［我講嗰個西貢，而家叫胡志明市呀］假裝在越南🇻🇳。之前在投注站對面，有人話某金融KOL一提就好多人。咁即係，鍾意嘅嘢梗係讚，唔通想人執笠冇生意咩（雖然有時都會有私心驚講完啲嘢好多人去，但反覆思考下，都係唔知醜太高估自己）

＝＝＝＝＝＝＝＝＝＝＝＝＝＝
月頭訂最抵！2021比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，已經1800人訂！ 畀年費仲有85折，20/40年費VIP 送本人著作一本。
＝＝＝＝＝＝＝＝＝＝＝＝＝＝

TLDR：原本講越南🇻🇳，變咗講《濁水標流》，同埋社會。食評？冇喎。

1. 而家搬遠咗，何福堂七仔再過。餐牌多咗嘢，有春卷有飯。之後報告。多咗個人幫手（佢阿媽？），但廣東話就麻麻地，唔似Jason 咁流利。大家講嘢唔好咁快咁複雜。

2. 又，屯門越南🇻🇳人好多都住呢頭。「之前有單情侶斬人都係」

3. 老嘢會知，我舊文都有寫（https://bityl.co/7uCf），屯門當年有好大個越南🇻🇳難民營，在虎地。而家富泰/嶺南大學個位。仲係開放營。越南🇻🇳人可以出嚟買嘢，甚至打工。

4. 我細個住兆康，細細個就接觸越南人。「就好似村上春樹在神戶海港接觸外國人咁」。舊文都寫過，越南難民，男人咪做地盤，做古惑仔好似冇乜，龍五咩（嗰時黑社會仲未老化，「人工」又還好，仲吸引到本地人，唔使搵南亞人）。

5. 女嘅？咪賣身。都市傳說「十二個蘋果」，係咪十二個唔重要，係咪蘋果都唔重要，但肯定係有呢啲勾當。呢啲冇乜需要潔癖刻意迴避的。冇乜技能嘅女人，搵錢當然係靠呢樣，有乜好奇怪？你見Florida Project都係咁，叫個細路入房就算架啦！（＊）。

6. 我並唔係要做女權自主L講到做雞點高尚點尊貴，點樣反污名化．雞咪雞咯，正如盲人係盲人 基佬係基佬，你問佢地佢哋都覺得冇問題。咩「visually impaired」之類，左膠自己感覺良好啫。我基佬聾人朋友都係自稱基佬聾人，亦唔介意人咁叫（兩個人啦，唔係又聾又基）。

7. What's in a name? That which we call a chicken by any other name would taste as sweet．正如我唔係美化吸毒或乜，但，根本就十分平常。你個世界可能冇呢啲嘢，但你個世界唔係全世界嘛。

8. 舊文提過，《過春天》茄輪都唔打個，亦係呢種潔癖。《麥路人》就仲好笑，根本呀「媽媽」下海合理之極。而我唔明呀金融才俊阿博嘅邏輯在邊，做乜去飛機場幫人出火就得（唔係正骨可以搵八萬蚊下話？邊度請人？），企街就唔得。

9. 《濁水漂流》並唔算好出色，但佢比《麥路人》好嘅係「誠實」。喂啲「街友」慶祝兄弟出冊就係醒一針。人地個世界係咁的。你見美國啲窮黑人都係咁，為乜呀？電影講到明（我覺得太明），等你走唔出呢個圈呀。唔通你「上流」咗會關心啲道友兄弟？人地就係唔想見你成功有正常生活。梗係要drag you down

10. 正如呀吳鎮宇明顯對阿木投射咗父子情（又係講得太白），阿木去吸毒佢要鬧，朋友引阿木佢都唔畀。明白係嗰種「我自己衰但唔想個仔衰」嘅心理。

11. 咁所以，佢去請阿木叫雞，根本亦係合理之極，唔通幫佢訂一年《端傳媒》？（即係咁講，或者，唔通幫佢訂一年 Ivan Li Patreon？）．我記得《華爾街》人地corrupt the youth，咪出花紅帶佢叫雞咯，睇得起你呀。

12. 喂，係咁架喎，唯一唔合理就係做乜深水埗企街有啲咁後生嘅女，仲好似係本地活雞。我就冇見過啦，導演不妨介紹下。

13. 舉一反三，《濁水漂流》入面，你見呀老爺一行人，就係去舖頭偷嘢。係咁架喎，根本平常之極。一樣，我唔係「美化」犯法或偷嘢（私有產權是資本主義的基石），但更唔係講咩「竊鉤者誅，竊國者侯」之類（雖然好大程度上係），唔係講咩「制度不公義」咁上綱上線。

14. 應該睇到呢度，好多人都不滿我呢句「喂，係咁架喎」。「個社會就係多呢啲你咁嘅仆街先搞到咁」「點解唔去改變佢」。但，喂，真係咁架喎！你當然可以或者應該去改變佢，「人人係咁唔代表你都要係咁」，正如我都冇去吸毒冇去偷嘢。但，你自己做好自己咪夠，我就至怕人指指點點其他人，「你應該點點點」，人地嘅人生，我嘅人生，關你撚事咩。

15. 我本書都未有位講，人生一大法則：唔好畀unsolicited advice，好乞人僧的。我以前都會，大個先知幾咁討厭。你點咗條好路人行，就自不然做優越青，「拿，嗰時多得我叫你入建造業訓練局咋，人工仲，哈哈哈」。你點咗條衰路人行？人地怨你一世添。

16. 係，好多人就係咁的，講過隻股票佢輸咗錢都嚟怨你啦，一定係有人拎住支搶指住你買的。呢個世界好多人，就係唔會為自己嘅決定負責任。但，喂，係咁架喎！

17. 所以，你見我核心價值都係個人主義，你咪煩我我咪煩你，大家走大家嘅路。

18. 呢個未必係《濁水漂流》嘅價值，但首先導演有講，戲入面蔡思韵嘅角色，就等於當年嘅佢。講真，呢啲中產，唔係話你不知民間疾苦，但，你點去明白人地嘅感受呢？導演本人，戲入面嘅蔡思韵，仲有我同你都係。

19. 我個人覺得戲入面拍啲大學生迎新營去露宿者度學習，又搞埋啲咩理想家園，就好有喜感。雖然我後來發現而家O Camp真係玩呢啲，好彩我早出世。而似乎導演拍呢啲唔係為咗諷刺啲大學生消費露宿者，實請畢業爭住幫地產霸權同政府出力起樓，只係我太cynic

20. 真的，適可而止，可能咁啱嗰排得閒，我睇咗好多導演嘅訪問。戲入面有一幕我好欣賞，個記者訪問吳鎮宇，問佢故事，都刻意中斷咗—呢個安排係特登的。我見唔少講法話故事無頭無尾（想點？），冇講到點解班友淪落街頭，冇講背後嘅故事。導演有話：就係特登唔講，因為佢唔想你有代入感，唔想你搵到自己嘅影子，「第時我都會係咁」，導演係寧願你用一個抽離啲嘅角度睇。

21. 食評？冇喎，等緊嘢食。但你睇我啲文為咗睇食評？

（＊）Bonus：大逆不道，但我都真係要講，希望我老母睇唔到。話說我十歲八歲時，我老母都係好撚神秘咁，有時夜晚唔見咗人，仲要特登打扮咁。咁嗰時老豆已經走佬，我雖然十歲八歲，但都知好多嘢，都心諗哪有錢？我嗰期係真係幾乎以為我老母去賣身或坐枱的（未免太高估佢？但，我十歲八歲時，我老母三十未到喎）。真係罪過罪過。真相？佢只係約咗情人啫，佢後來老公，當時都搞離婚，好合理，況且係我老豆有婚外情在先。不過呢，就真係唔好低估啲小朋友嘅「懂事能力」，我細細個已經sense到呢啲嘢，由佢會打扮已經知。亦證明我細細個就係一個好敏感嘅小朋友，都話啲單親家庭嘅小朋友好多都係咁。

＝＝＝＝＝＝＝＝＝＝＝＝＝＝
月頭訂最抵！2021比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，已經1800人訂！ 畀年費仲有85折，20/40年費VIP 送本人著作一本。
＝＝＝＝＝＝＝＝＝＝＝＝＝＝

［被炒記2.0 序：當年相戀意中人］（＊）回力鏢。埃汾25年前嘅 Ex，P小姐，至少廿年冇見，十年冇傾過計，而佢忽然在地球另一端Message我—「你畀人炒咗？咁啱嘅。我都係喎。我唔開心，有嘢想問你」

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
告個急先：Ivan已被炒，正式失業。未訂嘅記得訂Patreon，積小成多呀。訂咗嘅可以考慮加碼（https://bityl.co/4Y0h）。一星期至少出返六篇文．月頭訂最抵！月費80
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

1. 哇哈，正呀，國家卒之記得我！真係結他低泣時，「如果未嫌棄～～～我即賓近你」　—　好心啦，幾廿歲人仲咁多性幻想？

2. 嗯，原本我已經諗定被炒記2.0嘅開頭點寫。原本係：「如何避免輸錢？唔好買股票」「如何100%避孕？唔好做愛」—咁所以，「如何避免畀人炒？ 唔好返工」。

3. 但結果就在我好忙好憤怒，卒之在龜坑飲返杯凍奶茶補數時，忽然間就有人PM我。我甚至以為係點數黨騙局，因為，真係稀客。原來有人畀人炒咗，哦。但佢又發現我都畀人炒咗。就問我點解我可以處之泰然，若無甚事，甚至打鑼打鼓。的確，我第一時間就WhatsApp 各方好友，然後亦在Facebook Page ig Patreon通知大家。

4. 但我亦過咗「傷痕文學呃蝦條」嘅年紀。真的，以前成日寫啲唔開心嘢，或者係我屋企嘅嘢—後來固然發現冇乜咁大不了，畀我更大鑊嘅人更多—但當年講呢啲呢，幾好的。首先女有母性啦，你見N咁多無知少女都鍾意古惑仔，貪佢有錢？係覺得自己可以「改變」佢呀。二來，就算冇蝦條，都有掌聲，以前寫親「論盡我老母」系列，收視必定爆棚。但不了，冇咁嘅必要。

5. 哦。而佢覺得我係「畀人炒嘅專家」（我諗起摩連奴同雲加）—但我更正佢，我都只係第二次，同佢一樣，而佢仲後生我四年。邊個先係專家？

6. 對我嚟講，最高透明度。有嘢咪講。我唔係小學雞咁滿江紅鬥低分好光榮，但真係事無不可對人言。畀人炒，咪畀人炒咯。有乜難以啟齒？第一次就有感覺啫，第二次有乜感覺？你見工或乜問起你，你er er er，咪更心虛。《英雄本色》豪哥（狄龍）去堅記車房搵堅哥（曾江）咁，「我係台灣忠伯介紹嘅，我在台灣做生意嗰陣呢……」「痞監就痞監啦，做乜鬼生意？」

7. 當然仲係好多人屌我虛偽，Everyone (else) is a Hypocrite．但天地良心，我都係比較直接嘅。正如無數HR都同你講唔應該咁講，但我見親工，有人問我點解離開星展，我都係照答：同個老細唔係好夾得嚟（咁當然，我唔會講：條臭西乜撚都唔識仲一個仙花紅都唔出畀我，我忍撚到8月先走已經覺得要拎諾貝爾和平獎）

8. 不如都係講返我舊愛。

9. P小姐係我第二個女朋友，時為回歸之前，1996年。我幾多歲？有人唔知我邊年出世？所以重點係佢幾多歲！佢當年應係14？或者15歲？「嘩你個人渣」。但，唏，襟芒，幾時法律上或者道德上，原來同未成女少女拍拖係犯法或天地不容嘅？嗰時人人都知喎，冇人拉我或者的我去浸豬蘢喎。拍拖咋，你諗咗去邊？犯法嘢我係唔會做的。

10. 而我知你想問乜，你鍾意問到篤嘅，我咪寫過《失身記》咯（https://lkdin.io/3KwS），1998年2月14日嘛，我讀緊大學啦施主。我係一個會講大話嘅人？我連蘇斯克查將海報都仲記得。所以呢部份唔使深究了。

11. 當然我懷疑以上嘅嘢我寫得咁詳細，P小姐會唔鍾意。但我唔寫，你地一定會問。而講真，雖然我經佢同意先貼呢段message，不過，之後我寫文，佢鍾唔鍾意，你覺得我會care？「咁多舊愛咁我出個Post要 seek幾多人approval」？

12. 對話中佢有順手講到對我嘅文好多意見，但我只係十分婉轉地講返我一直嘅核心信念，唔鍾意，唔好睇。To be honest，佢一路都話覺得我好有才華（Translation：唔靜仔又冇錢不過有啲嘢嘅），但從來都唔鍾我意啲文（但又話一路都承認我好有才華，well，可能覺得我唔應該寫文應該去打NBA？）。如果佢鍾意我寫嘅文，就唔會十年冇同我傾過計啦。我FB 都加咗佢十幾年。

13. 仲有一樣嘢，我有同朋友講過，亦有同佢講過。P小姐係我咁多個女朋友之中，最靚嘅一個。「埃汾太除外」。諗落都幾大鑊。唔係佢唔靚，而係之後我都冇乜同過靚女一齊。「埃汾太除外」。好似啲球星（葛斯？）咁，年少成名，世界盃都捧埋，你以為係見證傳奇嘅誕生？原來已是終結。

14. 咁但，當然我唔會貼佢相啦。況且，都啤咗三件（好似）。而講真，再講一次，廿五年前嘅事，廿年冇再見過（難得佢有一次返咗香港），十年冇Message，你覺得會可以點？唔通山水有相逢咩。睇少啲周星馳。

15. 但我諗個引子係，佢相信我（雖則飛咗我），咁有人信你總係好事。佢問，我咪答。佢唔問，講真，發生任何嘢我都唔會畀意見，唔係我恨佢（廿五年前啦大佬！），而係unsolicited advice 係極之討厭的。

16. 佢問我，點解我畀人炒可以處之泰然，我諗呢個係幾好嘅討論題目。正如我問返佢，咁做乜佢要咁煞有介事？

17. 我嘅被炒記2.0，就由呢樣嘢講起。放心，篇文唔會同佢有乜關係。只係佢想知我點解處之泰然，咁啱我又係想寫，咪順手拉埋佢落水。反正呢個引子夠吸睛。

18. 我甚至唔肯定，佢睇完會唔會反面—或者睇完呢篇preface已經反我面。但都係to be fair，我會唔會需要特別去討好一個廿五年前同過我一齊 而家啤咗三件嘅幸福媽媽呢？佢問，我咪寫，反正都想寫，但我唔保證佢睇完會開心。

19. Stay Tuned

20. 我知應該唔少人想八掛呢啲故事，但再講一次，「咁多女朋友個個都寫我咪好唔得閒？」。況且，今日大家天各一方啦，佢在地球另一端，佢有佢嘅生活，我有我繼續我嘅磨碌。三十年前嘅事啦大佬（四捨五入），人地B都啤咗三件啦。仲記住大家一齊聽隻《愛與交響樂》（唔使Google都知係1996年）大家依注，仲有乜意思？

21. 所以，嚟緊都係寫返被炒記2.0。我先係主角嘛，睇女嘅，大把地方啦。例如科勞我ig （@ivanliresearch）．「你係女咩？」「唔係，但我科勞好多女」。Ig當然係用嚟睇女，唔通睇啲小朋友教我理財？

22. 有人話我啲文飄嚟飄去唔知寫乜。嗯，係的。但，讀者就係鍾意睇呢啲嘛！

23. 講真的，打從嗰杯凍奶茶後，你見我寫多咗好多嘢，好多咗唔係投資嘅嘢。但無論如何，我而家好似街邊江湖術士表演完拎個兜出嚟咁，大家支持下個Patreon—你唔睇金融嘢？你睇但覺得我寫得唔好？都冇所謂的。而家就靠讀者支持架啦。實情唔少人都訂咗唔睇的，係為支持我寫呢啲文亦得。

（＊）《當年相戀意中人》亦係一套戲，Broken Flowers．標梅利去搵返啲舊愛。好睇的。

＝＝＝＝＝＝＝＝＝＝＝＝＝＝
2021比別人知得多。subscribe now。Ivan Patreon，港美市場評點，專題號外，每日一圖，好文推介。每星期6篇，月費80，半年已1400人訂！（https://bityl.co/4Y0h）。年費仲有85折

［人人唔信見底，咪見底］所以都係要Contrarian．但當然談何容易，個個Contrarian，就個個都唔係Contrarian啦。

1. 非常簡單，Ramp Capital 在3月24日，在twitter做嘅poll．都成萬幾人，而且follow得呢個戶口嘅，應該唔係混吉花生友。未必好醒，但應該係有接觸開投資資訊嘅人。問題好簡單，問昨日（3月23日），係咪大市見底？八成人都話唔係。

2. 咁你估到，結果就係見底。當然你可以話而家先5月，有機會跌到500點嘅，隨你。

3. 但想講嘅係，投資者永遠受短期情緒影響。升嗰時覺得可以不停升，三萬點就估四萬，五萬點就估十萬。跌嗰時又以為不停咁跌。當時美股大跌大家就只係諗會死幾多人，等於上星期五港股大跌大家就以為世界末日

4. 以上種種當然講過無數次，街邊阿嬸都知畢菲特話「別人恐懼時我貪婪」。但除咗「別人恐懼時我冇錢」外，根本你判斷邊刻先係最恐懼，極難。你睇2008-9，你以為貝爾斯登爆煲已經夠恐慌，中秋節雷曼先嚟戲肉。但你以為呢浸搞掂，港股2009年都仲整單匯控供股。然後好多人（唔止係無知之士喎）都講資本主義結終，將來十年熊市。AND？而家睇返梗係簡單，你身處其中就知幾咁難，

5. 近少少嘅，肺炎。咁香港以為一月尾跌定啦，點知3月先全球大屠殺。點捉？你又以為一沉不起，但結果話咁快，標普指數低位一個月彈30%

6. 點去改善？其實似乎係不可能的。你睇恐怖片，知係假嘅，你都係會驚。呢啲係人類先天嘅基因。

7. 好少少嘅，你去用數字方式，會好啲。例如講過幾次睇Price to book 之類。但去到某個位，你會連呢啲嘢都唔信，根本你就任何嘢都唔會信。「恒指23000 但Book value 30000？從未去過呢啲估值？」「但夠從來冇試過疫情爆到咁大咯」「你點知聽日個book唔會變到300點？全部人死晒邊有book value」

8. 係誇張咗啲。但，你睇返本Page 當時嘅留言，都係咁上下。我只係講「真係大鑊過金融海嘯？」。已經畀人屌到七彩。話死緊人呀。我話係呀，又如何？仲會繼續死（魯迅上身），但結果係因為死人跌，定因為封關經濟衰退先跌？而4月又彈返多？

9. 到你驚嗰時，自然就自己以前用開嘅指標都唔信。仲有，當你有咗既定結論時，講乜你都可以反駁的。我同你講所有歷史所有我學嘅嘢所有我嘅經驗，都可以係廢話。因為你一句「點知聽日唔會核爆」已經可以解釋晒。

10. 又或者，可以話呢啲係相反指標，當我在Page畀人屌到開花時，就係入市之時—但一樣之嘛！成日我都畀人屌架啦，可能嚟緊仲勁呢？唔係玩嘢，你諗下貝爾斯登—雷曼—匯控供股嘅例子。點捉？

11. 但，總可以去改善少少。其實都講過數次，例如唔好睇咁多財經新聞啦。或者，唔好成日trade．

12. 都話，你做唔到撈底，但都唔好做低位打靶。你3月尾打咗靶嘅，我都唔知你而家咩心情。會唔會再飛又去？唔會啦，你會等等等等等到跌返去嗰個位先買。而首先，我好懷疑會唔會。但更重要係，就算會，你一樣唔會買。

13. 講咗咁多，又會畀人屌我日夜叫人買買買。咁但唔通應該叫你沽沽沽？我估批評嘅人嘅意思係，應買時先好叫佢買。講得再白啲，就係最好我叫你買時聽日就升然後唔會跌返落嚟。咁明顯，我冇咁嘅能力。

14. 不過又係睇返古今中外歷史，最後係咩人贏錢多？

15. 咁當然啦，可能聽日核爆呢。你點知唔會？

16. 不過正經啲講，有人都話，喂，咁你即係除咗叫人分散，同埋月供，好似冇乜其他嘢講。答案，係！但首先，「就係咁簡單都好多人做唔到嘛」。二來，都唔係真係咁簡單，正如我叫你「前鋒入多啲波後防唔好失波」咁。三來，就算係，都冇所謂的，好多大師都係幾個鐵律，但寫幾十本書。最緊要你睇完有得著。

17. 不過仲有第四，其實都好重要。其實呢，我深深知道，炒股票是好Q過癮的！特別係贏錢。但think out of the box 啦，根本冇矛盾。如果我永遠叫你月供，我就唔會寫咁多個股啦。

18. 問題係，膽同腳嘅分別，黃國英話頭，注碼定輸贏。你個core做得好，有閒錢咪拎嚟做古靈精怪嘢，過嘢又好，當可能扑中十倍股又好，輸晒又好

19. 但，即係如果輸幾舊水就叫救命嘅，唔好入賭場（＊）。同樣地，如果你買完隻嘢，輸清光，然後你要生要死又問侯老母嘅（無論係咪我老母），咁，即係你已經買得太大咯。

20. 亦都所以，就算你私下問我，好多時都未必真係幫到你點去搞你嘅投資。因為好視乎你同我講幾多嘢。有啲原來老母有層兩千萬嘅樓畀佢又冇講，或者有啲原來男朋友好富貴又唔講，好難討論的。

21. 更賴皮地講，其實你講晒出嚟，「都未必得」（請屌）。因為仲有太多嘢。例如你嘅性格，係賭仔定唔係，你自己先知。或者其實你嘅才華，到底有幾值錢—可能你都唔知，但照計你會比我清楚—否則，你都幾失敗。I mean，可能其實你幫人執屋好叻嘅，但我根本唔知呢種技能值錢。原本根本你一個仙都冇都可以移民嘅。之類。

22. 所以，講到尾，條命係你自己嘅。我可以畀參考你，作為讀者，你信我，我只能保證只講我真心想嘅嘢（唔代表我會講晒所有嘢，但代表我唔會講啲我都唔信嘅嘢，我可以選擇沉默），同埋話畀你知我會點做—但可能錯。又或者，在我身上得，在你身上唔得，又或者掉轉。可能你期望係搵幾億，但我只係期望唔使做有得睇下書睇下戲打下邊爐一年去幾次日本咁，點一樣呢？

23. 煩都講多次，條命你自己嘅，我亦盡量避免（雖然有時都會）畀啲unsolicited advice—即係人地都冇撚問你你去指指點點教人乜乜乜。你嘅生命就係你一連串選擇嘅後果，而差不多所有嘢，其實都係自己揀嘅（＊＊）。

（＊）朋友間好多都知，但呢度應該少講。本人曾經係一個足球博彩狂熱者—即係，爛賭撚。嗰幾年，我在馬會，輸咗幾十萬—直到一次有人幫我整理啲損失，之後我就算做戒咗賭。想講嘅係，我入賭場，輸一千幾百都好心痛，但上網，係冇感覺。現兜兜嘅錢，你去提款機拎出嚟，同埋就咁上網按個制即時轉帳，係爭好遠的。所以你見好多理財嘅教材，教你買嘢唔好用信用卡，debit card都唔好用，只可以用現金。但當然講買股票就唔多實際。

（＊＊）當然「基因」好似唔係自己揀，咁你天生好靚仔，恭喜。你天生冇咗隻腳，想踢英超，冇計。但總有人係好牌都打到爛的。

——————————————-

版務：收費專欄已推出，支持埃汾高質文章。幾舊水睇三個月，一星期三篇

請去呢度訂：bit.ly/2wVXndj
課程編號填: CC01
科咗水後後有Login及Password畀你

逢一三五入去 homebloggerhk.com （見到就睇到《事先張揚》），亦睇得返以前嘅文。一般我都係會黃昏出文嘅。