［科企CEO歧視鏈］添曲皮猜之類，打工仔嚟咋，身家係小朱光頭佬一個零頭都冇—不過又同時富有過堆議員好多。堆議員？在香港都只係普通中產。甚至唔係上級中產

話時話，呢排記得keep 住like and share，主動入嚟睇，同埋設定做see first．真係搵食艱難。但感激大家，Keep住做，呢排啲Reach係好返好多的，但唔好鬆懈。一個都不能少呀

TLDR：打NBA嘅頂多只係小富，班主先係富豪。同樣地，CEO只係小富，除非自己係大股東。

1. 上星期四大科企巨頭齊齊在聽證會畀人盤問，可惜疫情關係要用Webex，亞馬遜光頭佬Jeff Bezos更加斷線90分鐘，「我覺得特登嘅，同佢做人做生意作風一樣咁狗」。如果係現場嘅，更加震憾。例如上次Facebook小朱 Mark Zuckerberg 大戰光明頂，睇硬照都一流，絶對係雖千萬人吾往矣（https://bit.ly/3k8N09y），一夫當關，萬夫莫敵般莫迪。當時我就睇好股價，事實證明我果然係……好彩。

2. 同場加映，成堆議員，其實都係廢老，對現實同科技脫節程度，應該勁過香港。例如著名嘅Senator, we run ads，（https://ggle.io/3IDo）。議員問小朱，到底你檔嘢，唔收錢，點維皮？明顯呀議員係冇睇過免費電視的。建議下次不如叫Virgin Galactic 嚟問（呢檔嘢有新搞作，夠多人留言我就寫）

3. 至於今次聽證書，議員啲發言水平，好似改善咗啲，應該上次畀人恥笑得多，返去有人做功課。但我想講嘅係，今次集齊科企四大天王，真係極之難得。諗真啲？地球上人類歷史上最有錢嗰幾間公司全部嚟畀你插，幾爽。諗下入面坐咗幾多富豪幾多財富？

4. 就公司層面，市值，四間都去到以Trillion美金計，萬億。最細嘅Facebook其實未夠一萬億，7000億。Google（Alphabet）剛好10000億。亞馬遜16000億。蘋果？19000億。自己慢慢計。但寫過了，一間蘋果，年頭時市值已經畀德國DAX指數成份股30間加埋更加值錢（https://fbook.cc/3DRF）。同樣地，一間亞馬遜，亦都大過韓國成個股市嘅市值（有機會寫）。而德國係全球第四大經濟體系，韓國係第十大（＊），兩個國家都有一定嘅科技實力。香港？我想像唔到，可能相等於四大地產商畀你齊齊召去輪，但財富同影響力仲爭好遠。可能大陸啲乜乜科技論壇會似啲。

5. 如果講人呢？巴閉咯。全球首富喎，More money than God嘅光頭佬都有份。唔止，排第三嘅之唔係小朱（https://fbook.cc/3DRD）

6. 丫，做乜漏咗第二個？第二個正係標基。標基一早退落嚟，唔grill佢好合理，況且，廿年前咪grill過咯（而佢同微軟仲係咁有錢！）。第五位咪正係微軟第二任CEO，NBA快艇班主Steve Ballmer。冇微軟點成事呢！但講過了，微軟例外，可能因為廿年前畀人grill過（https://fbook.cc/3DRE）。但話說回頭，而家微軟依然咁嘅市值，五大富豪榜有兩個係佢前任CEO，係咪即係當年grill得唔夠徹底？唔係應該拖佢出去grill多鑊（＊＊）?

7. Anyway，講嚟講去，都係小朱同光頭佬。另外兩位呢？

8. 睇圖！爭得遠了。蘋果嘅添Apple（侵侵專用），同Google嘅皮猜，身家？真係小朱同光頭佬嘅零頭都冇。光頭佬仲要借機消失90分鐘，真係可撚恥。換著我係添曲同皮猜都仇富呀！

9. 真的，固然呢啲身家統計多數都低估，但即係咁講。皮猜添曲之類，身家十億八億美金—在香港都仲可以算富豪，但唔係超級富豪。應該咩鞋王（黃長發啲朋友），李德義（恒豐，個新抱分身家都十幾億）不如。即係夠你窮奢極恥（特登打錯字！）左擁右抱米芝蓮餵狗Lafite做漱口水，但唔夠你權傾天下。

10. 同真超級嘅小朱光頭佬比，就更加人比人比死人。你幾億美金身家，唔夠十億，Billionaire 未夠。人地係千億身家。

11. 個類比，好似你睇NBA咁。甚麼勒邦占士 居里之類當然有錢，紙醉金迷，但只係小富。班主嗰啲先係真有錢撚。咪話800億身家嘅Steve Ballmer係班主。咁當然窮啲嘅，Mark Cuban幾十億身家都夠做。但一般打波嘅，唔會有咁身家。

12. 對，添曲皮猜，同光頭佬小朱最大分別係，添曲皮猜都只係打工仔，即係NBA啲球員。光頭佬小朱當然「都係」打工仔，但真正身份係大股東。只係靠份糧（佢兩位好似收1蚊美金）仲得了？Elon Musk嘅情況都係咁

13. 再講一次，例外嘅，只有Steve Ballmer，佢亦只係打工仔。但佢係一個好早識得標基嘅打工仔，好早拎咗8%微軟股權。咁拎住間公司8%（even 嗰時微軟只係豆豉咁大）仲係咪只係「打工仔」？

14. 呀，都未講埋，啲議員。就真係窮人了。香港做議員可以有幾多身家我唔知，「李國寶都議員」。但今次出席grill人嗰班，最富貴不過係一兩千萬美金身家，真係中產嚟咋。多數甚至係一兩百萬。有幾件負數嘅，乜料？負資產議員？不過議員啲身家，我比較有保留。唔係佢地特別奸，而係光頭佬小朱之類，絶大部份嘅身家都係上市公司，好易查證，報多報少幾層樓幾億現水濕濕碎。但議員呢啲唔係，真係報少層豪宅（即使只係美國樓）都爭好遠。

15. 更吹脹嘅係，一完咗聽證會，四大科企出業績，小朱同光頭佬嘅身家，又多一百幾十億！

16. 更正嘅係，光頭佬之前已經離婚分咗身家，依然係首富。都算。佢前妻分咗佢啲身家，而家都在13位，到佢打入十大又出篇文先。

17. 所以呢，真係社會不公義。重覆一次：我志願係做個普通有錢人，然後同你地一齊去仇視啲超級富豪。大家一齊努力。

（＊）呢度當然係講籮綿奴，唔係計及物價嘅PPP。好簡單，股票係籮綿奴，市值亦都係。蘋果to….德國。

（＊＊）令我諗起《上海灘賭聖》，「做乜呢個太監咁多鬚根，一定係閹得唔乾淨，人嚟，拖佢出去閹多鑊」（https://ggle.io/3IE7，12分鐘）

————————————————————————————————
最新收費影片：第一次推介跑贏大市，同你回顧檢討下。仲有新推介。40分鐘，都係賣返$80

簡介及以前嘅片（未睇可訂）：https://bit.ly/3iYMD0F
報名嘅，課程編號CC006：https://bit.ly/3eXVX1K
報完名交咗錢，呢度log in：https://bit.ly/3gYXu9e
之後按最頂「按此觀看」就得
仲搞唔掂嘅，睇埋下面，或者搵客服，或者PM我。
-------------------------------------------------------------------------------
【最新李聲揚收費影片】題目:　回顧第一段專欄片有幾勁！今段落多幾個Number賺死你！40分鐘，都係賣返$80

影片/課程編號：CC006
播放平台：https://homebloggerhk.com/web-class-player/
付款及收看步驟：
1/點擊報名收看 [影片/課程編號：CC006]
2/利用信用卡網上付款
3/及後有登入資料可以立即收看
查詢：whatsapp 63832145

［阿信屋疫情受惠股？］都受受地，但冇你想像中咁受。

TLDR：阿信屋五年第一次賺錢，仲有息派。但其實上半年都賺緊啦。唔少都係靠賣物業，但本業亦都係有啲改善嘅。不過，其實yen升輸咗佢2000萬。你見唔到啫，我就見到。

話時話，呢排記得keep 住like and share，主動入嚟睇，同埋設定做see first．真係搵食艱難。但感激大家，Keep住做，呢排啲Reach係好返好多的，但唔好鬆懈。一個都不能少呀

1. OK，疫情受惠股嘛，多咗人搶米搶廁紙嘛，阿信屋5年第一次賺錢，舊年輸900萬，今年賺1200萬嘛。仲派息添，又係5年首次！正路都係咁寫（https://bit.ly/3jTwf28）—但我個人當然唔係好正路

2. 介紹返，4月年結呀下。首先，都算可喜可賀嘅。其實中期業績我都寫過，記住開住嚟睇（https://bit.ly/3hOBa2k）。你話賺錢？上半年（舊年4-10月）都賺緊啦。不過當其時話中期純利大升2.5倍，係140萬升到507萬—而仲有480萬係賣物業賣返嚟嘅。本業等同零利潤（但總好過蝕）

3. 好啦，睇返今次業績（https://bit.ly/3080RoH）。其實嗰1200萬純利，都有800萬係賣物業嘅（17頁）。呢個就去咗第一頁，其他收益虧損嗰度。你話，負數嚟嘅？輸450萬喎。係，因為有其他物業重估要輸錢。咁所以，其實啲物業，夾埋都係拖低咗個業績（但賣咗800萬已幫唔少），本業其實仲強

4. 如果睇毛利，全年6億3，上半年係3億1。見到下半年係做得好咗，雖則只係少少咁大把（3億2）。但零售嘅嘢，粒粒皆辛苦。另外你見個「融資成本」，即利息開支，上半年1600萬，全年先3000萬。一來減咗債，二來我估都因為減咗息。下次業績會更明顯

5. 咁其實，係做得不錯的。我講嘅「YEN升輸返2000萬」，又邊度嚟？

6. 答案，你睇份業績第二頁就見到（https://bit.ly/3080RoH）。匯兌差額嘛。當然主要係日圓。阿信屋，一般係日圓升嘅受害股，生意收港紙，來貨畀日圓。Yen升佢就輸錢。咁舊年上半年（阿信屋嘅上半年，即係4-10月），日圓相當強，咪輸得勁。其實上半年呢舊嘢已輸1500萬。去到下半年，日圓冇咁強，所以輸少好多，只係400萬到。夾埋全年呢度就輸1900萬

7. 計落埋去大數，就見到第二版嘅，倒蝕700萬。

8. 咁到底係蝕定賺？呢個問題有啲深。長答呢，就哲學討論，「咩叫盈利先？」。「收入減成本」「咁yen輸錢唔係成本係乜？山本？橋本？」「定盈利係change in total net assets？」．但短答：係賺。純利就係第一版嗰個。

9. 咁但第二版呢個計埋匯兌差額蝕700萬，有乜影響？就係中期篇文都有寫嘅（https://bit.ly/3hOBa2k），照抄一次算：

10. 但你話，喂，冇計落個損益表P and L喎，報出嚟係賺錢。係嘅。咁有乜影響？使乜理？梗係有啦。因為，會直接在你本book度冇咗的！「即係你入賭場兩個鐘後冇輸錢，不過最初拎500萬換籌碼，而家畀返400萬你」。正式啲講就係，真蝕錢咪經P and L再扣本book，呢啲就直扣。

11. 係喎，所以你見阿信屋個權益總值book value （第3頁）（https://bit.ly/3080RoH），舊年4億3，今年得返4億1。明明係賺錢，但個股東權益反而係縮咗的。所以間公司，其實係少咗錢。死未。

12. 不經不覺，原來間嘢畀起上次我寫中期業績時，升咗一個開。直頭above book．雖則，5億幾市值嘅嘢，其實都唔使睇咩業唔業績。但你問我，就梗係唔買啦。

13. 都係嗰句，一間公司，護城河在邊？好多都係自欺欺人。最鍾意就係講品牌（呀大佬，招牌唔同品牌，否則就間間有品牌，亦即係間間冇），或者秘方（澳牛炒蛋呀？去蘇黎世開個保險箱鎖起佢未？），客戶忠誠（隔離七折你嘅忠誠就冇晒），最後都係不切實際。

14. 雖然有時係事後先睇到。但冇所謂護城河嘅公司，十居其九最後就鬥減價，泥漿摔角。早兩日講書店咪就係咁，根本冇差異化。我同樣係買余光中嘅《記憶像黑軌一樣長》（鐵軌梗係黑），隔離賣平廿蚊，我就去隔離買架啦。但餐廳呀咖啡店呀唔同，可能都係同一舊嘢，但就係可以收到唔同錢。恙心快餐嘅糯米雞，同你去翠園甚至北京樓，我估都係嗰啲嘢？咖啡等等亦係。我話知你乜豆物豆，但事實係啲豆佔個成本極細極細。星巴克賣到幾廿蚊杯，有佢原因。當然小店一樣可以咁玩，甚至賣得貴過佢。但書店就近乎冇呢回事的。

————————————————————————————————
最新收費影片：第一次推介跑贏大市，同你回顧檢討下。仲有新推介。40分鐘，都係賣返$80

簡介及以前嘅片（未睇可訂）：https://bit.ly/3iYMD0F
報名嘅，課程編號CC006：https://bit.ly/3eXVX1K
報完名交咗錢，呢度log in：https://bit.ly/3gYXu9e
之後按最頂「按此觀看」就得
仲搞唔掂嘅，睇埋下面，或者搵客服，或者PM我。
-------------------------------------------------------------------------------
【最新李聲揚收費影片】題目:　回顧第一段專欄片有幾勁！今段落多幾個Number賺死你！40分鐘，都係賣返$80

影片/課程編號：CC006
播放平台：https://homebloggerhk.com/web-class-player/
付款及收看步驟：
1/點擊報名收看 [影片/課程編號：CC006]
2/利用信用卡網上付款
3/及後有登入資料可以立即收看
查詢：whatsapp 63832145

［負油價後，期油回歸正常］有讀者要求講下油價，就寫篇文講下「負油價」前世今生。今次導讀唔打咁長了（＊）。明報全文亦在本post最尾有

明報原文：https://bit.ly/3eJmQGw

1. 「負油價」，不經不覺就3個月。呢單嘢真係睇到懷疑人生，改寫三觀。即係，失業率破晒紀錄，聯儲局極速減息，股市食瀉藥咁，都係史無前列—但呢啲係數字上嘅紀錄啫。但「負油價」唔同！係真係好多人認知以外嘅事！

2. 市場上嘅原因，好多人解過，速速快解：就係因為，原油唔同股票，唔係一張紙，亦唔係黃金咁放入保險箱就得。原油平過水（其實一直都係，如果拎樽裝水比），要好多位儲，仲要唔可以就咁放在公司。（有人試過，唔成功，唔好試）。咁，當其時，全球封晒城，冇人開車，工廠停工，咁多油，邊度放？放到嘅位都滿晒，有人發現唔對路，到時點交收？索性快手貼錢都送走啲嘢，唔好搞到自己一褲係。輸幾十蚊好過自己拎住啲油唔知放去邊。就有咁嘅東西。

3. 但，賭馬賭波都知，賭嘅其實唔係波同馬，係人。金融市場有時都係，特別係期貨呢啲zero sum game，本身不創造價值（＊＊）。

4. 有冇諗一個問題，點解4月20號先爆壇咁嘅嘢？你睇返，差不多全世界所有股票指數，都係3月狂瀉，但3月尾已經見底。打後一個月，彈返一成幾兩成幾不等。睇任何量度，都過咗最危險最恐懼嘅時刻，點解4月20號先爆單「負油價」？

5. 正係因為，人人都撞入去。睇下美國隻USO，曾經全球最大期油ETF。而家冇乜人睇，當時炒到如痴如醉。3月之前，一日幾千萬美金流入。去到4月？去到6億都有！人人撞入去。咁之後就音樂停，派對結束，走火警，人踩人，踩死好多人。打後你估下資金流入係幾多？差不多係零。

6. 好多資產在波動市中都係咁（當然事後睇就易），人人搶入去，然後去到一下爆煲，最高追或者最重槓杆嘅即時狂打靶，不問價咁要狂沽，人踩人。嘔到呢啲人抬晒離場，就見底反彈。

7. 真喎，當時有條友，早早提過「負油價」，咁梗係又變咗先知。嗰時啲人梗係再問佢，佢話見負100蚊。然後點，你見到啦？物極必反，滿地鮮血就入場。但都係頭盔，講就易，你點知你唔係最後一滴血嗰個？我成日舉嘅例：金融海嘯，以為2008年3月貝爾斯登爆煲已經滿地鮮血啦。原來係PIXAR片頭，半年後先正場嚟料
8. 無論如何，而家就定咗落嚟啦，其實對普通人嚟講，而家個時機比較好。要抬走嘅都抬走晒，但又未見成班人仆入去。定咗落嚟的。

9. 之前睇WSJ有篇文，講對抗通脹。印咗咁多銀紙，好難要人相信冇通脹。咁之前呢度都寫過，當然係叫你買金　—　但我廢事啲友又嚟曲解我，唔係叫你100萬身家就買晒金，係拎5-10%去買。咁其實，油嘅嘢，可能都係咁（但唔使10%啦）。亦都真係買，只能買ETF—再講一次，唔好諗住買桶油放在保險箱或者公司士多房。

10. WSJ篇文（https://on.wsj.com/2OJNAMz），睇返之前通脹周期，邊啲資產最可以提供保險。第一位當然係黃金。但第二呢？唔係買樓，更唔係股票債券，而係期油。

11. 「負油價」時，香港隻三星原油ETF（3175）都好多人識。咁跟油價，就梗係大跌。但，至少係冇變負數的（其實應該唔會，ETF只能變零，唔會倒嘔）。當其時亦都改變咗個轉倉策略，令到你唔使變零或負數，但當然代價係之後反彈（亦都真係發生）你就賺唔到咁多了。針無兩頭利。

12. 隻嘢之前講話再檢討策略，留意返。而家出咗公告，但斷估你都冇心機睇（https://bit.ly/2WJhghg）。簡單嚟講，相關指數轉咗。咁即係點？即係，以前呢，隻嘢就持有9月、10月及12月的WTI期貨合約。之後呢，（8月7日生效），就係持有11月、12月同出年1月的期貨合約。即係，渣得更加遠期咗。自己留意返。

（＊）其實有個長版在medium（https://bit.ly/3fOeDC9）
（＊＊）指金融上嘅價值，你可以同股票比下，例如升咗N倍嘅港交所，有人發達，冇人輸錢。至於社會價值？好多人認為做金融嘅都係冇貢獻。但我就唔明做乜有人出糧，梗係客同埋公司開善堂。

---------------------------------------------------------------------------
李聲揚：倘通脹重臨 留意期油ETF

【明報專訊】3個月前的今天（4月20日），值得紀念。當天正是大家見證了「負油價」，金融市場果然局局新，never say never。

筆者自高中開始留意金融市場，說不上是老行尊，但也經歷了亞洲金融風暴、科網狂熱、港股直通車全民皆股，金融海嘯，以及今年的疫情股災。回想今年3月、4月，聯儲局減息之狠，股市跌幅之急，失業人數的慘况，均是前所未見。但情况本身並非新鮮，震撼的只是數字。

但「負油價」則完全不同，是大多數人認知以外的事情。就連不熱心金融新聞的朋友，也探聽是否「入油有錢收」，或研究是否可以帶桶原油回辦公室儲存獲利（美國的確有人試過，但並不成功）。

市場終是人的遊戲

「負油價」起因，就是原油儲存成本較高，當時參與期貨交易的投機者，發現儲存空間已滿，根本不能交收，唯有急急腳，貼錢送走。詳細內容坊間已有討論，不在此重複。

但除了「基本因素」外，也有「人為因素」。筆者少年時跟隨前輩到馬場「交學費」，前輩提點：看的不是馬，是人。金融市場也一樣，和你交易的不是市盈率、GDP或平均線，市場最終是人的遊戲。

經濟學大師凱恩斯（John Maynard Keynes）受人尊重，不只是因為學術成就，也因為他沒有紙上談兵，十分貼地，對市場頗有心得。凱氏曾提出「選美理論」：若猜中選美冠軍有獎金，你選的不應該是你認為最漂亮的佳麗，而是你認為大家心中最漂亮的——即使你完全看不上她。

又講跑馬又講選美，筆者想說的是，留意「負油價」發生的日期。環球股市3月狂跌後，已在3月20日（又是20日！）見底。一個月後的4月20日，美股納指已反彈25%。股市已過了最恐懼的時刻，那為何還會爆出「負油價」？

答案就是和人有關。「眾地莫企」的概念，大家也明白，但知而行難。美國的USO，曾經是最大的原油ETF。3月前，每天資金淨流入才幾千萬美元。然後到4月尾，資金流入忽然劇增，一度去到6億美元，接下來派對結束，迎接大家的是「負油價」，不少人損手。猜猜之後的資金流入？基本上是零。

正是否極泰來，物極必反，記得「負油價」出現後，之前提出此瘋狂猜想的分析員，當然成了「先知」，媒體紛紛訪問。「先知」認為油價會跌至負100美元。結果油價之後反彈至約40美元水平。但投資者一朝被蛇咬，仍未見貪婪情緒出現。

無限量寬將致通脹 短期支持油價

「負油價」一役後，大家都知道香港有三星原油ETF（3175）。當時產品價格，自然是隨着油價大跌而重創。但當時發行商也改變了轉倉策略，從而避免了投資者損失全部本金。但當然，發行商也有明確指出，及後油價若反彈，投資者也不能享受短期合約的升幅。畢竟針無兩頭利。

現在既然環球市場算是穩定下來，之前不少期油的投機客也被抬離場，對普通投資者來說，反而是比較安全的時機。早前也看到《華爾街日報》的文章分析，若擔心通脹重臨，應該考慮哪種資產？黃金固然是名列前矛，但排第二的不是房地產，也不是股票和債券，而是期油。若市場擔心聯儲局無限量寬將導致通脹（機會很大），短期也是支持油價的因素。

投資投機前先了解產品
但投資投機前，當然先要了解產品。留意發行商之前提出過會檢討策略，最近再有最新公告，投資者宜細讀。詳情可以在港交所或發行商網站找到，但重點是：產品的相關指數已有轉變，從而影響持倉。調整之前，產品會持有9月、10月及12月的WTI期貨合約。調整後，則會持有11月、12月和明年1月的期貨合約。簡單來說，持有的期貨合約更為遠期，投資者要留意。

作者為證監會持牌人士，並未持有以上股票。
-------------------------------------------------------------------------
香港聯匯何去何從？新收費片已出，講足一個鐘，單次買200

想睇簡介嘅，呢度。亦有埋以前嘅片，有興趣可訂：https://bit.ly/3iYMD0F
報名嘅，呢度。今次課程編號填 CC005。唔想填信用卡亦可以FPS： https://bit.ly/3j0r9QZ　
Log in 呢度：https://bit.ly/3gYXu9e
已付費嘅，log in後按最頂「按此觀看」就得。再唔係返呢度睇：https://bit.ly/3fyKbw0
仲搞唔掂嘅，睇埋下面，或者搵客服，或者PM我。
-------------------------------------------------------------------------------
【最新李聲揚收費影片】題目:「聯繫匯率會否脫勾？散戶應如何應對？」
影片/課程編號：CC005
播放平台：https://homebloggerhk.com/web-class-player/
付款及收看步驟：
1/點擊報名收看 [影片/課程編號：CC005]
2/利用信用卡網上付款
3/及後有登入資料可以立即收看
查詢：whatsapp 63832145