朋友都一直很有興趣上您的堂

未知開辦網上課程我和朋友包堂未知這個方法您是否願意和行得通？

龔成老師︰

抱歉，由於擔心出現盜錄問題，所以我以往一直都唔會開辦網上課程。

而且，我都較希望可以親身，跟學員互動溝通，所以網上課程暫時不會開。

至於包堂這個方法，暫時都未能安排。因為要配合本身課程和工作時間安排，所以偏向一次教一大班學員會較。

你們放心，只要疫情一穏定，我就會盡快重開澳門班，到時就可以見到大家。

你或者可以預早留位，只要whatsapp 852-55457212我同事講，打「留位澳門班」就得。我地有具體資料就會 whatsapp你。

因為現時已有好多澳門人留左位。

此期間，你可以先睇我架《80後百萬富翁》、《財務自由行》和《股票勝經》，都適合初學者。

之後，你有時間，可以再睇埋《選股勝經》和《年報勝經》，對你課堂上掌握，會有幫助。

------------------------------------------------

Q22727：

龔sir 你好！ 我上左你進階班，呢排摸索緊你教的估值方法。請問如果用你教的方法方析的話，比亞迪、信義玻璃、信義光能現價是否ok?

希望龔sir 你可以呢3間公司作用示範！ 感謝

龔成老師︰

比亞迪(1211)貴。信義玻璃(0868)合理區頂至略貴。信義光能(0968)合理區頂至略貴。

係估值方面，你建議你主力用市盈率比較法，去先做一個估值。

但比亞迪(1211)佢潛力較高，其實較難分析。佢現時市盈率去到200倍以上，我地可以參考佢預測市盈率，現時大約140倍。

以佢增長力，去到50-70倍左右，其實都可以。所以，你預佢回幾成，才算較合理區較頂位置。當然，佢業務不斷增長，因此企業價值正向上。

信義光能(0968)你可以睇翻佢行業市盈率，大約係11-24倍。而佢係行內有一定質素和優質勢，故你可以給予較近上部位置，作其合理市盈率。

之後，你再用我教的方法，找出一個有代表性的每股盈利。由於2021年受疫情影響，參考2020年會較好。以信義光能(0968)計，你預HKD0.65左右。

計算出來的合理區約HKD11-14，當然，企業增長中，有可能有少少調整。

信義玻璃(0868)同樣可以先我上堂教的方法，找出合理市盈率區間和代表性的每股盈利。但由於佢同信義光能(0968)一樣，近年增長力高左，所以都要自行上調。

緊記，近期中央政策都出較利好綠色能源股份，故計算信義光能(0968)和信義玻璃(0868)時，用較近期數據，會較能反映實況。

------------------------------------------------

Q22728：

龔Sir你好，本人40歲公務員，已婚，有一小朋友，月入$45,000 ，可以每月用一萬蚊投資。

2019年6月以4,400,000萬購入一個220尺單位深水埗、6年樓放租，現在每月放租一萬蚊。但同年出咗林鄭Plan，令到細單位吸引力大減。請問：

1. 當夠三年的時候我應該繼續持有放租定還是出售？

2. 我每個月有一萬蚊可以用嚟投資，暫時月供股票盈富基金、中銀香港、港鐵，有咩其他建議？

謝謝龔Sir

龔成老師︰

1) 我偏向建議你出售，因為你這個單位太細，連一個基本家庭需要的呎大小都無，投資價值係會大打折扣。

2) 當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時40歲去計，可以投資「平穏增長股」和「潛力股」。你現時選擇股票，屬於「平穏增長股」，都係適合你。

你每月5成儲蓄，即是用$5000做月供。其餘先儲起，用一邊月供一邊儲蓄的策略。

但我建議你都加少少「潛力股」，去提升組合增長潛力。

潛力股可選安碩恒生科技(3067)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。如果有投資美股，可投資QQQ。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多佔組合2成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約4成，視乎你現時投資經驗多寡和了解這些股票程度而定。

餘下的另一半現金，我地就等機會，當大市出現較大回調，就加大力度掃貨，然後作長線投資。

------------------------------------------------

Q22729：

你好，龔sir。9988 269均價 / 9618 330均價，係咪要沽好d

9988 1000股
9618 750股
1339 3.02 5000股
1398 5.8 10000股

1086 1.83 10000股
175 22 4000股
2127 2.56 10000股
806 5.89 10000股

有3分2是股票，有3分1是cash。

輸左10幾萬了，中美咁，係咪清倉好。謝謝龔sir

龔成老師︰

國際關係風險，近1,2年的確係高左，但我地分析一隻股票時，最主要都考慮翻佢本身質素。如果無對佢長線本質造成影響，咁就無問題。

阿里(9988)和京東(9618)最近受國家政策和相關風險影響，質素係弱左，但又未算好嚴重，估值會有少少調整。但由於核心價值無大變，從質素上計，依然值得長線持有。

但問題係，佢佔你組合比重好高。個別企業和行業，不要佔組合15%和30%以上，銀行業更加不要高於組合20%，否則會有過度集中性風險。

現時這2隻股票，從個股和行業(科技類)計，都係超左標，故你要沽出部份，換至其他優質股，咁會較好。

而且這2隻都係潛力型股票，若你偏年青，持有係可以。但如果你係中年至退休人士，就不宜太大注。

至於你虧損咁多，主要唔係股票質素出問題，而係你買貴左。如果你不太懂得估值，定平貴，我建議你未來時間，轉用月供或分注模式去儲貨，來減低買貴貨風險。

另外，中國人民保險（1339）、匯森家居（2127）、惠理基金(0806)和好孩子國際（1086）質素唔算好強，長期的投資價值只算中等，不宜持有太多。

現時大市在合理區，你現時股票和現金比例，係合適的。餘下1/3現金，你就等大跌市出現，才加大力度掃貨。

------------------------------------------------

Q22730：

請問龔成老師，若想定期買入股票，而自己又有時間可跟進的話，是否就非必要設定月供，自己定期買入即可？

主要是因月供有費用的支出，自己買入是否可節省這方面的成本？

龔成老師︰

簡單來說，月供股票就是你每月將現金，買入某一隻或多隻股票，慢慢咁樣儲貨。

月供股票每月投入的金額相同，因此當股價上升時，買入的股數自然減少，而當股價下跌時，就自然會買入較多股數，如同自行調節一樣，去減低價格波動的風險。

其實一手手買都可以做到以上效果，你現金只要平均地慢慢投入股市(如保持住每月定額買一手)就可以。

2個方法都可以，正如你所講，一手手買更可以節省月供費用成本，但你必需確保自已可以有自律性地進行﹐咁就無問題。

------------------------------------------------

Q22731：

龔sir，想問你對美股PDD點睇，有乜建議

龔成老師︰

由於之前估值貴，加上監管因素，令股價向下，中短期仍有一定的風險，但長線不差。不過，這刻只建議小注好婺。

拼多多(PDD)本質不差的，佢將娛樂與分享的理念融入電商運營中，由用戶發起邀請，與他人等拼單成功後，能以更低的價格買到所有商品。

同時也通過拼單了解消費者，通過機器算法進行精準推薦商品，這個商業模式不差，長遠其實有發展，只是行業的賺錢能力，存有不確定性。

------------------------------------------------

Q22732：

30萬本而加得番吾夠20萬

持有：
港股：京東，中海油，平安，網易，理想。
美股：360數科，ARKX，樂信，好未來。

龔Sir，想問而加應該點算好？由2020年all in投資至現在-30%

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。因為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心，照持有就可以。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

你現時持股，大部份都係有質素，雖然你帳面有虧損。但有質素企業，長線會慢慢成長，令股價回升。

持股當中，中海油(0883)只係商品類股份，價格自主能力弱，投資價值只係中等。而京東(9618)、網易(9999)、理想汽車(2015)、ARKX這類股票，不確定性都較大，不宜持有太多。

TAL Education Group 好未來(TAL)業務主要為內地中小學生提供課後輔導課程。該公司主要為幼兒園至十二年級（K-12）的學生提供輔導服務。

其業務正正是近期中央打擊對象，雖然長線會否再次放寬相關要求，我地唔知。但中短期一定好弱，因為政策影響到其核心部份。

若你持貨不多，可以守，博佢之後政策重新放寬對校外課程的限制。但持貨較多，最好沽出部份，換至其他股票去減低風險。

另外，我地投資係會因應大市平貴，去定策略。現時大市只係合理區，其實不宜資金盡用。所以，你再有新資金，最好先儲起，等大跌市機會。

如果你投資經驗不多，擔心好似之前咁買貴貨，你可以考慮用月供股票去做投資，透過平均價格買入法，去平衡買貴貨風險。

------------------------------------------------

Q22733：

老師你好，我29歲月入1萬5，每月可存4千左右。想問問我持有以下股票應該止蝕嗎？要放部分還是全放好？最近見到係咁跌，心好慌。

6618京東健康 109.3有1800股
3888金山軟件 49.6有1400股

謝謝老師

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

其實金山軟件（3888）和京東健康(6618)唔係無質素，但佢地不確定性都較高。特別係現時都未有盈利的京東健康(6618)，波動性就更高，你預佢地會大上大落。

以你年29歲年紀，持有這類潛力股，係無問題。但若果佢地佔你組合比重，係比較高，我就建議你沽少少，平衡下個風險，咁會比較好。

另外，你可以用每月儲到資金，去做供股票，加快你財富增長速度。

你29歲，可以用「平穏增長股」 + 「潛力股」作組合，去創造一個增值平台。

現在你每月先用5成儲蓄，即$2000做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富(2800)、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)。如果有投資美股，可投資VOO。

或潛力股︰安碩恒生科技(3067)、比亞迪(1211)、中生(1177)、福壽園(1448)、小米(1810)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。如果有投資美股，可投資QQQ。

但由於你現時資金不多，可以先集中盈富(2800)。以你年紀，如果無特別負擔，建議儲蓄比例最好去到收入一半。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q22734：

阿sir, 你好呀！我睇了一段時間futu, 近排才試進買了$110，$108，同$118，平均價$110.5，越買越跌，有100股，真係跌到驚，請問跌完未，值唔值得溝，還是忍痛割？

救你比啲指引，謝謝你。

唉，早上又輸晚上又輸，正宗韮菜

龔成老師︰

首先，我想你清晰翻溝貨概念。我地決定加注(即溝貨)與否，要睇幾個因素，記住，並不是「拉低平均買入價」為目的。

第一，要分析這股的質素，如果無質素，就再跌都唔加。

第二，這股的類別，如潛力或增長或收息類等，是否與你的財富組合匹配，比例是否適合。

第三，你要先計算加注後，這股佔你股票組合的比例會否太多，因為同一行業，同一股票。不能佔股票組合的比例太多。

第四，現價是否有投資價值率，要平，或起碼合理，不能貴。

第五，你要在加注後，仍有現金剩。

記住，重點不是「拉低平均價」，而是組合比例與配置。

因此，我地先有睇這隻股票，到底有無質素。

富途（FUTU）有增長力的。佢係一家在線經紀公司，提供一站式在線投資服務，騰訊（0700）為股東。該公司通過網上平台提供服務，其中包括香港、中國大陸，以及美國股市的市場數據、交易服務和新聞源。

佢以經紀佣金，以及手續費服務的形式產生收入。這企業雖然有發展，但現時市盈率好高，股價變化大，要留意風險。

此股你長線持有係可以，但由於不確定性都較高，不宜持有太多。如果你現貨只係佔組合好細比重，可以守。但較多的話，最好沽少少，去平衡風險。

另外，每注最好分開10-15%，會較為理想。

------------------------------------------------

Q22735：

sir早晨，我隻285原本已有20％利潤，依家要倒蝕！

龔成老師：

建議你減少睇股價，多睇企業年報。

你要平常心睇股價，我隻比亞迪（1211）之前都是這樣，$88賺錢跌到$12蝕錢。希望你唔好停留在一般散戶思維「著短期短期股」，你要提高層次「著重將來價值」。

------------------------------------------------

Q22736：

龔sir，我今年38歲，自己做小生意，所收入不穩定（每月3-8萬都有可能），我既資產組合，龔sir可唔可以比下寶貴意見

現金大約50萬（當中37萬係政府低息貸款），另有50萬左右股票

領展 60.5@700股
金沙27.9@4400股
福壽園7.23@15000股
平安好醫生81.6@2000股

阿里228@400股
雅生活服務29@1500股
中生制藥 6.52@10000股

唔該龔sir

龔成老師︰

以你38歲年紀，應以增值為主，你現時組合中的股票，都係有質素，而且係有增長力，你長線持有係無問題。

但留意平安好醫生(1833)雖有質素，但佢現時尚未有盈利，不確定性比較高，不宜持有太多。但佢現時郤佔你組合最大比重，建議你估少少，換至其他股票去平衡風險。

另外，你組合都比較偏向潛力股(1448,1833,9988,1177，未來時間要加翻多少少平穏增長股，以免組合風險太高。

平穏增長股︰指數基金、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)。如果有投資美股，可投資VOO。

最後，相提多你一點。因為你本身有生意，故餘下現金﹐應優先用來支援你業務。因為一盤生意做得好，其實增長力可以比優質股高好多。

當然，如果出現大跌市情況，你都可以動用這筆資金，去掃平貨。

------------------------------------------------

Q22737：

咁龔sir 可唔可以提議我如果$6000月供比例應該如何？例如領展，比亞迪，3067月供比例幾多，盈富仲供唔供好，thx

龔成老師︰

要睇你年齡、風險度。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

因此，你在選擇應該投資那一類股票時，會係因應你人生階段、投資經驗和風險承受能力，去做決定。

假設你係年青至中年人士，你可以用「平穏增長股」 + 「潛力股」的組合。如果你係偏年青，比例大約可以去到各一半。

但由於「潛力股」有一定波動性，較適宜年青和有投資經驗人士。若你投資取態較保守、經驗較淺或者較接近中年，「潛力股」比重就要相對下調。

現在你每月先用5成儲蓄，即$3000做月供。其餘先儲起，用一邊月供一邊儲蓄的策略。

如果你年齡較輕，可供3067及領展（0823）。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

比亞迪(1211)就暫時唔建議月供住，因為太貴，回到$180才好考慮。若你好想月供新能車股，可以先用ＧＸ中國電車基金（2845）代替。

安碩恒生科技(3067)由係單一行業，若你投資要控制係組合3成以內，否則會有過度集中性風險。

------------------------------------------------

Q22738：

龔Sir, 小妹有十幾萬積蓄, 現時放銀行定期/活期儲蓄都是沒有利息, 想買些收息股, 及作長線投資, 希望所買的股亦有升值的潛質,

因我從未買過股票, 所以無從入手, 最近有留意到以下幾隻股, 但不知那個獲利較高, 你可給我一些意見嗎?

股號 股名
6823 香港電訊
3988 中國銀行
2388 中銀香港
0939 建設銀行
00386 中石化
1398 工商銀行

龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

所以﹐投資那一類股票，要先睇翻你年紀和投資取向。

若你係年青至中年人士，應以增值為主。你上述股票，都係收息股(除了2388)，增長力不高，就不宜持有太多，但質素都有的。

策略上，你可以投資「平穏增長股」和「潛力股」。

大市現處於合理水平，那1X萬資金，你可以先用4-6萬，以"分注"形式慢慢入貨。餘下資金，就等你學到一定投資知識，或者大跌市出現，才大力度掃貨，並長線投資。

------------------------------------------------

Q22739：

2809，2846，3097，3134，3175，9845

最建議買那兩隻，這兩星期炒596和2160上落市

（唔知點解我買股票成日輸）

最後想問1357，如在1.45-1.5水位，是否已很合理價錢，這股是否也可以買

龔成老師︰

我建議你，真係唔好再做短炒。你自己都識講，你之前輸左好多錢。

如果你唔改變你投資方法，就算比你選中好股票﹐長線都可以係輸錢收場。你要記住，真正投資方法，應該係長線去持有優質股。

浪潮國際(0596)投資價值不高，而微創心通醫療科技（2160）雖有投資價值，但就好波動，不宜投資太多。

你講的ETF，都係有投資價值，但大多在合理區頂區。若現價投資，只宜小注或月供。

Global X 標普原油期貨增強型 ER ETF(3097)投資於WTI期貨合約。目標係追蹤標普高盛原油增強額外回報指數(指數)。

Ｆ三星原油期（3175）基金之投資目標為追蹤標普高盛原油額外回報指數之表現。2隻ETF都好類似，表現都係睇油價發展。

但短期油價，好難分析，至於中期，相信會由於全球經濟轉弱，表現只會一般。

這2隻基金唔易玩，因為好難準確捉到個位，就算投資都最多只宜好小注。

美圖公司（1357）佢過左最差時期，但始終業務有風險。算是有危有機類的股票。

佢主要從事提供在線廣告及其他互聯網增值服務；以及開發、製造及銷售智能硬件產品。

見佢財務數據改善，這企業仍有發展力，有長線投資價值。不過業務變化始終大，不建議大注投資。

------------------------------------------------

Q22740：

老師，1299可作穩定增長股嗎？

另外，我想問股票派息揀捽股，那捽股的買入價是如何計算？

龔成老師︰

友邦保險（1299）不差的，企業有一定的質素，有品牌、有規模，生意雖然做到較大，但仍有增長力，不過就不是高增長，只是平穩增長。

不過盈利就有少少波動，但這都正常，因為保險公司有投資相關收益，所以這亦會令股價略為波動。

前景方面，正面的，佢保持不同市場的發展，利用本身的品牌去加強新市場業務，而長遠的市場仍有增長潛力。

這股有長線投資價值，算係平穏增長股類別。現價就處合理區頂，長線持有無問題。

至於"碎股"，其實買入價同一般完整一手，唔會有分別，你都可以用網上投資平台的股價作參考。

主要分別是，你將碎股做買賣時，有機會買賣差價較高。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

🔥🔥中國人壽2月10日推出新的美元躉繳保單，1.5萬美元的高保額折扣由0.3%拉高至0.5%，報酬率優於美鑫，報酬率再次搶先公開❗️

🎲【2020美元躉繳儲蓄險】中國人壽金美美元利率變動型終身壽險（定期給付型）報酬率分析

ℹ️粉專頁貼文，不代表本站推薦！如有個別保單問題，請先看過保單分析文後，再私訊提問！
ℹ️免責聲明:本部落格或貼文資訊僅為作者個人經驗分享，不應視為投資建議！

➡️ http://davidhuang1219.pixnet.net/blog/post/322346120

【龔成問答信箱】（Q12281-Q12300）

Q12281：

老師你好，本人是文憑試考生，剛接觸投資，看了老師的80後百萬富翁1、2、3，得益甚多，使我突破了思想上的限阻！

現計畫8年內能擁有80萬資產，深知並非易事，但亦非不可能。現投資本金約2萬，打算大學時每月儲蓄500元。

現持有1600，788，1330以及2230各一手，打算長期持有，未知老師又何建議？

在兼職獲得足夠金錢後打算參加老師的課程，希望盡快能增加自己的知識，早日獲得第一桶金。
謝謝老師抽空回覆。

龔成老師：

天倫燃氣（1600）有質素的，但佢股價會比較波動，你唔好理中短期股價，長線投資就得。

中國鐵塔（0788）有長線投資價值，不過現價就唔平，你持有就得，唔好心急加注。

綠色動力環保（1330）則不過不失，持有無問題。

羚邦集團（2330）上市年期不久，這類股會較難分析，你要注意風險。初步睇，規模細，但有增長力，小注可以。

你要8年有$80萬，絕對無難度，你應該先加強投資技巧，這段時間提高知識，到你之後真正出來工作時，就盡力要自己儲錢，如果你可以每月儲到6000以上，我相信你能完成目標。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。做月供股票先。

如果你每月能儲到$10000，相信8年後有$120萬-$150萬，加油！

------------------------------------------------

Q12282：

龔成，我想問下華潤置地買5買得過？

龔成老師：

華潤置地（1109）正面的，規模與業務等各方面都不差，但負債高則是風險所在，雖然國內好多同行都有這情況，這企業已經不算嚴重。

不過，從風險角度分析，負債始終會令這公司扣分，因此投資時不能太大注。整體都有投資價值的。現價合理，分注就得。

------------------------------------------------

Q12283：

老師，我由今年3月開始月供股票。供煤氣和港鐵各$2000

我明白月供股票是以長時間進行，而且優質股長期來說都是會升。

只是有感煤氣和港鐵現價很貴（特別是港鐵）。我應否調整一下月供金額？（如各$1000或各$1500），將供少左的錢儲起，待股價回返至合理時分注購入？

龔成老師：

煤氣（0003）現時處略貴水平，而港鐵（0066）則在合理區上部，不過你以月供模式進入，唔需要理會太多，因為這本身是一個長期入市模式，可以將你的買入價平均。

如果你每月只能儲$4000，而將所有資金都用作用供，就減金額。

但如果你每月儲到一定的資金，只將一部分，即$4000去月供，咁樣就唔需要減少金額。

------------------------------------------------

Q12284：

龔sir，如果我有意買樓，是否不應投資太多落股票？

龔成老師：

對呀，因為當你買樓時，就需要現金，如果你本身先足夠現金，就要賣出股票，但無人知你賣出時，股市情況如何，因此，如果你想在中短期買樓，資金就唔能大多進入買股票。

我地買股票，就是持有企業，企業增長要時間，就算優質股都要長期先可以增值，而中短期只受外圍因素影響，而無人知你要買樓時當時的市況如何。

------------------------------------------------

Q12285：

老師點睇雅生活3319? NBV RMB4個幾 P/E 23陪 但業績同整個行業都有不錯的發展學間

龔成老師：

雅生活（3319）不錯的，佢無論在業務本質、規模、品牌、財務數據、前景，都是理想的，反映這企業有一定的質素。加上這企業的背景因素，以及行業的發展，相信這企業的前景不差，有長線投資的價值。

這企業的發展快速，可說是有危有機，雖然可帶動業務快速增長，同時會令企業造成風險，你要明白這點。

我相信雅生活長遠能保持中速增長，現時估值在合理區較上部，分注投資都可以。

------------------------------------------------

Q12286：

老師你好呀，關於投資方向的問題想問下你意見架。

今年30歲，現月入連兼職約3萬。下個月將會到外地工作進修一年。想係離港前先處理好財政上既安排。
期間依年唔會有額外支出，外地收入同用錢應該會balance。

一向投資都非常保守，只係會做銀行定期﹑買ibond同儲蓄保險，但最近開始有回港後置業諗法覺得應該要進取多d。

現有資產如下﹕
1) 0003 (11000股) $16時入
2) 10萬5年期定息儲蓄保險 (2023年中完)
3) 已供完10萬儲蓄保險 (唔打算拎番錢由佢自己滾息)
4) 定期50萬 (快將完結)
5) 流動資金55萬

平時因為唔多時間可以股票市場買賣，考慮緊係唔係應該以月供模式買股票呢？
同埋分配應該點好呢？謝謝。

龔成老師：

你30歲，仍是財富增值的黃金時期，如果你偏向保守，可以利用低風險的模式進行財富累積，月供股票就是其中之一。

你可以月供盈富（2800）$4000、港鐵（0066）$2000、金沙（1928）$2000、恆基（0012）$2000，合共供$10000。長期進行。如果資金許可，就加大金額。

至於儲蓄保險不用改變，但就唔需要再買更多。

至於你持有的煤氣（0003），這是優質股，但你太集中持有這股，會有集中風險。我地進行理財，是建立一個平衡、有質素的組合，長線投資。其實你可以減部分煤氣，轉到盈富。

------------------------------------------------

Q12287：

你好，我現有一物業 想做轉按趕尾班車 應唔應該加按？
而家供剩25年 貸款額大約250萬 加按到盡可借380萬 年期應做返25年定30年？

龔成老師：

加按有利有弊的。

首先，加按的原理是加大借貸，你的總負債會因此而增加，你的風險會增加。

你要視乎你的年齡，及風險承受能力，去決定是否加按。

另外，加按要比利息的，如果你的投資回報率大過按揭的利率，就能賺取息差，不過，你都要分析「賺息蝕價」發生的機會率。

現時的收息股，算是合理區至合理區較上部，因此，投資值博率算是中等，但未算高。你可以視乎你可承受風險程度，去決定是否加按，如果加按，就做30年。

------------------------------------------------

Q12288：

你好 龔sir，首先很感謝你分享自己的過去投資經驗和將所學到的智識無私分享，本人還算是初職在金融界打滾，但感到工作乏味，而自己有興趣投資以達至財務自由，有一天希望不為金錢而工作。本人已開始閱讀你的書藉，想明年參加你的股票班。

想你解答關於自己背景的問題：

1. 媽媽現為自僱人士打算3年後退休 想一個月有穩定收息收入 現有大約55%為現金 而證券有18% 其餘為外幣 退休後一個月想有大概3-4千蚊收息回報

今天去了銀行詢問關於延期年金 分為保證金額和非保證金額（非保證金額的的利率現為3.5%）。

但這計劃首5年要付7萬元(total 35萬)和直至第8年才是break-even. 了解後，媽媽認為這計劃能帶給她退休後一年約二萬元回報。

但本人覺得回報率並不可觀，還是將這35萬投資於收息股較好？如果是，以媽媽的年紀 是否可全月供收息股（e.g. 66, 405, 823）以達至目標？

2. 本人踏入職場一年後已開始月供基金 現回報率有10% ，但由於將成為人妻，已暫停供款。婚後敝除開支 二人一個月大概可儲蓄2萬元。

請問應該月供股票還是繼續供基金好 若投資股票 還是待股價跌到便宜至合理區才以一手手成交。心水股票是以壟斷公司為主。

3. 本人也對英國房地產有興趣 由於小兩口已在香港有自住物業 由於香港樓價過高 有想過希望可以在英國置業再租出去以賺取租金，但過山買牛涉及風險還是直接買UK REITs較好?

感謝你花時間解答本人的問題！
羨慕你現在所做的是自己喜悅的！

龔成老師：

1）年金有利有弊，好處是穩定的現金流，風險低，弱點是回報不高。

如果你媽能承受少少風險，可以建立一個收息股的組合（當然，同時要留有一定的現金），目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、必瘦站（1830）、互太紡織（1382）等（記住，股價略波動，不能太過大注）。

當然，亦可以建立一個平衡的財富組合，部分投資低風險產品，部分持有現金，部分建立收息股。

2）月供股票會比較好，因為管理費會比一般的基金低。你可以月供盈富（2800），以及幾隻有質素的股票，如恆基（0012）、港鐵（0066）等。

只要你每月保持月供股票，同時留有現金等機會投資就得。

3）外國樓都有投資價值，但一定要仔細分析。關鍵位是你熟識的程度，你要對當地的發展，物業市場，租務結構，城市發展，法規有所認識，之後先可以考慮。

同時，你要分析租金回報率是否吸引。

------------------------------------------------

Q12289：

你好，龔成老師！最近想幫父母 （56歲）繼續儲退休後金又可以收息，月供股票比較好嗎？

大概每月可儲$5000。應該$3000做月供，$2000 現金儲蓄？謝謝！！

龔成老師：

月供股票是一個好方法，因為可以平衡買入價的風險。

$3000月供，$2000儲現金，可以。

你可以考慮一半供盈富（2800），一半就供一些收息股，慢慢為退休做準備。

------------------------------------------------

Q12290：

龔成老師你好，想請教你2799 1339可否長期持有 ?
謝謝

龔成老師：

中國華融（2799）的風險會較高，佢本身業務比較波動，盈利不穩，投資價值算是中等，你要分析自己的風險承受能力。

中國人民保險集團（1339）質素不差的，佢的業務有財產保險，包括機動車輛險、企業財產保險、農險、責任險、貨運險等，另外亦有做人壽保險：包括傳統型人身險、分紅型壽險、萬能型壽險及意外傷害和短期健康險。

但由於財險部分的賺錢能力不算好強，而這企業近年的盈利有點波動，增長亦不明白，因此投資價值又未去到最高。

現時的市盈率好低，就是反映上述的情況，因此這個低市盈率並不是特別平宜，只是合理。這股可以長線投資。

------------------------------------------------

Q12291：

龔成sir:想問下點看2180這新股

龔成老師：

萬寶盛華（2180）業務都幾特別，佢係中國內地、香港、澳門及台灣，做人力資源解決方案供應商，業務都有獨特性，但卻不是必需品，同時會有潛在的波動風險。

加上我一向對新股、半新股有保留，因此這刻的值博率只屬一般，你小注投資都可以。

------------------------------------------------

Q12292：

我想問 你覺得用預測盈利估值會唔會好d?
對增長股

龔成老師：

當我地進行企業估值時，一定會考慮將來的情況，除了考慮過往的盈利情況外，亦要分析「前景」，所以，預測盈利是其中一個分析工具，可以作為輔助的性質。

------------------------------------------------

Q12293：

龔成sir.你好，因上年8月開始接觸你才開始買股票，然後又買了你幾本書看，對於我理財方面有不少啟發

1年後，現時投資組合如下
003 煤氣 2100股 @15.45入
1928金沙800股 @36.45入
006電能500股@55.6入
1212利福500股@11.06入
1848中國飛機租賃1500股@8.46入
3918金界4000股10.025入
215和記4000股 3.3入

對於以上組合，有幾個問題想請教

1.老師，我和記係高位3.3買入，覺得自己做錯決定，為左賺息蝕價，依家計埋收到既息，帳面蝕左2千幾近三千，我見和記平時無咩息收，我依家係應該忍痛蝕放買入其他，定趁佢低位再溝貨定係可以守住長期持有？

2.以上投資組合既比列合適嗎？買入的價位算是合理價嗎？

3.金界我約10蚊購入，見住佢上左11.4無放，但之後又跌到9蚊，因係投資新手，個心都有d慌，不過我相信這股有潛力，想問此股合理價是多少？
當再下跌時，我是否應再增持？

4.買股票約一年，現在股票帳面約賺1萬，期間收左約5，6千蚊息，但有點覺得回報好像不算高，請問要如何增加回報率，以上組合應加些什麼股票比較好？

5.最近有留意必瘦站這股票，但最近升左唔少，請問咩價位可以入？這股值得投資嗎？

6.本人快30歲，月入約24k，最終目標想每月有20000元被動現金收入，第一階段目標想5年內儲蓄到100萬。

現時卻只有10萬現金和16萬股票，請問老師有什麼建議助我盡快達成目標？

謝謝老師解答，靜候回覆

龔成老師：

1）和記電訊香港（0215）因為派特別股息，所以股價會自然地減翻$0.83，同埋之前較多人貪高息，所以股價推高左，現時翻到較合理水平。

預佢之後只是平穩型，增長力不強，股價會慢慢上翻D，有貨都可以暫時持有先，不過就只能當收息股（之後不會有特別股息，會變翻正常的股息）。

所以，這股不是無質素，但如果要價位上翻去，就可能要耐性點，第一，企業派出了這筆大額現金，因此好難上翻$3以上，這是正常的反映。

第二，企業是平穩型，就算要上翻$2.5，其實都要較長時間。

所以，你可以根據這個基礎，決定自己是否想持有。

2）其實都是有質素的，買入價除和記外，都處於合理水平，你可以長線持有，持有的比例亦無問題。

3）你唔需要理會中短期的股價波動，因為根本無可能捉到，你買入價合理，長線持有就得，這股如你持貨不過多，可加小小。

4）你唔需要太著重中短期的股價表現。

另外，你要增加股票知識，先可以提高長期回報，你要學習選股持巧，比市場早一步找到優質、潛力股，另外，要有企業質素評價，企業估值的能力。

5）這股有質素的，現價仍算是合理區，不過就無之前咁平，只要投資金額不過大，這股可投資。

6）當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

------------------------------------------------

Q12294：

想問下呀Sir，你話過IPO最好唔好抽，因為怕佢會做數，但係如果一d股票。

例如阿里巴巴，本身美國上左市，但係香港未，咁我地係咪可以利用美國上市既數據分析值唔值得抽？

龔成老師：

對，你可以利用美國的數據，加以分析，當佢以香港作為第二市場上市，我地可以分析的數據較多，較量掌握到企業的情況，因此有機會是買得過的。

但你都要留意，上市公司一定會想以較貴的價錢賣比你，這是一能避免的情況。

------------------------------------------------

Q12295：

你好，請問新手投資，資本唔多，應該作咩類型投資？

龔成老師：

首先，投資一定要投資優質股，同時要長線持有。

當然，優質股都可以分好多類，如潛力股、平穩增值股、收息股，對新手來說，最好就是投資平穩增值股，如盈富（2800）、港鐵（0066）、金沙（1928）、恆基（0012）、中銀香港（2388），如你不懂分析，就投資盈富。

另外，由於你未有掌握投資時機、平貴的能力，因此最好用分注投資的方法，例如月供股票。同時要留有現金，不要一次過用盡。

------------------------------------------------

Q12296：

老師，月供或每次買，其實費用邊樣貴？
樣買2800咩位入好？

龔成老師：

月供有可能貴少少的，但都要睇你邊間銀行，以及你的金額如何。

當你每次的投入金額少，而佢又要收你最低佣金，你月供就可能會較高成本。不過，月供的好處就是平均買入價，減少你的風險，避免一次過在高位買入。

所以，策略上最好是月供盈富（2800），長期進行，但都要你先了解不同銀行的收費。

------------------------------------------------

Q12297：

你好 龔成老師！一直有follow開你的page 對你十分敬佩！

我今日25歲 家人留了一伙已補地價 約500萬的居屋給我 沒有多少現金 我在計劃把物業賣掉 用來砌一個股票組合 再租樓住 請問可行嗎？

組合方面希望係30%增長型 70%收息 合理嗎？
謝謝你

龔成老師：

如果你只有一層物業，我會建議你持有這物業，因為你賣出後，無人知道你買唔買得翻，如果最後你要用更高的價，去解決日後你「住」的問題，其實有問題。

你可以考慮加按套現，同樣有資金去投資，而你持有的物業就仍在，這會更好。

你可以投資3成增長，7成收息，這是可以的組合，只要你分注買入，同時要留有現金等機會。

當然，如果你投資股票很有實力，而這刻股市又處平宜的水平，考慮賣出物業，再建立股票組合，都可以的，但坦白講，這不是首選。如果到時出現這機會，你買入的就不是3成增長，7成收息，而是6成增長，4成收息。

------------------------------------------------

Q12298：

老師，我一有cash就想買股票賺錢，基本上用晒所有cash，我是否有點病態？

龔成老師：

這反映你投資太過心急，好想達到某些目標，又或好心急想將財富滾大。

在投資上，這不是一個正確的方法，雖然我地都想將財富增值，但心急並不是理性的做法，如果你用盡現金，但股市下跌，你就無現金把握機會。

因此，我地在不斷投資的同時，都要留有一定的現金，目的是等機會，令財富變得更大。

建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q12299：

HI 龔成 我本身已經月供5000落823 3000落003同有3手435

近排想再入1手778 其實係咪唔應該集中哂reits？

定將個舊錢投資其他板塊？

龔成老師：

你唔應該將資金，太過集中在同一版塊，如果這版塊已經超過你股票組合比例的3成，就是過多，你應該調整翻。

我地進行投資，其實是建立一個平衡的組合，當中要做好配置。

------------------------------------------------

Q12300：

你好啊龔成老師！本人三十歲，沒有任何投資經驗，近日終於’的起心肝’想要學投資理財，上網睇左你既專欄，覺得你既分析好獨到，衷心希望老師能夠解答我幾個問題。

1. 本人五年前開始供緊基金，每月供$3500，為期二十五年。因為本人既洗費比較大，而且屋企負債既關係，加上當時無任何投資理財既知識，諗住用呢個方法強迫自己儲錢，係最簡單快捷既方法。

現時儲到大概$24萬，不過有$12萬係綁死左。想請問呢一個基金一直供落去直至五十歲時多一筆錢備用好？抑或應該將可動用既$12萬拎出黎投資股票？

2. 屋企既負債尚欠一年，但本人計劃現在開始月供股票。現時我可以儲既現金一年內每月$5000，之後兩年每月應該可增至$10000。

再分注買入平穩增值股每月平均能夠儲到$10000-$12000，想暫時用$7000做月供: $3000盈富 $2000銀娛 $2000比亞迪。平穩增值加上潛力股。

到一年後債務清理好之後，每月應該可以多出$8000，到時再加$4000-6000去供。

另外既錢就儲現金，希望呢段時間可以增加對股票既認識，再等跌市時分注買入。

3.三年內可以儲到八十萬嘛？

龔成老師：

1）你以這方法逼自己儲錢，作為累積財富的方法，可行的。

至於這刻是否將部分取出，首先，要睇翻該基金的質素，你可以睇翻過往的平均回報，如果有10%已是不錯，如果連5%都無，就不如轉其他。

另外，就是睇你的投資能力，如果你未有太高的投資能力，有可能將錢留在該基金，長遠的回報會更好。

2）基本上計劃可以，但我希望你手上，點都要有現金。現金除了可做備用外，亦可以「等投資機會」，因為這刻的大市只是合理，我地唔可以將全部現金都投入成股票，一定要餘下一些現金。即是說，你先要有現金在手，先好開始月供，之後就一邊月供，一邊儲現金。

因些，你上述的選股、月供、分配，都可以，但要先留一些現金。而之後再加加月供金額，其實無問題，但同樣要先留現金。

3）暫時睇，要3年內在$80萬，未必能完成到。

但你可以加大每月儲蓄，同時善用餘下的現金把握機會，例如早市場一步找到潛力股，同時要配合適當時機，先有機會做到。

----------------------------------------------

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

Bowtie 人壽保 — 定期壽險計劃
https://ad.doubleclick.net/ddm/clk/477356382;283533346;r
影片的內容僅屬個人意見

遇上黑天鵝?香港樓?賣唔賣好？移民??打仗?制裁?国安?‍♀️經濟寒冬？失業潮？

▶ 加入我們的patreon｜https://www.patreon.com/cocogor

【如果喜歡這條影片，記得給我Like & 訂閲我的頻道 】
https://www.youtube.com/c/cocogor?sub_confirmation=1
?Instagram｜https://www.instagram.com/officialcocogor/
?Facebook｜https://www.facebook.com/officialcocogor/
▄▄▄▄▄▄▄⭐️ 精選影片⭐️ ▄▄▄▄▄▄▄▄
?人民幣?賺得到！你洗唔洗得到？帶大家睇下我賣左間中山樓?
https://youtu.be/qJ-twwgcxTI
?封關?都賣到大陸樓⁉️又走得甩?大灣區超速師?沽貨保平安?數字人民幣前最後機會
https://youtu.be/QHyhn4yABzE
?沽貨保平安?賣大陸樓 走資?提款?一齊睇?大灣區
https://youtu.be/mIj-TXSnBLU
?中國經濟神話破滅 賣樓 走資 提款 換美金
https://youtu.be/TzWJBsaPgqc