【lovestoryhk潮文-by女朋友】 呢排Mirror、Error話題性極高，演唱會、劇集、廣告、綜藝節目都見到佢哋嘅蹤影。Yanny本來都冇留意佢哋，直到193講咗嗰句「收視得幾百部電視機！」佢即刻覺得193好敢言、好Charm。 . 因為193，佢追咗《考有feel》，鍾意佢哋狂出茅招，用手錶反光出貓、收埋人哋啲睡衣、食魚肝油食到變臉、狂加熱水入盤冰水度、眼罩剪開兩個窿、將象仔直接放入袋等等。當時佢send過啲精華片段畀佢男朋友Dickson睇，Dickson睇完眼神好不屑：「出貓梗係贏啦，咁茅，咁仲好玩😑？」Yanny反駁：「呢個綜藝節目嚟㗎，梗係要搞笑好玩啦。我就係鍾意睇佢哋唔守規則，要乖乖哋、守規則，玩完交咗差就算，我不如睇隔離台大電視啦🙄！」 . 道不同不相為謀，Yanny冇再同Dickson分享Error啲嘢，決定自己默默睇就算。嗰排佢用返工搭車、放飯、放工返屋企嘅時間，煲晒Error之前所有節目，好似《花姐Error遊》系列、《全民造星》系列、《口罩小姐》、《Mirror go》。因為咁，佢留意到Mirror呢對識跳舞、識唱歌，有樣有身材嘅組合，仲變埋鏡粉一份子。 . 當佢知道Mirror有演唱會，佢即刻瞞住Dickson拉埋同事去睇。「嘩～～～～Ian好靚仔😍😍😍救命，把聲勁好聽」、「OMG姜濤抬頭嗰吓好鬼正」、「Jeremy好有特色，佢值得被人多啲留意🥺🥺」成晚同同事尖叫到把聲沙咗。紙包唔住火，Yanny始終都要同Dickson拍拖，Dickson問佢把聲做咩搞到咁，唔擅長講大話嘅佢一秒露餡。 . 「你點解要瞞住我呢？一隊咁嘅嘢，啲飛炒到23萬，叫咩Error定Mirror？我唔識佢哋喎。」 . 「嗰隊係另一隊，呢隊叫Mirror！唔識就Google啦，話自己唔識威啲？」 . 「我係唔明佢哋有咩魅力，搞到你好似被嘢迷咁！」 . 「其實你有冇認真睇過佢哋嘅節目？冇嘅話憑咩批評？你咪十足啲廢老咁囉，同社會脫節，凡事只係睇表面，唔深入了解吓佢哋...啊唔係，你連表面都冇認真睇吓！」 . 嗰日起，Dickson同Yanny冷戰咗成個禮拜，正當Yanny煩緊點挽回呢段感情，Dickson突然主動道歉，佢話自己已經好盡力睇晒Error、Mirror嘅節目，日睇夜睇，終於明點解大家咁鍾意佢哋。原來望住佢哋從啱啱參賽不斷努力，不斷成長，到依家終於有咁多曝光率，個感覺係咁欣慰。你知道佢哋唔係hea，你知道佢哋個個都出咗萬二分力，好想做到一啲成績，被觀眾留意、支持。 . 「喂！你有冇睇《ERROR自肥企画》？Mike導勁自肥囉，同埋阿Dee個「鳳凰不死鳥」好搞笑，我睇咗19幾次😂仲要幫熱浪賣埋廣告嗰吓抵死」 . 「我梗係有睇啦😏我覺得佢同肥仔、保錡、193講英文搞笑啲🤓So scary~Oh no~」 . 「屌你睇得咁快嘅！我追返先，唔講，Bye!」 . 「喂！喂！我未同你講今日返工啲嘢啊...超～呢個死人Dickson仲迷過我...」 ♡ 𝘱𝘭𝘦𝘢𝘴𝘦 𝘷𝘪𝘢 @lovestoryhk 𝘪𝘧 𝘺𝘰𝘶 𝘳𝘦𝘱𝘰𝘴𝘵 ♡ 𝙛𝙤𝙡𝙡𝙤𝙬 @lovestoryhk 𝙛𝙤𝙧 𝙢𝙤𝙧𝙚 #lovestory禁忌#mirrorweare#mirror演唱會#errorweare #郭嘉駿#梁業#何啟華#吳保錡#姜濤#陳卓賢#陳瑞輝#王智德#楊樂文#邱士縉#江熚生#柳應廷#盧翰霆#李駿傑#呂爵安#邱傲然

Merry Christmas！又到聖誕節，組合Super Girls（SG）五位靚女有甚麼節日慶祝活動？原來她們選擇齊齊開Party，同場更特別加映為近日生日的Cheronna和Yanny慶生，Aka捧出蛋糕時兩位壽星女開心又驚喜！講到最難忘的聖誕節，Aka表示多年前聖誕節早上要去澳門，夜晚要返香港，當時的男朋友提議坐直升機回港，她說：「我以為好開心啦，點知坐上直升機，一來好嘈，二來因為夜晚，乜都見唔到，一啲都唔浪漫。」Heidi就表示試過整薑餅人和蛋糕給男友食，Jessica就難忘小時候在美國過的白色聖誕：「嗰邊嘅氣氛真係好好，屋企有聖誕樹，25號大家食完早餐就會一齊拆禮物。」 Yanny抽中「驚喜」禮物 Yanny就表示讀小學時會交換禮物：「曾經抽中一份係我送畀一個同學嘅生日禮物，我呆咗。」Cheronna就記得小學開Party時曾被迫扮卡通片的「結他他老伯」跳舞。講到新一年的目標，她們希望來年可以出多些快歌，如果儲夠歌的話都想再挑戰開騷。問到單身的Aka新一年可會想快些找個男朋友？她表示：「我覺得2019年未係時候搵男朋友，因為真係好攰。（唔羨慕人哋拍拖？）我淨係羨慕佢哋節日嘅時候唔使搵人陪，出街見到啲人一對對攞花又攞禮物，有人見到我又會問『唔使拍拖咩』，我不斷打電話問朋友有冇Party，但永遠都一定唔會係正日，真係唔知做乜好。」 Cheronna嫌結婚麻煩 而當日獲驚喜慶生的Yanny表示：「我覺得最搞笑嘅係每次都會安排驚喜，但每次我哋都可能會知，不過開心嘅。」而迎來29+1歲的Cheronna黯然表示：「係呀，所以你見我都唔係好想提。」講到女人踏入3字頭就是新階段，Aka認為Cheronna是人生勝利組，因為正與黃奕晨拍拖的她愛情事業兩得意，問到可會開始籌備人生大事？Cheronna表示想儲多些錢再算，Aka笑言如果他們結婚就會封大利是，Cheronna即笑說：「諗下先，不過結婚好煩，好多嘢要搞。」

【on.cc 東網專訊】出道五年的女子組合Super Girls（SG），成功憑健康形象深受廣告商垂青，同時亦俘虜萬千宅男的心。適逢聖誕浪漫佳節，SG五女自稱單身多年，她們坦言會努力尋找另一半，但暫時以工作為先，隊長Aka說：「大家梗係想有另一半陪，其實最驚過聖誕節，永遠喺街見到人一對對拎住花同禮物，我就攞住贊助禮物，又冇人幫我拎。」成員Jessica承認聖誕節最想攬住愛人，Aka插嘴說：「最好聖誕排滿工作，畀人問聖誕節有咩做，就大條道理話我好多嘢做。」Heidi和應說：「我都希望好多嘢做排到滿晒，乘機去搵錢。」 想過白色聖誕 問到有否想過要過一個白色浪漫聖誕？SG齊心說：「梗係想啦。」曾於美國求學的Jessica透露當日寄居當地家庭，每到聖誕節正日都會齊齊炮製早餐，食完便會拆禮物及出門口玩雪，她說：「真係好開心。」跳得又唱得的Cheronna說：「最想過白色聖誕同時間浸住溫泉。」有「冰山美人」之稱的Yanny表示曾與母親「肉帛相見」：「雖然唔係聖誕節，浸住溫泉個身好暖，啲雪飄落個身到溶嗰刻感受好好。」 織頸巾爛尾收場 SG承認曾為男朋友親手織頸巾，可惜全軍覆沒爛尾收場，Aka說：「冇乜耐性，好快收針搞到條頸巾好短。」Heidi自爆要搵阿媽出手，她說：「開頭同結尾要媽咪偷偷幫手，仲試過有年未送已經分咗手。」 Jessica透露當時在美國讀書時，有次回港買冷，因預錯顏色搞到要在美國補貨，她說：「點知唔同色，搞到條頸巾兩截色，勁奇怪。（男友有冇戴？）有呀，呢啲真愛嘅。」而Yanny則說：「織過一條條好核突，漏晒窿，因為Hea住織，阿媽睇唔過眼幫我織幾行，所以睇到條頸巾一截好、一截唔好，不過都有送畀男朋友，佢仲多謝我話好靚㖭。」