如果搵工真係搵到冇晒辦法，試下主動打去獵頭公司留低聯絡資料同埋CV吖。

好多人都問邊間agency最好？同時我亦收過好多msg，係投訴邊間agency好衰，呢兩個話題我直接撈埋一齊答。

獵頭公司冇間好？Consultant好現實又冇交帶？🔥

利申，已經冇做獵頭公司，冇任何生意係同獵頭有關，未來亦唔打算喺香港重操故業，故以下分析並不牽涉任何利益。

獵頭公司冇分邊間好或唔好，不快經驗通常嚟自一個衰嘅consultant，簡單嚟講，係個人操守問題，愈出名嘅獵頭公司就愈多仆街呢種觀念，其實只係大數定律，人愈多，遇到冇禮貌同埋冇交帶嘅consultant機會率就愈高，比例係均等，正如你公司嘅同事都有好有壞一樣，所以唔使咁快封死獵頭公司呢度門，畀機會佢哋，都畀機會自己。

咁乜嘢客同埋乜嘢position先會叫獵頭公司請人？好地地做咩自己唔登job ad？仲唔係有伏？🤔

我試列舉如下：

🐷豬頭骨
梗有㗎喇！不過又咁講，香港好多公司同埋工作本身已經係豬頭骨，同你自己搵嘅機會率都係一樣。

🙊間公司準備炒人
唔想出job ad畀自己員工見到，所以搵獵頭公司過濾晒先。

💰獵頭公司欠個客replacement
可能個客之前搵咗獵頭公司請人，而嗰個人又喺guarantee period內走咗，導致獵頭公司要「還」返個人出嚟。

🤫想撬competitor啲人
有啲嘢唔方便自己出手，我遇過有客人自己上LinkedIn搵行家啲員工個profile，然後丟過嚟叫我用獵頭公司身份撬佢，佣都係照計，呢張單真心好做，佢連人都幫我搵埋。

🤷🏻‍♂️公司冇HR
曾經有個澳洲人嚟香港開公司，得佢一個，想請兩個香港sales，佢自己唔知點搵人，又冇時間見人，所以乾脆畀錢獵頭公司。另外，以往經常有外國公司進駐香港，一開始未有員工，會直接搵獵頭公司成個department咁請人。

🥺HR太忙
有啲公司得兩三個HR，但每個月要請幾十人，做唔切就索性搵獵頭公司幫手。（咁當然，多少反映咗離職率好高。）

💸要用晒公司嘅Budget 💵
曾經有個銀行客無啦啦掟咗10幾個position過嚟，而當中大部分只係teller同埋分行CS，理論上呢類比較junior嘅position，以各大銀行嘅牌頭只要出隻job ad，一個朝頭早閒閒地收過200份CV，根本冇需要畀錢獵頭公司賺，跟住打去問個HR所謂何事？佢咁答：「係呀，今年啲budget未用晒，要散晒佢，否則老細見你用淨咁多，下年就會cut budget，呢啲嘢易收難放，你有茶水姐姐都可以彈嚟，我哋趕住用晒啲錢。」

都係嗰句啦！好多人經headhunt搵工一肚氣係事實，我聽過最極端嘅一單case，係有個candidate自己搵工收到兩個offer，另外經獵頭公司搵工又收到一個offer，權衡所有條件之後，佢打算take自己搵到嘅其中一個offer，個consultant知道之後就發晒爛渣，肉痛冇咗份佣吖嘛，跟住竟然恐嚇candidate，話會叫個客blacklist佢，以後佢想再apply呢個客間公司任何職位都唔會有回音......的確係喪心病狂。

我只可以講，同你買保險一樣，保險呢樣嘢本身冇問題，問題只係你搵唔搵到一個又好又盡責嘅保險經紀。

咁點解搵工搵到冇晒辦法，可以主動打去獵頭公司留低聯絡資料同埋CV呢？

首先講下個運作，有規模嘅獵頭公司會分好晒唔同department，負責唔同行業嘅job，一般文職好似會計、CS、Marketing、Merchandiser.....都會歸類為General，另外有其他team專做Banking & Finance，亦有專做IT，總之會分門別類，當中唔同嘅consultant又會有各自專長去搵某啲範疇嘅工，手上會有某啲範疇嘅客，所以你想留低聯絡資料同埋CV又唔知點做，可以直接搵晒各大獵頭公司嘅head office hotline，當你打去留低資料，補send埋份CV，head office嘅職員就會一次過出封email，cc晒畀成間公司所有consultant，邊個睇完覺得適合，就會覆返email話：「呢個candidate我要！」咁你就唔使愁唔知send畀邊個。

另外，唔好以為只有文職，full time，或者高職位嘅position先會適合獵頭公司，好多headhunt agency仲會有專請front line sales嘅部門，亦有專請part time、freelance、contract嘅部門，所以如果你真係搵工搵到灰又冇晒辦法，不妨考慮下send CV或者打去獵頭公司總機，至於遇唔遇到一個盡責又幫手嘅consultant，咁就真係睇彩數喇。

希望呢篇文幫到正在搵工嘅朋友，我比較少睇inbox，有唔明歡迎直接喺度發問同分享。