［普利茅斯大學宿位爆煲記］唔好意思，舊文都唔記得幫 獨角號 share。幸好呢篇冇咁有「時間性」。

海外樓，係呢五年其中一個最熱門嘅課題。無他，一來局勢唔好有人想移民，或者買個保險。二來，香港樓貴。升唔少都唔係最大問題，係單價貴，加上交易費貴，買一千萬樓一出一入冇咗成球嘢都唔奇。聰明嘅香港人當然睇到商機。

或日，你埃汾都有去啲海外樓盤講座喎。是的，其實冇乜關係，不過可以利申我冇海外物業。樓嘅嘢，同股票好唔同，真係可以好冇可比性。「日本樓」，係六本木（仲有冇？）定四國四萬十市已經爭好遠。

傳統智慧好多都錯，但講地產，露畸唇露畸唇露畸唇，都仲係冇乜死錯人。固然香港有香港獨特嘅問題，但全世界其實都係咁上下，民主又好獨裁又好，左翼政府又好右翼都好，都係一樣。就係啲友搬晒去城市。因為嗰度先有工作機會，配套好。後生仔寧願在城市住劏房都唔會返鄉下等死。日本如是，美國如是，大陸一樣係咁。所以你睇啲咩負擔比率去覺得樓市有泡沫，輸死你（http://bit.ly/2J5Rb2F）。你睇深圳中位數收入，一樣冇可能買得起樓。咁但，深圳嘅樓唔係深圳中位數收入嘅人買嘛，係全國最富有嘅人買。東京倫敦，或多或少都係咁

所以，明了，就係只買最旺嘅地方，冇乜走雞。除非政府玩到遷都。但，即使緬甸遷都，你都唔係買奈比多樓啦下話，雖然sell仰光樓條友好似著咗草。一座城市嘅底氣，都唔係政府可以十年廿年可以拆走的。

但，如果貪平買啲三四線城市，就祝你好運。

文中呢個例子，就係英國樓。英國樓當然係熱門，香港人戀殖嘛。客觀嚟講，有啲有仔女果邊讀書，一雞兩味。英國嘅法制亦都相對地好啲。同埋至少你都仲識英文，你在仰光層樓爛咗尾，我就唔知你點拎住堆圈圈鎖鏈嘅文件同人理論。

買英國樓，仲話住畀學生住添，學生宿舍。我懷疑有冇啲怪叔叔，係博人地女學生交唔到租可以肉償。我個朋友早排在日本買層樓，個租客又係女學生，我地就已經陰陰嘴笑。唔好話我睇得四仔多呀，英國真係有咁嘅東西，都幾猖狂。BBC呀，唔係我老作（http://bit.ly/34qxgpK）。

好丫，租畀學生。有冇諗過學生邊度嚟？大學嚟咯。咁你間大學收生唔足你咪仆街？

呢個故事就發生在普利茅斯(Plymouth)，軍事撚或英撚會知係海軍重鎮，但你有冇搞錯咗？你係房東，唔係蘇絲黃喎。當地經濟就固然麻麻地，但唔緊要，之前一路都靠學生頂住。咩學生？普利茅斯大學

普利茅斯大學啦喎，唔知呢度有冇舊生，但都係照講，認真麻麻地。你睇排行榜都係中下游，140間排到80咁上下，即管慢慢話我知排名榜唔係一切，嘻。

但唔緊要，有智慧不如趁勢，之前十幾廿年，英國教育一向係靚招牌，傻仔都搵到錢。但，然後係乜呢？脫歐。

估下咩學校死先？係咪LSE收唔夠人？定Warwick（個名好熟，好似幾好的）冇人讀？點都係死啲低排名嘅先。普利茅斯大學，十年唔夠，學生由三萬人跌到兩萬人。咁邊個幫你租屋？

之前幾年呢個故事十分好sell，不停有新樓動工，結果供應過剩。基金就早早沽貨，接貨就係你班好有錢嘅香港人。鍾意又有時間可以睇返Financial Times嘅成個故事（https://on.ft.com/2PLufwm）。但簡單嚟講，一係就大城市，一係就好大學咯。

BTW，其實使唔使有咁多大學？唔知，但近來多人問呢個問題。不妨話埋你知，普利茅斯大學，正係90年代初，英國「學位量化寬鬆」印陰司紙嘅產物（陶傑話嘅）。以前？理工嚟之嘛。有返咁上下年紀嘅記得呢段歷史。邊個搞出嚟？之唔係讀書唔成嘅馬卓安。然後香港跟埋一份添。

呢度仲有另一篇文講　（https://on.ft.com/2psFYVP）普利茅斯大學宿舍泡沫，慢慢睇，大把奸狡嘢，你以為英國人好善良啫。入面解埋畀你知，啲咩「八厘保證回報」，有幾搵笨。（簡單嚟講就係，我執笠咯，冇錢啦，破產）

拿，又係誠意呀，我個導讀長過篇文的。

記得讚好 獨角號專頁，因為係獨家供稿。開地盤畀埃汾自然係恩人，亦即係你地恩人