【笑到硬哂】（唔係鹹嘢）（長文） 笑到硬哂：當你十分尷尬，但又要保持笑容嘅狀態。 😀😀😀😀😀😀 . . 話說，早一個禮拜做阿正替工，幫佢做識貨之人。前一晚戰戰兢兢咁準備好資料，袋定三四個Punch，就行入直播室。 而我亦都無令大家失望，都真係做得好差吓。 Punch又Punch唔中，資料又講得唔夠清楚，仲要個腦好似落唔夠WD40咁，Kick實哂。 我無去睇返自己做成點，因為唔使睇都知道會有幾不堪。 但原來好奇害死貓之餘，好奇都仲會整到人眼濕濕。 我好唔小心咁開咗第一日嚟睇，畀人鬧就預咗，亦都合理， 做得唔好就梗係要鬧啦⋯但令我眼濕濕嘅，反而係一堆我無諗過會出現嘅打氣說話。 . . 「放鬆啲呀！」 「知你得嫁！」 「畀啲時間佢呀！」 「幾靚仔呀！」（呢個開心到眼濕濕） 我無誇張，睇完堆Comments嘅一刻， 我眼眶即刻「浪」住兩泡眼淚。 除咗Comments，仲有人特登搵我為我打氣。 我知呢啲包容、耐性同支持唔係必然。 講啲咩多謝都無乜意思， 唯有希望日後有機會再做嘅時候， 用好表現嚟「多謝」你哋！ 呢七日辛苦哂咁有耐性嘅大家！ 聽日畀返「孟呢正」你哋啦！！！ 🛸 再一次，衷心地，向每一位關心過自己同埋專登為我打氣嘅人⋯ 講一聲：「謝謝！」🙌🏼 . 2018-06-17