【網絡安全】2021年「暗網價格表」曝光 一個Gmail值80美金 網絡世界存在一個叫「暗網（Dark web）」嘅地方，內裡充滿著各種非法交易，成為黑客販賣帳戶資料絕佳渠道。最近資訊安全研究公司Privacy Affairs公開2021年「暗網價格表」，統計出多種帳戶資料售價，當中包括信用卡資料、社交媒體帳號、Email帳號，甚至連偽造文件服務都有，大家又估唔估到原來Gmail帳號值錢過信用卡？ 據Privacy Affairs指出，2020年發生重大資料外洩事件，Google、Microsoft、 Visa、Mastercard、NASA等大公司全部無一幸免。而呢啲被偷走嘅資料，就被黑客放喺暗網兜售拍賣，當中最為多人使用嘅Gmail售價最高。 （圖2） 從「價格表」可以見到，Facebook及Instagram帳號分別值$65美元（約$504港幣）同$45美元（約$349港幣），而社交媒體當中最貴嘅帳號就係Gmail，售價為$80美元（約$620港幣）。相信係因為Gmail帳號包含多種個人資料，同時又會綁定埋Youtube等平台，所以先賣到咁貴。值得一提嘅係，表上亦有列出買「likes」同「followers」嘅售價，只需$5美元就可以令IG相增加1000個likes。 （圖3） 至於信用卡資料售價方面，就複雜得多。除咗細分成VISA、Mastercard、AE卡之外，仲會因應張卡可以「碌」嘅餘額而有唔同價錢。例如張卡餘額為$1000美元（約$7760港幣），售價就係$150美元（約$1160港幣），愈高餘額嘅卡就賣愈貴，如此類推。而帶有Pin Code嘅信用卡，最平$25美元（約$194港幣）就有交易，仲平過Facebook帳號。 如上只係節錄咗價格表一小短段，詳情可以到Privacy Affairs網站（https://www.privacyaffairs.com/dark-web-price-index-2021/）了解更多。小編提醒大家，收到可疑Email或連絡請再三檢查先好打開，並且唔好安裝來歷不明嘅程式，時常更新帳戶密碼，以免成為資料外洩受害者。 #網絡安全 #資料外洩 #暗網