［香港讀Master，嘥錢嘥時間］　置地記者講起讀Master（http://bit.ly/2SLz8qU），我又講下。

首先快講我嘅真人真事經歷，免得你質疑我冇資格講。我在2000年夏天在港大畢業，精算，second lower。然後冇返過工，9月去咗英國讀書，在Warwick（冇錯，陶傑嗰間）讀MSc in Financial Mathematics．唔知讀一年定一年半，總之2001年中秋節我返咗香港，然後開始咗大半年好爽嘅雙失生涯，見咗好多份工都見唔成（我唯有同自己開脫：果時失業率個個月升，而我返嚟正係911後冇耐）。到2002年我開始返工，教書。2004年轉咗去做蕉行。以上種種，舊文有寫。（http://bit.ly/2FRQfBk　贏在起跑線？人生唔係一條直線）

我當年去讀Master，原因好簡單—唔想返工。到英國話收咗我，我更加仆到去，就同老豆老母（已離婚，但居然都同心協力）講科水。你話換著係香港？可能我都讀，讀左就抱憾終生，但唔使擔心呢個問題，因為根本冇人收我。Second lower嘛，堅記車房堅叔話齋，second lower就好難搵Master讀架，邊個想收second lower？ 咁多個米高佐敦？

而我返到香港，居然都仲有搵Master繼續讀，咁就梗係搵MPhil啦。讀完MSc又MSc？不過又係好彩，畀人百般羞辱（其中包括中大數學系某博士，屌佢老母啦，同科相輕，質疑我讀呢啲火箭數學嘢唔識抽象思維喎，同我講即係例如呢，我地講limit要用Delta-Epsilon Approach—我仆你個街我中五已經識啦！你唔撚睇我A level 拎乜grade？），最後又係多謝佢地各院校不娶之恩，收咗我嘅我應該都幾大鑊。
________________________________________
讀Master？首先問你點解想讀，二來問你去邊度讀。我嘅短答案係，在香港讀嘅，就唔好浪費時間了。在外國讀，好啲，不過都唔好以為有乜回報，你當係消費，心理易平衡啲。

想讀Master嘅人，心態各有不同。首先講係最好嘅，即係讀完Degree接住去嗰啲。最出色嘅，當然係為知識嘅，諗住做科研嘅，讀上去做Doctor嘅。咁你梗係去讀 MPhil啦，然後去送薄餅讀PhD。我冇讀過MPhil冇過薄餅，冇得評論。只能叫你睇返我朋友廖博士 軒翥而翔 嘅鴻文（http://bit.ly/2SO4cGM）。客觀地講，博士學位膨脹甚快（懶搵數據），而有幾多學校請，大家心照。請嘅會唔會請本地大學嘅博士，更加心照。我年少時正係香港兩大變三大三大變八大定十九大時，明明以前唔使薄餅都教得嘅位，變咗全部要有薄餅，就請咗好多人。呢班友就梗係霸住屎坑等退休。加上而家大家知道，研究院十居其九係大陸啲學霸，食樹皮偷渡落嚟，個個都省級狀元，勁過你勤力過你，你覺得你夠佢鬥？Think Again．不過都係嗰句，我冇做過就無謂潑人冷水，要追夢嘅自便。本人其實唔係討論MPhil

畢業去讀Taught Master（MA MSc MStat一大堆）嘅，九成就係啲唔想返工嘅人，咁其實係OK的。冇錯，只係將個問題推遲一年，但推得一年得一年嘛。況且工可以邊讀邊搵，分分鐘畀你搵到份好嘢就讀都慳返（都唔記得講，當年我嘅教育文憑PGDE就係咁樣畀港大殺咗訂，因為之後我冇教書，去咗做蕉行）。但真係除非好大件事，好冇錢，唔識講英文，要餐餐都食到譚仔。否則，強烈建議你唔好在香港讀。原因下面會再講。

好啦，最麻煩嘅，其實係啲做做下嘢走去讀Taught Master嘅友，亦都係呢度嘅讀者。又不外乎係兩種人。有啲係做得幾年嘢，可能唔開心，可能同人炒大鑊，可能畀條女飛咗，總之想逃離職場。呢啲例子我都聽唔少。或者有啲係條女做得唔開心，自己又有錢，就供埋佢去讀，又得。但一般嚟講，一係就唔做嘢，開始返得工呢，為療傷去讀Taught Master，應該冇乜用。

你自己計下，讀Taught Master要幾多錢，加上科乾咗嗰一兩年嘅人工。然後仲要再搵工，一個唔該一讀完金融海嘯你就仆街。況且，你唔鍾意都好，少不免會有老細或HR覺得，呢條友做幾年又走咗去嘅，會唔會之後都係咁？係好戇鳩，但HR就係戇鳩架啦，今日先知？貪過癮呀要減壓呀失戀療傷嘅，你過澳門應該簡單啲，自己計下用嗰堆錢可以做幾多嘢—最重要係，你放工先去嘛！唔使辭咗份工去澳門！所以，真係要讀，就Part Time。死都攬住份工。

另外，仲有堆比較正路嘅，係為事業，即係為錢。例如係做咗幾年嘢覺得自己有啲不足。但，千萬唔好係因為呀乜水讀過你冇讀，真係唔關事的，人戇鳩你又戇埋一份？邊個話你知老細升職睇人有冇Master？我歷任老細冇一個讀Master，亦都冇一個係CFA。因為李嘉誠真係唔使識落石屎。

如果係覺得自己不足，係好事，總好過覺得自己好醒。我年代唔少理科高材生，其實好叻仔，但大學走去讀工程或電腦。畢業之後覺得好瀨嘢喎，人工低工時長又溝唔到女，想轉型，就去讀金融（而家風水輪流轉，到啲金融撚扮Tech撚去Coding 去區塊鏈）。我見過啲成功例子，但其實我覺得，唔使用劍嘅，你讀個CFA咪得咯。真係事必要讀嘅，搵Part Time嘅嚟讀。辭咗份工去讀書，真係點計都唔啱數，邊個同我講我都話唔好。冇咗嘅人工，加埋學費，加埋要搵過工，未見官先打八十大板。你計下幾多年先回到本？知識？你咪撚玩啦。你睇我啲文肯定獲益多過你讀啲濕鳩Taught Master。仲唔使錢添。仲可以在公司睇添。

有冇例外？有，如果你去外國讀，就另一種玩法。當然外國讀by default就係full time，香港啲遙距乜乜，又係浪費時間浪費金錢。外國讀有乜好？兩個。首先，老細或HR都係膚淺嘅，外國緯度高啲，月亮真係圓啲的。蕉行嘅老闆標哥請我，就係因為我在Warwick讀。你即管話佢膚淺，但佢就係決定請人嗰個。後來我發現佢根本唔請任何Local大學嘅人，佢之後請個大陸仔都係澳大利亞讀大學的。第二，舊文寫過，Warwick嘅一年，係我生命中好重要嘅一年（http://bit.ly/2SG2SWh）。唔係佢地教得有幾好（實則我好少上堂，捽住腳趾都叻過啲鬼仔啦），而係在外國，一條友，冇王管，種種嘅文化衝擊。睇好多無聊嘅書，諗好多無聊嘅嘢，去好多無聊嘅地方，好多痴線嘅想法同核心價值，就係嗰時形成的。你話係咪幫到工作？唔知，你可以話我好彩，遇到標哥。但無論如何，你當係消費，都已經抵。幫到你加人工或仕途就額外嘅。

在香港讀呢？你可以計數。你諗下你個Master可以令你加到幾多人工（if any），然後睇下幾耐先會回到本。唔計錢的話呢？上面嗰段講嘅國體驗，你全部都冇。得罪講句，你話你在港大（我母校，唔怕講）讀MSc，啲女／仔都覺得你係有啲問題的。
________________________________________
仲有一種，其實應該分開嚟講，係MBA。又係嗰句，我冇讀過唔應該評點咁多。但正如 置地記者所講，人人都知讀MBA唔係為讀書，係為識人。所以你見大陸啲MBA好多靚女去讀—無非係釣金龜，塞張房卡畀佢，今晚玩救你（http://bit.ly/2SJml8m　EMBA的房卡故事）。因為好多大陸白手興家，書又冇乜讀過嘅大老闆，都會走去讀。

不過，潑冷水都要講句，香港啲MBA，就你懂的。另一朋友話頭，個盲點就係，人人都諗住入去識人，結果就好多九唔搭八嘅人去讀。MBA同社交網絡一樣，有好強嘅Network Effect ：原本已經多勁人嘅，咪更多勁人去讀咯。原本就騎呢嘅，就只會係一堆騎呢人。把關收生嘅當然係會講佢地點嚴格點乜，但真相大家都知。

因緣際會，有位工作上嘅前輩，家住成億嘅單位（我等牛屎仔眼中好貴架啦），耶魯School of Management畢業。因為佢，我有次在北京都參加佢地 嘅活動。係真係唔同的。甚至佢地自己有個場，定期畀啲校友交流下，叫啲客席嘉賓（例如本人）去講下。

________________________________________
都係講返錢。無論MBA又好，Taught Master又好，都面對一個好大嘅問題：回報率越嚟越低。

我反對人讀Master ，但絶對贊成人讀Degree，都係因為回報。有學位嘅工，都仲係高過冇學位嘅工（雖然差距收窄左，好多以前中學生做得嘅工都係大學生做）。香港讀大學有一個好重要嘅誘因：學費平。香港大學本科嘅學費，N咁多年冇加過—你人工再話停滯不前都好，都有加到。麥當勞時薪都貴過當年啦，但大學學費冇加過喎！

相反，香港嘅Taught Master我唔知。但MBA肯定加咗好多價。而我在Warwick 讀嘅嗰個MSc呢？當年，18年前，係9000鎊。而家？係35000鎊，四倍咁滯。咁你估下，而家畢業生嘅人工，會唔會係我當年嗰啲嘅4倍？梗係冇啦。所以好簡單嘅例子就話你知，個回報肯定跌緊。

MBA嘅情況，以我所知都係一樣。MBA係大學最現實嘅課程，亦係其中一個最吸錢嘅課程。往往賣點就係，讀之前幾多幾多人工，讀之後幾多幾多。呢啲統計全部都有水份，但，作數亦不能作得太離譜，即使你睇官方數字，呢啲increment，都冇乜增長 —但學費貴咗好多。原因亦好簡單，因為一街都MBA，而掉轉頭，邊有咁多中層？去中層化亦係近年企業嘅一大趨勢。
________________________________________
結論：唔係為錢嘅，唔好讀。要讀嘅，就去外國。真係在香港讀嘅，讀Part Time。MBA？一樣。