#今日我係火雞姐
#逐位火雞客打電話去傾
#好多謝意見 #聽到你哋話火雞好食好開心
#我要俾多啲清楚說明點樣翻熱

這星期開始出貨：火雞、盤菜、鴨肝。

見住啲食品一箱一箱咁出去，我會送佢哋出門口，同佢哋講byebye，
好希望收到嘅人開心，笑住咁食，一時間忘卻煩憂。

因為我同時見到Chef和同事花幾多心機做好食物，
客服同事逐個客覆逐個客約，
司機哥哥小心翼翼送貨，
貨倉同事跟車送上樓 （盆菜連埋個煲都真係好重），
而我同同事講：
聖誕系列反應好好，呢個聖誕假日要編更開工，
如果佢哋唔返我就請part time，但佢哋個個都話返工。

我哋喺後面好努力，希望你哋覺得好食，
我接受唔到有客話收到貨感到失望。
今天我打了好多電話俾客，親自同佢哋傾，問意見。
有意見嘅，我哋就商量，點樣做到最好。

有幾點我要講吓，關於Pot au Feu 、紅蝦盤菜和火雞：

各位訂咗French Pot 同火雞朋友注意，俾啲心機睇吓字

有客反映，覺得份量不是想像中的盤菜。
我好有誠意同大家講：
我們絕不是做傳統盤菜，
盤的確不大，但肯定足夠每個人份量，
而且每一個item都是Chef 的任性精選，
佢哋真係當喺米芝蓮餐廳咁，任性訂食材！

如果吃pot au feu，
牛骨膸、牛尾，牛膝再加上其他很rare的配菜如parsnip, celery root，
肯定是夠飽的，Chef Francky也做了特多份量的湯，
我們希望大家吃到一滴不留。

紅蝦「盤菜」，是French Pot的直譯。
最初有客人指紅蝦太大隻，煲面都不夠放，
我們就由一人1x180g紅蝦改為每位2x120g中蝦，
但有客反映覺得吃2x中蝦太飽，
而且影相不及1x大蝦咁impressive ，
我今日和Chef商量，決定明天出的盤菜，
全部改回一隻最大size紅蝦，
180g，即係你預隻蝦拉直時，長過手掌，
係1/3隻春雞咁重，相機食先一定正 😝😝

精選的Dansk 煲和Sori Yanagi柳宗里是18和22cm 直徑，
不會像盤菜的盤，而是很精緻實用的煲，
可以入雪櫃，焗爐，用明火及電磁爐。
其中柳宗里大煲，市價 $1950 。

要講埋隻釀火雞，有客問點解收到覺得塊皮好深色。
這是因為Chef Olivier 藝高人膽大的stuff火雞方法，
佢除咗挖空stuff中間，仲會喺皮同肉之間stuff多一層。
所以見到皮下的黑色，
那些是porcini, cepes, black truffle 和粟子餡料。

不過，我接受其中一位客人觀點
（佢係第一個落訂客人，好多謝佢）：
影相唔靚係原罪，
咁不如唔好stuff 皮同肉中間嗰層，
等隻雞出來金黃色。

我又去同Chef 傾，佢比香港人更加了解香港人，
佢即刻話可以，明天出貨的50隻火雞，
不stuff皮和肉中間嗰層，
但提醒大家翻熱時不能焗太久，
因為嗰一層原本有令隻火雞肉無咁易嚡的功能。

我今晚收工後，會做一個簡單易明的翻熱說明，
印出來隨盒送上。
開心的是，今日我傾的客人，
有幾位已經話會再訂，
仲話會訂慢煮版，自己喺焗爐度roast,
確保最金黃最脆。

我仲會推出無餡料版黃雞同春雞，
希望今晚上到架。
我收工喇，好凍呀今晚，大家保重身體。