【龔成問答信箱】（Q21221-Q21240）

Q21221：

老師，我聽咗你的選優質股和為何不賣出優質股覺好有道理。多謝你咁好的片，以下請假你幾個問題：

1）優質股會否因時因市而異？宜家個個都話唔好選新經濟股，但如騰信，巴巴，京東，小米（都持有）百度
，b站（目標股等待中）等我始終認為係優質股（我錯咗高追快手所以唔買，美團雖佢好但太貴）

2）最好的組合應集中買賣幾多隻優質股？定都要唔同行業優質股去平衡？

3）快手有排都未到家鄉令我反省覺以後應集中少隻優質股（80%想全買700），我是否錯？

4）我諗住係選優質中的優質，咁騰信應該係優中之優，你的優中之優係邊幾隻？

5）我之前670入過700賺唔多放咗跟住等到630再入，假期最後一日654我無放

見你答FB答話唔好放如果630買，但好多都話個市仲有機會跌，我矛盾中：覺你話唔好放啱，但又諗當日670入賺10唔放我入唔到630，我諗住短期若有機會去到660-680就放，定你都係建議我唔放嗎？

6）我205入咗比亞迪，太多信息話仲會跌（26000），我應放定唔理照長期持有？

感覺有時睇太多財經跟住個個都話會跌（之前話好多次跌真的跌），我唔理先會失手放買快手（分幾注買都係貴）

所以好矛盾（我個人都覺會再跌尤其疫情反覆，身邊見到好多行業都好差）

7）我52入咗中移動我會長揸
若跌穿50應再加注定幾多錢再加？

8）我唔會奢望3百萬變一千萬，我只要本金有一半的回報已好感恩，但感覺真的唔易，不過會努力，你要我地自己選優質股係好啱，因授人而漁，我設388@410-430入唔到因佢一跌標升，你現在建議388的買入價是多少？

9）你對來緊一個月的股市點睇？會跌至27000定會升至29000以上？

我見你叫人忍手，是否你都唔睇好後市嗎（第二季）？

龔成老師︰

1） 我地最主要都係睇企業本身質素，去確定是否一隻優質股。之後，再利用平貴，去定一個買賣策略。

現時有不少新經濟股，出現輕微過熱架情況。但唔係代表佢地無質素，唔值得買﹕只係用現時價值買入，個風險會太高，再等佢回調會較好。

我地只會係合理至平宜水平入貨，或者利用月供去儲貨。就算再好的股票，都唔好係貴價時高追，咁係好危險。

2） 一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

你預大約8-10隻左右，會較理想。

3） 就算質素再好，都不要過份集中，因為咁個風險反而大左。因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於3成，而單一企業不要高過15%。

4） 金沙（1928）、港鐵（0066）、比亞迪（1211）、中生（1177）、福壽園（1448）、小米（1810）等，都係一些有質素架股票。

但除了質素，我地都要考慮佢現價，到底有無值博率。好似比亞迪（1211）好有潛力和質素，但現價太貴，我地都唔會去入貨。

5） 你依然停留左係"賺差價"架思維，我地投資增值，係透過長線增有一些優質企業，去等佢自然咁升值，而唔係炒炒賣賣。

所以，只要係優質，你長線持有就可以。你見我比亞迪（1211）買左咁多年，中間升升跌，我都無賣過，現在才可以享受數倍升值的效果。

同埋，你唔好諗住自已估到個市點走。如果佢唔係好似你預期咁賣完，之後跌翻比你入，反而大升，你就會進退失據。

6） 你比亞迪（1211）個買入價係貴左，但由於佢好優質，你長線持有就可以，但現價唔好再加注。

記住，睇財經新聞，我地睇下個客觀資訊，唔係意見。

7） 中移動（0941）都有質素，但佢主要係收下息，如果你未近退休之年，唔建議持有太多。

至於再跌是否加注，就睇翻你本身預算投資此股的資金，是否已經用盡。如已用盡，就算再平也不要加注，否則只會增加風險。

如尚有資金，可每跌10-15%就加1注。

8） 其實只要你學習一套正確財富增值方法，再比些耐性，要令資產倍升，唔係話咁難做到。

港交所（0388）現價略貴，你預回多1,2成才算較合理。

9） 中短期股市走勢，我唔知道。我只係從大市水平和個別股票平貴，去定投資策略。

現時不少新經濟股，都有過熱情況，暫時不宜投資住。至於舊經濟股，普遍價格都合理，依然有投資價值。

------------------------------------------------

Q21222：

sir,可唔可以比D意見, thanks a lot!
（學員附上了6919的分析練習，但不便登出）

Sir,我有3隻蟹貨,都keep左3年,覺得唔係幾睇到未來既增長力,覺得食之無味棄力可惜

371 4.44@12000
698 0.84@40,000
315 6.44@14500
788 1.73@18,000

我覺得依幾隻質素都唔差,但睇唔到個增長力,每次出完業績就想等派息,派完息就想等業績希望有轉機,,明明其他資金買增長股回報都唔錯

但下唔到決心沽貨,從來未試過蝕錢沽貨,我係咪應該咁做,可唔可以比D意見我,THANKS!

龔成老師︰

你分析人瑞人才（6919）的練習，睇得出你花了一定的時間去進行研究，同時都有心機做的，基本資料方面無問題，至於評分方面，你的答案大致正確，你給了15分，我相信這個數與這企業優質度接近，相信你大致掌握了該評估表的指標方向。

至於你在SWOT分析，你可以寫更多（雖然評估表該格位不是很大，但你可以自行寫更多），你只簡單寫定位清、效率高，其實可以延伸這更多，佢怎樣效率高，這因素如果幫到這企業將來發展。

至於評估表第5頁，你表示負面因素是行業競爭加劇，其實可以再延伸寫更多，如果這情況發展，是否會對佢賺錢能力有所影響，你表示佢最終因經營本低而勝出，這是否佢最終能站得住腳但賺錢能力會減，到時如果真的行業競受加大，佢盈利會否減少，這企業怎樣保持現時的賺錢能力？

至於企業估值方面，你計算出的企業價值都大致正確。

人瑞人才(6919)主要為企業提供綜合人力資源服務，其服務包括發布招聘廣告、前端招聘、入職及上崗、後端人事管理等。

根據灼識諮詢報告，中國人力資源服務市場由2014年約人民幣1,912億元增長至2018年約人民幣4,086億元，複合年增長率為20.9%。

預期到2023年達到約人民幣10,142億元，複合年增長率為19.9%。故行業發展，預期係正面。

集團中國具有強大的服務網絡，覆蓋超過150個城市的客戶，開設超過20間辦公室。

按2020年末計，集團是內地龍頭靈活用工服務提供商，以工人數和收入計，市佔分別為2.3%和3.1%。

初步睇，此股都有投資價值。但人力需求很受經濟環境影響，加上集團現時賺錢能力，唔算得上十分強。

而且行業上，也算不上係藍海市場，因為行業都發展了一段時間，只是市佔較為分散，故增長力你預係中上，唔會係爆發性增長。

現價算係合理區頂部，此股係可以投資，但不宜太大注。

其實整份評估表，你都做得不錯，運用得很好。你要大量這樣分析企業，實力才會大幅提高，我自己多年來，都是不斷分析企業、分析企業，去提高實力，同時以「分析好多，投資好少數企業」去提高投資準繩度。

至於你這些持股，是否沽出換碼，你要從投資回報角度去考慮。如果換至其他優質股，長線有明顯較理想的增長，我地就應該行動。

北控水務集團（0371）和數碼通電訊(0315)都有質素，但你預佢主要係收息，唔會有太明顯增長力。

通達集團（0698），算是不過不失。但就唔值得持有太多，始終質素唔算好高。

中國鐵塔（0788）不是無質素的。始終中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入都增長，盈利都保持向上，但增長比之前略減，加上股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。

這股長遠仍算有發展力，可長線。不過，潛力度比過往略減。

你可以睇翻自己年紀、持股比重和風險承受力，去決定是否減持。

------------------------------------------------

Q21223：

龔sir.您好我今年40歲，以前有跟家人投資新股（白表）如下：

招行 1,000
領展 2,000
工商 2,000

中行 2,000
中鐵建 500
中鐵 2,000

因為自己唔識炒，輸多贏少，最後儲蓄都係做定期多，不過近期連一厘都無，跑輸比通漲。

現在收入二萬多，供養兩位已退休家人，住私樓（唔洗供）。

手持五百萬現金，應該點開始建立資產組合？

龔成老師︰

我地投資股票，係希望買入一些優質企業，透過佢自然增長，達至財富增值目的，絕對唔係"短炒"。

而定期這類方法，在財富增值上，効果都唔高，不建議你用。

只要選股和買入策略正確，並長線持有，就會有唔錯架財富增值效果。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你40歲，建議你用「平穏增長股」 + 「潛力股」的組合，當中以「平穏增長股」為主。

月供方面，你可以選擇投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、長建（1038）、領展（0823）、希慎（0014）、太古地產（1972）

或潛力股︰中生（1177）、福壽園（1448）、小米（1810）、安碩恒生科技（3067）、港交所（0388）、阿里（9988）、騰訊（0700）、ＧＸ中國電車基金（2845）。

現時大市只是合理區，你現有500萬資金，可先扣起等同半年開支的應急錢。

餘下部份，可以先投入一半，用"分注"形式，慢慢買貨。另一半就等大市出現一定程度的下跌，才大力度掃貨，然後長線投資。

不過，你投資經驗與知識不足，加上過往投資虧損較多，我會建議你先集中「平穩增長股」，而「潛力股」，只能小注，等你有較多知識後先加大投資潛力股。

同時，買入時要慢慢分注，或用月供作策略。

暫時只建議你動用$50萬-$100萬，到你有一定知識、經驗後，先慢慢去到約$250萬作投資。

------------------------------------------------

Q21224：

你好, 本人38歲, 已婚有一個3歲小朋友
手頭現金約100萬, 而家同老公屋企人一齊住

想盡快買樓…..但兩公婆月搵4萬蚊, 問過銀行按揭只借到400萬, 要再儲多D首期先有望
上車, 現每月可儲萬五蚊

1. 點先可以滾儲到多d資金

2. 投資新手, 之前都係抽下新股咁

3. 岩岩睇多左你既FB, 想4月開始月供三千2800, 請問是否OK?

4. 知道買私人樓保值/升值潛力高D, 但budget有限, 買居屋自住係咪都OK

5. 我地住將軍澳區, 因想屋企人幫手睇小朋友,想搵番同區,但而家樓價越升越有, 真係追唔係幾到, 係咪應該搵遠d地方住呢

另現有股票組合約27萬如下, 請問有沒有重複??否需要調整

0005,1600股, 平均買入價49
0175, 1000股, 平均買入價33
1177, 3000股, 平均買入價7.63
1299, 400股, 平均買入價200股抽新股中, 200股96.5
1810, 800股, 平均買入價22.7
2388, 500股, 平均買入價15
9988, 100股, 平均買入價229.6

感謝!

龔成老師︰

1） 如果你打算1、2年內買樓，就建議留較多現金。

但若果你不打算太快買樓，就可以先利用投資，滾存更多資金先。

由於你係新手，我建議你先用月供模式，去投資一些有增長的優質股，以達至財富增值目的。

2） 抽新股係可以，但你要明白我地分析新上市企業合理價和質素時，除了了解行業發展、佢本身業務狀況外，都要參考過往財務數據。

但新股都唔會有太多這方面的可靠資訊，令成個分析唔完整。所以我地係投資新股時，就算覺得佢基本面再好好，我地都要比較保守，唔可以太取，去平衡翻參考數據不足這個風險。

3） 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你38歲計，應用「平穏增長股」 + 「潛力股」的組合。我建議你用每月5成儲蓄，去做月供，其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、長建（1038）、領展（0823）、希慎（0014）、太古地產（1972）

或潛力股︰中生（1177）、福壽園（1448）、小米（1810）、安碩恒生科技（3067）、港交所（0388）、阿里（9988）、騰訊（0700）、ＧＸ中國電車基金（2845）。

由於你係新手，未有選潛力股的能力，也未必能掌握投資時機的能力。你可以簡單地先集中投資係盈富基金（2800）。到你有經驗，才選其他我建議架股票。

至於現有100萬，可先用30萬，分注咁入盈富。餘下現金和每月儲蓄，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

4） 私人樓一般情況，升值潛力都較高。但從自住角度，居屋都係有佢吸引之處。當你資金不多，而目的又係自住，居屋其實都可以考慮。

5） 除非你有迫切性要搬離現有居所，否則，你應先利用優質股增值，去先增值一筆財富。另一邊，再慢慢物悉價格較合理物業，咁會較好。

另外，其實將軍澳區已經是全香港，相對唔太貴的地區，所以日後其實唔太建議你轉其他區。

因為你手上資金不多，勉強買入單位，都會令你供款好吃力。而且，買物業後，我地都應該同時留有一定股票去做增值。所以，現時未必係咁適合。

建議你如果有較長時間，先用優質股累積起一筆財富，再慢慢換屋，會較理想。

至於現有持股，都適合你。除了匯控（0005），佢主要係收下息，唔會有太大增長力，不宜持有太多。

------------------------------------------------

Q21225：

龔sir你好，因為留意你啲post開始有買少少股收息，你嘅分析同意見都好實用！

想請教你以下情況，我應該如何理財，同埋有咩理財組員較適合我

本人28歲，
月入24k，
每月儲蓄大概15k-17k，
銀行現金20萬。

唔識理財，睇完你嘅分析先識買股票收息。多謝你嘅無私分享！！！

我個倉有:
0011一手@154.2
0006一手@45.9
1972一手@23.5

現金20萬中應該用幾多錢做投資？

另外如有每月月供股票應該每月供幾多較好，同埋哪一隻股適合？

目標期望5年內儲人生第一個一百萬，同埋一直想置業，但當有一百萬個時肯定樓價升到唔夠錢買樓。

仲有一個目標就係一直都好想創業，有好多想法，但好怕蝕哂d錢，所以一直遲遲未行岀第一步

我嘅目標係創業初期賺到嘅錢一部分捐岀去比有需要嘅人，我知失業率高企，好多人飯都無得食，有能力就要幫多啲人，平時每月都會買拉車仔買乾糧捐去食物銀行

所以如果創業我希望可以賺到更多錢，同時可以利用我嘅部分盈利再去幫人。感謝龔sir

龔成老師︰

你的想法很好，有能力時，我地係應該盡力回饋社會，這才有意義。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

以你28歲，可以選擇一些「平穩增值股」+「潛力股」作投資目標。現有持股都合適，但電能（0006）增長力唔高，只係收下息，長線唔好入太多。

以現時大市合理區狀況，月供最好用一半每月儲蓄，另一半就先儲起架策略。

由於潛力股要求你有一定的投資知識，因此這刻不用急著投資，你可以集中在平穩增值股先。

每月用$7000去月供盈富（2800），餘下就儲起，等大跌市機會。其餘合適股票，到你對佢地有一定了解，才從中選股。

平穏增長股：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建（1038）

潛力股：安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、ＧＸ中國電車基金（2845），但就要明白波動性比上述會高左，同時風險大左，你要自己平衡。

由於你投資知識不高，因此可較集中在平穩增長類股，至於潛力股，只宜小小注，最好是你提高投資知識，等你有一定知識，先慢慢增加翻潛力股比例。

現時大市處合理區，20萬資金，可先用7,8萬，分注咁慢慢盈富及其他平穩增長股。

餘下現金就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

當你累積到一定資金，就可以入市買樓。若此刻資金不多，可先從小物業入手，再慢慢換成大物業。（詳細做法，你可以睇我本<5年買樓4步曲>）

至於創業，你可以從你的興趣、強項、認識的事著手。

例如你本身對某類產品很有興趣，你會在那裡買？如果你在網上買這產品，這個網站的模式如何？

初期投入唔一定要多，可以用網店模式、網上買賣這些低成本模式著手。一邊做正職，一邊創業咁試都可以。最重要係行出第一步，因為未行過，你係唔會知乜野情況。

你最初要有學習的對象，你先尋找一些自己認為不錯的商店，了解一下佢地的商業模式，最始好大型及小型都有，先以小型作學習對象，然後就試下佢地的模式，能否成為你創業的方向。

記住，最好唔好做得太雜，要專注在某一範疇，等人容易記得你。

------------------------------------------------

Q21226：

龔Sir，想請教一下。

1. 522同981有潛力嗎？可以作月供選擇嗎？如可以，那一隻比較好？

2. 另外，聽你講過3067係供股好選擇，請問現價合理嗎？

龔成老師︰

1） ASM PACIFIC（0522）有質素。

佢係半導體和發光二極管行業的集成和封裝設備供應商，為跨國芯片製造商，為獨立集成電路（ＩＣ）裝配工廠和消費電子產品製造提供半導管裝配設備及材料。

過往的生意與盈利都有增長，不過盈利有點波動，這都會令股價略有波動。長遠有一定的發展，可長線投資。現價合理區頂位，如分注小注或月供，仍可以。

而中芯國際（0981）業務有增長力，但未必能稱為好優質的股。

睇翻佢過往的業務情況，雖然仍每年的生意都有增長，但盈利就有波動，反映雖然大環境的市場在增長中，但佢的成本與售價，就未必在佢掌握的範圍，最後造成盈利波動的結果。

雖然這股都有前景，但以佢面對的情況，但好難將佢定義為最優質的股票。

加上此股近年升了不少，就算有所回落都唔算平，加上之前熱炒過，股價大上大落，投資要注意風險。這股唔建議大注，也不建議用作月供選項。

2） 安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

------------------------------------------------

Q21227：

龔sir你好。我又忍不住在反思自己的組合了，希望你能給些意見！

問題1：我現在計劃的組合比例ok嗎？（我19歲）

問題2：現在的組合內，所有都有持股，除了小米。最近見你話小米波動性大咗
（因開發電動車），我應仍選擇它嗎？（如不應該，組合比例亦會考慮調整）

我月供的金額分配ok嗎？（每月有$17000能放入股票市場）

問題3：我另外還有些以前買咗，但現在不太想加入做我的組合的股票。你覺得我對這幾隻股票的處理正確嗎？（特別是9988）

現在計劃的組合：
科技 （700, 1810） —— 22%
安碩科技 （3067） —— 30%
醫療 （1833） —— 8%
舊經濟潛力 （388） ——5%
平穩 （66, 823） —— 10%
盈富 （2800） —— 25%

一手手買股票
- 騰訊 （when drop to $520）
- 平安好醫生
- 領展
- 小米

月供股票 （至少供3年持有5年）
- 港鐵 （1k）
- 港交所 （1k）
- 騰訊 （2k）
- 盈富 （2k）
- 安碩科技指數 （每個月買1手）

組合外現持有的股票：

打算就咁擺喺到：
11恒生1手@124
12恒基162股@30.92 （放棄了月供因增值較其他慢，好似我大個啲再買翻好啲）

等賣：
883中海油1手@6.7
9988阿里巴巴2手@272 （知道有質素的，但我現在好像已有不少科技股，而個人對這股
有些失去信心） （但如果不要小米，應保留？）

謝謝你的無私幫助

龔成老師︰

1） 19歲係一個好年青架年紀，正值財富增值的黃金時期，策略上可以相對進取些。

你現時月供組合，無問題。其實恆基（0012）仍是有質素，當然增長力減少左，預期佢中短期都是弱，不過，這股是睇長線及超長線的。

如果你將來有資金多，都可以考慮月供翻佢。至於恆基（0012）和恆生（0011）現貨，可持有。

但你現有持股，有少少偏重左係潛力股，令個組合波動性略高。以你年紀，唔好超過6成。

2） 小米（1810）由新能車發展有一定不確定，故你要預佢波動性大左，但整體質素係有，你照持有係無問題。

你現時月供金額和選股，都無問題。

3） 這些股票都係有質素（包括0011, 0012, 0883,9988），唔建議你沽出，照長線持有就可以。

但留意中海油（0883）只係商品類，價格自主性低，質素只算中等，不宜再加注。

------------------------------------------------

Q21228：

龔sir，你好，本人今年46 歲，有現金 $200,000，想買公用股作長線增值投資和收息用途。
目標有：

中電（0002），煤氣 （0003），電能（0006）
請問那一隻較適合我？

龔成老師︰

若果以收息角度，中電（0002）和電能（0006）會較好。

但我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你現時才46歲，都應該作一定程度上的財富增值，而唔係純收息。我建議你用「平穏增長股」，去創造一個增值平台。

現時大市只在合理區，你20萬可先用一半，分注咁慢慢儲貨。餘下一半，就等大市有明顯回調，才再出手。

------------------------------------------------

Q21229：

成老師你好呀，我現年22歲，月入21k，我學習價值投資開始了大約9月開始月供11k股票

直至現時，月供包括（均價）2800（$26.9）,0066（$41.9）,0002（$73.1）,0027（$60.1）,2013（$13.5）,0981（$21.2）,9988（$237.4），另外曾一手買入9988（$227.8）一手，0981（$20.2）一手，0823（$58.4），一手。

1.我想問一問我的投資組合風險會唔會唔太適合我這個年齡？

2.這個月供組合會唔會太保守是否需要作出轉換？

3.是否需要加大月供額？

4.我亦有儲現金作一手低位買入，如果需要買會唔會有一些建議？

我亦想好好把握黃金10年做好投資將現金轉換成資產。
謝回覆

龔成老師︰

1） 以你22歲計，係財富增值的黃金時期，可以承受較高風險。

你月供組合中的股票，大部份都有質素。但中芯國際（0981）業務有增長力，質素都有，但未必稱得上最高質。

睇翻佢過往的業務情況，雖然仍每年的生意都有增長，但盈利就有波動，反映雖然大環境的市場在增長中，但佢的成本與售價，就未必在佢掌握的範圍，最後造成盈利波動的結果。

雖然這股都有前景，但以佢面對的情況，但好難將佢定義為最優質的股票。故此股作月供，就不太適合，或最多小注月供好了。

微盟集團（2013）財務數據的增長都強勁，但波動性較高，唔建議用來月供。

但這2隻股票現貨，你照持有就可以。

2） 我不清楚你月供供款比重，故難言是否太保守。但從選股上看，都可以。你22歲，建議你用「平穏增長股」 + 「潛力股」作組合，比例約各一半。

以下都是一些適合你月供的股票，你可以用來加入。

平穏增長股︰盈富（2800）、銀娛（0027）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）

潛力股︰安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）、ＧＸ中國電車基金（2845）。

現時大市只在合理區，每月資金唔好盡用。最好留有部份，等大跌市出現時，可以用來掃貨。

3） 最好將可以動用的閒錢，都用來投資。因為你年紀，越做累積財富，個複利效果會越理想。

4） 現時大市在合理水平，現金和股票最好各佔一半。若果你現金唔多，可以先等大跌市出現，才出手。

至於投資目標，就係我2）中所講的股票。到時你可以因應自已持股情況和股價平貴，去用現金掃入這些優質股，並長線持有。

------------------------------------------------

Q21230：

老師你好，一直以來我都係對股票投資既概念都係半桶水，直至幾年前開始睇你既書，睇你係網絡

上分享你既心得同知識，慢慢學識投資係應該長線同睇企業既價值，亦都因為你，比亞迪

令我賺咗人生第一桶金，所以好想多謝你令我感受到賺錢原來咁開心，我來緊想抽居屋

同老公買樓，但係我唔知道應該點樣分配，所以想請教老師既意見

我現在持有268金鍱，9988阿里巴巴同3067，大約總供有二十萬

現金二十萬，每月可儲蓄15000，我應該月供股票令資產增值，還是應該儲蓄現金作為首期，我想兩至三年之間可以

賺多少少，幫補買樓，希望老師能夠指點一下，謝謝老師

龔成老師︰

比亞迪（1211）係有質素，雖然股價已升了不少。但由於佢有潛力和質素，最理想係繼續長線持有。

我建議你先用股票增值，但2至3年唔算係一個長架時間，增值時要保守些。

現有持股可持有，但由於佢地波動性略高，唔建議再加注住。未來以平穏增長股作為目標，去創造一個組合。

你每月5成儲蓄，去做月供，其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、長建（1038）、領展（0823）、希慎（0014）、太古地產（1972）

大市現處於合理水平，20萬資金和每月儲蓄，就等大跌市機會出現，才出手掃貨。

------------------------------------------------

Q21231：

大佬，我依家股票組合係咁

Stock 5, $46.3, 14000股
Stock 386, $6, 4000股
Stock 737, $3.95, 10000股
Stock 941, $74.75, 1000股
Stock 1789, $12.77, 4000股

Stock 1810, $31.75, 2000股
Stock 2333, $27.65, 2000股
Stock 2638, $6.84, 5000股
Stock 2800, $26.5, 5000股

我想問再整合一下。有冇咩股票會放左佢會好d ?

龔成老師︰

從質素上計，這些股票都係優質，可以長線持有。

但我地財富組合，除了係優質股外，都要因應自已年紀，去做相應的配置。

我地會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你現時這個組合，主要收息股為主，係偏向保守。若你係中年或接近退休的人士，這個組合都可以。

但當中有個較大問題，就係成個組合偏重左係匯控（0005），佢佔組合近一半。緊記，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於3成，而單一企業不要高過15%。

建議你，慢慢沽出部份，換碼至以下股票，去令組合回復平衡。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、平安（2318）。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金（3110），都可以。

------------------------------------------------

Q21232：

龔sir: 早前$15入咗3手藍月亮6993，之後係咁跌，買入的時候冇考慮市盈太貴，依家又冇咩息收，呢隻可
繼續持有？還是溝多兩手平倉就沽？

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

另外，我地決定加注與否，要睇幾個因素，記住，並不是「拉低平均買入價」為目的。

第一，要分析這股的質素，如果無質素，就再跌都唔加。

第二，這股的類別，如潛力或增長或收息類等，是否與你的財富組合匹配，比例是否適合。

第三，你要先計算加注後，這股佔你股票組合的比例會否太多，因為同一行業，同一股票。不能佔股票組合的比例太多。

第四，現價是否有投資價值率，要平，或起碼合理，不能貴。

第五，你要在加注後，仍有現金剩。

記住，重點不是「拉低平均價」，而是組合比例與配置。

藍月亮（6993）有質素的。

佢有「中國P&G」之稱，成立於1992年，擁有衣物清潔護理、個人清潔護理和家居清潔護理三大系列共73個品種的產品。

佢係中國洗衣液有龍頭地位，加上毛利率高，賺錢能力強。睇翻佢之前的資料，以零售額計算，藍月亮在洗衣液市場、濃縮洗衣液市場及洗手液市場的市佔率均為第一，分別為24%、28%、17%。

整體有質素與發展力，不過現價唔平，之前貴，現價算是合理區頂，唔係加注的時候。但此股有質素，現貨持有係無問題。

------------------------------------------------

Q21233：

成哥
本人38
我現在持有物業自住
每月可儲二萬
用作月供1177 及700
每月6000 供1177
8000 供700
其餘用作儲現金
手頭現金 約二十萬

手上持股
388 @ 451.6 100 股
700 @ 580 100 股
788 @ 1.2 20000 股
1211 @ 228 500 股
2158 @ 61.6 200 股
3067@ 17.83 400 股

6618@ 29.2 100 股 （因高位賣了接低成本）
9618 @330.7 100 股
9988 @ 255.2 300 股
2638 @ 7.2 8000 股
2800 @ 28.5 10000 股
3033 @ 8.3 4000 股
1177 及700 供了幾個月

目檟 ： 希望在十年後 有每月五萬被動收入

1）現在月供出這兩隻 可以嗎？
2）想增加潛力股 有那些值得投資十年後收成的倍升股？
3）現在持倉可以嗎？
4）想再集中儲倍升股 有沒有推介？ 例如 儲1448 及3067 可以嗎？
5）以上做法 能否做到十年後 有被動收入五萬？
6）現在倉位 會否太散？
7）178 好想買 值得現價大量入嗎 大約1.8

龔成老師︰

1） 我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

你現時持股和月供組合，都係太偏重係潛力股。以你38歲去計，潛力股和平穏增長股最好各佔一半。否則，你個組合架波動性風險會過高。

而且，大市只在合理區，每月儲蓄最好先用一半，另一半儲起去等機會。

2） 以下股票，都係有質素架潛力股，有力可以成為倍升股。

潛力股︰中生（1177）、福壽園（1448）、小米（1810）、港交所（0388）、阿里（9988）、騰訊（0700）、比亞迪（1211）

但大部份現價偏貴，買入前要做好估值。

3） 跟月供組合一樣，偏重左係潛力股類，但情況無咁嚴重。這些股票可以持有，再利用月供和新資金，慢慢修正翻個比例。

若你想投資恆生科技股ETF，我建議用安碩恒生科技（3067），佢費用成本比3033為低。

另外，港燈（2638）係收息股，增長力欠奉，你不宜持有太多。

4） 這兩股都可以的，同時你都可以睇我本<50值博倍升股>，當中會有更多選擇，但要注意組合比重問題。

5） 要做到10年後每月有5萬蚊現金流，以股息率5%計，你需要本金1200萬。

以大市過去年平均回報10%計（連股息再投資），你每月投資$20000再加上你現有資金和持股（約值85萬），10年後大約會增值至600萬。

如果要達至你的財務目標，你要再加大投資力度。可以看看你自已的開支，有沒有一些部份可以調整來增加月供金額。

如果無，你就要從開源著手，轉工（如SALES，一些多勞多得的工作）、找PARTTIME、網上生意等，令你每月可儲資金大幅提升。或者拉長增值年期，以助你達成10年後1200萬的目標。

6） 有少少，長線最好維持8-10隻，咁會較易管理。

7） 莎莎（0178）仍有質素，但佢已經無過往年代般的賺錢能力，同時香港的零售市道有風險，都令這股近年的表現較一般。

這企業本身在行業有一定的地位，賺錢能力不差，但就會受經濟及零售市道影響，令股價較為波動。

其實股票班我都有講這股的估值，在過往10年，自由行較為黃金年代過左，所以從估值上，無之前咁高。

佢在行業的優勢仍在，但整體行業及零售市道，無過往咁強。長遠仍有質素，這刻處合理區，但投資注碼不能太大注，亦要有耐心先有收成。

------------------------------------------------

Q21234：

請問2186 綠葉製藥 $6入左3萬股，請問前景好何？止蝕位？待覆。謝謝

龔成老師︰

綠葉製藥（2186）主要銷售腫瘤科、心血管系統以及消化與代謝三個領域的新藥品，基本上都係有市場的，其實長遠又不是太差，只是市場有時對佢的增長力會有不同。

但近年佢質素的確有少少轉弱，但相信最差時間已過，這股本身的風險較高，唔建議投資得太多。若佢佔你組合比重唔多，可長線持有。

至於止蝕位，我唔會用一個價格來定。

只會在其長線質素出問題，或者個市去到好狂熱，令個價異常地高，我才考慮沽貨。若質素不變，就算中短期出現波動，都需要太在意。

除非你持有貨太多，就建議你在反彈時減少少。

------------------------------------------------

Q21235：

龔Sir，想請教一下，我有10000股中國人壽是賺返嚟的, 我想賣咗佢, 換馬 買比亞迪, 請問你意見如何？

雖然換取比亞迪只係大約800 - 900股, 但前景會更樂觀嗎？

龔成老師︰

這些股票賺翻黎與否，佢始終都係你做財富增值的本錢，我地都要認真對待。

中國人壽（2628）並不是無質素，不過增長力唔強。同埋企業的賺錢能力不及過往年代。

長線持有價值都算有，但暫時唔好對股價有太大期望。你可以考慮沽出部份，換至其他優質股，都係可以。

比亞迪（1211）去年營業額1530億人幣，按年增長26%，而市場一般預期為1400億-$1500億。

至於盈利為$42億，比上年增長1.6倍，不過，這就差過市場平均預期的46億人幣。每股盈利1.47。

其實整個業績，都算同市場相差唔太遠，而我地分析時，最重要是長遠的企業發展。業績初步反映，新能源車的市場仍處增長狀態，動力仍在，不過賺錢能力這刻仍算好強，但當技術進步、市場規模增加、成本控制等因素慢慢出現，賺錢能力進一步提高。

預期佢2021年新能源車銷量，應該能達到40萬至50萬輛的水平，已經能獲得一定的市場佔有率，新能源車仍是增長動力，仍是正面。

反映比亞迪長遠仍是正面，不過我自己在估值上，暫時未有提高，始終這刻市場太著重前景因素，因此，這刻仍是略貴，初步保持我之前對這股的合理價，$120。如果想投資去翻$150先月供會較好。

當然，之後到比亞迪正式有詳細財務數據、年報、附註等資料，會正式重新估值，相信調高的機會有超過一半。

你現貨可長線持有，但想現時將中國人壽（2628）換碼至比亞迪（1211），我就不太建議。

最重要不是睇「賺蝕」，不是睇「買入價」，而是睇質素。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

------------------------------------------------

Q21236：

成sir，你好。小弟睇了《年報勝經》，書中提及經營現金流-資本開支＝自由現金流。

如果要搵上述資料，是不是在年報中的現金流量表就可以？

我想計算［215］和記電訊的自由現金流，可唔可以麻煩你指教一下。

以上是和記電訊的現金流量表，要計算自由現金流，應該用那一個金額計算呢？麻煩晒成sir。謝謝。

龔成老師：

佢2020年的資本開支，$5.93億

而佢的經營活動現金流，為$12.97億

所以，你只要將$12.97億減去$5.93億，就可以理解為佢的自由現金流。$7.04億。

------------------------------------------------

Q21237：

老師你好，我想請教一下買樓問題。我個portfolio入面己有70%係樓(澳洲投資物業），現已達正現金流狀態，睇個勢仲有機會升，真心唔想賣。

而我依家喺香港跟屋企住，都會想有更多私人空間，但稱不上係有迫切需要。

而我依家買樓唔係唔得，因為我人工穩定而且接近6萬，但要放晒所有股票做首期，就會變成All-in樓市既狀態

所以想請教老師，你認為我應否係香港買層自主樓？定係保持分散風險嘅原則，keep返三成股票？

龔成老師：

澳洲物業如果已有正現金流，同時質素唔差，其實可以持有

由於你這刻在香港，無太大的逼切自位需要，加上你在整個財富配置比例中，已經較集中在物業，因此，暫時你未必要好急在香港買樓。

你可以集中用股票作為投資工具，先將財富增值，到你有自住需要，又或樓市出現較明顯下跌，有明確機會時，才考慮買樓。

其實最好是，當你買樓時，只需賣出部分股票，買樓後仍有一定的現金及股票剩，就最平衡。

------------------------------------------------

Q21238：

龔sir 你好！我有個疑問：一般來講，投資股票越早越好，因為時間越長越有複利效果，而分注/月供就可以減低市場波動的風險。（我理解對嗎？）

但經過上年3月，我之前月供的股票（約供了兩年）帳面蝕咗好多，雖然我明白長線不用擔心，而之後今年年頭都升返啲

但好似輸咗機會成本，因為如果不月供而將儲到嘅錢大跌時入貨會賺多好多。

我知道老師你都沒有月供，而係耐心等機會。

咁其實我應唔應該停月供/分注，儲現金等到個市再大跌至入貨？

但又覺得留現金會蝕通脹及享受不到複利效應。我現在股票現金比例（2:1）（金額都好大下）......
謝謝

龔成老師：

股票愈早買愈好，這個大方向是不變的，當然，只限於優質股，但都要留意，這是講長期的，而中短期會波動，簡單來說，你今年買，會著數過5年後買，但如果以中短期計，只要我地能把握到買入時機，有機會在一年後的買入價比這刻好。

另外，月供是一個長期儲貨的策略，好處是平均了買入價，有效減少一次過在高位買入的風險，但缺點就是，無法一次過捉到低位。

因此，對於投資實力不足的人，利用月供是很好的方法。

但如果本身已有投資實力，能把握投資時機，有企業估值能力，其實不用月供都得，所以我自己都無月供。

而我一般的建議，都是部分資金月供，同時留部分現金，等機會，這是一個較平衡的做法。

你現時現金的比例，都可以的。

------------------------------------------------

Q21239：

龔sir，有幾個問題想問

第一，請問閱讀你12本著作的順序

第二，我已有1百萬流動資產，是否可以不去讀（80後百萬富翁）？

第三，你的二個面授課程，應分別在讀完你那本書的時候報讀？還是讀完你的12本書便無需報讀？

第四，看到你有一網上課程，你的12本書或面授課的內容可完全覆蓋到嗎？讀了你的12本書後是否無需報網課？

第五，我即將38歲，對於我閱讀你的書、面授課、網課的計畫會有建議嗎？

第六，網課會再推出限時優惠嗎？

第七，你的12本書中，相信大部分會是說「心態」、「經驗」，不會過時，但其中3本：50優質、50穩健、50值博，提及的股票會因時間而出現變化，現在或將來才買的話，會否過時呢？

龔成老師：

1）你可首先睇：

《80後百萬富翁》
《股票勝經》
《財務自由行》

之後再睇其他。

書本在三聯、商務、誠品都有得賣。由於部分書在一些書店已斷，所以若你見唔到，問下職員就得（又或向職員訂都可以）。

以下是我的12本書：

《80後百萬富翁》（第9版）
《80後2百萬富翁》（第4版）
《80後3百萬富翁》（第2版）
《財務自由行》（第7版）
《大富翁致富藍圖》（第5版）
《50優質潛力股》（第4版）
《50穩健收息股》（第3版）
《50值博倍升股》（第3版）
《股票勝經》（第3版）
《選股勝經》（第2版）
《年報勝經》（第2版）
《5年買樓4部曲》（第2版）

2）不是，因為書都是教你累積財富，同時無太大順序的。

3）課堂大部分內容，都是無在書講過的，而一些實戰，更具體的投資技巧，都只會有課堂講述。

例如企業估值技巧、5種選股模式、選股程式的具體應用、年報分析的實戰技巧，同時會派一份6頁紙的「企業評估表」給學員，令你可以自行為企業進行有系統的質素評分。

你可以當書只是頭1、2堂的入門部分。

4）網上課程是配合《大富翁致富藍圖》的，你可以理解是書的實戰版。

5）我建議你先睇《80後百萬富翁》、《股票勝經》、《財務自由行》，然後可以上股票班（基礎班），這樣進取最大。

6）暫時都無推出特別優專。

7）《50股》的3本書，你要睇下出版日期，因為久不久會更新的。當中分析股票，因為都是一些大方向，因此無太大變化，但平貴度，你就要留意可能會變。

------------------------------------------------

Q21240：

老師，如果想幫港交所做估值，應該使用甚麼模型比較適合？

龔成老師：

你可以用現金流折現法，以及市盈率估值，如果用市盈率估值，可以用佢過往的市盈率作參考。

其實要深入進行估值，要考慮企業長遠的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

▌端午節是台灣三大節日之一，身為社群行銷的你，除了在煩惱今年公司到底有沒有三節獎金外，是否每到特殊的節慶就開始煩惱該如何寫出好文案？掌握好要點，其實節慶行銷文案沒這麼難!

◆先瞭解自己本身品牌的定位
想要寫出獨一無二的節慶文案首先要做的事情就是對自身品牌的瞭解，如果對於自己的定位不明，可以試試用SWOT分析找出自己的定位，或是先研究與自己相近的競爭對手，觀察對方在做些什麼，從中找出差異化的突破點。

◆定義目標族群
不同的宣傳目的會有完全不同的做法，先想想為什麼要寫跟節慶有關的貼文，然後找出最有消費力且對於你有興趣的人。

◆找出痛點，為何非你不可?
痛點是消費者在體驗時內心需求沒有被滿足或期望有落差的部分，瞭解自身的產品，競爭對手的特點，以及站在消費者的立場，有需求、才會有購買。

◆為節慶行銷訂定主題
有了明確的定位以及目的之後，就可以開始「料理」你的文案了，節慶行銷可以結合該節日特有的代表物，以端午節來說粽子與屈原可以說是最具代表性，另外結合時事也可以帶來意想不到的效果。

◆文案要打動消費者，產生共鳴
讓人會心一笑的梗圖、意想不到的諧音、別出心裁的設計都是打動消費者的敲門磚，現在讓我們點開圖片，看看有哪些吸引人的端午節文案吧!

#青創學院
#八大課程
#夢想太燙手就需要幫手
#創業永遠不嫌晚所以幾歲都可以上課喔

【龔成問答信箱】（Q20441-Q20460）

Q20441：

龔成老師，想請教你怎看1211和3690這兩隻股，現階段還適宜買入嗎？因已升了很多，另外，我持有460，最近升了不少，但跟我買入價還有一段距離，我可繼續觀望嗎？

另外941和2628，我已坐艇好久，我應該賣了它們，然後買入3067ETF嗎？

謝謝！

龔成老師：

比亞迪（1211）潛力度是有的，但現價貴，這刻唔建議。

如果你睇好行業，或者可以考慮GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

由於近期不少車股被炒起，此股現價略貴。無貨可以現時入少少，到有明顯回調才再慢慢加注。

潛力度是有的，但會比較波動，如投資宜慢慢分注，可長線。

至於美團（3690），有質素，但現價唔平，月供好了。

至於四環醫藥（0460），佢股價可以好波動，自己衡量風險，以本質來說，不太好，你可以再等上多D賣出。

至於中移動（0941）、中人壽（2628）增長力不強（但都有基本質素），如果你想組合的增長力增加可以等佢地上多少少後，轉3067。

------------------------------------------------

Q20442：

龔SIR 你好,我是之前有上過你班的學生, 現持有3067(買入價: 20.61), 1177(買入價: 7.53), 0823(買入價: 68.04), 其實我知道這三隻都偏貴, 但現在都是有穩定增長, 所以基本上持有, 待下跌再增注。

1810 (之前買入價: 28.01) 因預計中短期會回落,所以現價(29.3)放了, 預期回落到23蚊左右, 再加注。

這個組合和操作有問題嗎?

另外, 就是關於潛力股問題, 大部份股票年底時已經開始上升, 現在都是比較貴既階段和預測中短期都會回落, 導致很多時候都沒有信心入市, 在等待合適價位既時候應該投資什麼比較好?

現在還有有什麼股票是底估底值搏率比較高呢?

龔成老師：

上述的3股，你可以一直持有，等跌先加注，這是最好的策略。

至於小米（1810），我唔建議你賣出等跌，因為無人能真正預測到股價，你賣出後可能唔跌的。最好是持有基本的貨，再跌先加注，這是最好的策略。

至於你潛力股的問題，由於現價唔平，所以買入時要較小心，不過，我並不建議100%等跌先買，因為不會有人知升跌。

所以，最好是慢慢分注入，只要同時留現金就得。

最簡單是考慮安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

------------------------------------------------

Q20443：

師傅，我睇你d影片，講人資產該以複式增長，但如何可以穩定地做到？

每年追贏通漲，更以每年10%以上增長。如遇到牛轉熊市，不回吐而有增長，如何做到？我諗極都諗唔明。

就算優質股遇到熊市都必然獲利回吐。還有儲蓄是隨時間而出，要做到乘的效果，是否代表我每一出糧就要投資？

龔成老師：

最重要是以長期計算，例如某股現價$100，中間可能有一年跌到$70，但之後又上翻$200，由於我地是長線投資，所以財富的增長就是由$100增至$200。

不要每年去計算，而是長期計，轉化為一年複息。

現金永遠貶值，資產永遠升值，所以在理論上，你不斷將現金轉為優質股，是最好。而實際上，我地會同時捕損較好的投資時機，以及力度。但如果你未有企業估值的能力，就建議你用月供，或慢慢分注的模式，投資優質股。

------------------------------------------------

Q20444：

Dear Kung sir,你好龔生，想請教你意見，44歲未婚同屋企人租屋住，手持五十萬現金，月薪22000，想同屋企人夾份買樓，短期可行麻？

請問以下投資組合意見：
1- @$1600-月供騰訊
2- @1200-月供舜宇科技
3- @1200-月供信義光能
想加- @1000-石藥 或 中芯
想加- 百度美股

此組合ok, 及預計回報合理麻？
請建議下，吾該。

Thanks a lot 及 祝課程長開長有^^

龔成老師：

如果你打算1、2年內買樓，就不太適合投資股票，你應該集中持有現金，盡力儲現金去追首期。

股票投資，中短期可以好波動，要長期先有較穩定的回報，所以你買股票反而有風險，並不是最好的方法。

當然，如果你現時首期不足，想利用股票去增值，方向不是不可，但就要以「長期」為目標。

上述股票，都有質素與潛力，但都是波動性較高的股票，你要明白這點。

------------------------------------------------

Q20445：

阿 sir, 上個月用了5% 的＄嘗試股資區塊鏈版塊，2/3 買了1611， 其他買了1647，1499。 1611 是交易平台，在港股就只有它跟港交所了。

當然沒有可比性，不過有獨特性，以初創的技術来説，最後嘗試這一個價值投資。

1499 像討論區，不能比google, 頭條新聞，不過以心動公司作例，也許會有成長性。

雄岸老板則是比特幣抄家而已，但除了區塊，還有工業大麻，也是有獨市的概念，老師可以分享一下嗎？

龔成老師：

區塊鏈我相信是長遠一個有潛力的行業，不過，要小心近期成為了投資的焦點，價格上落一定好波動，所以要注意風險。

火幣科技（1611）有潛力有風險類，佢2019年借殼上市。

原本的公司業務價值不算高，因此現時集中火幣網的發展，業務與虛擬貨幣有關，發展存有不確定性，因為中國的監管好可能有不利因素。

所以，只可以話風險類，潛力度不是無的，但這類股，一定要控制好注碼。

歐科雲鏈（1499）無特別研究，佢屬較高風險類，要睇下你博唔博。過往持續虧損，見佢股價上落好大。只可以話，唔建議大注，自己衡量風險。

這股真的只能賺佢的前景價值。以質素來說，1611會較好。

坦白講，區塊鏈版塊，我不是這方面的專家，無作太大研究。不過，只要你控制注碼，明白當中風險，不是不可投資的。

------------------------------------------------

Q20446：

成哥，我購入了一個二手居屋，已補地價，426尺，433萬。我有現金230萬，我計過做7成及8成按揭既所需金額:

律師費: 8000
印花稅: 123000
代理佣金: 43300
按揭保險: 75000
裝修: 400000

總費用:
7成按揭
首期: 1299000
律師費: 8000
印花稅: 123000
代理佣金: 43300
按揭保險: 75000
裝修: 400000
總費用: 1988300

8成按揭
首期: 866000
律師費: 8000
印花稅: 123000
代理佣金: 43300
按揭保險: 75000
裝修: 400000
總費用: 1555300

我有以下問題想請教:

1. 這個樓宇銀行估價約460萬，我以433萬購入(高層3十多樓，望東南)，是否理想?

2. 我有冇其他費用遺漏?

3. 我覺得做8成按揭較好，因為我剩餘現金會有大約 70萬，可以用於未來投資，這觀念是否正確?

4. 因屋內較殘舊，需要全爆重新裝修，用40萬左右是否理想? 定係可以有方法慳D搞?

5. 我係呢個時候置業適合嗎?
謝謝!!

6. 我仲有冇其他地方需要特別注意?

7. 我諗緊甚至借9成，留多啲現金，會唔會太進取？

龔成老師：

1）理想，最重要是銀行估足價。

居屋有自住的價值，睇你初步資料，不差的，只要自己住得舒服就得。

2）你要計算「每月供款金額」，要確定這方面無問題，以及自己在將來能夠做到「供得起原則」，要考慮自己的負擔能力，不要去得太盡。

3）在理論上，用高成數按揭，不要動用太多現金是較好的。因為餘下的現金可以進行投資，令財富有更大的增值，雖然按揭要比利息金額多左，但在現時低息環境，投資回報率會高過利率的。

所以，高成數按較好。

4）其實差不多了，現時的裝修都不平，如果你是長住的話，就合理的。

5）都適合，香港樓市要大跌不易，現時雖然不平，但都算是由高位回左，算是可以。

6）最重要是分析「供得起原則」。

7）9成的按保較貴，其實8成已可以，8成半是上限。

------------------------------------------------

Q20447：

老師我都想喺三年內儲到另一個一百萬
不過因為我喺呢方面有啲愚蠢

我睇完你啲書好多唔明同埋可能唔係呢方面人材
所以有啲會好快唔記得

不過我keep住都有睇你啲股票分析再搵股票月供

我本來供緊 1211 2800 0066 不過因為近排1211 同2800都貴咗所以停咗供

想問下如果暫時將資金放喺1972係咪都可以
我都想報呀

不過因為我返工放七點半
放工又去私補（聽你講要開源）
所以呢期時間唔啱

龔成老師：

如果你投資方面的技巧不算好強，利用月供股票，去穩步累積財富，是一個好適合你的投資方法。

你其實仍可以月供盈富（2800），只要金額不過多，以及同時有現金剩就得，未算貴。

至於比亞迪（1211）可停一停，原有貨就持有。

港鐵（0066）可繼續供。

至於1972，都可以投資的。

現時舊經濟類股處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

至於課程，你可以日後再睇時間，我基本上每個月都會開一班的。

------------------------------------------------

Q20448：

hello, sir 我係你學生，做左「雅生活服務」的「企業評估表」，有時間幫我睇睇。

我覺得物管股一旦簽約,之後盈利下跌機會好細,除左樓市影響案場物業管理及物業營銷代理服務但都只係佔20%左右,所以覺得可以用20年個EPS

龔成老師：

睇左你的「企業評估表」，基本上無問題，你都講出了重點位，你比16分，適合的，在SWOT分析中，我覺得你寫得不差，幾好，但可以再寫多D，你話佢弱項是併購方面，的確，佢未必會收購到最優質的公司，不過，佢收購左之後，能否增加這收購項目的價值？

由原本不是最優質，經過佢加入品牌及管理後，能否提高價值，你可以了解下佢過往收購翻來的項目，並分析現時情況。因為這企業其中一個有價值的地方，就是佢會收購同業以發展，你最好花多少少時間去分析這點。'

至於損益表分析，資產負債表分析，基本上你都寫到要點，無問題。

至於最後的正面因素，負面因素，基本上都講了重點，而你估值為$31，大致正確。

整個「企業評估表」，我都覺得你做得不錯，你要不斷分析企業，不斷這樣做，就能提高投資實力，以及找到市場未發現的優質股。

------------------------------------------------

Q20449：

老師可以幫我分析下嗎？

本人38歲，家庭主婦，股市新手，現金大約25萬，另持有800股滙豐，買入價35.2

請問老師有咩野投資方案可以提供给我嗎？滙豐可否繼續長揸，十分謝謝你

另外請問老師邊本書適合初學者睇，因為要湊BB未有時間上你嘅堂，所以想睇住你D書先，日後希望安排到時間上你嘅堂，十分謝謝你

龔成老師：

我地最重要是建立一個長期的「財富組合」，要優質，要平衡，要適合你的年齡與風險承受程度，建立後長期持有，不是買賣賺差價，而是成為你財富組合一部分。

你的年齡，其實財富仍有增長力，但由於你新手，不能太進取，建議你投資平穩增長股類別。

匯豐（0005）是收息股，不用持有太過多，小注持有可以。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

到你有基本知識時，可考慮加入：安碩恆生科技ETF（3067）。

你可以動用$10萬，分注買入上述的股，或利用月供股票去買都得。餘下的等你有一定的知識先動用。

你可以睇《股票勝經》。

------------------------------------------------

Q20450：

老師，本身有3000月供盈富，想借月供股票逼自己儲多d錢，另外想月供多2000，應該供邊隻股票合適?

3067 現價升上左21蚊以上 ，可以依架選擇月供嗎？定有其他推介?

定係1448?

龔成老師：

如果你能承受風險，或投資目標想增長力較高，可以選3067。

安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

3067比1448更有平衡作用。

你可以分注，慢慢入，如果見到升得太多，就減慢入貨的速度就得。

------------------------------------------------

Q20451：

你好，我對投資全不認識。我45歲，有180 萬現金，應該點做？

以前買過股票，330 ， 買20萬現在只有3萬，因此就怕了，我有一間海外物業，租金可供樓

龔成老師：

你現時持有物業，餘下資金其實可考慮股票，令你投資組合更平衡。

我地最重要是建立一個長期的「財富組合」，要優質，要平衡，要適合你的年齡與風險承受程度。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你45歲，其實財富仍有增長力，但就不是進取，你投資平穩增長股，最適合。

我建議你先動用$50萬，餘下不要用。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q20452：

龔生，請問3315隻股現在可以入貨嗎？

龔成老師：

金邦達寶嘉（3315）係大中華區（包括中國內地、香港及澳門）的金融卡（磁條卡或智能卡）、卡片個人化服務及現場發卡系統解決方案提供商。

佢主要為金融機構、政府機構及發行金融卡的其他組織提供整體解決方案及服務，並於香港、北京、瀋陽、杭州、南京、西安、廣州及昆明設有辦事處。

業務例如有製造及銷售磁條卡和智能卡、提供個人化解決方案服務等。

過往業務不過不失，有生意，有錢賺，但增長力不強，業務獨特性也不是好高。現價仍算合理價，投資價值算是中等，這類股又未必值得投資太多。

------------------------------------------------

Q20453：

龔Sir，你好。我剛剛上完一月份投資班。現在積極選股，希望能夠開始實踐學到的理論。因為我投資知識尚淺，所有首階段想先投資水桶二的優質股票。我有一些資金可以投資也同時考慮月供。

我現在有個難題就係什麼股票，什麼情況應該lump sum 買（會分注）什麼時候應該月供。你會建議用哪些criteria來決定嗎？

我嘗試用不同股票run 一些 similution（按照過往5年股價），發現股價波幅不大的（例如0003），股價向上的（例如0823）

lump sum回報會好過月供。用1211做similution， 月供同lump sum回報比較接近。我唔知我有沒有計錯。可以指教一下嘛。謝謝龔Sir.

龔成老師：

如果你自己經驗不多，可以先投資水桶2類別，之後如果想有增長力，再增加投資水桶1。

如果你有買賣時機、估值能力，你就可以一次過買入，但如果你這方面未掌握，就要用月供，或者慢慢分注投資。

同時，我地會分析現時大市平貴，如果平，當然一次過入，如果合理，就分注，如果貴，就未必買入。

如果你無信心，我建議你分注或月供先，同時，當見到大市有較大下跌時，就大手入。

------------------------------------------------

Q20454：

龔sir你好，我和先生有以下問題想請教你，希望你能給意見

我今年32歲，先生35歲，我們在澳洲生活，每個月扣除供樓和生活支出後有餘下AUD4k。現金有AUD120k, 股票AUD60k（個股有虧損，etf有獲利, 平均回報暫時break even）。

因暫時沒有分析個股價值的知識，所以我們每個月會用2k買入追蹤全球100大公司的etf 和用1k買入追蹤納指的etf。

我們的目標係十年以內可以每個月有8k被動收入以達到財務自由。

1）請問以上投資策略適合我們嗎

2）應該要留下多少現金才適合？可以運用的現金可以怎樣投資？應該投資澳股，美股定港股？

3）有考慮投資黃金，之前有看到你回覆留言話應該投資實金，點解唔可以買黃金etf?

Thanks

龔成老師：

1）「暫時沒有分析個股價值的知識，所以我們每個月會用2k買入追蹤全球100大公司的etf 和用1k買入追蹤納指的etf」，你這做法正確。

你地可保持投資ETF，長期進行，以「儲貨」模式進行就得。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

所以這刻，你就做好「增值」部分先。

2）你可以動用3分1至一半的現金投資，但如果無選股能力，就投資ETF，香港的ETF，如2800、3067都得。美股ETF，如VOO、QQQ都得。

3）黃金可作為財富分配的一小部分，長期持有，但就不用太多。

ETF如在香港上市的2840都得。

------------------------------------------------

Q20455：

Hi，本人30歲 想5年內置業，希望用月供形式讓資本增值

想問一下若是月供股票 或etf 遇到金融風暴 股市急跌 需要停供嗎？ 另外，還有什麼因素需要停供（etf/股票）

龔成老師：

月供股票一般要長年期先有效果，5年算是一個勉強可行的年期。

如果遇到金融風暴，反而會加大月供股票的力度，如果你睇翻過往的歷史，所有股市大跌、金融危機，都是股市處「便宜」的時候，你只要長線投資，這時候月供得來的股票，長遠的回報是最高的！

當然，你當時月供，有可能見到股價不斷下跌，但只要你長期，就無問題。

因此，如果你目標是5年置業，就要到差不多置業的一年，開始賣股票，因為無人知中短期市況，不要等到時先賣。

------------------------------------------------

Q20456：

龔sir，如果想做到「股樓並行」，我本身自住的物業就快供滿，如果供完，咁樣係咪我自住的物業已經算係有物業，而餘下的資金就放到收息股身上？

定還是要另外有用作放租，作被動收入的，先算開始有物業部份，然後先再投資收息股？

謝謝龔sir!!

龔成老師：

如果要正式界定，要你收租，有正現金流先算「資產」，不過，物業始終是你財富的一部分，都有長期增值的效果。

你可以在分配上，將資金投資股票，達至「股票並行」的作用。如果再買物業收租，就會令你太集中在物業類別。

------------------------------------------------

Q20457：

老師，有隻股想問 1772 贛鋒鋰業 好似好有前竟
可唔可以長線投資？
唔該龔sir

龔成老師：

贛鋒鋰業（1772）是潛力股，但估值較難，分析時的確資料較少。由於上市年份少，我地較難有長期數據分析。

佢為鋰化合物、金屬鋰及鋰電池等鋰資源生產商，業務涵蓋上游鋰資源提取、鋰化合物深加工、金屬鋰生產、鋰電池生產及鋰二次利用及回收。集團提供涵蓋五個主要類別逾40種鋰化合物及金屬鋰產品。

其實佢的產品應用都廣泛，包括電池相關產品、化學品、藥品及新材料等，而客戶主要包括電池材料公司、電池製造商、化學品製造商、製藥公司及電子器件製造商。產品主要於中國、韓國、日本及新加坡等十多個國家出售。

我相信佢長遠有潛力，有長線投資價值，問題只是平貴度的問題。現價略貴，小小注好了，之後等佢回落先正或入，始終行業有一定的變化。

------------------------------------------------

Q20458：

老師你好，我不是太年青，之前939＆6823收了多年穩定的派息，很不錯。

但現在牛市當道，我覺得先減持一半轉移高增長的股票如快手等，看情況再轉移余下的一半！待遲d完全退休時看情況再買入部份收息股也可。再重整持有的股票組合

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

如果你不是年輕，你持有939、6823，可以。

至於是否投資快手（1024）等這類潛力股，要睇翻你的年齡、風險承受能力，絕對不要「人買你買」！

另外，快手現價不平，而好多新經濟股都不平，如投資，一定要控制好注碼。

------------------------------------------------

Q20459：

Hello, 龔sir, 有兩個關於月供股票嘅問題想問

1. 月供股票會收手續費，我現時月供股票$9000，供4隻股票。手續費只係$50。從計算股票回報嘅角度，手續費應計入股票平均買入價嗎？

2.見你一直推薦3067,我都幾心儀呢隻股票，打算月供，不過呢隻股票都無納入坊間銀行嘅月供股票名單。所以我只好每月每一指定日子買入一手。

不過手續費就貴，以現價每手大約$2000嘅情況下，佣金、交易處理費高達約$130。這些費用又應計入平均買入價嗎？我的確幾鍾情這股，但如無得月供，每月買一手儲股票手續費又貴，可怎做呢？

非常謝謝！期待回覆。

龔成老師：

1）手續費都是成本的一種，你都要計入的。

每月投資$9000，手續費$50，並不高，無問題。我地投資，無可避免有這類費用，只要不過多就得。

2）要計入成本的。

你可以每隔2個月，買入2、3手，就可以減少手續費佔比。可以隔月在指定日子買，長期進行。

3067可以以儲貨模式進行，不過，由於現價略貴，所以不要佔組合比例太多。

------------------------------------------------

Q20460：

龔成老師你好，一直以來有留意你的專欄，但保守未敢入市。希望老師可以比少少意見/方向小妹

今年27歲，每月收入近2萬（浮動），現金資產有30萬，另有投資saving 保險今年會完供。

準備每月供$2000以下股票
2800盈富
2638港燈
0435陽光
是否應增加月供金額？

老師點睇0689 和2899?

老師認為1212有望短期內回落6.2-6.5嗎？

龔成老師：

以你的年齡，港燈（2638）未必最適合，陽光（0435）就勉強。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

如果你較保守，建議你月供盈富（2800）$4000、陽光$2000。

長盈集團（0689）投資價值不高。

紫金礦業（2899）佢主要從事黃金及其他礦產資源的勘探、採礦、生產、冶煉及銷售。

但你要留意番，雖然這類資源股雖有投資價值，但只算中等。

原因是這樣，資源本身有一定的價值，但盈利始終受國際黃金價格影響，本質上會較為被動，無乜價格自主能力，同時產品無差異性，是典型的商品企業。這類企業都有一定的投資價值，但就不會太高。

利福國際（1212）主要從事經營生活時尚百貨店及其他零售業務，以及物業發展及物業投資業務。

佢透過崇光在香港專門經營百貨店。

中短期一定弱，但長遠仍會正面，不過回勇就要時間。同埋要留意，佢負債較高，因此唔建議投資太大注，現價合理區中下部至底部。

你唔好預期股價中短期走勢，無人會知，我擔心你學投資行錯左方向，建議你多睇書，《股票勝經》是入門，可睇睇。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。