【腕錶】IWC推三款美軍飛行中隊特別版陶瓷計時腕錶 IWC與英國空軍嘅聯繫相信大家都耳熟能詳，而品牌自2018年起亦獲美國軍方准許，為美國海軍及海軍陸戰隊航空部隊現役及非現役近350個中隊製作腕錶，當中甚至有以中隊隊徽為靈感、只限成員擁有的「中隊特別版」。而品牌最新推出嘅三款計時腕錶，就係再以呢啲「中隊特別版」製成。 三款特別版以三個中隊為主題，分別為駐紮於日本岩國空軍基地、第5航母聯隊成員之一、綽號「Royal Maces」嘅第27攻擊戰鬥機中隊；駐紮於加州Lemoore海軍航空基地、綽號「Tophatters」嘅第14攻擊中隊，以及應該係知名度最高嘅「Blue Angels®」美國海軍戰鬥示範中隊。腕錶的六點位置小錶盤以及底蓋都飾有中隊隊徽，其中「Royal Maces」及「Tophatters」都用上黑色錶殼、錶面，錶冠、秒針、小秒針、日期字樣及錶帶縫線亦用上中隊的代表顏色。 較為特別嘅係「Blue Angels®」，成隻錶都係代表中隊嘅亮藍色，再以黃色作陪襯。 三款腕錶嘅錶殼都以氧化鋯陶瓷製造 (「Blue Angels®」混入氧化金屬以達成藍色)，而按鈕及錶冠則以 IWC研發嘅「瓷化鈦金屬（Ceratanium®）」製成。入面就係IWC自製嘅69380型自製機芯，含導柱輪計時功能，雙向棘爪式上鏈系統提供長 達46小時動力儲備。 資料來源：IWC #腕錶 #IWC #美國海軍

【腕錶】IWC「記仇」之作 Black Flieger 雖然IWC深受錶迷愛戴，但又唔代表佢每一隻錶都一樣咁受歡迎。1994年推出、型號3705嘅陶瓷飛行員計時腕錶「IWC Fliegerchronograph Keramik」雖然係當時首隻枚以黑色氧化鋯陶瓷打造錶殼嘅飛行員計時腕錶，但推出時就賣唔去，幾年間只係賣出1000隻，最後停產收場。 風水輪流轉，廿幾年後嘅今日，當年賣唔去嘅3705因為獲得錶界人士推薦而聲名大噪，IWC亦承勢推出「致敬3705」嘅「Black Flieger」。 當年嘅3705經過年月洗禮，時標及指針變成橙色，配上黑色陶瓷錶殼展現獨特味道，深受錶迷追捧，其中一杖來自品牌前董事嘅3705就曾於拍賣會上以53,750美金賣出。而型號為387905嘅「致敬3705」，就係向呢隻等咗廿幾年先有人賞識嘅前輩致敬之作。錶面佈局基本還原3705，最大分別係原本位於6點位置嘅小時計時盤、同原本位於9點位置嘅秒盤交換位置。 錶殼雖然都係黑色，但物料就由當年嘅氧化鋯陶瓷變成以IWC專利材質「瓷化鈦金屬」，既有鈦金屬嘅輕巧、又有陶瓷嘅堅硬抗刮。錶芯亦由當年嘅Vaijoux 7750換成IWC自家69380自動機芯，提供46小時動力。 講咗咁耐，大家係咪唔知篇文條題會話IWC「記仇」呢？仲記得我話3705當年只係賣咗1000隻嗎？唔知係咁啱得咁橋，定IWC想「紀念」呢個銷售數字，所以「致敬3705」都係限量1000隻，感覺就好似同班錶迷講，當年你哋唔識貨，依家係咪慢慢搶囉——以上對話純屬我個人虛構，不代表其他人真實想法呀下——BTW如果你想搶，記住隻錶係IWC.com獨家發售。 #IWC #腕錶