［野獸盈警］中電發電發到發盈警！

一係唔發市一係不停嚟，呢排好多正嘢。維他奶（345）（http://bit.ly/2x4O7Qf）莎莎（178）（http://bit.ly/2x7z6NC）業績後，收市又有中電（2）盈警。

發電咋喎，做乜變咗發盈警？其實盈警呢，成日都有。富智康（2038）呢啲次次發（http://bit.ly/2xckmwR），國泰（293）匯控（5）又發過。電廠呢？大陸啲火電廠（IPP是也，華能大唐嗰啲）一樣發盈警，太陽能亦都係。

但中電發盈警都係夠晒震驚，小朋友話我知時，我以為聽錯。

第一樣嘢，梗係睇減幾多，同市場有冇預咗。話減到輸錢喎，嘩。中電之前兩次半年業績，每半年60-70億純利左右，今次減60-70就減到輸錢，合理（當然仲有稅嘅問題）。另外，見分析員估，都估緊全年賺110-120億咁上下，肯定冇預到半年會蝕錢。所以股價怕且都有啲壓力。

中電業務一向穩定，唔通你用少啲電咩。電費？就只加唔會減。競爭？係冇嘅。理論上，好似法例冇講過中電就新界九龍南長洲，港燈就港島南丫島呀下。以我所知冇呢種限制，唔同話紅的綠的咁寫明。住港島嘅，不妨聽日打去中電問下可唔可以轉去你公司，問下點解唔得（更有創意嘅，住新界打去港燈問下，話你錢多想益佢都唔得？）

咁但，中華電力，你估真係中華咩。香港十隻白虎，都唔係香港又唔係十隻仲唔係白虎啦（原諒我的bad taste）。

出盈警，因為袋鼠國嘛。商譽減值

我記得之前都寫過「商譽」呢個字，極之誤導。好多人就真係當係你個聲礜，你個品牌，錯得很。上次都有人鬧，喂，官方譯名喎。我唔知咩？咪就話官方譯名垃圾咯！我甚至覺得英文goodwill一樣係差嘅字。

正如張五常解過，咩係Utility：「怎樣我也要給這選擇排列的數字起一個名字。怎麼辦？我於是閉着眼睛，胡亂地打開英語字典，手指下按，開眼一讀，那個字是Utility——功用。」

我寫，又畀人鬧啦。張五常寫就鬧少啲。但簡單嚟講，你見佢意思就係：冇意思！只係一個名！唔好照日常用語解。對我嚟講，「商譽」一樣。唔係咩品牌，唔好聽啲二樓分析員講

「商譽」，十分簡單，其實學過會計101會明（101都冇學惡搞啲），資產＝負債＋股本，Asset=Liabilities + Capital十居其十係「收購」時出現。你買間公司，當佢資產5億，負債4億，凈資產／帳面值／權益係1億。冇問題。但，我出2億買。咁就仆街啦！

買起成間公司，你點入數？首先你資產入面嘅現金少咗2億，新公司你食咗佢，資產多5億。你資產總共多咗3億。但負債多咗4億。仆街，咁凈返嗰1億去咗邊？唔係玩嘢IQ題，你細心一諗，知道因為你溢價收購嘛。但，會計點處理？兩邊條數點平？於是，就發明一個數，在資產嗰度多1億，long住佢。就係咁簡單！個名，咪叫做「商譽」

「商譽」就唔係真係你理解啲咩品牌。好簡單，我買完間公司，可以即時拆撚晒招牌，咁仲品乜鬼牌？但「商譽」一樣存在。況且，你買完全冇品牌嘅公司，一樣會有「商譽」。

呢樣嘢其實成日出現，因為收購差不多必定係溢價。當年星展買道亨如是（大大舊「商譽」），招商買永隆如是，因航買快運都應該會係咁。

咁，舊「商譽」，食咗入肚，點呢？最後，其實基本上，必然係減值。爭在幾時。N咁多年前嘅「商譽」就好似折舊咁一年年減，但近代已經唔會咁做，係每年做啲測試咁。我當（亂講）因航買完快運，然後間公司畀人制裁嘅，咁你就準備定「商譽」減值都得。但一般情況，其實公司自己可以判斷，出面核數師再劃押認同。

CFA課程有解，收購多數都係買貴嘢（所以面書朱仔買instagram係天才—但應該都有舊「商譽」）（http://bit.ly/2EUseKc）（http://bit.ly/2EQ4gA0），主要因為管理層好大喜功，有嘢留返下手食。星展買道亨，或者招商買永隆後冇耐，當然就金融風暴。然後就消化不良減值，冇食嘅，屙清咪再fight，問恒生就知。

咁所以，咪減值咯。而亦係CFA課程有解（所以幾好的說，記得去報）（http://bit.ly/2vV9zqg）（http://bit.ly/2x1UVhJ），公司如果有得揀（都有嘅），會揀幾時減值？初哥或者外行人，會以為積穀防飢，公司生意好時食咁啲。現實掉轉，基本上一定係等公司唔掂時先做減值。除咗本身有共同原因（例如經濟差，自然本身業務又衰，買返嚟嗰舊又減值），仲有人性嘅因素。

有鑊，梗係全部一齊爆！最好唔知爆唔爆嘅都爆晒，一次過自己爆晒，唔好擠牙膏。係核突架，股價係插水架，但插幾日就算（當你間嘢唔爆煲），下次業績咪大翻身，一個唔該管理層呀大股東仲可以低位爭持添（幾咁醜惡）。總好過每年擠少少，年年畀人問。

所以，我問過分析睇中電嘅真分析員（當然唔開名）。佢就覺得，係因為本身今次業績都差，索性一鑊過。同我估計差不多。（此人後生世仔，當本人師傅咁拜，但主要唔係股票方面，係非股票方面嘅東東）

咁中電話，非現金項目啫，冇乜影響嘅。係咪真？Yes and No。商譽減值的確係非現金，但，「你啲錢一早畀咗嘛」。招商買永隆後，消化不良，都拖低咗業績幾明顯下（咩中文）。或者當年金融海嘯前，三家分晉，RBS皇家蘇格蘭銀行，Fortis比利時富通，同埋西班牙桑坦德，齊齊買起荷蘭銀行ABN AMRO（對，西門吹雪嗰間）（http://bit.ly/2SmPHcE）。頭兩者都食瀉藥咁，Fortis 仲勁，之後要平保打救，然後平保自己都瀉到仆街，又係「商譽減值」。係得桑坦德食得住，而家仲有錢贊助西甲。（爛gag：Racing de Santander 桑坦德競技，就冇份踢La Liga Santander ）

至於你話，喂，如果佢1億凈資產，但我半億買到呢？就真係問下會計師。但就我理解，係唔容許「負商譽」呢啲咁有創意嘅嘢嘅。

聲明：本人只係CFA（嚴格嚟講係CFA CharterHolder），唔係CPA。呢啲嘢梗係會計師熟啲。你明佢講乜的話。

7個外國人，誇張！

有幾多個你認得呢？（已起底）

先講主教練先，佢係香港聯賽首位歐洲嘅教練。

Eduard Torres 托利斯
國籍：西班牙
52歲
簡介：
1985年展開教練生涯，先後教過七支西班牙最高水平嘅Liga ACE或者係LEB 西班牙乙組嘅球會，亦係當地球會CE Lleida Bàsquet 籃球隊主席。嚟香港前佢喺內地執教NBL，亦係CBA次一級嘅球隊，有5、6年執教大中華區球隊嘅經驗，相信會注入一啲歐洲籃球風格畀東方！

因為ABL賽制關係，可以有兩亞援兩外援，所以暫時搵嚟四名球員，薪金上限係每月總共外援費唔可以多過四萬美金，的確好難！但聽說仲會搵個高大中鋒。

Tyler Lamb (圖一左1)
25歲
6'5 (195cm)
PG/SG
國籍：美國/泰國
於ABL屬亞洲歸化球員

簡介：
此Lamb 不同Hornets彼Lamb，NBA的Lamb有個親生巴打叫Zach，但好似仲打緊NCAA。最初此Lamb 喺美國UCLA打波，33場有32場正選，平均9.0 分, 3.6 籃板, 2.8 助攻。之後轉到加洲Long Beach State 49ers，場均得分去年15.4，而且佢不在陣，球隊1勝9負，佢在陣球賽係14勝8負，落選NBA選秀後，曾經去過泰國球隊效力。

Steven Guinchard 張文平 (圖一左2)
23歲
6'5 (196cm)
PG/SG
國籍：台灣/法國
屬ABL 亞洲歸化球員

簡介：
媽媽係台灣人，爸爸係法國人，而中文名係媽媽改嘅。一直喺法國讀書，唔識中文，喺法國讀完高中後選擇赴美追求籃球夢。喺屬於NCAA D2 嘅Emmanuel College就讀，最後一個球季平均11.6分同3.2籃板，有唔錯嘅三分能力。9月時間簽約SBL嘅璞園。

Ryan O'neal Moss (圖一右1)
6'7 (200cm)
PF/C
42歲
國籍：巴哈馬

簡介：
UNIVERSITY OF ARKANSAS AT LITTLE ROCK TROJANS畢業，打過NCAA，嚟香港前喺墨西哥打搵食，之前亦打過ABL，原本已經諗住退休做助教，不過見仍然仲打得所以想繼續打。第一眼有人話佢似Kobe...不過係講緊外貌啫

Marcus Elliott (圖一右二)
6'3
PG/SG
32歲
國籍：美國
簡介：
以前讀LOUISIANA TECH UNIVERSITY打過NCAA，之後嘅職業生涯主要喺南美打波，嚟香港前效力阿根廷嘅甲組聯賽球會SAN LORENZO DE ALMAGRA 。實質數據唔係咁清楚，但東方教練團同教練對佢一致好評，認為佢係咁多個非本地人當中最有實力嘅一個。

其餘仲有三個黑人球員，但其實佢哋只係跟操。班尼斯只打香港聯賽；Bryant Austin 唔駛多介紹，EJ係之前超敏、上年晉裕嘅外援球員，打三號位力量唔錯，但相比其餘外援都係比下去。

佢哋已經飛咗去菲律賓集訓，嚟緊仲會返大陸佛山打友誼賽，再返嚟打ABL及超級工商盃，令人期待喎！

P.S. 有錯歡迎指正！

#起底組 #東方籃球隊