. [無綫][聲夢傳奇 決賽] 因為奧運星期五開始嘅關係，調咗去今日星期一晚做決賽嘅《聲夢傳奇》，由2030直播到2215，兩輪賽事，產生三個獎項。 5強參賽者包括炎明熹、姚焯菲、鍾柔美、冼靖峰、何晉樂，自選一首快歌一首慢歌，安排快定慢歌喺第一定第二輪出戰就自己話事。 全晚兩輪選歌都多次出事，冼靖峰 Archie 選唱孫燕姿《我懷念的》開首自彈自唱係最好嘅選歌，可惜原本層層遞進嘅原編曲，喺改篇之後分得更多層，Archie去到中後段已經無力再上，但又冇回落返再上，變咗喺未去到歌曲情緒高峰，把聲已經去到高峰，承托唔到。不過比賽係相對嘅，喺第一輪近乎個個選錯歌嘅情況之下，加上炎明熹選唱辛曉琪《領悟》時表現失準（我覺得佢應該係唱到，所以認為係失準），第一回合嘅評審評分，由Archie奪得最高嘅19/25分。炎明熹Gigi、選唱《第四晚心情》嘅鍾柔美Yumi並列第二得17/25分。 不過第一回合嘅總成績，除咗評審所佔嘅50%，仲有觀眾投票嘅50%。喺咁嘅情況之下，Gigi同姚焯菲Chantel反超前Archie同Yumi，成為最後兩強，進入第二回合對決。 兩強喺第二回合都安排咗快歌。一直以少女味得分嘅Chantel選唱鄭秀文嘅《Chotto等等》，改編之下兒童感十足，同歌詞舞步迴異，成為致命傷。Gigi選唱Lady Gaga《Bad Romance》，雖然比起決賽前嘅表現仍然有距離，但選歌方面比Chantel優秀，憑呢個優勢，以22對3嘅評審票數勝出，奪得「聲夢傳奇專業評選大獎」。 另外，Gigi亦都喺觀眾投票之中奪得最高分數，贏得「觀眾熱選大獎」。兩項分數相加最高得分者奪得嘅「聲夢傳奇 傳奇新星」獎項，自然都係Gigi嘅囊中之物。炎明熹成為首屆《聲夢傳奇》三料冠軍。 第一回合比賽評審評分如下 1st 冼靖峰《我懷念的》：19/25 2nd 炎明熹《領悟》：17/25 2nd 鍾柔美《第四晚心情》：17/25 4th 姚焯菲《愛很簡單》：16/25 5th 何晉樂《衝口而出》：4/25 第一回合經觀眾投票後總得分如下 （觀眾投票、評審評分 各位50%） 1st 炎明熹：33.0% 2nd 姚焯菲：25.0% 3rd 鍾柔美：18.9% 4th 冼靖峰：17.6% 5th 何晉樂：5.3% 第二回合得分如下 炎明熹《Bad Romance》22票 VS 姚焯菲《Chotto等等》3票 #無綫 #TVB #聲夢傳奇 #炎明熹 #姚焯菲 #鍾柔美 #冼靖峰 #何晉樂