【龔成問答信箱】（Q20561-20580）

Q20561：

你好 老師，我係25歲對於炒股票，係零知識既人，出嚟社會都兩三年，最近，被親戚叫投資，我有疑惑緊當中的風險

所以有兩條問題想問

1.我可以看你那一本書來作為增長知識？

2.假設有10,000給你，在兩至五年內，可賺十萬，可以買那一個股票？謝謝

龔成老師：

1）你可睇：
《80後百萬富翁》
《股票勝經》
《財務自由行》

2）這是一個10倍回報的投資，是一個極高回報！即是說，你要承受高風險先有機會爭取到這回報，我當然唔太建議。

你可以投資一些有增長力的股票，潛力股類，但要有10倍回報，坦白講並不易的。如果你投資知識不高，可考慮ETF。

安碩恒生科技ETF（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

------------------------------------------------

Q20562：

老師，您好。我一直都有留意您各種各樣的文章。我從來都無問您意見或問題，因為我怕會麻煩到您同令您覺得係呢啲“免費午餐“。

不過我之前見到您關於您十年前持有比亞迪嘅股數，我真係好想(作為閒談)問個時呢隻股佔您所有股票嘅百分之幾？因為我知道投資係要分散，不能太集中。(我只係投資新手)

因為我見個時嘅比亞迪都已經有差不多一百萬，咁您係點樣去決定呢隻股票嘅比重？因為我(可能係普通人)真係唔會敢放哂所有投資嘅錢落單一股票。

龔成老師：

當時（10年前）這股已經佔我一半持股以上，近年除了有增持比亞迪（1211）外，我同時有增持其他股（我大部分用只入不出的策略），所以現時比亞迪的比例%，比當年少，但股數比當年多。

對於98%以上的投資者，適當的分散風險，能有效減少非系統性風險，所以，一般投資者，同一隻股，不能多過15%。

但如果有一定投資實力，已經有相當的投資經驗，當十分睇好某一隻股時，就可以進行「集中投資」，當然，這一定會令風險提高。

------------------------------------------------

Q20563：

龔SIR你好,我係澳門讀者,我睇緊你本年報勝經,你講盈利應該睇股東應佔權益

但我實戰睇9988報表時又唔見有呢項,想問盈利我應該睇税后净收益定淨收入邊一項才對,謝謝

龔成老師：

其實，盈利是股東應佔溢利，只是一個好初步的講法，，嚴格來說並不完全是的。如果你睇《年報勝經》，當中會更具體講。

你可以在損益表，找「股東應佔溢利」。如果你睇阿里（9988）的年報，你可以找到「合併利潤表」，有一項目是「歸屬於普通股股東的淨利潤」，就是盈利的意思。

------------------------------------------------

Q20564：

Sir 1929同1177邊個潛力股d? 1177現時算貴嗎？

龔成老師：

中生製藥（1177）潛力度會較高，人口老化令佢長遠有唔錯的增長，無論是政府投入的行業資源，又或是人民生活質素令可控制資金上升，都令人們更在醫療方面投入更多。

佢已建立一套完整的商業系統，有多個已賺錢的藥品類別，同時毛利高，可以不斷將錢投資在新藥裡，這模式運作很好。

但這類藥物企業，難免有一點風險，因此要久不久檢視，中短問題不用理會，但如果有一些核心性的問題，就要再全面分析。

就這刻來說，這股可以一直持有，因為商業模式理想，高回報，不斷再投資令股東利益快速增長。加上睇翻佢的業績，保持增長，這令企業價值有實際的上升，令股價得以支持。

現價合理區頂至略貴，有貨可持有，分注或月供可以，這股可以長線持有的。

------------------------------------------------

Q20565：

你好 我係一位全職媽媽 幾年前105買入4手941 做左蟹民好多年 一直唔敢再入市 現有約20萬儲蓄 但眼見储蓄越來越少 好想從股票市場賺少少零用錢 請問有咩意見可以比我？

見你介紹平安好醫生 現價入得過嗎？還是再等低啲呢？多謝你議見先

龔成老師：

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

如果你太集中在一隻股，就賣出部分。

中移動（0941）不是無質素的，5G雖然對佢有正面影響，不過，中國政府希望相關費用不會太貴，令資訊流通更好便利，所以，對佢的賺錢能力方面，未必能帶來突破性的增長。

可視佢為收息股，增長力不算強，這股有長線投資價值。現價合理。但你應該將部分，轉到其他股，建立更平衡的組合。

平安好醫生（1833）長遠有發展力。

佢係中國領先的一站式醫療健康系統平台，透過「移動醫療+AI」，為每個家庭提供一位家庭醫生，為每個人提供一份電子健康檔案、一個健康管理計畫。

平安好醫生係中國互聯網醫療健康市場的先行者，以平均月活躍客戶，以及在線諮詢量計，是中國最大規模的互聯網醫療健康平台。

企業的業務有潛力，本身有優勢，大環境的配合，都成了這企業的機遇，前景正面，不過財務數據未算好理想。

雖然長遠的企業價值向上，但股價在中短期，可以十分波動，因為市場以「前景」作估值，故此變化必然很大。好難得出平貴的準確數，只能估估下，作參考。

因此，低風險者未必適合投資，若投資者考慮這股，亦不能大注投資，買入後就耐心長線持有，等待這企業改變整個行業的情況，現價算略貴，月供就得，如直接買入只能小小注。

由於你的投資知識經驗不多，建議你較多在平穩增長股類，如盈富（2800）、港鐵（0066）等這類，至於潛力股，如平安好醫生，就只佔組合比例相對較少。

------------------------------------------------

Q20566：

龔成老師你好，首先感謝你抽空回答我哋回覆，看了你的fb 二個月，宜家睇緊股票勝經，同已買了二本未睇，學倒好多，所以開始自己買股票！

現有50萬現金 ，已投資了70000以下股票

25000加幣
25000澳幣
30萬 manulife 收月息債
36萬 aia 投資保險5年後可以不扣除本金，每年派5%利息
70萬mpf

本人40歲，想嚮50前可以達到財務自由，被動收入25000-30000

現持有股票

00152 500股@12.74
00178 2000股@1.86
00636 [email protected]
00778 [email protected]
00823 200@ 69.75
01177 1000@ 7.76
02800 500@ 30.88
3067 200@ 22.3

以上股票都係睇左你fb加書去以小注入市
謝謝老師！

龔成老師：

如果你40歲，目標想50歲財務自由，這刻要投資有增長力的類別。你現時的保險公司產品，不是不可投資，但你在財富比例上太集中這類，而這類的增長力不強，所以在之後的財富配置上，宜投資有基本增長力的股票。

當我地進行人生財富累積，會運用「先增值，後現金流」作方法。

至於你現時持有的股票，基本上可以的，都是有質素，可長線投資的類別。

你之後的資金，可以投資平穩增長股為主，你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

小部分加入潛力股，如3067。

到你近50歲時，就要慢慢改變策略，開始投資收息股類別。

現時大市處波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q20567：

龔老師你好，最近股市波動大，近來比較多人討論 你點睇3800同6060？

謝謝你

龔成老師：

保利協鑫能源（3800）質素未算好強。

佢主要為光伏行業製造多晶硅及硅片；銷售電力；開發、投資、管理及營運光伏項目。

市場炒緊佢前景，但當中存有不確定性，股價大上大落，佢的確可能會大升，但同樣可以大跌，無得估，這炒作不少，現時值博率不算高。如果真的想投資，小小注好了。

眾安（6060），業務都有發展力的，但業務仍有不確定性。佢最近開始由虧轉盈，反映之前的投資開始有收成，暫時睇是正面的，但之後的發展仍有未知，這一定會令股價波動。

佢做這類互聯網保險公司，的確有潛力，同時背後有支持，所以有發展，這部分產生了「概念價值」。

現時市值有部分是概念價值，而這個價值值多少錢，其實無人知，市場對這價值的看法不一，同時經常改變，所以令股價大上大落。

初步睇，企業有發展力的，不過風險同時存在，因此唔建議太大注投資，這股都可考慮長線持有的。現價勉強合理區頂。

以值博率來計，眾安會較好。

------------------------------------------------

Q20568：

你好，龔成老師～我大升市時自己心理質素麻麻...買股無成效仲會蝕...之後轉買基金又撞正大跌市（基金是大中華非科網的偏零售的基金）都輸10%⋯

我開始對投資恐懼了，所以特別來問問方向。

——背景——

我地有一層樓市值700萬，
樓按還有420萬，
手上現金140萬
基金40萬
股票現值約10萬

月供
2800@3000
3款基金共月供8000

有一小朋友，未來想再生多個，
家庭月入約6萬，目標係唔使賣樓下，係10年後有一舊錢俾佢地去外國讀書.

麻煩哂老師提議下資產點分配好，謝謝啊！

龔成老師：

如果你過往的投資成績較一般，就唔好自行睇市去進行買賣，最好的方法，就是長期月供，累積一定的貨。

因為這可減少主觀的分析，往往效果更好。

你現時選月供盈富（2800）是可以的，只要你保持進行就得，不用理會中短期價格。

如果你目標是10年後有一筆資金，就應該利用這時間去進行增值。
你現時的$140萬，如果你認為自己投資知識與經驗不多，就不要以一手手模式投資。應該以月供模式進行，每月供$15000-$20000，如果將資金，慢慢轉為股票。

你可以將每月的資金，不斷做月供股票。平穩增長股，如盈富佔7成，潛力股佔3成。

潛力股可考慮：安碩恆生科技ETF（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）。

當然，建議你同時強化投資知識，令你可把握到大市的升跌投資時機。

------------------------------------------------

Q20569：

老師你好, 想幫父母問一下平穩少少的投資方面

我父母還有2年左右就準備退休, 剛剛拎了300萬作首期買了樓, 之後作收租用途, 預每月有1萬收入, 另外內地有物業收租, 每月5000 RMB;

而股票方面, 早期因誤信微信女, 買了新維國際10萬蚊, 目前得番千幾, 想問一下趁早斬了, 還是繼續手持?
目前想用10萬作投資, 選了3只想作為收息的, 想問一下意見

1. 01373
2. 02638
3. 00435

唔該哂

龔成老師：

新維國際控股（8086），企業年年虧損，點解要持有一盤不斷蝕錢的生意，當然是賣出。

至於上述的3隻收息股，可以投資，佢地要記住，買股票不是炒賣，是買入後長線投資，持續收息。現價合理，可投資。

其實佢地現時的投活組合，太過著重物業，其實將部分資金投資股票會更好，但相信佢地未必有足夠的股票知識。因此，暫時投資$10萬上述收息股先。

------------------------------------------------

Q20570：

老師，請問小米幾多錢先可以入手？

龔成老師：

小米（1810）有潛力的，佢的產品性價比高，相信在全球好多個國家都會有市場，佢長遠只會進一步增長。

同時，佢建立的平台是佢長遠的增長動力，先賣手機，再利用手機的平台延伸銷售小米家電。長遠正面的。

這股可長線，不過現價唔平，去翻$22以下合理，最好都$24先投資會較穩健。

如果現價想入，小注好了，或者較建議做月供。

------------------------------------------------

Q20571：

Hi老師，最近睇左你講既1833 , 可以長線投資
所以我都開始月供佢，$130 平均價，要落到咩位先再加好？

另外 想問3800 你認為可以長線投資嗎？

龔成老師：

平安好醫生（1833）長遠有發展力。

佢係中國領先的一站式醫療健康系統平台，透過「移動醫療+AI」，為每個家庭提供一位家庭醫生，為每個人提供一份電子健康檔案、一個健康管理計畫。

平安好醫生係中國互聯網醫療健康市場的先行者，以平均月活躍客戶，以及在線諮詢量計，是中國最大規模的互聯網醫療健康平台。

企業的業務有潛力，本身有優勢，大環境的配合，都成了這企業的機遇，前景正面，不過財務數據未算好理想。

雖然長遠的企業價值向上，但股價在中短期，可以十分波動，因為市場以「前景」作估值，故此變化必然很大。好難得出平貴的準確數，只能估估下，作參考。

因此，低風險者未必適合投資，若投資者考慮這股，亦不能大注投資，買入後就耐心長線持有，等待這企業改變整個行業的情況，現價算略貴，唔建議你心急加注，除非去翻$100。

至於保利協鑫能源（3800）有增長力，但業務不穩，質素中等。

佢主要為光伏行業製造多晶硅及硅片；銷售電力；開發、投資、管理及營運光伏項目。

市場炒緊佢前景，但當中存有不確定性，股價大上大落，佢的確可能會大升，但同樣可以大跌，無得估，這炒作不少，現時值博率未算好高。

如果真的想投資，小注好了。

------------------------------------------------

Q20572：

老師，你好。我是澳門人，每年都會有約一萬的現金分享，我想將每年一萬都投放在股票，18年後可用作女女讀大學之用，請問邊些股票會比較適合我？

我女兒現時只有1歲，本金只有一萬，謝謝你

龔成老師：

最簡單是投資ETF，因為這已經是一個組合，有風險分散的能力。盈富（2800）+安碩恒生科技（3067），是最適當的選擇，至於兩者的比例，就要睇你的風險承受能力，如果能承受風險，3067會去到6成，如果不能，就3成以下。

如果每手入場費較高，你就儲幾年錢先，等有足夠現金先買入。

------------------------------------------------

Q20573：

想請問一下 可以問你外幣嗎？本人搬過來溫哥華 一直失業 很難找到工作 身家就30萬港幣左右 係呢邊生活 亦不懂投資 聽朋友講可以試下問你意見

所以冒昧想請教你 最近加幣一直升 但我D港幣仲未換成加幣 有冇機會跌番之前5個幾既水位 但之後一直會升呢？

龔成老師：

如果你有實質需要，就要將港幣轉成加幣。

如果你擔心這刻較高，就轉3分1先，餘下遲D先轉。我地好多時好難估到佢的升跌，你永遠等都不是方法，因此
，你有需要，就轉部分先。

------------------------------------------------

Q20574：

Hello成哥， 我係18.18果陣買咗6666...依家點算好？

龔成老師：

恒大物業（6666）係物業管理服務運營商，佢係中國物業服務百強企業中，以項目所覆蓋城市數目計，佢排名第二，如果以總收入、總毛利及總淨利潤計，排名第三。

類別為中高端住宅物業、寫字樓及商用物業，並已訂約管理其他物業類型如主題樂園、產業園、康養項目、特色小鎮及學校等。

佢絕大部分物業管理服務收入，來自集團控股股東恒大集（3333）所開發物業提供的服務。

其實都有質素，有長線投資價值。不過負債高，不建議持有太多，如果你持貨不過多，無問題，可守。

------------------------------------------------

Q20575：

龔sir你好，本人今年34歲，月入二萬七，流動現金大約三十萬，每月扣除必要開支可儲蓄約$10000，現時持有9988及1833。

另有中人壽盈豐寶（五年）已供完，請問應該如何部署月供股票（預計月供6000），希望在50歲時每月有3萬元被動收入有可能嗎？謝謝

龔成老師：

上述兩股都是有質素的，可持有。但你唔能夠只集中在兩股，要建立一個組合。

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

你34歲，如果要50歲有$3萬現金流，不是不可，但要把握這段時間，運用「先增值，後現金流」的模式進行。你可投資平穩增長股+潛力股，潛力股約3成（當你日後投資知識增加，這部分可加大）。

你可以每月月供$7000做月供股票，餘下留現金。

平穩增長類：盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

潛力股可考慮：安碩恆生科技ETF（3067）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

你要好好利用餘下現金，把握機會。到50歲，再進行財富配置，轉為收息股，提高現金流。

------------------------------------------------

Q20576：

龔老師你好，我今年31歲，最近才立下心學投資，很認同您的投資概念，重要係睇公司價值發展，值唔值得長線持有

我的工作是銷售，無太多投資經驗，之前買嘅都係一啲for 退休後才有較高回報的產品和保險，一年供款約9萬多，平均回報約3-4厘

日後並無生小朋友打算，除供款和日常支岀外，每月可儲約10000-12000元，預計經濟好轉後，可儲約15000/月，現持有現金約30萬可用作投資，目標3-5年內，可增長至100萬元。

該如何做起和組合投資分配？取向會投資ETF 為主，因較易掌控，而家仲未識分析公司性質，盈富是否好選擇？定可投資較進取的ETF?

另外問問，為什麼很少見您推薦投資外匯？
謝謝您的幫忙

龔成老師：

如果你選股能力不強，投資ETF是最好的選擇，因為有平衡風險的作用，同時不用自行選股。

你31歲，財富仍有增長力，可以投資平穩增長股+潛力股。

盈富（2800）就是平穩型，這可以作為核心。另外，你可以適當加入3067，都是不差的ETF，是潛力股ETF。你可以這兩基金的比例，7：3比。當然，如果你有選股能力，就可同時加入個股。

現時的$30萬，你可以動用其中$10萬-$15萬投資。同時，你可做月供股票，每月投資$1萬。

現時大市處波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

外幣始終是「貨幣」，長遠的購買力，始終會下跌，因此不宜投資太多，長遠應持有一些真資產，令財富有真正增值。

------------------------------------------------

Q20577：

老師，最近開始留意你的post, 呢呢2個月轉了做全職家庭主婦，跟人玩股票，都有小小盈利，但跌市，由盈變虧，不知道果點操作，令我方寸大亂。。

持有以下股票，應該點操作
826 天工 4. 92
6078 海吉 65. 4
9633 農夫山泉 63. 6
1117 2. 91
6993 藍月亮 16. 58

係咪冇得坐返上去，全高要止蝕亂場，輸入肉了 請老師指點，謝謝。。

龔成老師：

股市有升跌好正常，你面對正常的事而方寸大亂，反映你投資知識不足，宜加強投資知識。

記住，我地最重要不是睇「賺蝕」，不是睇「買入價」，而是睇質素。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

天工國際（0826）、海吉亞醫療（6078）、現代牧業（1117）業務較波動，唔建議你持有太多。至於另外兩隻，有質素，可長線。

但睇翻你的買入價，大部分都是同一時間，都貴的時候買。建議你之後投資，最好做月供，以及慢慢分注投資，同時建議你先投資一些ETF作組合核心，如盈富（2800），會較穩陣。

------------------------------------------------

Q20578：

老師 我想問一下 有樣野我唔係好明，如果我一直靠月供股票去增值財富，舉例如果依家盈富30幾蚊 6-7年後可能60蚊 咁我供左6-7年

之後財富喺股價上面已經係升左好多，但如何可以製造到現金流？到時將股票賣出？定還是一直放著？

龔成老師：

你是要賣出的。

不過，這個賣出不是短期，是長期。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可慢慢賣出股票。

開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

整個過程，是長期性的，而「先增值，後現金流」，是整個人生的。

------------------------------------------------

Q20579：

龔sir, 708 恆大汽車有質素嗎？可長揸嗎？$61 買左少少

而家941 價格可入嗎？

聽龔sir講入左823，不過我會長線揸
感謝龔sir 教路

龔成老師：

恒大汽車（0708）雖然可能有潛力，但風險高，佢資金投入的確強，大力發展新能源車，但這些仍未有賣產品真正的實力，長遠能帶動多少收入，未知。

由於仍有好多未知數，而股價已經大升左好多（比半年前），因此，這刻要自己衡量風險。

可能佢真的有潛力，但連基本的銷售銷售都未有，我地作為投資者，就好難分析，只可以話佢股價會大上大落。你小注好了，唔建議買得太多。

中移動（0941）不是無質素的，5G雖然對佢有正面影響，不過，中國政府希望相關費用不會太貴，令資訊流通更好便利，所以，對佢的賺錢能力方面，未必能帶來突破性的增長。

可視佢為收息股，增長力不算強，這股有長線投資價值。現價合理。你可投資。

領展（0823），你長線就得。

------------------------------------------------

Q20580：

老師，明源雲0909高位$60入左，應該止蝕嗎？中長線如OK, 不介意坐

我都係透過你意見，上年開始做月供，今日大跌市都唔驚

龔成老師：

明源雲（0909）有潛力。

佢主要係中國房地產開發商及房地產鏈參與者，提供企業級ERP解決方案及SaaS產品。

睇翻佢之前的資料，佢係中國房地產開發商的第一大軟件解決方案供應商，市佔率有約2成。係呢個市場裡面，按收入計，亦為ERP解決方案及SaaS產品的最大提供商。

其實，佢的角色可以話中國房地產行業的數字化轉型，為房地產開發商及其他參與者，開發了一套行業垂直的ERP解決方案及SaaS產品，以助其管理廣泛的業務運營。

包括銷售及營銷、採購、成本管理、項目管理、預算以及房地產資產管理，佢的SaaS產品包括雲客、雲鏈、雲採購及雲空間。

業務雖然有增長力，但股價都唔平，如果初步分析，處貴水平，值博率未算強，始終市場現時對這類股有好大期望。只可以話，如投資，小注可以，長線可以。

如果你持貨不過多，無問題，可守。太多就宜減少少，這股業務波動較波動。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。