【影音】Spotify 將於今年內推出Hi-Fi 無損音質串流服務 最近Spotify喺網上活動Stream On宣布，將會今年內推出Hi-Fi 無損音質串流服務「Spotify HiFi」，令用戶可以體驗更高音質嘅音樂，不過暫時就未透露價格如何，亦無提到係CD規格嘅16bit/44.1kHz無損，定係24bit/96kHz或更高。 其實早喺2017年，Spotify已經喺外國搵一小部份用戶測試「Spotify HiFi」服務，當時被抽中測試嘅幸運兒，只要每個月畀多5-10蚊美金，就可以升級HIFI服務。事隔將近4年，Spotify今次終於正式推出該服務。 現時市面上都有唔少串流音樂平台提供無損音質串流服務，外國有Deezer、Amazon Music、Tidal，前兩者月費分別為14.99美金，而Tidal就要19.99美金（其實有個取巧方法可以平啲，就係用vpn轉區去土耳其買，只要大約$20港幣一個月就得，但我相信MenClub讀者唔使咁做，食餐好少少都無咗啦！）。 如果大家聽中文歌比較多又想聽無損，上面講個三隻Apps都可能唔啱你，一嚟佢哋中文歌唔夠多，二嚟為佢哋就算有中文歌，歌名好大機會都係用中文拼音，例如「追-張國榮」喺Tidal上顯示係「Zhui-Leslie Cheung」真係搵歌搵到頭都大埋。咁就可以考慮下幾個華語無損音樂串流平台，例如KKBOY HIFI（暫時只有台灣版）或者Moov。不過依家Spotify話推出無損音樂，一向有唔算多又唔算少中文歌嘅Spotify，可能畀到想聽無損中文歌嘅用家多個選擇。 資料來源：The Verge