我爸死後被綁架（上） . 嗰日我去拜山，一路燒紙紮用品比我阿爸，一路講：「阿爸，你喺下面過得點啊？依加燒間大屋畀你......」 . 講講吓，我電話響，我拎部手機出嚟諗住收線，點知手一滑，部手機跌咗落冥鏹桶度。 . 我呆一呆，手機已經燒到有幾分焦黑，睇嚟都唔用得。 . 好彩雲端度有資料備份，反正我本來都想換新手機，我就任由手機被烈火吞噬。 . 「阿爸，我連自己部手機都燒埋畀你啦。」我隨口講，當然我只係講笑。 . ， 但事實證明，說話，真係唔可以亂講。 . 夜晚，我屋企電話響，我隨手拎起電話筒，望向來電顯示，係我嘅手機號碼。 . 我仲未反應得切，電話就傳來阿爸嘅聲音：「阿仔，你近排點啊？」 . 我毛骨悚然，但睇鬼片嘅經驗話我知，如果我Cut線，多數會發生更恐怖嘅事。 . ， 我戰戰兢兢咁問：「你係......阿爸？」 . 我連續問咗幾個只有我哋父子先知嘅祕密，先確定佢係阿爸。 . 我再問：「阿爸，你點解可以打電話？」 . 阿爸把聲好興奮：「你今日燒咗部電話畀我嘛。不過，可能因為部電話係你燒嘅，我打咗幾個陽間嘅電話，剩係打到畀你。」 . ， 我唔係好明，之前我都燒過紙紮手機畀阿爸，仲燒埋大屋，阿爸都無打畀我。 . 「唉，你都識講係紙紮手機，我收到嘅就係一堆紙紮囉，根本用唔到。」 阿爸嘆氣：「你燒嘅係紙，落到地府，點會變成真嘢呢？」 . 我恍然大悟，一般人當然唔會拎真手機去燒，自然唔會收到「地府來電」。 . 咁計法，雖然有啲靈異，但又唔算恐怖。 . ， 我有啲好奇：「地府無手機？」 . 「有，蘋果教主都落咗嚟啦，研發咗『陰phone』。不過地府嘅電話，上唔到陽間嘅網絡，亦聯絡唔到陽間嘅人。」 阿爸愈講愈開心：「有幾個論壇，我生前好鍾意上，依加終於用你部手機上到。」 . ， 阿爸繼續講：「我打電話嚟呢，係有一件事......你可唔可以燒埋個充電器？」 . 幫人幫到底，燒手機都要燒埋充電器，我好爽快咁應承咗。 . 燒咗充電器之後，阿爸又陸陸續續打咗幾個電話嚟，問我要耳機、流動充電器、手機殼...... . 然後，阿爸就少咗打畀我，可能係掛住上網，玩到樂不思蜀。 . ， 直到有一日，我電話響，係阿爸嘅來電顯示。 . 我接電話，隨口問：「阿爸，你點啊？」 . 電話傳來阿爸嘅慘叫聲，近乎聲嘶力竭：「唔好啊！救命，阿仔救我。」 . 然後，係一把陌生嘅男人聲：「你好，我叫龍霸。請去XX墳場『龍霸之墓』，燒廿部最新嘅iphone，我就會放咗你阿爸。」 . ， 阿爸斷斷續續咁講事情嘅經過，原來，阿爸得到咗「通陰陽」嘅手機，沾沾自喜，忍唔住同朋友炫耀。 . 一傳十，十傳百，輾轉之下，地府嘅黑社會龍霸，就帶手下綁架咗阿爸，搶走咗部手機。 . 龍霸並唔滿足於一部手機，所以佢打畀我，用折磨阿爸嚟勒索我，要多廿部手機，分畀手下。 . ， 聽住阿爸嘅慘叫，我又心痛又無助。 . 正常情況下，我應該報警，但我依加可以點做？ 唔通我同警察講，我阿爸俾人綁架，但綁匪同人質都已經死咗？ . 先唔好講警察信唔信，就算警察信我，始終陰陽相隔，都無辦法救到我阿爸。 . 我無可奈何，只可以拎晒所有積蓄，買咗廿部iphone，燒晒畀龍霸，龍霸先放過我阿爸。 . ， 但係無幾耐，龍霸又打畀我，佢食髓知味，要求一百部「通陰陽」嘅iphone。 . 我好嬲：「一百部？你諗住開舖賣手機啊？」 . 「你理得我要嚟做咩。如果你唔滿意嘅，我咪再捉你阿爸嚟『商討』下囉。」龍霸語氣輕蔑。 . 一百部iphone，即係幾十萬，就算我籌到幾十萬，下次龍霸會唔會要一千部？ . 我心裡有一把聲音，其實阿爸已經死咗，人鬼殊途，或者......我唔應該再理呢件事？ 只要我唔聽龍霸電話，佢都無我辦法。 . 但係，阿爸生前咁錫我，唔通我真係任由佢做鬼都受盡折磨？我過唔到自己嗰關。 . 待續... . #短故 #短篇 #小說 #陳美濤 #廣東話 #粵語 #tomatochan #我爸死後被綁架