04-05/2017電影睇睇睇﹐原來一個月內睇左九套戲好誇張😂
.
聲之形 A Silent Voice
好耐冇響戲院睇戲睇到眼濕濕,未睇過原作所以睇起上黎好多位都幾心酸下,感覺表面講聽障欺凌,但原來主要講社交障礙。同時好鐘意佢冇變成純愛情片,又冇玩生離死別,個結局點到即止果下好正,同埋最催到我淚D...
04-05/2017電影睇睇睇﹐原來一個月內睇左九套戲好誇張😂
.
聲之形 A Silent Voice
好耐冇響戲院睇戲睇到眼濕濕,未睇過原作所以睇起上黎好多位都幾心酸下,感覺表面講聽障欺凌,但原來主要講社交障礙。同時好鐘意佢冇變成純愛情片,又冇玩生離死別,個結局點到即止果下好正,同埋最催到我淚D位多數都係響D配角度,今次男主媽媽有好幾個位都超催淚囉
.
波士BB The Boss Baby
對呢套其實有D失望﹐冇想像中咁好笑﹐又或者係話好笑ge都響trailer睇哂﹐又其實個故仔有D悶﹐細路仔可能會好鐘意﹐但我就覺得麻麻﹐基本上佢落字幕果下我已經唔多記得套戲D劇情﹐不過呢﹐應該好適合媽媽們睇﹐坐周圍D媽媽都睇到好入神﹐有D野真係有仔女先會明﹐相反有個老豆就好似當左自己屋企咁瘋狂大聲打喊露﹐心諗...🙄
.
狂野時速8 Fast & Furious 8
唔覺唔覺已經去到第八集﹐個開頭其實真係梁到爆﹐又係師奶劇果D你激嬲我了同雲迪素式家庭主義﹐不過之後入戲都幾好睇﹐條女真係好奸好博打係幾成功的﹐另外好開心Jason BB變左做忠﹐而且成套戲最好睇唔關車事而且Jason BB同BB果場槍戰﹐十五年前transporter果陣迷爆佢ge感覺即刻返哂黎😍 雖然臨結尾果陣見到天台BBQ我係恥笑到出左聲的﹐但去到個結尾BB果個位我突然係差D想喊的﹐Paul Walker咁就走左真係好可惜😔
.
銀河守護隊2 Guardians of the Galaxy Vol.2
感覺Marvel又更上一層樓﹐對上套doctor strange其實都好正﹐因為好似好耐冇睇過新英雄登場咁﹐而今次係續集﹐要keep到新鮮感其實有D難﹐不過銀河守護隊算係marvel咁多套之中我幾鐘意ge系列﹐一來係一隊人唔係一個人﹐成個感覺好唔同﹐瘋狂唔疾但到關鍵時刻又好團結﹐今集仲講埋父愛同姊妹愛兩邊都幾touch下﹐而且入面所有成員都好有喜感﹐串串貢ON99都有﹐今集笑點都超級多﹐baby groot更加唔洗講搶哂戲啦﹐不過臨尾變左青春期冇哂萌點就真係為下一集擔心😂
.
虐殺器官 Genocidal Organ
隔左成年﹐終於都睇到伊藤計劃最後一套遺作﹐堅係覺得天妒英才﹐同另作品調和一樣﹐表面上好似好有視覺性衝擊﹐但睇落去發現骨子裡全部都係哲學野黎﹐雖然冇調和咁睇到個腦出哂煙咁滯﹐但都有好多批判成份。唔多唔少都感覺到故仔似由911事件啟發出黎﹐要做到「世界和平」?將戰爭國變成內戰地獄就可﹐用兒童做士兵?你為左任務為左大義就可以光明正大咁大屠殺?一個個黑暗到極點的反思位比好多哲學電影探討得更深入﹐睇到個人直情係好路舒服。就好似開場時的一句:其實地獄就在你的腦中,只是你選擇面對還是忽視。
.
29+1
呢套野真係不得了﹐如果唔係有免費飛我真係會後悔錯過呢套住作。入場以為會係講變中女會點果種bitch戲﹐點知原來講好多人生哲理﹐愛情事業家人將來生離死別全部都有講﹐起碼有三個位睇到眼濕濕﹐欣宜同蛋哥/周秀娜響茶記/周秀娜變欣宜呢三場都差D喊出黎。發現周秀娜原來可以好好戲﹐雖然崩潰果場over左﹐但比起當年睇果套乜鬼分手100次真係進步左好多。另外有一幕講得好中:「而家D後生好鐘意扔野,以前D野壞左我地會修理而唔係即刻換過件新﹐你地D後生一見到有問題就放棄佢而唔係嘗試解決佢﹐你而家係高層喇﹐唔可以再下下都放棄問題﹐係時候學下解決問題喇。」
.
春嬌救志明 Love Off The Cuff
老實講第二集講咩我已經完全唔記得﹐淨係記得張志明扮王馨平﹐反而第一集仲記得清清楚楚﹐因為實在太地道﹐至於今集呢﹐都唔錯嘅﹐笑位夠多﹐係要彈ge係果個轉折位﹐為左陷入低潮而求其搵個藉口拆散佢地其實好夾硬﹐又UFO果part其實都幾核突﹐佢唔用CG拍出黎而用其他方法會好D囉。不過呢﹐好笑還好笑﹐但真係冇哂第一集果種生活感咁滯﹐唯一係春嬌同班姊妹gathering時狂爆粗同講mean野先有返果種感覺﹐所以睇到後面其實我係期待佢班姊妹出場多過條主線點囉😂
.
異形:聖約 Alien: Covenant
雖然唔會係經典﹐但絕對係上乘之作﹐既有異型果種緊張感﹐又有普羅米修斯嘅哲理位﹐只係太中庸兩邊都唔太到位﹐女主角依然係好勇﹐但劇情都係不斷俾人幫咁冇前幾代超高AQ嘅感覺﹐同埋作為一個女主角佢個存在感都真係幾低下😂 而哲理位果方面就真係要睇佢下集點收尾﹐另外好鐘意今集拍到好恐怖好血腥但完全唔會用突然嚇你一跳果種方法﹐反而每次都預先見到會有野準備出黎喇果種緊張感﹐好爽!仲有發現戲入面愈係高層就愈係白痴😏😂
.
沙灘拯救隊 Baywatch
擺明玩無腦笑片所以劇情上冇乜大期望純粹想得啖笑﹐只不過最正啲笑點都響trailer播晒,同埋雖然D笑點都幾黃幾俗下﹐但可以再玩得再盡D囉﹐兩個男主角睇起黎老左好多殘左好多orz~全片最爆係劇集版個女主角﹐好似人體蠟像館走出黎咁😂
.
📷 iPhone 6s
➡️ Slide the Slides
#馬高影音雜誌