三狼奇案 #梁家輝 #tonyleung #hkig #young #love #movie #香港電影 #90年代

三狼奇案 #梁家輝 #tonyleung #徐錦江 #hkig #young #love #movie #香港電影 #80年代

* 《藍天白雲》影評 「奇案的顛覆 人文的關懷」 (含劇透慎讀，但應該知套戲講咩啩?) (未睇都幫手LIKE/SHARE/BOOKMARK吖) — 奇案電影素來都係我最鍾意嘅類型片之一，呢類電影大多標榜極盡變態之能事，偶撒鹽花，揉合血腥驚慄張狂等等元素，《人肉叉燒包》同《三五成群》就係廣為人知嘅兩套代表作品，八九十年代此類作品如雨後春筍，什麼《吸血貴利王》、《三狼奇案》、《溶屍奇案》、《四人幫之錢唔夠洗》、《喪盡天良》、《滅門慘案》等等，成為了好些觀眾（或說是我）很希望獵奇的作品，而《藍天白雲》亦唔例外，係少女少男殺害雙親嘅一單「奇案」。 — 不難理解點解作品會有如此兩極嘅評價，我曾經試過睇完一套好精彩嘅電影，觀影過後與同行友人想分享自己慷慨激昂嘅見解，但被友人捷足先登反客為主：「好悶呀！」然後我和應，「係呀，又無爆炸，又無結局。」 — 我諗，《藍天白雲》唔係一套你可以睇到「結局」嘅電影，你唔會知道果一男一女究竟最後會坐幾多年，你唔會知道李任燊同鄧麗欣可唔可以快樂咁生活落去，最重要嘅係，你唔會知道佢哋嘅BB究竟會係咩樣，而呢啲嘢你喺《溏心風暴》入面通通都會比到你。 — 「無結局嘅戲，咁多留白嘅戲，咁睇嚟做咩呢？」我諗呢個講法某程度反映到香港教育或社會價值觀嘅悲哀，每個人追求嘅嘢，都只係件事最後嘅結果，而無諗過過程可以為你帶嚟啲乜嘢嘅意義。《藍天白雲》嘅意義絕對唔係在於製造個話題出嚟比我哋討論吓果對父母究竟抵唔抵死，而少男少女又係唔係惡魔，係咪變態，套戲值得討論嘅地方絕對遠超於「有無爆炸有無肢解」。 — 唔講故事，單係作品嘗試使用嘅技藝已經值得大家入場睇呢套戲。例如大膽嘅鏡頭運用，你幾時會見到套戲影人係會影到一忽一忽，會比畫面上嘅唔同物品遮住佢哋個靚樣？你幾時會見到一套電影嘅鏡頭唔係跟住角色去行，而係定鏡咁拍，一時見到個人一時見唔到？你有幾可見到導演拍人嘅時候，佢想拍嘅果個人唔係喺畫面正中間，而係縮咗去角落頭？你幾時見到啲主角嘅大小係細到粒蟻咁，用好多遠鏡影景多過影人？又或者唔講鏡頭，你又有無睇過套戲幾乎無任何音樂襯托，無做乜嘢特別嘅聲效，只係將現場嘅雜聲收入電影？ — 張經緯導演試圖喺不同嘅電影語言上去做顛覆，而呢種顛覆又係恰到好處。遠鏡、比嘢遮住，甚至連人都睇唔到，當然係要營造貫串整套電影蒼白而無力嘅疏離感，但我諗更重要嘅嘢係，人唔一定要作為劇情電影嘅主角，一定要喺鎂光燈下，電影拍嘅係一個又一個「平凡」嘅人。 — 奇案電影拍平凡人？咁樣咪無咗奇案電影最大嘅吸引力囉？呢樣嘢我推斷會係電影未來公映之後比人鬧得最勁嘅地方。因為大部份觀眾可能入場係睇一個不肖女點樣殘殺自己嘅父母，從而滿足一啲自己喺現實上無辦法接觸到嘅「慾望」。 — 而張導就係喺類型上嘗試繼續再做顛覆，邊個話奇案片一定要有猥瑣變態嘅殺人犯架？（對比《踏血尋梅》，白只造型算係滿足到大眾對殺人犯嘅期望，但今次係俊男美女喎。），整套電影嘅情節就帶領觀眾進入咗一條"DEBUNKING"(拆解)嘅道路。 — 例如我哋好容易會以為顧定軒同梁雍婷係比人打壓拍拖，然後起殺機。但原來佢哋甚至稱唔上係「男女朋友」關係；例如我哋好容易以為先殺爸爸，後殺媽媽，然後分階段處理屍體係經過精心策劃嘅變態陰謀，但原來只係攰，只係條屍臭咗要即刻處理；例如你以為女主角係比人性侵先起殺機，點知佢老豆仲驚佢凍親，叫佢著多件衫；又例如男女主角去咗青年旅舍度住，以為佢哋要遠走高飛，但原來佢哋只係想度幾日假，無諗過要走。甚至我唔敢講最後梁可麗點解會喊，係咪又係顛覆，覺得自己終於有勇氣落到手？ — 不斷將常識同認知翻轉再翻轉，最後成就咗《藍天白雲》，成套戲我最深刻印象嘅一場戲係，梁雍婷同佢爸爸見社工，表面上佢爸爸係一個好有活力嘅中年人（幾靚仔），支持啲學生打排球（實際大家知道背後含意），但當爸爸知道自己個女偷嘢之後就發曬癲成個野獸咁，然後輪到個女發癲制止爸爸。呢一幕我完全睇到流眼淚，因為當雍婷好討厭佢爸爸，但不知不覺佢都變成咗做佢爸爸嘅果類人，控制唔到自己嘅情緒同慾望，又係幾多家庭嘅寫照。 — 亦有論者話套戲無咩故事，根本解釋唔到點解件事會「發生」，而我確信導演已經將會導致呢件事發生中最重要嘅元素都交代清楚，選擇唔交代嘅都只會係旁枝。「係咁架喇，好出奇吖？」可能有陣時我哋比所謂MELODRAMA洗腦太多，覺得某啲激進行為背後一定有發生過啲驚天動地嘅事，但現實話比你聽，其實唔需要。 — 仲係唔明？再講白啲。睇戲果陣，我一直以為《藍天白雲》的靈感來自2013年的一單倫常慘案：//元朗八鄉一名18歲的中菲混血兒，夢想成為漫畫中無父無母的「華英雄」，昨日凌晨相約19歲舊同學在寓所打機時，因被母親斥責，盛怒下竟與同學組成「殺手二人組」，各持切肉刀斬殺雙親，造成父死母重傷。這是大角嘴揭發弒父母碎屍案20小時內，再發生的翻版倫常慘劇// — 無錯，殺曬自己老豆老母，因為打機咋，夠說服力未？即使你係主角，喺鏡頭裡也可能只係一顆微塵，但每個人都有被照顧同被愛嘅需要，帶過一個人去一次海洋公園，甚至件事連你自己都唔記得，就足夠一個人惦記一生。 — 哪電影是否繼續一念無明，完全無出路呢？有些關係無可挽回，有些關係仍未開始。點解要安排鄧麗欣係大肚嘅呢?有生命就有希望，唔好放棄。