［冷氣企管系列］國泰唔還優先股股息，會唔會爆煲？（圖：經濟日報，國泰航空第二度拖欠政府優先股股息（https://bit.ly/3fRqDVB））

1. 事忙，昨晚寫Patreon都六點先瞓，起身又見工（！）。「你都仲搵工？」。我冇搵工，但有人搵我。當然我唔係扮晒嘢話咩「人地咁有誠意咪應酬下佢」，幾有趣嘅role，但搞得掂先再諗。

2. 亦係我在我本書都有提，maximize your options．你揀人好過人揀你。唔知份工做唔做好？見咗先（前題係你可以鼠出去見工，或者在公司後樓梯zoom）。到人地出offer畀你你先慢慢諗。當然我呢啲講法，係HR同埋公司CEO嘅眼中釘。但我唔係為佢地服務，係為讀者服務嘛。對不？「所以我仲會教你返工搞自己嘢，好似你而家睇緊呢篇文咁」。大逆不道？理由同上。況且，公司炒你嗰時幾時會同你講感情？

＝＝＝＝＝＝＝＝＝＝＝＝＝＝
一週年！月頭訂最抵！比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，已經1900人訂！ 畀年費仲有85折，20/40年費VIP 送本人著作一本。
＝＝＝＝＝＝＝＝＝＝＝＝＝＝

3. TLDR：冇得飛，邊有錢畀？而有得畀都唔會畀住。反正唔會罰息唔會起釘唔會有得清盤。又，到底你知唔知咩叫「優先股」？有得派息你咪優先過普通股293啲友，但冇得派嘅，一樣係冇。正如你鑽石菠蘿優先上機，當然可以打人尖—但架機唔嚟你都不能衝出跑道嘛。

4. 但講返，今日嘅主菜係國泰。大家知，「拖數」，爭政府嘅優先股股息。當然你睇啲評論，全部都係先有立場再塞啲嘢落去。

5. 好簡單，個講法當然係國泰好唔掂（而家先知？冇得飛可以點掂？），拖政府錢。「會唔會畀人起釘罰息清盤架？」。又或者話違約呀，政府啲錢掉晒落鹹水海，做咗傻仔呀咁。

6. 有立場唔緊要，問題啲嘢仲要係錯嘅，fit story into narrative，係我過去十幾年返工做嘅嘢。但都唔該專業少少嘛

7. 講真，成件事合理之極，一早估到。唔係馬後炮。點解一早估到？因為上一次都已經冇畀啦！你剛剛偷渡落嚟？咁上次爆咗煲未？清咗盤未？至於股價影響？零。上次仲要有得升添。我知股價「勁跌」1.5%，咁你堅持係受呢單嘢影響，隨你。不過可口可樂在C朗唔飲後就股價反彈。

8. 好啦，香港地，真係街市師奶都識講引伸波幅，我冇見過一個地方咁高水平。但同樣地，其實，大家知唔知咩叫「優先股」？你唔使好波過美斯先可以講美斯，但至少你應該識英文先可以評莎士比亞下話？

9. 當你乜都唔識，望文生義，其實都唔難。優先，唔等於包生仔嘛。優先登機，都要你隻機嚟咗先有得登嘛。有得派息的話，你咪優先過買普通股293嘅人，但冇派息你咪冇，有幾難明？包有得派息嘅叫債券。我知，總有啲人要拗，咩呀，債券都可以違約。當然可以，但債券唔派息係有後果的，就真係違約，分分鐘可以清你盤。但優先股唔派息？近乎冇後果（唔係完全冇，陣間講）

10. 同樣，優先股嘅，大吉利事公司清盤嘅，賣餐車賣制服之類，你咪優先過啲普通股293股東拎錢—但當然後過債權人，即係銀行呀，恭應湘呀之類。

11. 唔望文生莪呢？咁你唔識Google，唔識英文，應該都識中文架可（雖然我發現越嚟越多文盲上網）。咁你咪睇下原本約嘢，「合約精神」嘛（＊），我唔懂事基本上都白紙黑字（https://bit.ly/3lMzLPd）

12. 合約寫明，延遲派優先股股息，「可以因為任何原因」—細心諗下，「可以因為任何原因」，亦即係「唔使任何原因」。近乎冇任何懲罰，唔會違約，冇得清盤，冇得告，唔會罰息唔會起釘。

13. 但係咪全無後果？又唔係。簡單嚟講，舊數未清新數免問。你優先股股息可以拖，但不能走數（破產都要走，不過係找咗其他債主先），一路積上去，雖然唔使額外罰息。

14. 仲有，只要你仲拖欠一個仙嘅優先股股息，你公司就不能派息，亦不能回購股份，亦不能贖回其他債務。唔係咩叫「優先」？呢個亦係好重要嘅考慮，例如呢個情況，優先股股東係政府，不能公帑借錢/入股畀你，然後你拎去派息或回購，益咗高層或其他基金之類。同樣地，亦不能係我公帑借錢畀你，你就用舊錢去贖其他債。（實務上，就睇啲seniority，係咪Pari passu之類。講句拉丁文即時好撚型）（＊＊）　

15. 另外，延遲派優先股息，好合理。首先冇咁嘅能力，都冇得飛，派條毛？況且，就算有，國泰亦都冇意慾去畀。正如有錢還都可以唔還，「你都試過借錢畀人，然後個朋友一年去幾次日本，但話冇錢還畀你」

16. 因為，反正冇罰息，咁仲乜要咁早還？頭先講話冇得派息冇得回購，但咁情況，冇優先股都唔會諗呢啲嘢啦。所以梗係拖住先。

17. 記住啦，踢波嘅嘢，根本好簡單。前面入多啲波，後面唔好失波。正經，做生意嘅嘢，我都講過，其實唔難，Buy low sell high collect early pay late avoid tax．「你MBA畀百萬學費都係學呢啲咋」

18. 仲有，都係文件有講。頭3年，優先股息係3厘。高定低任你講，但肯定係，頭3年都係咁嘅息，我做乜要1年就畀？（睇多次上面句金句）。冇錯，之後加上去，第四年5厘，第五年7厘。第六年開始9厘息。

19. 呢個設計，固然係會令國泰唔會好快還，但亦「迫」佢唔好一路唔贖。好簡單，去到第6年，捱9厘息—我估到時公司出面發債都唔使9厘啦，咁我出面借錢，然後贖咗啲優先股咪得（當然找埋啲未找嘅息）。呢個設計就係等國泰唔好無了期咁爭住舊錢

20. 呢個時勢，幫政府講好嘢真係等於自殺，我亦唔會做打手，又唔係有錢收，況且我個良心都好大。但真係要講，傾呢堆terms嘅人，或者出面幫手搞嘅金融撚，都至少有用過下腦。唔會係啲terms搵鳩政府笨益晒國泰。咁固然係街外啲金融撚法律撚搞，但至少呀邊個（劏房波？）都要過下目。啲terms係合理嘅，襟蚊business practice

21. 你特別見到，啲設計點樣去畀唔同嘅誘因，encourage 或discourage 你做不同嘅嘢。例如要找咗優先股先，等你冇得回購益高層或出面基金（美國啲公司之前畀人鬧到七彩）。例如第6年要9厘息，近乎係「迫」你贖返佢。全部都有佢嘅原因

22. 好多商業問題，都係principal agency 問題（唔知中文叫乜，我都係譯做「Meg Ryan除衫問題」—如果套戲（In the cut）咁好，點解Nicole Kidman自己唔去除衫，要老點朋友？）

23. 呢個亦係我本書講嘅嘢，唔同遊戲有唔同規則，從而去限制或鼓勵你做唔同嘅嘢。讀書係咁，打工係咁，甚至溝女，投資都係咁。不過有啲規則寫得明，有啲遊戲易玩。有啲遊戲係「潛規則」（唔係指嗰啲潛規則，但亦包括嗰啲潛規則），冇人話你知。對我嚟講讀書遊戲易玩，規則簡單明確，話明你知。但其他遊戲就靠你自己摸，因為設局嗰個都未必話到你知。

（＊）見一次屌一次，係香港（定大中華？）地區先有「尊重合約精神」呢啲咁撚搞笑嘅講法。我冇見任何鬼媒會咁講。合約「精神」唔使你「尊重」的，你唔守咪上法庭，十分簡單。

（＊＊）話說我朋友做airline，都幾大粒，有次同佢一齊坐啲平價飛，「士大夫飛」或稱「乞兒飛」，就真係去到機場望天打掛，要望有人no show。呢啲飛當然在食物鏈低層，但最好笑係好似十三張咁，有晒唔同排位，畀錢嘅客當然最先，乜乜白金會員更先。然後去到乞兒飛都仲有高級乞兒同低級乞兒，例如前面嗰個係老臣子 CXO，你係入職半年嘅小薯，咁得一個位，你估邊個上先？完全係一條歧視鏈。好難受呀？「咁你畀錢買張飛」，就好似橋牌trump卡咁，一張平價econ Trump死人地隻紅心A（當然實際上可以好多其他安排，舉例啫）

＝＝＝＝＝＝＝＝＝＝＝＝＝＝
一週年！月頭訂最抵！比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，已經1900人訂！ 畀年費仲有85折，20/40年費VIP 送本人著作一本。
＝＝＝＝＝＝＝＝＝＝＝＝＝＝

【龔成問答信箱】（Q21501-Q21520）

Q21501：

阿sir ，我每個月供～$25000 股票，3成收息股，3成穩健增長股，4成新經濟股，供了4個月都只係賺得5%，冇20%，距離我目標仍好遠，會唔會出了什麼配置問題？

龔成老師：

第一，你要睇長期，不是短期。

第二，股神巴菲特一年的平均回報是20%，要思考目標的可行性。

第三，月供股票的回報不及自行投資，但好處是風險低，你要睇翻自己的風險承受能力，以及投資實力，決定每月月供的比例，留現金等投資機會的比例。

我地投資，一定要「先想風險，後想回報」。

------------------------------------------------

Q21502：

老師，我正溫緊書，想請教房託類市帳率為何過住10 年數據都咁穩定？

自己係第4 堂note p.92寫左上高句野，想知多少少

龔成老師︰

首先，你要回憶翻何謂市帳率。就係"市價" / "帳面值"

房托主要係透過旗下物業放租，租金就係佢地收入主要來源。房托企業很少作額外發展，故帳面帳變化較細。

而且租金收入，一般都穏定，市場預其佢收入唔會有太大增長，因此市價都唔會太波動。

所以，整體你會見房託類的市帳率，波動好細。

------------------------------------------------

Q21503：

龔sir, 你好，睇完你本書《50股》，真係明白好多，又容易理解

但我都想請教，由於資金有限，只可以從書中3選1
@0916 （依家就似你書中所講過熱投資）
@0868 （價格冇點變動，但利好）
@0968（現價格好似適中，但利淡）

另外仲有：
@1250
@3818 係睇其他報導
謝謝！

龔成老師：

北控清潔能源集團（1250）、中國動向（3818）質素唔算高，你選翻上述的3股，長線投資的價值會更高。

上述3股，你都可以考慮，信義玻璃（0868）最穩健。

這股有質素，仍有增長力。

當然，近年股價上升了不少，股價是唯一的風險，業務則仍是長期睇好，市場長遠發展正面。

現價大約在合理區頂，如投資，這刻唔建議大注。

另外，龍源電力（0916）都可考慮，有質素，這股有長線投資的價值。

佢係中國發展風力發電業務，收入大部分來自銷售風電場及火電廠所發的電力，而有關電力銷售主要倚賴淨售電量及上網電價。

旗下客戶為風電場及火電廠連網的各地方電網公司。

過往業務發展不差，生意與盈利保持增長，不過股價就有少少波動，現價合理區頂，但就要留意股價上落風險。這股可長線。

信義光能（0968）潛力度高，但風險都較高。

------------------------------------------------

Q21504：

老師你好，小弟開始計劃加入新經濟股，希望能解答疑難

（1）9618同9888長遠有增長力嗎？

（2）如果同時持有上邊2隻股得唔得？

（3）舊經濟股現時仲可以加注嗎？

（4）若持倉較少新經濟股，咁係咪應該加入新經濟股先？

（5）小弟睇好9618，9888，若加注3067，9618，9888作長期持有可以嗎？

龔成老師：

1）+2），有，兩隻都有投資價值，如果同時投資，可以。但由於類別有少少近，因此合共佔的比例不宜太多。

京東（9618）會較百度（9888）穩定，而百度的潛力度會較高。

京東業務有質素，發展仍是正面，不過現價就唔算平。

佢係一間電子商業銷售平台，佢定位為「以供應鏈為基礎的技術與服務企業」，現時是中國第二大電商，有一定的品牌。同時，根據《財富》按收入統計的全球500強排行榜，集團是中國最大的零售集團。

佢目前業務已涉及零售、數位科技、物流、技術服務、健康、保險、物流地產、雲計算、AI和海外等領域，其中核心業務為：零售、數位科技、物流、技術服務四大板塊。

京東已建立自己營運覆蓋全中國的物流基礎設施，以支持電商業務，打造了線上購物體驗，係2017年、2018年、2019年，活躍用戶數達到了2.9億、3.0億、3.6億。可見已建立了一個巨大的網絡。

佢經營線上零售，以及電商平台業務，線上零售業務方面，從供應商購買產品，然後直接銷售給客戶，並從24,000多家供應商採購商品。

佢的物流基礎設施佈局覆蓋了中國幾乎所有的區縣，包括遍佈89個城市、累計總建築面積約1,690萬平方米的700多個倉庫，包括京東物流技術開放平台所管理的倉庫面積。

從質素上，這股不差的，現價算是合理區中上部至頂，如果買，都可以，但要控制注碼。這股可以長線投資的。

3）可以，大部分相關股，現時在合理區內。

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

4）要睇你的年齡、風險程度，去設計長期的配置，去設計長期的配置比例。再根這個比例，去衡量現時加入那類股。

5）可以，但合共的比例，不能過多。

------------------------------------------------

Q21505：

老師你好~我今年年頭開左個網店 ,來緊下月會租格仔舖試下開舖既反應

其實我而家手頭上無太多現金流 , 主要都放哂係股票 , 有10萬左右 , 其實我想入多D貨 , 想問你意見 , 放左部分手頭上股票 ? ( 0388 , 01810 , 02800 )

還是以低息借貸去入貨做生意呢? 因為長遠會想租一間舖頭去做生意的, 我預10萬起步基金

另外，我有諗過借貸買股票 ( 一定唔係短炒 , 係長期 ) 等唔等於買樓做按揭 ?
感謝老師

龔成老師：

網店你要找到一個獨特的市場，做生意不要與其他人硬碰，要有自己的獨特性，你往往要不斷試先能找到市場的爆發點在那裡。你唔好太急去做太大生意，除非你確定市場正爆發中。

至於你現時的持貨，基本上無問題的，可長線。但留意，你要留翻多少少現金在手，不要零現金，否則當大跌市出現時你就無錢把握到機會。

借貸長線投資，等同於預支資金去買股，由於物業與股票的性質不同，因此股票會較物業一般風險較高，因為物業有穩定現金流，同時可抵押性一般較高，而股價上落的風險一般較大。

因此，這貸買股，風險會比物業高，除非大跌市令股價好平，好有值博率，否則，未必太建議。

------------------------------------------------

Q21506：

老師，我之前聽你建議我宜家每月都月供港鐵、領展、3067，亦都記得你話未來香港樓市升幅不會像前十年升得咁勁，所以諗住轉買車位投資。

我年尾會搬康城，請問你對康城車位有咩睇法？有投資價值嗎？大約要200萬每個車位。或者香港有冇其他地區嘅車位值得投資？ 多謝老師你嘅意見同時間先！

龔成老師：

先以住的角度分析，康城比之前好左，因為交通、配套開始足，加上九龍東的發展不斷，都利好了康城區。

而車位都會因為上述因素而加分，不過，潛力度始終不算好高，投資價值中等。

你要考慮當區及屋苑裡，住宅與車位的比例，以及租金回報率資料，先有具體的投資價值。

至於車位投資，其實現時的吸引力整體算是中等，不過已比之前好，之前車位貴，現時已由高位回落了兩成，投資價值好翻D。你可以留意一下大型，中產地區的屋苑車位。

------------------------------------------------

Q21507：

你好龔老師，最近我買左你嘅股票勝經呀，概念上慢慢改變緊嘅，希望一路吸收知識，好好理財。

另外我手頭有400股772，平均價係70.35，係咪應該要放左佢入其他更好嘅股票？

同埋我最近留意緊3067同2382，現價合理可分小注買入嗎？

龔成老師︰

閱文集團（0772）這類股，並不易分析的，因為佢的生意模式未完全穩定，可說是有危有機，這一定令業務的不確定性較大，同時市場對佢的估值變化亦較高。

集團從騰訊控股（0700）分拆上市，在中國運營網絡文學平台。業務包括在線閱讀、版權運營及紙質圖書業務。

業務發展是有的，但盈利變化大，未能好確實分析到這經營模式的賺錢能力。同時估值難分析，唔能夠確定這刻平貴，只可以話唔算特別平。

這股長遠應該都有發展力，但這刻就唔建太過大注。

如果這400股只係佔你組合不多，可以持有。但若佔較多，建議先沽出200股，去平衡翻個風險。

至於舜宇光學科技（2382）現價略貴，回1成左右才入，值博率會較高。

而安碩恒生科技（3067）算係合理區頂至略貴，你無貨，可以先階下先小注。到有較大回調，才正式入貨。

但留意你以上所講的，都是一些較有潛力股票。如果你本身投資經驗不多，投資取態較保守，或者你係偏向年長，我都唔好持有太多這類股票。

因為潛力股都有一定波動性，風險會係較高。

------------------------------------------------

Q21508：

老師 你好 我媽媽留左50萬俾我 我要保本，買定期 但利息小得厲害

我想分別買3-5隻收息股2 /133 /941 /1398 /2638/1373/3187/

你可以俾啲意見我嘛 你可以揀幾隻 俾我參考下嘛。

龔成老師︰

若你這筆資金，係以保本為主。定期利息雖少，但其實係一個適合選擇。

因為就算收息股波動性再低，畢竟佢係股票，股價波動係在所難免。

買不買收息股，要乎你媽媽承受風險能力。或者可建立一個組合，部分定期，有部分就收息股。

你上述收息股，都係有質素，除了招商局中國基金(0133) 多年出現虧損，不建議投資外。

你可以考慮用香港電訊（6823）、恆生（0011）、置富（0778）、陽光（0435）、深高速（0548)等去取締。

但留意3187, 0778, 0435同是地產類股票，同一行業不要大於組合30%，否則會出現過度集中風險。

現時大市只在合理區，你可以先用一半，分注入貨。餘下一半，就等大跌市才出手，咁會較好。

------------------------------------------------

Q21509：

長汽2333 如何呢？

吉利好還是長汽好？

長汽業績唔差，但又跌成咁，感謝龔sir。

龔成老師︰

長城汽車（2333）有質素的，業務都不差，不過，過往的增長力不算好強，長遠業務發展雖然正面，但未必是潛力型。這股都有長線投資價值。

過往佢股價偏貴，現在下跌只係將股價，回到一個較合理水平。質素上，唔見有明顯轉壞的情況。

現價算係合理區頂，可小注。

而吉利(0175)同樣質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。

另外，佢早前杭州灣新工廠正式發布純電動新品牌新車「極氪（ＺＥＥＫＲ）００１」，宣布吉利進軍高端電動車。

這些動作不單有利佢有中國發展，同時長遠，可能加快了海外發展速度。因此，這股長遠仍是正面的。

未來電動和智能車，將會係行業發展的大方向。這方面，吉利的質素會較長汽好，長線計，投資吉利會較有利。

吉利(0175)現時價位在合理區頂位，股價波動，暫時只宜小注都得。到有較大回調，才正式入貨，或現價月供都可以。

------------------------------------------------

Q21510：

3918
1909
3319
我對以上股票有興趣，應該挑選那一隻比較好？

龔成老師︰

金界控股（3918）有質素的，但始終新興市場，因此點都有風險。佢會因全球的疫情，而影響左生意，但這只是中短期。

長遠計，佢仍然正面，佢之前有項目獲當地政府批准發展5幢建築面積共逾580萬平方呎的物業，包括提供共4700個房間的酒店群、娛樂場所及公寓等。我相信長遠對佢仍正面。

這股股價較為波動，不過都有長線投資的價值，分注投資可以。另外由於市場新興，在注碼上不能投資得過多。

火岩控股（1909）有質素的。佢主要從事開發網頁遊戲及移動設備遊戲（包括遊戲設計、編程及圖像製作）以及授權全球各地的營運商營運集團自主開發的遊戲。

遊戲已在北美、日本、歐洲及中國營運。集團收入主要來自授權費及出售遊戲幣。

業務發展理想，生意與盈利都有理想的上升，賺錢能力強，基本上有投資價值，暫時睇，前景仍是正面的。

不過要留意兩大風險，第一，佢行業是一些變化較大的類別，無人知當中的優勢能持續多久，始終市場變化可以較大。

第二，股價上落大，現價合理區上部，投資值博率都有，但未算高。因此，如果要投資，就要控制注碼。

雅生活服務（3319）不錯的，佢無論在業務本質、規模、品牌、財務數據、前景，都是理想的，反映這企業有一定的質素。

加上這企業的背景因素，以及行業的發展，相信這企業的前景不差，有長線投資的價值。

整體是有長線投資價值的。現價合理，不過股價都會有時出現波動，投資宜分注進行。

以這刻值博率計，金界控股（3918）和雅生活服務（3319）會係相對較高。

但留意，以上3隻都係波動性較高股票，不宜佔組合過高比重。如果你投資經驗不足、年紀較年長、或者本身投資取態較保守，只宜好小注。

------------------------------------------------

Q21511：

老師 我呢排睇好多同比特幣有關聯既股份。雖然本人對比特幣信心唔係去到好大，但我覺得區塊鏈技術係未來好大機會普及。

你覺得1263，1611，0863，1499，1647 邊隻最有潛力，同埋現時可大注嗎?

另外想問你點睇美股隻SOS同CAN

龔成老師︰

無錯，區塊鏈技術係將來，預期會日漸普及。而比特幣，是利用區塊鏈的其中一項產物。

至於比特幣相關股份，如果你要投資，建議你要認研究企業細節和質素。唔好因為好比特幣，或者見比特幣走勢好，就去入貨。

栢能集團（1263），火幣科技（1611）、BC 科技（0863）都係有風險，有回報的類別。投資這類股係可以，但估值唔易，只能說，投資時一定要控制好注碼。

歐科雲鏈（1499）無特別研究，佢屬較高風險類，要睇下你博唔博。過往持續虧損，見佢股價上落好大。只可以話，唔建議大注，自己衡量風險。

雄岸科技（1647）主要於新加坡從事提供綜合樓宇服務，當中專注於維修及安裝機電系統，以及提供建築及建造工程服務。

此股規模細，賺錢能力唔算好強。在2020/03年度，核數師意見係"無保留意見（修定報告）"。雖然唔代表盤數一定有問題，但我自己保守D，會對佢有所保留。

Sos Ltd（SOS）主要業務是提供消費信貸業務，和緊急救援服務業務的控股公司。

初步睇，佢企業規模唔算好大，生意額都唔算十分高。加上業務性質，會令佢收入較波動。過去幾年，一直都在虧損狀態。

暫時所見，投資價值一般。如果你有研究，覺得佢有潛力，可投資。但只宜小注，以控制風險。

Canaan Inc(CAN)通過專有的高性能計算專用集成電路提供超級計算解決方案。

公司為客戶提供整體人工智能解決方案，包括人工智能芯片、算法開發和優化、硬件模塊、最終產品和軟件服務。

我未研究此股，粗略睇此股市值不高，近年生意有下滑情況，近年更轉盈為虧。這是短期問題，還是集團技術已經追不上大環境，要再觀察。

暫時不建議投資，最好再觀察一下發展，才作決定會較安全。

------------------------------------------------

Q21512：

老師，我睇緊你本財務自由行有野唔係好明

因為樓價上升既速度快，而家租金回報率唔再有5%！如果得4%既回報率，凈息差只有1.5%咁係咪表示而家買樓只係「平倉樓市」，只係賺樓市既升幅？因為租金都唔係好夠比每月既銀行供款！

龔成老師：

現時的租金回報率，大約為3%，而按息大約為2%，淨息差約1%，可以視為投資物業得到的淨回報並不高，因此，作為投資者，利用借貸買樓，吸引力只是一般。

你可以理解，投資物業只能賺升幅，租金回報部分無乜得賺。

而「租金都唔係好夠比每月既銀行供款」，其實供款包左：還錢、還息，如果每月收到的租，基本能還到息，即最每月正在「償還本金」，對投資者其實是一個財富累積的動作。

另外「平倉樓市」的意思，是指個人持有物業狀態，不要亂左，你可以再睇翻《財務自由行》內容。

------------------------------------------------

Q21513：

龔Sir，
請問你354(中軟),659(新創健)如做月供边隻好D。

晤該阿Sir幫我揀。

龔成老師：

中國軟件國際（0354）企業本質不差，但行業有少少波動，略有風險，但前景正面。現時大約在合理區頂位。

因為佢太多收入來自華為，這是核心風險，因為這是客戶集中的問題。華為久不久因中美因素，從而影響到這股，大部分都是中短期，當然有一些會發展至長期性。

長遠仍算正面，但無可避免存有風險，你如投資，就要分注，控制注碼，同時明白這股股價較為波動，前景可以的。

新創建集團（0659）都有質素的，佢係是新世界發展（0017）的基建及服務旗艦，業務遍及中國內地、香港、澳門。

新創建係一間綜合企業，可分為7大業務：道路、環境、物流、航空、設施管理、建築及交通、策略性投資。當中可分為兩大類，即是基建及服務

整體的質素，算是不差，但又未到最高級別，業務分散於多個範疇，部分與公共事業有關，過往的生意雖然穩定上升，但盈利卻停滯不前。

企業本身不是沒有優勢，長遠仍有增長能力，但由於賺錢能力略有下降，加上企業本身已很龐大，增長期望不會太多，過往過價大致穩定，投資宜集中在股息多於股價回報。

另外，近期的肺炎對佢有一定的影響，相信中短期仍弱，不過長期來說。仍是有投資價值。

現價合理，分注投資可以，但這股不建議太大注。同時要耐心等好轉，明白佢增長力不強。

兩隻都有質素的，如果要2選1，好簡單，睇翻你本身的風險承受能力、投資目標。

如果你想增長高D，就中國軟件國際（當然風險會高D），收息及基本增長，就新創建。

------------------------------------------------

Q21514：

龔先生，你好！最近開始睇你80後百萬富翁的書，開始設定自己的目標和理財計劃。

我本身都有放錢係股票市場，但投資概念都同一般散戶一樣，見低就買，賺少少就放。

最近睇你本書之後，略略對自己持有的股票分析下，發覺好多都落係新經濟股，所以風險較高。

我持有388，1398，3988，3690，1810，9988，6618，6060，6690&3993，大概總供有25萬左右。我覺得自己要再重整一下投資的策略。

想分散吓風險。係咪應該將6060，6690，6618呢幾隻賣咗佢。我想入1919，佢質素好嗎？另外都想每月供股，應該供邊隻好？

我係澳門人，我見你有開班，你會唔會考慮用zoom做線上教課呀？

龔成老師︰

記住，我地投資係長線，特別是優質股，因為賣出股票最大的風險，就是買唔翻。

好多散戶會覺得「若果現在賣出 到時再以低價買入」。「到時再以低價買入」？真的發生嗎？？？

你試想想，如果用你賺少少就沽的策略，在過往，港交所（0388）、騰訊（0700）在這麼多年，股價上升100倍時，你的方法能賺到多少？

可能連一倍都賺唔到。你怎樣能賺到100倍，就是「唔好賣」。

你現時持有的都是優質股，可長線。但正如你所講，太過偏重係新經濟類這種潛力股。

若果你係年青人，風險承受能力較高，潛力股佔5成都可以(但經驗較淺，要下調至3成)。但若你係中年人，最多佔3成好了。

你可以睇翻潛力股佔組合比重，如果太高，你係可以沽部份，好似眾安在綫(6060)、京東健康(6618)、美團(3690)這類風險較高的潛力股，去平衡風險。

如果只係高左少少，你可以不用沽貨。利用新資金買一些平穏增長股，去將個比重慢慢拉平衡即可。

海爾智家(6690)業務不差，而且相對平穏，你持有就可以。

中遠海控（1919）主要從事提供集裝箱航運、集裝箱碼頭管理與經營服務。

整體的質素算是不過不失，雖然在行業有一定的規模與優勢，但行業整體的賺錢能力無過往咁強。

經濟好轉會對佢有利，因為始終是對經濟較敏感的行業，現時的股價已反映相關利好因素。股價大升後，其後之後較難有高增長，因為已反映了利好因素，反而預佢之後轉為平穩增長。

現價略貴，回1、2成才入貨，會較好。

而網上課程，因為擔心有被人偷拍風險，故暫時不會安排，還望見諒。

------------------------------------------------

Q21515：

你好，想問你對777和914前景如何？謝謝

龔成老師︰

網龍（0777）主要從事網絡遊戲開發（包括遊戲設計、編程及繪圖）及網絡遊戲營運；教育業務；移動解決方案及移動營銷業務。

另外，佢近年有發展教育業務，相信長遠都有前景的，但業務始終有不確定性，市場具體情況仍有未知數，所以，投資價值是有。若想投資﹐唔建議太大注。

安徽海螺（0914）有質素，有增長力。

佢主要從事生產和銷售熟料和水泥製品，業務地區包括中國東部、南部、西部、中部及海外。而安徽海螺是水泥行業中，全球最大的單一品牌供應商。

水泥屬於基礎原材料行業，對建築行業有很高的依賴性，同時亦會與經濟增長速度有較高的相關性，特別與固定資產投資相關。即是說，當中國基建及房產市場不景，水泥行業會比一般行業處較大的不利狀態。

另外，水泥企業在生產過程中，燃料成本佔總生產成本中約佔了超過一半。若能源價格出現較大變動，就會對企業成本造成較大影響。因此，當能源價格出現較大上升時，將引致安徽海螺的成本增加，影響其中毛利。

綜合來講，佢擁有相當規模、生產能力，有一定的質素及賺錢能力，而水泥行業長期將因中國城鎮化以及一帶一路的建設，仍然會增長，但不會像過往般快速，而是進入較平穩的時期，在本質上此企業不差。

現價勉強合理的，無貨的話，你可以小注，但要留意盈利有潛在波動。

------------------------------------------------

Q21516：

龔成老師您好，請問9911，6666，2327，883呢幾隻係咪潛力股？依家都蝕緊5-20%，是否應該止蝕？

另外有一直購入3067，暫時蝕緊，不過唔擔心，但請問咩價會比較適合入？

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。因為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

赤子城科技（9911）算是潛力股類，佢主要從事開發一系列移動應用程式、健身應用程式、遊戲應用程式等。佢長遠有發展的。

業務上，係有吸引力的，但就仍未算好穩定，盈利上落較大，但長遠增長力是有的，加上業務規模細，發展力強，不過風險都會有。

這股質素中等，不宜持有太多。若持股不多，可以守。若太多，就要沽少少去平衡風險。

恒大物業(6666)算係平穏增長至潛力股之間。此股同樣可持有，但只宜小注。

美瑞健康國際（2327）主要從事抗衰老健康管理服務及銷售藥物；房地產代理及建築材料貿易服務；買賣健康醫療產品及建築材料。

生意雖然有增長，但業務有點波動，企業規模細，獨特性不強，投資價值只是一般般，不過初步睇，不是劣質類。

長線計，慢慢換碼至其他優質股較佳。

中國海洋石油（0883）不自潛力股，只是一般商品類股票。

石油是商品，當中沒有差異性，這令佢地的獨特性有限。這類商品企業，都可投資，但就要明白不是最高質的企業，只宜小注。

安碩恒生科技（3067），有長線投資價值，現貨可持有。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴。你有貨就不用急，等佢每月10%左右回調，才再加注，並長線持有。

------------------------------------------------

Q21517：

老師，請問1810 在30蚊揸重貨，6865在33蚊揸重貨。。6618有150蚊揸重貨？請問要走貨嗎？

請賜覆

龔成老師：

你如果持貨不過多，持有就得，你要問翻，佢有那些業務明顯轉壞，要令你賣出這隻優質股？

業務發展一直良好，只是股價之前貴，現時回翻，根本業務完全無變，優質度無變。

唔好太著重短期股價，睇「企業業務」「長遠發展」。試下唔好睇股價，了解翻佢業務，如果你想賣出，要找出佢「業務轉差」的理由！

小米（1810）可長線，但如果你佔組合%太多，可能要上翻D減持。

福萊特玻璃（6865）其實都有質素，但都幾波動，唔建議太過大注。這股可長線。

京東健康（6618）都有類似情況，可守。只要不是貨多就得，但你預佢上翻去需時。

你有幾個問題。

第一，只投資熱炒類或市場焦點股。

第二，一次過在高位買入，而不用月供或分注投資。

第三，無建立一個平衡的組合。

第四，無計過企業價值，全部都在貴的時候買。

最後，建議你大幅提高你的投資知識。

------------------------------------------------

Q21518：

老師，我忽然有一個想法，希望老師可以指點一下。

既然中電和港鐵都是平穩增長股，是否應該先月供其中一隻，將$2000集中投資一隻谷大股數？

到將來有能力每月撥多啲錢才投資其他股票？港鐵和中電之中選一隻是否港鐵比較有潛力？謝謝老師

龔成老師：

你要留意平衡。

當你太集中去供一隻的時間，組合就會出現中短期失衡，相反，如果同時供兩隻，雖然要較長時間先可以同時有一定的數目，不過組合能一直保持較為平衡的狀態，這是對投資者重要的。

其實，如果資金可以的話，應該整個財富組合都有這模式，當然，實際操作上有點難，因此盡力平衡就得，同時，我地都會考慮每隻股票這刻的平貴度，去決定入貨的力度。

------------------------------------------------

Q21519：

龔老師，我想問︰

1. 751 創維 $2.88 入了 放了一年、 應該止蝕嗎？ 很多好消息 為何還不升？

2. 另6030 值得多買嗎？ 經常很大上大跌 但我個人覺行戈好好炒 ... 經常朝早買 下午放 day trade 一流 ...

3. 另1375 應止蝕嗎？ 2.88 買 、 放了2 年了 🥲蝕好多 ...

4. 另買之前 sir 認為買前功課應做咩？ 是否看左周年報表先？ 或先看多小才經新聞先？

thz

龔成老師︰

1) 你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

中短期價格，與企業本質唔一定有直接關係，就算有好消息，唔代表一定會升。我地分析一隻股票價值，應該用長線去分析。

創維集團（0751）從事電機、智能系統技術業務、智能電器業務等，中國及海外都有市場。

近年增長力唔算強，生意未見有擴展力，盈利有點波動，整體的品牌價值及銷售網絡，未算好強。長遠發展力只是一般。

現價合理，但你預佢增長力唔算強，長遠算是不過不失。若你持貨較多，可考慮沽少少，去減低風險。如果持貨不多﹐可以守住先。

2) 短炒我見好多人都係蝕錢收場，股價中短期一定會有波動，唔好用種估走勢，賺差價模式去投資。優質股一定要長線持有，才會最有利。

中信証券（6030）質素算是中等，增長力不強。

其實佢不是無生意，盈利都有，但增長力就是無乜動力，發展力亦不強，現價合理，但這股又唔值得佔組合比例太多。

3) 中州證券（1375）從事投資管理、投資建設項目所需工業原材料及機械設備，原材料銷售及房屋租賃。

佢以中原証劵股份有限公司的名義於中國經營業務，另以「中州證券」名義於香港開展業務。集團之主要業務包括：

（１）經紀：代客戶進行股票、基金和債券交易，並提供融資融券服務及執行商品期貨及金融期貨交易。

（２）投資銀行：向機構客戶提供投資銀行服務，包括股權融資、債權融資和財務諮詢。

（３）投資管理：包括資產管理、直接投資和基金管理。

（４）自營交易：通過自有帳戶從事股票、債券和基金以及衍生工具等交易。

（５）其他創新業務：用自有或籌集的資金從事其他資本中介業務，如股票質押式回購交易及約定購回式證券交易等。

睇翻過往的財務數據，只是一般，生意無特別增長力，盈利波動，未見好賺，而企業獨特性不強，規模不大，投資價值不算高。

若你持貨較多，建議在反彈時沽出部份，餘下小注可以守。

4) 看年報、財經新聞、公司網站，睇相關書本和上課程。

我建議你先學好正確投資理財概念，才慢慢學分析和投資股票，會較理想。

你可以睇我寫架"80後百萬富翁"、"財務自由行"和"股票勝經"，會對你有幫助。

------------------------------------------------

Q21520：

龔成老師我想問,我現時34歲,最終目標想達到財務自由,現時目標先要增值資金,收入中等4萬左右,有一萬要比父母,同伴侶租屋(租金一萬)

每月儲到1萬5左右, 現時現金有120萬左右,之前有係4X位入過1211 3手,但後期疫情伴侶叫我沽左佢(賺dd),我又真係好聽話沽左,後悔左超級耐down左一段時間

之後開始去圖書館借你頭幾本書,又慢慢再買你d書, 經過閱讀你d書沈澱左後,最近再出發,現時手頭上股票有:
005(2800股, 買入53)005係疫情前買；270 (6000股, 買入12.25); 823 (600股, 買入62.3); 1810 (600股,買入22.75); 1830 (12000股,買入4.55); 3067 (200股, 買入16.8 ）

由於最近先再出發,價位已經唔平, 想問老師黎緊我應該點做較好?

股票會唔會買得太散?邊方面的股票可以增加返多d?005我諗到返差唔多位置就沽左佢, 轉換其他

同埋我而家唔會同伴侶講有咩股票,發覺我手上股票一跌佢就好緊張叫我沽. 謝謝老師, 希望好快可以係澳門見到你(已留名上堂)

龔成老師：

比亞迪（1211）事件過去就由佢過去，但佢比到你一個很好的經驗，就是明白優質股長線投資的道理，只要你做好這點。之後行翻正確的方向，你睇到的一定更加多！

現時你的持股，其本上都是有質素的，無太大問題，由於你34歲，財富仍有增長，因此收息股如匯豐（0005）就未必是最好的選擇，你可以等之後上翻，賣部分或全部，轉其他。資金可加入3067及港鐵（0066）、銀如（0027）這些股。

你現時的現金比例較多，要好好運用，暫時先慢慢加入平穩增長股+潛力股先。

你34歲，潛力股及平穩增長股，可以「5：5」，但如果你投資實力不足，就「3：7」，我會建議你這刻，唔好有太大變動，從比例上，潛力股類別已差不多，反而可等你上完堂，學好知識後，先正式進行配置。除非大市大跌，否則。這刻不用做任何野，投資是長期戰的。

只外，你現時不與伴侶講有咩股票，是正確的，因為一般人對股價上落的心態都不正確，所以不講好過講。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

［盲盒聽聲劍］其實都係抄日本啫。不過今次唔係講無印，係講課金扭蛋

告個急先：本人已被炒，未訂嘅記得訂Patreon，積小成多呀。訂咗嘅可以考慮加碼（https://bityl.co/4Y0h）。當然我唔係坐定定「我不想努力」，一星期至少出返六篇文，仲要之前有啲讀者贏到下錢嘅（但本人目標唔係玩畀冧把，係更高層嘅嘢）。睇下年尾前Patreon會唔會夠1000人！仲有3日，爭60人。相當有難度，但唔試點知唔得？（https://bityl.co/4Y0h）

1. 有人話我啲文越嚟越踩界，我都有啲驚。上次寫完龍五，今次就寫呢啲。危險。實情上次篇龍五係讀者報料，嗰位讀者自己都寫文，但話「後尾枕唔係鑲鋼板」，但就叫我寫。真係畀面，好似Nicole Kidman 自己唔剝衫點咗 Meg Ryan 去拍 “In the cut” 咁（＊）

2. 講真，唔去MINISO 就個人選擇，好閒，我都唔去。不過話人抄嘢呢，又係嗰句，一係你告上法庭咯。咁既然佢大搖大擺仲可以去美國上市都未畀人告（美國律師唔係講笑的說），你話呢？

3. 當然話鍾意話「合法但不道德」，亦隨你。十人十義啦。 Facebook 一樣抄晒抖音snapchat嘅功能，微軟一樣照抄Slack同Zoom，韓仔啲電器照抄日本，零食亦都係。陳慧嫻成個造型照抄荻野目洋子，鄭秀文MV都係照抄李晶賢。任你鬧，但請睇返第一段。

4. 而反正，MINISO都有人抄呀！呢個世界就係抄嚟抄去架啦，正如而家日本又抄返韓國（某啲嘢）之嘛。你唔係講學術論文plagiarism 下話？而抄，就唔等於「侵犯知識版權」，唔明嘅，睇多次第一段，或者問下我朋友
Seafood 狀棍 （又，佢個 Page名又算唔算抄人呢？君子馬蘭頭又係咪抄人？）

5. 不過本文重點都唔係講呢啲，係講，隻MINISO做乜大跌？就唔係因為抄嘢。大陸，唔怕抄，只怕一樣嘢，當然係官府。龍五都要移民啦。你可以睇多次《黑社會》，或者《樹大招風》。《樹大招風》講到明啦，「落到黎連飯都無得你吃呀！」

6. 原來，今次MINISO成為collateral damage，因為大陸整治「盲盒」。我真係呢兩個月先聽到呢個名詞，絶對係「盲盒騎劫隱形戰機」。盲盒嘅代表，當然係隻泡泡瑪特。咩嚟呀？原來係Pop Art，9992．率先已經中槍。官媒出文特別關注，股價一日跌10%。而原來，MINISO都有唔少「盲盒」。證明真係唔得與時並進。

7. 講真幾意外。雖然知道大科企一定冇運行，中資美資都係。固然國情不同，但殊途同歸。美國為選票，中國要維穩，都係要拎科企開下刀順應下民意。況且不能比官大嘛。

8. 但估唔到，搞到去泡泡瑪特呢啲細公司。1000億人仔市值咋喎，冇乜咩大影響力。難免令人覺得係咪保護費未交夠，否則幾時政府咁關心「一入盲盒深似海，從此錢包是路人」。正如之前官府好關心騰訊啲小朋友打機咁（相比之下，整治螞蟻嘅花唄借唄就幾合理）

9. 「盲盒」是乜東東？大把文章有介紹，例如吾友高天佑嘅呢篇（https://bityl.co/4zpR）。

10. 對我嚟講，「好似細個食杯麵咁咯」，硬係「合」「味」「道」總係爭一個字。正如你去七仔換公仔，都唔知咩款式啦。不過聽聞有啲人會搖下佢，就聽到係乜款！勁過葉漢聽骰呀！（埃汾太都話 胡迪 巴斯光年 同 勞蘇唔同聲，三眼仔都唔同，但如果維尼同勞蘇就好難分，因為都係熊）

11. 「盲盒」呢樣嘢，正如高兄一文講，玩物喪志啦，同埋真係疑似有啲賭博成份。最接近嘅，就同手機遊戲課金扭蛋差不多，真係十分邪惡。

12. 即係，每個人都話自己唔會上癮。但我諗我都曾經係有啲病態嘅賭徒。我歷年（唔係一年啦）好似買波輸咗二三十萬（！！！！！），後來知咗個總數，就戒咗賭。

13. 然後？有一輪我玩手機遊戲，都課金不少。真的，十分邪惡。佢捉緊晒你用家嘅心理，好多文寫過。首先畀啲甜頭你啦，畀幾張勁卡你，畀你見到有幾勁。然後？搞活動啦，頭位有得拎勁卡。問題就嚟啦喎：你要排頭位拎到勁嘅卡，本身你咪要有勁嘅卡！完全係社會嘅寫照，一定係富者越富，越拉越濶。

14. 唔想咁可以點？咪好似啲球會有中東佬俄佬資金咁，銀彈攻勢。你發現真係唔使技術，你課返一百幾十蚊，輕易打低啲咩鑽研戰術開個Excel嘅零課金玩家。你可想而知對家有幾沮喪。「然後加入課金嘅行列」

15. 類似邪惡操作仲有好多。同賭波賣丸仔一樣，第一次一定畀好多甜頭你，平到笑，首次課金有好多獎品。你心諗，一蚊美金之嘛，訂Ivan Patreon都唔夠啦，咪試—開咗個頭，有第一次就有第二次啦。然後話你知，課夠三美金又有多幾張喎。唔爭在，唔爭在，就租埋好多。連續七日課又有獎喎。

16. 仲有，不可能不停叫人畀錢嘛。總要畀甜頭你，先引到你玩落去，軟硬兼施。你最沮喪嗰時？嚟嚟嚟，今次你課一舊水，必定抽中C朗美斯呂布關公。呢個心理同夾公仔一樣，輸得多得滯，一定送一隻畀你。何生都有叉燒飯畀你食啦

17. 如此種種，對自制能力低嘅人，的確好大誘惑。加埋萬惡嘅信用卡，仲有萬惡嘅Face ID/Touch ID 畀錢。完全唔覺。

18. 唔覺唔覺，嗰時我一個月可以課到幾千銀，甚至過萬。死未？

19. 後來到我畀隔離聯盟欺凌，見鑊打鑊，加上工作忙，打到冇癮，就賣咗個戶口—都收返兩千銀。可想而知幾咁值錢。回想當年，我仲覺得啲友話online game畀人偷咗虛擬武器要報警甚至自殺CLS，果然係「誰料那個是我　又能如何恨我 沒法面對自我其實最痛楚」

20. 講返「盲盒」，同課金扭蛋，最大不同當然係有實體貨物（雖然虛擬嘢同實際嘅界線未必咁明顯，我有張國家隊C朗，值錢過你隻公仔啦）。又要出限界版。聽聞儲齊一套仲可以炒，互為因果，啲人為咗搏齊一套就去抽。但又有人覺得老子有錢使乜抽，直接買咪得，又助長炒風。

21. 又話時話，嗰時呢，以我專業嘅數學知識，我幾肯定，K社某足球遊戲，入面講嗰啲機率，應該係假嘅。好簡單，你做個實驗，佢聲稱有幾多%抽中C朗，但我連抽幾多次都唔中—當然可能我好黑仔，抽極都唔中。但，有個 confidence interval 嘛。Let’s say 賭場粒骰仔，固然我唔會擲六次就有一次出到1點，我擲到第十次都唔出都好正常，我擲一百次都冇一次1點呢？當然理論上都可能，「你真係好黑」。但，如果我擲一千次都冇一次1點？就梗係告你出千，粒骰有問題啦。聽聞後來有人在日本真係告上法庭，搵統計學家去做專家證人添。

（＊）套戲真係爛到仆街，但我嗰時同女睇冇乜所謂啦。雙手不閒著呀。在新港戲院，已執。

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
Ivan Patreon，港美市場評點，專題號外，每日一圖，好文推介。每星期6篇，月費100蚊唔使，4個月已900人訂！（https://bityl.co/4Y0h）