浪漫月巴睇2000（107） 【ERROR很帥！】 好耐未試過睇電視睇到笑，說的是《ERROR自救TV》。 1.我鍾意睇ERROR。因為鍾意，所以開電視，睇他們這個新節目。 2.留意，「好耐未試過睇電視睇到笑」涉及兩個層面——A.「好耐未試過睇電視」：講堅，我屋企部電視，只是一件擺設，好耐冇開，我說的「好耐」，以年計。B.「睇到笑」：講堅Again，今時今日若果你能夠成日開電視而且睇到笑，你不是太樂天，就是太無知。 3.很多人都忘記了笑。當然，在日常中還是會笑，但不是恥笑（某些官和星的彈出彈入言論行為），就是（為現實的痛苦無奈）苦笑。恥笑苦笑，都不是純粹的笑，都不是因為快樂而產生的笑。 4.甚麼是因為快樂而產生的笑？例如好耐以前，入場睇港產笑片，大笑狂笑勁笑，笑呈現了快樂，忘我地快樂。但當日那班曾經令我由衷地快樂地笑的人，事隔多年後，都令我笑唔出——笑唔出都算，更極端的是，足以令我眼火爆。一班明明曾經令我快樂的人，事到如今卻只會喚起我滿腔怒火。可能佢哋變了，可能我變了，更大可能是大家都變了。 5.過去二十年香港有沒有出現過甚麼搞笑綜藝人才？你可能會答「福祿壽」，但Sorry，望住他們仨（尤其最唔高嗰個），我真的笑唔出——又或，我真正嫌棄的是大台那種沿用了幾十年的唧人笑方式。 6.直至ERROR出現，很多年都沒有因為睇綜藝節目而笑過的我，笑了，再一次笑了。 7.我們都知道，ERROR是一個衍生Project——《全民造星》一班靚仔參賽者，被合組成人多勢眾的MIRROR，MIRROR有甚麼特色？就是靚仔，而靚仔，是符合古往今來對偶像的主流要求。ERROR呢？毫不靚仔，不靚仔本身就是一個錯誤，偏偏這個錯誤，被放大，放大成一種風格。 8.靚仔當然也涉及後天工夫，但基本上，是一件相當先天的事，一個先天就沒有「靚仔DNA」的人，是絕對不會後天地變得靚仔，所以DeeGor絕對不會變成姜濤。搞笑呢，則是一件近乎完全後天的事，而且相對公平：先天靚仔的人有權搞笑，先天三尖八角的人亦有權搞笑，而且離奇地，由三尖八角的人負責搞笑，總是比較好笑——因為當你搞笑，往往需要動用自我、剝削自我，不介意兼不保留，將自我最根源的缺點，提煉成一件令人笑得出的事。一個先天靚仔的人，表面上沒有缺點；先天三尖八角的人，他的存在，根本就已經是缺點。 9.所以自嘲永遠是最Work的搞笑方式。像《404》和《我們很帥》，其實都是自嘲，而當中又以《我們很帥》攞埋F4那種陳年美學來笑更有玩味。又例如「保錡個人自救計劃」那一集，將保錡（一向被認為）獨具的MK氣質，錯置地，對照一個感覺正經嚴肅的政治人物，安排保錡執到四四正正去訪問曾俊華（偏偏曾俊華只是笠件牛仔外套）。表面上，就話要幫他脫去MK標籤，實則是在借用和強化MK標籤，讓他擺明錯誤地去做這個訪問（如果改由Fat Boy或DeeGor做，效果爭好遠）；而最重要的是，那經由錯配而產生的Error效果，係正喎。我Keep住笑，Keep住由衷地快樂地笑。實不相瞞，四位成員中我最鍾意睇保錡。 10.搞笑是後天的事，需要用腦，需要思考，需要鑽研，講到尾，是一件相當嚴肅的事。靚仔冇腦，依然係靚仔。ERROR未必靚仔，但很帥。 （原文刊於am730） #浪漫月巴睇2000 #error