「演唱會的背後」⋯ 做過好多大大小小嘅演唱會監製，每次都有唔同嘅感受，但似乎「The First MIRROR Live Concert」俾我感受係最深。 一開始，大家理所當然覺得阿花會係呢個演唱會嘅監製嘅時候，我堅決反對，因為我對MIRROR太了解，亦都太寵愛，仲要係佢地嘅經理人，好怕呢種關係會令到佢地係演唱會好難有突破嘅演出，於是我揾我信任嘅人去擔當呢個重要嘅角色，最後當然失敗。冇辦法，我又去番起點，用一晚時間催眠自己「我係監製，我係監製」 ，再用一晚時間同cm，十一同阿耀老師度一份我地認為最適合MIRROR演唱會嘅rundown。我好多謝佢地嘅專業意見同付出，冇左佢地呢個演唱會唔會成事。 係排練期間，MIRROR仍然有好多其他嘅工作，好怕佢地支持唔到，再加上我同左ERROR去左日本，又唔可以係佢地身邊指導同支持佢地，我心𥚃面非常不安。有一日，分別收到佢地嘅Whatsapp 話唔開心，我知道佢地快將爆煲，好想好想衝番香港睇下佢地。 番到香港，我即刻約左佢地開左一個緊急會議，了解下佢地唔開心嘅原因。主要因為演唱會快到，佢地覺得同隊員步伐不一致，怕影響進度。於是我叫佢地不如而家盡情講出不滿，嗌一場交。哈哈，佢地真係好聽話，真係嗌左幾個鐘頭交，有D工作人員打眼色，叫我阻止佢地，我冇咁樣做，因為我知道佢地12個其實非常愛錫對方，非常珍惜MIRROR，呢一場交反而令佢地更了解對方，令佢地更一條心⋯⋯12個馬騮嗰晩之後，第二日又攬頭攬頸，繼續為演唱會努力綵排，比之前更加落力。 19-20/12開始on site rehearsal ，第一眼見到屬於MIRROR嘅舞台，雖然冇豪華設計，冇利害嘅機關，但仍然非常非常感動，見到佢地好開心咁跑上舞台大叫「呢個台係我地㗎」我覺得好滿足。 21/12演唱會開場，已「前傳」作為序幕，感覺非常夢幻，幾個月前一班無名小卒，今日擁有自己嘅舞台同粉絲，佢哋唔算有咩完美嘅演出，但睇到佢地努力不斷，希望大家可以繼續支持佢地，希望有更多人認識佢地。 最後多謝曾為「The First MIRROR Live Concert」出過力嘅人，因為你地，成就左一個美好嘅演唱會。 PS: MIRROR，今日嘅幸運唔係必然，未來嘅路仍需努力去走，12個一條心，互相包容，延續全民造星嘅精神💪🏻