兩條窮L喺茶餐廳嘅一席對話，坐對面嘅細佬同我講：「有冇睇新聞？旺角居屋富榮花園天價1065萬成交，居屋要1000萬！」

我：「有呀，痴咗線。」

細佬：「其實買嗰個人知唔知自己on9？」

我：「唔會啦，我哋買唔起先會笑人on9，佢應該覺得自己好威。」

樓價都係面嗰浸，個底係仲要慢慢供，之前望過啲私樓價錢，普遍嘅壓力測試都要月薪2萬先過到關，稍為睇好少少都已經講緊壓力測試要3萬至5萬，就當你月薪有呢個數，供一層樓要用20年、30年，真係有人可以肯定嚟緊20至30年唔失業？唔會畀人炒？唔會有病有痛？

做我呢行更加了解花無百日紅嘅道理，任何行業都有機會式微，例如以前做Merchandiser係幾搵到錢，啲鬼唔信大陸，英文又溝通唔到，落單都係要經香港先有信心，搞搞下，香港已經冇特別優勢，而家連你肯station國內都唔一定有得你做，因為啲單走晒去越南、柬埔寨、孟加拉，好多人喺大陸開廠都衰收尾，出一隻Merchandiser嘅招聘廣告，一個朝早可以收到過百份CV，有啲失業咗3個月、半年、一年，當然呢啲只係冰山一角，根本冇一個行業或者職位保你一世無憂，但係我哋供一層樓就要供到50、60歲。

問題嚟喇，你有經驗係咪一定搵得返份工？年中聽唔少僱主話唔要年紀大嘅求職者，點解咁抗拒？一來人工高，二來怕唔聽話，叫唔郁佢哋做嘢，所以呢班高齡求職者萬一被裁員就有排坐，而最可悲嘅事實係，我同你都有老嘅一日，呢樣嘢我哋今日唔使面對，將來都係要面對。

地產商同政府、商界關係千絲萬縷，香港人已經阻止唔到樓價無止境飆升，希望啲僱主唔好再設下年齡同埋其他門檻，自己人隊死自己人，因為每一個人都會老，但生活仍是要繼續。

題外話，榮幸獲JobsDB邀請寫專欄，因為某啲原因，呢次合作遲咗接近一年先至出現，第一炮寫咗個關於年齡歧視嘅真實個案，希望大家都會慷慨喺以下連結畀個Like，等JobsDB知道搵聶瞳寫嘢永遠都唔會太遲，感謝每一位！

https://www.facebook.com/41777525504/posts/10156400291355505