【香港去處】K11 Art Mall 7月擺《咒術迴戰》期間限定店 去年《鬼滅之刃》大熱之時，就有人話同樣於《少年Jump》上連載、由芥見下下創作嘅《咒術迴戰》能夠成為下一本《鬼滅》。而喺《鬼滅》完結之後，《咒術迴戰》嘅人氣亦的確水漲船高，甚至與《Dr.Stone》一起被捧上與《One Piece》同級嘅「Jump 三本柱地位」，相信唔少香港漫畫迷都係其Fans。既然係咁，黎緊7月於K11 Art Mall開設嘅《咒術迴戰》期間限定店，大家就不能錯過啦！ 《咒術迴戰》期間限定店開設於K11 Art Mall (即係舊K11) 地下，店內會出售多款《咒術》週邊產品，例如連盒嘅「兩面宿儺」USB手指、最強人類五條悟眼罩、Megahouse出嘅場景盒玩等。店內亦有貼滿正、反派人物嘅打卡牆，去到唔買都要影下。 期間限定店由作品嘅香港代理「香港羚邦集團」設立，所以賣嘅一定係官方正品，而且係全港首間《咒術》期間限定店，絕對係Fans們「敗家」嘅好地方。 《咒術迴戰》故事簡介：故事的主角虎杖悠仁是一名具運動天賦的高中生，為了照顧住院的爺爺而加入能夠準時放學的靈異現象學會，並於爺爺離世當天遇上東京咒術高專的學生伏黒惠，二人的相遇並非偶然，伏黒惠到來的目的是告訴虎杖日前他撿到的「木盒」是極危險的特級咒物，稍一不慎便會使人喪命。虎杖想起爺爺的遺言，希望他「盡其所能拯救他人」，於是毅然吞下特級咒物「詛咒手指」，展開連串戰鬥與冒險的故事！ 《咒術迴戰》期間限定店資料： 地點：K11 Art Mall 地下G01 （尖沙咀河內道18號） 日期：2021年7月8日至31日期間 時間：早上11時 － 晚上20時 入場須知： ※ 最後入場時間 19:30。 ※ 圖片僅供參考，請以實物為準。 ※ 活動內容依現場工作人員指示或公告為準，主辦單位保有最終解釋權。 ※ 本活動採實聯制入場，並請全程配戴口罩及配合量測體溫與手部消毒。