【 試當真開騷破天荒門票逐日減價 】 _ 東京奧運閉幕，終於得閒返啲？ _ 我 ── 都 ── 想 ── ！ _ 大把嘢堆埋一齊在周一（9/8）發生，換句話講，即係大把嘢寫，其中一件更係「大件事」 ── 由YouTube頻道「試當真」首度開辦的實體活動《試當真一周年現場版（暫名）》，落實於10月26日（周二）在九展Star Hall舉行一連兩場（下午3時、晚上8時），主辦單位日前公開宣傳海報，公開所有成員陣容，包括：游學修、許賢、蘇致豪（豪哥）、林家熙（Locker）、岑珈其、陳穎欣（Yanny）、倪安慈（阿慈）以及陳苡臻（Jessica），演出長兩小時，內容包括戲劇、歌舞和棟篤笑，並於今天早上10時起於快達票公開售票。 _ 打算狂撳F5搶飛？咁又唔使，事關今次「試當真」破天荒使用類似「荷蘭式拍賣」（Dutch Auction），又稱為「減價拍賣」的方式售票，票價劃一，第一日公開售票的價錢為一萬港元，24小時之後，即周二（10/8）早上10時起減價至5,000港元，再過24小時後，即周三（11/8）的票價將減至2,000港元，去到9月1日，票價將會降至最低的10港元。門票開賣後，觀眾可以在快達票網站上看到不同區域的賣票情況，再視乎座位供應買票，另外頻道的「認真毛」會員將不設優先買票，但可享專屬福利，至於以較貴價格購票者也沒有優待。 _ 雖然有網民呼籲大家一起等到9月1日才買飛，亦有人懷疑會否有人願意大拿拿「成皮嘢」拎出嚟買飛，所以簡單而言，今次賣飛方法，是「試當真」的一次群眾實驗：到底粉絲有多撐他們？到底他們覺得這個品牌的「市價」去到哪個水平？皆可以從賣票價格變化中看出端倪。正如游學修在短片《買飛教室》裏說，他們也不是坐定粒六會穩賺：「如果真係冇人睇嘅話，我哋嘅門票價格最後會減到落10蚊，到時你最討厭嘅試當真，就真係血本無歸喇！」 _ 游學修周六（7/8）在個人facebook專頁發帖宣傳，為今次的售票方式解畫：「開賣前有人同我講，有人可以幫我某價位清飛，躲在暗處嘅事我偏唔做，連清返啲單丁位宣布沽清，我都唔做我都想睇啲單丁位可以跌到咩價位，我都想有人執到平飛。」他又指，贊助商同內部訂購的門票，都是只得樓上座位（Star Hall有兩層），樓下（舞台樓層）只留極少量VIP飛，其餘全部公開發售，「內部認購價會跟公開連位沽清價賣，煩到乜咁，但我想挺直胸膛，同個街講我要做實驗、反傳統。我見識少，錢大媽、荷蘭拍賣，我未聽過。只係因為我由細到大都唔好睇Show，諗唔明點解香港人咁鍾意搶飛，又諗唔明點解啲主辦要繼續定一個永遠有得炒嘅價，所以先有咁嘅諗法。」 _ （09082021） _ #游大東 #游大東影視筆記 #試當真 #游學修 #許賢 #蘇致豪 #林家熙 #岑珈其 #陳穎欣 #倪安慈 #trialanderror @trialanderror_meme #09082021 #陳苡臻 @trialanderror.fanspage @hkdumbyouth @triplesartistemanagement @ronnie816 @429tkm @teotwatm #陳苡臻