Laiying エミー TANG 鄧麗英 真係一個好有才華嘅演員
亦都係香港近年好少有嘅女喜劇演員

[方以文問兩句] [Laiying エミー TANG 鄧麗英][教束]
[立即重溫 鄧麗英 精彩表演：《教束》https://viu.tv/encore/limited-education]

「不老騎士，為你做事﹗」當日一句「你哋需要我呀？」就吔住隻糯米雞應承加入不老騎士內閣嘅阿Mo，喺劇裡面唔算多戲份，但每次出場都好搶鏡，唔係因為佢成日食住嘢，而係因為佢啲反白眼同埋不屑嘅表情，真係震攝咗全天下。到底麗英佢係點練成一身輕蔑世間萬物嘅武功呢？

———————
問：你喺咩機緣之下參與《教束》嘅拍攝呢？喺拍《教束》之前有冇參與過其他演出？有冇演戲訓練背景呢？

答：喺上上年碌Facebook嗰陣時，就見到《教束》嗰個演員招募。佢個poster好得意嘅，有政府印出嚟嗰個兩個公仔[ 按：係小一入學申請表嗰兩個出現咗幾十年嘅男女同學仔] ，所以就去咗睇。咁見到裡面招募嘅角色都超得意，好似「零死角缺點王」之類嘅形容，覺得幾得意喎，咁所以諗都冇諗就遞咗表喇。

《教束》之前都有參與其他演出嘅，有學生作品，如果公開作品嘅話就有劉德華先生嗰套《熱血合唱團》、甄子丹先生嘅《大師兄》。因為自己一直都好鍾意演戲，所以一有機會都會去試吓。我中學時候有參加過三年劇社，之後畢業到依家都有參加啲戲劇workshop，係一啲常規課程，一個星期一次去做啲戲劇訓練。

———————
問：阿Mo呢個角色好鬼爆同埋hyper，係劇組同導演本身嘅設定？抑或係你自己加啲瘋狂元素落去呢？你本人同阿Mo又似唔似呢？

答：阿Mo呢個角色係導演組諗，本身諗呢個女仔係超級為食，仲好似食零食食到有癮咁。啲瘋狂元素，好似係咬魷魚絲同埋啲詭異笑容神態就係我自己加。可能當初casting導演都係睇到我呢樣嘢先搵我做阿Mo，所以都好多謝佢。

我真人同阿Mo唔係好似，我唔係成日食零食，嘢都唔係話成日食，呢個係最唔似嘅地方。另外，阿Mo啲表情咪超級誇張嘅，有時感覺係有啲creepy，真實嘅我就梗係正常好多啦，係同啲好熟好熟好熟嘅朋友，先會用呢啲誇張表情同奇怪動作去玩吓。

———————
問：拍劇時你食嘅零食係平時嘅幾多倍？有冇肚痛？

答：拍戲嗰時係我平日食零食嘅兩三倍，拍《教束》之前完全好少掂零食，係喺劇組裡面狂食，基本上每一次拍我都要帶住個零食袋，裡面就裝住啲魷魚絲、百力滋，拍嘅時候係咁食。拍完呢套劇我覺得自己都有少少上癮，會食吓零食咁。慘喇，今次真係肥喇。

———————
問：阿Mo同狗榮有好多糾纏嘢，仲有同神婆嘅三角關係。你同 #程人富、 #盧蓁宜 兩個係點夾呢？

答：我同程人富同神婆就冇特別夾嘅，好好彩我哋三個都係好傾得埋。我諗最大功勞應該係人富，佢平時都好主動叫我同神婆Claudia一齊去睇電影，佢成日推介周星馳，又會同我哋一齊傾偈。我平時係同Claudia玩多啲嘅，會唱吓歌呀、分享吓心事，因為不老騎士得我哋兩個女仔嘛~ 就係咁樣，慢慢熟絡起來。

———————
問：有咩想同程人富講？

答：超開心喺《教束》識到程人富，佢成日等埋位時又會同我哋唱吓歌、玩吓咁樣。我覺得佢真係超級有趣嘅人，好開心好開心識到佢，希望之後我哋都繼續咁好朋友啦，但如果係狗榮就，嘩，不了，哈哈，你快啲同神婆一齊啦。

———————
問：成套劇播到第16集，你絕大部分時間都係嘻嘻哈哈。到你埋數揭發學生會有人穿櫃桶嗰段又幾好睇喎，沉落嚟都做得到。你覺得hyper定係沉實難做啲呀？演hyper同埋沉實又邊樣好玩啲？

答：好多謝你覺得我嗰段做得唔錯呀，多謝。我自己覺得沉實係比較難做，我覺得自己演喜劇係比較好，要好大動作或者去做啲搞怪嘅表情、放開自己呢樣嘢會比較拿手少少。演嘅時候就難度不大，因為日常當中都差唔多有呢啲嘢透滲喺裡面。

但係沉著嘅戲呢，我哋唔可以一場戲如果唔開心嘅話，個表情唔郁或者唔笑就okay，咁係唔得嘅。因為內在要有種tension，做啲沉實嘅戲先會好睇。我聽 #劉俊謙 同埋 #朱栢謙 分享都係咁講，我覺得係要學嘅嘢。

Hyper同埋沉實我好難揀，因為兩樣演嘅時候都好鍾意好enjoy，因為hyper可以有好多種方法去表達出嚟，癲之餘仲可以更加癲。沉實對我就一定係個挑戰，因為我自己唔叻，要去學，要搵個方法令自己快啲入到種感覺，或者點樣可以喺鏡頭前面更加表現到出嚟，可以令到人感動。

———————
問：你自己最鍾意邊一幕？如果可以重拍你會有咩想改善呢？

答：我最鍾意係阿Mo一開頭食糯米雞嗰一幕。嗰一幕係一睇就知佢係個好為食嘅女仔，同我自己係好唔似。我拍嗰時都有少少驚，但出到嚟又幾好睇，好似真係有人係咁食嘢，所以我都滿意嘅。如果重拍嘅話，我諗係學生會自我介紹嗰一幕啦，因為我覺得可以做多少少表情或者其他嘢，可以更加放，咁樣阿Mo嘅性格會更加出。同埋嗰時對於鏡頭嘅位置唔係好知，好多時都望咗去地下啲位、塊臉又唔知擰咗去邊度呀，sense有啲差，如果可以嘅話都想喺呢啲位改善吓。

———————
問：你把聲好正喎，喺劇中有扮聲之外，我見你有upload自彈自唱嘅片，成日都唱日本動畫歌，有冇諗過做聲優 / 歌手？ [按：麗英自彈自唱 >> https://www.facebook.com/laiyingdesu/videos/414798579296560/ ]

答：喂呀多謝晒多謝晒。我細個嗰時有諗過做歌手，去到中學就冇。咁嗰時大家都顧住讀書啦，好少有話追夢咁。多數聽到人講最緊要入大學、搵份好工呢啲。都係畢業之後先諗吓去做自己鍾意做嘅嘢。如果有呢個機會都想試吓唱歌，都唔錯嘅。不過歌手就真係冇乜諗，應該話係唔敢諗，因為有咁多人，又咁靚女，係都佢哋做歌手先啦。配音員係有諗過做嘅，所以有一排都狂玩嗰啲配音app同埋拍啲聲音經過處理嘅片。

———————
問：演戲、唱歌、配音，如果都有工作搵你，你個priority係點？

答：同你畀我嘅排序一樣，第一演戲、第二唱歌、第三配音，嘻嘻。因為演戲實在係太好玩喇，你會無啦啦喺個角色度發現自己係一個點嘅人，太神奇喇，所以如果可以嘅話都係演戲排先。

我喺阿Mo身上發現我冇佢咁勇敢。如果畀我中學嘅話，我唔會為咗學生嘅權利去出聲，我會係專心讀好自己書嗰類，所以我覺得阿Mo同埋成班不老騎士真係超叻。

———————
問：有咩短期同長期目標？嚟緊會喺邊度見到你嘅演出呢？

答：我短期目標係希望一個月有一兩個有關演戲嘅job啦~ [ 按：工作請聯絡 ginylaii@gmail.com ] 長期目標就，因為依家都仲讀緊書，希望畢業之後可以做到自己鍾意嘅嘢，同埋維持到生活 [按：依家麗英喺浸大國際學院讀緊創意寫作學士]。我都想趁後生入演藝學院進修一吓嘅，自己要努力啲，要做到七分努力，同埋要睇吓嗰三分運氣可唔可以畀我做到佢哋學生，入到我最想入嗰科drama。下一部見到嘅作品係《熱血合唱團》，到時大家支持一吓啦~

———————
[photo credit : 編劇 吳振忠]
#方以文問兩句 #鄧麗英 #ViuTV #教束 #熱血合唱團 #大師兄

Good morning from #GrandmaPru , fresh off the bath ( not boat 🤣 )!
#nomakeup #nofilter #nobeautycam
.
I need your help 👇.
.
ViuTV溫情劇演員招募：
監製：伍健雄、劉美君
導演：陸天華
拍攝日期：2018年11-12月

演員要求：
女性
約12-16歲
精靈可愛
口齒伶俐
操流利廣東話
有演戲天份，具演出經驗更佳

*拍攝時間會盡量遷就，惟預計必需向學校請假

有意請將以下資料電郵到：
[email protected]

1）相片
2）姓名
3）年齡
4）身高
5）班級
6）有否演出經驗
7）聯絡電話