我係咪要將呢一系列改名為【廣告後創傷後遺】？咁都係時候開始part 2喇！

開估先，行咗prepay之後，經理人幫我接job時聽得最多係咩？

第1位
我地公司policy 唔容許prepayment 嫁喎！

(呢句我想特別回應 : 你公司Policy就係世界標準Policy，人哋公司Policy就唔係Policy？人人要跟你係咪？)

2) 嗰少少錢我哋咁大間公司唔會走你數嘅

（經理人自己有個非正式統計，講呢句嘅走數或拖數率高達99.9%)

3) 你哋都唔差嗰少少錢生活啦！

（呢句我笑多過嬲，即係你老闆見你戶口仲有錢或者唔係窮，唔出糧然後同你講：你都唔差嗰少少錢生活啦！)

4) 你哋咁有錢！破一次例俾我啦！

（不如我畀你破處，你畀錢我啦！)

5) 如果喺我戶口撳俾你就梗係易啦，果少少錢我都仲俾得起呀，之但係啲行政手續好麻煩嫁嘛，你明啦.......(下刪500個籍口）

以上答案係剛才whatsapp問我經理人，佢真係好好EQ，其實第3至第5我係啱啱先知，因為客係同佢講，然後經理人小姐同我補充一句：姐受幾多氣你唔知嫁啦

......真係聞者傷心，聽者流淚🤣🤣🤣

另外，我都想同一班好好嘅Marketing或者品牌講一聲：唔好意思！因為一撮害群之馬搞到你哋全部要prepay，我真係情非得已，完全係「一粒老鼠屎，壞了一鍋粥」嘅寫照。

唔知你哋覺唔覺呢？細細個麥記啲紙巾係擺出嚟任攞，嗰陣啲麥記紙巾係淺啡色頗厚身好好用，我自己都見過唔少師奶一嘢抽走咗半疊，後來麥記再冇提供喇，因為呢種模式令到真正顧客冇得用，大部份紙巾畀貪心人攞晒返屋企。

喺我哋要求prepay之前，除咗有好多收唔到錢，或者要整爛塊面追數嘅job之外，有兩單好經典，其中一單佢拖咗半年，我先後用email同whatsapp跟進，每次對方都係copy & paste同一堆字:「chasing finance department. will be done within a month。」

呢個within a month，足足講咗6個月，仲要無誠意到不多不少，次次都copy同一堆字，卒之我忍唔住爆炸，最後一次whatsapp同佢講，再唔找就唯有出post開名，然後第二朝9點幾我已經收到錢。

另一單經典之作係搵我做廣告嗰位Marketing原來辭咗職，已經欠咗半年，完全冇人follow up，咁我唯有搵返佢email入面cc嘅同事，當中大約有6個人，唔知好嬲定好笑嘅係，email內其餘6個人已經全部離職........係呀，係全部離職，其實Marketing呢行係常見既，只係冇諗過咁啱呢封email內嘅人一齊走晒啫，最後我要搵到人哋會計部主管去跟，再等多個幾月先收到。

我明白大家工作嘅立場同崗位唔同，但將心比己，如果你打份工，幾個月先出糧比你，甚至唔出，你追返應有報酬都好似去乞咁，你會唔會打呢份工？

其實有好多品牌同Marketing都好好，有啲隻廣告未出街已經畀晒錢，有啲完全唔使追，廣告出完之後一至兩星期已經寄支票嚟，但因為一撮害群之馬同埋唔守信用嘅人，搞到個個都要prepay先可以喺度落廣告，我衷心向守信嘅一班Marketing同品牌致歉，過往經歷令我迫於無奈要咁做。

唔係呃大家去like廣告，但好想講一句，而家喺辦公室日報每一個廣告都係prepay，佢哋全部都係好客，衰嘅客我已經淘汰咗，所以第日見到廣告寫得好，千祈唔好吝嗇你哋嘅like，留得喺度都真係值得畀。

我記得經理人小姐頭兩個月幫我做嘢嗰陣，佢曾經問過一句:「下，個客未畀錢你都出糧畀我呀？佢找數先啦！」

可能佢都唔記得咗，但其實呢句說話我一直擺喺心，真係好感動，我只係想講，如果我等到個客找數先出糧，咁我同嗰啲客有咩分別？

若然每間公司都等啲貨賣晒，等啲客找晒數先出糧畀員工，咁我哋全部都餓死咗啦！你開得公司，做得老闆，就係要承擔，而唔係要幫你做嘢嘅人一齊承擔。

賺就你最大份，蝕嘅風險就轉嫁畀人，咁著數不如我做啦！