【持續關注】數據挖掘者發現《Cyberpunk 2077》10個未發布DLC內容 經歷波蘭政府監督、黑客入侵、首席遊戲設計師離職嘅CD Projekt Red，日前終於推出《Cyberpunk 2077》1.2版更新檔。即使更新檔容量接近40GB，修復咗大量BUG，但同「完善」遊戲仍然有一段距離。最近就有數據挖掘者發現，CDPR正發開緊10個《Cyberpunk 2077》DLC，不過就未知係咪免費（CDPR你仲敢收錢？）。 自從CDPR被波蘭政府「周」完之後，就努力推出更新檔「完善」遊戲，可惜2月嗰陣被黑客入侵伺服器，搞到更新檔推遲到3月29日先發布（無錯！又甩轆啦...）。今次1.2更新檔可以算係相當有誠意，PC版更新檔容量約30.9GB、PS4版為44GB、XBOX版則為43GB，共修復超過500項內容，中文說明更突破1萬字，好似「水蛇春」咁長，不過呢啲都係紙上談兵，實際有無改善到、改善咗幾多，要玩家玩過先知。 除咗1.2更新檔之外，最近一位名為PricklyAssassin嘅Reddit用戶，透過數據挖掘方法發現CDPR正發開緊10個《Cyberpunk 2077》DLC。原Post就已經被Reddit刪咗，但好彩一位叫IdleSloth84嘅Twitter網友有Back up，所以大家先睇到相關內容。 從圖片可以睇到，10個DLC分別係RipperDocs Expansion（神機醫擴充）、Body Shops Expansion（體型商店擴充）、 Fashion Forward Expansion（時尚未來擴充）、Gangs of Night City（夜城幫派）、Body of Chrome（鉻合金身體）、Rides of the Dark Future（暗夜騎行）、The Relic（聖物）、Neck Deep、Night City Expansion（夜城擴充）同三個未命名嘅欄位。 按照各個DLC名稱嚟睇，似乎就係傳聞中被刪除嘅內容。雖然張圖寫住售價為$0.00，但考慮到CDPR前作《The Witcher 3》嘅經驗，好有可能較大規模、涉及新故事劇情擴充嘅DLC將會收費，而小型任務或裝備道具等DLC就免費，不過最終係點就要睇CDPR有幾「佛心」。