《香港人很忙》陳心遙
《信報》2018年1月24日《視線所及》專欄

如果話香港人幾乎係全世界最忙都應該冇乜異議，而且我可以肯定，而家嘅香港人比起二三十年前更忙。以前都仲有「蛇王」，老闆要人，但你匿埋咗唔知邊度「吞Pop」，仲可以一收工就「較腳」、「閃人」，就算個天跌埋嚟，老闆都只可以徒嘆奈何，等你聽朝返嚟先算。而家，唔得，香港有全世界最快速嘅無線網絡，手機上有數之不盡即時通訊軟件，你就算走去天腳底，旅行到天涯海角，俾老闆全球24小時on call已經係好多員工嘅基本責任。要逃出生天，下一步應該係上太空。
然後，香港又有全世界大城市之中絕無僅有嘅擠迫。人哋地方夠大，返工放工揸車或者搭鐵路通勤，用一兩粒鐘係常事。香港呢，細，而且有絕對方便嘅24小時無休嘅交通網絡。如果你去醫院見到醫生護士會戥佢哋辛苦，咁你間唔中都應該同情一下自己；因為公司耐不耐就出現超urgent生死存亡嘅case，你都係隨時候命嘅英雄嚟。
咁既然忙係全香港嘅共識，咁到底忙可唔可以成為做錯事嘅理由呢。我當然覺得應該啦！即係如果我唔小心將一個機密email CC晒咗全公司；將supplier嘅報價單當invoice寄咗畀個客；或者出票嘅時候唔小心加多咗個零；呢啲全部都係值得體諒嘅係咪？下次同老闆講「如果呢個係事實，惟有就係事實，我好忙吖嘛。」睇吓之後會點？
然後，你會發覺，「我好忙吖嘛」呢個理由，正如好多其他excuse，譬如「我口快講錯咗」、「我原意唔係咁」、「我警覺性未夠」、「我都係人，太壓抑控制唔到情緒」等等等等，講完之後係咪情有可原，要唔要接受懲罰；關鍵唔在件事，而係在你本人，你萬中無一，骨骼精奇，「犧牲好大去服務社會嘅」，咁咪萬事都係無心之失囉。
所以，唔小心擺咗架滿載紙皮嘅木頭車嘅伯伯，人要拉、車要充公。唔小心攞咗啲印花返屋企但第二朝拎番去嘅嬸嬸，人要炒，長期服務金要取消。唔小心講咗粗口嘅學生，要退出校，兼報警。因為佢哋唔算忙，又唔算有錢，做嘢返學又唔係為咗服務社會，一定係滿腦貪念、生性惰怠、窮兇極惡嘅刁民，罪無可恕，必須從嚴處理。
無論如何，佢哋做過嘅錯違過嘅例犯過嘅法，都會得到大家嘅原諒或者不了了之，全都因為忙，唔係犯錯嘅人忙，係我哋太忙，根本唔得閒理會誰對誰錯，有冇不公不義，有冇破壞制度，通通都因為我哋忙而一筆勾銷。就算唔忙得閒理，又可以點？

#香港人很忙 #信報 #陳心遙