要講嘅嘢實在太多了，caption係第3張相開始，有興趣了解我呢4年入行嘅經歷就即管睇下我講乜 開一個節目好易，但要做一個節目四年係好難 多謝呢4年幫過後生仔，參與過後生仔製作，黎過做嘉賓，一齊玩過crossover 嘅人。無你地一點一滴嘅支持，呢個節目可能一個月就完。 後生仔係我心目中唔只係一個節目咁簡單，呢到係一個屋企，兄弟姊妹之間一齊成長，有咩火花都好快唔記得晒，只係記得大家一齊經歷一齊成長嘅片段，一家人，永遠都會支持自己人！ 我由一個20歲，仲係對世界充滿好奇心嘅黃毛小子，到一個24歲，有目標理想，勇往直前，同時學識自我反省，不斷學習孔德賢。多謝你地對我嘅包容，我都知自己好麻煩，但你地都無厭棄過我。有時我唔係好識表達自己嘅意思，講野太mean太直千祈唔好放係心，我唔係有心。有時我成日講經扮晒野個陣，其實唔係想做大佬，我只係好想同大家分享我嘅諗法愚見。 我好想同大家分享一樣野，好多人話你24歲好細個姐，數字上可能我真係一個大學畢業兩年，啱啱出黎做野嘅社會freshman，但我經歷左2年邊讀書邊做野嘅日子，感覺自己真係好老。係overlap個兩年，我每日嘅生活就係係hall打機讀書拍野，試過考計數前兩日要全日拍野，一路拍一路溫，最後考考下訓著左。試過趕拍野提早做完fyp，3日無訓嘅日子，然後訓到心口痛扎醒嘅晚上。考試同做野撞期嘅日子，keep住一年訓4個鐘，搞到體重急跌到65kg，放棄左兩年我由細到大都好鍾意嘅運動，身體好差，厭食症初期嘅唔想食野，食唔食都係咁，食野好晒時間，食野為咗生存嘅日子。入行呢4年我淨係請過一次假，任何野都唔做，year4 final exam前嘅最後衝刺，因為想為自己暫時嘅讀書生涯再努力一次，認真讀一次書，搏盡無悔。但呢段日子真係訓練左我排通宵唔訓教嘅特異功能，好似都幾有用哈哈！我都好多謝我嘅朋友比我放無數次飛機都仲肯約我，比我放過飛機嘅真係好對唔住。你地見住我入行，見住我升見住我跌，都咁支持我，做我嘅避風港。 呢4年嘅節目，如果要諗起最開心最感動嘅真係台慶最佳綜藝節目。因為呢樣係我一秒都無諗過會發生嘅事，所以最後要裸跑，唉，激死我！要拎一個節目獎其實好難，因為要對得起—最佳呢兩個字。我地一班nobody上台拎獎，拎完獎都仲係nobody嘅somebody。個一刻我真係覺得好唔真實，一個成班唔知乜水係到傾唔知乜野，拍左完唔知自己講過乜嘅節目。但係節目4年然後結束嘅一刻，我覺得我地台前幕後係配得上呢個獎，因為呢幾年大家心機同時間都係盡心盡力咁付出，消失左4年嘅星期五，就係為咗帶比（無聊咁啱經過唔小心睇到J2）嘅大家一份娛樂。 我知道有觀眾係4年睇晒，為左了解自己仔女成日睇嘅爸爸媽媽們，多謝你地嘅支持，我諗你地真係好了解我地每一個人。啲人成日問你地有無稿，我可以答你有=無(sorry total)，如果吹水都有稿嘅話，我地個個背書應該滿分。 可以同係鏡頭面前分享自己嘅故事係好幸福嘅事，我一開始頭幾個月覺得自己完全無定位，無特色，無character 而問Mr R點算，我係咪做得好差，但最後我發現做自己先係最舒服，雖然出到黎我聽到嘅comment只有［扮晒嘢個個Danny］其實咁都幾好呀，起碼有個特色比大家見到，哈哈！ 去到最近，經歷翻天覆地，又有好多消息傳出。其實對於節目結束都心裡有數。好多人成日問後生仔做乜完，我只可以話因為要完囉！。一個節目嘅完結唔係評定佢係好定差定乜乜乜嘅因素，只係有啲野要完嘅時候，佢就會完。 唔知由幾時開始期待開廠有show變成想見到大家，呢年拍劇小開左好多後生仔，有時都會掛住大家，因為入到4廠就係最舒服嘅感覺。一個團隊入面真係有好多嘅角色，陸浩係我嘅榜樣，由偷偷地學佢講野，抄佢嘅mc技巧，去到大家有咩問題都會問陸浩，成日請我地食飯嘅陸浩，帶住我地800集搵好多show錢嘅陸浩。陸浩係我地嘅哥哥，照顧細佬妹100分，有求必應，人生導師，心靈輔助嘅哥哥。盈盈就係我嘅二家姐，成日請食飯，請野飲請野食，有求必應，有問必答嘅家姐，我見佢真係多過見我親生家姐😂莫名奇妙嘅雙子座默契，一齊經歷嘅心靈成長，最明白我嘅人，多謝你句原來係處。Louisa係移咗民嘅大家姐，因為係跟年齡排，無辦法。其實我幾enjoy同你一齊做節目同去日本拍野嘅時間，同你嘅小小默契，係其中一樣係節目最大嘅滿足，哈哈。你總係將最殘忍嘅現實話我聽，話比我知理想歸理想。我會記住我左手雞翼，右手蛋糕個一幕，呢個福利係我有哈哈。佢地三個真係靈魂，值得我地嘅掌聲。 #多謝當初汁我返黎嘅人 #多謝照顧過我地嘅經理人 #其實我唔係好鍾意chok住擺pose咁影相出post #只係我唔敢將感性嘅自己比人見到 #用懶型黎覆蓋自己嘅怕醜 #唔tag任何人啦有緣份就會睇到 #原來係處 #後生仔傾吓偈