Medium ：一個唔完美，可接受嘅貼文平台

(賴叔喺 Medium 嘅專頁：
https://medium.com/賴叔睇育)

//

星期五，好攰。唔想講啲咩政經嘢或正經嘢。咁，講下第啲。

唔知大家有冇發現，呢一兩年以來，有一批本地作者出文嘅時候，係貼 Medium Link ，然後邀請大家「畀 claps 」 (拍手) 嘅。

當然，為咗顧及未用或者唔會用 Medium 嘅讀者，賴叔啲政治文都係原文筆錄喺 Facebook 專頁，方便廣傳，以及射落海。

冇錯，喺 Facebook 出文，傳播快而且範圍廣泛，唔好處得一個：冇收入，純粹無償勞動。 (按：喺某啲網媒供稿都係免費嘅，或者賺到少少曝光率同光環囉)

咁近年啲傳媒，除咗廣告收入，都開始行訂閱制，《蘋果日報》最近推行，雖然已經好遲好遲，但至少都叫改變過往「文字內容是免費的」嘅觀念。記者、編輯、攝影師都要開飯嘅，好冇？

好在賴叔唔係靠寫文章開飯 (如果唔係餓死咗好耐) ，所以為興趣而 run 個 page 幾年，有 like 有 share 已經相當滿足。咁當然，錢嘅嘢冇人嫌多，如果 #文字有價 ，咁賺返少少零用錢當然唔拘。

所以呢，而家我啲文都擺晒喺 Medium 度。

- - -

Medium 係一個咩地方呢？你當係 Netflix 或 Spotify 嘅文字版啦，大約 40 港紙一個月，就可以做會員，任睇所以中西文章。

咁如果你未做會員，每個月就可以免費睇三篇文章。情況同 Bloomberg 類似，但當然人哋係專業財經新聞，性質唔同。

讀者交咗月費，同作者收入並冇直接關係。 由 2019 年10 月最後一星期開始， Medium 會主力按讀者閱讀時間，將月費按比例分發畀唔同嘅作者。以前大家見到嘅「畀 claps 」影響力會大減。

或者大家聽過其他貼文平台，例如 Patreon 。交月費畀 Medium ，同交訂閱費畀喺 Patreon 開檔嘅作者，分別在 Medium 係 one-to-many ，而 Patreon 係 one-to-one 。

對作者嚟講，收到讀者恆常指定嘅收入，當然最好，但賴叔自問冇咁嘅叫座力，亦唔好意思請讀者定期課金助養。 Medium 呢個文章大笪地，畀讀者喺字海中自由選擇，比較自由。

- - -

Medium 有網頁版、手機版同 App 版，初用嘅朋友可以透過搜索功能，搵自己感興趣嘅文章。

懶惰啲嘅，直接用以下呢條link 就會見到所有 hashtag 有「中文」二字嘅文章。

https://medium.com/search?q=中文

再唔係， click 呢篇文嘅 link 或者參考置地記者 profile 入面 following 同 followers 名單，睇下有邊位作者啱你心水。

https://link.medium.com/0XNzFko730

有咩唔明唔清楚嘅，留言問我，盡量解答。