【包場夢終達成，多謝每位支持嘅朋友！🥳】  一如以往，又係長文感謝Post，願意睇曬好多謝你。  再一次多謝各位嚟參加包場嘅讀者朋友，仲有唔嚟都課金嘅讀者朋友，如我一再重申十週年包場冇人肯俾錢嘅惡夢，今次反而冇認真諗過做乜要搞、點解要搞，都問過自己，無啦啦做乜十年唔搞十二年去搞？搞完又點？但係冇架，做得電影Blogger，點都係想包次場架啦。就係突然忽發奇想，見到Dark Knight重映，不如試吓再包場啦，又咁啱疫情我唔駛包400個位，試吓丫，然後，多得大家鼎力支持，唔駛十日全院滿座，仲玩到有walk-in。喺呢個時勢，要做到全院滿座唔係易事，仲係我一個nobody，全賴大家咁支持。  同埋，你哋好癲呀，八點未夠就排隊，我仲以為個個都last minute先到。  兩年前包場搞唔成，得幾位讀者朋友出嚟食個飯，其中一位當晚讀者朋友表示，「兩年前同今日比較真係兩個世界，估唔到光合作用可以捱得到開花」，兩年前都估唔到，兩年後竟然得咗。  其實尋日有少少甩轆，開場有意外遲咗開始，原本背好嘅講稿突然要縮，縮到我腦海一時反應唔切，變咗好緊張。然後又嚟單壞機事件，我每一次分享會都有意外，估唔到今次，連戲院都會輕機，我心諗仆街了。  冇理由大家呆等，點都要去娛樂大家，俾大家笑吓我柒，都好過大家眼光光等開場丫。一件事完得靚定衰收尾，就睇我果刻落唔落去撐一撐場。臨時臨急走去十分鐘「暖場」唔好dead air，事前冇諗過ad-hoc Q&A，真係嚇窒咗。好多謝大家俾反應我，帶動氣氛都冇咁dead-air。有讀者朋友表示氣氛好好，都有讀者朋友表示我兜得好好，可以考慮吓去做MC，我只覺得不完美，可接受，多謝大家睇得起我。我果刻唔知應該點做，純考我臨場反應點兜，兜唔到就超尷尬，希望唔會悶親大家啦。  作為一個IMAX fans，估唔到有朝一日，我個名上到IMAX screen；我自己影嘅相，有朝一日，會上咗IMAX，喂我唔係用IMAX機拍架，都扯到Full screen呀，係我成日講嘅「俾多26%你睇版」呀！就咁電腦睇張相冇乜特別，點知原來撐大咗成個IMAX畫面堅震撼；呢個畫面，再加「疫情下全院滿座」畫面好靚，我一生一世都唔會忘記。你哋坐喺上面睇可能唔會明白，我喺下面望上去，好感動。12年嚟每個大大小小時刻，儲到你哋每一位支持，成就到我呢一晚，值嘅。  初時呢，我以為咁樣book個場係好容易，但原來背後logistic好複雜，尤其「神秘驚喜」呢單嘢（你哋又真係大部份留言都肯同我保持神秘到呢刻，多謝曬），背後來來回回講到我都覺得煩，然後又有無數個意外同亂局，有一刻我甚至以為搞唔成。托賴最終重重難關重重過，成件事或者未至於完美，都終於完成到。感謝大家體諒，令大家要怒趕尾班車。  要堅持12年唔係一件容易嘅事，如我尋日所講，呢12年經歷嘅種種起跌得失，甚至曾經玩到差啲要打官司。幾年前一度低潮到唔知為乜，曾經想執Blog，但捱得過這極限，我相信總可以走落去。  12年喇，我有一個發咗12年嘅夢，終於達成到。我唔知下一次會做啲咩，但呢個，一定係一個里程碑。  Dark Knight我應該睇過超過十次，尋晚係我第二次睇IMAX，由IFC飛落去果幕，IMAX鏡頭下香港，點睇都係咁靚。12年前嘅香港有無限可能、12年後我哋已經變成一個葛咸城，今時今日睇返，有少少唏噓。  大家問我未來會搞咩活動，再包場包多獲係咪嚟先？根據過往經驗，第一次成功、第二次食住個勢總係差咁啲嘅。  最後，尋日時間所限，最重要果樣唔記得講呀，我都想多謝背後幫我嘅朋友，由我決定做呢件事開始，每個細節都聽我講俾意見我嘅你，到諗流程、設計、影相、派飛劃位、拍Live、印嘢、幫手share、無啦啦一日課一次金（係呀講緊你呀兄弟咪再咁癲啦），仲有喺我緊張時安慰我嘅，不離不棄嘅每一位，同我度過咗咁多次活動，無限感謝。  如果大家尋晚影咗相拍咗片，唔介意可send返俾我，或者「#晞觀影記事12週年」，感謝感謝。有咩意見，做得好做得唔好，歡迎留言告知～  【‼️留意‼️】 「晞。觀影記事」Patreon加強版已經開幕，更多精選深度獨家電影文章，請即訂閱：https://www.patreon.com/travelerwithmovie  📣文字工作者也得要吃飯，你的支持是我的原動力。請給點心意，給小弟寫更多好文章，歡迎透過payme課金以作支持🥳：https://payme.hsbc/jackyhei 或使用QR code：https://bit.ly/3a9wOzy 或透過Paypal捐款：paypal.me/jackyhei  🙏感謝各位支持，小弟執筆之原創小說私人貨存已全部售罄，有意者可到此文章內的連結購買：https://bit.ly/3dRuUWu  #晞觀影記事 #travelerwithmovie