【Apple】春季發布會五大新品懶人包：七色iMac、M1 iPad Pro、AirTag、紫色iPhone 12 Apple春季發布會於今日凌晨舉行，會內除咗公布傳咗好耐嘅AirTag、七色iMac同iPad Pro，就連iPhone 12都有新顏色。小編為大家準備好懶人包，一次過睇晒所有重點。 （圖1） 1.iPad Pro 新iPad Pro有11吋及12.9吋兩個尺寸，共有銀色及太空灰兩隻色。新機搭載M1晶片，處理效能比上代提升50%、而圖像處理效能則提升40%。新iPad Pro保留採用USB-C接口，但加入支援Thunderbolt及USB 4.0技術，最高能進行40Gbps傳輸，另外加入5G流動網絡版本選擇。 價格為$6,399起（11吋）及$8,799起（12.9吋），預計4月30日起接受訂購，5月中後開始發售。 （圖2-4） 2.iMac 新iMac外觀移除過往正下方嘅Apple LOGO，超薄機身僅有11.5mm，並有七種唔同顏色可以揀，包括綠色、黃色、橙色、粉紅色、紫色、藍色同銀色。搭載M1晶片及24吋 4.5K Rentina螢幕，解像度為4480 x 2520。同時配備全新1080p FaceTime HD相機，高度傳真六揚聲器音響系統，並配備錄音室級數三麥克風陣列，有助減少反饋，減低雙方干擾，令對話更暢快自然。 入門型號價格為$9,999起，預計4月30日起接受訂購，5月中後開始發售。 （圖5） 3.紫色iPhone 12 上年推出嘅iPhone有黑、白、藍、紅、綠五隻顏色，Apple今次喺會上就公布iPhone 12同iPhone 12 mini將加入全新嘅紫色（iPhone 12 Pro無份）。 價格分別為$6,799起（iPhone 12）及$5,999起（iPhone 12 mini），4月23日起接受訂購，4月30日開始發售。 （圖6-9） 4.AirTag 今次Apple全新推出AirTag配件，只要將佢扣喺銀包、鎖匙或背囊，就可以透過尋找App定位其位置，啱晒「大頭蝦」嘅朋友。AirTag內置揚聲器，如果唔記得件嘢放咗喺邊，只要喺尋找App全新「物品」分頁，或直接講「喂 Siri，搵吓我個銀包」，AirTag就會響。 而且AirTag具有防止非自願追蹤的功能，如果你嘅物品入面有其他人嘅AirTag，iPhone會知道有個AirTag跟住你移動，並發出通知提醒你。一段時間後，如果你仍未發現到AirTag，AirTag將會發出聲音以引起注意，咁就唔怕有人用將AirTag當成跟蹤器嚟追蹤你。 單個價格為$239，四個裝為$799，可以選擇免費鐳射雕刻，製作個人化AirTag。4月23日起接受訂購，4月30日開始發售。 （圖10） 5.Apple TV 4K 新一代Apple TV 4K 採用A12彷生晶生，擁有兩倍高動態範圍 （HDR） 影片格率，兼容杜比全景聲音響系統，隨機附送全新Siri Remote遙控器，採用觸控式點觸板，加入咗類似iPod轉盤嘅設計，為用戶帶嚟更簡單流暢而且快速精準嘅操控。 價格為$1,399（32GB版本）及1,599（64GB版本），4月30日起接受訂購，5月中後開始發售，每位顧客限購6部。 #Apple #Apple發布會