【 #那些年的港式情侶 - Neway清盤 真正唔捨得嘅係以前啲回憶】 「各位Neway既k迷係咪玩得好開心呢？」（有聲） 尋日一早見到Neway申請清盤嘅消息，相信好多人（包括小編）都唔算好意外，畢竟疫情打擊真係大。不過內心都難免有少少不捨，與其話唔捨得Neway，不如話唔捨得以前唱K啲難忘回憶。 . 仲記得當年小編仲讀緊中學，一班人每逢考完試早放都一定狗衝去唱K，校服都唔換了，唱K要緊！嗰時K-lunch仲係$39蚊唱兩粒鐘，求其打電話去前台叫兩杯甜到生腎者之石嘅「波斯貓」就開波。然後你哋開始點歌，開始有人抱怨自己首歌輪極都未到，開始有咪霸掉低句「喂我飲歌」就搶埋你點嗰隻歌，開始有啲hihi點完又要開伴唱，又或者怕醜唔唱，問「邊個㗎隻歌」，全場竟然靜到聽到支咪啲回音...... . 唱多幾隻歌之後，啲騎呢友開始慢慢上水，先有A君唱周董死都要唱埋段rap但完全唔夠快，又有B君用哭腔唱歌乸埋晒口面，再有C君逢人唱歌必和音，你唱一句，佢就用氣音重複返你呢句最後嗰幾粒音，忍咗好耐先無執佢一身...... . 一輪熱身之後，你膽粗粗同你暗戀對象合唱万刀甲同Stephy嘅情歌，「太慣看你左邊笑臉~」、「差點想碰你的肩～～」。雖然你哋啲音完全和唔到，甚至見到其他人由歡呼聲變到開始面露難色，但你望住佢笑，唔小心同佢視線碰撞，成間K房，啊唔係，係成個世界，就好似得返你同佢。 . 最後終於嚟到唱K嘅尾聲，大家開始機關算盡，唱完一次副歌就cut，臨尾仲要插首13分鐘、古巨基嘅《勁歌金曲》先滿意，以求榨盡每分每秒。唱到就快斷氣終於唱完，個mon即刻傳嚟熟悉嘅畫面，成班歌手爭住問候你：「各位Neway既k迷係咪玩得好開心呢？」，你仲好小學雞咁串返佢「唔開心啊！」不過其實問心，你係好開心嘅，甚至內心暗自發誓，返去一定要練多啲歌，下次無人可以再笑我走音！ . 「一開心唱飲歌～不開心唱飲歌～」以前嘅開心好簡單，可以係笑個fd走音，可以係一齊喺K房賣醉，唱到天昏地暗。見到Neway清盤嘅消息之所以難過，唔係因為唔捨得Neway（有啲歌都唔齊嘅，呸），而係我同你都驚，呢個屬於青春嘅回憶會成為絕唱。 . 「喂，今晚旺角瓊華通K，Come？」 . #最嬲係唱唱下有人cut咗你隻歌 #啊唔小心撳錯 #又或者點歌點錯首演唱會版 #勁多廢話要講 #情侶 #愛 #愛情 #語錄 #拍拖 #香港 #搞笑 #回憶 #80後 #90後 #集體回憶 #唱K #neway #再見了我的青春 #我的初戀 #我仲想入去唱mirror的 . 即like 港式情侶 HKstyleCouple 緊貼更多港式愛情生活資訊❤️！ IG : https://instagram.com/hkstylecouple 歡迎Dm投稿戀愛趣事，我哋等緊你㗎😙！

#gfmurmur9257 第一次投稿，寫得1999請見諒🙇🏻‍♀️ 我今年廿八，佢細我兩年，我地一齊咗半年，佢係台灣人，我哋係打機認識。當初未一齊未見面嗰陣，都係靠line傾偈，我地好好傾，由起身傾到瞓覺，互相都對大家有好感。過咗兩個月左右，我去咗台南搵我朋友，佢過咗嚟搵我，帶我周圍去，我走嗰日佢送我機，仲俾咗個goodbye kiss俾我，無耐我地就一齊咗，開始我地嘅long D關係，亦係我嘅惡夢開始...... 我係一個空姐，所以會經常周圍飛，到其他國家會同其他同事出去行街食飯，佢會唔鍾意會發我脾氣，求咗佢好耐先俾我出去，仲要時時刻刻同佢video call，搞到d同事覺得我好奇怪，同埋電話費真係好貴！！講真，做呢行大部分原因都係鍾意去旅行，見識多d，我有同佢傾過，佢好多時都發我脾氣，佢話驚我俾人搶走咗，就算全女班佢都唔鍾意唔俾我出去，一定要我陪住佢。咁好啦，唯有我讓步唔出去陪佢喺酒店video call。有次我去咗洛杉磯，同台灣有十幾個鐘時差，佢朝早我夜晚，我瞓覺前都有同佢講，佢突然喺我嗰邊凌晨嗰陣打俾我，由於我飛完長途機好攰所以昏睡咗聽唔到電話響，佢打第十幾次嗰陣我終於聽到，一聽佢就十幾廿萬個粗口問候我話我失咗蹤，最憎人唔聽電話，其實我凌晨瞓緊覺有咩問題有咩錯？當時我委屈到大喊佢先至話原諒我。 我知佢欠缺安全感，因為佢ex又係香港女仔，俾帽佢戴，佢成日鬧交嗰陣都話佢身邊d朋友都勸佢唔好咁認真，香港好多女仔都係玩玩下，又話佢親戚介紹佢俾其他女仔識，佢唔驚我唔要佢，但係我自問從來無做對佢唔住嘅事，時時刻刻都報到，佢講d咁嘅嘢同埋咁嘅相處方式，我覺得透唔到氣，我同佢傾，佢只係覺得我因為唔夠愛佢。 佢除咗管我去邊之外，我用錢佢都要管埋，自問都算節儉，又無追求名牌嗰d，有次我帶媽咪婆婆去買嘢，用咗幾千蚊，佢話我大洗，結婚之後點俾d錢我管，其實我用緊自己錢又唔係用佢錢，講大洗？佢要求我每次放假都要飛去搵佢，酒店機票買嘢全部自費，我去一次都幾千蚊啦，佢又唔計？佢嚟過兩次搵我，我知台灣人工低，所以都係我俾晒，我都無所謂但佢有咩資格話我買嘢俾屋企人係大洗？ 佢上次嚟香港，佢舅父結婚，佢舅母邀請我地去佢婚前party，喺ceo Neway度搞，我喺Paris 買咗盒都幾貴嘅朱古力送俾佢地做禮物，坐咗一陣我地就走，佢話佢俾咗人情，呢餐佢舅父話請我地唔使俾錢，走到去門口嗰陣，佢舅母叫住我，問我拎返錢，話淨係講過請佢但無話請我，佢舅父就話請我地叫我地走，我即刻喺銀包拎咗兩千蚊出嚟掉喺枱，我地唔使你請！之後就走咗。我好嬲唔出聲走咗，但佢覺得係我有問題，問我做乜發脾氣，喺條街好大聲鬧我叫我全名，好大力扯我返嚟，仲嬲到想打我嘅樣。到最後我返酒店執晒我d嘢走嗰陣佢先冷靜返叫我唔好走。 呢場疫症搞到我地無得見佢又發咗好多次癲，我頂唔順提出咗分開下，佢即刻又用十幾廿萬個粗口鬧我，話唔驚自己無人要，冷靜之後話佢會改善下，佢好需要我，好愛我先會咁樣，但過咗一排又打回原形。我好想分手，但好驚佢做傻事或者對我做d咩事。我應該點做好？ ———𝐂𝐨𝐮𝐩𝐥𝐞.𝐦𝐮𝐫𝐦𝐮𝐫——— ♡投稿請按 @couple.murmur IG主頁鏈結! #hongkong #couple #lovestory #hkig

（三十）K房 有次响糖街唱K，我地加加埋埋都十一、二個人左右，一間大房。 以前都成日聽到人地話K房陰氣重，易撞嘢。 試過聽過一個話，唱唱下K，突然喇叭傳出一把細佬聲係到笑，d人一唱歌，把聲又好似跟住佢地咁哼d音出黎。一無唱，又無左果把聲，而成間房，都無個係細佬仔。 又聽過話埋單數人頭，多左一個。個侍應原來一路見到房裡面有多一個人，成晚坐係角落頭位，到最後先發現… 「呃…我地得十三個人咋喎…」 等等等等。 事關K房長年累月都不見天日，一d陽光都射唔到入黎，而且通常污煙瘴氣，濕氣又重。聚陰，也是常識吧。 之但係，聽還聽，一大班老友去唱K狂歡，又真係唔會無情情失驚無神諗起呢味嘢。 果次，十一點零到，我地一班友唱唱下，有個侍應入黎，好記得佢係著住制服嘅，中年男人，三十歲頭到，塊面好瘦，好蒼白，目無表情咁，入左黎，企左係門口到。 又無出聲，又唔係入黎執嘢咁。 我同friend都係你眼望我眼咁，「乜你有叫人入黎咩？」 又唔係喎，無人call過出去。 正想開口同佢講，我地唔駛嗌嘢喎之際，果個waiter 走左入去門口側邊個廁所裡面，關左門。 「乜料呀！」有兩個男仔friend 率先行過去睇。 咯咯咯咯…敲門…無人應。再鈕下對門…門，鎖住左。 有個仲大力踢左幾下對門，表左兩句，都係無人應機。 無可奈何之下，我地跟手打出去服務台。 「屌你咩，你地有個同事衝左入黎我地房廁所到呀，而家仲Lock住左對門，乜料呀你地？」 未幾，一位經理仔入黎了解情況，佢敲敲門，講左句大約：「好喇，唔好阻住客人喇。」之後，鈕一鈕門鎖，竟然一開就開到。 佢慢慢咁推開條門，我諗當時廁所門前我地總共有四、五個人哄前去睇，我地幾個竟然，同時間，一齊，見住廁所門推開之後，入面，一個人都無！ 「呃…唔係嘛…頭先明明就有個好瘦，塊面好白，著曬你地制服嘅男人入左去，我地幾對眼都睇到…」 經理仔都無同我地辯論咁多，嗱嗱聲就已經話轉個間再大d嘅房俾我地。 從佢個反應，我諗，呢d事件，應該唔止一次發生過。 果一次係好罕有咁，一大班人，好清楚咁集體目睹一d不可思議離奇事件發生。 近日撞到一位朋友，佢宜家係糖街K房到做，聽佢講返，原來佢地成日都會半夜凌晨時份見到有個好生面口，但係著住自己公司制服嘅「同事」响走廊經過，「蓬」一聲拎轉頭就唔見左。佢仲話，有次自己一個人執執下檯，一抬高頭，突然見到果個「同事」企左响電視隔離d角落頭位到望住佢，佢即刻耷低頭扮見唔到，再望已經唔係到。 而當然，門一直都無人進出過。 所以佢話，夜晚自己一個人執房，一定要開曬d燈，同打開門一陣先好行入去做野，佢話呢d大家做開都有共識架喇。 佢特別提醒我… 唱K果陣，專心留意d字好喇。 因為你四圍望，你好可能係電視機個倒映裡面，望到自己坐梗果張梳化到… 有一d，你唔希望見到嘅嘢响你隔離。 Tag k 迷迷，k房同事，成日唱夜k，唱k唔專心四圍望嘅 frd入。 #離奇 #鬼故 #鬼 #靈異 #不可思議 #高登 #靈異事件勿語 #離奇家遮 #恐怖 #文字 #isee #ghost #horror #scary #852 #hkig #hongkong #read #book #neway #style #hihi#hongkonger #singk