【龔成問答信箱】（Q22381-Q22400）

Q22381：

你好啊龔成老師，我現時係一個中五學生，我好希望可以得到你嘅幫助

我今年啱啱18歲，因為家庭環境問題，一直好想快啲賺多啲錢，因為咁我好快就踏上咗買賣股票，大半個月前我因為貪心，無經驗，

心急咁買咗美團嘅認購證，我好蠢咁擺咗成世人儲曬嘅錢落一隻股到（～35000），果陣頭兩日賺4000好開心，但第二日開始每日跌，跌二千，二千，三千幾，一萬幾，

跌到宜家我差唔多輸咗8成（～30000）我唔知點，

我心態好崩潰，好後悔自己貪心，明明畫圖分析咗佢跌，自己又唔肯走，仲覺得佢會升返，我宜家唔知點好，你可唔可以指導下我

龔成老師︰

首先，同學仔你對投資理念，存在一個好大誤解。你現時成個投資模式，都係同一般散戶一樣，犯上同樣，而且致命的錯誤。

其實我20年前，都做過同你一樣的事，短炒、炒孖展、炒衍生工具，輸左幾年我先識醒，後來發現全最賺錢的投資者、基金經理，只用一個方法「長線投資優質股，買股票就是買企業」，我就改變策略，長線投資，之後就賺多過輸。

你要好清晰一個投資"重點"，我地買入一隻股票，就等同買入一間企業，一定要知道佢質素、行業前景、財務狀況等，才去考慮否投資。

當我地確認係值優質股後，我地會用平貴定入貨策略，並長線持有。而唔係做短炒股票或者輪證，去賺差價。因為短線股價會受市場氣氛、資金流向等，與企業質素不相關的事情影響。這些因素，我地係不能估計。

但長線，企業價值會係股價上展現出來。因此，優質股你買入後，長線持有，讓其自然增值，永遠都係最有效的財富增值方法。

我明白你家庭問題，需要盡快賺多D錢。但你要明白投資增值，係一件長線的事，你唔好預佢對你短期財務，有任何幫助。

全世界投資最叻，最賺錢的巴菲特，佢會唔會做短炒。佢只會叫大家，長線持有有質素股票，等佢地自然升值，達至財富增值效果。佢自己身體力行左幾10年，去證明這件事係行得通的。

所以，我建議你放棄短炒。現有的輪，就全數沽出，當買左個經驗。同時要認真去學好投資，之後才再出手。你可以睇我架《80後百萬富翁》、《財務自由行》和《股票勝經》，都適合你。

------------------------------------------------

Q22382：

老師 ，我現時的資產分佈如下

股票 36%
現金 23%
等跌市 41%

請問現時配置ok嗎？（因為我冇物業，所以比較簡單）

我現時總資產約85萬，首期都比唔起，所以冇諗過上車，只希望靠股票儲到多啲錢可以三年後移民

雖然有啲渺茫，因為我計過自己三人家庭，6年洗費都要2.5M。但移民係我短期目標，香港生活真係太壓迫了。

而且我曾經在英交流半年，我有信心可以適應嗰邊既生活。我每一日都會想像我喺英國冇咗姐姐、自己又冇工作能力又要湊住個（三年後六歲）囡搞唔搞得惦

答案係：未得

所以我比三年自己康復、去說服身邊既人我可以

請問老師你對移民英國有什麼看法呢？應該要有幾多錢先夠？

龔成老師︰

現時大市在合理區，股票佔比重，去到5-6成都係可以。你可以用分注形式，再慢慢加大翻股票佔比。

但若果你係好大機會在三年後移民，時間不算好長，我會建議投資選項上，要保守少少，以平穏增長股為主。

以下平穏增長股，都係有質素，現價都在合理水平，可慢慢分注。但緊記我地組合要平衡，個別企業和行業，不要佔組合15%和30%以上，以免出現過度集中性風險。

至於移民部份，每個人都有不同考量，有的為工作、有的為教育、有的為改生活模式。最重點，係你明白你目標係想點，而這個新地方，係未來長線係唔係可以做到，你心中所想，咁就可以。

但由於移民去新地方，好多野都要重新配置，所以資金係好重要。到時你要優先留有一定現金，去先處理好生活事宜，到一切都安定好，才好再諗投資。

在你打算移民前半年倒，你就要開始慢慢沽出股票套現，唔好等到要用才一次過沽，以免回報受價格波動影響。

至於要用多少錢，你要睇翻自已計劃，衣食住行各方面開支。因為每個人都有不同，單係住在不同英國城市，個租金和樓價，都可以有好大分別，故好難話要幾多才足夠。

所以，你要先計劃好，自己移民的落腳地。再去了解翻這個城市生活和住屋水平。由於這是個新地方，會有不少額外開支，故你要預鬆D。生活費用上，最少有半年儲備，才算理想。

------------------------------------------------

Q22383：

多謝你不斷提供正面資訊俾我哋，成日都覺得投資要盡早開始，自己本金唔大，成日睇住股價上上落落，短炒咗一段時間，真係輸多過贏 好後悔好後悔。

而家睇緊老師你出嘅書，龔老師啱啱聽你咁講，先增值後享受，有正如所講長線投資一定會有回報，我想問你個意見，我同先生月入大約四至五萬 ，正因為而家有兩個小朋友讀緊小學 開支好大 儲錢亦唔多

如果我手頭上有一間價值六百萬嘅樓居屋 係自住嘅 大概仲有一百六十萬未供完。因為短時間都升值咗好多 都算係人生第一桶金

你覺得能唔能夠賣出然後用二百萬至三百萬長線去投資 然後自己租樓住五至八年。咁到五年或者八年後 咁樣財富增值 係唔係一個好嘅選擇？

但如果最後升值唔多，有機會而家住緊嘅屋都會再升，但如果我唔用呢個機會 根本就冇辦法 拎到現金去投資

以上是我之前同你提及的方案

如果我真係賣出層樓，利用一百萬收息，例如電燈。一年都大概有70,000至80,000利息，咁樣可以蓋過租樓開支，然後剩返二百拎嚟投資，選擇一些有潛力的， 你覺得咁樣大概等幾年後收成，

我希望能夠右手上嘅300零萬，可以變到500幾萬 ，幾年之後再買返樓，目標希望可以買到600-700萬600呎新界私樓， 而且可以製造多啲現金流！

如果萬一有風險嘅話，咁就可能選擇買返一啲納米樓。

因為如果唔用呢個方法，我同先生每月嘅收入 就好似變成入不敷支，根本唔可以令資產再提高。

龔成老師︰

我自己唔係太建議你，沽出自住樓去投資。因為你會變成處於"沽空樓市"狀態。表面上，你計劃係可行。

但實際上，當個貸款息率上、租金持續向上、或者樓市升幅跑嬴股市，都會令你計劃失算。

我建議你自住樓部份不變，如果開支真係無任地方可以減少。你地睇下有無可能做些網上小生意﹐或做些兼職，去增加收入。最終可以做到，每月有一定資金，去做投資增值。

如果都係唔可行，你最後方法，就係去加按。現時仍處低息期，加按是沒有問題的。

但你要睇翻自己年齡，可承受的風險程度。40歲總負債大約可佔總資產7成，如果50歲就5成好了。

現時按息不高，將資金買入其他資產，創造更高的回報。但要新資產產生的利息回報，一定要比加按的利率高，這樣才值得做。

最好有比較明顯的息差回報，這樣才能抵銷加按後，加大負債為你所帶來的風險。因此，你加按前，最好先計劃如何分配新資金，如何平衡風險。

投資於股市時，相信中低風險會較合適，公用股、內銀股、收息股、房託等，都可考慮，策略為長期的增值及收息，期望股息回報大於加按利息，這樣就值得做。但絕不建議炒賣等方式投入股市。

同時，你要明白加按表面上無本生利，但實質有風險的，你負債增加，風險會增加。

另外，如果你投資的股票不幸股價下跌，你就會出現「賺息蝕價」，對你不利。如果日後加息，又或你收息股的派息減少，都會令你得到的息差回報收窄，你的回報會減少。

若你覺得以上風險，都係你可以接受範圍，你才好加按。

另外，我地投資物業時，緊記唔好投資納米樓。因為佢呎寸太細，連一個基本家庭需要(約300呎)都做唔到，投資價值會係比其他較大樓盤，弱好多。

------------------------------------------------

Q22384：

龔老師，我有事想請教。我之前聽你教導每月月供股票，現約有約：

1）40萬股票
2）另有20萬基金
3）及約10萬現金

我想用林鄭plan買一層約500萬，209呎開放式住宅（20年樓）住宅作投資用途，但要將手上全部股票基金放曬。這樣會否太高風險？

請指點迷津，感激。

龔成老師︰

我地財富組合除左要有增長力和質素外，平衡性都好重要。若你盡沽優質股，去買物業，會令你組合偏晒去物業類，因而產生風險。

最理想係，買物業之餘，可以保留一定優質股作增值，才算平衡。除非你發現的物業，明顯係旬盤，現價又好有值博率，才好考慮。

再加上，現時整體租金回報率唔高，從投資角度，投資優質股會較好。

另外，係你將來購買投資物業時，緊記要買一些最少有300呎的單位(能滿足一個家庭需要的大細)。單位太細，其實投資價值會被打折扣。

------------------------------------------------

Q22385：

阿sir 之前8.15開始入3918，分段入，入到開始懷疑人生，而家平均買入價係7.16

每一次佢再跌我又睇一次佢既負債，現金流，財務數據，仲有佢既專營權，有冇咩壞消息，相信係短期，再入。不過而家話全球疫情會反彈，相信又要再跌。

想問下佢跌成咁我有冇miss左啲咩風險？新興市場，較受中國旅客人數影響，比澳門賭股有風險我都了解。

另外，我理解呢類股注碼不能去得太盡，而我入下入下都變成一隻持貨較多既股，但佢大平賣我又真係想再入，我既步署應該點調整好？

多謝阿sir，正當全城人妻都睇緊mirror，我老公就話，你又睇龔成（仲要無樣睇）@@我同佢講睇龔成係唔會導致我地婚姻破裂，相反係為左我地既將來努力😆

今晚進階班見

龔成老師︰

金界控股（3918）其實佢本質，無大變動。正如你所講，佢較大風險係新興市場，故一定不能大注。

雖然佢現價已經係合理區中下，好似好抵。但你過度加注，表面上拉低平均價，實際上係加大左成個組合，投放係高風險項目的資金，咁係唔理想。

如果佢已佔你一定比例(組合5-10%)，但停一停，再平都唔加注住。

現時佢一直跌，最大原因係疫情不明朗，特別係一些發展中國家。因此，你預佢中短期一定會好弱，但長線質素係依然存在，持有係無問題。

------------------------------------------------

Q22386：

龔sir, 你好。上完堂之後買了好多你的書，好有用，令到我更容易明白你的堂課。因為一直以來我好相信你加上你無論上堂及sms都好有心及好誠懇。

所以好想請教一下，你可以給意見我嗎？

現年60，計劃退休年齡想5年後，但唔想完全不工作及0工作收入，如果現在先學定開網店，待退休後的工作及生意，你認為可以嗎？

Facebook 見到有廣告講網店，但教學費大約要hkd8000好耽心能否學以致用，所以想聴下老師意見及有冇推介？

現仍在月供股票中，想加多1只3188，你點呢？

最近見152（有10000股）但跌好多，請問點解既？

見388, 700, 9988 跌中，如想入，請問合理價約幾多？好感恩遇到老師，感謝你的幫忙分析，辛苦晒也謝謝你。

龔成老師︰

我覺得可以，你可以把握退休前的5年，去學習和嘗試網店經營模式，去找出一個最適合你退休後營運的方法。

至於這些創業堂有無用，我就唔係好知。但你記住，「價值」最重要，「價格」是次要。

其實，只要你從你的興趣、強項、認識的事著手。例如你本身對某類產品很有興趣，你會在那裡買？如果你在網上買這產品，這個網站的模式如何？

你最初要有學習的對象，你先尋找一些自己認為不錯的商店，了解一下佢地的商業模式，最始好大型及小型都有，先以小型作學習對象，然後就試下佢地的模式，能否成為你創業的方向。

你最初創業，就係摸石過河，一路做，一路修正，然後再一步步發展。記住，最好唔好做得太雜，要專注在某一範疇，等人容易記得你。

另外，你可以睇一些創業書本，可以到坊間找找「XXX創業」之類的字眼就得，另外可睇有關猶太人生意經之類的書。但你要緊記，創業係唔易，好多事都係摸石過河，慢慢從經驗中修正。

而且，成功與否，最大關鍵位唔係你能力，而係你能否堅持。加油!

至於投資方面，近期大市氣氛較弱，故不股票都有明顯回落。但我地唔好用股價，去判斷一隻股票有無持有價值，我地要睇佢本質。

深圳國際（0152）本質無大變，你照持有收息就可以。

但華夏滬深三百(3188)、阿里(9988)、港交所(0388)、騰訊（0700）都係潛力股，唔係咁適合你年紀，如果係你女兒投資，咁就可以。

現價都在合理區中上至頂位，可分注。除了港交所(0388)較貴，要回多2,3成才好考慮。

------------------------------------------------

Q22387：

阿sir (1810)應該咩位入

老師 你另外個4本我都訂埋。可唔可以講一次我知 13本書個順序要點睇？

我宜家睇緊股票勝經

龔成老師︰

小米(1810)$24合理區頂。

但如果你現時完全無貨，現價入一小注先，都係可以。

你可以先睇我架《80後百萬富翁》、《財務自由行》和《股票勝經》，都適合初學者。

之後，如果你想了解多D有關企業估值，可以睇埋《選股勝經》和《年報勝經》。其餘幾本，你按自己興趣去睇就可以。

------------------------------------------------

Q22388：

龔老師你好我有個問題想請教你一下。有些股票係有股息分配，理論上是否我衹要在分紅之前一天，擁有該股票就有權分到每股的紅利?

如果是的話噉，每一個人衹要係分股息之前買入，賺股息之後賣出就可以賺到股息。

這個概念是否正確?

龔成老師︰

你對派息運作，似乎有點誤解。

如果你要收到股息，必需在「除淨日」前一天，依然持有股票。「除淨日」，其實就是用來確認那些股東收到這權益的日子。等到「除淨日」當天才買，派息就唔會有你份。

「除淨日」那天，股價就會扣除派息部份，例如原來股價$10，派息$1。那麼「除淨日」就會將股價，從$10下調至$9，以反映派息動作。

而「派息日」，就係這班合資格股東，正式收到股息的日子。

由於「除淨日」股價會下跌。而下跌比重同收到息係一樣，所以只係左手交右手動作，你唔會在此期間因買/沽貨，出現任何著數。

------------------------------------------------

Q22389：

謝謝老師。另外想請教一下微盟集團2013。我看見它2018 的總負債遠比總資產多？我不太看得懂發生了什麼事。是會計上的計算問題嗎？正常應該破產了吧? 謝謝

請問老師怎看6123圓通？

老師晚安，不好意思想問一下1070 TCL 股價現在是不是已回到合理區？

龔成老師︰

因為佢2019年才上市，在上市集資時獲得大量資金，故2019年資產比2018年明顯為多。由於2018年未上市，以一間開發中公司，總負債較多都係正常。

圓通速遞（6123）本身係一家以香港作為總部的國際貨運代理服務供應商，業務已擴展至多個國家，並在亞洲、荷蘭及北美設立了幾十個辦事處。

佢主要經營以下四項業務：空運及海運貨運代理服務、總銷售代理、配套及合約物流服務。

早前阿里巴巴（9988）入股增持，令股價大上大落，這的確會令企業有更多發展，前景正面，不過，估值方面已難。

因為這刻根本無法計算佢，之能賺多少錢，企業發展情況如果，只可以話好多不確定性，但股價就反映大部分利好因素。

因此，這股雖然有發展，但同樣股價上是有風險，相信之後的股價仍會波動。只可以話，這類股小注持有不是不可，但要明白風險因素。

TCL電子（1070）全球最大的電視生產企業之一，其產品銷售遍及全球各主要市場。

集團本質不差的，業務穩定，生意不差，有持續的盈利，不過，過往的增長力就不算強。

負債偏高會係一個扣分的地方，以現時估值來說，可說是處合理區的範圍。

------------------------------------------------

Q22390：

我朋友一直叫我改玩美股代替港股，話港股已冇得買，但本身美股一d概念也沒有
請老師請教

龔成老師：

我地投資，最重要是建立一個優質股組合，中國、美國，都是往後20年最強的兩大經濟體，我地在當中選股，點都唔差。

所以，你可以考慮配合投資，不過，不要認為港股玩完。正如我在2003年，聽到大量分析話香港樓市玩先，人是好表面的，我地要睇長期。

正如我持有的比亞迪（1211），港股，都升左10倍，過往跌到最低時人人話無得玩，但多年後就大升。

------------------------------------------------

Q22391：

龔老師，你好～我今年35歲，女，與父母同住，有62萬做了定期，會2023年到期。而股票是在今年六月才開始投資股票，現在有18萬在股票上，而現金只有10萬。

其實已經有一年多沒有上班了，原因是被診斷出我的腦部有一個先天缺陷，雖然已經經過一年多時間的治療和復健，康復進度理想，但始終影響了我半邊身的活動能力，

無論平衡力、腿部活動、手指活動能力、閱讀、寫字、表達或迅速反應的能力都受到影響。

但好在我是在大公司內工作，他們都具有一定的社會責任，仍然保留職位空缺給我，如無意外我將會在下個月復工。但人工相信將會下降至等同一個剛畢業生，

因為我的工作能力已經不及從前⋯

我估計自己將來的工資會是12K-15k左右，同時，我一直需要每月有1萬元給家裏作供樓用途，因此在這情況下我無法累積新的現金。

所以希望請教一下你，在這情況下：

1）我可以如何更有效地滾存現有的資金？

2）而我現有的投資組合有需要作出調整嗎？

同時，非常期盼你能來澳門開班，讓我能夠學習如何有效地增值財富。我已經買了五本你的書籍，但礙於現在的讀寫障礙，需要很長時間慢慢的閱讀，

期盼疫情過後能夠出席你的課堂。

00388 - 100股 $462.2
00823 - 200股 $75.3
01810 - 800股 $26.55
01928 - 400股 $29.6

02382 - 100股 $234.4
02800 - 2000股 $28.6
02845 - 50股 $154.1
03067 - 400股 $15.365

感謝你的寶貴意見

龔成老師︰

1) 你現時股票，都係有質素和適合你年紀，你照長線持有。但由於你本身健康因素，我建議你現金部份，留來備用會較好。

如果現時生活上未能儲錢，就唔好勉強去增加投資。到你身體狀況轉好，或者財政上較鬆動，才再考慮。永遠我地都係生活和健康行先。

至於你62萬定期，由於佢息口唔會太高，你可以將佢用來投資。至於投資目標，以你年紀計，應該係潛力股和平穏增長股。

但如果你每月收入，都未必能支付你基本開支，而這個情況，你預期係較長線，你可以用這筆錢，去買入一些收息股，目標係5-6%，大約每月都可以幫你創造$2500-3100現金流，去舒緩你每月開支。

潛力股︰比亞迪(1211)、中生(1177)、福壽園(1448)、安碩恒生科技(3067)、港交所(0388)、阿里（9988）、騰訊（0700）、舜宇光學（2382）、小米（1810）、ＧＸ中國電車基金（2845）、三星FANG ETF（2814）

平穏增值股︰指數基金、港鐵（0066）、金沙（1928）、煤氣(0003)、恆基（0012）、中銀香港（2388）、長建（1038）、粵海(0270)、領展(0823)、希慎(0014)、太古地產(1972)

收息股︰港燈（2638）、香港電訊（6823）、工行（1398）、恆生（0011）、置富（0778）、陽光（0435）、深高速（0548)。收息基金(3110)，都可以。

2) 暫時無需要，當然如果你有需要加強每月現金流，你可以將部份持股，換成收息股，都係無問題，緊記照顧好自已生活，永遠都比投資增值係優先。

至於澳門班，因為現時疫情，所以暫時停左，之後會再開翻的。

你或者可以預早留位，只要whatsapp 852-55457212我同事講，打「留位澳門班」就得。我地有具體資料就會 whatsapp你。

因為現時已有好多澳門人留左位。

------------------------------------------------

Q22392：

龔成老師：我的港股處於蝕錢階段，想請教你我應該如何做。

以下是我的持股:

9988: 平均價250，持300股
941: 平均價47.8，持1000股
939:平均價6.15，持10000股
883:平均價8.76， 持6000股
700:平均價685.75，持300股

388:平均價544，持100股
11: 平均價152.58，持200股
1038:平均價45.03，持500股

其實我想買英國樓，但D現金係股票度。謝謝你的指教。

另外，我亦有買了108股Tesla( 平均價為666.7），手持大概400,000港元現金

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

你現時持股都有質素(港股和美股)，但有少少亂，不同種類股票都有。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

如果你係年青至中年，0941/0939/0011這類收息股，就不宜持有太多，因為始終增長力較弱。相反，你係近退休之年，你投資上就可以集中係這些收息股上。

另外，中海油(0883)係商品類股票，價格自主力能低，質素只算中等，不宜持有太多。

現時大市只在合理區，未算係好平宜。你現有40萬現金，建議先儲起，等大跌市出現時，才動用。

至於是否買英國樓，你可以睇翻你有無實際需要，若有實際需要，你可以分段沽出部份股票套現。

如果只係為左投資，你就要考慮翻佢回報率是否吸引。以過往港股長線波幅，都大約有8-10%(連股息再投資)。如果你覺得都有這個數，你對相關物業、法規、市場等又有一定認知，你都可以考慮。

------------------------------------------------

Q22393：

龔Sir，你好，我今年50歳，有自往物業，現金一千萬，請問現在買樓收租好嗎？樓咁貴，仍有升值潛力嗎？謝謝你

龔成老師︰

從投資角度計，現時租金回報率不高，投資在股市，值博率會較好。而且，你本身已有一間物業，我建議你先用優質股增值，從增值角度或資產平衡性計，都會較理想。

以你50歲，可以選擇一些「平穩增值股」作投資目標。

以現時大市合理區狀況，你可以用200-300萬，以分注形式，慢慢買入以下優質股。餘下資金，我地就等大跌市，才加大力度入貨。

但由於你資金都較多，長線你都應該再加持物業。但現時先用優質股增值，到將來樓市有明顯回調，或你在期間發現優質又平的旬盤，才再去加注物業市場。

------------------------------------------------

Q22394：

龔老師你好。我今年23歲，是一位大學生，每月大約有4000元港幣的收入請問我可以怎樣投資在30歲前達到100萬的資產？

還想請教老師，母親今年48歲，有45萬元的現金，請問可以怎樣投資？

感謝你！希望得到您的回覆

龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時23歲去計，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

策略上，你可以投資「平穏增長股」和「潛力股」。你每月5成儲蓄，即是用$2000做月供。其餘先儲起，用一邊月供一邊儲蓄的策略。

餘下的另一半現金，我地就等機會，當大市出現較大回調，就加大力度掃貨，然後作長線投資。

假設投資回報有10%（連股息再投資），你每月投資$4000，30歲時大約會增值至45萬。雖然好似同你目標，有好大落差。但你很年青，收入增長力較高，你可以慢慢加大月供金額，以達至一個可完成你目標的水平。

至於你媽媽，由於佢已經係中年人士，投資要比你保守，只宜集中係平穏增長股身上。

現時大市只是合理區，你現有45萬資金可以先投入10-20萬，用"分注"形式，慢慢買貨。餘下資金，就等大市出現一定程度的下跌，才大力度掃貨，然後長線投資。

------------------------------------------------

Q22395：

龔sir, 你好!想問一下 偉易達 (303) 用市盈率估值法 or 用股息率估值法 比較好?

我用客觀方式用市盈率估值法(用五年數據: 市盈=11.88 至16.42, EPS=$6) 計到合理範圍$72至$99, 我的計法對嗎?

謝謝回覆!

龔成老師︰

其實2個計法，都係可以，你可以互相配合，去得出一個較立體估算。

市盈率你可以拿長少少時間，用10年個計法，去找出市盈率合理範圍。而EPS係正確，大約係HKD6。

但你計算後，你會發現個合理範圍較窄，你記得要加入緩衝區，對相關估值進行調整。

若以股息率計，佢達9%。但由於佢股息較波動，加上企業質素唔算好高，大約算係合理區底部。

根據2種分析，此股現價大約在合理區較底至初步平宜區。如果你目標係收息為主，加基本增長，此股可投資，但不能太過大注。

緊記，我地估值法有好多種。最理想就係用不同估值法，去立體得出一個答案，咁會較為穏當。

------------------------------------------------

Q22396：

老師︰微盟 11.32入左
9666 57.25入左
2400 62.5入左
493 1.7有49000股
巴巴 276 入

應該止蝕定溝貨，謝謝

龔成老師︰

首先你要正確了解翻，加注這個概念。我地決定加注與否，要睇幾個因素。但記住，絕對並不會是「拉低平均買入價」為目的。

第一，要分析這股的質素，如果無質素，就再跌都唔加。

第二，這股的類別，如潛力或增長或收息類等，是否與你的財富組合匹配，比例是否適合。

第三，你要先計算加注後，這股佔你股票組合的比例會否太多，因為同一行業，同一股票。不能佔股票組合的比例太多。

第四，現價是否有投資價值率，要平，或起碼合理，不能貴。

第五，你要在加注後，仍有現金剩。

記住，重點不是「拉低平均價」，而是組合比例與配置。

你現有持股，大多有質素。但金科服務（9666）、微盟(2013)、心動公司(2400)不確定性較大，只宜小注。。

而且，你持大部份都係科技相關行業，有過度集中性風險(個別行業不應佔組合3成以上)，就算再平，都時不宜加注。

國美零售（0493），從過往分析，質素只是一般。

企業連續出現虧損，品牌價值遠不及從前，優勢不強，雖然正加強網上網售網絡。

唯一的賣點是創始人黃光裕回歸，可能帶公司變強，但發展仍有未知數，如果以這刻的業務、發展、現價，整體的投資價值唔算高。

當然黃生可能帶領公司變到好唔同，但這點真的無得計。以理性分析，這刻投資值博率，只是一般。

因此，你以上股票可持有。但考慮到組合平衡性問題，建議你新資金，優先投資在科技類以外股份(而非在現有股票加注)，去令組合更平衡，才是理想做法。

------------------------------------------------

Q22397：

龔老師，想請教一下投資策略，本人現時48歲，沒有物業，存款有100萬，另每月可供$5000。請問我該選什麼股，ETF, REITs 呢？香港或外國都可以，可以教我嗎？多謝

我的計劃是買
$30萬（2800）
$30萬（2638）
$20萬（0066）
$20萬（0002）

每月供
$2500 美國（VTI)
$2500 加拿大 （Riocan)
請指教

龔成老師︰

以你48歲計，都有一定財富增值需要，但進行時就要保守少少。

你現時月供計劃，其實都已經可以。但RIOCAN係專注於單一行業，有少少集中生風險，我建議更改為$3000 VTI和$2000 RIOCAN，咁會較好。

另外，現時大市未算平，每月要留有一定現金，去等大跌市機會出現。

至於直接買入選股，都係可以。但同樣現時港股只在合理區，你可以先用一半資金，分注咁慢慢儲貨。餘下一半，就等大市有明顯調整，才慢慢加大力度入市。

以下是一些都適合你年紀的股票，除了ETF和REITS外，我都比埋一些單一企業的優質股你作參考。

平穏增長股︰VOO、盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

------------------------------------------------

Q22398：

龔Sir你好，我追蹤咗你嘅FB一段時間，好多謝你無私付出。我第一次問問題，希望你可以撥冗回覆：

我$14入咗6000股微盟（2013），我有持貨能力，但考慮到騰訊和阿里合作平台的消息，是否會影響到微盟長遠的賺錢能力，還可以長期持有嗎？謝謝你。

龔成老師︰

微盟集團（2013）集團主要在中國從事提供軟件即服務產品及營銷服務。

佢的產品分為「商業雲」解決方案、「營銷雲」解決方案及「銷售雲」解決方案三類。

「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及ＡＩ技術為商戶提供智能營銷服務。

這些都是將來發展的大趨勢，從業務潛力上，的確是有的，見佢財務數據的增長都強勁。

至於，騰訊和阿里合作消息，其實好多具體細節，我地都唔清楚，好難咁快判斷成件事，是好是壞。

只能說，此股中短期股價，一定會較波動。如果6000股佔你組合不多，你長線持有就可以。但若佔較大比重，你可以考慮沽出少少，去平衡一下風險。

------------------------------------------------

Q22399：

龔老師你好，你給予大家既意見好中肯，你寫既書都好有啟發性，多謝你分享咁多！

我自己最近有啲野念極都念吾明，所以想向你請教下啲睇法。6988樂享互動，營銷SaaS服務的定位，我覺得前景吾錯，公司有錢賺，但股價就未有反映出嚟！

我3.1入，現價2.6，我想知我係咪應該繼續持有？

麻煩老師解答，感謝老師！

龔成老師︰

樂享互動（6988）是中國的效果類自媒體營銷服務提供商，利用商業智能技術為行業客戶及自媒體發佈者提供服務。

睇翻近年的財務數據，佢增長力是有的，但上市前的數據參考價值較低。

相信佢長遠，業務都有增長力的，公司話佢自己能盈利高增長，但佢估值一直都唔平，你買入價都算係偏貴水平。

就算現時回落，都係合理翻D，未算平。此股你預佢中短期，都係較波動。如果你持貨不算多，可以守住先，再觀察。

------------------------------------------------

Q22400：

Hi 老師，-我想問家人有20萬現金 在股票市場應該如何分配？

-現時有：

$2.4買入1萬股中國銀行，$13.5 買入3000股中國人壽 需繼續持有定沽出？

-佢地半退休狀態，希望將儲咁耐的現金流，變更多金錢。為未來退休做准備，謝謝你

龔成老師︰

若你家人已進入半退休狀態，穏定現金流去支援生活開支，會比財富增力為主要，所以配置上，會較以收息股為主。

中行(3988)係唔錯收息，可持有。中國人壽(2628)有增長力，但質素只係算中等，近年賺錢能明顯弱左，不宜持有咁多。

未來組合，建議一半用指數基金，可以為組合帶來股息之餘，都有平穏增長力。

另一半，就係收息股。目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）、富豪產業（1881）等（記住，股價略波動，不能太過大注）。

現時大市只係合理水平，現金佔比重大約3-5成，你可以再投入多少少資金，去分注入市。餘下資金，就等大跌市出現，才加大力度掃貨。

但留意一點，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

特別係銀行業，佢營運模式較特別，風險會比一般行業為高。必需堅守30%這個準則，如果可控制在20%以內，會更好。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q13681-Q13700）

Q13681：

老師，我係你學生，想問下：

1. 你說過中電和港燈是資產型企業，對嗎？是否因為政府准許利潤等於總資產價值的某百份比，資產越多，准許利潤越多？

2. 當用行業分析去比較某企業和其行業整體表現，你怎樣找出某行業五年內的生意額平均增長率、每年的行業平均毛利率等？如果你自己計算，你會怎樣計平均數？

龔成老師：

1）對。

當我地分析企業是否資產型時，會考慮佢本身的資產變現能力，以及資產與盈利間的相關性是否好高。

2）我會找出這行業較有代表性的企業，例如我現時想分析某行業某檔次的企業，就要找翻該行業該檔次的企業，找數間，去計算佢地的生意與盈利增長。一般會用過往5年的數據去分析。

------------------------------------------------

Q13682：

你好, 龔sir
我想問下如果長期月供2822好唔好, 每月5000

龔成老師：

南方A50（2822），追蹤中國股票的指數基金，可投資，但你要明白，這股比較波動，即是說風險度會比盈富（2800）略高，因為集中在中國，同時當地股市較波動。

你要衡量是否適合你的風險度。這類股，可月供，但不建議太過集中。

------------------------------------------------

Q13683：

成哥，離岸戶口好嗎？
有什麼好介紹謝謝

龔成老師：

簡單來講，離岸戶口就係指，存款人在居住國家或地區以外的地方，開設海外銀行戶口。

離岸戶口的資金轉左後，就不再受本地去監管，而是根據離岸戶口所在地的司法系統監管。

其實，唔少人去外國如留學、工作假期、海外投資，都需要使用海外戶口方便在境外使用。

其實開設離岸戶口，透過銀行或證券行，不過證券行風險就可以會略高，選擇銀行較好，例如匯豐卓越理財或運籌理財、花旗Citigold、Citi Priority等。

------------------------------------------------

Q13684：

龔老師：你點睇新盤愛海頌呢，有無發展/升值潛力呢，環境又是否適合自住呢？謝謝

龔成老師：

坦白講，不少新樓的價格，都會比佢的真實價值略貴，同時由於無租金回報率數據可以參考，因此買家更難分析平貴。

因為你的對手是發展商，你好難找到佢地著手。但若在二手市場，你的對手是另一業主，就有機會找到著數。

最重要是你每月的供款，佔人工的比例不會過多。希望每月供樓後仍有資金剩，位置等因素不差，始終都市區，但就不能說好好。

你可以比較翻同區二手價，如果佢開價較貴，就唔好追，如果與二手價相約，就有投資價值。

------------------------------------------------

Q13685：

Hi, sir. 有幾個問題想請教你~
1) 長飛光纖A股成32蚊,但H股先1X蚊,點解市場會容許依個價格差距?
明明盈利派息都係以股數平分,冇跟比例黎分

2) 係你之前上堂比果張股票分析表入面,有一項係要每股盈利增長>10%
但我發現長飛光纖個每年盈利增長同每股盈利增長個比例唔同
i) 2015年: 盈利增長係15.34%但每股盈利增長係-11.71%,以我所知果年佢用$7.X配售H股,係咪以合理價錢配股其實對小股東冇乜大影響?我既理解係當股數增加,但配完股D錢又入返公司,所以其實股價應該冇大影響?

ii) 2016年: 盈利增長係18.72%,每股盈利增長係11.47%,
iii) 2017年: 盈利增長係90.83%,每股盈利增長係91.12%,
以我所知,依2年股本冇任何變化,有咩因素令但2邊個比例可以唔同?

iv) 2018年: 盈利增長係11.51%,每股盈利增長係6.71%,用2X蚊黎配售A股,佔總股本11%,同埋配股同武漢長江通信產業集團股份有限公司訂立股權轉讓協議。但A股平均價係3X蚊,好似有D唔Fair?

3) 想請問以上咁既行為符唔符合每股盈利增長>10%?我覺得係可以接受,你點睇?

4) 其實用每股盈利增長做量度指標既作用了解到間公司有冇大量配股黎溝淡盈利?

Thanks you sir!

龔成老師：

1）因為A股市場是一個不完全開放的市場，因為與我地市場的價值，一般都會有差距，但就好少有好大的分別，因此這是少見的。

當中在2個因素，第一，香港市場會睇較多實際的經營情況去做企業估值，而A股市場則偏向前景，所以當前景較多期望時，就會出現這情況。第二，A股市場由於不完全開放，所以好大程度，股價只基於供求，當市場流通性較少，就有機會出現這情況。

這股其實有質素的，但中短期仍會較一般，不過長期仍是正面。

2）你要睇總股本，可以財經網只顯示H股的股數，而我地要用總股數去計先得，因為每股盈利，一定是由總股本去除的，你可以在年報找到相關資料。

至於配售，其實這些不公平的配售，都不是等一天在上市公司出現，好多上市公司都有這情況，這是制度的問題。所以我地見到這類情況，只能自行調整翻少少合理估值。

3）仍算是合格。我地唔需要太執著於所有數，只要大致合符，已經算是過關，當然，這只是分析的其中一步，我地仍要再進一步分析的。

4）只要我地用長期的每股盈利增長，作為分析點，已經考慮了股數等因素的變化。

------------------------------------------------

Q13686：

老師，月供股票，係咪一定每年都要隻股上升，否則可能蝕水，好似MPF咁？

龔成老師：

其實月供股票是一個長期策略，例如5年，所以我地唔需要太著重中短期的股價，唔需要每年賺錢，只要長期向上就得。

最好的情況，就是頭幾年股價不斷跌，咁我地不斷月供，就可以買更多的平貨，然後到5年後升，這就會有最大的回報！

------------------------------------------------

Q13687：

老師 可以分析2772嗎？

龔成老師：

中梁控股（2772）係中國大型地產開發商，主要業務包括物業銷售、管理諮詢。

睇翻佢的物業情況，項目位於中國個核心經濟區域（即長三角經濟區、中西部經濟區、環渤海經濟圈、海峽西岸經濟區及珠三角經濟區。土地儲備為3800萬平方米，業務及資產都不差的。

不過，佢是上市不久的股票，這類股其實較難分析，因為上市公司的真實面，好多時都要1、2年後先慢慢出現。同時，這類股的股價波動一般較大，風險較高，你要自己平衡風險。這股如果你持有小注，都可以。

------------------------------------------------

Q13688：

你好龔成老師，我36歲，從未買過股票，最近被你啟發，也買了你的股票勝經，請問現在是否不應入市？保留現金等待大市下跌才入手優質股呢？

我希望可以長期持有令資產有所增值，我有$20萬閒錢，應如何分配？

感謝你的分享，期待你的回覆

龔成老師：

我地會睇翻現時的大市平貴，去決定入市的力度。

現時股市處合理區，但並不是平宜區。因此，你最好將部分資金投資股票，同時留有一定的現金，這是最好的策略，你這刻完全無貨，並不是好的財富配置，因為現金始終會不斷貶值。

如果你初階，建議你將其中的$5萬-$7萬，投資盈富（2800），分注入，長線持有。同時好好增加投資知識，之後先慢慢運用餘下的資金。

------------------------------------------------

Q13689：

老師，我幾個問題想請教：

1:請問如果1隻優質股，假如只有1手，但出現明顯貴的現象，係唔係應該都要放左佢?thanks

2:請問老師用咩手機apps記得自己果d股票比例，有冇推介下?thank

3:請問3140，應該點睇平貴，見佢又冇市盈率，又唔識美股，上完堂想買番個美股etf長擺等佢自己升

4:老師，請問有關借錢買股既問題，先問銀行借錢買收息股，再以5/6%息率既收息股黎還比銀行，咁樣其實有冇著數，長遠計好似等於收息股幫我還錢比銀行咁，其實我咁既諗法有冇錯?thanks

龔成老師：

1）如果佢係好優質的股，我建議持有，但如果只是一般質素，或少少優質，都可以賣出。

2）我會用簿記低，因為我每月都會寫翻「個人收支表」「個人資產負債表」，你睇《財務自由行》，有教你點做。

3）你要睇翻美股果邊現時的市盈率先得，基金一般都唔會顯示平貴，你要找翻果邊的資料。你預現時是合理區。

4）這樣是可以，但有個前提，你的投資回報率，一定要大過借貸的實際年利率。

------------------------------------------------

Q13690：

你好龔成，我之前有睇過你啲片，同文章，都留意到，你多數話入都係2800，我之前都有研究下，但都係菜鳥，所以想請教下你，2800呢隻，佢係跟恆指上落，其實呢隻係收息好嗎？如果2800跌同升都照入？

我心目中係想買啲穩陣，同收息既股，一有閒錢就入當儲錢。

另外一問，點解2800你咁推介？

龔成老師：

因為盈富（2800）是一個組合，比起單一股票，佢可以有效減少集中性風險，對不懂選股的初階者來說，這是一個很好的選擇。

另外，恆指裡的股票，都是一些大型、有代表性、有一定的質素的股票，因此，長遠的增長力不差。

盈富股息率，你預約為3%，以收息來說，不算多，但佢本身就有基本的增長能力。

你可投資盈富，以及一些穩健收息股，建立一個平衡的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435）都可以。

------------------------------------------------

Q13691：

你好，新手投資零經驗，而家想試下投資擁有多兩陪甚或三倍金錢。

手頭上資金得8萬左右

龔成老師：

記住，投資風險與回報，往往有一定的關係，如果追求太高的回報，有不能面對太大的風險，這樣未必值得。

如果是初階，先從平穩增值，穩健類入手。投資始終是「在可承受風險的情況下，追求合理回報」。

因此，我會先建議你投資盈富（2800），同時增加你的知識，當你有知識後，先投資潛力股等其他較高風險，較高回報的類別。

------------------------------------------------

Q13692：

我是freelancer 教音樂的老師，32歲，月入大約7-8萬，投資都是在不同地方買物業為主，大陸一層，買時20萬，現價60萬。

香港的一層現價450萬 已供100萬，月供1.2萬， 馬來西亞一層還要供100萬，大約供多7年，現金流大約50萬。

希望4-48 歲可移民馬來西亞退休，你有建議嗎？每月連供樓所有開支大約4萬多，每月可儲3萬元

龔成老師：

你建立一個環球的物業組合，當然是不錯的策略，但你都要留意翻，這樣會令你的財富組合，太過則重於物業類別。你應該同時投資其他類別，以平衡整體的風險。

建議你每月將$20000，做月供股票，你可以考慮一些ETF，例如盈富（2800）、南方A50（2822）、領航標普五百（3140）。這些都是平穩增長型的基金，都是適合你的年齡，你可以作長線投資。

另外，如果你能承受少少風險，就可以加翻少少潛力股，作為提高組合回報的一員，例如比亞迪（1211）、中生製藥（1177）等。

------------------------------------------------

Q13693：

龔成老師，我係一個媽咪，53歲，任職夜間保安員，現時有約25萬港幣作投資用途（岩岩完左美元定期，仲未轉返港紙）。想請教一下老師應該如何運用？

本身有一間自住的居屋，已經供斷左，現在目標是2-3年內搵到首期買多間居屋，出租賺取租金。投資在香港股票還是美國基金比較好呢？

另外我持有大概30萬股票：

德視佳(1846) 9000股 - 11.14買入
南方能源(1573) 40,000股 - 1.86買入
太興集團(6811) 30,000股 -1.87 買入
金嗓子(6896) 20,000股 2.01買入
敘福樓(1978) 50,000股 0.82買入
承興國際(2662) 50,000股 1.18買入
百威亞太(1876) 400股 29.6買入
騰訊 (700) 200股 348.4 買入

請問我的投資組合應該點樣調整呢？
唔該哂老師！！！

龔成老師：

先講你上述的股票，部分的質素一般，你要注意。而我地繼續持有一隻股票與否，關鍵位就是企業的質素、前景，買入價只是一個心理因素。

德視佳（1846）質素只算一般，業務波動，投資價值一般。
南方能源（1573），風險高，投資價值不大，建議賣出。
太興集團（6811）都算有質素，可持有。
金嗓子（6896）都算有質素，可持有。
承興國際控股（2662）如復牌要賣出。
百威亞太（1876）可持有。
騰訊（0700）可持有。

你將有問題，或質素不佳的股票賣出後，將資金投資更優質的股，如盈富（2800）、港交所（0388）、港鐵（0066）、金沙（1928）等。

至於你現時現金的安排。

以你的年齡，其實會開始慢慢為退休做準備，但同時，財富仍有增長力（但不是進取），因此，你可以投資「平穩增值股」+「收息股」。

同時，你可以做月供股票，供「平穩增值股」+「收息股」，但就隨著年齡增加，慢慢增加收息股的比例。

平穩增值股，例如盈富（2800）等這類。

同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435）都可以。

------------------------------------------------

Q13694：

成哥，你好！
請問#3110恒生高股息率在2019無派息？

龔成老師：

因為佢的基金公司，進行了一些收購合併情況，所以你見佢連都3110的基金名改左。現叫ＧＸ恒生高股息率。

不過你唔需要擔心，因為佢裡面的資產，無任何改變，投資策略等都無影響。

我相信因為這類原因，佢改左派息模式，有可能一年派一次，或遲少少先派。其實佢遲派早派，你唔會因此而有損失的，只是派的日期問題。

------------------------------------------------

Q13695：

你好，我本身家庭有兩個孩子加太太！自己住屋村（已經埋下不用供款）家族祖屋不可買賣！

本人50歲！現有1,000,000現金！可作什麼投資！期待。。。。60歲時！可退休

龔成老師：

你本身有物業，因此在配置上，最好投資非物業的資產，這樣可以令你的組合更為平衡。

你可以將這$100萬，分成4部分。

第一部分投資收息股，你可以建立一個收息股組合，你可考慮港燈（2638）、香港電訊（6823）、匯豐（0005）、工行（1398）、置富（0778）、陽光（0435）、深高速（0548）等，大多有5%股息

（你可睇下《50穩健收息股》當中仲有好多）。

你平衡的投資這些股，除了可以得到穩健的收息收，同時可有效的分散風險。

第二，投資債券，你可以選擇A評級的債券，年期較長都可以，但利息卻不高。你可以到銀行問問。

第三，投資年金，你可以睇睇，這是適合你們的產品，零風險，可以有穩定回報。

第四，持有現金，除了可做定期外，現金亦可以為你的後盾，以備不時之選。同時，若投資市場大跌，你可以在這時買到更多的收息股，股息率會進一步上升。

你可以將$100萬資金，平衡地分配在上述的項目上，對你來說是最好平衡風險，同時有穩定的現金流。

------------------------------------------------

Q13696：

老師你好呀，我follow你個Page好耐了，好多時都令我學到好多嘢！想同你講一句多謝先！最近我有幾個問題一直諗唔通，所以想請教下你呀！

話說呢排中國對P2P嘅監管收窄左（之前爆左煲出左事），我同朋友就傾起一間大陸公司，喺美國上咗市，叫和信貸（股票代號： H X ）佢由一開始上市16個幾，跌到剩返依家嘅0.6幾。

但係其實佢嘅業績唔差，而且亦都比其他同行有好多牌照，加上我有啲朋友都係大陸做呢一行，佢都話呢間公司其實個品牌唔錯，產品都幾多元化，應該可以好有發展，但係點解個股價可以跌到咁誇張？

我之前聽老師你解釋過，明白股價有時會有浮動，但係呢個差距好似太誇張

呢個咁低嘅股價其實會唔會暗示緊間公司有問題？

因為我有朋友有買佢嘅產品，驚佢倒閉回唔到本..定一話其實仲有其他更多因素影響緊個股價而導致出現呢個情況？希望老師可以指教！！非常感激，多謝～～

龔成老師：

如果股價有這樣大的跌幅，一般都有一些核心的問題，而你作為投資者，就要找出原因，一定要明白點解會咁跌，之後就要分析這個因素，是中短期或是長期，這因素的風險情況。

之前中國的確好多P2P公司出事，同時令監管收窄左，這一定會影響行業的發展。而你就要分析翻，佢本身的業務，會唔會因為這些收窄左，對佢有長期的影響，我相信你朋友在大陸做這一行，應該能分析到佢的情況。

首先，你要了解佢的業務，同時，分析翻中國收緊左監管，會唔會令佢無得做生意。如果有些業務令佢無得做，這會影響到佢的現金流，佢一下子翻唔到錢，的確有倒閉的風險。

同時，政府這些動作，會唔會影響左佢D客，令佢D客無錢比，從而對佢資產有影響。

在你未有答案前，就要小心，你見佢股價跌咁多，可能是一些較專業的投資者及機構，已計出佢的風險度大增，當中的資產質素惡化。

------------------------------------------------

Q13697：

龔成你好，本人40歲，請問1299,2800,2388
for長線現時投資得過嗎？還是買樓出租更好

龔成老師：

如果以現時的投資市場計，投資股票的回報仍高於物業，除非你能在物業市場，找到比市價較低的物業（這就值得投資），否則，這刻投資股票先。

你上述的3股，都是有質素的股票，你可以投資，長線持有，但當中有2股都同金融業有關，因此，最好加上其他類的股，令組合風險更為平衡。

------------------------------------------------

Q13698：

你好，我最近接觸投資剛剛兩個月，不斷嘗試學習投資知識，而資金情況如下：

=）之前股票都全放出，手上持有大約30萬可動用投資現金（並冇持有任何股票）
=）年輕人，暫時沒有工作
=）短期目標希望投資可以帶來每月5萬收入

想問關於這個投資方案應該如何計畫，買入藍籌股➕reits 還是短期追入將會派息的股票？
謝謝

龔成老師：

你要明白，當你追求太高的回報時，風險亦會好高。而我地投資，要在自己可承受的風險程度下，盡力爭取回報。

如果每月$5萬的投資收入，即是一年投資收入為$60萬，以現時的本金來說，這是十分困難，你一定要承受好高風險先做到。而就算是巴菲特，一年的回報率都只有20%，因此，你要想翻事情的合理性。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。我希望你一步步，從穩健類股票開始，同時增加知識。

你可以考慮盈富（2800）$2000、銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）等，你可以了解下這些股票，然後從中選股。另外，房託亦是適合你的，但一定要長線投資。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

你現時無收入，更加要穩健為主，你可以一邊找工作，一邊利用時間增加投資知識。

------------------------------------------------

Q13699：

阿sir你好，我係你既讀者，非常認同你所講要分析股票係屬貴定平，唔係淨係睇價位。關於ETF 我想問，2800可以點樣睇屬貴定平？

唔知ETF係咪應該用技術分析？

我除左2800都有買美股既ETF (只買VTI一隻）, 兩樣都係每月定期買入，美國隻ETF表現非常好。

因為定投既關係，我又無刻意去諗係屬平定貴。請指教一下，謝謝！

龔成老師：

技術分析證實左完全無用，同時巴菲特都唔會用。

我地投資ETF，原理就是買入背後的資產，例如盈富（2800），就是追蹤著恆指，因此我地要分析恆指的平貴，最簡單的分析方法，就是利用市盈率去分析，10倍以下就是初步確認為平宜。

以現時的市況，大約24000以下就會進入這區。

至於美股，分析的原理都是一樣。

不過，如果你每月買入，其實唔需要太著重平貴，因為買入價能長期平均。你保持現時的投資策略就得，唔需要太刻意理會平貴。

------------------------------------------------

Q13700：

請問咩係市場缺口
唔該晒你恩師！

龔成老師：

市場缺口就是市場中有需求，但未有或未有足夠供應的領域。

例如大家都好多飲某飲品，但卻無供應，這就是一個市場缺口。其實我初出書都有這情況，因為我睇左好多年書，明白當中的市場。

但我找不到一本我最想要的書：「教我一步步，如何合理累積財富，不是停於理論，而是由理論到實戰，由思維到行動」。

我睇左好多書，好想找一本這樣的書，但市場無，而我問我其他喜歡睇財經書的朋友，佢地都表示如有都想睇。

於是，我知這是市場的缺口，因此我自己出，寫了《80後百萬富翁》。

所以，你一定要從市場的需求面著手。

----------------------------------------------

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

以下是一些美股ETF在2013的報酬

專門投資美國高股息類股的VYM, 年度報酬 30.26%

專門投資股息連續增長股票的VIG 報酬率28.99%

MOAT投資有寬廣護城河，且股價/合理價位(Price/fair value)比最低的公司，報酬率30.88%

沒有什麼特別投資策略，單純依市值比重買進股票的VTI則有33.51%的報酬

這個例子說明了，
不見得有特定策略就會拿到比較好的報酬
單純市值加權的無所做為
不見得會落後

政府因應高房價推出新版 #房地合一稅，能有效抑制房價嗎？有可能實行新稅制後房價腰斬，讓我們有機會進場撿便宜嗎？如果手上有筆買房頭期款，用來買房還是投資好？如果用來投資，買 #0050 或 #台積電 能打敗房租嗎？

⁉️ 投資朋友你會將頭期款用來買房還是投資呢？歡迎在影片下方留言告訴我們哦～
---------------------------
0:38 一表搞懂房地合一稅2.0版
2:27 新稅制實施後還有 #投資客炒房 嗎
3:00 價格上漲2要件
4:36 台灣房價合理嗎？
5:29 #房價下跌 20趴可能嗎
7:45 政府能接受房價下跌極限
8:22 #溺水屋 是⋯⋯
9:10 高房價跟低薪有關？
10:18 比較各國房屋税率，台灣有較高嗎?
11:07 新稅制能讓房價下跌嗎？
11:43 買房頭期款300萬，拿來買房好還是投資好
13:04 台積電上看1000元！ #台股2萬點
13:58 如果萬一利息上升投資也賠，怎麼辦？
---------------------------
【投資嗨什麼FB】https://www.facebook.com/hitoinvestment
【投資嗨什麼IG】https://www.instagram.com/?hl=zh-tw

(免責聲明)本片內所有音效/配樂/動畫均屬該音效/配樂/動畫作者所有，如有侵權，請告知删除。謝謝。

#投資嗨什麼
#JOE是嗨投資
#投資嗨Sharon
#財經雪倫
#房地合一稅