#gfmurmur9116 我同ex下個月就三年，佢出軌了再同我分手。我同佢係醫院返工識，個陣我21歲係新入職PCA，佢24歲係fresh grade RN。佢係好乖好顧家嘅男仔，我地相處咗半個月，最後一齊咗。我嘅初戀係佢，而佢之前大學拍過次2年幾拖，冇對外公開過，得佢好熟嘅大學朋友知。由於我地一齊嘅時候仲係同一個ward做野，所以佢唔想公開我都好明白。呢段期間，仲有個呀sir同文員追我，但我都拒絕咗，因為我眼中只有佢。 佢陪我經歷好多，陪我見好多護士學校，終於7個月後有護校收我，我離開醫院重返校園。我以為我地嘅關係終於可以公開，但佢冇咁做，ig嘅story同post從來冇我出現（真係得我一個女朋友）。有次係街遇到以前同事，佢鬆開咗我隻手，我好傷心，問佢點解唔公開連朋友都唔知（佢屋企有好多問題，所以屋企人唔知我接受）佢只係講對唔住。但我繼續等，因為我信佢，信有公開嘅一日。 . 係讀書一年半間，我地感情好穩定，而每逄考試測驗佢都成日陪我去自修室溫書，之後再一齊出街。連佢放大假都係同我一齊，因為當時佢嘅生活只有我。我有佢手機pw，佢都saved我指紋，但我一次都冇check手機，因為我信佢。呢段期間佢ig加咗愈黎愈多同事，我知公開我嘅時候又唔知係幾耐喇，但我等，我信佢。 近呢半年，佢ward同事大調動，有個大佢1年嘅女同事去佢ward，佢地同另外啲後生嘅同事玩得好埋，會出去食飯，有自己whatsapp group。我以為佢對大佢一年嘅人冇興趣，所以我完全冇戒心。直至有段時間，佢whatsapp online但唔係覆我，我開始懷疑喇。再到7月幾有日同佢出街，發現個女單獨whatsapp佢，我好嬲好驚，我問ex平時係咪覆佢唔覆我，同埋點解個女單獨搵佢，同埋個女知唔知有女朋友嘅存在，佢話因為同個女比較好傾，個女唔知有女朋友，話同個女仔冇野但係唔肯俾我睇手機。因為ex性格真係好乖，所以我信佢。而佢個日攬住我講咗句「對唔住」，我問做咩咁講，佢話冇野，到依家我終於明咩意思喇。 . 呢半年，因為實習更期，我地有時隔十幾日先見一次，即使我好掛住佢，好想佢接我放工，但佢屋企好窮我唔想佢嘥錢，所以我冇提出。我又鬥氣，唔想次次都我打俾佢我約佢，所以我地少咗好多聯絡。出街我想佢主動攬我錫我，但佢都冇咁做，最後我地冇半年冇錫過喇，但我仲以為我地感情好好。上年12月佢轉咗新ward，佢同個女同其他前同事仲去BBQ，我冇戒心。我問佢關心佢返工情況，佢都唔願意講咁多，我都唔敢問咁多，我以為靜靜陪著佢就可以。 到12月尾我終於考完最後一個試喇，我好開心因為我地講好有好多plan要做，旅行機票都買咗，但同時佢開始好少覆我，覆我嘅語氣好冷淡，我講過嘅野佢都唔記上心。次次覆我都話好攰，所以我唔敢煩佢，但原來已經有人關心佢。到1月中，佢同我講唔想再呃我，覺得我地感情淡咗好多，好似係朋友咁，叫我俾幾日時間佢冷靜下。過咗十幾日，我忍唔住偷接佢放工，個陣佢同我講鍾意咗個女仔但冇一齊，仲要俾我估中係之前個女同事，佢話今晚同個女講清楚，只會whatsapp佢因為知我唔想佢地見面，之後聽日搵我。我信佢。 . 到第二日，佢whatsapp我話佢諗清楚要同我分手，佢唔聽我電話所以我去佢屋企樓下等佢，但佢唔落樓唔肯見我，我企佢屋企門口先逼到佢出黎。原來佢個個女同事一齊咗1個月幾，佢哋一齊咗幾日之後，個女仔知道佢有女朋友，但都繼續一齊。佢話傷害咗三個人，琴晚去咗搵個女講清楚分手。佢話自己做錯左好多嘢，對唔住我要同我分手。 我喊到崩潰，係咁留佢都唔得。我逼佢講先知道真相。逼到佢認現階段覺得鍾意個女仔多過鍾意我，同個女仔一齊好開心，同我就冇以前咁開心，仲話同我少咗好多共同話題。佢對我嘅態度同語氣變得好冷淡，好陌生。我求佢比我留係佢身邊，佢答我對唔住，佢話比兩日時間佢考慮，之後搵我。我信佢，但過咗幾日喇都冇搵我。我呢個前女朋友嘅身分，只係得佢大學兩個朋友知。佢一直傷害嘅只係我。 . 我好辛苦好掛住佢，好多地方太多回憶唔敢去。我好後悔冇做好女朋友角色，冇珍惜佢以前嘅愛，唔記得佢都要人錫嫁。只要佢返黎我可以當冇事發生。我好驚佢同個女仔會復合，因為佢哋係同一間醫院做，一定會見到。我唔想。我甚至想放棄私院返工，揀去HA做，因為可以見到佢。 . 我好想憎佢好想鬧佢但我做唔到。分手個陣佢同我講，平時我送好多禮物俾佢，佢好內疚因為佢冇錢買嘢俾我。但佢一直唔知道無論係我生日定其他節日，我最想要嘅禮物係唔使錢，只係要公開我，認我係女朋友。 . 如果係街見到佢，佢會唔會覺得我好煩，好討厭我呢⋯⋯我唔想咁 ———𝐂𝐨𝐮𝐩𝐥𝐞.𝐦𝐮𝐫𝐦𝐮𝐫——— ♡投稿請按 @couple.murmur IG主頁鏈結! #hongkong #couple #lovestory #hkig

《虎紋和你TALK — 黑醫黑護貪心怕死？》 網上成日都有好多假又不失的消息 虎紋最驚訝的是 竟然有議員都是如此弱智 蔣麗芸博士： 我讀書唔多苦讀幾年考左個RN牌話你知！口罩無論蒸炒煮炸燜燉焗都唔可以重用架🤬係一次性！一次性！一次性！ 講完🙂唔想為左D on9仔動怒 我作為一個專頁經營者成日都會有Hater屌我 我唔是好介意 有人屌我黑護 話我貪心怕死 唔想辭職又想要份糧 又驚死咪出聲囉 唔洗用咁多煽情的野去包裝自己 其實我好撚嬲 架🙂 因為我做左護士咁多年 我試過 奮不顧身唔食飯犧牲個人時間去搶救生命 我會因為救唔到某個男人而內疚好耐 我會嬲自己點解唔再做好D 雖然一個護士睇16-18個病人 我可以好多藉口去話忙 所以做唔到 點解自己疏忽左佢俾少左關注佢 我返到屋企臨訓前都會諗起依d事 我屋企人會話我傻 一個人一對手我做得幾多 內疚感和無力感 依然充斥住我的內心 我亦都試過俾家屬指罵 罵到在病房痛哭 被指責我不盡力 指責因為我失職而病人失救 而我心知我已經盡力 只係我地資源唔夠 我可以做的我都做了 我問心無愧 卻又無能為力 因為政府依然莫視醫療系統崩潰 醫護人手不足的事實 回想現況 我地醫護到底要啞忍到何時？ 以前有班經歷過沙士的前輩講過 「你地家下好幸福架啦！果陣我地口罩又唔夠，都要重用再重用，隔離設施唔夠，好多cases都放在普通病房架炸，咪又係咁樣捱過黎！果陣總減左人手，一樣搞得掂」 我聽完沉左一沉 我覺得佢好可悲 佢竟然可以幫不合理的醫管局搵藉口 而唔係幫自己同後輩去爭取更好的權益 到底係佢奴性重定是不思進取？ 點解好似好自豪咁講出黎？ 你唔染病是因為你好彩 因為防護裝備不足的情況下 你拎緊自己生命同人地生命博 點解總可以覺得好威咁講出黎？可悲😢 去到家下武漢肺炎 我身邊的好友都抽中了生死籤 要在連N95 Fit test都未做好的情況下 要入隔離病房工作 佢地怕的不是要接觸病毒 更怕的是自己感染病毒🦠而累及家人 我地醫護罷工 可能講的野好空泛 但全部都係有理有據 一個隔離病房10張病床入面 有一半以上係「非本地居民」 （以上是我觀察到本醫院的情況） 政府點解死都唔肯全面封關呢？ 起碼禁止🚫「非本地居民」入境先啦呀嘛？ 你可以放D香港人入黎 但起碼唔好再俾旅客、內地人以求醫為由來港散播病毒😔 我真係對政策不熟悉，但我好肯定如果政府再唔做野 SARS的慘劇一定會重演！ 點解唔可以幫市民買口罩抗疫 參考下澳門政府咁樣憑身份證限購！ 要大批大批市民去寒風凜冽排幾個鐘買口罩？ 我地醫護唔好講到自己咁偉大啦 為全香港人🙄 但我可以話你知 我地除了想救港 同時都想爭取我地合理權益 要在安全資源夠的環境下工作 我地條命唔係地底泥 就係咁簡單姐！ 你train一個警案幾個月會考5科合格，你出錢去外國買Full 防暴gear去上前線 點解你唔願意為train4年 DSE起碼3條5**考入大學的醫護去購買足夠而夠規格的裝備呢？ 醫護不時貪心怕死，只是想爭取合理權益 以及希望可以做到上醫醫國！下醫醫人！ 香港人要自救的時候到了！靠政府？唔好傻啦 請支持醫護罷工！ 市民的支持是俾我地最大的強心針！ #虎紋姑娘 #帶口罩 #手動轉 #勤洗手 #防疫人人有責 #香港人加油 #自己香港自己救 #醫管局員工陣線

2003年，我仲讀緊中學 剩係知日日返學要帶口罩， 成條街都無咩人， 樓市新低， 好多人失業， 唱K好平, 支咪仲多左個網笠住, 可能有好多人病左好多人死左， 但我只係個中學雞， 所有野對我影響唔大， 我仲多左好多日放假係屋企hea... 十幾年後嘅今日， 我做左個RN, 我做左個媽媽， 非典型肺炎又黎啦， 個ward整左部流動裝備車， 準備隨時收武漢critical case時， 推去開isolation ward用。 senior RN 又開始講返當年SARS ， 大家點樣抽生死籤去照顧病人， 提返當年邊啲醫生/護士/親人中招， 有人死左， 有人好返， 有人骨枯， 有人無左個老公， 自己湊大個仔。 有人插到成身chest drain, 屋企人就剩係可以企係病房門外， 病人死果下都無人陪你送終..... 依一切一切係幾咁恐怖？！ 你明未？你識驚未？ 我相信香港人係識驚嘅... 因為我地經歷過..... 但大陸人呢？ 野味照食， 痰照吐， 口罩照唔戴， 病左照過關， 去環遊世界都得啦， 有咩問題。 當全世界都有confirm case, 你先話中國得567宗？！ 得17個人死？！ 然後香港得2單....？！ 有無可能呀？！ 今日， 香港仲同你講佢有零星個案， 十年後呢？ 當一切一體化之後， 就唔會再有人病， 唔會再有人死...... 因為黨會保護你， 黨可令人免疫， may黨bless u all